1. Isiyani makristau inlamuliyaaya upanka wiira atthawe mpaka wiimaleloni?

MAKRISTAU ari muutthawani yapheelaka waakhela ukumi. Weeva atthunaka upacenre utthawa phiyaaru, awula atthunaka upacenre khalayi. Hataa ukhalaka wiira nipacenre phiyaaru awula khalayi, otheene cihu khaninlamuliya uhiya utthawa mpaka wanhaleehu uphiya wampikani. Apostolu Paulu ahowantikhela makristau ooFilipo iwarakha inhala unisovenriha wiira nihoocyeele utthawa. Ukati makristau ooFilipo waakhenlyaaya iyo iwarakheeyo, yahaavo yanswalela Yehova ukhuma nenne no khalayi. Ayo yaanaatthawa ratta, masi Paulu ahowuupusera itthu yofayita: wiira atthawe mpaka wiimaleloni, ayo yaalamuliya utthawa yooniheraka uvilela. Paulu aapheela wiira makristau ooFilipo antakihe ni ‘yiikurumice uphiyeera mpika.’—Afili. 3:14.

2. Kontha isiyani ukati apostolu Paulu waasovenrihalyaawe afilipo, waari ukati womaana?

² Ukati apostolu Paulu waasovenrihalyaawe makristau afilipo, waari ukati womaana. Kontha makristau yaanaalupatthiya ukhuma ukati waapacenryaaya utthenkaciya nloko no makristau uFilipo. Citthu cotheene caapacenre mwaakha wo 50, ukati Nluku wanrumalyaawe Paulu ‘urwaa uMasetoniya.’ (Mite. 16:9) Ukati Paulu ni Silas waaphiilyaaya uMasetoniya, yahoncuwela nthiyana mmoca eehaniya Lidia. Lidia “aanaaviriyana” ihapari comaana ni “Yehova ahotthukula cinene nrimaawe.” (Mite. 16:14) Woohipica, Lidia ni atthu otheene yaakhala wapuwani wawe yahopattisiya. Masi Sotwani kheetthaalale. Alopwana owasitati yahoncisa Paulu ni Silas waakhulupale ni yahowootheriha unkumihaca nanrokottole wasitati. Phimaana Paulu ni Silas yahocaphiya ni yahotthukiya, ni wahoolo yahoomoliya wasitati. (Mite. 16:16-40) Niireke ayo yahoocya? Mena! Vano mayamunna o wanlokoni no phiyaaru yaakhanle cani? Ayo ciicammo yahovilela! Unawoonannya wiira ayo yahiicoona ulipihiya ni ntakihero nomaana na Paulu ni Silas.

3. Isiyani apostolu Paulu yaacuwelaawe, ni makohoni anhaleehu waakhula nhina ula mwahoola?

 ³ Paulu aholakela uvilela. (2 Akor. 4:16) Masi uyo aanaacuwela wiira aalamuliya uweheeha itthuvo yaahalaawe waakhela wiira akhitiri utthawa mpaka wiimaleloni. Ntakihero na Paulu ninniitthuniha isiyani? Atthuni o mahukweehu athoonyenre waamini anoonihera wiira hiivano pooti uvilela hataa nikhalanaka masankiho? Ni itthu inweherereehu uhoolo innikavihera cani utepa ulakela uhoocya?

4. Paulu aathoonyenre cani wiira aanawiikurumica hataa akhalaka ni marikariko?

⁴ Wuupuwele mananna apostolu Paulu ceekurumicaawe ukati waawantikhenlyaawe iwarakha afilipo. Uyo aanootthukiya nnupani uRooma ni khaalamuliya ukhuma wiira arwee wuulalyeerani. Waanookhalaru commo, apostolu Paulu aheekurumica waalalyeera atthu yaawa umootola ni aanawantikhela iwarakha maloko oottayi. Inanna imoca, ilelo ahaavo mayamunna enci ahinkhitiri ukhuma wapuwani wiira arwee wuulalyeerani nlattu wo citthu cinci. Hataa ukhalaka commo, ayo anawaalalyeera ihapari comaana ale anwa uwootola. Ni ciicammo anaawantikhela iwarakha cowaavara nrima atthu ahimphwanyiya mmapuwani waya wiira alalyeeriye.

5. Toko cinthoonyeraaya Afilipo 3:12-14, isiyani yankavihenre Paulu uhiitthaala?

⁵ Paulu khaahiile cimwiitthaalihaka citthu comaana ni coohinamaana caapankilyaawe. Toko uyo ciiralyaawe, ‘uliyala citthu coottuli’ yaari itthu yaalamuliyaawe upanka wiira ‘atthimakele citthu coohoolo,’ awula amalihere utthawa wawe. (Usome Afilipo 3:12-14.) Isiyani apostolu Paulu yaapankilyaawe wiira hoocye? Woopacera, Paulu ahopanka citthu cinci cootikhiniha ukati weettelaawe ittiini ya ayuuta. Masi citthu cotheenennyo uyo oona “ukhala ikokhola.” (Afili. 3:3-8) Yonayeeli, hataa akhalaka wiira ahaalupattha makristau, Paulu khaahiile uvara nteko wa Yehova. Yoneeraru, uyo khoopuwenle wiira ahonvarela nteko Yehova venci, ni aalamuliya weemelela uvara nteko cinene. Paulu ahopanka citthu comaana cinci wuulalyeerani hataa ukhalaka wiira ahotthukiya, ucaphiya, uvonyakaciya ni maluku, upinttuwa ikalawa yaakenlyaawe ni hataa ukati nkiina hikhalanaka iyoolya ni itthu yoowara. (2 Akor. 11:23-27) Hataa ukhalaka wiira ahopanka citthu cinci ni ahohuva venci, Paulu aanaacuwela wiira khaalamuliya uhiya wiikurumica uvara nteko wa Yehova. Ni hiivano ciicammo iyo phi itthu ninlamuliyeehu upanka.

6. Isiyani cikhanle “citthu coottuli” atthunaka cinlamuliyeehu uliyala?

⁶ Ninlamuliya untakiha cani Paulu ni ‘uliyala citthu coottuli’? Mayamunneehu akiina anaakhalaka ooriipiya nrima nlattu wo matampi avaralalyaaya khalayi. Wakhala wiira iyo phi itthu inookhumelela weeva, unoonela cani usoma mwaha wo wiivaherera wa Yesu ukati wo wiisomiha Ibiiblya veekha? Ukati woosoma, wuupuwele ni ulompe nhina uyo mwahooyo. Upanka commo unaahala wuukavihera uhiya utepa ukhala ooriipiya nrima. Weeva unaahala ukhitiri uhiya wiitulumu nlattu wo matampi Yehova yuulevelenlyaawe. Wuupuwele itthu ikhwaawe ineetthuceehu ni Paulu. Mayamunna akhwaawe ahohiya nteko wo nsurukhu mwinci wiira yiivaherere uvara cinene nteko wo Umwene. Wakhala wiira weeva uhopanka iyo, inanna imoca ‘yooliyala citthu coottuli’ ukhanle uhiweheeha mihaku atthunaka cihiilya uttuli. (Manu. 11:4-6; Ekles. 7:10) “Citthu coottuli” ciicammo pooti ukhala citthu comaana cipankileehu mumphwinkoni wa Yehova ni pooti ukhala masakha akhitinriihu uvilela khalayi. Ninaacuwela wiira wuupuwela iparakha Yehova caanivahalyaawe ni mananna caanikavihenryaawe khalayi ankhala  mananna oolipihaca upatthaniihu nuuyova. Masi khaninlamuliya wuupuwela wiira nihaana nimumulaka kontha nihovara cinene nteko wa Yehova.—1 Akor. 15:58.

7. Toko cinthoonyeraaya 1 Akorintu 9:24-27, isiyani inlamuliyeehu upanka wiira naakhele itthuvo? Utakihere.

⁷ Paulu aanaacuwela ratta-raatta moolumo a Yesu: “Mwiikurumice cinene.” (Luka 13:23, 24) Paulu aanaacuwela wiira, toko Kristu, ahaana wiikurumica cinene mpaka wiimaleloni. Phimaana, aholattaniha makhalelo o makristau ni masinttaano ootthawatthawiya. (Usome 1 Akorintu 9:24-27.) Mmasinttaanoni ootthawatthawiya, namatthawa noweheeha mpika uheleliyaawe ni khanhiya citthu cikiina cimwiitthaalihaka. Wootakihera, anamasinttaano antthawa mmasitati atthunaka anaavira mparapaarani uryaaya anamatumihaca enci ni citthu cikiina caahala uwiitthaaliha. Unaakhitiri umuupuwela namasinttaano mmoca ahiyaka utthawa wiira oone citthu cintumihiya nlooca? Unawoonannya wiira khaahala upanka iyo itthwiiyo! Apankaka commo, uyo khanhala utthema. Inanna imoca, hiiva nintthawa nipheelaka waakhela ukumi, khaninlamuliya wiitthaala. Nihaana nipankaka toko apostolu Paulu: uweheeha mpika ni wiikurumica cinene. Napankaka commo phinhaleehu ukhitiri waakhela itthuvo.

8. Marikarikoni mararu anhaleehu woopela mwaha?

⁸ Marikariko makiina pooti uniloloviha muutthawani wihu. Nttwee noopele mwaha marikariko mararu: (1) uhiirannya itthu ukati waaweherereehu, (2) uweryaaciya awula wuuluvala ni (3) masankiho oopica uvira. Itthu inhala unikavihera ukhanle woona mananna mayamunna akiina caakhitinryaaya uvilela ayo marikarikwaayo.—Afili. 3:17.

9. Isiyani atthunaka inkhumelela caahiirannyeeke citthu ukati waaweherereehu?

⁹ Uhiirannya itthu ukati waaweherereehu. Otheene cihu ninaapheela cinene woona ciirannyaaka citthu comaana Yehova cinikhuluvelihalyaawe. Upheela cinene woona ciirannyaaka nnyo citthunnyo khuntakhala. Ukati porofeeta Habakuki weeralyaawe wiira aanaapheela cinene woona cimalihiyaka citthu coohinamana uYuuta, Yehova ahomwiirela: “Uhihiye uweherera.” (Habak.  2:3.) Masi ukati nkiina, pooti ukhalaka wiira citthu cinweherereehu cinaapica wiirannya. Nlattu wo iyo, pooti ukela uhinicivela ikhweeli ni uniwerya nrima. (Miru. 13:12) Iyo phi itthu yaakhumelenle mayamunna akiina oothanliya mwaakha wo 1914. Enci yaaweherera urwaa wiirimu ule mwaakhoole. Ukati wahaakhumelenlyaaya itthu yaawehereraaya, makristau ookhuluvelya yaapankile isiyani?

10. Isiyani yaapankalyaaya anamathelana wahiirannyaalyaaya itthu ukati waawehereraaya?

¹⁰ Woone ntakihero na Royal ni Pearl Spatz, anamathelana yaakhumelenle iyo itthwiiyo. Munna Royal pattisiye mwaakha wo 1908, narina myaakha 20. Uyo aanaakhuluvela wiira woohipica aanaarwaa wiirimu. Phimaana, ukati wampakanenlyaawe Pearl mwaakha wo 1911, uyo ahomwiirela: “Unaacuwela itthu inhala wiirannya mwaakha wo 1914. Napheela uthelanaca, phatari nithelane phiyaaru va!” Masi mwaakha wo 1914 wahophiya ni ayo khayaarwaale wiirimu. Niireke nlattu wo iyo itthwiiyo ayo yahoocyeela utthawa weekristau? Mena. Itthu yoonaaya ukhala yofayita cinene waari unswalela Nluku, kahi waakhela itthuvo. Royal ni Pearl yaholakela uhinhiya Yehova ni uhihiya utthawa yavilelaka. Ni iyo phi itthu yaapankalyaaya mpaka waakhwilyaaya cinavinre myaakha cinci. Ilelo hiiva nihaattamela ukati Yehova unhalaawe ureeriha ncina nawe wiira nihiye woothaceriya. Ninaaweherera cinene ukati Nluku unhalaawe uthoonyera wiira mananna cinlamulelaawe phiri omaana ni ukati unhalaawe waamaliha anatiryaawe otheene. Ukupali wiira nnyo citthunnyo cinaahala wiirannya ukati Yehova uthanlalyaawe. Uhinaphiya uyo ukatyuuyo, wiikurumice uvara nteko wa Nluku ni yaahiirannyeeke itthu ukati waawehereraa, uhivukule nteko unonvarelaa Nluku.

11-12. Kontha isiyani nihaana niweheehaka uhoolo hataa naweryaaciyaka awula nuuluvalaka? Uhimye ntakihero.

¹¹ Uweryaaciya awula wuuluvala. Ale ampanka masinttaano ootthawiya ahaana yakhomaalaka irutthu. Masi ukhomaala irutthu khinakhala itthu impheeliya wiira hiiva nuunuwe mminepani. Khweeliini, mayamunneehu enci anawiikurumica hataa yakhalaka owuuluvala awula hataa yaweryaaciyaka. (2 Akor. 4:16) Woone itthu yankhumelenle munneehu Arthur Secord. * Uyo aarina myaakha 88, ahoviriha myaakha 55 avaraka nteko uPeteli ni aanawerennya cinene. Nihuku nimoca, anfirimeera yahophiyeera wankorini wawe wiira anwacere. Ayo yahonweha ni yahomwiirela sana-saana: “Munna Arthur, irutthwiinyu iheetta cinene yavaraka nteko wa Yehova.” Masi munna Arthur khaaweheeha citthu co khalayi. Uyo ahaaweha anfirimeera, ahosithya ni ahowaakhula eeraka: “Khweeli. Masi itthu ipankaleehu khalayi kahi phiri yofayita cinene. Itthu inhaleehu upanka ukhuma nna va mpaka uhoolo phirina ifayita cinene.”

 ¹² Atthunaka nyuuva nnanswalela Yehova ikhumelo yo khalayi, ni nna va nhanca woona wiira ukumiinyu khunookhitirihani uvara cinene nteko wa Yehova toko khalayi. Yookhumelelani iyo, nhikhale ni masukhuli. Nkupali wiira Yehova naavaha ifayita cinene citthu cotheene cimpankeleenyu khalayi. (Mabere. 6:10) Ni muupuwelaka makhalelweenyu nna va, nhiliyale wiira unfenta Yehova khunakhala upanka citthu cinci ukati unonvareleehu nteko. Hiiva ninoonihera wiira ninanfenta Yehova nathoonyeraka utteeliya ni uweherera, ciicammo neekurumicaka upanka itthu inkhitiriihu. (Akol. 3:23) Yehova naacuwela nipuro ninvelavelaaya ikuru cihu ni khannilepela upanka itthu ihinkhitiriihu.—Mark. 12:43, 44.

13. Yankhumelenle Anatoly ni Lidiya innisovenriha cani urwaa uhoolo hataa nikhalaka myaakha cinci ni masankiho?

¹³ Masankiho oopica uvira. Mayamunneehu akhwaawe anawaakhumelela masankiho ni anaalupatthiya nenne no khalayi. Wootakihera, Anatoly Melnik, * o Moldávia, aarina paasi myaakha 12 ukati waatthukiyaaya athumwaane, ni waarwaaniyaaya ukootthukeliya u Sibéria, woottalivana ni nipuro naaryaaya amucyaaya ikiloometuru coopwaha 7.000. Uvira waya mwaakha mmoca, Anatoly, anumwaane, ataataawe ni apiipyaawe ciicammo yahorwaaniya utthukiya u Sibéria. Nuukatyaaya, ayo yahokhitiri wancera urwaa umikutthaanoni aliteeya akhwaawe, masi yahaana yeettaka ikiloometuru cookhalaka 30 ukati wooririya cinene. Wahoolo waya, Anatoly ahotthukeliya myaakha miraru nkhattya, uttayi naamwaarawe, Lidiya, ni uttayi ni mwanawe aarina paasi mwaakha mmoca. Anatoly ni amucyaawe hataa yakhalaka ni masankiho myaakha cinci, khayaaturuwenle uttuli. Ilelo, Anatoly rina myaakha 82 ni novara nteko mumphwinkoni wo Mahumu Anhoolela Ipeteli ncoko wo Ásia Central. Toko Anatoly ni Lidiya, nilakele upanka yotheene inhaleehu ukhitiri muntekoni wa Yehova ni nihihiye uvilela, toko civilenleehu khalayi.—Akalas. 6:9.

14. Isiyani Paulu yaalamuliyaawe upanka wiira aakhele itthuyo?

¹⁴ Paulu aanaakhuluvela wiira aanaahala ukhitiri umalihera utthawa wawe ni waakhela itthuvo. Ukhala wiira aari nkristau oothanliya, Paulu itthu yaatothaawe yaari ‘itthuvo yeehaneliyaawe uculu ni Nluku.’ Masi uyo aanaacuwela wiira aahaana uhihiya ‘wiikurumica’ wiira aakhele itthuyo. (Afili. 3:14) Wiira aakavihere afilipo uweheeha itthuvo yaahalaaya waakhela, Paulu ahopanka nlattanihero nomaana.

15. Paulu aavarenle nteko cani nlattanihero nolapo wiira aasovenrihe afilipo uhihiya ‘wiikurumica’?

 ¹⁵ Paulu ahowuupusera makristau afilipo wiira ilapwaaya yaari wiirimu. (Afili 3:20) Kontha isiyani waanaareera uwuupusera iyo itthwiiyo? Ule ukatyuule, ntthu yaari ilapwaawe uRooma aanaavahiya ifayita cinene. * Masi makristau oothanliya ilapwaaya yaahala ukhala yootepa uttitthima, yaahala waavaha ifayita cinene. Uweherera urwaa ukhala wiirimu phaatepale ukhala itthu yofayita cinene uvikana ukhala ntthu olapo yooRooma! Phimaana, Paulu ahaasovenriha afilipo awiirelaka: “Mweetteke khampa atthu olapo imoca ni mananna oophwanelana ni ihapari comaana nhina Kristu.” (Afili. 1:27, niwehero) Toko makristau oothanliya o ule ukatyuule, makristau olelo anweherera urwaa wiirimu akhanle ntakihero nomaana kontha anawiikurumica wiira yaakhele itthuvo.

16. Hataa niwehereraka urwaa ukhala wiirimu awula wapeephoni watuninyani, isiyani ninlamuliyeehu uhihiya upanka toko cinthoonyeraaya Afilipo 4:6, 7?

¹⁶ Hataa ukhalaka wiira hiiva ninweherera ukhalana ukumi woohimala wiirimu awula wapeephoni watuninyani—otheene cihu nihaana niikurumicaka wiira naakhele itthuvo. Khaninlamuliya uweheeha citthu coottuli ni khaninlamuliya uhiya citthu cikiina cinihiihaka unswalela Yehova. (Afili. 3:16) Hataa ukhalaka wiira citthu cinwehereraa cinaapica wiirannya, unaahuva nlattu wooweryaaciya, wuuluvala awula anawuukhumelela masankiho oopica uvira—hataa citthu cotheenennyo cuukhumelelaka, ‘uhikhale ni masukhuli niitthu.’ Uhiya commo, uncuwelihe Nluku masukhulyaa, ni uyo naahala wuuvaha ineema yoopwaha khula itthu inhalaa wuupuwela.—Usome Afilipo 4:6, 7.

17. Isiyani inhaleehu wiitthuca nhina mwaha nkiina unhaleehu usoma?

¹⁷ Toko namatthawa cineekurumicaawe oonaka wiira hanle vakaani uphiyeera mpika uheleliyaawe, uweheehe mpikaa ni wiikurumice wiira utthawe mpaka wiimaleloni wiira waakhele ukumi. Yehova naakhuluveliha citthu comaana uhoolo. Phimaana, uhihiye wiikurumica ni upanke yotheene inhalaa ukhitiri. Masi isiyani inlamuliyeehu upanka wiira nihihiye utthawa munttalani womaana? Mwaha nkiina unhaleehu usoma unaarwaa unikavihera uthanla ratta citthu coohala uhoolelihera muukumini wihu ni ‘ucuweleeha citthuni citepale ukhala cofayita.’—Afili. 1:9, 10.