MWAHA WOOSOMIYA 41
Nyuuva pooti uphwanya utteeliya weekhweeli
“Ootteeliya phi ule nomoova Yehova ni neetta mmittalani cawe.”—ISAA. 128:1.
NCIPO 110 “Utteeliya unkhuma wa Yehova”
NINHALA WIITTHUCANI? *
1. Isiyani hiiva impheeleehu cinene ni manannani iyo itthwiiyo cinvaranacaaya nuutteeliya?
UTTEELIYA weekhweeli khunakhala ukhala nithyaathyaaka ukati vakaani paasi muukumini wihu. Aacaka utteeliya, Yesu aheera co ukati waataphulelaawe mwaha umwaakoni: “Ootteeliya phaale ancuwela wiira ahaana yancuwelaka Nluku.” (Mat. 5:3) Phimaana, hiiva pooti wankhaleehu ootteeliya muukumini wihu motheene. Masi ninhala ukhitiri cani? Yesu ancuwela wiira apinaatamu yumpiye wiira apheele cinene uncuwela ni unswalela Mpattusi, Yehova Nluku. Ni ukhala wiira Yehova khanle “Nluku ootteeliya,” ale anonswalela ciicammo pooti ukhitiri ukhala atthu ootteeliya.—1 Tim. 1:11.
2-3. a) Toko cinthoonyeraaya moolumo a Yesu, phaapani ciicammo ankhalana utteeliya weekhweeli? b) Citthuni cinhaleehu wiitthuca nhina ula mwahoola ni manannani nnyo citthunnyo cinhalaaya unikavihera?
2 Niireke wiira hiiva ninhala ukhala ootteeliya paahi canikhumelelaka citthu comaana muukumini wihu? Mena. Yesu ahooluma itthu yootikhiniha. Uyo enre wiira “ale anonla”—nlattu wo matampyaaya awula nlattu wo masakha anaakhumelela muukumini waya—pooti ukhala ootteeliya. Ni Yesu aheera wiira “ale anlupatthiya nlattu wo weettela isariya” ni “anruwanakaciya” nlattu wookhala atthari a Kristu ciicammo pooti ukhala ootteeliya. (Mat. 5:4, 10, 11) Masi manannani cinhaleehu ukhala ootteeliya hataa canikhumelelaka nnyo citthunnyo?
3 Yesu aapheela uniitthuciha wiira utteeliya weekhweeli khunniphwanya nlattu woonikhumelela citthu comaana muukumini wihu. Masi hi ninkhalana nwo utteeliyanwo nlattu wo wiikurumica uncuwela ni umpatthanana Nluku. (Tiya. 4:8) Manannani cinhaleehu upanka iyo itthwiiyo? Nhina ula mwahoola, ninaahala woona citthu tthaaru cinhala unikavihera uphwanya utteeliya weekhweeli.
NLYE IYOOLYA YO MMINEPANI
4. Itthuni yoopacera ninlamuliyeehu upanka wiira niphwanye utteeliya weekhweeli? (Nwehe Isaalimu 1:1-3.)
4 ITTHU YOOPACERA: Wiira niphwanye utteeliya weekhweeli, nihaana niilihaka iyoolya yo mminepani. Apinaatamu ni inama ahaana yalyaaka wiira akhitiri ukhala nuukumi. Masi apinaatamu paahi phinlamuliya ulya iyoolya yo mminepani. Hi nihaana niikurumicaka wiira nihihiye ulya iyoolya yo mminepani. Hataa phimaana Yesu wenryaawe co: “Pinaatamu khanlamuliya ukhala akhuuraka iphaawu paasi, masi haana eewelelaka moolumo otheene ankhuma wa Yehova.” (Mat. 4:4) Phimaana, khaninlamuliya uviriha nihuku nimoca woohisoma Nuulumo na Nluku, Ibiiblya. Nasaalimu aheera: ‘Ootteeliya khanle nlopwana ninoncivela nlamulo na Yehova ni nosoma nno nlamulonno uthana nuuhiyu.’—Nsome Isaalimu 1:1-3. *
5-6. a) Citthuni cineetthuceehu mbiiblyani? b) Manannani usoma Ibiiblya cinnikaviheraaya?
5 Mbiiblyani, Yehova naanihimyeera citthu cinci ninlamuliyeehu upanka wiira nikhale unitteelaka nrima. Wootakihera, hi ninawiitthuca nlattuni unumpalyaawe, manannani ninlamuliyeehu umphiyeera ni itthu inlamuliyeehu upanka wiira anilevelele itampi cihu. Ciicammo ninawiitthuca niweherero nomaana ninivahilyaawe. (Jer. 29:11) Nasomaka Ibiiblya ni neetthucaka nnyo ikhweelinnyo, ninaakhala ootteeliya nrima cinene wanrimani wihu!
6 Ibiiblya ciicammo ihaana ikano cinci cinnikavihera muukumini wihu. Neettelaka nnyo ikanonnyo, ninaakhitiri uphwanya utteeliya weekhweeli. Khula ukati unkhaleenyu ooriipiya nrima nlattu wo masakha anookhumelelani, mwiikurumice usoma Nuulumo na Yehova ni wuupuwela itthu inhimyaaya. Yesu aheera: “Ootteeliya phaale aneewelela nuulumo na Nluku ni aneettela!”—Luka 11:28.
7. Isiyani inlamuliyeenyu upanka wiira nvarele nteko ratta ukati unkhaleenyu nsomaka Ibiiblya?
7 Ukati woosoma Nuulumo na Nluku, nkumihe ukati wiira muupuwele itthu insomeenyu. Muupuwele nna ntakiheronna: Nyuuva nhaapyeeliya iyoolya inoocivani cinene. Masi, nlattu wookhala niiwasiwaasi, nyuuva nnomakela umiryakaca paahi, woohitaphwela. Mwamalihaka ulya, nyuuva nnawoonelela wiira mwaanootepa waakuvihaca cinene ni nnawuupuwela wiira phataari nnalyaale woohaakuvyaaca wiira moone uciva. Nyuuva nhopaca usoma Ibiiblya mwaakuvyaacaka ni wahoolo woonelela wiira khayuucivaleni iyoolya yo mminepani yuutthenkacenryaaweni Yehova? Nkumihe ukati wiira wuuciveni usoma winyu Ibiiblya. Ukati woosoma, muupuwele citthu ceerannya, mmananihe uviriyana citthu caaruma ni macu aatthu ni muupuwele cinene citthu cotheene cinsomeenyu. Upanka commo, unaahala wuutteelihani nrima cinene.
8. Manannani “ipottha yookhuluvelya ni yankhili” invaraaya nteko uvahaceriyaaya ni Yesu? (Nwehe ciicammo niwehero.)
8 Yesu hothanla “ipottha yookhuluvelya ni yankhili” wiira initthenkacere iyoolya yo mminapani ukati umpheeleehu, ni hi ninaalihiya sana-saana iyo iyoolyeeyo. * (Mat. 24:45) Itthu yuulupale inkela nhina iyoolya yo mminepani intthenkaceriyeehu ikhanle Ibiiblya. (1 Atesal. 2:13) Iyo iyoolyeeyo inaanikavihera wiitthuca moopuwelo a Yehova. Phimaana nineekurumiceehu usoma irevista Ukhalenla ni Despertai!, ni myaha cinkumiheriya nsayitini jw.org. Hi ninawiitthenkaca nihinaaya urwaa woona khula nkutthaano ni ninawoona iporokaraama yo khula mweeri yo JW Broadcasting®. Nalyaaka iyoolya yo mminepani, iyo iyoolyeeyo inaahala unikavihera upanka itthu yonayeeli inhala uniphwanyiha utteeliya weekhweeli.
MWEETTEELE MALAMULO A YEHOVA
9. Itthuni yonayeeli inlamuliyeehu upanka inhala uniphwanyiha utteeliya weekhweeli?
9 ITTHU YONAYEELI: Wiira niphwanye utteeliya weekhweeli, nihaana neettelaka malamulo a Yehova. Nasaalimu hantikha co: “Ootteeliya phi ule nomoova Yehova ni neetta mmittalani Cawe.” (Isaa. 128:1) Umoova Yehova maanaaya isiyani? Maanaaya wiira unhisimu cinene ni wiikurumica uhipanka citthu cinonrusa. (Miru. 16:6) Phimaana, ukati wotheene hi ninawiikurumica wiiwelela malamulo a Yehova anhimya citthu comaana ni coohinamaana amphwanyannya mbiiblyani. (2 Akor. 7:1) Ninaahala ukhala ootteeliya nrima cinene napankaka citthu Yehova cinoncivela ni nakhottaka citthu cinonrusa.—Isaa. 37:27; 97:10; Aroo. 12:9.
10. Toko cinthoonyeraaya Arooma 12:2, isiyani ninlamuliyeehu upanka?
10 Nsome Arooma 12:2. * Ntthu pooti ucuwela wiira Yehova haana ukhulupale woohimya isiyani ikhanle itthu yomaana ni yoohinamaana. Masi uyo ntthuuyo ciicammo haana apheelaka wiiwelela malamulo a Nluku. Wootakihera, ntthu pooti ucuwela wiira akhulupale ookuvernu ahaana isariya yoohelela mpika mananna ntthu cinlamuliyaawe weettiha ikaaro mparapaarani. Masi uyo ntthuuyo pooti uhipheela wiiwelela nno nlamulonno. Nlattu wo iyo itthwiiyo, uyo atthunaka naahala utthawiha ikaaro cinene, woohitthara mpika uhelenlyaaya akhulupale ookuvernu. Meettelweehu phinhala uthoonyera wiira khweeliini ninaakupali wiira wiiwelela malamulo a Yehova phi itthu yomaana inhala unikavihera ukhala saana. (Miru. 12:28) Davidi ciicammo phoopuwelaawe. Amwaacaka Yehova, uyo aheera co: “Weeva unaakicuweliha nttala weekumi. Uhoolo waa unaaphwanyannya utteeliya. Utteeliya uri moonwaa wonlopwana mpaka.”—Isaa. 16:11.
11-12. a) Yanikhumelelaka masakha awula nakhalaka ooriipiya nrima, nihaana niivaracaka wiira nihipanke isiyani? b) Manannani Afilipo 4:8 cinhalaaya unikavihera uthanla ratta citthu cinthukeleleehu?
11 Otheene cihu anaanikhumelelaka masakha ni uhaavo ukati unniriipaaya nrima. Uyo ukatyuuyo, hi ninaapheelaka upanka itthu wiira nimalihe iwasiwaasi cihu. Nihaana isariya yowuupuwela, masi ratta! Nihaana niikhikiceraka wiira nihipanke itthu inonrusa Yehova.—Efesu 5:10-12, 15-17.
12 Nhina iwarakha yaawantikhenlyaawe afilipo, apostolu Paulu ahaakurumica makristau uhihiya wuupuwela citthu “cosariya, . . . cowaarya, . . . coofentya [ni] comaana.” (Nsome Afilipo 4:8. *) Nhina iyo iveeruswiiyo, apostolu Paulu khoopenle mwaha citthu cinthukeleleehu, masi itthu ihimyalyaawe inaanikavihera uthanla ratta mathukelweehu. Mmananihe upanka ila itthwiila: Nhinaaya uthanla icipo wiira mwiiwelele, ifiilime wiira moone, ilivuru wiira nsome awula ijogo yoohala uttikha, moone wakhala wiira iyo itthwiiyo inaavaranaca niitthu yantikhiye nhina Afilipo 4:8. Upanka commo unaahala wuukaviherani ucuwela wakhala wiira itthu impheeleenyu uthukelela inancivela Nluku awula mena. Nimpheela wiira makhalelweehu ahivirikanihe malamulo a Yehova. (Isaa. 119:1-3) Napankaka commo, ninaahala ukhalana nrima wootaphuwa wiira nipanke itthu ikhwaawe inhala unikavihera uphwanya utteeliya weekhweeli.—Mite. 23:1.
NHOOLELIHERE UNSWALELA YEHOVA MUUKUMINI WINYU
13. Itthuni yoneeraru inhala unikavihera uphwanya utteeliya weekhweeli? (Nwehe Joau 4:23, 24.)
13 ITTHU YONEERARU: Mwiikurumice wiira nhoolelihere unswalela Yehova muukumini winyu. Yehova khanle Mpattusiihu ni unamphwanela uswaleliya. (Apoka. 4:11; 14:6, 7) Phimaana, itthu yuulupale cinene muukumini wihu ukhanle unswalela Yehova khampa uyova cimpheelaawe, “neettiheriyaka ninnepa ni niikhweeli.” (Nsome Joau 4:23, 24. *) Iyo itthwiiyo maanaaya wiira ukati wonswalela Nluku, nihaana neettiheriyaka ninnepaawe wowaarya ni unswalela wihu uhaana uvaranacaka niikhweeli cimphwanyannya mbiiblyani. Unswalela Yehova inlamuliya ukhala itthu yoopacera muukumini wihu, hataa ukhalaka wiira ilapo inkhaleehu ninaakhottihiya uvara ntekweehu woolalyeera ni uswali. Mayamunna ni mayanuunu oovikana 100 ula ukatyuula ari mmakhattya nlattu wookhala Masaahiti a Yehova. * Hataa ukhalaka commo, ayo unawaatteela nrima nlattu wookhitiri ulompa, usoma Ibiiblya ni uwuulumana akhunanaya yaahimyeeraka myaha ca Nluku ni co Umwennyaawe! Noolumiyaka pusya ni nalupatthiyaka, hi ninaakhala ootteeliya cinene nlattu woocuwela wiira Yehova ri nihiiva ni naahala unitthuvela.—Tiya. 1:12; 1 Pet. 4:14.
NTAKIHERO NOKHWEELI
14. Isiyani yaamwiirannyenle mmirawo mmoca o Tadjiquistão, ni nlattuni?
14 Citthu cokhweeli ciirannyeele cinaathoonyera wiira citthu tthaaru ciitthucaleehu khweeliini cinankavihera ntthu uphwanya utteeliya weekhweeli, hataa yankhumelelaka isiyani. Moone itthu yankhumelenle Jovidon Bobojonov, rina myaakha 19 ni nokhala u Tadjiquistão. Uyo ahokhotta urwaa wiina itoropa; phimaana, nihuku 4 mweeri wo Outubro wo 2019 uyo ahocisiya wapuwani waakhalaawe ni ahokhala myeericene natthukiye ni attarusiyaka khampa nakhirini. Mananna caattarusiyaawe yahohimiya mmahaparini ilapo cinci. Uyo ahaattakaciya naanatoropa yankhanyereriha uwara ikuwo caanatoropa ni ulapha wiira akhale natoropa. Wahoolo, uyo ahohukhumwiya ni ahoveleelihiya nipuro naarwaaniya atthu yaavarihaciya miteko. Wuumaleloni, nhooleli o iyo ilapweeyo ahonlevelela ni ahontthukula nkhattya. Ukati weerannyaaya citthu cotheenennyo, Jovidon khaahiile unvaresesa Nluku ni khaahiile utteeliya nrima. Masi aakhitinri cani? Uyo khaaliyanle wiira ahaana atothaka uncuwela ni unswalela Nluku.
Jovidon khaahiile ulya iyoolya yo mminepani, weettela malamulo a Nluku ni uhoolelihera unswalela Yehova muukumini wawe (Nwehe iparaagarafu 15-17)
15. Manannani Jovidon cahaahiilyaawe ulya iyoolya yo mminepani ukati waaryaawe nkhattya?
15 Ukati waaryaawe nkhattya, Jovidon aheeliha iyoolya yo mminepani hataa hikhalanaka Ibiiblya ni ilivuru cihu. Aakhitinri cani? Mayamunna ni mayanuunu o ncoko waaryaawe yaananrweehela iyoolya ni yaanawantikha iveerusu yo khula nihuku munrupani yanrweehelaaya iyoolya. Ala manannaala, uyo aanaakhitiri usoma Ibiiblya ni wuupuwela itthu yaasomaawe khula nihuku. Waatthukuliyaawe nkhattya, uyo ahaavaha ila ikanweela atthu uhinaaya uttehiya cinene waamini waya. Uyo enre: “Ula ukhanle ukati woovarela nteko ratta utaphuwa urineehu wiira nuncerere ucuwela wihu myaha ca Nluku nisomaka Nuulumo nawe ni ilivuru cihu.”
16. Citthuni Jovidon caahoolelihenryaawe wuupuwela?
16 Munneehu ciicammo aheekurumica weettela malamulo a Yehova. Uhiya ukhala oopuwelaka citthu coohinamaana awula apankaka citthu cootakhala, uyo ahohoolelihera umuupuwela Yehova ni wuupuwela citthu cinoncivela. Jovidon aanaaweha citthu cooreera Nluku cumpilyaawe. Khula nihuku onwaka uwicisu, uyo aanawiiwelela inuni ceepaka. Uhiyu, waanancivela woona mweeri ni itthonttwa. Uyo enre co: “Mi kaanaakhala ootteeliya ni oolipihiya koonaka nnyo itthuvo ca Yehova nnyo.” Khweeliini, nasukhuruku citthu cotheene Yehova cinnivahaawe muukumini wihu ni mminepani, hi ninaakhalana utteeliya weekhweeli. Ni nwo utteeliyanwo unaanikavihera uvilela.
17. Manannani 1 Peturu 1:6, 7 inhalaaya unkavihera ntthu oottehiya khampa Jovidon?
17 Jovidon ciicammo ahohela nipuro noopacera unswalela wawe Yehova. Uyo aanaacuwela wiira ikhanle itthu yofayita uhihiya unswalela Nluku eekhweeli. Yesu aheera: “Yehova, Nlukwaa, phikhanle unlamuliyaa unswalela ni phi mmoca paahi oopheela weeva unvarela nteko wowaarya.” (Luka 4:8) Maseefi ni anatoropa yaapheela wiira Jovidon ahiye weettela ittiinnyaawe. Uhiya upanka commo, uyo aananlompa Yehova uthana nuuhiyu wiira hihiye ukhuluvelya ni waamini waarinaawe. Uhookhalaru wiira aanaahukhumwiya, uyo khaahiyale unvaresesa Yehova. Ni unookhalaru wiira uyo ahokumihiya uwannyawe natthukiye ni eepetthiyaka wiira atthukeliye, vano uyo haana itthu yahaarinaawe khalayi—waamini woovirihiya mwaavi.—Nsome 1 Peturu 1:6, 7. *
18. Ninlamuliya upanka isiyani wiira nikhalane utteeliya weekhweeli?
18 Yehova naacuwela itthu impheeleehu wiira nikhale nitteeliyaka weekhweeli. Wakhala wiira nyuuva nnaatthara citthu tthaaru cimphwanyiha utteeliya weekhweeli, nyuuva ciicammo pooti ukhala ootteeliya hataa yuuphwanyakani masakha moolupale. Ni ciicammo nyuuva nnaahala wiira: “Ootteeliya phaatthu Nlukwaaya khanle Yehova.”—Isaa. 144:15.
NCIPO 89 Nviriyane, mwiiwelele ni ncaalihiye
^ Atthu enci khankhwitiri ukhalana utteeliya weekhweli, khonta antotha citthu cihimphwanyiha nwo utteeliyanwo—uthuka, nsurukhu, ucuwelaciya awula uttitthimihiya. Masi ukati Yesu waaryaawe watuninyani, uyo ahaahimyera atthu isiyani inlamuliyaaya upanka wiira akhalane utteeliya weekhweli. Nhina ula mwahoola, ninaahala usoma citthu tthaaru cinlamuliyeehu upanka wiira niphwanye utteeliya weekhweeli.
^ Isaalimu 1:1 Ootteeliya ntthu hineettela ikano caatakhali, ni hinkelakela iphiro caanamatampi, ni hinonkoma ikharipu caanamatarawa. 2 Masi, itthu inoncivela nikhanle nlamulo na Yehova, ni uyo naasoma nlamulo Nawe woohikumihera ncu nawe vate, uthana ni uhiyu. 3 Uyo nhala ukhala khampa mwiri wowaaliya ninceresere mooloko, mwiri uniima ni uhinnyaala mataakhurwaaya. Yotheene inhalaawe upanka inaahala unkhumela ratta.
^ Nwehe mwaha uneera “Nyuuva munnaakhela iyoolya yo mminepani intthenkaceriyeenyu ‘ukati umpheeleenyu’?” nhina irevista Ukhalenla 15 yo Agosto yo 2014.
^ Arooma 12:2 Ni nhiye utthara meettelo o ula ulumwenkuula, masi nrukunuse meettelweenyu, nrehereryaka moopuwelelweenyu, wiira mwiithoonyere mwaasineeneenyu itthu ikhanle yomaana, yooreera ni yoohipahuwa impheelaawe Nluku.
^ Afilipo 4:8 Vano mayamunna, citthu ceekhweeli cotheene, citthu cofayita cotheene, citthu cosariya cotheene, citthu cowaarya cotheene, citthu coofentyaa cotheene, citthu cinoolumiya ratta cotheene, citthu comaana cotheene ni citthu cimphwanela uttottopeliya cotheene, nhihiyerere wuupuwela nnya citthunnya.
^ Joau 4:23 Masi, unaala uphiya ukati, ni khweeliini uyo ukatyuuyo uhophiya, aswali eekhweeli unrwaaya waaswalela Apaapa ninnepa ni niikhweeli. Kontha Apaapa anawaatotha atthu toko ayo wiira yaaswalele. 24 Nluku khanle nnepa, ni ale anonswalela ahaana yanswalelaka yeettiheriyaka ninnepa ni niikhweeli.
^ Mwapheela ucuweleeha, nkele isayiti jw.org yeekunya ni mphantte untothiya citthu mwantikhe: “Presos por causa de sua fé.”
^ 1 Peturu 1:6 Nlattu wo iyo itthwiiyo, nyuuva unawuutteelani nrima cinene, hataa ukhalaka wiira anawuukhumelelani masakha yaahala wuuriipihani nrima, 7 wiira waamini winyu woovirihiya mwaavi uwiiriheni uttottopeliya, uttitthimihiya ni uhisimiya ukati unhalaawe uwa Yesu Kristu. Nwo waamininwo uhaana ifayita cinene uvikana iwooru immalamala hataa ukhalaka wiira ihovirihiya wamooroni.
^ ILATARATO: Munna mmoca nootthukiya ni nrwaaniya utiripunaali wiira ahukhumwiye ni mayamunna akhwaawe anaathoonyera wiira ari nkhayi nuuyova.
