MWAHA WOOSOMIYA 32
Amirawo—Nhihiye wuunuwa mminepani mwapattisiyaka
“Nuunuwe nhina citthu cotheene.”—EFESU 4:15.
NCIPO 56 Faz da Verdade a Tua Vida
NINHALA WIITTHUCANI? *
1. Citthuni amirawo enci cinkhitiryaaya upanka?
KHULA mwaakha, mayamunneehu amirawo enci anaapattisiya. Wakhala wiira weeva ummirawo upattisiye mphiyaaruni, ukupali wiira mayamunnaa ni mayanuunwaa o wanlokoni uhaatteela nrima cinene ni Yehova ciicammo khureere untteela nrima! (Miru. 27:11) Weemele vakaani ni wuupuwele citthu cotheene cikhitinryaa upanka. Weeva uhosomeeha Ibiiblya ni atthunaka cihovira myaakha cinci usomaka. Nlattu wo iyo itthwiiyo, uhokupali wiira Ibiiblya ikhanle Nuulumo na Nluku. Itthu yuulupale cinene ikhitinryaa ukhanle uncuwela ni unfenta Yehova. Nwo unfentanwo uholipa cinene wanrimani waa, mpaka weeva uholakela uvaherera ukumyaa wa Yehova ni upattisiya. Ninawuuttottopela nlattu weeva woolakela upanka iyo itthwiiyo!
2. Ninhala wiitthucani nhina ula mwahoola?
2 Ukati weeva weetthenkacaa wiira upattisiye, khweeliini cihookhumelela citthu cinci cittehattehale waamini waa. Masi nanlelo uhaana uwehereraka wiira cinaahala wuukhumelela citthu cikhwaawe cinhala uttehatteha waamini waa. Sotwani naahala upanka yotheene inhalaawe ukhitiri wiira alolovihe unfenta waa Yehova ni wiira oohiihe unswalela. (Efesu 4:14) Masi uhihiye iyo itthwiiyo iwiirannyeelaka. Isiyani inlamuliyaa upanka wiira unvaresese Yehova ni ukhitiri weettela wiivaherera waa wa Yehova? Weeva uhaana wiikurumicaka wiira ‘ukhomaale’ awula wuunuwe mminepani. (Mabere. 6:1) Unhala ukhitiri cani upanka iyo itthwiiyo?
ISIYANI WEEVA INLAMULIYAA UPANKA WIIRA WUUNUWE MMINEPANI?
3. Isiyani makristau otheene inlamuliyaaya upanka yapattisiyaka?
3 Otheene cihu napattisiyaka, nihaana neettelaka ikano apostolu Paulu yaavahilyaawe makristau o Efesu. Uyo aawiirenle wiira yaalamuliya ukhala makristau ookhomaala. (Efesu 4:13) Nimoolumelo makhwaawe, nihaana nihihiyaka wuunuwa mminepani. Khunnirika ucuwelela itthu apostolu Paulu yaapheelaawe uhimya noopuwelaka mananna mwaana cinoonuwaawe. Mwaana ayariyaka phiyaaru, athumwaane ni anumwaane unawaattela nrima cinene. Masi ayo khampheela wiira uyo akhale mwaana mpaka. Nuuwakatyaaya, uyo mwaanooyo haana oonuwaka ni uhiya “makhalelo eenamwane.” (1 Akor. 13:11) Inanna imocaaru, hiiva makristau napattisiyaka, nihaana nihihiyaka wuunuwa mminepani. Phimaana, nimpheela woona citthu cinhala unikavihera wuunuwa mminepani.
4. Isiyani inhala wuukavihera wuunuwa mminepani? Utaphulele. (Nwehe Afilipo 1:9.)
4 Utepe unfenta Yehova. Weeva khweeliini unanfenta cinene Yehova. Unookhalaru commo, weeva uhaana wiikurumicaka wiira nno nifentonno nivire nitepaka wuunuwa. Manannani? Apostolu Paulu hohimya mananna ninhaleehu ukhitiri utepa unfenta Yehova nhina Afilipo 1:9. (Nsome. *) Paulu aholompa alepelaka wiira nifento no mayamunna “nivire nitepaka winciva.” Iyo itthwiiyo inthoonyera wiira hiiva pooti ukhitiri wuncerera unfenta wihu Yehova. Masi ninhala ukhitiri cani? Nihaana nikhalanaka ‘ucuwelaca weekhweeli ni ankhili.’ Ukati unvireehu nincuwelaka sana-saana Yehova, hiiva ninaahala utepa unfenta ni utikhinaca makhalelwaawe ni mananna cimpankaawe citthu cawe. Hiiva ninaahala upheela upanka citthu cinontteeliha nrima ni khaninhala upheela upanka hataa itthu inonriipiha nrima. Phimaana, hiiva ninawiikurumica ucuwela isiyani Yehova impheelaawe ni manannani ninlamuliyeehu weettela iyo itthwiiyo.
5-6. Isiyani inhala unikavihera utepa unfenta Yehova? Ntaphulele.
5 Unfenta wihu Yehova unaahala utepa wuunuwa neekurumicaka uncuwela Mwanawe, ukhala wiira uyo aanawaatakiha sana-saana Athumwaane. (Mabere. 1:3) Inanna yoncuwela ratta Yesu ukhanle usoma ivangeeliyu cese. Wakhala wiira weeva khunaaya wiilemaleliha usoma Ibiiblya khula nihuku, unoonela cani wancera ilelo? Ukati woosoma ihantisi ya Yesu, wiikurumice ucuwelela makhalelo yaarinaawe. Atthu otheene ni hataa anamwane khayoova ukhala wakhiviru nuuyo. (Mark. 10:13-16) Yesu aanawaafenta atthu, aari namaana ni attharyaawe khayaamoova unhimerya citthu coopuwelaaya. (Mat. 16:22) Ukhala wiira Yesu nawaatakiha Athumwaane, pooti wankupaliihu wiira Yehova ciicammo haana ayo makhalelwaayo. Hiiva pooti unlompa Yehova ninrimeehu wotheene woohoova wiira naahala univiruwela nlattu wo mananna cineecooneehu. Yehova naanifenta ni naaniwacera otheene cihu.—1 Pet. 5:7.
6 Yesu waananriipa nrima awoonaka atthu yahuvaka. Apostolu Matewus heera: “Woona wawe nkupitti waatthu, ahowoonela ikiriri, kontha yaakhala yarutthuwacaka ni yakakheleliyaka uno nuuno toko ikhontwaa coohimakampuci.” (Mat. 9:36) Vano Yehova nokhala cani awoonaka atthu yahuvaka? Yesu aheera: “Apaapaaka ari wiirimu khampheela wiira arimele hataa ntthu mmoca mwankaani va.” (Mat. 18:14) Unaareera ucuwela inanna Yehova cineecoonaawe awoonaka atthu yahuvaka! Phimaana waneereehu wiira nancuwela Yesu, ninaahala utepa unfenta Yehova.
7. Kontha isiyani uviriha ukati unari ni mayamunna ookhomaala pooti wuukavihera weeva?
7 Itthu ikhwaawe inhala wuukavihera utepa unfenta Yehova ni wuunuwa mminepani ukhanle uviriha ukati unari mayamunnaa ni mayanuunwaa ookhomaala mminepani. Utothe woona mananna ayo mayamunnaayo cinkhalaaya ootteeliya nrima. Ayo khattharuwile nlattu woolakela unswalela Yehova. Waalepele wiira yuuhimyeere citthu ciwiirannyeele ukati ukhanlyaaya yanswalelaka Yehova. Ni wapheelaka ulakela upanka citthu cuulupale, waalepele ankhili. Uhiliyale wiira “yakhalaka atthu enci oovaha ankhili, cinaakhumelela citthu comaana.”—Miru. 11:14.
Weeva unhala wiitthenkaca cani wiira ucuwele itthu yoohimya ucikolani woolumiyaka mwaha wo wiiriya wiira hiiva khanumpiye ni Nluku? (Nwehe iparaagarafu 8-9)
8. Isiyani inlamuliyaa upanka wakhalaka wiira unawuurika ukupali itthu ineetthucihaaya Ibiiblya?
8 Umalihe citthu cinoorika ukupali. Khampa conneehu nhina iparaagarafu 2, Sotwani naahala upanka yotheene inhalaawe ukhitiri wiira oohiihe wuunuwa mminepani. Inanna imoca inhalaawe umananiha upanka iyo itthwiiyo, ukhanle wuurikarikihela ukupali itthu ineetthucihaaya Ibiiblya. Wootakihera, pooti ukhumelela atthu anhala umananiha wuukupaliha wiira Nluku khanumpale, masi hi niphattuwacile veekha. Atthunaka ukati waaryaa mwanhima, weeva khawaawacera uyo mwahooyo. Vano wuunuwilya, uyo mwahooyo pooti wuulumiya ucikolani. Ni citthu cinoolumaaya mapurusooryaa aneetthuciha uyo mwahooyo pooti ukhala khampa cosariya awula cokhweeli. Masi ayo mapurusooryaayo atthunaka khanapaca weemela ni wuupuwela citthu cinthoonyera wiira Nluku khweeli phinumpile. Unaareera wuupuwela itthu inhimyaaya Miruku 18:17: “Wakhumelelaka nlattu, ntthu nopacera wuuluma pooti ukhala khampa haana isariya, mpaka wanhalaawe uwa ntthu nkiina onkohakoha wiira icuweliye ikhweeli.” Uhiya wuupuwela wiira citthu cotheene cineetthucihiyaa ucikolani cikhanle ikhweeli, ukumihe ukati wiira usome saana itthu ineetthucihaaya Ibiiblya. Weeva pooti uvarela nteko ilivuru cihu ni uwoopana mwaha mayamunna khalayi yahaakupali wiira Nluku phinumpile. Waakohe ayo mayamunnaayo isiyani yaakupalihile wiira haavo Nluku numpile ni noniwacera hiiva. Uwoopana mwaha ayo mayamunnaayo pooti wuukavihera ukupali wiira hiiva numpiye ni Nluku.
9. Itthu yaamwiirannyenle Melissa iwiitthucihale isiyani?
9 Nrokorihu mmoca neehaniya Melissa ahosoma myaha cinthoonyera wiira Nluku phinumpale ni nnyo myahannyo cahonkavihera utepa ukupali itthu Ibiiblya ineetthucihaaya. * Uyo nrokorihuuyo heera co: “Ucikolani, mapurusoore anawuuluma wiira Nluku khanumpale niinanna inaakupaliha atthu wiira iyo ikhanle ikhweeli. Wiipaceroni, mi akaatothale usoma sana-saana uyo mwahooyo, kontha kaanawoova woonelela wiira mapurusooryaaka yahaana isariya. Masi kahoopuwela wiira Yehova khampheela wiira nikupali citthu co mbiiblyani kontha ninoohimyeeriya paahi, masi nopheela wiira nooneehe mwaaneeneehu wiira nnyo citthunnyo cikhanle ikhweeli. Phimaana, mi kahosoma ilivuru Existe um Criador Que Se Importa com Você? Ni kahosoma ibroxura A Vida — Teve um Criador? ni A Origem da Vida — Cinco Perguntas Que Merecem Resposta. Myaha caasomilyaaka nhina nnyo ilivurunnyo phi itthu khweeliini yaapheelaaka. Phataari kinasomile nnyo myahannyo khalayiiru.”
10-11. Isiyani inhala wuukavihera unyema urupihana woohiloka? (Nwehe 1 Atesalonika 4:3, 4.)
10 Unyeme urupihana woohiloka. Wakhalaka mmirawo, weeva pooti upheela cinene urupihana awula pooti ukhalaka wiira ahaavo atthu anookhanyereriha. Iyo phi itthu Sotwani impheelaawe wiira weeva upanke. Masi isiyani inhala wuukavihera weeva ulipa wakhanyererihiyaka urupihana uhinoncivela Nluku? (Nsome 1 Atesalonika 4:3, 4. *) Unlompe Yehova ninrimaa wotheene ni unhimyeere citthu cotheene cinwiira. Ukati wonlompa, uhinvithe hataa itthu ni unlepele wiira oovahe ikuru. (Mat. 6:13) Uhiliyale wiira Yehova nopheela wuukavihera, kahi wuuhukhumu. (Isaa. 103:13, 14) Usoma Ibiiblya ciicammo pooti wuukavihera. Nrokorihu Melissa, moopenleehu mwaha, hohimya itthu yankavihenre uhiya wuupuwela citthu coohiloka. Uyo enre co: “Usoma Ibiiblya khula nihuku uhokikavihera uvilela, uhiliyala wiira mi kinonswalela Yehova ni upheela weettela malamulwaawe muukumini waka.”—Isaa. 119:9.
11 Uhimananihe umaliha veekha marikariko ankhalanaa. Uwuulumane asithumwanaa ni waahimyeere citthu cotheene cinwiira. Wuupaceroni, pooti wuurika waahimyeera citthu caa. Masi ikhanle itthu yofayita waahimyeera. Nrokorihu Melissa heera: “Mi kahonlompa Yehova wiira akikavihere ulipa nrima ni kikhitiri waahimyeera apaapa itthu yaakirikarika. Waahimenryaaka apaapa iyo itthwiiyo, mi wahokitaphuwa nrima. Mi kaanaacuwela wiira Yehova ahotteeliya nrima nlattu wookoona kaahimyeeraka apaapa iyo itthwiiyo.”
12. Isiyani inhala wuukavihera ulakela upanka citthu comaana?
12 Weettele mattharelelo o mbiiblyani. Ukati unviraa wuunuwaka, weeva uhaana ulakelaka mwaaneennya citthu coohala upanka. Masi uhiliyale wiira cihaavo citthu cinci nanlelo cinlamuliyaa wiitthuca. Isiyani inlamuliyaa upanka wiira uhilakele upanka itthu yootakhala inhala uhonona upatthannya ni Yehova? (Miru. 22:3) Nrokorihu mmoca neehaniya Kari hohimya itthu yankavihenre ulakela upanka citthu comaana. Uyo nrokorihuuyo hoonelela wiira nkristau ookhomaala khanweherera ukati wotheene uhimyeeriya citthu cinlamuliyaawe ni cihinlamuliyaawe upanka. Uyo enre co: “Mi kihoonelela wiira kihaana kicuwelaka mananna Yehova cinweheraawe citthu, kahi uhela mmuru malamulo paahi.” Phimaana, ukati weeva woosoma Ibiiblya, wiikohe co: ‘Ila itthu insomakeela, inkiitthuciha isiyani nhina mananna Yehova cinweheraawe ula mwahoola? Ula mpantta unsomaakoola, ihaavo ikano awula nttharelelo no mbiiblyani nineetthucaaka ninhala ukikavihera ulakela upanka citthu comaana? Weettela itthu inhimyaaya Ibiiblya unhala ukiphwanyiha ifayitani?’ (Isaa. 19:7; Isai. 48:17, 18) Weeva wasomaka Ibiiblya ni woopuwelaka mattharelelo ni ikano cineetthucihaaya, khunhala wuurika ulakela upanka citthu cinontteeliha nrima Yehova. Ni ukati unviraa wuunuwaka mminepani, weeva unaahala woona wiira khunlamuliya ukati wotheene uweherera uhimyeeriya citthu cooreera ni coohireera upanka, kontha mwaaneennya unaahala ucuwela mananna Yehova cinweheraawe itthu impheelaa ulakela upanka.
Phaapani nrokorihu anaapatthananaawe? (Nwehe iparaagarafu 13)
13. Ukhalana apatthani oolipa mminepani unhala wuukavihera cani? (Nwehe Miruku 13:20.)
13 Ukhalane apatthani anonfenta Yehova. Toko coopenleehu mwaha, apatthannyaa pooti wuukavihera wuunuwa mminepani. (Nsome Miruku 13:20. *) Nrokorihu mmoca neehaniya Sara ahancera ulolovaca mminepani. Masi ihaavo itthu yankavihenre urukunusa moopuwelelwaawe. Uyo enre: “Uyo ukatyuuyo, mi kahaatotha apatthani yaakikavihenre cinene. Mi kahancera utthenkaca myaha co nrevistani Ukhalenla co khula isumana naanuunu amoca o wanlokoni. Mpwanaaka nkhwaawe o wanlokoni ahokikavihera wancera ukomentari mmamikutthaanoni. Nlattu wookaviheriya naayo asimpwanaakaayo, mi kahokhitiri wiikurumica usoma Ibiiblya veekha ni uhihiyerera ulompa. Upatthannyaaka ni Yehova uhokhala woolipa ni ulolovaca waka mminepani uhomala.”
14. Munneehu Juliano aakhitinri cani waaphwanya apatthani omaana?
14 Unhala ukhitiri cani waapatthanana atthu ookhomaala mminepani? Humu mmoca o wanlokoni neehaniya Juliano heera: “Ukati waaryaaka mmirawo, mi kahaapatthanana mayamunna yaakhumanaaka wuulalyeerani. Ayo yaari mayamunna o wiikurumica ni yahokikavihera wiira ukicivele nteko woolalyeera ihapari ca Nluku. Ayo yahokikurumica wiihelela mpika woovara nteko wo wiivahereriya ukati wotheene. Ciicammo, mi kahoona wiira nlattu woopheela waapatthanana amirawo akhunanaka ni yaarina ilikaaka, kaanawiihaleeliha ukhalana apatthani omaana yaahala ukikavihera ulipa mminepani. Ni uno upeteelyuuno nanlelo kihaana apatthani omaana. Ayo asimpwanaakaayo anaakikavihera ulakela upanka citthu comaana, toko ucuwela uthanla ratta mathukelo ni anaakikavihera ukhalana upatthani woolipa ni Yehova.”
15. Isiyani apostolu Paulu yaamwiirenlyaawe Timotiyu? (Nwehe 2 Timotiyu 2:20-22.)
15 Vano isiyani inlamuliyaa upanka woonaka wiira haavo ntthu wanlokoni hinreera umpatthanana? Apostolu Paulu ancuwela wiira ule ukatyuule yahaavo makristau yahaalipale mminepani. Phimaana, ahomwiirela Timotiyu wiira haapatthanane ayo atthwaayo. (Nsome 2 Timotiyu 2:20-22. *) Upatthani urineehu ni Yehova uhaana ifayita cinene. Phimaana, nihinhiye hataa ntthu ahononaka upatthani womaana uneekurumiceehu ukhalana ni Nluku.—Isaa. 26:4.
WIIHELELE MIPIKA CINHALA WUUKAVIHERA WUUNUWA MMINEPANI
16. Mipikani weeva cinlamuliyaa wiihelela?
16 Wiihelele mipika comaana. Weeva pooti wiihelela mipika cinhala ulipihaca waamini waa ni cinhala wuukavihera ukhala nkristau omaana. (Efesu 3:16) Wootakihera, weeva pooti wiihelela mpika woopanka usoma wo veekha ni woosoma Ibiiblya khula nihuku. (Isaa. 1:2, 3) Awula pooti wiihelela mpika wo wiilemaleliha unlompa cinene Yehova. Ciicammo, pooti wiihelela mpika wo wiitthuca uthanla ratta mathukelwaa ni uvarela nteko ratta ukatyaa. (Efesu 5:15, 16) Yehova awoonaka wiira unawiikurumica khweeliini wuunuwa mminepani, naakhala ootteeliya nrima cinene.
Mpikani nrokorihu uneekurumicaawe wiirannyeeha? (Nwehe iparaagarafu 17)
17. Ifayitani weeva inhalaa uphwanya weekurumicaka waakavihera akhunanaa?
17 Wiikurumica waakavihera akhunanaa ikhanle itthu inhala wuukavihera ukhala nkristau ookhomaala. Yesu aheera: “Uvaha unaatteeliha nrima cinene uvirikana ni waakhelela.” (Mite. 20:35) Khweeliini, weeva unaahala uphwanya ifayita cinci weekurumicaka uleva ukatyaa ni ikuru caa wiira waakavihera akhunanaa. Wootakihera, weeva pooti wiihelela mpika wo waakavihera mayamunna o wanlokoni yuuluvanle ni anweryaaciya. Awula pooti waakavihera uthuma citthu upacari awula waalakihera umpotolaca telefooni ni ikomputatoori. Ni wakhala wiira weeva unlompwana, pooti wiihelela mpika wookhala nrumiya o wanlokoni wiira waakavihere ratta mayamunnaa. (Afili. 2:4) Ciicammo, weeva pooti wiivaherera wiira waakavihere atthu akhwaawe ahikhanle o wanlokoni wiikurumicaka waalalyeera ihapari comaana ca Nluku. (Mat. 9:36, 37) Ni wakhitiryaa, wiikurumice wancera uvara nteko wo wiivahereriya ukati wotheene.
18. Uvara nteko wo wiivahereriya ukati wotheene unhala wuukavihera cani wuunuwa mminepani?
18 Uvara nteko wo wiivahereriya ukati wotheene, pooti wuukavihera wuunuwa mminepani nimananna menci. Uvara nteko weepiyoneeru pooti wuuhulela mikhora wiira usome Icikola ya Anamalalyeera Umwene, wiira uvare nteko u Peteli awula wiira ukavihere miteko cootekatekiya mapuro answaleliya Yehova. Nrokorihu mmoca neehaniya Kaitlyn heera: “Upattisiya waka, itthu ikikavihenre wuunuwa mminepani ukhanle uviriha ukati kikhalaka ni mayamunna ni mayanuunu yancenre ulalyeera khalayi. Waatakiha ayo mayamunnaayo, uhokikavihera ucuweleeha Ibiiblya ni ucuwela wiitthuciha ratta.”
19. Iparakhani cinhalaa uphwanya weekurumicaka uhihiya wuunuwa mminepani?
19 Weeva unaahala waakhela iparakha cinci weekurumicaka wuunuwa mminepani. Wootakihera, weeva khunhala urihakaca ukatyaa waavyaka citthu cihimphureliya itthu. (1 Jo. 2:17) Ciicammo, khunhala uhuva kontha unaahala ulakela uhipanka citthu coohinamaana. Weeva unaahala ukhalana ukumi womaana ni utteeliya nrima weekhweeli. (Miru. 16:3) Ntakihero naa ninaahala waalipiha mayamunna amirawo ni hataa oolupale. (1 Tim. 4:12) Ni itthu yuulupale cinene, ukhanle weeva ukhalana nnema ni utteeliya nrima nlattu woocuwela wiira unanciveliha Yehova ni woocuwela wiira uyo khanle Mpatthannyaa.—Miru. 23:15, 16.
NCIPO 88 Os Teus Caminhos Quero Entender
^ Mmirawo apattisiyaka, atthu otheene wanlokoni anaakhala ootteeliya cinene. Ale ampattisiya phiyaaru ahaana nanlelo yiikurumicaka wuunuwa mminepani. Ula mwahoola, unaahala waakavihera amirawo o wanlokoni uhihiya ukhomaala mminepani, ni khweeliini unaahala waakavihera ciicammo atthu otheene wanlokoni.
^ Afilipo 1:9 Ila phi itthu kinlepelaaka kalompaka: wiira nifento ninyu nivire nitepaka winciva, nuucuwelaca weekhweeli ni nankhili.
^ Macina makiina ahaakakhanihiya.
^ 1 Atesalonika 4:3 Kontha ila phi itthu Nluku impheelaawe: nopheela wiira nyuuva nkhale atthu owaarya ni nnyeme urupihana woohiloka. 4 Khula ntthu iriyariinyu haana acuwelaka weettihera ratta irutthwaawe ni makhalelo owaarya ni ohisima.
^ Miruku 13:20 Ntthu neetta naatthu ankhili omaana, nuuyo nhala ukhala ntthu ankhili omaana, masi ule neettana atthu oohankhili omaana naahala uttharuwa.
^ 2 Timotiyu 2:20 Nyuuva nnaacuwela wiira inupa yuulupale khinkhalana ikaruma cowooru ni coparaata paasi, masi ciicammo inaakhalana ikaruma cothaapwa ni cooloko. Cihaavo ikaruma cinvareliya nteko ukati woopankiya citthu cooreera, masi ikaruma cikhwaawe cinvareliya nteko ukati woopankiya citthu coonanaraca. 21 Phimaana, wakhalaka wiira haavo ntthu neereeriha wiira hikhale toko ikaruma cinvareliya nteko nicitthu coonanaraca, uyo ntthuuyo nohala ukhala ikaruma invareliya nteko nicitthu cooreera, yooreerihiya, yonkavihera mwaneene ni yootthenkaciya wiira ipanke khula nteko womaana. 22 Phimaana, utthawe citthu cinaacivelesa amirawo, masi wiikurumice utotha isariya, waamini, nifento, nnema, wamoca ni ale anaaswalela Apwiiya ninrima womaana.
