Kontha isiyani ninaapheela Umwene wa Nluku?
Wuupaceroni, ukati wumpiyaaya apinaatamu, Mumpiihu neehaniya Yehova, phaalamulela ituninya yotheene veekha cawe. Uyo aalamulela ni nifento. Yehova ahopanka nlava nomaana Uweeteni wiira ikhale itthoko yaapinaatamu, ciicammo uyo ahowaaverya icoolya cinci. Uhiya commo, uyo ahaavaha apinaatamu nteko wofayita cinene wiira avare. (Uphattuwaca 1:28, 29; 2:8, 15) Apinaatamu yaahala ukhala ni nnema yantthunenle Nluku waalamulela.
Apinaatamu oopacera yahonkhotta Nluku ukhala nhoolelyaaya
Ibiiblya inaattonkaca wiira nlayikha nimoca nanrukuwenle Nluku, vano nikhalaka Sotwani, Tiyapu, naheera wiira Nluku khawamphwanela waalamulela apinaatamu. Nno nlayikha nno naahimile wiira apinaatamu yaanaahala ukhala ootteeliya cinene woohihooleliya ni woohilamuleliya ni Nluku. Wooriipiha nrima, asipaapeehu oopacera, Atamu ni Hawa, yahomwiiwelela Sotwani ni yahonrukunuwela Nluku.—Uphattuwaca 3:1-6; Apokalipise 12:9.
Ukhala wiira Atamu ni Hawa yahonkhotta Nluku ukhala Nhoolelyaaya, ayo yahohaleela ipeephoni ni nweherero waarinaaya woohala ukhala mpaka nuukumi womaana. (Uphattuwaca 3:17-19) Itthu yaapankilyaaya ciicammo yahaahonona asaana yaayanryaaya. Ibiiblya inaahimya wiira, nlattu woottheka Atamu, “ahokela matampi ntuninyani, ni ukhwa nlattu wo itampi.” (Arooma 5:12) Ciicammo itampi ihokumihera masakha makhwaawe: “Pinaatamu nanhoolela pinaatamu nkhwaawe wiira eephwanyihe masakha.” (Eklesyaste 8:9) Ni moolumacero makhwaawe, apinaatamu yiilamulelakoono, masakha khanhala uhiya ukhumelela.
ULAMULELA WAAPINAATAMU UNAWANCERA
Ninroti ahonrukunuwela Yehova
Nlopwana mmoca aapacenre waalamulela apinaatamu nohimyaciya mbiiblyani khanle Ninroti. Masi uyo ciicammo ahorukunuwela ikuvernu ya Yehova. Ikhumelo ukati wa Ninroti, atthu ookhalana ukhulupale, ahovarela nteko uhoolelyaaya wiira yaaphwanyihe masakha akhunanaya. Myaakha cookhalaka 3.000 uttuli, mwene Salomau ahantikha eeraka: “Kihoona miithori aatthu anhuvihiya, masi khaarivo oohala waamaaliha. Atthu yaahuviha yahaana ikuru.”—Eklesyaste 4:1.
Iyo itthwiiyo khivirikanne ni mahukwaala. Mwaakha wo 2009, ilivuru imoca yaakumiheriye nimphwinko woothotokanihiya uneehaniya Nações Unidas, yahohimya wiira ikuvernu yoohiloka ineera itepaka wooneneliya wiira ikhanle “itthu imoca inaakumihera citthu coohinamaana apinaatamu.”
UKATI IKUVERNU YA NLUKU UNHALAAYA ULAMULELA
Apinaatamu anawaapheela ahooleli omaana ni ikuvernu yomaana. Iyo phi itthu Nluku ikhuluvelihilyaawe!
Hataa ikuvernu caapinaatamu cinooniya ukhala comaana, khacikhitinri umaliha masakha aapinaatamu
Nluku hotikitherya Umwene, awula ikuvernu. Uyo umwennyooyo unaahala umalamaliha ikuvernu caapinaatamu cotheene, ni “uyo paahi phinrwaa ulamulela mpaka.” (Daniele 2:44) Uyo umwennyooyo phiyooyo atthu anlompakaaya wiira uwe. (Matewus 6:9, 10) Masi kahi Nluku mwaneene phinhala ulamulela iyo ikuvernwiiyo. Uhiya commo, uyo honthala ntthu pacile ukhala watuninyani, wiira akhale Mwene. Tipani Nluku nthanlilyaawe?
