MWAHA WOOSOMIYA 33
Yehova nawaakhikicera ni nawaawacera apoovwaawe
“Miitho a Yehova anawaakhalenla ale ammoova.” —ISAA. 33:18.
NCIPO 4 “Jeová É o Meu Pastor”
NINHALA WIITTHUCANI? *
1. Nlattuni Yesu wanlepenlyaawe Yehova wiira aakhikicere attharyaawe?
YESU hinaaya wiiviya, ahonlepela Yehova itthu yofayita. Uyo ahonlepela wiira aakhikicere attharyaawe. (Joau 17:15, 20) Hi ninaacuwela wiira ukhuma nenne nokhalayi, Yehova nawaakhikicera apoovwaawe ni khanhiya waawacera. Masi Yesu aanaacuwela wiira attharyaawe yaanaahala ulupatthiya cinene ni Sotwani. Yesu ciicammo aanaacuwela wiira attharyaawe yaahala ukhitiri uvilela ulupatthiya ni Sotwani yakaviheriyaka ni Yehova.
2. Toko cinthoonyeraaya Isaalimu 33:18-20, nlattuni nihinlamuliyeehu woova masakha?
2 Ituninya ya Sotwani inkhaleehu inawaawaanela masakha menci makristau. Hi cinaanikhumelela citthu cinci cinniloloviha ni cinnirikarikiha unvaresesa Yehova. Masi nhina ula mwahoola, ninaahala woona wiira khaninlamuliya woova. Yehova naaniwacera. Uyo naacuwela citthu cinniirannyeela ni khula ukati naapheela unikavihera. Nttwee noone matakihero meeli o mbiiblyani anthoonyera wiira ‘Yehova nawaakhalenla ale ammoova.’—Nsome Isaalimu 33:18-20. *
YEHOVA NAANIKAVIHERA NEECOONAKA UKHALA VEEKHA
3. Citthuni cinniiriha wiicoona ukhala veekha?
3 Hi ninaapanka mphantte mphwinko muulupale waamuciihu o mminepani. Hataa ukhalaka commo, ukati nkhwaawe atthunaka ninawiicoonaka ukhala veekha. Wootakihera, amirawo pooti wiicoona ukhala veekha yathamelaka nloko nikhwaawe awula ucikolani ukati unlamuliyaaya uhimya citthu cinkupalyaaya. Akhwaawe, anaakhala nimasukhuli ni ooriipiya nrima ni pooti wiicoona ukhala veekha nlattu woohimoona ntthu owaakavihera waanana itthu inwiira. Ayo atthwaayo pooti uhipheela waahimyeera akhunanaya masukhulyaaya kontha anoopuwela wiira khaavo ntthu nohala uwacera itthu inwiira. Khula ukati uneecooneehu ukhala veekha, hiiva ninaakhala nimasukhuli ni wuupuwela wiira khaavo noniwacera. Masi Yehova khampheela wiira niicoone commo. Nincuwela cani?
4. Nlattuni porofeeta Eliyasi wenryaawe wiira uyova phaari porofeeta aahanle paahi?
4 Muupuwele ntakihero na porofeeta Eliyasi, nswali ookhuluvelya a Yehova okhalayi. Apwiyamwene Yesapeeli yaholakela umwiiva porofeeta Eliyasi ni uyo ahokhala mahuku 40 aatthawaka. (1 Mam. 19:1-9) Utthawa wawe, porofeeta Eliyasi ahorwaa wiipitha nnikhukuni ni ahomwiirela Yehova: “Porofeeta hanle thi mi paahi.” (1 Mam. 19:10) Masi ule ukatyuule, nanlelo yahaavo maporofeeta makhwaawe. Porofeeta Obadiya ahokhitiri uwiipithiha maporofeeta 100 wiira ahiiviye naapwiyamwene Yesapeeli. (1 Mam. 18:7, 13) Vano isiyani yaamwiiriha porofeeta Eliyasi wiicoona ukhala veekha? Uyo atthunaka oopuwela wiira maporofeeta Obadiya yaawooponlyaawe yaheevakaciya otheene. Ciicammo, uyo eecoona ukhala veekha atthunaka nlattu wo woona wiira khaavo aalakenle unswalela Yehova toko uyova ukati woonihenryaawe umwaakoni Carmelo wiira Yehova phi Nluku eekhweeli. Awula, pooti ukhalaka wiira uyo ooniha wiira khaavo aacuwela citthu caamwiirannyeela ni khaavo anwacera. Hi khanincuwela khweeliini mananna porofeeta Eliyasi ceecoonaawe uyo ukatyuuyo. Masi hi ninaacuwela ila itthwiila: Yehova ancuweleeha nlattuni Eliyasi weecoonaawe ukhala veekha ni ancuwela mananna onkavihera.
Neecoonaka ukhala veekha, wuupuwela mananna Yehova canwacenryaawe porofeeta Eliyasi unnimaaliha cani? (Nwehe iparaagarafu 5-6)
5. Manannani Yehova cankavihenryaawe porofeeta Eliyasi woona wiira khaari veekha?
5 Yehova ahopanka citthu cinci wiira ankavihere porofeeta Eliyasi. Uyo ahonhiya Eliyasi uhimyaca mananna ceecoonaawe. Ikwaha piili, Yehova ahonkoha Eliyasi co: “Unvarani nna nipuronna?” (1 Mam. 19:9, 13) Nnyo ikwaha piilinnyo, Yehova ahonviriyana Eliyasi ukati waahimyaawe citthu cankhaliha nimasukhuli. Yehova ahomwaakhula porofeeta Eliyasi anthoonyeraka wiira aari nuuyova ni wiira khanle Nluku nakuru cinci. Yehova ciicammo ahonhimyeera porofeeta Eliyasi wiira nanlelo yahaavo asarayeli enci yanswalela. (1 Mam. 19:11, 12, 18) Khweeliini, Eliyasi wahontaphuwa nrima ukati wanhimenryaawe Yehova masukhulyaawe ni ukati weewilyaawe citthu Yehova coolumilyaawe. Vano, Yehova ahonvahacera Eliyasi miteko cuulupale. Uyo ahonlepela Eliyasi unthanla Hasayeli wiira akhale mwene o Siiriya, Jeú wiira akhale mwene o Isarayeli ni Elisewu wiira akhale porofeeta. (1 Mam. 19:15, 16) Yehova unruma wawe nnyo mitekonnyo, aanankavihera Eliyasi wiira hikhale ukati mwinci oopuwelaka masukhulyaawe. Yehova ciicammo ahomwaaverya Eliyasi mpatthannyaawe: porofeeta Elisewu. Vano nyuuva, isiyani inlamuliyeenyu upanka wiira Yehova ookavihereni mweecoonaka ukhala veekha?
6. Isiyani inlamuliyeenyu wuuluma ukati wonlompa Yehova mweecoonaka ukhala veekha? (Nwehe Isaalimu 62:8.)
6 Yehova nawuulattulani wiira mmuulumane munlompaka. Uyo naacuwela masakha anookhumelelani ni naakhuluveliha wiira naahala uviriyana ulompa winyu khula ukati. (1 Atesal. 5:17) Yehova unancivela uviriyana ulompa waatthu anonswalela. (Miru. 15:8) Isiyani inlamuliyeenyu wuuluma mwanlompaka Yehova ukati uneecooneenyu ukhala veekha? Muntakihe porofeeta Eliyasi. Munhimyeere Yehova citthu cotheene cinookhalihani nimasukhuli. (Nsome Isaalimu 62:8. *) Munhimyeere masukhuliinyu ni mananna cineecooneenyu. Munlepele Yehova wiira ookavihereni umaliha ayo masukhulyaayo. Wootakihera, wakhala wiira weeva unawoova awula khunoorya waahimyeera myaha co mbiiblyani atthu anaasomanaa, unlepele Yehova wiira ookavihere ulipa nrima. Ciicammo, pooti unlepela wiira ookavihere ucuwela utaphulela saana citthu cinkupalyaa. (Luka 21:14, 15) Wakhala wiira nyuuva nnaakhala ukati mwinci wuuriipakani nrima, munlepele Yehova wiira ookavihereni ukhitiri umuulumana nkristau ookhomaala ni unhimyeera masukhuliinyu. Nyuuva pooti unlepela Yehova wiira amwiirihe ntthu nohaleenyu umuulumana wiiweeha itthu inwiirani. Munhimyeere Yehova yotheene inwiirani wanrimani winyu ni inooriipihani nrima. Mmananihe ucuwelela mananna Yehova cinhalaawe waakhula ulompa winyu ni ntthune ukaviheriya naakhunaninyu. Mwapankaka commo, nyuuva khannohala utepa wiicoona ukhala veekha.
Nyuuva munneekurumica ulalyeera cinene ni waalalyeerana mayamunna oovirikana? (Nwehe iparaagarafu 7)
7. Ntakihero na munna Mauricio niwiitthucihileni isiyani?
7 Yehova honivaha nteko wofayita wiira nivare. Nkupali wiira Yehova nawoona ni unancivela nteko nyuuva unvareenyu wuulalyaani ihapari comaana ni wanlokoni. (Isaa. 110:3) Wiikurumica cinene uvara uyo ntekooyo pooti wuukaviherani uhitepa wiicoona ukhala veekha. Unhala wuukaviherani cani? Muupuwele itthu yaamwiirannyenle munna mmoca neehaniya Mauricio. * Upattisiya wawe, mpwanaawe mmoca ahancera vakaani-vakaani uhiya weettela ikhweeli co mbiiblyani. Munna Mauricio enre co: “Umoona mpwanaaka ahiyaka unswalela Yehova wahokiloloviha makhuva. Mi kahancera wiikoha wakhala wiira khanhala ukhitiri unvaresesa Yehova ni uhihiya upanka mphantte muumucini wawe. Mi kaheecoona ukhala veekha ni koopuwela wiira khaavo aacuwela itthu yaakiira.” Isiyani yankavihenre munna Mauricio? Uyo hottonkaca eeraka co: “Mi kahancera ulalyeera cinene. Upanka commo, wahokikavihera uhitepa wuupuwela masukhulyaaka ni citthu caakiriipiha nrima. Mi waanaakitteela nrima ni akeecoona ukhala veekha kalalyeeraka nimayamunna akhwaawe o wanlokoni.” Hataa ukhalaka wiira khaninkhitiri ulalyeera nimayamunna co ni co, hiiva pooti waalalyeerana nitelefooni awula nantikhaka iwarakha. Ni napankaka commo, ninaakhala oolipihiya cinene. Isiyani-tho yankavihenre munna Mauricio? Uyo woottonkaca enre co: “Mi kahancera wiikurumica uvara cinene miteko co wanlokoni. Kaanawiitthenkaca saana kavahiyaka miphantte coomikutthaanoni. Nnyo miphanttennyo caanaakikavihera woona wiira Yehova ni mayamunna o wanlokoni anaakoona ukhalana ifayita.”
YEHOVA NAANIKAVIHERA YANIKHUMELELAKA MASAKHA
8. Hiiva nineecoona cani yanikhumelelaka masakha?
8 Hi ninkhala ukati wo mahuku ookhicera. Phimaana, otheene cihu anaanikhumelela masakha. (2 Tim. 3:1) Hataa nicuwelaka iyo itthwiiyo, masakha makhwaawe pooti unikhumelela ukati uhinweherereehu. Wootakihera, hi pooti unithwaa nsurukhu, uniphwanya iretta awula ukhwa ntthu anfenteehu. Masakha toko ayo pooti unikhaliha nimasukhuli, utepa yaniphwanyaka masakha menci wo nkwaha mmoca. Masi nihaana nihiliyalaka wiira Yehova naacuwela citthu cinnirannyeela. Uyo pooti unikavihera uvilela khula masakha anhala unikhumelela nilipaka nrima.
9. Masakhani yamphwanyale Jó?
9 Muupuwele mananna Yehova cankavihenryaawe Jó. Uyo yahonkhumelela masakha oorika wo nkwaha mmoca. Nihuku nimoca paahi, Jó cahonkhumelela ihasara cinci. Woopacera, mihuwo cawe cotheene cahennyiya. Vano, anantekwaawe yaheevakaciya, asaanaawe otheene yahaaphituwela inupa ni yahokhwa. (Jó 1:13-19) Uvira waya ukati vakaani, nanlelo unweryaaka nrima nlattu wo nnyo citthunnyo, Jó yahonkela iretta yoohiirya yanrakalihacile ni yaatankanyile irutthwaawe. (Jó 2:7) Jó ahowerennya cinene mpaka aheera: “Ukirusa ukumyaaka ni akimpheela-tho ukhala nkumi.”—Jó 7:16.
Yehova wiira anthoonyere Jó wiira aananfenta, ahooluma mananna menci uyova cinwaceraawe citthu cumpilyaawe (Nwehe iparaagarafu 10)
10. Manannani Yehova cankavihenryaawe Jó uvilela masakha yankhumelenle? (Nwehe ilatarato yo wakaapani.)
10 Yehova aanawoona citthu caamwiirannyeela Jó. Yehova aananfenta Jó. Phimaana, ahonkavihera cinene wiira akhitiri uvilela masakha yankhumelenle. Wootakihera, Yehova ahomuulumana Jó ni ahomuupusera wiira ucuwelaca wawe khummalela ni naawacera ninifento citthu cotheene cumpilyaawe. Uyo ukatyuuyo, Yehova ahooluma inama cinci cootikhiniha. (Jó 38:1, 2; 39:9, 13, 19, 27; 40:15; 41:1, 2) Yehova ciicammo ahonkurumica nlopwana ookhuluvelya eehaniya Eliwu wiira anlipihe ni ammaalihe Jó. Eliwu ahonkhuluveliha Jó wiira Yehova khanhiya waatthuvela aswalyaawe anvilela. Masi Yehova ciicammo ahomwiiriha Eliwu unvaha ikano Jó. Eliwu ahonkavihera Jó uhiya wiicuupuwela mwaaneennyaawe, masi woona wiira Yehova, Ule ompile citthu cotheene, khanle muulupale unipwaha otheene cihu. (Jó 37:14) Ciicammo, Yehova ahonvahacera Jó nteko. Uyo ahonruma Jó waalompela apatthannyaawe afaalusu araru yaavanre matampi. (Jó 42:8-10) Vano hiiva yanikhumelelaka masakha, Yehova nonikavihera cani?
11. Manannani Ibiiblya cinnimaalihaaya yanikhumelelaka masakha?
11 Ilelo, Yehova khannuulumana khampa caamuulumannyaawe Jó. Masi uyo nonuulumana mbiiblyani. (Aroo. 15:4) Niweherero noohoolo Yehova ninnivahaawe ninaanimaaliha. Nttwee noone moolumo o mbiiblyani annimaaliha yanikhumelelaka masakha. Wootakihera, mbiiblyani Yehova naanikhuluveliha wiira khiivo hataa itthu, hataa masakha oorika cinene, anhala unimwalaniha nuuyova. (Aroo. 8:38, 39) Yehova ciicammo naakhuluveliha wiira ri wakhiviru waale anonlompa. (Isaa. 145:18) Uyo ciicammo hohimya wiira nankhuluvelaka, ninaahala ukhitiri uvilela khula masakha ni khaninhala uhiya ukhala unitteelaka nrima. (1 Akor. 10:13; Tiya. 1:2, 12) Ibiiblya ciicammo inaanuupusera wiira masakha annikhumelela ilelo ankhala oohipica uvira nalattanihaka nuukumi woohimala unweherereehu wahoolo. (2 Akor. 4:16-18) Yehova ciicammo naakhuluveliha wiira naahala waamalamaliha ale ankumiherera masakha anniphwanya: Sotwani ni atthu anontakiha. (Isaa. 37:10) Nnoonela cani uhela mmuru iveerusu co mbiiblyani cinhala wuumaalihani ni wuukaviherani uvilela masakha anhala wuukhumelelani?
12. Wiira Ibiiblya inikavihere, isiyani Yehova impheelaawe wiira hiiva nipanke?
12 Yehova mpheela wiira nikumihe ukati wiira nisome Ibiiblya ni nuupuwele itthu insomeehu. Neettelaka citthu cineetthuceehu mbiiblyani, waamini wihu ni upatthaniihu ni Yehova unaakhala woolipa. Ni iyo itthwiiyo phinhala unikavihera ulipa wiira nivilele masakha annikhumelela. Yehova ciicammo nawaavaha nnepaawe wowaarya ale anoonihera nimeettelwaaya wiira anaakhuluvela Ibiiblya. Nnepa wowaarya pooti univaha ikuru wiira nikhitiri uvilela khula masakha anhala unikhumelela.—2 Akor. 4:7-10.
13. Iyoolya yo mminepani innitthenkaceraaya “ipottha yookhuluvelya ni yankhili” innikavihera cani uvilela marikariko?
13 “Ipottha yookhuluvelya ni yankhili” inaakaviheriya ni Yehova wantikha myaha, upanka ividiyu ni icipo cinnikavihera ulipihaca waamini wihu ni uhiitthaala. (Mat. 24:45) Nihaana nivarelaka nteko iyoolya yo mminepani yotheene Yehova innivahaawe. Arokorihu amoca ankhala u Estados Unidos ahohimya mananna cinsukhurweelaaya iyoolya yo mminepani inaakheleehu. Ayo yinre co: “Cihovira myaakha 40 kinswalelaka Yehova ni myaakha cotheene civinre, waamini waka uhottehiya ikwaha cinci.” Ayo arokorihwaayo yahaakhumelela marikariko menci. Ataataaya yahopwesiya niikaaro yeettihaawe nlopwana oohapaliya, athumwanaya ni anumwanaya yahowerennya cinene mpaka waakhwilyaaya ni ayo arokorihwaayo yahaakela iretta ineehaniya cancro ikwaha piili. Isiyani yaakavihenre uvilela citthu cotheenennyo? Ayo aheera co: “Yehova khahiile ukiwacera ni iyoolya yo mminepani inkivahaawe avarelaka nteko ipottha yookhuluvelya ni yankhili phinkikavihera uvilela. Phimaana, mi kineecoona khampa Jó enre: ‘Mpaka wanhalaaka ukhwa, mi akinhala uhiya imaannyaaka!’”—Jó 27:5.
Manannani ninlamuliyeehu waakavihera akhunanihu wanlokoni? (Nwehe iparaagarafu 14)
14. Manannani Yehova cinaakurumicaawe mayamunneehu wiira anikavihere yanikhumelelaka masakha? (Nwehe 1 Atesalonika 4:9.)
14 Yehova naawiitthuciha apoovwaawe ufentana ni ukaviherana ukati wo masankiho. (2 Akor. 1:3, 4; nsome 1 Atesalonika 4:9. *) Mayamunneehu ni mayanuunwiihu enci anontakiha Eliwu anaapheela cinene unikavihera uvilela masakha annikhumelela. (Mite. 14:22) Muupuwele itthu yaakhumelenle arokorihu aneehaniya Diane. Awannyaya yahowerennya cinene ni mayamunna o wanlokoni yahopanka citthu cinci wiira yaakavihere uhihiya ulipa mminepani. Ayo arokorihwaayo aheera: “Uvilela ayo marikarikwaayo wahonirika. Masi nnyo myeerinnyo, mi kahoona mananna Yehova caanikaviheraawe. Mayamunna o wanlokoni yahopanka yotheene yaakhitinryaaya wiira anikavihere. Mayamunna enci yahonootola, yahonilikarela ni akhwaawe yahonikapatta. Citthu caapankaaya cahonivaha ikuru wiira nivilele. Ni ukhala wiira mi akincuwela weettiha ikaaro, mayamunna o wanlokoni yaheetthonkomaniha wiira khula isumana anipakherye yanirweehaka umikutthaanoni ni wuulalyaani.” Khweeliini ikhanle iparakha yuulupale upanka mphantte mumphwinkoni waamuci oofentana khampa ayo!
NINANSUKHURU YEHOVA NLATTU WO MANANNA CINNIFENTAAWE NI CINNIWACERAAWE
15. Nlattuni ninkupaliihu wiira ninaahala ukhitiri uvilela masakha otheene anhala unikhumelela?
15 Otheene cihu anaahala unikhumelela masakha. Masi khampa ciitthucileehu nhina ula mwahoola, khaavo masakha anhaleehu waanana veekha cihu. Yehova khanle Apaapeehu ni nawoona citthu cinnirannyeela. Uyo nokhala ni hiiva ukati wotheene, nawiiwa ulompa wihu ni naapheela cinene unikavihera. (Isai. 43:2) Pooti wankupaliihu wiira hi ninaahala ukhitiri uvilela masakha otheene anhala unikhumelela, kontha Yehova naanivaha citthu cotheene cimpheeleehu wiira nikhitiri uvilela: ulompa, Ibiiblya, iyoolya yo mminepani ni mayamunneehu annifenta.
16. Isiyani inlamuliyeehu upanka wiira Yehova hihiye uniwacera?
16 Hi ninaasukhurweela cinene, kontha Nlukwiihu naaniwacera otheene cihu. Isaalimu 33:21 ineera: “Nrimeehu unkhala unitteelaka nlattu wawawe.” Hiiva ninthoonyihera unsukhuru wihu Yehova navarelaka nteko citthu cotheene cinnivahaawe wiira anikavihere. Hiiva khaninlamuliya weemela ni ukhala ninwehereraka Yehova paahi wiira anikavihere. Nihaana niikurumicaka umwiiwelela ni upanka citthu cinoncivela. Napankaka commo, uyo khweeliini naahala uniwacera otheene cihu mpaka!—1 Pet. 3:12.
NCIPO 30 Meu Deus, Meu Amigo e Pai
^ Hi ninaapheela cinene ukaviheriya ni Yehova wiira nikhitiri uvilela masakha annikhumelela mahukwaala. Ula mwahoola, unaahala unuupusera wiira Yehova khanhiya waawacera apoovwaawe. Uyo nawoona masakha annikhumelela otheene cihu ni naanikavihera uvilela ayo masakhaayo.
^ Isaalimu 33:18 Moone! Miitho a Yehova anawaakhalenla ale ammoova, anweherera nifento nawe nookhuluvelya, 19 wiira ukhwa uhaahonone ni wiira oopole ukumyaaya uwakati wotala. 20 Hi ninonweherera Yehova. Uyo nokhala nikavihero ni nikhikicero nihu.
^ Isaalimu 62:8 Munkhuluvele khula ukati, apoovwaaka. Munhimerye irineenyu wanrimani. Nluku khanle mwiikitthweehu.
^ Macina makiina ahaakakhanihiya.
^ 1 Atesalonika 4:9 Masi, nhina wo nifento no mayamunna, pooti uhiwantikhelani, kontha nnawiitthucihiya ufentana ni Nluku.