1. Kontha isiyani atthu enci ankhala woohicuwela ittiinini inlamuliyaaya utthara?

ILELO, khacimala ittiini cineehimya ukhala ceekristau ni unswalela ratta Nluku. Hataa phimaana atthu enci khancuwela ittiinini inlamuliyaaya utthara! Ayo atthwaayo anawiikoha: “Ittiini yeekhweeli iri imoca paahi awula cotheene cikhanle ittiini ca Nluku?” Vano hiiva? Ninnokupali wiira citthu cineetthuciheehu cikhanle ikhweeli? Ninnokupali wiira Masaahiti a Yehova phinonswalela Nluku toko cimpheelaawe? Nttwee noopele mwaha citthu cinhala unikavihera ukupali.

2. Kontha isiyani nhina 1 Atesalonika 1:5 apostolu Paulu ahohimya wiira ankupali citthu ceetthucihaawe?

² Apostolu Paulu ankhuluvela wiira citthu caakupalyaawe caari ikhweeli. (Nsome 1 Atesalonika 1:5. *) Uyo khaakupali nnyo citthunnyo nlattu wo wiiwa paahi wiira cikhanle ikhweeli. Paulu aari nlopwana eekurumica usoma ratta Nuulumo na Nluku. Uyo ankupali wiira “Cowantikhiya cotheene ciphattuwale wa Nluku.” (2 Tim. 3:16) Usoma wawe Cowantikhiya Cowaarya, isiyani apostolu Paulu yeetthucilyaawe? Apostolu Paulu ahoonelela ikhweeli coohivaanyihaniya caathoonyera wiira Yesu phiri Mesiya aakhuluvelihiye. Masi ahooleli ottiini o Yuuta khayaawacenre nnyo ikhweelinnyo. Yathoonyeraka ufaalusu waya, ayo yeehimya ukhala ahooleli oothanliya ni Nluku, masi yaapanka citthu conrusa Nluku. (Titu 1:16) Apostolu Paulu khaari toko ayo ahoolelyaayo; uyo khaathanla miphantteni co mbiiblyani caahalaawe ukupali. Aheevaherera wiitthuciha ni weettela “citthu cotheene cinrumaawe Nluku.”—Mite. 20:27, niwehero.

3. Niireke ninhala ukupali wiira nihophwanya ikhweeli wakhalaka wiira ninawaakhuliya makoho otheene arineehu? (Nwehe ikwaaturu ineera “ Miteko ni moopuwelo a Yehova—‘Khacimmala uttonkaciya’”.)

 ³ Atthu akiina anoopuwela wiira ittiini yeekhweeli yaalamuliya waakhula makoho otheene, hataa ni ale ahinaakhuliya mbiiblyani. Masi niireke ayo atthwaayo ahaana isariya? Mmuupuwele apostolu Paulu. Uyo ahaakurumica mayamunna ‘uwehacera saana citthu cotheene;’ masi uyo ciicammo ahohimya wiira cihaavo citthu cahaacuweleehaawe. (1 Atesal. 5:21) Uyo ahantikha co: “Ucuwela wihu khulikanne . . . unkhala khampa ninweha citthunnyo waloolani yo yuuma ihinoonnya ratta.” (1 Akor. 13:9, 12) Apostolu Paulu khaacuwela citthu cotheene, ni hi ciicammo khanincuwela citthu cotheene. Khunakhala wiira apostolu Paulu khiivo yaacuwelaawe; uyo ancuwela ikhweeli cuulupale ca Yehova. Citthu caacuwelaawe cahotosera wiira akhitiri ukupali wiira ahophwanya ikhweeli ca Nluku!

4. Isiyani inhala unikavihera ukhuluvela wiira ninkupali citthu ceekhweeli, ni isiyani inhaleehu woopela mwaha?

⁴ Nihaana nikhuluvelaka wiira citthu cinkupaliihu cikhanle ikhweeli. Itthu inhala unikavihera ukhanle ulattaniha uswali wiitthucihalyaawe Yesu ni citthu cimpankaaya Masaahiti a Yehova ilelo. Nhina ula mwahoola, ninaahala woona wiira makristau eekhweeli (1) khanaaswalela attontto, (2) anaahisimu ncina na Yehova, (3) cinawaacivela ikhweeli ca Nluku ni (4) anaafentana venci.

5. Isiyani Yesu yiitthucihilyaawe nhina mananna onswalela Nluku ratta ni ninhala untakiha cani?

⁵ Yesu aananfenta cinene Nluku. Phimaana answalela Yehova paahi ukati waaryaawe wiirimu ni ciicammo waaryaawe watuninyani. (Luka 4:8) Ni Yesu ahowiitthuciha attharyaawe unswalel Nluku paahi. Yesu ni attharyaawe khayaavarela nteko attontto awula citthu coohemiya ukati wooswali. Ukhala wiira Nluku khanle nnepa awula khanoonya, khaavo ttontto, ilatarato awula itthu  yoohemiya inlamuliyeehu unlattanihera Nluku! (Isai. 46:5) Vano ilatarato awula attontto aatthu aneehaniyaka “attakattiifu”, niireke pooti uswaleliya? Nlamulo nonayeeli naaphwanyannya nhina Malamulo Khuumi a Nluku, nineera: “Uhiipankele ttontto oohemiya, ulattaniheraka itthu iri wiirimu, awula watuniyani va . . . uhikhorome uhoolo waya.” (Nkw. 20:4, 5) Khampa cinthoonyeraaya ala moolumwaala, atthu ampheela unciveliha Nluku khanaaswalela attontto awula ilatarato.

6. Masaahiti a Yehova anaatakiha apani nhina mananna cinswalyaaya?

⁶ Hataa ciicammo anamasoma ihantisi cokhalayi anaacuwela wiira makristau oopacera yanswalela Nluku paahi. Wootakihera, ilivuru imoca ineehaniya Ihantisi yokereeca yeekristau * ineera wiira makristau oopacera “yaanaathanya cinene” uweesa attontto awula ilatarato mapuro yaaswalyaaya. Ilelo, Masaahiti a Yehova anawaatakiha makristau oopacera. Hi khaninswalela ilatarato caatthu anooniya ukhala “attakattiifu” awula attontto o malayikha. Ni hataa ciicammo khaninonswalela Yesu. Ni khanimpanka hataa itthu yaahala uthoonyera wiira ninaaswalela awula uttitthimiha ilapo inkhaleehu. Hataa yiirannyaaka isiyani, hi niholakela wiiwelela moolumo a Yesu, wenryaawe: “Unswalele Yehova, Nlukwaa.”—Mat. 4:10.

7. Masaahiti a Yehova anvirikana cani niittiini cikiina?

⁷ Ilelo, atthu enci unawaacivela waattharatthara ahooleli ottiini anttitthimihiya ni ancuwelaciya cinene. Atthu enci anawaattitthimiha cinene ayo ahooleli ottiinnnyaayo ni mpaka anawaaswalela. Atthu anaacara mmakereeca waya, anaathuma iliivuru caya ni anaavaha micanko cinci wiira akavihere miteko caayo ahoolelyaayo. Atthu enci anaakupali khula itthu inoolumaaya. Ni mpaka unaarika ukupali wiira ayo atthwaayo yanhala ciicammo unttitthimiha Yesu iyo inanneeyo unari wiira ahowa watuninyani va! Masi ale aneettela ittiini yeekhweeli khanaatthara apinaatamu. Khweeli, ninawaahisima ale avahaceriye unihoolela, masi khaninliyala moolumo a Yesu: “Otheene cinyu nkhanle mayamunna.” (Mat. 23:8-10) Hi khaninaaswalela atthu, akhale ahooleli ottiini awula ahooleli osiyaasa co nlaponi. Hi khaninkavihera hataa vakaani miruku caya. Uhiya commo, khanineekelakeliha myaha co ila ituninyeela. Nhina citthu cotheenennyo, unawoonannya wiira ninaavirikana niittiini cineehimya ukhala ceekristau.—Joau 18:36.

8. Nincuwela cani wiira Yehova nopheela wiira ncina nawe nittitthimihiye ni nicuweliye?

⁸ Ikwaha imoca, Yesu aholompa eeraka: “Paapa, nttitthimihe ncina ninyu.” Yesu wenryaawe commo, Yehova ahaakhula wiirimu nincu nowiiwannya eeraka wiira anhala uttitthimiha ncina nawe. (Joau 12:28) Ukati wotheene Yesu waakhanlyaawe watuninyani, ahottitthimiha ncina naathumwaane. (Joau 17:26) Phimaana, makristau eekhweeli ciicammo unawaacivela uromola ncina na Nluku, Yehova, ni uwiitthuciha akhunanaya nno ncinanno.

9. Makristau oopacera yaathoonyenre cani wiira yaanaahisimu ncina na Yehova?

⁹ Utthenkaciya waya khalayi nloko no makristau noopacera, Yehova ‘ahopacera waawacera amalaponi wiira nhina waya atthonkomanihe upoovu unhala ucisa ncina Nawe.’ (Mite. 15:14) Makristau yaakhala ule ukatyuule waanaacivela uromola ncina na Nluku, Yehova, ni waakavihera akhunanaya ucuwela nno ncinanno. Ayo yahoromola nno ncinanno ikwaha cinci ukati waalalyaaya moolumo a Nluku ni wantikhaaya ilivuru co mbiiblyani. * Makristau oopacerra yahothoonyera wiira ayo paahi phaari upoovu weetthuciha ncina na Nluku.—Mite. 2:14, 21.

10. Isiyani inthoonyera wiira Masaahiti a Yehova khweeliini phaapoovu ancisa ncina na Nluku?

¹⁰ Niireke khweeliini Masaahiti a Yehova akhanle apoovu ancisa ncina na Nluku? Muupuwele nnya  ikhweelinnya. Ahooleli ottiini enci anaamananiha cinene uvitha ncina na Nluku. Akhwaawe mpaka ahokumiha nno ncinanno mmabiiblyani citaphulenlyaaya; ni ikwaha cikiina, anawaahiiha atthu uromola nno ncinanno ukati unswalyaaya. * Niireke haavo novaanyiha wiira Masaahiti a Yehova paahi phinttitthimiha ni phinhisimu ncina na Nluku? Khiivo ittiini ikhwaawe inwiitthuciha atthu ncina na Nluku, Yehova, khampa Masaahiti a Yehova cimpankaaya! Pooti waneereehu wiira ninneekurumica uttitthimiha ncina nivahiyeehu, Masaahiti a Yehova! (Isai. 43:10-12) Mpaka nna co, hi nihempirimiri Ibiiblya Tradução do Novo Mundo da Bíblia Sagrada coopwaha 240 milhões. Iyo ikhanle Ibiiblya irina ncina na Nluku, Yehova, mapuro naakumihiyaaya naatthu yaataphulenle Ibiiblya cikhwaawe. Ni ninaapanka ilivuru cinlalyaa ncina na Nluku niiluuka coopwaha 1.000!

11. Makristau eekhweeli anthoonyera cani wiira cinawaacivela ikhweeli ca Nluku?

¹¹ Yesu ahothonyera uncivela cinene ikhweeli cimmuuluma Nluku ni citthu cimpheelaawe waapankela apinaatamu. Yesu aheettela nnyo ikhweelinnyo ni ahowiitthuciha akhunanawe. (Joau 18:37) Atthari a Yesu eekhweeli o ule uwakatyuule ciicammo caanawaacivela cinene ikhweeli ca Nluku. (Joau 4:23, 24) Phimaana apostolu Peturu aheera wiira ukristau ikhanle “iphiro irina ikhweeli.” (2 Pet. 2:2) Makristau oopacera caanaacivela cinene ikhweeli ca Nluku, phimaana khawaarika ukhotta moopuwelo ottiini cowootha, ilema coohinamaana  ni miruku caatthu caavirikana niikhweeli ya Nluku. (Akol. 2:8) Makristau eekhweeli ilelo ciicammo anawiikurumica ‘uhihiya weettela ikhweeli,’ ni wiikurumica ukupali ni weettela paasi citthu cinhimyaaya Nuulumo na Nluku.—3 Jo. 3, 4. 

12. Mayamunna anhoolela nloko nihu neekristau yoonaka wiira ahaana yapankaka marukunuso, isiyani impankaaya ni nlattuni?

¹² Masaahiti a Yehova khaneehimyahimya ucuwela ikhweeli cotheene co mbiiblyani. Ukati nkiina anaavonyaka utaphulela iveerusu yo mbiiblyani awula uvaha malakihero o mananna oovariya miteko wanlokoni. Iyo itthwiiyo khinlamuliya unitikhiniha. Kontha Ibiiblya ineera wiira ucuwelaca unvira wincivaka vakaani-vakaani. (Akol. 1:9, 10) Yehova nonithoonyera ikhweeli vakaani-vakaani ni hiiva nihaana nikupaliki uweherera mpaka wanhalaawe unithoonyera ikhweeli sana-saana. (Miru. 4:18) Mayamunna avahaceriye uhoolela yoonaka wiira yahovonya itthu, ayo anaapanka marukunuso woohipica. Iyo itthwiiyo khaninoona yiirannyaaka mmattiini cowootha. Ikwaha cinci, ahooleli o nnyo ittiininnyo ampanka marukunuso anhala waacivela atthu anaaswalanaaya wiira yaatteelihe nrima awula wiira acuweliye ntuninyani motheene. Masi mphwinko woothotokanihiya wa Yehova umpanka marukunuso wiira unikavihere ulipiha upatthaniihu ni Nluku ni wiira nitthare ratta uswali wiitthucihalyaawe Yesu. (Tiya. 4:4) Hi khanimpanka marukunuso nlattu woopheela utthara makhalelo ophiyaaru ntuninyani awula nlattu wookhanyererihiya naatthu, masi nlattu wo wiiweeha saana Ibiiblya. Hi cinaanicivela cinene ikhweeli ca Nluku!—1 Atesal. 2:3, 4.

13. Ikhaleloni yuulupale yaathoonyeraaya khalayi makristau eekhweeli ni Masaahiti a Yehova anthoonyera cani iyo ikhalelweeyo?

¹³ Makristau oopacera yahaana makhalelo menci, masi ikhalelo yuulupale cinene yaarinaaya naari nifento. Yesu heera: “Nlattu woofentana atthu otheene anaahala ucuwela wiira nyuuva nkhanle attharyaaka: mwafentanaka.” (Joau 3:34, 35) Ilelo, Masaahiti a Yehova ntuninyani motheene anaafentana ni anawiiwanana. Hi ninaavirikana naatthu ottiini cikhwaawe. Ni hataa nikhalaka ilapo coovirikanaca ni nikhalanaka ilema coovirikanaca, nikhanle amuci owiiwanana. Ninaakhitiri woona nno nifento neekhweelinno mmamikutthaanoni ni mmakonkereesuni cihu. Woona nno nifentonno unaatepa unikupaliha wiira Yehova unancivela uswali wihu.

14. Toko cinhimyaaya Akoloso 3:12-14, manannani ninlamuliyeehu uthoonyerana wiira ninaafentana?

¹⁴ Ibiiblya ineera: “Mooniherane nifento nuulupale.” (1 Pet. 4:8) Inanna imoca yoothoonyera nno nifentonno ukhanle ulevelelana ni uvilelana citthu cinvonyeehu. Hiiva ciicammo pooti waameela irineehu awula uwaakhelela mmawannyihu mayamunneehu o wanlokoni, hataa ni ale anipankile itthu ihinicivenle. (Nsome Akoloso 3:12-14. *) Nafentanaka cinene ninthoonyera wiira hiiva makristau eekhweeli.

15. Isiyani-tho inthoonyera wiira uswali wihu unaatthara uswali wo makristau oopacera?

¹⁵ Cihaavo citthu cikhwaawe cinthoonyera wiira uswali wihu nimpanka khampa caaswalyaaya makristau oopacera. Wootakihera, mumphwinkoni wihu ahaavo mamootoli osirikwiitu, mahumu ni arumiya o wanlokoni—khampa caaryaaka ukati wo makristau oopacera. (Afili. 1:1; Titu 1:5) Uhiya commo, mananna cinwehereehu uraruwa, uthelanaca, iphome, waakumiha wanlokoni ale anvara matampi woohittharuwa wiira nikhikicere nloko—citthu cothenennya ninwehera khampa caaweheraaya makristau oopacera.—Mite. 15:28, 29; 1 Akor. 5:11-13; 6:9, 10; Mabere. 13:4.

16. Efesu 4:4-6 inniitthuciha isiyani?

 ¹⁶ Yesu aheera wiira yanhala ukhumelela atthu enci yaahala wiihimya ukhala attharyaawe, masi kahi wiira otheene yaahala ukhala attharyaawe eekhweeli. (Mat. 7:21-23) Ibiiblya ciicammo ihohimya wiira mahuku ookhicera atthu enci yaahala ukhala “owiipanka unswalela Nluku masi ooheettela impheelaawe.” (2 Tim. 3:1, 5) Masi Ibiiblya inaahimya sana-saana wiira uri “waamini umoca” paahi unoncivela Nluku.—Nsome Efesu 4:4-6. *

17. Ittiinini inontthara Yesu ni impanka uswali weekhweeli?

¹⁷ Ittiinini ikhanle yeekhweeli ilelo? Nhina ula mwahola, nihoopela mwaha citthu cinci cinithoonyenre ittiini yeekhweeli. Niheetthuca uswali wiitthucihalyaawe Yesu waatthanryaaya makristau oopacera. Phimaana waakhuliya waya nno nikohonno phi co: Masaahiti a Yehova phi ittiini yeekhweeli. Ikhanle iparakha yuulupale ukhala wamoca naapoovu a Yehova ni ucuwela ikhweeli ca Nluku ni citthu cimpheelaawe waapankela apinaatamu! Otheene cihu nikhuluvele wiira citthu cinkupaliihu cikhanle ikhweeli.