MWAHA WOOSOMIYA 38
Nkhale oocuwelaca ukati wo nnema
“Ilapo yaari wannemani ni khaavo aamwaanana ikhotto nnyo myaakhannyo, ukhala wiira Yehova ahonvaha ukati woomumula.”—2 IKOR. 14:6.
NCIPO 60 A Mensagem de Vida
NINHALA WIITTHUCANI? *
1. Ukatini unrikaaya unswalela Yehova?
WOONELA winyu, ukatini uhinrika unswalela Yehova—ukati wo marikariko awula ukati wo nnema? Yaniphwanyaka masakha khunrika unkhuluvela Yehova. Masi ukati wo nnema, niireke ninankhuluvela? Awula ninaaliyalaka wiira unswalela Nluku phikhanle itthu yofayita? Iyo phi itthu Yehova yaahimyenryaawe asarayeli.—Deut. 6:10-12.
Mwene Asa aholakela umalamaliha uswali woohikhweeli (Nwehe iparaagarafu 2) *
2. Isiyani Asa ipankalyaawe yooreera utakihiya?
2 Mwene Asa aari ntthu oocuwelaca nolamuliyeehu untakiha. Uyo ahonkhuluvela ni ahonswalela Yehova kaahi paahi ukati wo marikariko, masi ciicammo ukati wo nnema. Ikhumelo inamwannyaawe, “Asa ahonvaherera Yehova ni nrimaawe wotheene.” (1 Mam. 15:14, niwehero) Inanna imoca Asa caathoonyenryaawe wiira aheevaherera unswalela Nluku, waari umalamaliha uswaleliya anluku oohikhweeli u Yuuta. Ibiiblya ineera wiira uyo “ahokumihaca ikhilompi ca anluku olapo cikhwaawe ni mapuro yaaswaliya, ahopwesakaca ni ahomarulaca mapotto yaaswaleliya.” (2 Ikor. 14:3, 5) Uyo ahaahiiha uhoolela apiipyaawe, yeehaniya Maaka. Nlattuni? Kontha ayo yaanaakurumica atthu unswalela nluku oohikhweeli.—1 Mam. 15:11-13.
3. Ninhala wiitthucani nhina ula mwahoola?
3 Asa ahopanka itthu ikhwaawe, uhiya paahi umalamaliha uswali woohikhweeli nlaponi wawe. Uyo ahoturusela uswali weekhweeli ni ahaakurumica atthu yaahooleliya nuumwene wo Yuuta wiira anturuwele Yehova. Phimaana, Yehova ahoncaaliha Asa ni asarayeli. Uyo ahaavaha ukati wo nnema. * Myaakha khuumi caalamulenlyaawe Asa, ‘ilapo yahokhala wannemani.’ (2 Ikor. 14:1, 4, 6) Nhina ula mwahoola, ninaahala woona manannani mwene Asa caavarenlyaawe nteko ratta ukati wo nnema waakhalannyaawe. Ciicammo, ninaahala woona itthu yaapankalyaaya makristau oopacera. Toko Asa, ayo yahocuwela uvarela nteko ratta ukati wo nnema waakhalannyaaya. Wiimaleloni, ninaahala waakhula nna nikohonna: wakhala wiira nnyuuva nnokhala ilapo uhinkhottihiyeehu uswali, isiyani inlamuliyeenyu upanka wiira nvarele nteko ratta uyo ukati wonnemooyo.
ASA AHOVARELA NTEKO RATTA UKATI WO NNEMA WAAKHALANNYAAWE
4. Toko cinthoonyeraaya 2 Ikoronika 14:2, 6, 7, manannani Asa caavarenlyaawe nteko ratta ukati wo nnema waakhalannyaawe?
4 Nsome 2 Ikoronika 14:2, 6, 7. * Asa ahowiirela apoovu wiira Yehova ‘ahaamumuliha uwaattakanana awanannyaaya.’ Asa khoopuwenle wiira ule ukati wonnemoole ahaana onkomaka paahi woohivara itthu. Uhiya commo, Asa ahovarela nteko ule ukatyuule wiira ateke isittatti, muuru, inupa cooreka ni mikhora. Asa ahowiirela asarayeli: “Ila ilapweela nanlelo iri mmatatani wihu.” Isiyani Asa yaapheelaawe uhimya? Uyo aapheela waahimyera asarayeli wiira ayo pooti weettaaya ile ilapweele woohoova ulupatthiya naawanannyaaya. Asa ahaakurumica apoovu wiira avarele nteko ukati wo nnema waarinaaya.
5. Nlattuni Asa waatthenkacalyaawe anatoropaawe?
5 Asa ahovarela nteko ukati wo nnema waakhalannyaawe wiira aatthenkace anatoropaawe. (2 Ikor. 14:8) Niireke iyo inthoonyera wiira Asa khaamwaamini Yehova? Mena. Iyo inthoonyera wiira Asa ancuwela wiira ntekwaawe waari waatthenkaca apoovu wiira acuwele waanana masakha yaahala waakhumelela wahoolo. Ni ciicammo ancuwela wiira nnema naarivo u Yuuta, wanihukuni nanhala umala. Ni iyo khweeliini phi itthu yaakhumelenle.
MAKRISTAU OOPACERA YAHOVARELA NTEKO RATTA UKATI WO NNEMA WAAKHALANNYAAYA
6. Manannani makristau oopacera caavarenlyaaya nteko ukati wo nnema waakhalannyaaya?
6 Unookhalaru wiira makristau oopacera ikwaha cinci yanlupatthiya, uhaavo ukati waakhalaaya ninnema. Isiyani yaapankaaya uyo ukati wonnemooyo? Ayo yaaneekurumica uvarela nteko uyo ukatyuuyo wiira answalele Yehova ni alalyeere ihapari comaana. Phimaana yahenciva. Khweeliini, Yehova ahaacaliha nlattu wo wiikurumica waya ulalyeera uyo ukati wonnemooyo.—Mite 9:26-31.
7-8. Isiyani Paulu ni makristau akhwaawe yaapankaaya yakhalanaka ukati? Ntaphulele.
7 Makristau oopacera yaaneekurumica uvarela nteko ukati waakhalanaaya wiira alalyeere ihapari comaana. Wootakihera, apostolu Paulu aheera wiira ahohuleliya nkhora muulupale wiira avare nteko wowaalalyeera atthu enci u Efesu. Phimaana, uyo aheekurumiya wiira alalyeere ni aapanke eetthuci isittatti yo Efesu.—1 Akor. 16:8, 9.
8 Paulu ni makristau akhwaawe ciicammo yahokhalana ukati wo waalalyeera atthu enci mwaakha wo 49, waamalihiyaawe nanrokottole aakhumelela wanlokoni nlattu wo wuulihaniya. (Mite. 15:23-29) Ukati maloko waacuwenlyaaya itthu yaalakeliye nhina uyo mwahooyo, atthari yaheekurumica ulalyeera “ihapari comaana co nuulumo na Yehova.” (Mite. 15:30-35) Isiyani yaakhumelenle? Ibiiblya ineera wiira “maloko yaanaalipihiya nhina waamini ni yaanoonuwa khula nihuku.”—Mite. 16:4, 5.
NIVARELE NTEKO RATTA UKATI WO NNEMA NIRINEEHU ILELO
9. Isiyani inkhumelela ilapo cinci ilelo, ni isiyani ninlamuliyeehu wiikoha?
9 Ilelo, ilapo cinci hiiva ninaatthuniheriya ulalyeera. Akhulupale anhoolela ilapo inkhaleenyu anawuutthuniherani unswalela Yehova? Wakhala wiira anawuutthuniherani, mwiikohe co: ‘Kinaavarela nteko saana ula ukatyuula?’ Ala mahuku ookhiceraala apoovu a Yehova unawaatthapa nrima, kontha ari moovara nteko uhinatoko thanku uvariya ntuninyani: nteko wo waalalyeera ni uwiitthuciha atthu ihapari comaana. (Mark. 13:10) Nihaana ukati woopanka citthu cinci wiira nikavihere uyo ntekooyo.
Mayamunna enci anawaakhela iparakha nlattu wookavihera nteko woolalyeera ilapo ikiina awula ulalyeera niiluuka ikiina (Nwehe iparaagarafu 10-12) *
10. 2 Timotiyu 4:2 innikurumica upanka isiyani?
10 Isiyani inlamuliyeenyu upanka wiira nvarele nteko ratta ukati wo nnema urineenyu? (Nsome 2 Timotiyu 4:2. *) Nnoonela cani nyuuva awula mmuciinyu wiikurumica uvara cinene nteko woolalyeera toko piyoneeru? Ula khunakhala ukati woohoolelihera utotha mihakhu awula maali. Kontha hiiva khaninhala woopwaana nnyo citthunnyo ukati wo masakha moolupale.—Miru. 11:4; Mat. 6:31-33; 1 Jo. 2:15-17.
11. Isiyani anamalalyeera enci impankaaya wiira akhitiri waalalyeera ihapari comaana atthu anci?
11 Anamalalyeera enci anawiikurumica wiitthuca iluuka ikiina wiira avarele nteko iyo iluukeeyo ukati wo waalalyeera ni uwiitthuciha atthu myaha ca Nluku. Mphwinko woothotokanihiya wa Nluku unaakumihera myaha co mbiiblyani niiluuka cinci. Wootakihera, mwaakha wo 2010, hiiva naataphulela ilivuru cihu niiluuka cookhalaka 500. Masi ilelo, ninaataphulela niiluuka coopwaha 1.000!
12. Kontha isiyani unaareera atthu wiiwa ihapari co Umwene niiluukaaya? Nttonke itthu yaakhumelenle.
12 Niireke khweeliini unaareera ntthu eewaka ikhweeli ca Nluku niiluukaawe? Moone itthu yankhumelenle nrokorihu mmoca ukati woonalyaawe ikonkereesu yaapankiye u Memphis, Tennessee, EUA. Iluukaawe uyo nrokorihuuyo ineehaniya Quiniaruanda, inoolumiya u Ruanda, u República Democrática do Congo ni u Uganda. Ni ile ikonkereeswiile yaapankiye niiyo iluukeeyo. Woona wawe iyo ikonkereeswiiyo, nrokorihu aheera: “Cihovira myaakha 17 kikhalaka u Estados Unidos, masi ila phiikwaha yoopacera kikhitinryaaka wiiweeha ratta myaha cotheene caataphuleliya.” Unawoonannya wiira uyo nrokorihuuyo ahokhala ootteeliya cinene nlattu wooviriyana ile ikonkereeswiile niiluukaawe. Nnoonela cani nyuuva wiikurumica wiitthuca iluuka ikiina wiira mwaalalyeere atthu oncoko unkhaleenyu anooluma iyo iluukeeyo? Pooti ukhala wiira ncoko unkhaleenyu ahaavo atthu antthuna uvirinaya ihapari comaana yalalyeeriyaka niiluukaaya. Khawaahala ureera nyuuva wiitthuca iyo iluukeeyo? Wiitthuca iluuka ikhwaawe unaarika, masi phataari wiikurumica!
13. Manannani mayamunneehu u Rússia caavarenlyaaya nteko ratta ukati wo nnema waakhalannyaaya?
13 Ahaavo mayamunneehu ahintthuniheriya ulalyeera ilapo inkhalaaya. Ilapo cikiina, mayamunneehu khanlalyeera ratta kontha anaakhottihiya naakhulupale ookuvernu. Nwuupuwele mayamunneehu u Rússia. Uvira waya myaakha cinci yalupatthiyaka, ayo yahotthuniheriya unswalela Yehova mwaakha wo 1991. Ule ukatyuule, ilapo yo Rússia yaarivo anamalalyeera 16.000. Masi uviraya myaakha 20, anamalalyeera yahonceryaa mpaka uphiya 160.000! Iyo inthoonyera wiira mayamunneehu yahokhala oocuwelaca ni yahovarela nteko ratta ukati wo nnema waakhalannyaaya wiira alalyeere woohisuphiya. Masi ule ukati wonnemoole khawaapicale umala. Unookhalaru wiira anaalupatthiya venci ilapo inkhalaaya, mayamunneehu u Rússia khahiile wiikurumica unswalela Yehova. Ayo anaapanka yotheene inkhitiryaaya wiira ahihiye unswalela Yehova.
UKATI WO NNEMA URINEEHU KHUNHALA UPICA UMALA
Asa ukati waalompalyaawe, Yehova ahaakavihera atthu o Yuuta waatthema awanannyaaya (Nwehe iparaagarafu 14-15)
14-15. Manannani Yehova caathoonyenryaawe ikuru cawe wiira amoopole Asa?
14 Ukati wo nnema waakhalannyaawe mwene Asa khawaapicale umala. Anatoropa enci, oopwaha imiliyawu imoca yahowa yakhumaka u Etiópia. Nhoolelyaaya, eehaniya Zeraa, aakupali wiira anhala waatthema atthu o Yuuta. Masi mwene Asa khoovale nlattu wooyeva anatoropa yaarinaawe, masi ankhuluvela Nlukwaawe, Yehova. Asa ahonlompa Yehova eeraka: “Unikavihere, sontte Yehova, Nlukwiihu, kontha ninookhuluvela weeva ni nlattu wo ncina naa, nihowa waattakanana ula nkupittyuula.”—2 Ikor. 14:11.
15 Hataa ukhalaka wiira anatoropa o Etiópia phaari enci cinene waapwaha anatoropa a Asa, uyo ancuwela wiira Yehova haana ikuru ni naakhitiri uwoopola apoovwaawe. Ni Yehova khanhiyale Asa veekha; anatoropa o Etiópia yahotthemiya.—2 Ikor. 14:8-13.
16. Nincuwela cani wiira ukati wo nnema urineehu khunhala upica umala?
16 Khanincuweleeha citthu cinhala unikhumelela uhoolo. Masi ninaacuwela wiira khula ukati wo nnema unhaleehu ukhalana khunhala upica umala. Khweeliini, Yesu ahohimya wiira attharyaawe yanhala “urusa nlaponi motheene.” (Mat. 24:9) Ni apostolu Paulu heera wiira “otheene ale ampheela ukhala yanswalelaka Nluku, wamoca ni Yesu Kristu, ciicammo anaahala ulupatthiya.” (2 Tim. 3:12) Sotwani ‘nooviruwa cinene.’ Waahala ukhala ulolo hiiva wuupwela wiira urusiya wa Sotwani khunhala uniwaanela masakha.—Apoka. 12:12.
17. Manannani waamini wihu cinhalaaya uttehiya wahoolo?
17 Woohipica, otheene cihu waamini wihu unaahala uttehiya. Ntuninyani anaahala ukhumelela “masakha moolupale ahinatoka wiirannya thanku yumpeliyo ituninya mpaka ilelo.” (Mat. 24:21) Uyo ukatyuuyo, pooti ukhala wiira amuciihu anaahala unirukunuwela, ni ntekweehu woolalyeera atthunaka unaahala ukhottihiya. (Mat. 10:35, 36) Ninhala upankani uyo ukatyuuyo? Ninaahala unkhuluvela Yehova wiira naahala unikavihera ni unikhikicera toko Asa cankhuluvenlyaawe?
18. Toko cinthoonyeraaya Maberewu 10:38, 39, isiyani inhala unikavihera wiitthenkaca wiira nalipe ukati wo nnema wamalaka?
18 Yehova naanitthenkaca wiira nirwee nacuwele waanana citthu cinhala ukhumelela wahoolo. Uyo naahoolela “ipottha yookhuluvelya ni yankhili” wiira univahe iyoolya yominepani ‘ukati umpheeleehu.’ Nlattu wo iyo, ninaakhitiri ulipa wiira nihihiye unswalela Yehova. (Mat. 24:45) Masi hiiva otheene cihu nihaana niikurumicaka wiira nikhalane waamini woolipa.—Nsome Maberewu 10:38, 39. *
19-20. Noopuwelaka moolumo ari nhina 1 Ikoronika 28:9, isiyani ninlamuliyeehu wiikoha, ni nlattuni?
19 Toko mwene Asa, hiiva nihaana ‘nintothaka Yehova.’ (2 Ikor. 14:4; 15:1, 2) Itthu yoopacera ninlamuliyeehu upanka wiira nintothe Yehova ukhanle upattisiya. Nihaana nivarelaka nteko ukati wotheene unkhalaneehu wiira nilipihace unfenta wihu Yehova. Napheela ucuwela wakhala wiira ninnonfenta Yehova, ninlamuliya wiikoha co: ‘Kinaarwaa umikutthaanoni cotheene?’ Umikutthaanoni phi nipuro ninvahiyeehu ikuru wiira nihihiye unswalela Yehova ni ninaalipihiya ni mayamunneehu. (Mat. 11:28) Ciicammo ninlamuliya wiikoha co: ‘Kinaasoma Ibiiblya khula ukati?’ Wakhala wiira nyuuva nnokhala naamucinnyu, nnaapankaka uswali waamuci khula isumana? Awula wakhala wiira nnokhala veekha, nnaakumihaka ukati wiira nsome Ibiiblya, toko amuci cimpankaaya uswali waamuci? Uhiya iyo, niireke nyuuva nnawiikurumica uvara venci nteko woolalyeera ni wo waapanka eetthuci?’
20 Nlattuni unreeraaya wiikoha commo? Ibiiblya ineera wiira Yehova naaweheeha moopuwelelweehu ni mirima cihu; phimaana, hiiva ciicammo nihaana niweheehaka. (Nsome 1 Ikoronika 28:9. *) Moona wiira nhaana nrukunusaka itthu yaatotheenyu ukhalana awula ahaavo moopuwelelo anlamuliyeenyu urukunusa, munlepele Yehova wiira ookavihereni ukhitiri urukunusa. Ula phuukati ninlamuliyeehu wiitthenkaca wiira nalipe waamini wihu wattehiyaka wahoolo. Mwiikurumice ukhala oocuwelaca ni uvarela nteko ratta ukati wo nnema urineenyu!
NCIPO 62 ‘O Novo Cântico’
^ par. 5 Akhulupale anhoolela ilapo inkhaleenyu anawuuhiyani unswalela Yehova? Wakhala wiira anawuuhiyani, munnovarela nteko ratta uyo ukati wonnemooyo? Ula mwahoola unaahala uthoonyera manannani ninlamuliyeehu untakiha mwene o Yuuta, Asa, ni makristau oopacera. Ayo yahocuwela uvarela nteko ratta ukati wonnema waakhalannyaaya.
^ par. 3 NUULUMO NOOTAPHULELIYA: Nuulumo nnema khunaaciyaka uhikhala ikhotto paahi. Nno nuulumonno niiluuka iheperewu, ciicammo ninaaca ukhalana ukumi womaana, uhikhalana masakha ni uhikhala itthu yoonihela isukhuli.
^ par. 4 2 Ikoronika 14:2 Asa ahopanka citthu comaana uhoolo wa Yehova, Nlukwaawe. 6 Ahoteka isittatti coolipihaciya u Yuuta, kontha ilapo yaari wannemani ni khaavo aamwaanana ikhotto nnyo myaakhannyo, ukhala wiira Yehova ahonvaha ukati woomumula. 7 Uyo ahowiirela atthu o Yuuta: “Nttwee niteke nnya isittattinnya ni nitekele muuru ni inupa coorekama, nipankele mikhora ni ikhwiinya coohala utthukela. Kontha ila ilapweela nanlelo iri mmatatani wihu, ukhala wiira nihontotha Yehova, Nlukwiihu. Hiiva nihontotha, ni uyo honimumuliha uwaattakanana awananiihu.” Coo, ayo yahokhitiri uteka saana.
^ par. 10 2 Timotiyu 4:2 Ulalyeere nuulumo; waakuvele upanka iyo, ukati woohirikarika ni hataa ukati woorikarika; waahukhumu, waavaanyihe, waahimyere, wooniheraka uvilela ni wiitthuciha ratta.
^ par. 18 Maberewu 10:38 “Masi ntthwaaka neettela isariya, phinhala ukhala nkumi nuwaamini wawe” ni “wakhala wiira uyo naahokoleela uttuli, mi akinhala uciveliya ni uyo”. 39 Hiiva khaninakhala atthu anhokoleela uttuli wuutankanyiyani, masi nikhanlee atthu owaamini, wiira noopole ukumiihu.
^ par. 20 1 Ikoronika 28:9 Ni weeva, mwanaka Salomawu, uncuwele Nluku aathumwana ni unswalele ni nrimaa wotheene ni nuukumyaa wotheene, woraati, ukhala wiira Yehova naacuwela iri wanrimani wa khula ntthu ni naacuwela unkelelaaya moopuwelelo aatthu. Weeva wantothaka, uyova naahala wiihiya wiira umphwanye; masi wannyanyalaka, uyo naahala wuukhotta mpaka.
^ par. 61 ILATARATO: Mwene Asa ahaahiiha apiipyaawe uhoolela kontha ayo yaanaakurumica atthu unswalela nluku oohikhweeli. Atthu ookhuluvelya yankavihera Asa anantakiha ni anawaapwesakaca attontto yaaswaleliya.
^ par. 63 ILATARATO: Anamathelana anawiitthenkaca wiira yakavihere ulalyeera nipuro nihirivo anamalalyeera enci.
