Wiira avare nteko urumiyaaya, Anamasoma Ibiiblya yahaana yalipaka nrima. Yahaana yaalalyeeraka atthu “ihapari comaana” ni ciicammo ‘nihuku noorukunuweliya’ atthu oohinamaana.

Amunna John Henry Hoskin yaakhala u Canadá, yahothoonyera ulipa nrima ukati wo wuuluma ihapari hataa yalupatthiyaka. Mwaakha wo 1921, ayo yahomphwanya nswali ottiini metodista. Amunna John yaapacenre woopa mwaha nuuyo nlopwanooyo co: “Nihaana noopelaka mwaha moolumo o mbiiblyani woohaanihana, ni hataa moopuwelweehu yavirikanaka hikhale nhala urusiya nkhunanawe avaanyihaka.” Masi iyo itthwiiyo khayeerannyeele. Amunna John yaheera: “Hiiva naavirihile iminutu vakaani noopaka mwaha ratta, kontha uyo nlopwanooyo wahomphwanya urusiya cinene mpaka waatta nkhoraawe niikuru cinene ni uhaleela vakaani upwesa iviituru.”

Uyo nlopwanooyo ciicammo ahocaca eeraka: “Uhinrweelani uwuulumana mapakawu?” Masi amunna John khayuulumale itthu, ni ukati waakhumaaya nno nipuronno yahoncipwa yuupuwelaka co: ‘Mi kaamuulumana pakawu!’

Waaseele, nswali ottiini metodista waakhanlyaawe naaswali akhunanawe ahowuuluma pusya amunneehu. Amunna John yahottonkaca itthu yaakhumelenle: “Uyo ahaahimyaceraca atthu owakereeca wawe wiira nihuku nookikumanana yahaana yakihuluwaka kontha kaari ntthu owoopiha aawile ile isittattiile ni waakiphwanela woopeliya nikaputthi.” Hataa ukhalaka commo, iyo itthwiiyo khayaawiirihile amunneehu weemesera ntekwaaya woolalyeera ihapari. Phimaana, yahovara ntekwaaya ni yahaaphwanya atthu yaapheela wiiwelela. Amunna John woopuwenlyaaya mananna ceettalyaaya saana ntekwaaya iyo isittattiiyo yaheera co: “Ule phaari phuukati waakeettenlyaaya saana ntekwaaka woolalyeera ihapari. Mpaka ahaavo atthu yaakiirenle co: ‘Mi kinaacuwela wiira nyuuva nrumiya a Nluku!’ ni yaheevaherera ukivaha citthu caapheelaaka.”

Wiira akaviheriye atthu yaakhelela ihapari comaana, Anamasoma Ibiiblya yahotthenkaca nrevistani The Golden Age * (A Idade de Ouro) iporokaraama caakavihera usoma Ibiiblya. Iporokaraama imoca yeehaniya Estudo Bíblico Juvenil. Myaha coolumiya nhina iyo iporokaraameeyo caanaakhalana makoho ayari yaalamuliyaaya waapanka asaanaaya ni waakavihera uphwanya cinaakhuliyaaya mbiiblyani. Nikoho toko nna: “Ibiiblya irina ilivuru kavi?” naaneetthuciha ikhweeli cankaani. Ni nikoho nikhwaawe toko: “Niireke nkristau haana awehereraka  ulupatthiya wanihukuni?” naanawaakavihera amirawo ukhala alalyeeri oolipa nrima.

Iporokaraama ikhwaawe yeehaniya Estudos Avançados no Plano Divino das Eras. Iyo iporokaraameeyo yaapheela waakavihera Anamasoma Ibiiblya yaacuwela cinene myaha ca Nluku ni yahaana makoho oorika waakhuliya yaakumihiya nvoluumeni yoopacera yolivuru Estudos das Escrituras. Atthu enci yaanawiitthuca citthu cinci nhina nnyo iporokaraamannyo. Masi, irevista A Idade de Ouro yo 21 yo Dezembro yo 1921 yahohimya wiira nnyo iporokaraamannyo khacaahala ukumiheriya-tho. Nlattuni?

Mayamunna yaahoolela mphwinko woothotokanihiya wa Yehova ule uwakatyuule yahoona wiira inanna yoomwiitthuciha saana ntthu Ibiiblya waari unsomiha mwaha mmoca khula nkwaha. Phimaana, mweeri wo Novembro wo 1921 yahokumiheriya ilivuru A Harpa de Deus. Ntthu aakhelela iyo ilivurwiiyo ciicammo aanawantikhiya wiira apanke ikuurusu yeehaniya Estudo Bíblico da Harpa. Woopanka iyo ikuuruswiiyo, khula ntthu ahaana asomaka veekha cawe ni wiitthuca mpantta wooluma “utthenkaca wa Nluku wiira aatthuvele apinaatamu nuukumi woohimala.” Iyo ikuuruswiiyo yaapankiya cani?

Ntthu aakhelela ilivuru yonaanaano aanaavahiya ciicammo ikartau yankaani. Iyo ikartawiiyo yaanaahimyaca ipaaginani co nlivuruni ntthuuyo caalamuliyaawe usoma veekha khula isumana. Avirihaka isumana nteru asomaka myaha co nlivuruni, uyo ntthuuyo aanaavahiya ikartau ikiina yaawaana makoho o myaha cisomilyaawe. Ni wiimaleloni ila ikartawiila, yaanahimya ipaagina caahalaawe usoma isumana ikhwaawe.

Mpaka isumana 12, ntthu aakhela ilivuru aanaaveleeliheriya khula isumana ikartau ni mayamunna o classe awula nloko naattamananaawe. Nnyo ikartawunnyo caaveleelihiyaka ni mayamunna owuuluvala awula yahaakhitiri urwaa ulalyeera mmawaani. Wootakihera, arokorihu Anna Katherine Gardner yaakhala ncoko wo Millvale, isittatti yo Pensilvânia, ilapo yo Estados Unidos, yahottonkaca yiiraka: “Anuunu Thayle yaari aretta, masi ukati waakumiheriyaaya ilivuru A Harpa de Deus, ayo yaheevaherera uveleeliha khula isumana ikartau caarina makoho.” Vano namasoma amalihaka upanka ikuurusu, aanaarumiya munna o wanlokoni wiira amwiitthucihe myaha cikhwaawe co mbiiblyani.

Waamanlyaaya mwaakha wo 1921, munna Joseph Franklin Rutherford, ahoveleeliha mmalokoni motheene iwarakha yaahimya co: “Nteko woolalya ihapari co Umwene wa Nluku uvariye nantano phitepale wuunuwa ni waakavihera atthu wiitthuca ikhweeli, uvikana nteko woolalya uvanreehu myaakha uttuli.” Oopuwelaka itthu yaahala uvariya uhoolo, munna Rutherford aheera-tho: “Nanlelo khumala nteko woohala uvariya. Mwaakurumice akhwiinyu uvara ula nteko woocaalihiya ni Nlukuula.” Anamasoma Ibiiblya khweeliini yahotthara iyo ikannweeyo. Ni mwaakha wo 1922, ayo yahothoonyera ulipa nrima ulalya waya venci cinene ihapari co Umwene.