Kontha isiyani asarayeli yaanaarwaa ukhottoni masi hiiva kaninrwaa?
“AKHUMELELA ntthu mmoca nohala ukhotta urwaa ukhottoni wiira naattakanane ilapo yo França awula yo Inglaterra, otheene cinyu ninaawiivakacani!” Iyo phi itthu nhooleli mmoca o paritiitu Nazi yahimyenryaawe ikhurupu yo Masaahiti a Yehova ukati yalavaniyaya ikhotto yonaayeli yo ntuninyani. Anatoropa o paritiitu Nazi yaheetthenkaca wiira awiivakace ale yaahala ukhotta urwaa ukhottoni, masi khaavo Saahiti a Yehova aahiile waamini wawe. Ayo khweeliini yaholipa nrima! Nno ntakiheronno ninaathoonyihera sana-saana mananna hiivano Masahiti a Yehova cinwehereehu uyo mwahooyo. Hi khaninkavihera ikhotto co ila ituninyeela. Haata noopopiheriyaka wiiviya, hi ninaakhotta wiikelakeliha ikhotto co ntuninyani.
Masi, ahaavo atthu aniiciirela makristawu ahinoopuwela ayo manannaayo. Ayo atthwaayo anawaamini wiira nkristawu pooti waakiha ilapwaawe ni haana apankaka iyo itthwiiyo. Ayo anoopuwela co: ‘Asarayeli yaari apoovu a Nluku ni yanaarwaaka ukhottoni. Vano nlattuni makristawu ilelo uhinlamuliyaaya upanka iyo itthwiiyo?’ Nnari nyuuva, mwaahala waakhula cani? Wiira mwaakhule, nhaana mpaceraka unhimyeera ntthuuyo wiira makhalelo aasarayeli anaavirikana ni maakhalelo aapoovu a Nluku o mahukhwala. Nttwee noone mananna mathanu cinvirikanaaya.
1. APOOVU A NLUKU OTHEENE YAAKHALA ILAPO IMOCAARU
Khalayi, Yehova ahaathukumaniha apoovwaawe otheene nhina ilapo imoca paahi, Isarayeli. Uyo aawiihanne asarayeli “atthwaaka ootthuniya iriyari yaapoovu otheene.” (Nkwa. 19:5) Nluku ciicammo ahaathanlela apoovwaawe ilapo waahalaaya ukhala. Phiimaana, Nluku aarumaka apoovwaawe urwaa ukhottoni wiira yaattakanane ilapo cikhwaawe, ayo khayaahala uwaattakanana mayamunnaaya awula atthu akhwaawe yanswalela Yehova. *
Ilelo, ale anonswalela Yehova akhanle atthu “olapo, o mahimo, o maloko ni oluuka cotheene.” (Apoka. 7:9) Unari wiira apoovu a Nluku yaanaarwaa ukhottoni waattakanana ilapo cikhwaawe, ayo yaanaahala uwaattakanana awula uwiiva mayamunnaaya.
2. YEHOVA AANAWAARUMA ASARAYELI URWAA UKHOTTONI
Khalayi, Yehova aanaalakela ukatini ni nlattuni asarayeli waalamuliyaaya urwaa ukhottoni. Wootakihera, Nluku ahowiirela asarayeli wiira yaahukhumu apoovu o Kanaa. Ayo apoovwaayo yaacuweliya ukhala atthu yaaswalela maciini, yaapanka urupihana woohiloka ni yaapaha asaanaaya wamooroni. Ciicammo, apoovu o Kanaa yaakhala ilapo Nluku yakhuluvelihalyaawe waavaha apoovwaawe. Phimaana, Yehova ahaaruma waamalamaliha ayo apoovwaayo, wiira citthu coohinamaana caapankaaya cihaahapuse aswalyaawe. (Lev. 18:24, 25) Haata ukati asarayeli yaakhalaaya ilapo yaakhuluvelihiyaaya, Nluku aanawaatthuniheera urwaa waattakanana ilapo cikhwaawe. (2 Sam. 5:17-25) Masi khuuvo ukati Yehova waatthunihenryaawe asarayeli ulakela asineennyaaya urwaa ukhottoni. Yalakelaka veekhacaya urwaa ukhottoni, khiivo yaaweettela saana.—Manu. 14:41-45; 2 Ikor. 35:20-24.
Ilelo, Yehova khanaatthunihera apinaatamu urwaa ukhottoni. Ilapo co ntuninyani cinrwaa ukhottoni nlattu wo citthu cimpheelaaya, kahi nlattu wa Nluku. Nnyo ilaponnyo cinaattakana nlattu woopheela wuncerera ncokwaaya, wiira cithaciri awula wiira caakihere myaha caya cosiyaasa. Masi ahaavo atthu aneera wiira anrwaa ukhottoni kontha ampheela waakihera ncina na Nluku, ukhikicera ittiinnyaaya awula waamalamaliha awanani a Nluku. Niireeke wiira ayo atthwaayo ahaana isariya? Yehova nohala waakhikicera aswalyaawe eekhweeli ni waamalamaliha awanannyaawe wahoolo, ukhottoni yo Harmacetom. (Apoka. 16:14, 16) Waphiyaka uyo ukatyuuyo, anatoropa a Nluku anhala ukhala malayika, kahi apinaatamu anonswaleela.—Apoka. 19:11-15.
3. ASARAYELI KHAYAWIIVA ATTHU YAAMWAAMINI NLUKU
Niireke wiira ikhotto co mahukwaala cinawaakhikicera atthu arina waamini khampa Yehova cankhikicenryaawe Raabi ni amucyaawe u Jericó?
Khalayi, anatoropa o Isarayeli ikwaha cinci yaanaawoonela uthunku atthu yaathoonyera umwaamini Nluku, masi yaawiiva paahi atthu Yehova yaalakelaawe wiira yahaana yeeviyaka. Moone matakihero meeli. Yehova ahoruma wiira isittatti yo Jericó imalamalihiye, masi asarayeli khayaamwiivale Raabi naasimucyaawe nlattu wo waamini waathoonyihenryaawe. (Jos. 2:9-16; 6:16, 17) Wahoolo, isittatti yo Gibeau khayaamalamalihiye kontha atthu o iyo isittattiiyo yahothoonyera unhisimu Nluku.—Jos. 9:3-9, 17-19.
Ilelo, ilapo carwaaka ukhottoni khacinaathanla atthu ammwaamini Nluku wiira ahiiviye, ni ikwaha cikhwaawe atthu oohittheka anawiiviya mmakhottoni co ntuniyani.
4. ASARAYELI YAHAANA YATTHARAKA MALAMULO OOKHOTTONI A NLUKU
Khalayi, Yehova aanawaaruma asarayeli weettela malamulwaawe yarwaaka ukhottoni. Wootakihera, ukati nkhwaawe Nluku aanaawiirela wiira yahaana yapankaka nleehano no nnema niisittatti yaawanannyaaya. (Deut. 20:10) Yehova ciicammo aapheela wiira anatoropa asarayeli ahipanke citthu cootakhala ni arattele mapuro yaalukamaaya. (Deut. 23:9-14) Wootakihera, anatoropa olapo cikhwaawe ikwaha cinci yaanawaatuphelaka athiyana mapuro yaarwaaya waana ikhotto, masi Yehova aanawaakhottiiha asarayeli upanka iyo itthwiiyo. Masi, yapheelaka unthela nthiyana olapo yaarwaalyaaya waana ikhotto ni yaatthemalyaaya, yahaana yawehereraka uvira mweeri mmoca.—Deut. 21:10-13.
Ilelo, ilapo cinci cihopanka maleehano wiira ceettele malamulo carwaaka ukhottoni. Ayo malamulwaayo ampankiya wiira akhikiceriye atthu ni ahipankiye citthu cootakhala naanatoropa, masi ikwaha cinci ayo malamulwaayo khaneetteliya.
5. NLUKU AANAWAAKIHA ILAPO YAAPOOVWAAWE
Niireke wiira mahukwaala Nluku nawaana ikhotto naapinaatamu toko caawaakihalyaawe asarayeli u Jericó?
Khalayi, Yehova ahowaakiha asarayeli. Ikwaha cinci, uyo ahopanka miiriirya ceekhweeli ni waakavihera apoovwaawe utthema ikhotto caanaaya. Wootakihera, manannani Yehova caakavihenryaawe asarayeli utthema isittatti yo Jericó? Apoovu yahopanka itthu yaarumiyaaya ni Yehova. “Uwakati waakhuwenlyaaya cinene, imuuru cosittatti cahomaruwela vathi.” Iyo itthwiiyo yahaakavihera asarayeli utthema iyo isittattiiyo. (Jos. 6:20) Vano asarayeli yaakhitinri cani waatthema maamorewu? “Yehova ahaamorihela maluku moolupale . . . Ni khweeliini, atthu yaakhwile nlattu wo ayo malukwaayo phaari enci waavikana atthu asarayeli yaawiivalyaaya niikatana.”—Jos. 10:6-11.
Ilelo, khiivo ilapo Yehova inaakihaawe va watuninyani va. Umwene wa Nluku urina Yesu khampa mwennyaaya “khumpanka mphantte wo ila ituninyeela.” (Joau 18:36) Masi, Sotwani phinhoolela ikuvernu ca apinaatamu. Ikhirini cimpankiya mmakhottoni co ntuninyani cinthoonyera wiira Sotwani khanle ntakhali.—Luka 4:5, 6; 1 Jo. 5:19.
MAKRISTAU EEKHWEELI AKHANLE ANANNEMA
Khampa niiwaleehu, mananna cinkhaleehu ilelo anaavirikana nimakhalelo yaarinaaya asarayeli. Masi uhookhalaru ukati woovirikanaca, khinakhala itthu imoca paahi inniiriha hiivano uhirwaa ukhottoni. Wootakihera, Nluku ahohimya wiira ale anhala wiitthucihiya nuuyova ‘khayaahala wiitthuca ikhotto’ ni khayaahala urwaa ukhottoni. (Isai. 2:2-4) Uhiya commo, Yesu aheera attharyaawe ‘khanhala upanka mphantte wotuninya’ awula khayaahala wiikelakeliha ikhotto co ntuninyani.—Joau 15:19.
Masi Kristu ciicammo ahaakurumica attharyaawe upanka citthu cikhwaawe. Uyo ahowiitthuciha wiira ahikhalane makhalelo aahala uwiiriha ukhalana nruukwa, uviruwa ni urwaa ukhottoni. (Mat. 5:21, 22) Uyo ciicammo, ahowiitthuciha attharyaawe ukhala “anannema,” awula umananiha ukhalana nnema naakhunanaya ni waafenta awanannyaaya.—Mat. 5:9, 44.
Nyuuva nneecoona cani? Pooti ukhalaka wiira hi khaninoopuwela urwaa ukhottoni. Masi niireke wiira nyuuva wanrimani winyu nhaana nruukwa ninhala uwiirihani unyakulihana nimayamunna awula ukawaniha nloko. Nihaana niikurumicaka wiira nihikhalane ayo makhalelwaayo.—Tiya. 4:1, 11.
Hiivano khanineekelakeliha ikhotto ca apinaatamu. Uhiya commo, ninawiikurumica wiira nikhalane nnema ni nifento naakhunanihu. (Joau 13:34, 35) Hiivano niholakela uhipanka mphantte wo ntuninyani mpanka nihuku Yehova ninhalaawe umaliha ikhotto cotheene ntuninyani.—Isaa. 46:9.
^ Ukati nkhwaawe, mahimo o Isarayeli yanawaattakanaka yaayoru. Masi iyo itthwiiyo yaananrusa Yehova. (1 Mam. 12:24) Waanookhalaru commo, ikwaha cikhaawe Yehova khaawaateeliha apoovwaawe nnyo ikhottonnyo. Uyo aapanka commo kontha mahimo makhwaawe atthunaka yaanoohiya umwiiwelala awula yaanoovara matampi moolupale.—Masuw.20:3-35; 2 Ikor. 13:3-18; 25:14-22; 28:1-8.
