1. Isiyani otheene cihu inaapheeleleehu amuciihu?

WEEVA uhaana amucyaa ahinaaya uncuwela ni unfenta Yehova? Wakhala wiira uhaana, pooti wiicoona toko nrokorihu neehaniya Pauline. * Uyo naattonka: “Ukhuma nihuku kicuwenlyaaka ikhweeli, kaapheela wiira amucyaaka otheene arwee yakhale upeephoni wamoca ni miiva. Kaanaapheela cinene wiira awannyaka, Wayne, ni mwanihu answalele Yehova wamoca ni miiva.”

2. Makohoni anhaleehu waakhula nhina ula mwahoola?

² Hiiva khaninlamuliya waakhanyereriha amuciihu utthuna ihapari comaana. Masi ninlamuliya waakavihera wiira atthune ihapari co mbiiblyani. (2 Tim. 3:14, 15) Kontha isiyani nihaana waalalyeera amuciihu? Kontha isiyani nihaana nithoonyeraka wiira ninawaawacera? Ninlamuliya waakavihera cani unfenta Yehova toko hiiva cinonfenteehu? Ni manannani mayamunna o wanlokoni otheene cinlamuliyaaya unikavihera? Nnya phi citthu cinhaleehu ucuwela nhina ula mwahoola.

3. Toko cinthoonyeraaya 2 Peturu 3:9, kontha isiyani nihaana naalalyeeraka amuciihu?

³ Nihaattamela cinene umala wo ila ituninyeela, ni ule noonihera “uratteene uphavela ukumi woohimala” phinhala woopwa. (Mite. 13:48) Hiiva ninaarihakaca ukati mwinci ni ikuru cihu naalalyeeraka ihapari comaana atthu nihinaacuweleehu. Phimaana, nihaana isariya yopheela wiira amuciihu, anaacuweleehu, ciicammo answalele Yehova. Ni nlattu wookhala nanifento, Yehova “khaavo ntthu mpheelaawe wiira atankanyiye, masi mpheela wiira atthu otheene attharuwe.”—Usome 2 Peturu 3:9.

4. Isiyani atthunaka hiivano invonyeehu ukati wo waalalyeera amuciihu?

 ⁴ Nihaana nuupuwelaka wiira ahaavo mananna omaana ni oohinamaana oolalyeera ihapari comaana. Nanlalyeeraka ntthu hinoncuweleehu, imaara cinci ninawuuluma niihisima. Masi ntthuuyo akhalaka mmuciihu, atthunaka hiiva ninonhimyacera ikhweeli woohinkhuwakhuwa.

5. Isiyani inlamuliyeehu uhiliyala napheelaka waalalyeera amuciihu?

⁵ Weeva unawuupuwela ikwaha waapacerihalya unlalyeera mmucaa? Atthunaka unawuuwerya nrima woopuwelaka mananna coolumacalya ni waanapheela unamuulumanne tootho ni mananna makhwaawe. Apostolu Paulu haavaha makristau ila ikannyeela: “Moolumweenyu ahaana ukati wotheene yakhalaka oocivela, oolukiya ni maakha, wiira ncuwele inanna yoohala umwaakhula khula ntthu.” (Akol. 4:5, 6) Unaareera uhiliyala ayo moolumwaayo ukati wo waalalyeera amuciihu. Kontha nahitthareke ayo moolumwaayo, unawoopiha hiivano waahulusa amuciihu, uhiya waakavihera wiira apheele uniiwelela.

6-7. Nkristau rina awannyawe awula amwaarawe ahiri Saahiti a Yehova, kontha isiyani haana athoonyeraka wiira nawaawacera? Utakihere.

⁶ Uthoonyere wiira unawaawacera. Pauline, romoliye, neera: “Wuupaceroni, ukati woowuulumana awannyaka kaamuulumaka paasi Nluku awula Ibiiblya. Hiiva khanoolumaka myaha cikiina.” Masi Wayne, awannyawe Pauline, khayaacuwela mena vakaani myaha co mbiiblyani ni kheeweeha itthu yoolumaaya amwaarawe. Phimaana, uyo ahancera wuupuwela wiira amwaarawe yaapheela ittiini paahi. Wayne ahancera woova wiira amwaarawe yahokela ittiini yowoopiha ni yaanaahala uhapusiya.

⁷ Pauline naahimya ikhweeli eeraka wiira uhaavo ukati waavirihaawe iwoora cinci nari nkhayi ni mayaamunna o wanlokoni. Uyo aanaarwaaka  umikutthaanoni, wuulalyeerani ni aanaarwaa mmawanuwaya mayamunna. Pauline naattonka: “Ukati nkiina Wayne aanaakhalaka veekha, kontha aphiyaka uwaani, khamphwanya ntthu.” Wayne aanaapheela cinene ukhala wamoca naamwaarawe ni mwanawe, ni ahaana isariya. Wayne khaacuwela atthu yaapacenryaaya waapatthanana amwaarawe ni unkhala toko Pauline waanancivela cinene ukhala naasipatthannyaawe o phiyaaru uhiya ukhala naawannyawe. Phimaana, Wayne mpaka ahomwiirela Pauline wiira amwalanace. Woonela waa weeva, manannani Pauline caahalaawe uthoonyera wiira nawaawacera awannyawe?

8. Toko cinthoonyeraaya 1 Peturu 3:1, 2, isiyani amuciihu inweheehaaya?

⁸ Uthoonyere meettelo omaana. Imaara cinci, amuciihu anweheeha kahi itthu inoolumeehu, masi itthu impankeehu. (Usome 1 Peturu 3:1, 2.) Iyo phi itthu Pauline yaacuwelenlyaawe wahoolo. Uyo neera: “Mi kaanaacuwela wiira Wayne aanaanifenta ni khaapheela umwalanaca ni miiva. Masi ukati weeralyaawe wiira nimwalanace, kahoona wiira miiva kahaana kanceraka upanka citthu toko Yehova cimpheelaawe. Uhiya ukhala kuulumaka cinene, miiva kahaana kancaka wiikurumica uthoonyera meettelo omaana.” Pauline ahohiya unkhanyereriha Wayne wuuluma myaha co mbiiblyani ni ahancera umuulumana myaha cikiina, uhiya umuulumana paahi myaha co mbiiblyani. Ciicammo, Wayne ahomoona Pauline akhalaka ntthu onnema ni ahomoona mwaamwanawe athoonyeraka meettelo omaana. (Miru. 31:18, 27, 28) Ukati Wayne woonalyaawe wiira Ibiiblya yaanawaakavihera amucyaawe, uyo ahotthuna ucuwela itthu Nuulumo na Nluku ineetthucihaaya.—1 Akor. 7:12-14, 16.

9. Kontha isiyani khaninlamuliya woocyaa waakavihera amuciihu?

⁹ Uhoocye waakavihera amucyaa. Yehova naanivaha ntakihero nomaana. Ibiiblya ineera wiira,  “imaara cinci,” Yehova nawaavaha atthu ukati wiira atthune ihapari comaana ni aphwanye ukumi woohimala. (Jer. 44:4) Ni apostolu Paulu ahomwiirela Timotiyu wiira aakavihere akhunanawe woohoocya. Kontha isiyani? Apostolu Paulu mwaneene nawaakhula eeraka: “Wapanka commo unaahala uyoopola weeva ni unaahala uwoopola atthu anooviriyana.” (1 Tim. 4:16) Hiiva ninawaafenta amuciihu ni nimpheela wiira ayo acuwele ikhweeli ciri mbiiblyani. Woone itthu inkhumelenle Pauline. Uvira waya ukati vakaani, moolumwaawe ni meettelwaawe omaana yahaakavihera amucyaawe. Nna va uyo ri oottteeliya kontha awannyawe ananswalela Yehova nkhayi nuuyova. Ooyeeli ahokhala mapiyoneeru, ni Wayne hokhala humu o wanlokoni.

10. Kontha isiyani nihaana nivilelaka?

¹⁰ Waavilele. Ukati wiitthucaleehu ikhweeli, hiiva nihohiya ukupali citthu caakupaliihu khalayi ni nihorukunusa meettelweehu. Masi pooti ukhala wiira amuciihu unawaarika ulemalela makhalelweehu o phiyaaru. Wootakihera, ayo ampacera unoona wiira hiivano khaninkhala wamoca naayo ukati umpankaaya isukuhulu cottiini ni khanineekelihaca isiyaasa. Iyo pooti waarusa amuciihu akiina. (Mat. 10:35, 36) Masi iyo itthwiiyo khinlamuliya unihiiha waahimyera citthu cinkupaliihu. Noocyaka waakavihera amuciihu, khweeliini ninawaahukhumu wiira ayo khunaaphwanela uphwanya ukumi woohimala. Masi Yehova khanivahale nteko woohukhumu—uyo ntekooyo nvahale Yesu. (Joau 5:22) Navilelaka, pooti ukhala wiira amuciihu anaahala utthuna uviriyana ihapari cinaahimyereehu.—Uwehe ikwaaturu “ Uvarele nteko isayitiihu wiira wiitthucihe.”

11-13. Wiitthucale isiyani ni mananna Alice caawacenryaawe asithumwaane?

¹¹ Uthoonyere unamaana, masi uhaahiye amucyaa yarukunusaka itthu ilakenlyaa upanka. (Miru. 15:2) Woone ntakihero na Alice. Uyo oonuwihiye naasithumwaane yahaamwaamini Nluku ni yeekelihaca isiyaasa. Ukati waahiilyaawe ukhala wapuwani waya, Alice aheetthuca ikhweeli. Uyo ahoona wiira woohipicapica, aalamuliya waahimyera asithumwaane citthu comaana ceetthucaawe. Alice neera: “Wapicaka waahimyeera amucyaa citthu co phiyaaru cinkupalyaa ni meettelwaa o naanaano, ayo anaahala utepa ututhuwa ukati unhalaaya ucuwela.” Alice aanaawantikhelaka iwarakha asithumwaane. Nhina nnyo iwarakhannyo, uyo aanaamananiha wantikha mwaha woonaawe wiira unaahala waacivela asithumwaane, toko nifento. (1 Akor. 13:1-13) Khula ukati, uyo aanawaasukhuru asithumwaane nlattu wo citthu cotheene cimpankenlyaaya ni khaahiya waaveleelihera citthu. Arwaaka uwootola, uyo aanawiikurumica waakavihera anumwaane uvara miteko co wapuwani. Wuupaceroni, asithumwaane Alice khawaacivenle ukati waahimenryaawe citthu co naanaano caakupalyaawe.

¹² Alice akhalaka wapuwani waasithumwaane, khaahiya usoma Ibiiblya. Alice naattonka: “Iyo yahaakavihera amaama woona wiira Ibiiblya yaari itthu yoonaaka ukhala yofayita cinene.” Yoole ukatyuule, athumwaane Alice yaholakela wiitthuca vakaani itthu inhimyaaya Ibiiblya. Ayo yaapheela woona isiyani yaarukunusale moopuwelelo a mwanaya ni yaapheela uphwanya mbiiblyani itthu yoohala uvaanyiha. Alice neera: “Mi kahaavaha apaapa Ibiiblya ni kahowantikhela moolumo wabiiblyani yaavahalyaaka.” Yaakhumelenle isiyani? Athumwaane Alice uhiya uphwanya citthu coopheela uvaanyiha, ayo yaanootikhinihiya cinene ni citthu caasomalyaaya Nnuulumoni na Nluku.

¹³ Nihaana nathoonyeraka unamaana, masi khaninlamuliya waahiya amuciihu wiira arukunuse citthu cilakenleehu upanka, hataa wakhalaka ukati woorika. (1 Akor. 4:12b) Wootakihera, Alice ahaana avilelaka ulupatthiya naanumwaane. “Ukati waapattisiyaaka, amaama yahokiihana ‘mwaana ootakhala nrima.’” Alice aapankale  isiyani? “Uhiya umaala, mi kahaahimyera amaama niihisima wiira kaapheela ukhala Saahiti a Yehova ni akaahala uturuwela uttuli. Ciicammo kahowiirela amaama wiira kinawaafenta cinene. Nahonla nkhayi ni kahowaapyeela iyoolya yoociva. Ukhuma ule ukatyuule, amaama yahancera ukupali wiira Ibiiblya yaanaakikhaliha ntthu omaana.”

14. Kontha isiyani khaninlamuliya waahiya amuciihu yarukunusaka citthu cilakenleehu?

¹⁴ Atthunaka pooti uvira ukati mwinci amuciihu ahinaaya ukupali wiira hiiva ninoona ukhala itthu yuulupale unswalela Yehova. Wootakihera, ukati Alice waalakenlyaawe wancera uvara nteko weepiyoneeru uhiya utthara nteko asithumwaane waapheelaaya, anumwaane yahonla. Masi Alice khaarukunusale moopuwelelwaawe. Uyo neera: “Wahiyaka upanka itthu ilakenlya wiira utthare itthu imoca impheelaaya amucyaa, ayo anaahala wuukhanyereriha upanka citthu cikiina cimpheelaaya. Mphantte nkhwaawe, weeva wathoonyeraka unamaana, masi uhitthunaka wiira ayo arukunuse citthu cilakenlya, pooti ukhala wiira amucyaa akiina anaahala uwiiwelela.” Iyo phi itthu yankhumelenle Alice. Ilelo, athumwaane ni anumwaane anvara nteko weepiyoneeru, ni athumwaane akhanle humu o wanlokoni.

15. Toko cinthoonyeraaya Matewus 5:14-16 ni 1 Peturu 2:12, manannani ‘miteko comaana’ caakhwiihu cinaakaviheraaya amuciihu?

¹⁵ Wiira Yehova aawaane atthu wanlokoni wawe, uyo nvarela nteko ‘miteko comaana’ co mayamunna o wanlokoni. (Usome Matewus 5:14-16; 1 Peturu 2:12.) Wakhala wiira awanuwinyu awula amwaarinyu khanakhala Saahiti a Yehova, niireke ayo ahaacuwela mayamunna o wanlokoni?  Pauline romoliye wuupaceroni, aanawaalattulaka wapuwani wawe mayamunnaawe ni asirokorawe o wanlokoni. Commo, awannyawe, Wayne, yaanaahala waacuwela mayamunna. Wayne nawuupuwela mananna caakaviheriyaawe ni munna mmoca waawehera ratta Masaahiti a Yehova: “Uyo munnooyo aholepela ifeeriya yo nihuku nimoca untekoni wawe wiira awe paahi umoona bola wamoca ni miiva. Iyo yahokiiriha miiva wuupuwela co: ‘Ula ntthu oothukaniya!’”

16. Nlattuni ninlamuliyeehu waalattula amuciihu umikutthaanoni?

¹⁶ Inanna imoca yooreera waakavihera amuciihu ukhanle waalattula umikutthaanoni. (1 Akor. 14:24, 25) Nkutthaano Wayne waapacenryaawe woona waari wo Nuupuwelelo na nookhwa a Yesu—kontha waapankiye Wayne naturuwale untekoni ni waari nkutthaano woohipica. Uyo neera: “Akeeweehale mwaha woolumiye, masi atthwaayo kinaawuupuwela. Ayo yaanaawa ukuulumana, yaanaakaakhelela ni yaanakivaha moono. Kaanaakhitiri woona wiira yaari atthu ooreera nrima.” Wayne ciicammo ahoona wiira wanlokoni ahaavo munna mmoca naamwaarawe yankaviheraka Pauline. Ayo yaanankavihera unwacera mwaana umikutthaanoni ni wuulalyeerani. Phimaana ukati waalakenlyaawe ucuweleeha citthu co phiyaaru caakupalyaawe Pauline, Wayne ahonlepela uyo munnooyo wiira ansomihe Ibiiblya.

17. Kontha isiyani khaninlamuliya ukhala ni masukhuli, ni nlattuni uhinlamuliyeehu woocya waakavihera amuciihu?

¹⁷ Otheene cihu nimpheela wiira amuciihu otheene answalele Yehova wamoca ni hiiva. Masi hataa niikurumicaka venci wiira naakavihere, ayo pooti uhitthuna ikhweeli. Wakhala wiira iyo phi itthu yuukhumelenle, uhikhale ni masukhuli. Kontha ayova phinlamuliya ulakela utthuna awula uhitthuna. Ni hiivano khaninlamuliya unkhanyereriha ntthu utthuna citthu cinkupaliihu. Wahoolo, amucyaa atthunaka anaahala woona mananna weeva cinkhalaa ootteeliya nlattu wonswalela Yehova ni iyo pooti inaahala waapankiha urukunusa moopuwelelwaaya. Phimaana, waalompele. Uwuulumane niihisima. Uhoocye waakavihera. (Mite. 20:20) Waamini ni ukupali wiira Yehova naahala ucaaliha wiikurumica waa. Ni amucyaa yatthunaka uwiiwelela, ayo anaahala woopwa!