MWAHA WOOSOMIYA 34
Mananna o wiilemaleliha makhalelo o phiyaaru wahiyaka nteko waavaraa
“Nluku khanakhala ootakhala nrima wiira aliyale miteko cinyu ni inanna cifentaleenyu ncina nawe.”—MABERE. 6:10.
NCIPO 38 Jeová Vai Dar-te Força
NINHALA WIITTHUCANI? *
1-3. Kontha isiyani mayamunna akiina yiivaherenre uvara nteko wo Umwene ukati wotheene ahaana yahiyaka nteko waavaraaya?
ROBERT NI MARY JO yahoviriha myaakha 21 yavaraka nteko weemisiyonaariyu. Vano asithumwaane Robert ni ciicammo asithumwaane Mary Jo yahancera uwerennya. Ayo aneera: “Wahonicivela waawacera mayapaapeehu. Masi hataa ukhalaka commo, nahokhala ooriipiya nrima kontha nahaana nihiyaka uttuli nipuro naanicivela cinene.”
2 William ni Terrie ciicammo yaavara nteko nipuro nikiina nahaari ilapwaaya. Ayo aneera: “Nahonla cinene ukati waacuwenleehu wiira, nlattu wooweryaaciya, nahaana nihiyaka ntekweehu. Yaari itthu yaapheeleehu cinene unswalela Yehova nipuro noohikhala ilapweehu, masi khanaahala upanka-tho iyo.”
3 “Aleksey aavara nteko uPeteli. Uyo naattonka: “Otheene naanaacuwela wiira kuvernu aanaahala utthuka iPeteli yaavaraaka nteko. Masi ukati waatthukalyaaya, nahaana nikhumaka ni wahoniwerya cinene.”
4. Makohoni anhala waakhuliya nhina ula mwahoola?
4 Uwuupuwele ciicammo mayammuna enci anvara nteko mmaPeteli ni mayamunna akhwaawe avahiye miteko cikiina. * Enci unawaarika cinene uhiya nteko waacivela. Ayo mayamunnaayo anhala ukhitiri cani uvilela yaakhumelelaka iyo? Isiyani weeva inlamuliyaa upanka wiira waakavihere? Waakhuliya waya ala makohwaala pooti unikavihera otheene cihu uvilela makhalelweehu yarukunuwaka.
MANANNA OOVILELA NAHIYAKA NTEKO WAAVAREEHU
Kontha isiyani ale yiivaherenre uvara nteko wo Umwene ukati wotheene unawaarikela uhiya nteko waavaraaya? (Uwehe iparaagarafu 5) *
5. Marikarikoni ankhalaneehu nahiyaka nteko unvareehu?
5 Neevahereraka uvara nteko wo Umwene ukati wotheene uPeteli awula mapuro makiina, ninaakhalana apatthani enci ni ninaanicivela cinene nipuro ninvareehu nteko. Phimaana, napheelaka ukhuma nlattu wo itthu ikhumelenle, ninaakhalaka ni masukhuli. Anaaninukhela cinene mayamunneehu ni khunnitaphuwa nrima nlattu waale yaahiileehu uttuli, venci-venci wakhalaka wiira nikhumale nlattu woolupatthiya. (Mat. 10:23; 2 Akor. 11:28, 29) Uhiya iyo, nanceraka uvara nteko nkiina—awula hataa naturuwelaka uwaani—pooti unirika wiilemaleliha ilema co phiyaaru. Robert ni Mary Jo aneera: “Naholiyala ilema co nipuro naakhumeehu. Mpaka ulalyeera niiluukeehu waanaanirika. Nlattu woolemalela makhalelo olapo yaavareehu nteko, ukati waaphiileehu uwaani neecoona khampa atthu oohikhala anenci.” Nrikariko nikiina ninkhalanaaya ale ahiile nteko waavaraaya, ukhanle wancera uthuma citthu cahaawehereraaya wiira yaanaahala uthuma. Iyo pooti waakhaliha ni masukhuli menci. Isiyani inhala waakavihera?
Ikhanle itthu yofayita cinene ulipihaca upatthaniihu ni Yehova ni unkhuluvela uyova (Uwehe iparaagarafu 6-7) *
6. Ninhala ulipiha cani upatthaniihu ni Yehova?
6 Ulipihace upatthannyaa ni Yehova. (Tiya. 4:8) Ninlamuliya upanka cani iyo? Ukhuluvele wiira Yehova nawiiwa mavekelwaa. (Isaa. 65:2) Isaalimu 62:8 ineera wiira nihaana ‘unhimyera irineehu wanrimani.’ Yehova “pooti upanka citthu cuulupale cinene coopwaha khula itthu inkhitiriihu wuupuwela.” (Efesu 3:20) Nluku khampanka paahi citthu cinonlepeleehu ukati woolompa. Nakhalanaka masankiho, Yehova pooti umaliha ayo masakhaayo ni mananna hiiva cahoopuweleehu.
7. a) Inannani ikhwaawe yoolipihaca upatthannyaa ni Yehova? b) Toko cinthoonyeraaya Maberewu 6:10-12, isiyani inhala ukhumelela naahihiyeke unswalela Yehova?
7 Inanna ikhwaawe yoolipihaca upatthannyaa ni Yehova ukhanle usoma Ibiiblya khula nihuku ni wuupuwela insomaa. Munna mmoca khalayi aavara nteko weemisiyonaariyu neera: “Uhihiye upanka uswali waamuci ni utthenkaca mikutthaano khula isumana, khampa weeva caapankesaa nipuro naavaraa nteko.” Uhiya iyo, wiikurumice ulalyeera ihapari comaana wanlokoni naa no phiyaaru. Yehova khanaaliyala ale ahinhiya unswalela weekhweeli, hataa nna co yahikhitiriki uvara nteko cinene toko khalayi.—Usome Maberewu 6:10-12.
8. Moolumo ari nhina 1 Joau 2:15-17 anhala wuukavihera cani uhirikarikiha makhalelwaa?
8 Uhirikarikihe makhalelwaa. Uhihiye masukhuli o ntuninyani ya Sotwani yoohiihaka unswalela Yehova. (Mat. 13:22) Uhaakhuluvele atthu o ntuninyani, ni hataa apatthannyaa ni amucyaa ookhala toko anawuutthuna, anhala wuusovenriha utotha uthaciri ntuninyani ya Sotwani. (Usoma 1 Joau 2:15-17.) Unkhuluvele Yehova. Uyo naakhuluveliha wiira naahala univaha citthu cotheene cimpheeleehu “ukati umpheeleehu.” Ni naahala unikavihera ulipihaca waamini wihu, ukhala oomaala ni naahala univaha citthu cinnithwa.—Mabere. 4:16; 13:5, 6.
9. Toko cinthoonyeraaya Miruku 22:3, 7, kontha isiyani unaareera uhitepa ukopha, ni isiyani inhala unikavihera uthanla upanka citthu comaana?
9 Uhitepe ukopha. (Usome Miruku 22:3, 7.) Uthamela nipuro nikiina pooti uwiiriha weeva upheela uthuma citthu cinci, ni wancera ukopha. Wiira uhilokihiye cinene, uhikophe nsurukhu wiira uthume citthu cihimpheelaa. Yanikhumelelaka masakha—toko ukati wonwacera ntthu nowerennya—pooti unirika uwehacera nsurukhu woopheela ukopha. Uyo ukatyuuyo, wuupuwele wiira ‘ulompa woohihiyerera’ pooti wuukavihera uthanla upanka citthu comaana. Yehova naahala waakhula mavekelwaa oovahaka ineema inhala ‘usunka nrimaa ni moopuwelelwaa.’ Commo, weeva unaahala ucuwela uwehacera unamaalale itthu yuukhumelenle.—Afili. 4:6, 7; 1 Pet. 5:7.
10. Isiyani ninlamuliyeehu upanka wiira naaphwanye apatthani akhwaawe?
10 Ukhalane upatthani womaana naasimpwanaa ni amucya. Waahimyacere asipatthannyaa mananna cineecoonaa ni citthu cinookhumelela, venci-venci ale apacale waakhumelela citthu cinookhumelela. Iyo inaahala wuukavihera wiicoona ratta. (Ekles. 4:9, 10) Apatthani o nipuro naavaraa nteko khalayi, khanhala uhiya ukhala apatthannya. Masi nna va, uryaa nipuro nikiina, uhaana ukhalanaka apatthani o phiyaaru. Uhiliyale wiira, wapheela ukhalana apatthani omaana, weeva ciicammo uhaana ukhalaka mpatthani omaana. Isiyani weeva inlamuliyaa upanka wiira waaphwanye apatthani akhwaawe? Uttonke iparakha civahiyaa ni Yehova wiira yoone utteeliya waa nlattu wonswalela Yehova. Pooti ukhala wiira atthu akiina wanlokoni waa khanhala ucuwela nlattuni weeva uneekurumicaa uvara nteko wo Umwene ukati wotheene, masi akhwaawe pooti anaahala upheela wuucuwela ni anaahala ukhala apatthannyaa. Masi uhiithence awula uhitepe wuuluma cinene citthu cipankalyaa, ni uhuulume paasi masukhuli arinaa.
11. Isiyani inlamuliyeenyu upanka wiira nkhale ootteeliya muuthelanani winyu?
11 Ukati nkiina, anamathelana ahaana yahiyaka nteko waavaraaya nlattu woowerennya nlopwanooyo awula nthiyanooyo. Yookhumelela iyo, uhaaromole awanuwaa awula amwaaraa anwerennya wiira ayo phuuhiihale nteko waavaraa. Mphantte nkiina, wakhala wiira thi weeva unwereennya, uhikhale ni masukhuli wuupuwelaka wiira uhaahiiha awanuwaa awula amwaaraa nteko waavaraaya. Wuupuwele wiira ooyeeli cinyu nkhanle “irutthu imoca” ni nhonkhuluveliha Yehova wiira nnaahala uwacerana hataa ikhumelelaka isiyani. (Mat. 19:5, 6) Ciicammo pooti ukhala wiira anamathelana ahaana yahiyaka nteko waavaraaya nlattu nthiyanooyo woorupala irukulu woohilakela. Yookhumelelani iyo, nhinromole mwaanooyo wiira phuuhiihaleni nteko waavareenyu. Uhiya commo, munhimerye wiira uyo haana ifayita cinene uvikana nteko waavareenyu khalayi. Khula ukati, munhimerye wiira uyo khanle “itthuvo” ivahiyeenyu ni Nluku. (Isaa. 127:3-5) Ciicammo, munttonkele citthu comaana cotheene cuukhumelenleni ukati waavareenyu ntekweenyu wo khalayi. Iyo pooti unvaha ikuru mwaninyu wiira uyo ciicammo eevaherere uvara nteko wo Umwene ukati wotheene.
MANANNA ATTHU AKIINA CINLAMULIYAAYA UKAVIHERA
12. a) Manannani cinlamuliyeehu waakavihera ale yiivaherenre uvara nteko wo Umwene ukati wotheene? b) Isiyani inlamuliyeehu upanka wiira naakavihere wiilemaleliha makhalelo o phiyaaru?
12 Unaareera woona itthu impankaaya maloko menci ni mayamunna enci wiira yaakavihere ale yiivaherenre uvara nteko wo Umwene ukati wotheene. Akiina unawaacivela cinene waasovenriha wiira ayo ahihiye nteko wiivaherenryaaya uvara. Akhwaawe anaakhitiri waakavihera, yaavahaka citthu cinaathwaa. Ni ciicammo ahaavo akiina aneevaherera waakavihera amucyaaya mayamunna yiivaherenre uvara nteko wo Umwene ukati wotheene. Commo, ayo khanhala uhiya nteko unvaraaya nipuro niryaaya. (Akalas. 6:2) Haavo munna hiile nteko waavaraawe khalayi ni rumiye ukavihera wanlokoni waa? Wakhala wiira haavo, uhuupuwele wiira uyo ihaavo ivonyalyaawe phimaana ahiyaka nteko waavaraawe. * Uhiya commo, upanke inkhitiryaa wiira unkavihere wiilemaleliha makhalelo o phiyaaru. Umwaakhelele ratta uyo munnooyo ni unttottopele nlattu wo nteko uvanryaawe, hataa ukhalaka wiira nna va khanvara nteko cinene nlattu wooweryaaciya. Umananihe uncuwela ratta. Weeva pooti wiitthuca cinene ni citthu cankhumelenle, ni nuucuwelaca urinaawe.
13. Manannani makhwaawe ninlamuliyeehu waakavihera ale yaakhenle nteko wo phiyaaru?
13 Wiipaceroni, mayamunna yaakhenle nteko wo phiyaaru, anaapheela ukaviheriya wiira akhitiri uphwanya inupa, nteko woohala waavaha ipooso ni citthu cikhwaawe. Ayo atthunaka anaapheela ucuwela ratta citthu cikhwaawe, toko mananna ooliva nsokho. Ni itthu yuulupale impheelaaya cinene khunakhala wooneliya ikiriri, masi ampheela wiira nimananihe ucuweleeha citthu cinaakhumelela. Pooti ukhala wiira ayo anaawerennya awula mmucyaaya phinwerennya. Awula atthunaka ayo ari ooriipiya nrima cinene nlattu wookhwa ntthu anfentaaya. * Ni hataa yahuulumaka, pooti ukhala wiira ayo anaanukheliya cinene naatthu yaahiilyaaya nipuro naavaraaya nteko khalayi. Nnya phi citthu cinwiira ayo mayamunnaayo, ni wuupuwela weemaara imoca citthu cotheene nnya, pooti waakhaliha ni masukhuli.
14. Manannani mayamunna o nloko nimoca cankavihenryaaya nrokorihu wiilemaleliha makhalelo o phiyaaru?
14 Ula ukatyuula, wiikurumica waa ni ntakihero naa pooti waakavihera mayamunna ukhitiri wiilemaleliha makhalelo o phiyaaru. Nrokorihu mmoca khanle ukati mwinci avaraka nteko nipuro nahaari ilapwaawe neera: “Nipuro naavaraaka nteko khalayi, kaanawaasomiha atthu Ibiiblya khula nihuku. Masi nipuro naathamenlyaaka phiyaaru, akaakhitiri wancera unsomiha ntthu Ibiiblya awula uthoonyera ividiyu wuulalyeerani. Masi mayamunna o nloko naka no phiyaaru yahokilattula urwaa nkhayi naayo uwootola atthu yaalalenryaaya ni yaasomihaaya Ibiiblya. Ukati waawoonalyaaka mayamunnaka ni asirokoraka owiikurumica ni oolipa nrima yaasomihaka atthu Ibiiblya, kahancera waawehera ratta atthu o ncoko waalalyeereehu. Kahiitthuca wancera woopa myaha wuulalyeerani. Citthu cotheene nnyo cihokikavihera uturuwela ukhala ootteeliya.”
UHIHIYE URWAA UHOOLO!
Umananihe uphwanya mananna o wiikurumica uvara nteko cinene wuulalyeerani wanlokoni waa no phiyaaru (Uwehe iparaagarafu 15-16) *
15. Isiyani inlamuliyaa upanka wiira wuukhumele ratta nteko wo phiyaaru unvaraa?
15 Weeva pooti wuukhumela ratta nteko wo phiyaaru unvaraa. Uhuupuwele wiira ihaavo ipankalyaa yoohiloka ukati waavaraa ntekwaa wo khalayi ni uhuupuwele wiira nna va weeva khurina ifayita. Uweheehe mananna Yehova cinookaviheraawe ni uhihiye ulalyeera. Waatakihe makristau ookhuluvelya oseekulu yoopacera. Hataa yakhalaka ncokoni, ayo ‘yaanaarwaa ulalyeera ihapari comaana co nuulumo uyo ncokooyo.’ (Mite. 8:1, 4) Unaahala woona ifayitaaya wiikurumica waa uhihiya ulalyeera. Wootakihera, mapiyoneeru yaavara nteko nipuro nahaari ilapwaaya yahoomoliya ni yahothamela ilapo ikiina yo wakhiviru. Ilapo yaathamenlyaaya yaanaathwaa anamalalyeera owuuluma iluuka yolapo woomoliyaaya mapiyoneeru. Uvira waya myeeri, cahokhumelela ikhurupu cinci co iyo iluukeeyo ni cahoonuwa wowaakuvyaaca.
16. Isiyani inhala wuukavihera uphwanya utteeliya ukati woovara nteko nipuro no phiyaaru?
16 “Utteeliya unkhuma wa Yehova phiikuru cinyu.” (Nem. 8:10, niwehero) Ntekweehu pooti unicivela cinene. Masi Yehova phinniphwanyiha utteeliya, kahi nteko unvareehu. Phimaana, uhihiye ulipihaca upatthannya ni Yehova, ni unlepele wiira oovahe ucuwelaca, malakihero ni wiira ookavihere. Uhiliyale wiira weeva waanawuucivela cinene nteko waavaraa khalayi kontha waanawiikurumica waakavihera atthu nipuro naavaraa nteko. Wiikurumice ukati woovara nteko nipuro niryaa nna va ni woone mananna Yehova cinhalaawe wuukavihera wiira wuucivele nteko wo phiyaaru unvaraa.—Ekles. 7:10.
17. Isiyani ihinlamuliyeehu uliyala nhina nteko unvareehu ilelo?
17 Uhiliyale wiira unswalela Yehova itthu inhaleehu upanka mpaka, masi nteko unvareehu nna va, wanihukuni ninaahala uhiya uvara. Upeephoni, atthunaka otheene cinyu ninaahala uhiya nteko urineehu ni ninaahala uvahiya nteko nkhwaawe. Aleksey, romoliye wiipaceroni, naakupali wiira citthu cotheene cinonkhumelela cinankavihera wiitthenkaca niitthu inhala ukhumelela wahoolo. Uyo neera: “Mi kaanaacuwela wiira Yehova khweeliini haavo ni ipeephoni khweeliini inaahala ukhala, masi cotheene nnyo koona ukikhalela uttayi. Masi nna va, kinaakhitiri umoona Yehova uhoolo waka ni kinawoona ipeephoni wiira iri wakhiviru cinene.” (Mite. 2:25) Phimaana, hataa ukhalaka wiira ahokhumelela marukunuso yuuhiihale nteko waavaraa, ulipihace upatthannyaa ni Yehova. Uyo khanhala wuuhiya veekha. Uhiya commo, khula ukati uyo nhala ukhala ni weeva ni naahala wuukavihera ukhala ootteeliya ukati unonvarelaa nteko—hataa uvaraka ntekoni ni hataa wakhalaka nipuroni.—Isai. 41:13.
NCIPO 90 ‘Encorajemo-nos Uns aos Outros’
^ par. 5 Ukati nkiina, mayamunneehu ni asirokorihu yiivaherenre uvara nteko wo Umwene ukati wotheene ahaana yahiyaka nteko waavaraaya, awula ahaana yanceraka uvara nteko nkhwaawe. Ula mwahoola unaahala wuuluma marikariko ayo mayamunnaayo anaananaaya ni isiyani inlamuliyaaya upanka wiira akhitiri wiilemaleliha makhalelo o phiyaaru. Uhiya iyo, ula mwahoola unaahala uthoonyera ciicammo isiyani mayamunna akiina inlamuliyaaya upanka wiira yaalipihe ni yaakavihere. Mattharelelo anhimiya nhina ula mwahoola pooti unikavihera otheene cihu uvilela makhalelweehu yarukunuwaka.
^ par. 4 Ukati wooluvanlyaaya, mayamunna akiina yaarina miteko cinci ciicammo yahaana yahiyaka miteko caavaraaya ni yahaana yaahiyeraka nnyo mitekonnyo mayamunna amirawo. Uwehe mwaha “Irmãos mais velhos — Jeová dá muito valor à vossa lealdade”, nhina irevista A Sentinela yo Setembro 2018, ni mwaha “Não perca a paz interior ao passar por mudanças”, nhina A Sentinela yo Outubro 2018.
^ par. 12 Mayamunna yiivaherenre uvara nteko wo Umwene ukati wotheene yahiyaka nteko waavaraaya, ni yarwaaniyaka nloko nikiina, mahumu ahaana yaveleeliheraka iwarakha nloko ninhalaaya urwaa ayo mayamunnaayo woohipica. Commo, ayo anaahala uturuwela ukhala mapiyoneeru, mahumu awula arumiya o wanlokoni woohipicapica.
^ par. 13 Uwehe myaha coottharanaca nhina irevista Despertai! N.° 3 yo 2018, irina mwaha uneera: “Como lidar com a dor da morte.”
^ par. 57 ILATARATO: Anamathelana ahaana yahiyaka nteko weemisiyonaariyu waavaraaya ilapo ikiina ni anaaleha nloko naya anari ooriipiya nrima.
^ par. 59 ILATARATO: Anaturuwenle ilapwaaya, anamathelanaale khanhiya ulompa ni anaalepela ukaviheriya ni Yehova wiira akhitiri waanaana marikariko.
^ par. 61 ILATARATO: Yakaviheriyaka ni Yehova, anamathelanaale anawiivaherera tootho uvara nteko wo Umwene ukati wotheene. Ayo anaavarela nteko iluuka yiitthucalyaaya ukati waaryaaya mamisiyonaariyu wiira yaalalyeere atthu olapo cikiina anwa ilapo yo wanlokoni naya.
