1. Isiyani nlayikha nimoca inhimyaaya ni nlattuni iyo itthwiiyo ikhanlyaaya yofayita?

 WAARI wiira nlayikha naapheela uwuulumanani mwaanawiiwa itthu naahalaaya uhimya? “Atthu ankhala watuninyani, olapo cotheene, o maloko otheene, oluuka cotheene, ni apoovu otheene.” Isiyani inhimyaaya? “Mmoove Nluku ni munttitthimihe, kontha uhophiya ukati unhalaawe uhukhumu. Phimaana, munswalele Ule umpale irimu, ituninya, ipahari, ni iluusi co maaci.” (Apoka. 14:6, 7) Yehova khanle nluku mmoca ninlamuliyeehu unswalela. Hiiva pooti wanonsukhureleehu Yehova nlattu woonivaha iparakha wonswalela nnupani wawe yoominepani!

2. Itempulu yo mminepani ya Yehova ikhanle isiyani? (Nwehe ciicammo ikwaaturu “ Itempulu yo mminepani khinakhala isiyani?”)

² Itempulu yo mminepani ya Yehova isiyani ni nipuroni nimphwanyeehu yuulumiyaaka? Itempulu yo mminepani ya Yehova khinakhala inupa ninkhitiriihu woona nimeetho. Masi akhanle mananna Yehova nivahilyaawe wiira ninswalele toko uyova cimpheelaawe nlattu woparakha Yesu nivahilyaawe. Apostolu Paulu ahohimya ayo manannaayo ukati wantikhilyaawe iwarakha awantikhela makristau maberewu oseekulu yoopacera yaakhala u Judeia. b

3-4. a) Nlattuni Paulu waalakenlyaawe uwantikhela iwarakha makristau maberewu? b) Isiyani uyo yaapankilyaawe wiira aakavihere?

³ Kontha isiyani Paulu aawantikhenlyaawe iwarakha makristau maberewu? Atthunaka nlattu wo citthu piili. Yoopacera, wiira aalipihe. Mayamunna enci yaari ittiini ya ayuuta ikhumelo inamwannyaaya. Ahooleli ottiini atthunaka yaanaatarawaca nlattu ayova wookhala makristau. Kontha isiyani? Kontha makristau khayaarina itempulu  yooreera wiira answalele Nluku, khayaarina ikhilompe wiira anvaherere itthuvo Nluku ni ciicammo khayaarina anankuttho wiira yaakavihere. Iyo itthwiiyo pooti waahalaaya waaloloviha atthari a Kristu ni uloloviha waamini waya. (Mabere. 2:1; 3:12, 14) Atthunaka akiinaayo wanrimani waya yaanaapheelaka uturuwela ittiini ya ayuuta.

⁴ Yonaleeli, Paulu aapheela waakurumica mayamunna wiira yiikurumice ucuwela ikhweeli co naanaano ni cuulupale cimphwanyannya Nnuulumoni na Nluku, cinlikanaca ‘niiyoolya yoolipa.’ (Mabere. 5:11-14) Unkhala toko wiira mayamunna akhwaawe yaaneettela nlamulo na Moceesi. Paulu ahaahimerya wiira uvaha itthuvo khawaamalamaliha itampi cotheene. Nlattu wo iyo itthwiiyo, nlamulo ‘nahohinnya weetteliya.’ Paulu ahopacera uwiitthuciha mayamunna ikhweeli cuulupale. Uyo ahopacera uwuupusera mayamunnaawe niweherero nomaana ninkhalaneehu nlattu wo woopoliya ni Yesu, naahala waakavihera ‘umwaattamela Nluku.’—Mabere. 7:18, 19.

5. Isiyani ninlamuliyeehu wiiweeha nhina iwarakha yo Maberewu, ni nlattuni?

⁵ Paulu ahaahimerya mayamunna wiira uswali waya weekristau waanaavikana uswali waya wokhalayi. Citthu cantikhiye munlamuloni caapankaaya wiira answalele Yehova caari paahi “irunku yo citthu caahala uwa, masi ikhweelyaaya nnyo citthunnyo khanle Kristu.” (Akol. 2:17) Irunkwaaya itthu inoonihera paahi mananna ciryaaya itthwiiyo, masi khinakhala itthweeneeneeyo. Inanna imocaaru, uswali wa ayuuta khalayi waari paahi irunku yo mananna caahalaaya unswalela saana Yehova wahoolo. Hiiva ninlamuliya ucuweleeha citthu cotheene Yehova cipankilyaawe wiira itampi cihu cileveleliye ni wiira ninswalela khampa uyova cimpheelaawe. Nhina ula mwahoola, ninaahala ulattanihera “irunku” (mananna ayuuta caaswalyaaya) “niikhweeli” (mananna makristau cinswalyaaya), khampa cittonkaciyaaya nhina iwarakha yo Maberewu. Napankaka commo, ninaahala wiiweeha isiyani ikhanle itempulu yo mminapani ni manannani cinniphwanyihaaya ifayita

6. Itabernaakulu yaavareliya nteko cani?

⁶ Mananna ayuuta caaswalyaaya. Paulu ahovarela nteko itabernaakulu yaatekiye ni Moceesi mwaakha wo 1512 hinawa Kristu wiira eetthucihe mananna ciryaaya itempulu yo mminepani. (Nwehe ikwaaturu “Mananna ayuuta caaswalyaaya—Mananna makristau cinswalyaaya.”) Itabernaakulu yaari inupa yookhala toko heema asarayeeli yaacisaaya khula nipuro yeettaaya. Iyo yahovareliya nteko myaakha coophiyeraka 500 mpaka itempulu yaatekiyaaya u Yerusalemu. (Nkw. 25:8, 9; Manu. 9:22) Itabernaakulu awula “heema o nkutthaano” naari  nipuro asarayeli yaathukumanaaya wiira answalele Nluku ni anvahe itthuvo. (Nkw. 29:43-46) Masi itabernaakulu ciicammo yaathoonyera itthu ikhwaawe yuulupale Yehova yaahalaawe waavaha makristau.

7. Itempulu yo mminepani yancenre ukhala yaakhani?

⁷ Mananna makristau cinswalyaaya. Itabernaakulu yo khalayi yaari “irunku yo citthu co wiirimu” ni yaari nthoonyero notempulu yuulupale ya Yehova yo mminepani. Paulu enre wiira uyo “heemooyo [awula itabernaakulu] yaari nthoonyero no ula ukati unkhaleehuula.” (Mabere. 8:5; 9:9) Phimaana, ukati waawantikhenlyaawe iwarakha maberewu, itabernaakulu yahovira ni waari ukati wotempulu yo mminepani yeekhweeli. Ukati wotempulu yo mminepani upacenre mwaakha wo 29 nawile Kristu. Uyo mwaakhooyo, Yesu ahopattisiya, ahothanliya ninnepa wowaarya ni phi mwaakha ukhanlyaawe “nankuttho muulupale” a Yehova, ntempuluni yo mminepani. c—Mabere. 4:14; Mite. 10:37, 38.

8-9. Nankuttho muulupale o Isarayeli aavirikana cani ni Nankuttho Muulupale, Yesu? (Nwehe Maberewu 7:23-27.)

⁸ Mananna ayuuta caaswalyaaya. Nankuttho phaahoolela apoovu uhoolo wa Nluku. Nankuttho oopacera o Isarayeli aari Arawu. Uyo aathanliye ni Yehova ukati waapacerihiyaaya uvareliya nteko itabernaakulu. Masi Paulu ahohimya wiira anankuttho “yaanaawa ni yaanaavira, kontha ukhwa khawaakhitiriha ukhala nankuttho mpaka.” d (Nsome Maberewu 7:23-27. e) Ukhala wiira anankutthu ciicammo yaari atthu o matampi, ayo yahaana yavahaka itthuvo wiira cileveleliye itampi caya. Va, hi ninawoona mananna anankuttho o Isarayeli cinvirikanaaya ni Nankuttho Muulupale, Yesu Kristu.

⁹ Mananna makristau cinswalyaaya. Khampa Nankuttho, Yesu Kristu “khanle namakavihera . . . o nheemani eekhweeli, oothanliya ni Yehova, kahi ni naapinaatamu.” (Mabere. 8:1, 2) Paulu hohimyaca wiira “ukhala wiira uyova khankhwa, unankuttho uvahaceriyaawe khunakhala woohiyeraniya.” Paulu ciicammo hohimya wiira Yesu khanamatampi ni, woovirikana naanankuttho o Isarayeli, uyo “khanlamuliya uvaherera itthuvo khula nihuku” wiira cileveleliye itampi cawe. Vano, nimpheela woona manannani ikhilompi ni itthuvo ca ayuuta cinvirikanaaya ni nnyo co makristau.

10. Itthuvo caavahereriya wakhilompini yokoopere caataphulela isiyani?

¹⁰ Mananna ayuuta caaswalyaaya. Vate waya itabernaakulu, yahaavo ikhilompi yokoopere caavahereriyaaya itthuvo conama. (Nkw. 27:1, 2; 40:29) Masi nnyo itthuvonnyo khacaakhitiriha uleveleliya itampi cotheene caatthu. (Mabere. 10:1-4) Nnyo itthuvo conamannyo canvahereriya ikwaha cotheene utabernaakulu ni caathoonyera wiira uhoolo yanhala uvahereriya itthuvo yuulupale wiira apinaatamu otheene aleveleliye itampi caya.

11. Ikhilompini Yesu yaavarenlyaawe nteko wiira avahe ukumyaawe? (Nwehe Maberewu 10:5-7, 10.)

¹¹ Mananna makristau cinswalyaaya. Yesu aanaacuwela wiira aaveleelihiye ni Yehova va watuninyani va wiira avahe ukumyaawe khampa itthuvo wiira awoopole apinaatamu otheene. (Mat. 20:28) Vano, upattisiya wawe, Yesu ahothoonyera wiira aapheela upanka itthu Yehova yaapheelaawe. (Joau 6:38; Akalas. 1:4) Yesu vaherenre ukumyaawe wakhilompini yo nthoonyero, kahi yowoonnya nimeetho. Iyo ikhilompiiyo ikhanle “itthu impheelaawe” Yehova. Itthu yaapheelaawe Yehova waari Yesu uvaha ukumyaawe weepinaatamu woohimatampi. Yesu hovaha ukumyaawe “ikwaha imoca” wiira cileveleliye itampi ca atthu otheene ammwaamini.  (Nsome Maberewu 10:5-7, 10. f) Vano, nttwee noone isiyani intaphulelaaya citthu caari nhina itempulu.

12. Tipani aalamuliya ukela nhina Nipuro Nowaarya ni tipani aalamuliya ukela nhina Nipuro Nootepa Waarya?

¹² Mananna ayuuta caaswalyaaya. Itabernaakulu ni itempulu caatekiye u Yerusaleemu caanaalikanaca nhina waya. Nhina waya, yahaavo mapuro meeli oolattanaca. Nipuro noopaceranno neehaniya “Nipuro Nowaarya” ni nikiinanno “Nipuro Nootepa Waarya.” Ayo mapuro meelyaayo yaakawanihiye niikortiina. (Mabere. 9:2-5; Nkw. 26:31-33) Nhina Nipuro Nowaarya yahaavo isamininnya yowooru ni yahaavo ikhilompi yaapaheriya ilumpani ni ciicammo meeca yeesiya iphaawu coovahereriya. Anankuttho oothanliya paahi phaalamuliya ukela Nipuro Nowaarya wiira avare miteko caya. (Manu. 3:3, 7, 10) Nhina Nipuro Nootepa Waarya phaakhalaaya ikasa yo nleehano yaapintaraciye niiwooro. Iyo ikaseeyo yaathoonyera ukhala wawe Yehova nne nipuronne. (Nkw. 25:21, 22) Nankuttho muulupale paahi phaatthuniheriya uvira wiira akele Nipuro Nootepa Waarya. Uyo aalamuliya ukela ikwaha imoca paahi khula mwaakha, nihuku noolepela uleveleliya itampi ca apoovu. (Lev. 16:2, 17) Khula mwaakha naphiyaka nno nihukunno, uyo aanaakela niiphome yonama wiira alepele uleveleliya itampi cawe uyova ni itampi ca atthu olapo yotheene yo Isarayeli. Nuuwakatyaaya, Yehova ahoonihera sana-saana isiyani yaataphulelaaya ayo  mapuro meeli o ntabernaakulunnyaayo.—Mabere. 9:6-8. g

13. Nipuro Nowaarya ni Nipuro Nootepa Waarya no ntabernaakuluni ninaathoonyera isiyani makristau?

¹³ Mananna makristau cinswalyaaya. Makristau vakaani paahi phinthanliya ninnepa wowaarya wa Nluku. Ni nlattu woothanliya, ayo anaakhalana upatthani muulupale ni Yehova. Ayo makristawaayo ari 144.000 ni anhala ukhala anankuttho wiirimu nkhayi ni Yesu Kristu. (Apoka. 1:6; 14:1) Nipuro Nowaarya naari ntabernaakuluni nintaphulela iparakha irinaaya ayo asaana a Nlukwaayo yakhalakoono va watuninyani va ahinarwaa wiirimu. (Aroo. 8:15-17) Vano Nipuro Nootepa Waarya no ntabernaakuluni nintaphulela irimu, nipuro ninkhalaawe Yehova. “Ikortiina” yaakawaniha Nipuro Nowaarya ni Nipuro Nootepa Waarya intaphulela irutthu ya Yesu. Ukati Yesu waaryaawe watuninyani ni waarinaawe irutthu yeepinaatamu, uyo khaalamuliya urwaa wiirimu wiira akhale Nankuttho Muulupale ntempuluni yo mminepani. Ukati uvahilyaawe irutthwaawe wiira awoopole apinaatamu, Yesu haahulela iphiro makristau oothanliya wiira naayo arwee yakhale wiirimu. Khampa Yesu, makristau oothanliya ciicammo ahaana yahiyaka irutthwaaya yeepinaatamu wiira yaakhele iparakha yoorwaa ukhala wiirimu (Mabere. 10:19, 20; 1 Akor. 15:50) Yesu wunwelelihiya wawe, uyo ahokela Nipuro Nootepa Waarya no mmonepani, awula ahorwaa wiirimu, nipuro makristau oothanliya otheene ninhalaaya ciicammo urwaa wiira yakhale nkhayi nuuyo.

14. Kontha isiyani unswaleliya Yehova ntempuluni yo mminepani unaavikana uswali wa ayuuta khalayi? (Nwehe Maberewu 9:12, 24-26.)

¹⁴ Hi ninonswalela saana Yehova nlattu Yesu Kristu wowiivaherera wiira anoopole ni nlattu wo nteko unvaraawe khampa Nankhuttho Muulupale. Unawoonannya wiira nwo uswali weekhweelinwo unaavikana uswali wa ayuuta khalayi. Nankuttho muulupale o Isarayeli aakelaka Nipuro Nootepa Waarya niiphome yonama ni nno nipuronno naatekiya naapinaatamu. Masi Yesu kenle wiirimu, nipuro nootepa waarya uvikana mapuro otheene, wiira amoonanane Yehova. Ukati waavahaawe ukumyaawe woohimatampi wiira anoopole, Yesu ahokhitiri umalamaliha itampi nlattu wo wiivaherera wawe mwaneene. (Nsome Maberewu 9:12, 24-26. h) Yesu Kristu uvaherera wawe ukumyaawe wiira anoopole khawampheeliya-tho uvahereriya itthuvo ikhwaawe wiira nileveleliye itampi cihu. Toko cimpheeleehu wiitthuca vano, hiivano otheene pooti unswalela Yehova ntempuluni yo mminepani, hataa ukhala wiira ninweherera urwaa ukhalana ukumi woohimala wapeephoni awula wiirimu.

15. Tipani aavara nteko nhina ipuwa yo tabernaakulu?

¹⁵ Mananna ayuuta caaswalyaaya. Itabernaakulu yahaana ipuwa yootekeliya iluwani ni nhina iyo ipuweeyo, ananteko phaavaraaya ntekwaaya. Ikhilompi yokoopere waavahereriyaaya itthuvo coopahiya yaakhala nhina iyo ipuweeyo ni yahaavo ciicammo ipasiya yokoopere yaaheliya maaci wiira anankutthu anyawe ni yiivululace mmettoni ahinaaya wancera uvara miteko caya. (Nkw. 30:17-20; 40:6-8) Itempulu caatekiye wahoolo ciicammo cahaana ipuwa yoovate. Nhina iyo ipuweeyo phanswalelaaya Yehova atthu yahaari anankuttho.

16. Tipani nonswalela Nluku nhina ipuwa yo nhina ni tipani nonswalela nhina ipuwa yoovate yo ntempuluni yo mminepani?

¹⁶ Mananna makristau cinswalyaaya. Ahinaaya urwaa wiirimu wiira yakhale anankutthu nkhayi ni Yesu, makristau oothanliya ananswalela Yehova watuninyani. Va watuninyani va phikhanle ipuwa yo nhina yo ntempuluni yo mminepani. Ipasiya yuulupale yo maaci iri nhina iyo ipuweeyo ikhanle nthoonyero wiira makristau oothanliya  ni makristau akhwaawe otheene anawuupuseriya wiira ahaana yiirattelaka mwiirutthuni waya ni nhina mminepani. Vano ale akhanle “ikhurupu yuulupale” anaakavihera makristau oothanliya, anonswalela Yehova nipuroni? Apostolu Joau ahoona mphwinko muulupale wa atthu aneemenle uhoolo wohice. Nhina itempulu yokhalayi, nno nipuro neemenlyaayanno yaari ipuwa yo vate, ‘wanswalelaaya [Nluku] uthana ni uhiyu.’ (Apoka. 7:9, 13-15) Hi ninawoona ukhalana ifayita cinene iparakha Yehova inivahilyaawe yonswalela nimananna owaarya ntempuluni wawe yo mminepani!

17. Itthuvoni hiiva ninlamuliyeehu unvaha Yehova?

¹⁷ Ilelo, makristau otheene ahaana iparakha yonvaha itthuvo Yehova, yalevaka ukatyaaya, ikuru caya ni citthu cirinaaya wiira akavihere Umwene wa Nluku. Toko apostolu Paulu caawiirenlyaawe makristau maberewu, hiiva pooti ‘unttottopela’ Nluku awula ‘unvaha itthuvo nivarelaka nteko malakwiihu wiira nilalyee ncina nawe waatthuni.’ (Mabere. 13:15) Hiiva ninthoonyera wiira ninawoona ukhalana ifayita cinene iparakha irineehu yonswalela Yehova neekurumicaka unvaha inkhitiriihu.

18. Citthuni cihinlamuliyeehu uhiya upanka ni isiyani ihinlamuliyeehu uliyala? (Nwehe Maberewu 10:22-25.)

¹⁸ Nsome Maberewu 10:22-25. Wiimaleloni iwarakha apostolu Paulu yaawantikhenlyaawe makristau maberewu, uyo ahooluma citthu cinci cinlamuliyeehu upanka wiira ninswalele Yehova. Nnyo citthunnyo cikhanle unlompa Yehova, waalalyeera atthu niweherero nihu noohoolo, uhilova mmamikutthaanoni co wanlokoni ni ulipihana, ‘utepa wanooneehu waattamela nihuku [na Yehova]!’ Ni nhina ilivuru yo Apokalipise, unaahimiya wiira nlayikha na Yehova naheera co: “Munswalele Nluku!” Nno nlayikhanno noolumile iyo itthwiiyo ikwaha piili, kontha naapheela uthoonyera wiira ikhanle itthu yofayita cinene. (Apoka. 19:10; 22:9) Hi khanimpheela uliyala citthu cotheene ciitthucileehu nhina itempulu yo mminepani ni iparakha yuulupale nirineehu yonswalela Nlukwiihu Muulupale, Yehova!