MWAHA WOOSOMIYA 32
Wincivihace nifento naa
“Ila phi itthu kinlepelaaka kalompaka: wiira nifento ninyu nivire nitepaka winciva.”—AFILI. 1:9.
NCIPO 106 Amor – Uma Qualidade sem Igual
NINHALA WIITTHUCANI? *
1. Phaapani yaakavihenre utthenkaca nloko uFilipo?
APOSTOLU Paulu, Silas, Luka ni Timotiyu ukati waaphiilyaaya isitati yooFilipo yaahooleliya ni ilapo yooRoma, ayo yahaaphwanya atthu enci yaapheela wiitthuca ihapari co Umwene. Mayamunna owiikurumica ooceese yahokavihera utthenkaca nloko uFilipo, ni atthari o phiyaaru otheene yahancera uthukumana, atthunaka uwanuwawe nrokokorihu aawaakhelela aletto eehaniya Lidia.—Mite. 16:40.
2. Masakhani woohipica yaakhumelenle wanlokoni nooFilipo?
2 Woohipica, yahokhumelela masakha wanlokoni no phiyaaru. Sotwani ahaapankiha atthu owaarusa ikhweeli wiira alupatthe nteko woolalyeera. Paulu ni Silas yahovariya, yahocaphiya ni yahotthukeliya nkhattya. Waatthukuliyaaya, ayo yahorwaa uwootola atthari o naanaano wiira yaalipihe. Vano, Paulu, Silas ni Timotiyu yahorwaa ncoko nkhwaawe, masi Luka atthunaka ahohala uFilipo. Nloko no phiyaaru naapankale isiyani ule ukatyuule? Yakaviheriyaka ni nnepa wa Yehova, mayamunna o phiyaaru yaholakela uhihiya unswalela Yehova. (Afili. 2:12) Unawoonannya wiira ayo yahontteeliha nrima cinene Paulu!
3. Toko cinthoonyeraaya Afilipo 1:9-11, isiyani Paulu yaalepelaawe alompaka?
3 Uvira waya myaakha cookhalaka 10, Paulu ahantikhela iwarakha nloko nooFilipo. Nhina iyo iwarakheeyo, ninaakhitiri woona mananna Paulu caafentaawe ale mayamunnaale. Uyo ahowantikhela co: “Kiri oonukheliya venci ni nyuuva otheene cinyu, ni nifento, khampa na Kristu Yesu.” (Afili. 1:8) Nhina yeeyo iwarakheeyo, Paulu aheera wiira aanawaalompela venci. Uyo aananlepela Yehova wiira aakavihere mayamunna uvira yatepaka wincivihaca nifento naya, wiira ayo acuweleehe citthu citepale ukhala cofayita, wiira akhale oolikana ni wiira akhale oocarana nhokorokho wosariya. Ilelo, hiivano ciicammo pooti ukaviheriya cinene ni moolumo eekhweeli a Paulu. Phimaana, nttwee nisome moolumo Paulu yaawantikhenlyaawe afilipo. (Usome Afilipo 1:9-11.) Ni ninaahala ciicammo woopela mwaha citthu coolumalyaawe ni woona manannani cinlamuliyeehu weettela khula itthu.
WINCIVIHACE NIFENTO NAA
4. a) Toko cinthoonyeraaya 1 Joau 4:9, 10, itthuni yuulupale inthoonyera wiira Yehova naanifenta? b) Nifento nihu ni Nluku ninlamuliya ukhala cani?
4 Yehova naanifenta cinene. Itthu yuulupale inthoonyera wiira naanifenta ukhanle uyova unveleeliha mwanawe watuninyani wiira akhwe anoopolaka mmatampini wihu. (Usome 1 Joau 4:9, 10.) Nifento nuulupale na Yehova ninaaniiriha hiiva upheela ciicammo unfenta. (Aroo. 5:8) Masi nifento nihu ni Nluku ninlamuliya ukhala cani? Yesu ahaakhula nno nikohonno ukati waamwiirenlyaawe nfarisewu: “Unfente Yehova, Nlukwaa ninrimaa wotheene, niirohwaa yotheene ni muupuwelelwaa otheene.” (Mat. 22:36, 37) Nrimeehu khunlamuliya ukhala wookawanihiya. Hiiva nimpheela wiira nifento nihu ni Nluku nuunuweke khula nihuku. Toko apostolu Paulu ciiralyaawe, nifento nihu ninlamuliya ‘uvira nitepaka winciva.’ Isiyani ninlamuliyeehu upanka wiira nifento nihu ni Yehova nivire nitepaka winciva?
5. Isiyani inlamuliyeehu upanka wiira nifento nihu nuunuwe?
5 Wiira ninfente Nluku, nihaana nincuwelaka. Ibiiblya ineera: “Ule hinfenta, khanoncuwela Nluku, kontha Nluku nifento.” (1 Joau 4:8) Apostolu Paulu hothoonyera wiira nifento nihu ni Nluku ninaahala ukhomaala cinene natothaka ‘ucuwelaca weekheeli ni ankhilyaawe.’ (Afili. 1:9) Ukati waapacenreehu usoma Ibiiblya, niheetthuca unfenta Nluku hataa ukhalaka wiira khanaacuwela makhalelwaawe ootikhiniha otheene. Nuukatyaaya, hiiva naheetthuca citthu cikiina ca Yehova, ni nifento nihu nuuyova naanaavira natepaka wuunuwa. Khanimpheela wiira nno nifentonno nihiye wuunuwa. Phimaana muukumini wihu, ninoona ukhala itthu yofayita cinene usoma Ibiiblya ni wuupuwela cinene insomeehu!—Afili. 2:16.
6. Toko cinthoonyeraaya 1 Joau 4:11, 20, 21, manannani ninlamuliyeehu wincivihaca nifento nihu?
6 Nifento nuulupale ninnithoonyeraawe Nluku ninaahala unipankiha waafenta mayamunneehu. (Usome 1 Joau 4:11, 20, 21.) Hiiva atthunaka ninoopuwela wiira waafenta mayamunneehu ni asirokorihu khunrika. Kontha otheene ninonswalela Yehova ni ninawiikurumica utakiha makhalelwaawe. Hiiva ciicammo ninawiikurumica untakiha Yesu, nifentale cinene mpaka uvaha ukumyaawe wiira anoopole. Masi, ukati nkiina pooti unirikela wiiwelela nlamulo nineera wiira nihaana nifentanaka. Woone ntakihero nimoca ninthoonyera itthu yaakhumelenle wanlokoni nooFilipo.
7. Isiyani inniitthucihaaya ikano Paulu yanvahalyaawe Evodia ni Sintiki?
7 Evodia ni Sintiki yaari asirokorihu owiikurumica yaavarale nteko “nkhayi” ni apostolu Paulu. Atthunaka ooyeeli yahokhalana nanrokottole ni yahohiya waatanaca. Phimaana, ukati afilipo yantikheliyaaya iwarakha ni Paulu, khaahiyale unromola Evodia ni Sintiki ni waavaha ikano woohikhuwakhuwa: ‘Nkhalane moopuwelelo mamocaaru.’ (Afili. 4:2, 3) Paulu ciicammo ahoona wiira ahaana avahaka ikano nloko notheene naafilipo: “Nhihiye upanka citthu cotheene woohaapana ni woohinyakulihana.” (Afili. 2:14) Khweeliini, ikano Paulu yaavahalyaawe woohikhuwakhuwa, yahaakavihera kahi paahi asirokorihu ookhuluvelya Evodia ni Sintiki, masi ciicammo yahaakavihera atthu otheene o wanlokoni. Mayamunna afilipo yahoona wiira yahaana yafentanaka cinene.
Kontha isiyani nihaana niikurumicaka uweheeha citthu comaana cimpankaaya mayamunneehu? (Uwehe iparaagarafu 8) *
8. Isiyani inhala unirikihela waafenta mayamunneehu, ni ninlamuliya umaliha cani iyo?
8 Toko Evodia ni Sintiki, ukati nkiina hiiva pooti unirikela cinene waafenta mayamunneehu naweheehaka venci citthu cinvonyaaya. Otheene cihu ninaavonyaka khula nihuku. Masi naweheehaka cinene citthu cinvonyaaya akhunanihu, unaahala utepa unirika waafenta. Wootakihera, wuupuwele wiira munna mmoca holiyala unikavihera ukweca Usalau yo Umwene. Iyo itthwiiyo atthunaka inawuurusa, ni weeva unawancera wuupuwela ikwaha cotheene uyo munnooyo pankalyaawe itthu yohinamaana. Masi weeva woopuwelaka commo, unaahala utepa urusiya ni khunhala unfenta cinene uyo munnooyo. Yookhumelelaka iyo itthwiiyo, umananihe wuupuwela ila: Yehova naakhitiri woona citthu cinvonyaawe uyo munnooyo ni naakhitiri woona citthu cinvonyaa weeva. Masi hataa ukhalaka commo, uyo nanlelo nanfenta uyo munnooyo ni ciicammo nawuufenta weeva. Khunkupali wiira phataari untakiha Yehova ni uweheeha citthu comaana cimpankaaya mayamunneehu? Neekurumicaka waafenta mayamunneehu, ninaatepa wiiwanana naayo.—Afili. 2:1, 2.
‘CITTHU CITEPALE UKHALA COFAYITA’
9. Citthuni “citepale ukhala cofayita”?
9 Nnepa wowaarya wahomwiiriha Paulu wantikha awiirelaka afilipo—ni makristau otheene—wiira ‘acuweleehe citthuni citepale ukhala cofayita.’ (Afili. 1:10) Nhina citthu citepale ukhala cofayita, uhaavo ureerihiya ncina na Yehova, wiirannya impheelaawe ni ukhala nnema ni wiiwananiya wanlokoni. (Mat. 6:9, 10; Joau 13:35) Hiiva nanfenta khweeliini Yehova, nnyo citthunnyo ciicammo ninaahala woona ukhala cofayita.
10. Isiyani ninlamuliyeehu upanka wiira Yehova anoone ukhala atthu oolikana?
10 Paulu ciicammo aheera: “Nkhale oolikana.” Iyo khinapheela uhimya wiira hiiva nihaana nikhalaka oohipahuwa. Hiiva khaninkhitiri ukhala oolikana toko Yehova ciryaawe oolikana. Masi neekurumicaka wiira nithoonyere nifento ni nahooleliheraka citthu citepale ukhala cofayita, Yehova naahala unoona ukhala atthu oolikana. Inanna imoca yoothoonyera nifento, ukhanle upanka inkhitiriihu wiira nihaakakathule akhunanihu.
11. Kontha isiyani khaninlamuliya waakakathula akhunanihu?
11 Wowaakulela, Paulu aheera: “Nhaakakathule akhunaninyu.” Manannani caahaleehu unkakathula ntthu? Hiiva atthunaka pooti unkakathula ntthu ni mathukelo anthanleehu, ikuwo cinwareehu awula nteko unvareehu. Weeva atthunaka pooti ulakela upanka itthu yoohitakhala. Masi wakhala wiira iyo itthwiiyo inanhunka ntthu ni uyo naakakathuwa nlattu wo iyo, inkhala itthu yuulupale. Yesu aheera wiira phatari hiiva utthukeleliya nsikoni nluku noolemela ni uttikheliya mpahari, uhiya unkakathula munneehu!—Mat. 18:6.
12. Isiyani inniitthucihaaya itthu yaapankilyaaya anamathelana mapiyoneeru?
12 Woone mananna anamathelana mapiyoneeru ceettenlyaaya moolumo a Yesu. Wanlokoni waya, ahaavo nlopwana naamwaarawe yaapattisiye phiyaaru, ni yoonuwenle mmatthokoni waakhottihiyaaya upanka citthu cinci. Nlattu wo iyo, ooyeeli yoopuwela wiira khayaalamuliya urwaa usineemani woona ifiilime—hataa yakhalaka ifiilime yoohoonihera citthu cootakhala. Nihuku nimoca, ale mapiyoneerwaale yahorwaa usineemani woona ifiilime. Masi nlopwana naamwaarawe yaapattisiye phiyaaru ukati waacuwenlyaaya iyo, yahokhala oohunkiya. Vano mapiyoneeru yaapankale isiyani? Ayo yaholakela uhirwaa-tho usineemani mpaka ukati anamathelana yaapattisiye phiyaaru waahalaaya ukhitiri uwehera ratta citthu. (Mabere. 5:14) Upanka waya commo, mapiyoneerwaale yahothoonyera waafenta mayamunna o phiyaaru kahi paahi ni moolumo, masi ni citthu caapankilyaaya.—Aroo. 14:19-21; 1 Joau 3:18.
13. Manannani caahaleehu unvariha matampi ntthu?
13 Hiiva ciicammo pooti unkakathula ntthu noolumaka itthu inhala unvariha matampi. Manannani? Wuupuwele ila: ntthu nsomihiya Ibiiblya, heekurumica cinene ni hokhitiri uhiya uhapaliya. Uyo naacuwela wiira unaahala unrika wiivaraca ni naalakela uhiwurya nipha mena vakaani. Uyo naakhitiri urukunusa makhalelwaawe ni naapattisiya. Nuukatyaaya, munna mmoca o wanlokoni nanlattula wuulyani ni nanvaha nipha amwiirelaka: “Weeva nna co uhopattisiya; ni uhaana nnepa wowaarya wa Yehova. Ikhalelo imoca yo nhokorokho wo nnepa ukhanle wiivaraca, keera? Weevaracaka, khunhala uwurya cinene mpaka uhapaliya.” Wuupuwele itthu yaahala ukhumelela waari wiira munna pattisiye phiyaaru aheewelela iyo ikano yoohinamaaneeyo!
14. Mikutthaano cihu cinnikavihera cani weettela moolumo ari nhina Afilipo 1:10?
14 Mikutthaano cihu cinaathoonyera mananna menci o weettela moolumo ari nhina Afilipo 1:10. Woopacera, myaha cinoolumiya umikutthaanoni cinaanuupusera isiyani Yehova inoonaawe utepa ukhala yofayita. Yonayeeli, mikutthaano cinaanithoonyera mananna o weettela ile ineetthuceehu, ni iyo inaanikavihera ukhala oolikana. Ni yoneeraru, mikutthaano cinaanisovenriha “uthoonyera nifento ni upanka miteko comaana.” (Mabere. 10:24, 25) Mayamunneehu yanilipihaka, nifento nihu ni Nluku ni nifento ninaathoonyereehu mayamunna ninaatepa wuunuwa. Ni nanfentaka Nluku, ciicammo naafentaka mayamunna, khaninhala upanka nanka itthu inhala waakakathula mayamunneehu.
“NKHALE OOCARANA NHOKOROKHO WOSARIYA”
15. Ukhala ‘oocarana nhokorokho wosariya’ maanaaya wiira cani?
15 Waalompaawe, Paulu aholepela wiira makristau afilipo akhale “oocarana nhokorokho wosariya.” (Afili. 1:11) Khweeliini, uyo ‘nhokorokho wosariyooyo’ waari unfenta Yehova ni waafenta mayamunna. Ciicammo waari waalalyeera akhwaaya umwaamini waya Yesu ni niweherero naya noohoolo. Masi kahi iyo paahi. Nhina Afilipo 2:15, Paulu heera wiira makristau afilipo yahaana ‘woonnyeela khampa mithuko co watuninyani.’ Nno nlattaniheronno nikhanle nomaana, kontha Yesu ahowiihana attharyaawe “nthuko woomwaleela ituninya.” (Mat. 5:14-16) Uyo ciicammo ahaaruma attharyaawe ‘waapanka eetthuci’ ni aheera wiira ayo yaahala ukhala ‘masaahiti mpaka micoko coottayi nviralyaaya ituninya.’ (Mat. 28:18-20; Mite. 1:8) Phimaama, inanna ikhwaawe hiivano yookhalana “nhokorokho wosariya,” ukhanle wiikurumica cinene ukavihera uyo nteko wofayitooyo.
Natthukiye uRooma, Paulu nawantikhela iwarakha nloko nooFilipo. Uyo ukatyuuyo, Paulu ciicammo aheekurumica waalalyeera ale yankhalenla ni ale yaawa umootola (Uwehe iparaagarafu 16)
16. Afilipo 1:12-14 inthoonyera cani wiira hiiva pooti upharela toko mithuko hataa yanikhumelelaka marikariko? (Uwehe ilatarato iri wakaapani.)
16 Hataa cinikhumelelaka citthuni, hiiva pooti upharela toko mithuko. Ukati nkiina, itthu yoonirikihela ulalyeera, pooti univaha ukati woolalyeera ihapari comaana. Woone itthu yankhumelenle apostolu Paulu. Ukati wantikhalyaawe iwarakha ya afilipo, Paulu aanootthukiya nnupani uRooma. Masi unyoolo waatthukeliyaawe khawanhiihale Paulu waalalyeera ale yankhalenla ni ale yaawa umootola. Hataa akhalaka ni marikariko, Paulu khaahiile ulalyeera, ni iyo yahaakavihera mayamunna ukhala ookhuluvela ni oolipa nrima “wiira alalyee nuulumo na Nluku woohova.”—Usome Afilipo 1:12-14; 4:22.
Khula ukati, utothe mananna o wiikurumica upanka inkhitiryaa wuulalyeerani (Uwehe iparaagarafu 17) *
17. Uttonke ntakihero no mayamunna o mahukweehu anthoonyera ukhalana mihokorokho hataa yaakhumelelaka marikariko.
17 Mayamunneehu ni asirokorihu enci anaatakiha ulipa nrima wa Paulu. Ayo ankhala ilapo unkhottihiyeehu ulalyeera mmawaani, masi anaaphwanya mananna makiina oolalyeera ihapari comaana. (Mat. 10:16-20) Ilapo imoca unkhottihiyeehu ulalyeera mmawaani, mootoli osirikwiitu ahowiirela mayammunna wiira yaalamuliya ulalyeera “ncokwaaya,” awula waalalyeera amucyaaya, aattamanannyaaya, atthu anaavaranaaya nteko awula anaasomanaaya ni atthu akiina anaacuwelaaya. Uvira waya myaakha miili, maloko o ile isirikwiitwiile yahoncerya. Pooti ukhala wiira ilapo inkhaleehu khaninkhottihiya ulalyeera mmawaani. Masi hataa ukhalaka commo, itthu ipankalyaaya mayamunneehu ni asirokorihu ile ilapweele inaaniitthuciha itthu yofayita: khula ukati utothe mananna o wiikurumica upanka inkhitiryaa wuulalyeerani, ni ukhuluvele wiira Yehova naahala wuuvaha ikuru cimpheelaa wiira ukhitiri uvilela khula inanna yo marikariko.—Afili. 2:13.
18. Isiyani weeva inlamuliyaa ulakela upanka?
18 Ula ukati unkhaleehuula, ulakele weettela ikano Paulu ivahalyaawe nwarakhani ya afilipo: ucuweleehe citthuni citepale ukhala cofayita, ukhale oolikana, uhaakakathule akhwaa ni ukhale oocarana nhokorokho wosariya. Wapanka commo, nifento naa ninaahala winciva ni unaahala waattitthimiha Apaapeehu o nifento, Yehova.
NCIPO 17 “Eu Quero!”
^ par. 5 Venci-venci ilelo, nifento ninaathoonyereehu mayamuneehu nihaana natepaka ukhala noolipa. Iwarakha Paulu yaawantikhenlyaawe afilipo inawoonihera manannani nifento nihu ninencivaaya, hataa warikaka uthoonyera nifento.
^ par. 54 ILATARATO: Ukati wookweciya Isalau yo Umwene, munna mmoca neehaniya José, naweemela ni nawanca umoopana mwaha munna nkhwaawe ni mwanawe. Iyo itthwiiyo inannyoonyiha cinene Márcio, munna cisale ikaruma yookumiha ntthupi. Uyo nawuupuwela co: ‘Uhiya ukweca, José noopa mwaha!’ Wahoolo waya, Márcio naamoona José aakaviheraka arokorihu owuuluvala. Umoona wawe apankaka iyo, Márcio nawuupuwela makhalelo omaana arinaawe munnaawe.
^ par. 58 ILATARATO: Ilapo Masaahiti a Yehova unkhottihiyaaya ulalyeera mmawaani, munna mmoca nanlalyeera ihapari co Umwene ntthu noncuwelaawe ni mananna uhinhalaaya ucuwela atthu akiina. Wahoolo, ukati wonterevaalu untekoni, uyo munnooyo nanlalyeera nlopwana nonvaranaawe nteko.
