UHAAVO nteko wanlokoni waa woocivenle uvara, masi nna va weeva khunlamuliya uvara uyo ntekooyo? Atthunaka ukhanle nteko uvahiyaawe uvara munna nkiina. Ni pooti ukhala nteko awula nrintti waarinaa khalayi mumphwinkoni wa Yehova, masi nlattu wo wuuluvala, uweryaaciya awula nlattu wo wuuthwa nsurukhu, weeva uhohiya uyo ntekooyo. Awula ukhanle nteko weeva uvirihalyaa myaakha cinci uvaraka, masi wahaana uhiyaka nlattu wo marukunuso apankiye mumphwinkoni wa Yehova. Hataa yakhumelelaka itthuni, weeva atthunaka unawuupuwela wiira khumpaka citthu cotheene coocivenle upanka muntekoni wa Nluku. Yookhumelelaka iyo itthwiiyo, weeva atthunaka unaakhala ni masukhuli, ooriipiya nrima ni mpaka pooti ukhala ookasiriya. Isiyani inlamuliyaa upanka wiira uhiicoone commo wanrimani waa? Isiyani inhala wuukavihera uhihiya ukhala ootteeliya?

Ntakihero na Joau Mpattisa pooti uniitthuciha citthu cinci. Joau ahaana miteko cuulupale muntekoni wa Yehova. Hataa ukhalaka commo, makhalalwaawe yahorukunuwa ni mananna ahaawehereraawe. Joau aavirihale ukati vakaani avaraka nteko wa Nluku, masi ahokhala ukati mwinci nari nkhattya. Uyo khoopuwenle wiira iyo itthwiiyo yaanaahala unkhumelela. Masi iyo khayanhiihale Joau ukhala ootteeliya. Uyo khaahiile ukhala ootteeliya mpaka ukati waakhwilyaawe. Isiyani yankavihenre Joau? Ni isiyani inlamuliyeehu upanka wiira nihihiye ukhala ootteeliya hataa cihiirannyaaka citthu caaweherereehu?

Abril o mwaakha 29 EC, Joau Mpattisa ahancera uvara ntekwaawe wo waatthenkacera atthu uwa wa Mesiya. Uyo eera: “Nttharuwe, kontha Umwene wo wiirimu uri wakhiviru.” (Mat. 3:2; Luka 1:12-17) Atthu enci yahomwiiwelela. Atthu o mapuro menci yaanaweetta cinene wiira yeewe ihapari caalalyeeraawe Joau, ni enci yahottharuwa matampyaaya ni yahopattisiya. Joau ciicammo aholipa nrima ukati waavaanyihalyaawe ahooleli ottiini yeethenca ukhala atthu osariya, ni ahaahimyera wiira, yaahirukunuse nrimaaya, ayo yaanaahala uhukhumwiya. (Mat. 3:5-12) Ukati muulupale cinene muntekoni wa Joau waari mwaakha 29 EC, ukati wampattisilyaawe Yesu. Ukhuma uyo ukatyuuyo, Joau aanawaahimyera atthu wiira yaalamuliya untthara Yesu, Mesiya aahimiye wiira aanaahala uwa.—Joau 1:32-37.

Nteko wa Joau Mpattisa waari nteko muulupale. Hataa phimaana Yesu weeralyaawe: “Nhina atthu  ayariye nintthiyana, khaavo khumelenle ompwaha Joau Mpattisa.” (Mat. 11:11) Khweeliini, Joau aanaakhala ootteeliya cinene nlattu woparakha caakhenlyaawe. Toko Joau, mayamunna enci ilelo ahovahiya iparakha cinci ni Yehova. Woone ntakihero na munna mmoca neehaniya Terry. Uyo naamwaarawe, aneehaniya Sandra, ahoviriha myaakha coopwaha 50 yavaraka nteko wowiivahereriya ukati wotheene. Terry neera: “Mi kahocaalihiya venci. Kahokhala piyoneeru, uvara nteko uPeteli, piyoneeru owiivaherera, mootoli osirikwiitu, mootoli odistritu ni nna va, kihoturuwela ukhala piyoneeru owiivaherera.” Waakhela miteko mumphwinkoni wa Yehova ikhanle itthu yootteeliha nrima. Masi toko cinthoonyeraaya ntekihero na Joau, umpheeliya wiikurumica wiira nihihiye ukhala ootteeliya makhalelweehu yarukunuwaka.

Itthu imoca yankavihera Joau Mpattisa uhihiya ukhala ootteeliya waari uhihiya usukhuru iparakha caarinaawe. Wootakihera, uvira waya ukati vakaani Yesu napattisiye, atthari a Joau yahancera uwukuwa, masi atthari a Yesu yaanawinciva. Woona waya iyo, atthari a Joau yahorwaa umwiirela Joau: ‘Moone, nlompwana mwavaheenyu usaahiti mmuulumaka, naapattisa, ni atthu otheene anantthara.’ (Joau 3:26) Vano Joau ahaakhula: “Ule rina ntthiyana oopakaneliya khanle mpakaneli. Masi mpwanaawe mpakaneli akhalaka wakhiviru ni amwiiwaka mpakaneli, naatteeliya venci nlattu wo wiiwa nlove na mpakaneli. Phimaana utteeliya waka uholikana.” (Joau 3:29) Joau khaatotha umpwaha Yesu, ni khoopuwela wiira ntekwaawe wahohiya ukhalana ifayita kontha nteko wa Yesu phaari wofayita cinene. Uhiya commo, Joau khaahiile ukhala ootteeliya kontha awehera ukhala itthu yofayita ukhala “mpwanaawe mpakaneli.”

Mananna Joau caaweheraawe citthu phankavihenre ukhala ootteeliya hataa ntekwaawe wakhalanaka marikariko. Wootakihera, Joau aari nazirewu ikhumelo iyareliyo ni, nlattu wo iyo, uyo khaalamuliya uwurya iviinyu. (Luka 1:15) Yesu oopelaka mwaha makhalelo a Joau aheera: “Joau waale hilyaka ni hiwuryaka.” Mphantte nkiina, Yesu ni attharyaawe khayaari manazirewu ni yahaana makhalelo yaarinaaya atthu otheene. (Mat. 11:18, 19) Uhiya commo, Joau khaapankale mitikhiniho. Masi uyo aanaacuwela wiira atthari a Yesu, ni ciicammo ale wiipaceroni yaari a atthari a Joau, yaanaahala waakhela ikuru yoopanka mitikhiho. (Mat. 10:1; Joau 10:41) Joau khaahiile nnyo citthunnyo cimwiitthaalihaka, masi ahiikurumica uvara nteko waavahiyaawe ni Yehova.

Iyo inaaniitthuciha itthu imoca: navahaka ifayita itthu impankeehu muntekoni wa Yehova, ninaahala ukhikicera utteeliya wihu. Terry, romoliye wiipaceroni, neera: “Kaanaaweeheeha cinene khula nteko waavahiyaaka.” Awehaka uttuli oopuwelaka ukati ukhanlyaawe avaraka nteko wo wiivahereriya ukati wotheene, uyo neera: “Akittharuwale mena vakaani; masi kinoopuwela citthu comaana paahi.”

Itthu inhala wuncerera utteeliya wihu ukhanle wuupuwela ile impankiha nteko unvareehu ukhala wofayita: iparakha ‘yoovara nteko nkhayi ni Nluku.’ (1 Akor. 3:9) Ikaruma yoyuuma inreera hiiva naahihiyeke ukuttha. Inanna imoca, wiira hiiva nihihiye ukhala ootteeliya, nihaana uhihiya wuupuwela iparakha yuulupale irineehu yoovara nteko nkhayi ni Yehova. Khaninhala ulattaniha wiikurumica wihu nuwiikurumica waakhwiihu, ni khaninhala wuupuwela wiira nteko unvaraaya akhwiihu phirina ifayita uvikana nteko unvareehu hiiva.—Akalas. 6:4.

Joau Mpattisa atthunaka ahocuwela wiira khaahala ukhala ukati mwinci avaraka ntekwaawe, masi uyo pooti khoopuwela wiira ntekwaawe waahala umala ni mananna owaakuvyaaca cinene. (Joau 3:30) Mwaakha wo 30 EC, uvira waya myeeri 6 nampattisile Yesu, Joau ahotthukiya ni mwene Heroti. Hataa akhalaka nkhattya, Joau ahopanka yotheene yaakhitiryaawe wiira hihiye uvaha usaahiti. (Mark. 6:17-20) Isiyani yankavihenre Joau uhihiya ukhala ootteeliya hataa ukumyaawe warukunuwaka? Uyo ahoweheeha citthu coominepani.

Nari nkhattya, Joau aanaahimyeriya citthu Yesu caapankaawe. (Mat. 11:2; Luka 7:18) Joau aanakupaleeha wiira Yesu aari Mesiya, masi atthunaka aanawiikoha manannani Yesu caahalaawe wiirannyeeha inatiri cotheene nhina Cowantikhiya cinttonka citthu Mesiya caahalaawe upanka. Joau atthunaka  aanawiikoha: ‘Ukhala wiira Mesiya aahala ukhala mwene, kiireke umweennyaawe unhala wancera ulamulela mphiyaaruni? Kiireke Yesu naahala ukitthukula nkhattya?’ Apheelaka cinene woona itthu Yesu yaahalaawe upanka, Joau ahaaruma attharyaawe eeli wiira yankohe Yesu: “Nyuuva phi Ule Nowa, awula nihaana ninwehereraka nkiina?” (Luka 7:19) Ukati waaturuwalyaaya, Joau pooti ahaaviriyana ratta-raatta waattonkaaya mananna Yesu caavonihaawe atthu ni moolumo yaaveleelihalyaawe: “Atthu oohoona nna va anawoona, atthu ooheetta anaweetta, atthu omakuttula anaarerihiya, atthu oohiiwa anawiiwa, atthu ookhwa anawunwelelihiya, ni amasikhini anaalalyeeriya ihapari comaana.”—Luka 7:20-22.

Joau Mpattisa khweeliini aholipihiya makhuva ni citthu caattonkalyaaya attharyaawe. Uyo ahohimeriya itthu yankupalihale wiira Yesu aanawiirannyeeha inatiri ca Mesiya. Waahookhalaru wiira Yesu khaahala untthukula Joau nkhattya, Joau aanaacuwela wiira ntekwaawe khawaari wopure. Hataa yankhumelelaka marikariko, uyo ahaana isariya yookhala ootteeliya.

Toko Joau, naweheehaka citthu coominepani, ninaahala ukhitiri uvilela nathoonyeraka utteeliya. (Akol. 1:9-11) Wiira nikhitiri uvilela, nihaana nisomaka Ibiiblya ni wuupuwela insomeehu. Iyo inaahala unuupusera wiira nteko unonvareleehu Yehova khunakhala wopure. (1 Akor. 15:58) Sandra neera: “Itthu imoca inkikavihera ulipihaca upatthannyaaka ni Yehova ukhanle usoma ikapiitulu imoca yo mbiiblyani khula nihuku. Iyo inaakikavihera uhoolelihera umuupuwela Yehova, woohihoolelihera uyuupuwela miiva.” Itthu ikiina inhala unikavihera cikhanle irelatooriyu cinttonka mananna cineettakacaaya nteko wo Umwene. Nnyo cinaanikavihera uhiweheeha citthu cinnikhumelela ni uhoolelihera wuupuwela ile Yehova impankaawe. Sandra neera: “Iporokaraama co khula mweeri co JW Broadcasting^® cinaaniiriha uyoona ukhala wakhiviru ni mphwinko wa Yehova ni cinaanikavihera uhihiya ukhala ootteeliya ukati unvareehu ntekweehu.

Nhina ukati vakaani ukhanlyaawe avaraka ntekwaawe, Joau Mpattisa aholalyeera “ninnepa ni niikuru ca Eliyasi.” Ni khampa Eliyasi, Joau “aari nlopwana o makhalelo toko hiivano.” (Luka 1:17; Tiya. 5:17) Nathoonyeraka usukhuru toko Joau ni naweheehaka citthu coominepani, ciicammo khaninhala uhiya ukhala ootteeliya ukati unonvareleehu nteko Yehova, hataa ikhumelelaka isiyani.