MWAHA WOOSOMIYA 31
NCIPO 12 Yehova ti Muluku Muulupale
Isiyani Yehova ipankilyaawe wiira awoopole apinaatamu oottheka
“Kontha Nluku haafenta cinene apinaatamu, phimaana haavaha mwanaawe mmoca.”—JOAU 3:16.
ITTHU INHALEEHU WIITTHUCA
Nhina ula mwahoola, ninaahala woona mananna Yehova cinnikaviheraawe waanana matampiihu ni mananna unnikaviheraawe ukhalana niweherero noophwanya ukumi woohimala ni woohipahuwa.
1-2. a) Matampi isiyani ni manannani ninhaleehu uthema? (Nwehe ciicammo “Nuulumo nootaphuleliya”) b) Isiyani inhaleehu woona nhina ula mwahoola ni unttharelana nhina ila irevisteela? Nwehe ciicammo “Mawehero anamasoma” nhina ila irevisteela.)
NYUUVA mwampheela ucuwela mananna Yehova noofentaaweni? Inanna imoca yo woonenela iyo, ukhanle usomasoma isiyani Yehova ipankilyaawe ni ihinhiyaawe upanka wiira awoopoleni nyuuva ntampini ni muukhwani. Itampi a ikhanle nwananiihu owoopiha cinene. Nwanani mmoca nihinonkhitiriihu untthema veekheehu. Hi ninaavara matampi mahuku otheene ni ukhwa nlattu wo matampi. (Aroo. 5:12) Masi iyo khinakhala itthu ihinkhitiriihu utthema. Nikaviheriyaka ni Yehova, hiiva pooti unkhitiri untthema uyo nwananyooyo. Khweeliini, Yehova honikhuluveliha ni naahala unoopola ntampini ni muukhwani!
2 Woopwahaka myaakha 6.000, Yehova haakavihera apinaatamu waanana itampi. Kontha isiyani uyo nopankaawe iyo? Kontha uyo naanifenta. Ukhuma nenne niwumpilyaawe apinaatamu, Yehova naanoonihera nifento. Uyo hopanka citthu cuulupale cinene wiira anikavihere utthema itampi ni ukhala apatthannyaawe. Yehova naacuwela wiira itampi inaawaana ukhwa ni uyo khampheela wiira hiiva nikhwe. Yehova nopheela wiira hiiva nikhale mpaka. (Aroo. 6:23) Uyo nopheela wiira nyuuva nkhale mpaka. Nhina ula mwahoola, ninaahala woona waakhuliya waya makoho mararu: (1) Niwehereroni Yehova naavahalyaawe apinaatamu oottheka? (2) Isiyani atthu okhalayi yaapankilyaaya wiira antteelihe nrima Yehova? (3) Isiyani Yesu ipankilyaawe wiira awoopole apinaatamu?
NIWEHERERONI YEHOVA NAAVAHALYAAWE APINAATAMU OOTTHEKA?
3. Manannani anamathelana oopacera yaavanryaaya matampi?
3 Yehova umumpa wawe nlopwana oopacera ni nthiyana oopacera, uyo apheela wiira akhale ootteeliya. Yehova ahaavaha nipuro nomaana wiira akhale, itthuvo yomaana uthelanaca ni uvara nteko wootteeliha nrima. Ayo yankhalana iparakha yowaacariha atthu watuninyani ni ukhaliha ituninya ipeephoni khampa yo Eeteni. Yehova ankhottihile Atamu ni Hawa itthu imoca paahi. Ni iyo yaari itthu yoohirika wiiwelela. Uyo ciicammo athoonyeraka waafenta, ahaataphulela itthu yaahala waakhumelela yaahihisimeke nno nlamulonno ni yathanlaka uhimwiiwelela. Iyo yaahala ukhala itampi ni yanhala wiiriha ukhwa. Hi ninaacuwela itthu yiirannyeele. Nlayikha nimoca nootakhala nrima nihinonfenta Nluku ni apinaatamu, nahontheperya Atamu ni Hawa uhimwiiwelela Nluku. Anamathelana oopacera yaaheewelela nno nlayikhanno. Uhiya waakhuluvela apaapaaya onifento, ayo yaahovaraca itampi. Ni hi ninaacuwela itthu ikhumelenle. Ukhuma nenne nihukunne, Atamu ni Hawa yahohuva muukumini waya motheene, yahooluvala, yahowerennya ni mpaka ukhwa. Khampa Yehova caahimenryaawe, ayova yahoturuwela ukhala ntthupi.—Upha. 1:28, 29; 2:8, 9, 16-18; 3:1-6, 17-19, 24; 5:5.
4. Kontha isiyani Yehova unonrusaaya itampi ni manannani cinnikaviheraawe waanana? (Arooma 8:20, 21)
4 Iyo ikhanle ihantisi yooriipiha nrima, masi Yehova heeriha wantikhiya mbiibiliyani wiira niiweehe ikhweeli cofayita. Iyo ihantisiiyo, inaanikavihera woona kontha isiyani Yehova ihinoncivelaaya itampi. Itampi inaamwalaniha upatthaniihu ni Yehova. (Isai. 59:2) Khweeliini, nlayikha nootakhala nrima nanthepenrye Atamu ni Hawa uvara itampi, inancivela itampi ni khanhiya waakurumica apinaatamu mahukwaala uvara itampi. Atamu ni Hawa uvara waya itampi, Sotwani atthunaka oopuwela wiira Yehova khaahala wiirannyeeha itthu yaalakenlyaawe naapinaatamu. Masi uyo, khoopuwela wiira Yehova khanle naanifento. Yehova khaahala urukunusa itthu yaapheelelaawe asaana a Atamu ni Hawa. Uyo nawaafenta apinaatamu. Phimaana, Atamu ni Hawa uvara waya itampi, Yehova hovaha niweherero ucuulu wotheene wa Atamu ni Hawa. (Nsome Arooma 8:20, 21. b) Yehova ancuwela wiira asaana akhwaawe a Atamu ni Hawa yanhala uthanla unfenta ni umwiiwelela. Phimaana, ahopanka yotheene wiira awoopole ntampini ni waavaha ukati wiira amwaattamele. Isiyani Yehova ipankilyaawe wiira yiirannye?
5. Ukatini Yehova woonihenryaawe wiira apinaatamu oottheka ahaana niweherero? Ntaphulele. (Uphattuwaca 3:15)
5 Nsome Uphattuwaca 3:15. c Niweherero noohoolo noonannyeele ukati Yehova waahimilyaawe itthu yaahala urwaa umwiirannyeela Sotwani. Yehova ahohimya wiira wanhala ukhala ucuulu waahala uvareliya nteko wiira uwoopole apinaatamu. Uyo ucuuluuyo, wanhala unyakela muru wa Sotwani ni wanhala umalamaliha masakha yaakhumelenle u Jardim yo Eeteni. (1 Jo. 3:8) Masi, wiira yiirannye iyo itthwiiyo, uyo ucuuluuyo wahaana wahuvaka. Sotwani ahaana urakaliha ucuuluuyo ni mpanka wiiriha ukhwa. Iyo khweeliini, yanhala unkumiherera masakha Yehova. Masi uyo ahaamini uhuvihiya ucuuluuyo, kontha naayo manannaayo, atthu oophiyaka imiliau phaahalaaya woopoliya ntampini ni muukhwani.
ISIYANI APINAATAMU OTTHEKA OKHALAYI YAAPANKILYAAYA WIIRA ANTTEELIHE NRIMA YEHOVA NI UMPATTANANA?
6. Isiyani alopwana akhwaawe owaamini khampa Abel ni Nowee yaapankilyaaya wiira ampatthanane Yehova?
6 Waahoolo, Yehova ahaathoonyihera vakaani itthu apinaatamu oottheka yaalamuliyaaya upanka wiira ampatthanane. Wootakihera, Abel mwaana o nayeeli a Atamu ni Hawa, ahothoonyihera umwaamini Yehova ukati Atamu ni Hawa woomoliyaaya u Jardim yo Eeteni. Abel ananfenta Yehova ni ampheela untteeliha nrima ni umpatthanana. Phimaana, uyo ahopheela unvaha itthu Yehova. Abel aari makampuci okhontwa, vano, uyo ahokusa ikhontwaa yomaana wiira anvaherere Yehova khampa nkuttho. Manannani Yehova oonenlyaawe uyo nkutthooyo? Uyo “aahonwehesesa niiraati Abel ni nkutthwaawe.” (Upha. 4:4) Yehova ciicammo, anthoonyihera upheela itthuvo caatthu akhwaawe yanfenta ni yankhuluvela. Khampa Nowee. (Upha. 8:20, 21) Utthuna wawe nnyo itthuvonnyo, Yehova hothoonyihera wiira apinaatamu oottheka pooti untteeliha nrima ni umpatthanana. d
7. Isiyani ineetthuceehu niitthu Yehova anlepenlyaawe Aparahaamu wiira apanke?
7 Unavinre ukati, Yehova ahonlepela Aparahaamu nlopwana aarina waamini woolipa upanka itthu yoorika cinene. Unvaherera mwaamwanawe, Isaaki, khampa nkuttho. Khweeliini, iyo yaari itthu yoorika yaalepeliyaawe muukumini wawe. Unawoonannya wiira khiivo itthu Yehova anlepenlyaawe Aparahaamu uvikana iyo. Uhookhalaru commo, Aparahaamu aaholakela umwiiwelela Yehova. Ukati Aparahaamu waapheelaawe unvaherera mwaamwanawe Isaaki, Yehova ahonkhottiiha. Yehova khaapheela wiira Aparahaamu ariipiye nrima cinene nlattu wookhwa mwanaawe. Itthu Yehova anlepenlyaawe Aparahaamu inaaniitthuciha otheene cihu itthu yofayita cinene. Yehova anhala unvaherera mwaamwanawe mmoca anfentaawe. Iyo yaanoonihera wiira aanaafenta apinaatamu.—Upha. 22:1-18.
8. Isiyani yaathoonyeraaya itthuvo caasovenrihaaya nlamulo na Moceesi? (Levitiku 4:27-29; 17:11)
8 Uvira waya iseekulu, Yehova ahaavaha nlamulo apoovu o Isarayeli ni nno nlamulonno naahimya wiira a Sarayeeli yahaana yavahaka nkuttho wo inama wiira aleveleliye itampi caya. (Nsome Levitiku 4:27-29; 17:11. e) Nnyo itthuvonnyo, yaari mananna oothoonyihera nkuttho wofayita waahala uvahereriya. Itthuvo yaahala umalamaliha matampi apinaatamu otheene. Yehova ahowiiriha maporofeeta menci wuuluma ucuulu waakhuluvelihiye. Ayo yantaphulela wiira uyo ucuuluuyo, aahala ukhala mwaana ofayita a Nluku, aahala uhuva ni ukhwa. Uyo ucuuluuyo, wanhala wiivaherera khampa itthuvo yo khontwa. (Isai. 53:1-12) Muupuwele co: Yehova aanhala unvaha mwaamwanawe nonfentaawe khampa itthuvo wiira awoopole apinaatamu otheene— mmatampini ni muukhwani—wuuhelani nhina nyuuva!
ISIYANI YESU IPANKILYAAWE WIIRA AWOOPOLE APINAATAMU NTAMPINI?
9. Isiyani Joau Mpattisa yaahimilyaawe amwaacaka Yesu? (Maberewu 9:22; 10:1-4, 12)
9 Mwaakha 29 nawile Kristu, Joau Mpattisa ahomoona Yesu Nnasarenu ni aheera co: “Moone Ikhontwaa ya Nluku inkumiha matampi watuninyani!” (Joau 1:29) Ayo moolumwaayo, anaathoonyera wiira Yesu phaari ucuulu waakhuluvelihiye ni Yehova. Yesu anhala uvaherera ukumyaawe khampa itthuvo yaahala uwoopola apinaatamu. Yooyo ukatyuuyo, niweherero Yehova aakhuluvelihilyaawe wiira anhala uwoopola apinaatamu nahoonannya.—Nsome Maberewu 9:22; 10:1-4, 12. f
10. Manannani Yesu woonihenryaawe wiira wile wiihana anamatampi?
10 Yesu anaawacera nimananna omaana ale yaahuva nlattu wo matampi ni uyo anawaalattula wiira akhale attharyaawe. Yesu ancuwela wiira apinaatamu anaahuva nlattu wo matampi. Phimaana, uyo ampanka yotheene wiira aakavihere alopwana ni athiyana yaahuva nlattu wo matampi yaavanryaaya. Ikwaha imoca, uyo ahotaphulela iyo avarelaka nteko ntakihero. Uyo enre co: “Atthu akumi khanrwaa wa meetiku, masi aretta phinrwaa.” Vano uyo aheera-tho co: “Kontha mi akaawenle anasariya, masi kaawenle anamatampi.” (Mat. 9:12, 13) Ni iyo phiitthu Yesu yaapankilyaawe. Uyo ahowoonihera unamaana ni waalevelela athiyana amoca oottheka yaarapihile nnya cawe ni miithoryaaya. (Luka 7:37-50) Uyo ahowiitthuciha ikhweeli cinci ni cofayita athiyana amoca o Samariya, hataa acuwelaka wiira yaakhala ninlopwana ahaathenle. (Joau 4:7, 17-19, 25, 26) Mpaka Nluku honvahacera Yesu ikuru wiira amalihe ukhwa— ukhumelenle nlattu wo matampi. Manannani? Yesu hoonihera iyo ukati waawunwelelihilyaawe alopwana, athiyana ni asaana.—Mat. 11:5.
11. Kontha isiyani apinaatamu oottheka waacivelaaya umwaattamela Yesu?
11 Phimaana, atthu enci yaavara matampi moolupale yaaneecoona saana yamwaattamelaka Yesu. Uyo anawoonihera unamaana ayo atthwaayo ni ancuwela mananna ceecoonaaya. Phimaana, khaavo oova umoopana mwaha uyova. (Luka 15:1, 2) Yesu anaattottopela ni aanaacaaliha atthu yoonihera umwaamini. (Luka 19:1-10) Naayo manannaayo, Yesu ahothoonyihera mananna Yehova ryaawe Nluku nakiriri. (Joau 14:9) Citthu Yesu coolumilyaawe ni caapankaawe, caanawoonihera wiira Yehova nawaafenta aatthu ni noopheela waakavihera utthema itampi. Uhiya commo, Yesu ahaakavihera anamatampi upanka marukunuso ni untthara.—Luka 5:27, 28.
12. Isiyani Yesu yaahimilyaawe mananna aahalaawe ukhwa?
12 Yesu ancuwela wiira anhala uvaherera ukumyaawe. Phimaana, ikwaha cinci ahaahimerya eetthucyaawe wiira anhala utumihiya ni ukhomeliya wanipottoni. (Mat. 17:22; 20:18, 19) Uyo ancuwela wiira iyo itthuvweeyo yanhala umalamaliha matampi ntuninyani, khampa Joau ni maporofeeta makhwaawe yuulumilyaaya. Yesu ciicammo aheera, ukati waahalaawe ukhwa, anhala ‘uwiihana atthu wo khula ikhapila.’ (Joau 12:32) Iyo maanaaya wiira ule nohala uthoonyera umwaamini Yesu ni ukhala nttharyaawe naahala unciveliha Yehova ni ciicammo naahala “woopoliya ntampini.” (Aroo. 6:14, 18, 22; Joau 8:32) Phimaana, Yesu ahokhala oolipa nrima ni aari oolikaneene wiira akhwe nimananna oowerya.—Joau 10:17, 18.
13. Manannani Yesu khwilyaawe ni ukhwa wawe unniitthuciha isiyani ya Yehova Nluku? (Nwehe ciicammo ilatarato.)
13 Yesu ahotumihiya nimpatthannyaawe anfentaawe cinene. Nuuwakatyaaya, awanannyaawe yahontthuka, yahonruwana ni yahomootherya upanka citthu cahaapankilyaawe. Uyo aholakeliya wiiviya ni ahohuvihaciya ikwaha cinci coovirikana. Wuumaleloni, anatoropa yahonkhomela wanipottoni. Cotheenennyo, khweeliini cahomwiiriha Yesu uhuva. Masi, ahaavo ntthu aatepile uhuva cinene, Yehova Nluku. Yehova ahaana eevaracaka wiira himalihe uhuva wa mwanaawe yoole ukatyuuyo. Kontha isiyani? Isiyani yankurumicile Yehova unhiya mwanaawe wiira ahuvihiye ni akhwe? Waakhuliya waya nna nikohonna, uri nnuulumoni nimoca: nifento. Yesu aheera co: “Kontha Nluku haafenta cinene apinaatamu, phimaana haavaha Mwanawe mmoca, wiira ntthu nhala umwaamini hitankanyiye, masi aphwanye ukumi woohimala.”—Joau 3:16.
Hi khanincuwela mananna Yehova huvilyaawe nlattu wonhiya mwaamwanawe wiira akhwe, masi uyo hopanka iyo wiira anoopole ntampini ni muukhwani (Nwehe iparaagarafu 13 )
14. Itthuvo ya Yesu inoonihera isiyani?
14 Yesu hovaha nkuttho muulupale unoonihera mananna Yehova nofentaawe ucuulu wa Atamu ni Hawa. Iyo itthuvweeyo inawoonihera mananna Yehova noofentaaweni nyuuva. Yehova hovaha itthu yofayita yaarinaawe ni mpaka wahophiya ukati waariipiyaawe nrima wiira akhitiri uwoopolani nyuuva mmatampini ni muukhwani. (1 Jo. 4:9, 10) Khweeliini, Yehova noopheela unkavihera khula ntthu waanana matampi—ni uthema!
15. Isiyani inlamuliyeehu upanka wiira matampiihu aleveleliye?
15 Iyo itthuvo ya Nlukwiiyo, uri wiivaherera wa mwaamwanawe anfentaawe, inawiiriha ukhitirya uleveleliya itampi cihu. Masi wiira nileveleliye ni Nluku, nihaana upanka isiyani? Joau Mpattisa ni Yesu, yaahoohimya itthu inlamuliyeehu upanka: “Nttharuwe, kontha Umwene wo wiirimu uri wakhiviru.” (Mat. 3:1, 2; 4:17) Vano, itthu inhala unikavihera waanana matampi ni wiira nikhale apatthani apaapeehu onifento ukhanle uttharuwa. Masi uttharuwa maanaaya isiyani ni manannani iyo inhalaaya unikavihera waanana itampi? Mwaha unttharanaca nuula, unaahala waakhula nno nikohonno.
NCIPO 18 Ninnixukhurela Yowoopola
a NUULUMO NOOTAPHULELIYA: Mbiibiliyani, nuulumo “itampi” pooti waaciya citthu piili coovirikana. Ikwaha cikhwaawe pooti waaciya citthu cootakhala awula wakhalaka wiira ntthu khaneettela mattharelelo Yehova neeraawe phiri omaana awula oohinamaana. Masi nuulumo “itampi” ciicammo pooti waaciya uhimalela awula itampi ciyaryaanneehu ca Atamu. Hiiva ninkhwa nlattu wo matampi niyaryanneehu.
b Arooma 8:20 Citthu cowumpiya khacaaphenle uhukhumwiya wiira cihikhalane niweherero, masi Nluku phaaphenle uhukhumu. Ni ukati waahukhumwalyaawe, uyo ahonivaha niweherero 21 wiira cowumpiya cinaahala uhiya ukhala ipottha coopahuwa ni cinaahala uphwanya utaphuwa woottitthima waasaana a Nluku.
c Uphattuwaca 3:15 Kinaahala uhiwiiwananiha weeva ni nthiyana, ni kinaahala uhiiwananiha ucuulwaa weeva ni ucuulu wa nthiyana. Ucuulu wa nthiyana nokowuunyakata muru ni weeva unkonrakaliha ikottokotthwaawe.
d Yehova pooti waatthunaawe itthuvo yaavahaaya apinaatamu ookhuluvelya hinaaya uwa Yesu, kontha uyo ancuwela wiira Yesu anhala uvaherera ukumyaawe wiira awoopole apinaatamu ntampini ni muukhwani.—Aroo. 3:25.
e Levitiku 4:27 Wakhala wiira ntthu naavara matampi woohilakela ni untthekela Yehova apankaka itthu uyo nonihimyeera wiira nihipanke 28 awula onenelaka itampi vanryaawe, naahala uwaana ipuri yankaani wiira avahe itthuvo, alivelaka matampyaawe. 29 Naahala uhela ntata nawe wamuru wo Iyo itthuvweeyo ni nohala uvaha iyo itthuvweeyo nipuro ninvahiya itthuvo yoopahiya; 17:11 Kontha ukumi wo khula itthu (inama) uri mphomeni, kuuvahilyaakani wakhilompeni wiira mwiilevelele ineenenyu. kontha iphome inlevelela nlattu wo ukumi urinaaya.
f Maberewu 9:22 Coo, toko nlamulo ninhimyaaya, citthu cotheene cinreerihiya niiphome, waahikhaleke umwarusiya wo phome, khaninkhala nlevelelo; 10:1 Nlamulo nikhanle paahi irunku yo citthu comaana caahala uwa, masi khaninakhala itthweeneeneeyo. Phimaana, niitthuvo caavahereriya khula mwaakha woohihiyereriya, nno khaninkhitiri waakhaliha oohipahuwa ale anonswalela Nluku. 2 Niireke khawaahala uhinnya uvahereriya itthuvo? Kontha ale anvara miteko cowaarya, ureerihiya waya, khayaahala ukhalana moopuwelelo o matampi. 3 Woovirikana nnyo itthuvonnyo cinkhala khula myaakha, nuupuwelelo no matampi 4 kontha iphome yo moope ni yopuri khinkhitiri umaliha matampi. 10 Nlattu wo itthu “ impheeleenyu,” hi nihoreerihiya niirutthu ya Yesu Kristu ivahereriye ikwaha mmoca.
