Yesu enre: “Ilapo inaahala uwanihana ni ilapo ikhwaaya, umwene ni umwene nkhwaawe; ni unaahala ukhala uttettemelaca wotthaya, wo khula nipuro, iretta, uthwaa wo yoolya.” (Luka 21:10, 11) Nnyo citthunnyo ceerannyaaka ukati umocaaru, canhala woonihera wiira ‘Umwene wa Nluku uri wakhiviru.’ Niireke nnyo citthunnyo cineera ceerannyaaka uwakati umoca ntuninyani motheene? Nttwee noone.

1. IKHOTTO

Mwaakha wo 1914, yaahancera ikhotto yuulupale ntuninyani motheene yahaatokile ukhumelela yumpiyeru apinaatamu! Anamasoma História aneera wiira mwaakha wo 1914, ukhanle mwaakha wiirihile ulakeliya upankiya citthu, kontha uyo mwaakhooyo phaakhumelenlyaaya Ikhotto Yoopacera Yontuninyani. Iyo ikhottweeyo phaapacerihile uvareliya nteko cinene ikaruma toko, ibomba coottikhiya ni matteeke, ikaaro cookhottoni cineehaniya tanque ni ikaruma cowoopiha ni cowiiva cikhwaawe. Wahoolo waya, yahokhumelela Ikhotto Yonayeeli Yontuninyani, ni iyo ikhottweeyo phaapacerihile uvareliya nteko ikaruma toko bomba atómica. Ikhumelo mwaakha wo 1914, mapuro menci cinaakhumelelaka ikhotto, ni atthu imiliyau cene ahokhwa nlattu wo nnyo ikhottonnyo.

2. UTTETTEMELACA NI UPARUWACA WOTTHAYA

Khula mwaakha, unaakhumelelaka uttettemelaca ni uparuwaca wotthaya imaara cookhalaka 100 ni “unaakwanyulacaka citthu cinci”, ineera Academia Britânica. Ikhurupu yo Estados Unidos inwehaweha ni imphimaphima uttettemelaca wotthaya watuninyani wotheene, ineera wiira “yawehaceraka imaara cittettemenlyaaya itthaya (ukhuma mwaakha wo 1900 mpaka nna), khula mwaakha pooti ukhumelelaka uttettemelaca ni uparuwaca wotthaya imaara 16.” Atthu akiina aneera wiira mahukwaala unawoonannya cinene uttettemelaca ni uparuwaca wotthaya kontha ikaruma cinvareliya nteko wiira ciwehawehiye nnyo citthunnyo cihookhala comaana uvikana co khalayi. Masi unawoonannya wiira uttettemelaca ni uparuwaca wotthaya uneera ukumiheraka uhuva ni atthu enci aneera yakhwaaka.

 3. UTHWA WO IYOOLYA

Uthwa wo iyoolya, unaakhumelelaka ntuninyani motheene nlattu wo ikhotto, unyonkanaciya, uthwa nsurukhu, mananna oolimiya uhikhala omaana awula uhiitthenkaciya wiira caananiye ihasara cuulupale cinkhumelelaka. Irelatoriyu yo 2018 yo mphwinko unkawesaka iyoolya ntuninyani, ineera: “Ntuninyani motheene, atthu imiliyau 821 inawaavola itala, ni iriyari wo ayo atthwaayo, imiliyau 124 khanlya saana.” Asaana imiliyau cookhalaka 3.1 anaakhwa khula mwaakha nlattu woohilya saana.

4. IRETTA

Ilivuru imoca ikumiheriye ni Mphwinko Woothotokana Unwacera Ukumi Ntuninyani, ineera: “Ukhuma mwaakha wo 2001, cineera cikhumelelaka ikwerere cuulupale. Iretta cokhalayi, toko koolera, ittekusa inkhaliha miitho osafarau ni iretta ineehaniya peste, cihoturuwela; ni iretta conaanaano cineera cikhumelelaka, toko Sars [síndrome respiratória aguda severa], ikothomo yowaakuva umwaryeela, Mers [síndrome respiratória do Oriente Médio], ébola ni zica.” Koronaviiru COVID-19 phi iretta ikiina ikhumelenle mphiyaaruni. Hataa masiyentista ni mameetiku yoonenelaka mananna menci oovoniha iretta, ayo khankhitiri uphwanyera mirette iretta cotheene.

5. ULALENNYA IHAPARI COMAANA NTUNINYANI MOTHEENE

Yesu ahohimya itthu ikiina yaahala woonihera wiira Umwene wa Nluku uri wakhiviru, uyo enre: “Nnya ihapari comaana nnya co Wuumweneni cinaarwaa ulalennya ntuninyani motheene munkhaliya, yahimyeriyaka atthu o khula ilapo; vano phinhalaaya umala ulumwenku wotuninya.” (Matewus 24:14) Uhookhalaru wiira mahukwaala atthu anawaanana masankiho, atthu oovikana imiliyau 8 okhula maloko aneera yalalyeeraka ihapari comaana co Umwene wa Nluku, ilapo 240 ni iluuka cimpwaha 1.000. Iyo itthwiiyo yaari ihinatoko wiirannya yumpiyeru apinaatamu.

Citthu caahimilyaawe Yesu wiira canhala wiirannya, cineera ceerannyaaka mahukwaala. Kontha isiyani ikhanlyaaya itthu yofayita ucuwela iyo itthwiiyo? Kontha Yesu enre: “Mwarwaaka woona cikhumelelaka citthu toko cila, ncuwele wiira Umwene wa Nluku uri wakhiviru.”—Luka 21:31.

Nawehaceraka citthu Yesu caahimilyaawe ni citthu cikhwaawe cinhimyaaya Ibiiblya wiira canhala wiirannya, cinaanikavihera ucuwela wiira Nluku hotikitherya Umwennyaawe wiirimu, mwaaka wo 1914. a Uyo mwaakhooyo Yesu Kristu hokhalihiya Mwene o Umwene wa Nluku. (Isaalimu 2:2, 4, 6-9) Woohipica Umwene wa Nluku unaahala ulamulela ituninya, umalamaliha ikuvernu cotheene coohinamaana ni ukhaliha ituninya ipeephoni wiira apinaatamu akhale mpaka.

Ciicammo, itthu yoolumacilyaawe Yesu imphwanyannya nhina nivekelo niitthucihilyaawe, inaahala wiirannya woohipica, uyo enre: “Umweneenyu uwe. Ipankiye impheeleenyu wiirimu, ciicammo vathi va.” (Matewus 6:10) Masi isiyani Umwene wa Nluku impankaaya ikhumelo mwaakha wo 1914 wancenryaaya ulamulela? Ni isiyani inhalaaya upanka uyo Umwennyooyo ukati unhalaaya waalamulela apinaatamu otheene?