1-2. Manannani ooreera usoma Nuulumo na Nluku? Ntakihere.

 MUUPUWELE wiira nyuuva nnopheela uthuma inupa. Nyuuva mwanhala upheela woona sana-saana iyo inupeeyo nhinaaya uthuma? Awula nyuuva mwanhala ukupali woona ilatarato yoohoolo waya inupeeyo paahi, nuuthuma? Khweeliini, nyuuva mwanhala urwaa wooneeha iyo inupeeyo, uweha ukela ikwartu cotheene ni uweheeha citthu cotheene ciri mpaani waya. Ni atthunaka mwanhala upheela woona ipalantaaya iyo inupeeyo wiira ncuwele inanna citekiyaaya. Woohaanyihacera, nyuuva mwanhala upheela woona citthu cotheene co iyo inupeeyo nhinaaya uthuma.

² Pooti wampankeehu itthu yoolikanaca ukati unsomeehu Ibiiblya. Namantikha mmoca aholattanihera moolumo o mbiiblyani “niipereetiyu yuulupale, yoorekama ni itekiye nipuro noolipa.” Vano, isiyani inlamuliyeehu upanka wiira nicuwele saana Ibiiblya? Wakhala wiira nyuuva mwacisaka Ibiiblya nnosoma moolumwaayo paahi, khannohala wiitthuca myaha cuulupale, masi nnohala wiitthuca paahi “citthu coopacera co nnuulumoni nowaarya na Nluku.” (Mabere. 5:12) Khampa caahaleenyu urwaa wooneeha inupa impheeleenyu uthuma, nyuuva ciicammo nhaana usoma Ibiiblya sana-saana wiira nkhitiri wiiweeha. Mananna oosoma saana Ibiiblya ukhanle utotha ucuwelela manannani mphantte wo mbiiblyani unsomeenyu cinvaranacaaya nimiphantte cikiina. Nhiikurumice wiiweeha paahi ikhweeli co mbiiblyani nyuuva cinkupaliinyu, masi ciicammo mwiikurumice ucuwela kontha isiyani nnokupaliinyu nnyo ikhweeliinnyo.

3. Isiyani apostolu Paulu yaawiirenlyaawe makristau ni kontha isiyani? (Nwehe Efesu 3:14-19.)

 ³ Wiira niiweehe Nuulumo na Nluku, nihaana wiitthuca ikhweeli cuulupale co mbiiblyani. Apostolu Paulu ahowiirela mayamunna wiira yahaana usoma Nuulumo na Nluku saana wiira akhitiri ‘ucuweleeheeha yaatapuwelo, irekamelo, yeemelelo, ni yiiserelwaaya’ ikhweeli ca Nluku. Naayo manannaayo paahi, phaahalaaya ukhitiri ulipihaca waamini waya. (Nsome Efesu 3:14-19. b) Ni iyo phi itthu hiiva ninlamuliyeehu upanka. Nttwee noone vano manannani ninlamuliyeehu usoma ikhweeli cuulupale co mbiiblyani wiira niphwanyere ifayita mihakhu cinnivahaaya.

4. Isiyani inlamuliyeehu upanka wiira nitepe umpatthanana Yehova? Ntakihere.

⁴ Khampa makristau, hiiva nimpheela wiiweeha mbiiblyani kahi paahi myaha cankaani. Masi, nikaviheriyaka ninnepa wowaarya wa Yehova, hi ninaapheela wiitthuca “citthu cuulupale ca Nluku”. (1 Akor. 2:9, 10) Nnoonela cani nyuuva upacera usoma Ibiiblya veekha wiira ntepe umpatthanana Yehova? Wootakihera, nyuuva pooti utotha ucuweleeha mananna Yehova caawoonihenryaawe nifento aswalyaawe okhalayi ni manannani cinoofentaaweni. Nyuuva ciicammo pooti utotha ucuwela mananna asarayeli yanswalelaaya Yehova khalayi ni manannani nopheelaawe wiira ninswalele ilelo. Awula nyuuva pooti usoma saana inatiri Yesu ciiraneehilyaawe ukati waaryaawe va watuninyani va.

5. Uhaavo mwaha woocivenleni nyuuva usoma wiira ncuweleehe saana?

⁵ Mayamunna akiina unaacivela usoma Ibiiblya ahohimya citthu cinaacivela usoma sana-saana. Nyuuva pooti uweha miruku civahilyaaya nhina ikwaaturu “ Citthu coopheela usoma”. Nyuuva pooti uvarela nteko Índice das Publicações da Torre de Vigia awula Guia de Pesquisa para Testemunhas de Jeová wiira ntothe myaha nnopheeleenyu usoma. Nyuuva nnaahala woona wiira nnyo ikarumannyo cinaacivihaca usoma winyu. Usoma cinene myaha co mbiiblyani pooti wuukaviherani ulipihaca waamini winyu ni ‘uphwanya ucuwelaca unkhuma wa Yehova Nluku.’ (Miru. 2:4, 5) Nttwee noone vano myaha cuulupale co mbiiblyani nyuuva nnolamuliyeenyu utotha ucuweleeha.

6. a) Ulakela itthu unvirikana cani nuupheela itthu? b) Kontha isiyani nineereehu wiira itthu Yehova inaapheelelaawe apinaatamu ni ituninya ikhanle itthu “yoohimala”? (Nwehe Efesu 3:11.)

⁶ Wootakihera, Ibiiblya inaahimya itthu Yehova Nluku impheelaawe. Ulakela itthu ni upheela itthu unaavirikana. Muupuwele wiira nnopheela urwaa nipuro. Hi pooti wanlattaniheehu ulakela winyu urwaa nno nipuronno niiparapaara inhaleenyu uvira wiira mphiye unrweenyu. Masi itthu ilakenleenyu pooti uhiirannya toko caalakenleenyu, kontha iparapaara pooti uttiyeleliya awula utthukiya nlattu wowiirannya itthu. Vano itthu impheeleehu pooti wanlattanihereehu ninipuro ninrweenyu. Nyuuva nnaacuwela nipuroni nnopheeleenyu urwaa, phimaana pooti uvira iparapaara coovirikana wiira mphiye nno nipuronno. Ni iparapaara yattiyeleliyaka, nyuuva pooti uvira iphiro ikiina wiira mphiye. Hiiva ninansukhuru Yehova nlattu woonoonihera mbiiblyani vakaani-vakaani ‘itthu nopheelaawe.’ (Nwehe niwehero no Efesu 3:11 nhina Bíblia de Estudo.) Hataa yiirannyaaka isiyani, Yehova naakhitiri upanka khula itthu impheelaawe, kontha uyo “naapanka khula itthu wiira yiirannye itthu impheelaawe.” (Miru. 16:4) Ni khula itthu Yehova nopankaawe inaakhala mpaka. Masi isiyani Yehova impheelaawe ni isiyani ipankilyaawe wiira yiirannye itthu impheelaawe?

7. Atamu ni Hawa uhimwiiwelela waya Yehova, marukunusoni uyo wiira yiirannye itthu impheelaawe? (Nwehe Matewus 25:34.)

⁷ Nluku ahaahimerya anamathelana oopacera itthu yaapheelelaawe. Nluku ahowiirela: “Mwaayare asaana ni mwincive; ncare ni nwacere ituninya; nlamulele . . . inama cotheene ciri watuninyani.” (Upha. 1:28) Nlattu Atamu ni Hawa woohimwiiwelela Nluku, apinaatamu otheene ahaana itampi, masi iyo itthwiiyo khinhiihale Yehova upanka itthu impheelaawe. Uyo rukunusile paahi mananna owiirannya itthu impheelaawe. Yehova holakela uwaana Umwene va watuninyani va unhala wiirannyeeha itthu impheelaawe ukhuma ukati wumpilyaawe ituninya ni apinaatamu. (Nsome Matewus 25:34. c) Nlattu wo nifento nawe, Yehova aholakela unveleeliha mwanawe oopacera watuninyani, ni waaphiilyaaya ukati, uyo ahowa va watuninyani va. Naayo manannaayo, Yesu anhala uwiitthuciha atthu ihapari co Umwene ni uvaha ukumyaawe wiira anoopole. Vano, Yehova ahomunweleliha Yesu wiira aturuwele wiirimu ni alamulele khampa Mwene o Umwene wa Nluku. Masi cihaavo-tho citthu cikiina nyuuva nnolamuliyeenyu wuupuwela nhina itthu impheelaawe Nluku.

8. a) Ibiiblya inooluma mwahani? b) Toko cinhimyaaya Efesu 1:8-11, itthuni yuulupale impheelaawe Yehova? (Nwehe ilatarato yo wakaapani.)

⁸ Mwaha muulupale unoolumiya mbiiblyani motheene ukhanle ureerihiya ncina na Yehova. Nno ncinanno ninhala ureerihiya ukati unhalaawe wiirannyeeha itthu impheelaawe avarelaka nteko umwennyaawe, unlamuleliya ni Kristu. Khaavo nohala urukunusa awula waakakhaniha itthu impheelaawe Yehova. Yehova naahala wiirannyeeha citthu cotheene khampa cikhuluvelihilyaawe. (Isai. 46:10, 11, mawehero; Mabere. 6:17, 18) Wahoolo waya, ituninya inaahala ukhala ipeephoni ni ucuulu woohipahuwa wa Atamu ni Hawa unaahala ‘ukhala mpaka.’ (Isaa. 22:26) Masi Yehova naapheela unipankela citthu cinci cikiina. Itthu yuulupale nopheelaawe ukhanle wiira aswalyaawe otheene, wiirimu ni hataa watuninyani, answalele uyova yiiwananaka. Naayo manannaayo, atthu otheene anaahala unvaresesa Yehova khampa nkhulupale o wiirimu ni o watuninyani. (Nsome Efesu 1:8-11. d) Nyuuva khannokhala ootikhinihiya nlattu wo woona mananna Yehova cineerannyeehaawe itthu impheelaawe?

9. Usoma wihu Ibiiblya unnuupusera isiyani yoohoolo?

⁹ Moone inatiri Yehova yaapankilyaawe ujardim yo Eeteni, inoolumiya nhina Uphattuwaca 3:15. e Iyo inooluma itthu impheelaawe Nluku yaahala wiirannya myaakha cinci wahoolo. Yehova ahomwiirela Aparahaamu wiira nhina maloko menci yaahala ukhumelela watthokoni wawe, mwanculawe umoca anhala ukhala Kristu. (Upha. 22:15-18) Vano, mwaakha wo 33, Yesu ahorakalihiya ikottokottho khampa inatiri caahimyaaya. (Mite. 3:13-15) Mphantte woomalela wo iyo inatiriiyo, unooluma ukati muru wa Sotwani unhalaaya unyakatiya, unhala wiirannya paahi wiimaleloni waya ukati wo myaakha 1.000 nohalaawe ulamulela Kristu. (Apoka. 20:7-10) Ni Ibiiblya inawuuluma citthu cinci cinhala wiirannya ukati wotheene Sotwani nohalaawe ukhala awanihanaka mphwinko woothotokanihiya wa Yehova.

10. a) Isiyani inhala wiirannya woohipica? b) Manannani ninlamuliyeehu utthenkaca moopuwelelweehu ni nrimeehu? (Nwehe niwehero.)

¹⁰ Muupuwele citthu cootikhiniha cinhala wiirannya cinhimiya mbiiblyani. Yoopacera, aatthu o ntuninyani anaahala ukhuwela “nnema ni mpuha!” (1 Atesal. 5:2, 3) Vano woohipica, ukati atthu o ntuninyani unhalaaya urukunuwela ittiini cowootha, anaahala upacera “masakha moolupale.” (Apoka. 17:16) Wahoolo waya, ‘Mwaana a Pinaatamu naahala uwa mmahutteni wiirimu niikuru ni nuuttitthimihiya.’ Uyo ukatyuuyo, atthunaka ninaahala woona citthu wiirimu cinhala woonihera uwa wawe. Vano, Yesu naahala waahukhumu atthu ni uweesa mphantte mmoca ale akhanle ikhontwaa ni uweesa mphantte nkiina ale ankhale ipuri. (Mat. 25:31-33, 46) Uhookhalaru commo, Sotwani khanhala uhiya waalupattha apovu a Nluku. Naviruwile, uyo naahala ukurumica ikhurupu yaatthu ineehaniya mbiiblyani Gogue olapo yo Magogue, wiira yaatuphele apoovu a Yehova Nluku. (Ezek. 38:2, 10, 11) Uyo ukatyuuyo, makristau oothanliya anhala uhala watuninyani anaahala urwaaniya wiirimu. Nwo, nkhayi ni Yesu ni anakhottwaawe, ayo anaahala ukavihera ikhotto yo Harmacetom; iyo ikhottweeyo phinhala ukhala mphantte woomalela wo masakha moolupale. f (Mat. 24:31; Apoka. 16:14, 16) Yamalaka masakha moolupale, vano unaahala upacera ulamulela Umwene wo Myaakha 1.000 wa Kristu.—Apoka. 20:6.

11. Nneecoonaka cani mweemelaka muupuwelaka wiira nnaahala ukhala mpaka? (Nwehe ciicammo ilatarato.)

 ¹¹ Vano, mweemele ni muupuwele mananna cinhaleehu ukhala caviraka myaakha 1.000. Ibiiblya ineera wiira Mpattusiihu “hohela wanrimani wihu ukhala mpaka.” (Ekles. 3:11) Nhotoko weemela ni wuupuwela ifayitani urinaaya upatthaniinyu ni Yehova muukumini winyu? Ilivuru Achegue-se a Jeová ipaagina 319 inawuuluma itthu inniiriha wuupuwela. Iyo ineera co: “Ninakhanleene myaakha cinci, imiliyawu cene, ninaahala ucuwela citthu cinci ca Yehova upwaha cincuweleehu ilelo. Masi cinaahala ukhala citthu comaana cinci cikhwaawe cinhaleehu upheela wiitthuca . . . Ukumi woohimala unhala ukhala womaana, ni iparakha yuulupale inhaleehu ukhalana ukhanle utepa umpatthanana Yehova.” Masi ihinaaya wiirannya iyo itthwiiyo, isiyani inlamuliyeehu wiitthuca woosoma Ibiiblya?

12. Citthuni co wiirimu ninlamuliyeehu wuupuwela? Ntakihere.

¹² Ibiiblya inaanihimerya mananna ciryaaya nipuro ninkhalaawe Yehova awula “wiirimu.” (Isai. 33:5) Ibiiblya inaahimya citthu cootikhiniha yamwaacaka Yehova ni yaacaka mphwinkwaawe wo wiirimu. (Isai. 6:1-4; Dan. 7:9, 10; Apoka. 4:1-6) Wootakihera, hiiva pooti wansomeehu citthu cootikhiniha coonilyaawe porofeeta Ezekiyeli ukati ‘waahuliyaaya irimu ni waakhalannyaawe iwooni ca Nluku’—Ezek. 1:1.

13. Nneecoona cani ucuwela winyu itthu Yesu nopankaawe nari wiirimu? (Nwehe Maberewu 4:14-16.)

¹³ Muupuwele ciicammo itthu Yesu nopankaawe wiirimu, khampa Mweneehu ni Nankutthweehu Muulupale, nocuwela citthu cinoopuweleehu. Nlattu wa Yesu, hiiva ninaakhitiri unlompa Nluku ni unlepela wiira anilevelele itampi cihu ni anikavihere ‘ukati umpheeleehu ukaviheriya.’ (Nsome Maberewu 4:14-16. g) Nhihiyerere uvira nihuku  nimoca woohuupuwela citthu cotheene Yehova ni Yesu cinnipankelaaya anaryeene wiirimu. Woona mananna cinnifentaaya uhaana unikurumicaka uvara nteko wa Yehova niikuru cihu cotheene.—2 Akor. 5:14, 15.

14. Manannani ninlamuliyeehu woonihera wiira cinaanicivela citthu Yehova ni Yesu cinnipankelaaya? (Nwehe ciicammo ilatarato.)

¹⁴ Itthu imoca yomaana inlamuliyeehu upanka wiira noonihere wiira ninaavaha ifayita itthu Yehova ni Yesu cinnipankelaaya ukhanle wiikurumica wihu waakavihera atthu akiina ukhala Masaahiti a Yehova ni atthari a Yesu. (Mat. 28:19, 20) Iyo phi itthu apostolu Paulu yaapankilyaawe wiira oonihere unsukhuru wawe Yehova ni Yesu. Uyo ancuwela wiira itthu yaapheelaawe Yehova waari wiira “atthu okhapila cotheene yoopwe ni acuwele ikhweeli.” (1 Tim. 2:3, 4) Paulu aheekurumica wuulalyeerani wiira aakavihere atthu enci ‘wiira nimananna otheene akhitiri uwoopola.’—1 Akor. 9:22, 23.

15. Toko cinhimyaaya Isaalimu 1:2, isiyani inhala unitteeliha nrima?

¹⁵ Nasaalimu mmoca hohimyaca saana mananna cinkhalaawe ntthu oosoma Nuulumo na Nluku. Uyo enre wiira ntthu nosoma nuulumo na Nluku naatteeliya kontha “itthu inoncivela ukhanle usoma nlamulo na Yehova” ni uyo ‘nawuupuwela uhiyu ni uthana.’ (Isaa. 1:1-3; niwehero.) Oolumaka iyo iveeruswiiyo, namataphulela Ibiiblya Joseph Rotherham, hantikha nlivuruni wawe ineehaniya Estudos dos Salmos, niiluuka Inglês, wiira ntthu haana “cancivelaka ikano ca Nluku mpaka wancera waavya nnyo ikanonnyo, usomeeha ni uviriha ukati mwinci oopuwela.” Uyo ciicammo enre wiira ntthu “avirihaka nihuku nimoca woohisoma Nuulumo na Nluku, naahaleela ucuwelaca waya.” Nyuuva ciicammo pooti wuucivelani usoma Ibiiblya mwaavyaka ucuwela citthu cofayita ni woona mananna cinvaranacaaya. Usoma Nuulumo na Nluku ikhanle itthu intteeliha nrima!

16. Isiyani ninhaleehu woopela mwaha nhina mwaha unttharana nuula?

¹⁶ Ikhweeli Yehova cinniitthucihaawe nnuulumoni nawe khacinakhala coorika wiiweha. Nhina mwaha unttharana nuula, ninaahala usoma ikhweeli imoca yuulupale—Itempulu yuulupale yo mminepani ya Yehova, yaattonkacilyaawe apostolu Paulu nhina iwarakha yaawantikhenlyaawe Maberewu. Nyuuva unaahala wuucivelani usoma uyo mwahooyo.