MWAHA WOOSOMIYA 47
Nhihiye nanka itthu yuuhiihakani unvaresesa Yehova!
‘Mi kinookhuluvela weeva Yehova.’—ISAA. 31:14.
NCIPO 122 Vamos Continuar Firmes!
NINHALA WIITTHUCANI? a
1. Nincuwela cani wiira Yehova nopheela wiira nimwaatanane?
YEHOVA naanilattula wiira nimwaatanane. (Tiya. 4:8) Uyo mpheela ukhala Nlukwiihu, Apaapeehu ni Mpatthaniihu? Nincuwela cani iyo itthwiiyo? Yehova nawaakhula ulompa wihu ni naanikavihera yaniphwanyaka masakha. Uyo ciicammo naavarela nteko mphwinkwaawe woothotokanihiya wiira aniitthucihe ni anikhikicere. Vano hiiva? Isiyani ninlamuliyeehu upanka wiira nimwaatanane?
2. Isiyani ninlamuliyeehu upanka wiira nimwaatanane Yehova?
2 Wiira hiiva nimwaatanane Yehova nihaana nanlompaka, nasomaka Ibiiblya ni noopuwelaka citthu cinsomeehu. Napankaka commo, unfenta wihu ni unsukhuru wihu Yehova unaahala winciva ni ninaahala upheela unvaha itthu inomphwanela cinene: umwiiwelela wihu ni unswalela wihu. (Apoka. 4:11) Neekurumicaka uncuwela ratta Yehova, ninaahala utepa unkhuluvela ni ninaahala utepa ukhuluvela mphwinko woothotokanihiya unvarelaawe nteko wiira anikavihere.
3. Isiyani Sotwani impankaawe wiira amananihe unihiiha unvaresesa Yehova, ni isiyani inhala unikavihera uhinhiya Yehova ni uhihiya mphwinkwaawe woothotokanihiya? (Nwehe Isaalimu 31:13, 14.)
3 Masi Sotwani naamananiha unihiiha unvaresesa Yehova venci-venci yanikhumelelaka masakha. Manannani Sotwani cimpankaawe iyo itthwiiyo? Uyo naamananiha uvukula vakaani-vakaani uvukula unkhuluvela wihu Yehova ni ukhuluvela wihu mphwinkwaawe. Masi hi khaninlamuliya unhiyerera Sotwani anihapusaka. Wakhalaka wiira waamini wihu ni unkhuluvela wihu Yehova ukhanle woolipa, khiivo itthu inhala ukhitiri unihiiha unvaresesa uyova ni uvaresesa mphwinkwaawe woothotokanihiya.—Nsome Isaalimu 31:13, 14. b
4. Ninhala wiitthucani nhina ula mwahoola?
4 Nhina ula mwahoola, ninaahala woona marikariko mararu ankhumelela vate nloko neekristau ni atthunaka yaahala uloloviha unkhuluvela wihu Yehova ni ukhuluvela wihu mphwinkwaawe. Manannani ayo marikarikwaayo caahalaaya unihiiha unkhuluvela Yehova, ni isiyani ninlamuliyeehu upanka wiira niikhikicere?
YANIKHUMELELAKA MASAKHA
5. Manannani masakha annikhumelela caahalaaya unihiiha unkhuluvela Yehova ni ukhuluvela mphwinkwaawe?
5 Ukati nkiina, otheene cihu anaanikhumelelaka masakha khampa ulupatthiya naamuciihu awula ukumihiya nteko. Ayo masakhaayo pooti unirikihela ukhuluvela mphwinko wa Yehova ni pooti uniiriha uhiya unvaresesa. Manannani. Navirihaka uwakati mwinci naananaka masakha, hiiva pooti uniriipa nrima ni ulolovaca makhuva. Sotwani naavarela nteko nnyo citthunnyo wiira aniirihe uhiya unkhuluvela Yehova. Wootakihera, hiiva pooti wancera wiikoha co: ‘Masi Yehova khweeliini naakifenta? Kiireke wiira ala masakhaala Yehova awula mphwinkwaawe phikumihacale?’ Itthu toko iyo yahowiirannyeela asarayeli yaakhala Wiciipitu. Wiipaceroni, ayo yahokupali wiira Yehova phanthanlale Moceesi ni Arawu wiira aataphule ni aahiihe ukhala ipottha. (Nkw. 4:29-31) Masi wahoolo, uwakati Farawoo waarikarikihalyaawe makhalelwaawe, ayo yahancera umootheriha Moceesi ni Arawu. Ayo yaheera: “[Nyuuva] nhoniiriha uthanyiya ni Farawoo ni uhoolo wa anantekwaawe ni nkhanle khampa nhaavaha ikatana mmatatani waya wiira aniive.” (Nkw. 5:19-21) Ayo yahowootheriha aswali ookhuluvelya a Nluku. Iyo yaari itthu yoohisariya! Wakhala wiira uhovira ukati mwinci nyuuva mwaananaka masakha, isiyani nyuuva inlamuliyeenyu upanka wiira nhihiye unkhuluvela Yehova ni nhihiye ukhuluvela mphwinkwaawe woothotokanihiya?
6. Itthu yaamwiirannyenle porofeeta Habakuki inniitthuciha isiyani? (Nwehe Habakuki 3:17-19.)
6 Munlompe Yehova ninrimeenyu wotheene ni munlepele wuukaviherani. Porofeeta Habakuki yahonkhumelela marikariko menci. Unkhala toko wiira uhaavo uwakati Habakuki wancenryaaya unrika ukupali wiira Yehova khweeliini Yehova aananwacera. Uyo ukatyuuyo, Habakuki ahonlompa Yehova ninrimaawe wotheene ni ahonhimyeera itthu yaamwiira. Habakuki enre co: “Oo Yehova, kinhala wuulepela ukikavihera weeva uhikiiwaka mpaka yaakhani? . . . Nlattuni unhiyaa ukhumelelaka uhuva?” (Habak. 1:2, 3) Yehova ahaakhula ulompa wa Habakuki. (Habak. 2:2, 3) Habakuki ahancera wuupuwela citthu cotheene Yehova caapankenlyaawe apoovwaawe. Upanka commo wahonkavihera uhokoleela ukhala wantteelaka nrima. Habakuki ahooneeha wiira Yehova khweeliini aananwacera ni aanaahala unkavihera waanana khula marikariko yaahala unkhumelela. (Nsome Habakuki 3:17-19. c) Isiyani ineetthuceehu? Yookhumelelakani marikariko, munlompe Yehova munhimyeeraka mananna cineecooneenyu ni munlepele wiira ookavihereni. Pooti wankupaliinyu wiira Yehova naahala wuuvahani ikuru wiira nkhitiri uvilela. Moonaka wiira Yehova ri ni nyuuva, waamini winyu unaahala utepa ukhala woolipa.
7. Isiyani amucyaaya arokorihu Shirley yaamananihilyaaya upanka, masi isiyani arokorihu yaapankilyaaya?
7 Nhihiye upanka citthu cinhala wuukaviherani unvaresesa Yehova. Arokorihu ankhala u Papua-Nova Guiné aneehaniya Shirley yahaakhumelela masakha menci. d Amucyaaya yaari amasikhini ni ukati nkhwaawe waanawaarika cinene uphwanya citthu caapheelaaya toko iyoolya awula ikuwo. Mmucyaaya mmoca ahomananiha uwiiriha arokorihu Shirley uhiya unkhuluvela Yehova. Uyo aawiirenle co: “Nyu nneera wiira nnepa wowaarya wa Nluku unawuukaviherani. Vano nkoonani; unookaviherani manannani? Amuciinyu nanlelo akhanle amasikhini ni nyu nnaarihakaca ukati mwinci nlalyeeraka.” Arokorihu Shirley aheera wiira uyo ukatyuuyo yaheekoha co: ‘Kiireke wiira Nluku khweeliini naakiwacera miiva ni amucyaaka?’ Ni ayo aheera: “Wowaakuvyaaca, mi kahonlompa Yehova ni kahonhimyeera citthu cotheene coopuwelaaka. Akaahiile usoma Ibiiblya, ilivuru cihu, ulalya ni urwaa umikutthaanoni.” Arokorihu yahancera woona wiira Yehova aanawaawacera amucyaaya. Amucyaaya khayaaviriha nihuku woohilya ni waanawaattela nrima. Arokorihu aheera: “Mi kahoona wiira Yehova ahaakhula ulompa waka.” (1 Tim. 6:6-8) Nyuuva mweekurumicaka upanka citthu cinookaviherani umphiyeera Yehova, masakha anookhumelelani khanhala uwiirihani uhiya unvaresesa Yehova.
YALUPATTHIYAKA MAYAMUNNA ANHOOLELA MITEKO CO MUMPHWINKONI WA YEHOVA
8. Isiyani inwiirannyeela mayamunna anhoolela miteko co mumphwinkoni wa Yehova?
8 Nhina ihapari ni nhina redes sociais awula mwinternetini, alupatthiihu anaamwarusela citthu cowoothiya yawuulumaka pusya mayamunna anhoolela miteko co mumphwinkoni wa Yehova. (Isaa. 31:13) Mayamunna akhwaawe anaatthukiya, ni akiina anawootherihiya ukhala atthu oopanka ikhirini. Masi iyo itthwiiyo khinlamuliya unitikhiniha, kontha makristau okhalayi yahaakhumelela itthu toko iyo uwakati apostolu Paulu wootherihiyaawe upanka citthu coohiloka ni waatthukiyaawe. Isiyani ayo makristawaayo yaapankilyaaya?
9. Isiyani makristau akhwaawe yaapankilyaaya uwakati apostolu Paulu waatthukiyaawe?
9 Uwakati apostolu Paulu waatthukiyaawe u Roma, makristau akhwaawe yahohiya unkavihera. (2 Tim. 1:8, 15) Kontha isiyani? Niireke wiira ayo yaanawoona ihaaya nlattu wa Paulu kontha ooniya ukhala nakhirini? (2 Tim. 2:8, 9) Awula niireke wiira ayo atthwaayo yaanawoova ayova ciicammo ulupatthiya? Hataa ukhalaka cani, muupuwele mananna Paulu ciicoonalyaawe uyo ukatyuuyo. Uyo yahonkhumelela marikariko menci ni aholeva ukumyaawe wiira aakavihere ayo mayamunnaayo. (Mite. 20:18-21; 2 Akor. 1:8) Khweeliini, hi khanimpheela waatakiha ale mayamunnaale yaahiyale unkavihera Paulu uwakati waapheelaawe cinene ukaviheriya. Yalupatthiyaka mayamunna anhoolela miteko co mumphwinkoni wa Yehova, isiyani inlamuliyeehu wuupuwela?
10. Isiyani ihinlamuliyeehu uliyala yalupatthiyaka mayamunna anhoolela miteko co mumphwinkoni wa Yehova?
10 Nhiliyale nlattuni hiiva ninlupatthiyeehu ni tipani nhoolela ulupatthiya wihu. Nhina 2 Timotiyu 3:12, Ibiiblya ineera co: Atthu “otheene ale ampheela ukhala yanswalelaka Nluku, wamoca ni Kristu Yesu, ciicammo anaahala ulupatthiya.” Phimaana, hi khaninkhala ootikhinihiya namoonaka Sotwani atepaka waalupattha ale anhoolela miteko co mumphwinkoni wa Yehova. Itthu impheelaawe Sotwani ukhanle waahiiha ayo mayamunnaayo unvaresesa Yehova. Ciicammo, uyo mpheela uniloloviha makhuva ni unoopopihaca.—1 Pet. 5:8.
Hataa ukhalaka wiira Paulu aanootthukiya, Onesíforo aholipa nrima ni ahonkavihera. Ilelo, mayamunneehu ni mayanuunwiihu ciicammo anawaakavihera ale atthukiye khampa cinthoonyeraaya ila ilataratweela (Nwehe iparaagarafu 11-12)
11. Isiyani inniitthucihaaya ntakihero na Onesíforo? (Nwehe 2 Timotiyu 1:16-18.)
11 Nhihiye ukhala ntthu ookhuluvelya ni nhihiye waakavihera mayamunneenyu. (Nsome 2 Timotiyu 1:16-18. e) Khalayi, nkristau mmoca eehaniya Onesíforo khaatakihile makristau yaahiile untakiha apostolu Paulu. ‘[Uyo] khoonale ihaaya nlattu [Paulu] wootthukeliya nkhattya.’ Onesíforo ahontotha Paulu ni ukati wamphanyalyaawe, ahomananiha unkavihera nhina citthu cotheene caapheelaawe. Upanka wawe commo, Onesíforo aholeva ukumyaawe. Iyo itthwiiyo inniitthuciha isiyani? Inniitthuciha wiira khaninlamuliya ukhala owoova cinene mpaka wanhiyeehu waakavihera mayamunneehu anlupatthiya. Uhiya commo, nihaana nimananihaka uwaakiha ni waakavihera nhina citthu cotheene cimpheelaaya. (Miru. 17:17) Ayo anaapheela cinene wiira naathoonyihere nifento ni wiira naakavihere.
12. Isiyani inniitthucihaaya ntakihero no mayamunneehu ni mayanuunwiihu ankhala u Rússia?
12 Moone itthu inaakhumelela mayamunneehu ankhala u Rússia. Ayo khanhiya waakavihera mayamunnaaya ni mayanuunwaaya atthukeliye mmakhattya. Ukati mayamunna akhwaawe unrwaaniyaaya utiripunaali wiira ahukhumwiye, mayamunneehu ni mayanuunwiihu akhwaawe anawiikurumica urwaa utiripunaali wiira yakhale nkhayi naayo. Iyo itthwiiyo inniitthuciha isiyani? Mayamunneehu anhoolela miteko co mumphwinkoni wa Yehova yatarawaciyaka, yatthukiyaka awula yalupatthiyaka, nhikhale owoova. Mwaalompele, mwaakavihere waawacera amucyaaya ni muupuwele citthu cikhwaawe cinlamuliyeenyu upanka wiira mwaakavihere.—Mite 12:5; 2 Akor. 1:10, 11.
NATARAWACIYAKA
13. Manannani utarawaciya cinhalaaya uniiriha uhiya unkhuluvela Yehova ni uhiya ukhuluvela mphwinkwaawe?
13 Asimuciihu, atthu anaavaraneehu nteko awula anaasomaneehu pooti unitarawaca kontha hiiva ninaalalya moolumo a Nluku ni ninaweettela malamulo a Yehova. (1 Pet. 4:4) Ayo pooti atthunaka uniirela co: “Mi kinaaciveliya niweeva, masi ittiinnya phinkikasiri. Iyo ittiiniiyo khinoohiya upanka hataa itthu ni khinoohiya wiitaphulaka.” Itthu atthu enci intepaaya wuuluma pusya ukhanle ukumihiya ntthu wanlokoni. Ayo aneera co: “Nyu nnolalya wiira nihaana naafentaka atthu, masi munnoona mananna cinontafitiinyu ntthu kumihiye wanlokoni?” Ayo moolumacerwaayo pooti uloloviha waamini wihu mpaka hiiva wancera wuupuwela co: ‘Kiireke wiira Yehova naatepa ukilepela upanka citthu cihinkhitiryaaka? Mphwinko woothotokanihiya wa Yehova uhinihiyaka niitaphulaka vakaani?’ Wakhala wiira iyo itthwiiyo inaawiirannyeelani, manannani cinhaleenyu ukhitiri uhihiya unvaresesa Yehova ni mphwinkwaawe woothotokanihiya?
Apatthani afaalusu a Jó yahomuulumela citthu cowoothiya ni yahontarawaca. Waanookhalaru commo, Jó aholakela uhihiya unvaresesa Yehova. (Nwehe iparaagarafu 14)
14. Isiyani inlamuliyeehu upanka atthu akhwaawe yanitarawacaka nlattu wo weettela malamulo a Yehova? (Nwehe Isaalimu 119:50-52.)
14 Nlakele upanka citthu Yehova cineeraawe wiira phikhanle comaana. Jó khaahiile wiiwelela malamulo a Yehova hataa atarawaciyaka. Mpatthani faalusu a Jó mmoca ahomananiha unkupaliha itthu yowoothiya. Uyo enre wiira Nluku khaawacera wakhala wiira Jó aanaapanka citthu comaana awula coohinamaana. (Jó 4:17, 18; 22:3) Masi Jó khaakupanli iyo itthu yowoothiyeeyo. Uyo aanaacuwela wiira malamulo a Yehova ukati wotheene ankhala omaana ni aholakela weettela ayo malamulwaayo. Jó khaahiyerenre hataa itthu imwiirihaka urukunusa moopuwelelwaawe omaana. (Jó 27:5, 6) Iyo itthwiiyo inniitthuciha isiyani? Nhihiyerere utarawaciya naakhunaninyu uwiirihakani uhaamini malamulo a Yehova. Muupuwele citthu cotheene cuukhumelenleni muukumini winyu. Nyuuva atthunaka nhoona wiira malamulo otheene a Yehova akhanle omaana ni anaaniphwanyiha ifayita. Phimaana, nlakele ukavihera mphwinko woothotokanihiya wa Yehova uneettela sana-saana ayo malamulwaayo. Ni hataa atthu enci yanitarawacaka, hi khaninhala uhiyerera ni khaninhala unhiya hataa ntthu anihiihaka unvaresesa Yehova.—Nsome Isaalimu 119:50-52. f
15. Nlattuni arokorihu Brizit waatarawaciyaaya?
15 Moone itthu yaakhumelenle arokorihu ankhala u Índia aneehaniya Brizit. Ayo yahotarawaciya naasimucyaaya. Ahinaaya upattisiya mwaakha wo 1997, awannyaya yahaari Saahiti a Yehova yahoomoliya nteko. Nlattu wo iyo itthwiiyo, ayo yahaana yathamelaka isittatti ikhwaawe wiira yakhale wapuwani waasithumwanaya. Uphiya waya nwo, arokorihu Brizit yahaakhumelela masankiho makhwaawe ootepa urika. Ukhala wiira awannyaya khayaavara nteko, arokorihu yahaana yavaraka nteko ukhuma uwicisu mpaka uhiyu wiira yaalihere amucyaaya. Ciicammo, Isalau yo Umwene waarwaaya woona mikutthaano yaari uttayi, ikiloometru 350. Wooriipiha nrima, amucyaaya awannyaya yahancera uwuuluma pusya cinene ni waarukunuwela nlattu wo citthu caaminnyaaya. Masakha yaakhumelela yahotepaca cinene mpaka arokorihu Brizit naawannyaya yahaana yathamelaka nipuro nikhwaawe. Vano, ukati wahaawehereraaya, awannyaya yahokhwa. Wahoolo, mwaamwanaya mmoca mwanthiyana ahokhwa nlattu woretta yo cancro ni uyo aarina myaakha 12 paahi. Uhiya commo, amucyaaya arokorihu Brizit yahowiirela wiira nnyo citthunnyo khacaahala uwiirannyeela unari wiira ayo khakhanle Saahiti a Yehova. Nimoolumacero makhwaawe, amucyaaya yaahimya wiira citthu cotheene ceerannyaale nlattu waarokorihu. Masi waanookhalaru commo, arokorihu khayaahiile unkhuluvela Yehova ni uvaresesa mphwinkwaawe.
16. Manannani arokorihu Brizit cicaalihiyaaya nlattu wonvaresesa Yehova ni nlattu woovaresesa mphwinkwaawe woothotokanihiya?
16 Ukhala wiira arokorihu Brizit yaakhala uttayi niwanlokoni, mootoli osirikwiitu mmoca ahaakurumica ulalyeera ncoko waakhalaaya ni upanka mikutthaano wapuwani waya. Wiipaceroni, arokorihu Brizit wahaarika upanka iyo itthwiiyo. Waahookhalaru commo, ayo yaholakela upanka itthu yeereliyaaya. Ayo yaanaarwaa wuulalyaani, yaanaapanka mikutthaano wapuwani waya ni yaanaapanka uswali waamuci naasaanaaya. Isiyani yaakhumelenle nlattu wo iyo itthwiiyo? Ayo yahokhitiri wancera waasomiha Ibiiblya atthu enci, ni enci yaasomihaaya Ibiiblya yahopattisiya. Mwaakha wo 2005, ayo yahancera uvara nteko weepiyoneeru owiicaaverya. Unkhuluvela waya Yehova ni uvaresesa waya mphwinkwaawe wahocaalihiya. Asaanaaya nnaco ananswalela Yehova sana-saana ni ahaavo maloko meeli nipuro naalalyeeraaya arokorihu. Ayo anaakupali wiira Yehova haavaha ikuru caapheelaaya wiira avilele masakha yaakhumelela ni wiira akhitiri uvilela utarawaciya naasimucyaaya.
MUNVARESESE YEHOVA NI NVARESESE MPHWINKWAAWE WOTHOTOKANIHIYA
17. Isiyani inlamuliyeehu ulakela upanka?
17 Sotwani mpheela unikupaliha wiira Yehova naaninyanyala yanikhumelelaka masakha muukumini wihu ni mpheela unikupaliha wiira uvaresesa mphwinko woothotokanihiya wa Yehova unaahala urikarikiha makhalelweehu. Uyo naamananiha unoopopiha yalupatthiyaka, yaruwaniyaka awula yatthukiyaka mayamunna anhoolela miteko co mumphwinkoni wa Yehova. Ni Sotwani naavarela nteko utarawaciya wihu naatthu akhwaawe wiira anihiihe ukhuluvela malamulo a Yehova ni ukhuluvela mphwinkwaawe woothotokanihiya. Masi ninaacuwela sana-saana itapha ca Sotwani ni khaninthepiya. (2 Akor. 2:11) Nlakele ukhotta citthu cowoothiya ca Sotwani ni uhihiya unvaresesa Yehova ni uvaresesa mphwinkwaawe. Nhiliyale wiira Yehova khanhala wuunyanyalani. (Isaa. 28:7) Phimaana, nhihiye hataa itthu iwiirihakani uhiya unvaresesa Yehova!—Aroo. 8:35-39.
18. Ninhala wiitthucani nhina mwaha nkhwaawe unhaleehu usoma?
18 Nhina ula mwahoola, nihoona marikariko menci annikhumelela anweela vate nloko neekristau. Masi unkhuluvela wihu Yehova ni ukhuluvela wihu mphwinkwaawe woothotokanihiya ciicammo pooti uttehiya nhina nloko neekristau. Isiyani inlamuliyeehu upanka wiira naanane ratta ayo marikarikwaayo? Iyo phi itthu inhaleehu wiitthuca nhina mwaha nkiina unhaleehu usoma.
NCIPO 118 Jeová, Pedimos-te Mais Fé
a Wiira nihihiyerere unvaresesa Yehova ala mahuku ookhiceraala, nihaana nankhuluvelaka ni nihaana nikhuluvelaka mphwinkwaawe. Masi Sotwani khanhala uhiya umananiha unkhuluvela wihu Yehova. Nhina ula mwahoola, ninaahala woona citthu tthaaru Sotwani cinvarelaawe nteko wiira anikhitiri ni ninaahala wiitthuca isiyani inlamuliyeehu upanka wiira nihihiye unvaresesa Yehova ni uvaresesa mphwinkwaawe woothotokanihiya.
b Isaalimu 31:13 Kiheewa citthu coohinamaana atthu enci cinoolumaaya; woova uhokiphwanya. Yathukumanaka wiira akuulume pusya, anaavahanaca miruku wiira akiive. 14 Masi mi kinookhuluvela weeva, Yehova. Ni kineera: “Weeva ukhanle Nlukwaaka.”
c Habakuki 3:17 Hataa miri cofiiku cihiyaka uphuwela, ni hataa miri co uva cihikhalanaka mihokorokho; hataa imatta co olivera cihikumihaka hataa itthu, ni hataa cihiruweriyaka icoolya mmamattani; hataa ikhontwaa cimalaka utthawaka mmacicini, ni hataa cihikhalaka imope mapuro waakhalaaya; 18 Hataa yiirannyaaka isiyani, mi kinaahala utthapa nlattu wa Yehova, kinaahala utteeliya nlattu wa Nluku kooponle. 19 Nkhulupale Pwiiya Yehova khanle ikuru caka; uyo naakhaliha inya caka khampa co nacoro ni naahala ukinyakeliha mapuro ooculu.
d Macina makiina ahaakakhanihiya.
e 2 Timotiyu 1:16 Apwiiya awoonele uthunku amuci a Onesíforo, kontha uyo ikwaha cinci ahokilipiha, ni khoonale ihaaya nlattu miiva wootthukeliya nkhattya. 17 Uhiya commo, ukati waaryaawe u Roma, uyo ahokitotha ratta-raatta ni ahokiphwanya. 18 Apwiiya Yehova amoonele uthunku nihuku nowaahukhumu atthu. Ni hataa weeva unaacuwela miteko cinci uyo civanryaawe u Efesu.
f Isaalimu 119:50 Nno phikhanle nimaaliho naka kasankaka, kontha nuulumo naa phinkikhaiha nuukumi 51 Atthu ohinamaana anaakitarawa cinene, masi mi akinhiya weettela nlamulo naa. 52 Kinawuupuwela ihukhumu caa cokhalayi, oo Yehova, ni nnyo cinaakimaaliha.
