MWAHA WOOSOMIYA 33
NCIPO 130 Nihaana nilevelelanaka
Manannani Yehova nopheelaawe wiira mayamunna yaatafiti ale avanre itampi cuulupale?
“Masi, ntthu avaraka matampi, nihaana namakavihera.” —1 JO. 2:1.
ITTHU INHALEEHU WIITTHUCA
Isiyani ineetthuceehu nimananna nloko no Korintu nanwaceraaya munna avaraka matampi moolupale.
1. Isiyani Yehova inaapheelelaawe apinaatamu otheene?
YEHOVA howumpa apinaatamu niitthuvo yoothanla itthu yoohala upanka. Nyuuva nnaavarela nteko iyo itthuvweeyo khula nihuku ukati nnolakeleenyu itthu yoohala upanka. Itthu yofayita cinene khula ntthu inlamuliyaawe ulakela, ukhanle wiivaherera wa Yehova ni upanka mphantte waamucyaawe. Yehova noopheela wiira otheene nilakele upanka iyo. Kontha isiyani? Kontha uyo nawaafenta apinaatamu ni noopheela waakavihera. Uyo noopheela wiira akhalane upatthani nuuyo ni akhale mpaka.—Deut. 30:19, 20; Akalas. 6:7, 8.
2. Manannani Yehova cineecoonaawe aawehaka atthu ampanka citthu cootakhala ahooniheraka uttharuwa? (1 Joau 2:1)
2 Phimaana, Yehova khanonkhanyereriha ntthu wiira answalele. Uyo nanhiya khula ntthu ulakela uthanla itthu yoohala upanka. Vano wakhalaka wiira nkristau oopattisiya naavara itampi yuulupale? Wakhalaka wiira uyo khanttharuwa naakumihiya wanlokoni. (1 Akor. 5:13) Masi, hataa ukhalaka commo, Yehova naaweherera wiira uyo ntthuuyo anturuwele. Khweeliini, iyo phiitthu yofayita cinene imwiirihile unvaherera mwanawe wiira atthu oottheka anttharuwa aleveleliye. (Nsome 1 Joau 2:1. a) Nlukwiihu onifento nawaakurumica ale avanre itampi wiira attharuwe.—Zak. 1:3; Aroo. 2:4; Tiya. 4:8.
3. Isiyani inhaleehu woona nhina ula mwahoola?
3 Yehova nopheela wiira ntthu novara itampi cuulupale ninwehere khampa uyo nonweheraawe. Nhina ula mwahoola, ninaahala woona manannani ninhaleehu upanka iyo. Woosoma ula mwahoola, ntothe (1) manannani nloko no Korintu nanwaceraaya ntthu aavara itampi cuulupale, (2) ikanoni apostolu Paulu yaavahilyaawe wakhalaka wiira ntthu vanre itampi naattharuwa, ni (3) manannani ila ihantisi yo mbiibiliyaniila, inniitthucihaaya mananna Yehova naaweheraawe makristau anvara itampi yuulupale.
MANANNANI MAKRISTAU OSEKULU YOOPACERA YAAWACERAAYA ALE YAAVARA ITAMPI CUULUPALE?
4. Isiyani yaakhumelenle ninloko noopacera no Korintu? (1 Akorintu 5:1, 2)
4 Nsome 1 Akorintu 5:1, 2. b Nkwaha wo neeraru waapankilyaawe weemisiyonaariyu, Paulu aheewa ihapari yanriipihile nrima yo nloko nophiyaaru no Korintu. Munna mmoca onne nlokonne ahaarupana anumwaane. Iyo yaari itthu yoohinamaana hataa “atthu o ntuninyani yahaapankaaya”! Wanlokoni khiivo yaapankiye, woovirikanaca mayamunna yantteeliya nuuyo. Atthunaka atthu akhwaawyaayo yoopuwela wiira ayo akhanle mananna Nluku ooniheraawe unakiriri ni ukhala owiiwanannya naapinaatamu oottheka. Masi Yehova khampheela citthu coohinamaana iriyari ya apoovwaawe. Uwehawehiya waya ratta-raatta uyo mwahooyo, waahoneneliya wiira uyo nlopwanooyo anaawiiriha wuulumiya pusya nloko. Uyo pooti waahalaawe wiiriha makristau akhwaawe yankhalakhalana upanka iyo itthwiiyo. Vano, isiyani Paulu aarumilyaawe mayamunna nno nlokonno upanka?
5. Isiyani apostolu Paulu yaahimenryaawe mayamunna o nloko no Korintu wiira apanke ni isiyani yaapheelaawe uhimya? (1 Akorintu 5:13) (Nwehe ciicammo ilatarato.)
5 Nsome 1 Akorintu 5:13. c Yehova aahonruma apostolu Paulu wantikhela iwarakha mayamunna o nloko no Korintu, aahimeryaka wiira ntthu vanre itampi yuulupale hooniheraka uttharuwa haana akumihiyaka wanlokoni va. Manannani makristau ookhuluvelya yaahalaaya unwacera? Paulu aahowiirela co: “Nhiye unkhalakhalana wamoca uyo ntthuuyo.” Iyo itthwiiyo maanaaya isiyani? Paulu aahomalihera eeraka co: “Nhinlyaane nipuro nimoca.” (1 Akor. 5:11) Umookomana wiira munlyaane ntthu kumihiye wanlokoni pooti uviriha ukati mwinci munthukanaka awula mmoopanaka mwaha. Khweeliini, Paulu aapheela wiira nloko khaninlamuliya unkhalakhalana ntthu kumihiye wanlokoni. Iyo yanhala ukhikicera nloko nhina citthu cowoopiha. (1 Akor. 5:5-7) Uhiya commo, unyema unkhalakhalana nipuro nimoca ntthu kumihiye wanlokoni pooti umwiiriha ucuwelela wiira khweeliini hohiya weetta iphiro ca Yehova, umoonihiihaca ihaaya ni mpaka umwiiriha uttharuwa.
Paulu aahowantikhela iwarakha mayamunna nloko no Korintu wiira ntthu vanre itampi hooniheraka uttharuwa haana akumihiyaka wanlokoni (Nwehe iparaagarafu 5)
6. Isiyani mayamunna o wanlokoni yaapankilyaaya ukati waakhenlyaaya iwarakha ya Paulu ni isiyani nlopwana aavanre itampi yaapankilyaawe?
6 Vano uvaherera wawe iwarakha nloko no Korintu, Paulu aahopacera wiikoha mananna mayamunna yaahalaaya uwehera iyo itthwiiyo. Wiimaleloni, Titu aahonwanela ihapari cantteelihile nrima Paulu. Mayamunna o nloko no Korintu yahotthara ikano ya Paulu ni yahonkumiha ntthu aavanre itampi. (2 Akor. 7:6, 7) Uhiya commo, uvira waya myaakha Paulu navaherenre iwarakha, ntthu aavanre itampi ahoonihera uttharuwa niitthu yaapankilyaawe. Uyo ahorukunusa moopuwelelwaawe oohiloka ni ahopacera utthara moopuwelelo osariya a Yehova. (2 Akor. 7:8-11) Isiyani Paulu aahimenryaawe mayamunna o wanlokoni wiira apanke?
MANANNANI MAYAMUNNA YANWACENRAAYA NTTHU AAVANRE ITAMPI OONIHERAKA UTTHARUWA?
7. Isiyani nlopwana yaapankilyaawe ukumihiya wawe wanlokoni? (2 Akorintu 2:5-8)
7 Nsome 2 Akorintu 2:5-8. d Paulu ahoona wiira “uyo nlopwanooyo ulakiya wawe naatthu enci unaatosa”. Nimoolumacero makhwaawe, ulakiya wahonkavihera uyo nlopwanooyo. Aamalenle cani? Wahonkavihera uttharuwa.—Mabere. 12:11.
8. Isiyani apostolu Paulu yaahimenryaawe mayamunna o wanlokoni wiira apanke?
8 Ukhala wiira uyo nlopwanooyo aahottharuwa, Paulu aahowiirela mayamunna o wanlokoni co: “Anhiye uyo nlopwanooyo aturuwele wanlokoni. Uyo ciicammo, ahowiirela mayamunna wiira “nhaana munlevelelaka ninrimeenyu wotheene ni nhaana mummaalihaka wiira uyo hitepe uriipiya nrima mpaka wanoocyaawe”. Phimaana, kinwiirelani wiira munthoonyere unfenta. Paulu apheela wiira mayamunna anthoonyere wiira ananfenta uyo nlopwanooyo nimoolumacerwaaya ni citthu caapankaaya wiira khweeliini yaahonlevelela. Uyo munnooyo, anhala ukupaleela wiira mayamunna yaari ootteeliya nlattu wooturuwela wanlokoni.
9. Kontha isiyani atthu akhwaawe waanaarika unlevelela munna aattharuwile?
9 Wuupaceroni, atthunaka atthu akhwaawe khayaari ootteeliya wiiwa waya wiira munna aakumihiye wanlokoni hoturuwela. Kontha isiyani nineereehu commo? Atthu akiina atthunaka yaari oonyonyinya kontha ahonkumiherera nanrokottole wanlokoni. Ni akhwaawe pooti ukhalaka ooriipiya nrima nuuyova nlattu wo waanyoonyiha. Ukhala wiira mayamunna yaahovara nteko mwinci wiira ceetteliye ikano ca Yehova. Atthu akhwaawe khayoona ukhala itthu yofayita ntthu vanre itampi uhokoloseriya wanlokoni. (Luka 15:28-30.) Kontha isiyani yaaryaaya itthu yofayita mayamunna o wanlokoni unthoonyihera nifento nookhuluvelya munna aaturuseliye?
10-11. Isiyani yaahala wiirannya unari wiira mayamunna khayaatthuna unlevelela ntthu aavanre itampi attharuwaka?
10 Muupuwele unari wiira mahumu o wanlokoni khayanttunihenre uturuwela wanlokoni nlopwana oonihenre uttharuwa awula mayamunna ni mayanuunu khayanthoonyihera nifento, uyo wanhala unriipa nrima cinene. Uyo pooti woopuwelaawe wiira khawaahala ukhitirya-tho ukhala mpatthani a Yehova. Ni mpaka uhiya wiikurumica wiira alokiherere upatthannyaawe ni nluku.
11 Isiyani yaahala umwiirannyeela unari wiira mayamunna khayaatthuna unlevelela nlopwana oonihenre uttharuwa? Iyo yanhala utankanya upatthannyaaya ni Yehova. Kontha isiyani? Kontha ayo khayaahala untakiha Yehova naalevelela apinaatamu oottheka yooniheraka uttharuwa. Uhiya commo, ayo yaahala untakiha Sotwani khanle ootakhala nrima ni hinoonihera unakiriri. Ayo yanhala unhiya Sotwani aavarelaka nteko wiira ahinlipihe ni ukurumica uyo nlopwanooyo unswalela Yehova.—2 Akor. 2:10, 11; Efesu 4:27.
12. Manannani mayamunna o wanlokoni yaahalaaya untakiha Yehova?
12 Manannani nloko no Korintu naahalaaya untakiha Yehova unhiya Sotwani? Yattharaka mananna Yehova naaweheraawe atthu oottheka anttharuwa. Moone isiyani anamantikha Ibiibiliya ihimilyaaya amwaacaka Yehova. Davidi enre co: “Yehova, nkhanle namaana ni khula ukati nnaatthuna ulevelela.” (Isaa. 86:5) Mikeya hantikha co: “Tipani khanle Nluku khampa nyuuva, tipani nolevelela coottheka caya ni hinoopuwela-tho itampi ca apoovu?” (Mik. 7:18) Ni Isaiya hooluma co: “Atthu oohiloka ahiye iphiro caya, ni anakhirini ahiye moopuwelwaaya; anturuwele Yehova nohala uwoonela ikiriri; anturuwele Nlukwiihu, kontha naahala waalevelela niiraati.”—Isai. 55:7.
13. Kontha isiyani wiiriyaaya wiira nlopwana vanre itampi attharuwaka pooti uhokoleela wanlokoni? (Nwehe ikwaaturu “ Ukatini nlopwana o Korintu aaturuseliyaawe wanlokoni?”)
13 Wiira antakihe Yehova, mayamunna o nloko no Korintu ahaana umwaakhelela ntthu vanre itampi attharuwaka ni unvaresesa ninifento. Paulu ahohimya wiira yamwaakhelelaka nlopwana aavanre itampi attharuwaka, yanhala uthoonyera wiira “anawiiwelela citthu cotheene.” (2 Akor. 2:9) Khweeliini, caavinre myeeri vakaani paahi uyo naakumihiye wanlokoni. Masi ulakiya wahomwiiriha uttharuwa. Phimaana, khawaahala ureera mahumu umpicapiciha unhokolosera wanlokoni.
MANANNANI NINHALEEHU UTAKIHA UNASARIYA NI UNAKIRIRI WA YEHOVA?
14-15. Isiyani inlamuliyeehu wiitthucera niitthu yaakhumelenle nloko no Korintu? (2 Peturu 3:9) (Nwehe ciicammo ilatarato.)
14 Ihantisi inooluma mananna nloko nokhalayi no Korintu nanwaceraaya ntthu, ihantikhiya mbiibiliyani wiira “nitthare.” (Aroo. 15:4) Nlattu wo iyo ihantisiiyo, niheetthuca wiira Yehova khanaatthuniha ale avanre itampi ahooniheraka uttharuwa uturuwela ukhala wanlokoni. Atthu akhwaawe pooti wuupuwela wiira Yehova khanle nakiriri. Uyo naahala ukupali wiira ntthu novara itampi yuulupale hooniheraka uttharuwa pooti nanlelo wankhalaawe naapoovwaawe. Masi ayo khanaakhala mananna Yehova nooniheraawe unakiriri. Hataa ukhalaka wiira Yehova khanle nakiriri, khanoncivela moopuwelelo otheene ni ikettelo cawe cinhimya itthu yomaana ni yoohinamaana khanrukunusa. (Yuda 4) Unari wiira Yehova anaahiya ale avanre itampi ahooniheraka uttharuwa ukhala nkhayi naapoovwaawe, khawaahala woonannya wiira khanle nakiriri ni nloko nanhala utakiha ayo moopuwelelwaayo.—Miru. 13:20; 1 Akor. 15:33.
15 Hataa ukhalaka commo, niheetthuca wiira Yehova khampheela umoona ntthu atankanyinyaka. Uyo nopheela wiira atthu otheene yoopwe. Ciicammo, uyo nawaathoonyihera unakiriri atthu anoonihera uttharuwa ni ampanka marukunuso ninrimaaya wotheene wiira akhalane upatthani woolipa nuuyo. (Ezek. 33:11; nsome 2 Peturu 3:9. e) Coo, nlopwana o Korintu waarukunusilyaawe moopuwelolwaawe, Yehova aahonvarela nteko apostolu Paulu akurumicaka nloko unlevelela ni umwaakhelela.
Utakiha nifento ni unakiriri wa Yehova, mayamunna o wanlokoni anaawakhelela sana-saana ale aavanre itampi yooniheraka uttharuwa awula aturuwenle wanlokoni (Nwehe iparaagarafu 14-15)
16. Manannani nyuuva nneecooneenyu nimananna nlopwana o Korintu aawaceriyaawe?
16 Ntakihero no nloko no Korintu ninawoonihera mananna Yehova ryaawe nanifento ni osariya. (Isaa. 33:5) Wiitthucera iyo, inaaniiriha upheela unswalela Nlukwiihu ninrimeehu wotheene. Kontha hiiva otheene nikhanle atthu oottheka. Phimaana, ninaapheela uleveleliya. Khula ntthu haana isariya yonsukhuru Yehova nlattu wooleveleliya itampi cihu. Ikhanle itthu yootteeliha nrima ucuwela wiira Yehova nawaafenta apoovwaawe ni nopheela waakavihera!
17. Isiyani inhaleehu woona mwaha unttharelana?
17 Wakhalaka wiira ntthu hovara itampi yuulupale mahukwaala, manannani mahumu o wanlokoni anhalaaya utakiha nifento na Yehova ni unkavihera ntthu uttharuwa? Manannani mayamunna anhalaaya ukhala mahumu yalakelaka unkumiha ntthu wanlokoni awula unturusela? Ninaahala woona waakhuliya waya ala makohwaala nhina mwaha unttharelana.
NCIPO 109 Niphentaneke ni Murima Wotheene
a 1 Joau 2:1 Asaanaaka, kinwantikhelani nnya citthunnya wiira nhivare matampi. Masi, ntthu avaraka matampi, nihaana namakavihera: Yesu Kristu, ule khanle nasariya ni ri nkhayi naapaapeehu.
b 1 Akorintu 5:1 Kiheewa wuulumiyaka wiira uhaavo iriyariinyu urupihana woohiloka, urupihaniya uhimphwanyannya iriyari yaamalaponi: toko nlopwana mmoca aathenle amwaara athumwaane. 2 Vano nyuuva inawuucivelani iyo itthwiiyo mpaka waneettottopeleenyu? Mena khamwaalamuliya, uhiya commo khayaalamuliya wuucukulihani wiira nlopwana vanre ayo matampyaayo akumihiye iriyariinyu?
c 1 Akorintu 5:13 vano Nluku norwaa waahukhumu ale ahikhanle munlokoni. “Munkumihe wanlokoni ntthu noopanka citthu cootakhala.
d 2 Akorintu 2:5 Wakhala wiira ntthu hopanka itthu yooriipiha nrima, kahi thi mi kiriipihile nrima, masi ooriipihileni nrima nyuuva otheene. Masi akimpheela wuuluma cinene ula mwahoola. 6 Uyo nlopwanooyo ulakiya wawe naatthu enci unaatosera; 7 Vano, nhaana munlevelelaka ninrimeenyu wotheene ni nhaana mummaalihaka, wiira uyo hitepe uriipiya nrima mpaka wanoocyaawe. 8 Phimaana, kinwiirelani wiira munthoonyere wiira nnanfenta.
e 2 Peturu 3:9 Yehova khampicapica upanka ikhuluvelihalyaawe, kahi toko atthu akiina cinoopuwelayaaya, masi uyo nawuuvilelani, kontha khaavo ntthu nompheelaawe umoona atankanyiyaka, masi nawiira uweherera wiira atthu otheene arukunuse mirima caya.
