MWAHA WOOSOMIYA 35
NCIPO 123 Nimwiiweleleke Yehova ni Mutthenkeso Awe
Manannani mahumu anhalaaya waakhavihera ale akumihiye wanlokoni?
“Kinoohimeeryani wiira, inanna imocaaru, unaahala ukhala utteeliya wiirimu nlattu wonamatampi mmoca nottharuwa uhiya anasariya 99 ahinlamuliya uttharuwa.”—LUKA 15:7.
ITTHU INHALEEHU WIITTHUCA
Ninaahala woona kontha isiyani atthu akhwaawe anlamuliyaaya ukumihiya wanlokoni ni manannani mahumu anhalaaya waakavihera uttharuwa ni uturuwela ukhala apatthani a Yehova.
1-2. a) Manannani Yehova naaweheraawe ale anvara itampi ahooniheraka uttharuwa? b) Isiyani Yehova inwehereraawe wiira ale anvara itampi apanke?
YEHOVA khaanoncivela moopuwelelo otheene; uyo khantthuka miitho wiira hoone citthu cootakhala. (Isaa. 5:4-6) Yehova noweherera wiira otheene cihu neettele ikettelo cawe cimphwanyannya mbiibiliyani. Masi unawoonannya wiira uyo khanweherera wiira hiiva khaninhala ukosa, kontha naacuwela wiira nikhanle atthu oopahuwa. (Isaa. 130:3, 4) Ukati yooyo, uyo khanaapheela atthu ahinonttitthimiha, antthara meettelo oohiloka anoonihera uhiwulihaca muru.’ (Yuda 4) Khweeliini Ibiibiliya inawuuluma “umalamalihiya waatthu ahinonttitthimiha” unhala wiirannya ikhotto yo Harmacetooni.—2 Pet. 3:7; Apoka. 16:16.
2 Masi Yehova khampa umoona ntthu atankanyinyaka. Khampa noonileehu myaha civinre, Ibiibiliya inawoonihera sana-saana wiira uyo “noopheela wiira atthu otheene arukunuse mirima caya.” (2 Pet. 3:9) Mahumu anantakiha Yehova yooniheraka uvilela ni umananiha waakavihera ale ampanka citthu cootakhala urukunusa mirima caya ni uturuwela ukhala apatthani a Yehova. Masi wooriipiha nrima, atthu akhwaawe khampheela nwo ukaviheriya nwo. (Isai. 6:9) Atthu akhwaawe khanhiya upanka citthu cootakhala hataa mahumu yamananihaka waakavihera. Vano yiirannyaaka iyo, isiyani mahumu inlamuliyaaya upanka?
“MUNKUMIHE WANLOKONI NTTHU NOOPANKA CITTHU COOTAKHALA”
3. a) Wakhalaka wiira ntthu vanre itampi khanoonihera uttharuwa, isiyani Ibiibiliya inrumaaya upankiya? b) Naayo manannaayo, kontha isiyani nineereehu wiira ntthuuyo phithanlile ukumihiya wanlokoni?
3 Wakhalaka wiira ntthu naapanka citthu cootakhala ni hooniheraka uttharuwa, mahumu khanoona-tho itthu yoohala upanka uhikhanle upanka ile imphwanyannya nhina iwarakha 1 Akorintu 5:13, ineera: “Munkumihe wanlokoni ntthu noopanka citthu cootakhala.” Nimoolumacero makhwaawe, uyo ntthuuyo phinthanla ukumihiya wanlokoni; uyo nohepha paahi ile yaalalyaawe. (Akalas. 6:7) Nlattuni nineereehu commo? Kontha uyo ntthuuyo naakhotta urukunusa moopuwelelwaawe hataa amananihaka ukaviheriya ni mahumu ikwaha cinci. (2 Mam. 17:12-15) Citthu cimpankaawe cinawoonihera wiira khampheela wiiwelela ikettelo ca Yehova.—Deut. 30:19, 20.
4. Kontha isiyani unhimyaaya wanlokoni wakhalaka wiira ntthu vanre itampi hooniheraka uttharuwa hokumihiya wanlokoni?
4 Ntthu noopanka citthu cootakhala hooniheraka uttharuwa ni akumihiyaka wanlokoni, anaahimyeeriya mayamunna o wanlokoni wiira uyo khanakhala-tho Saahiti a Yehova. Yahimiyaka commo, khanakhala wiira ntthuuyo khampheeliya. Khweeliini, inhimiya iyo wiira mayamunna o wanlokoni atthare ikano ineera: ‘Nhiye umpatthanana’ ntthuuyo ni ‘nhilyaane hataa vakaani.’ (1 Akor. 5:9-11) Yehova hovaha nno nlamulonno nimananna omaana. Apostolu Paulu enre co: ‘Iferementu vakaani inaalovotariha itiriku yotheene.’ (1 Akor. 5:6) Ale ahinoonihera uttharuwa niitthu ipankilyaaya, pooti umananiha wiiriha ale ammananiha weettela ikettelo co waarya ca Yehova ulolovaca.—Miru. 13:20; 1 Akor. 15:33.
5. Manannani ninhaleehu unwehera ntthu kumihiye wanlokoni ni kontha isiyani?
5 Manannani ninhaleehu umoonela ntthu nokumihiya wanlokoni? Hiiva khaninhala umpatthanana uyo ntthuuyo awula uviriha ukati ninari nuuyo ntthuuyo. Uhookhalaru commo, khaninlamuliya unwehera khampa ntthu oorimela, masi khampa ikhontwaa irimenle. Ikhontwaa yakhumaka muncicini inaaturuwela. Muupuwele wiira uyo ntthuuyo hovaherera ukumyaawe wa Yehova. Wooriipiha nrima, khaneettela ni khankhala khampa Yehova cinoncivelaaya. (Ezek. 18:31) Masi nuuwakatyaaya, Yehova pooti umoonihera unakiriri ni haana niweherero. Vano, manannani mahumu anhalaaya unkavihera ntthu kumihiye wanlokoni?
MANANNANI MAHUMU ANLAMULIYAAYA WAAKAVIHERA?
6. Isiyani mahumu inhalaaya upanka wiira yaakavihera ale akumihiye wanlokoni?
6 Niireke ntthu akumihiyaka wanlokoni, mahumu khanlamuliya unkavihera-tho unturuwela Yehova? Mena! Ukati mahumu unrwaaya umuulumana ntthuuyo wiira naahala ukumihiya wanlokoni, ayo ciicammo ananhimyeerya itthu inlamuliyaawe upanka apheelaka uturuwela wanlokoni. Ciicammo mahumu anaapanka-tho itthu ikhwaawe. Ikwaha cinci, ayo anaahala unkoha ntthuuyo wakhala wiira naapheela uthotoliya caviraka myeeri vakaani awehiyaka waakhala wiira hopanka marukunuso. Ntthuuyo atthunaka, nuuwakatyaaya, mahumu anaaturuwela-tho umoopana mwaha, yankurumicaka uttharuwa ni unturuwela Yehova. Hataa ukhalaka wiira khanoonihera uttharuwa, mahumu anaaturuwela umoopana-tho mwaha ntthuuyo ikwaha cikhwaawe, ankurumicaka uttharuwa.
7. Manannani mahumu antakihaaya unakiriri wa Yehova ukati unrwaaya umuulumana ntthu kumihiye wanlokoni? (Jeremiya 3:12)
7 Mahumu anawiikurumica utakiha unakiriri wa Yehova ukati unrwaaya umuulumana ntthu kumihiye wanlokoni. Wootakihera, Yehova khaaweherenre a Sarayeli yaavanre itampi woonihera uttharuwa wiira anhokoleele Yehova. Woovirikanaca, uyo ahopanka itthu wiira aakavihere hataa ahinaaya woonihera uttharuwa. Khampa noonileehu mwaha wo nayeeli nhina ila irevisteela, Yehova aahomwiirela Oseiya wiira ahaana aalevelelaka ni aahokolela amwaarawe hataa avanraka matampi. Naala manannaala, Yehova aahathoonyihera apoovwaawe wiira uyo ri oolikaneene wiira aalevelele. (Ose. 3:1; Mal. 3:7) Khampa Yehova, mahumu anaapheela venci cinene wiira ntthu vanre itampi attharuwe ni ahokoleele wanlokoni ni ayo anaahala upanka yotheene inkhitiryaaya wiira iyo itthwiiyo yiirannye. Apheelaka wiira ihinrikarikihele ule vanre itampi.—Nsome Jeremiya 3:12. a
8. Manannani ntakihero namwaana aakhumile wapuwani ninnikaviheraaya wiiweeha saana unakiriri wa Yehova? (Luka 15:7)
8 Ntakihero namwaana nothama wapuwani waasithumwaane, moone mananna athumwaane cimmwakhelelaaya. Ukati waamonnyaaya mwanaaya ahookolelaka wapuwani, athumwaane yaahontthawelela, yaahonkapatta ni yaahompexari ninrimaaya wotheene.” (Luka 15:20) Uhiya commo, ayo yaahopanka itthu khula nyari yaalamuliyaawe upanka. Mahumu anaawikurumica waathoonyera ayo makhalelwaayo ale akumihiye wanlokoni. Ayo ampheela wiira ikhontwaa cirimenle cihokoleele wapuwani.” (Luka 15:22-24, 32) Ukati ntthu vanre itampi ooniheraka uttharuwa, Yehova, Yesu ni malayikha anaakhala ootteeliya ni mayamunna o wanlokoni ciicammo anaakhala ootteeliya!—Nsome Luka 15:7. b
9. Ooniheraka waafenta, isiyani Yehova naahimeeryaawe ale anvara itampi ahooniheraka uttharuwa?
9 Mpaka va unawoonannya wiira Yehova khampheela wiira ale avanre itampi ahooniheraka uttharuwa akhale wanlokoni. Masi iyo khinthoonyera wiira Yehova nannyanyala ntthuuyo. Yehova nopheela wiira uyo anturuwele. Oseiya 14:4 inawoonihera sana-saana mananna Yehova cineecoonaawe amoonaka ntthu vanre itampi hooniheraka uttharuwa. Iyo ineera: ‘Kinaahala waalevelela coottheka caya. Kinaahala waafenta ninrimaaka wotheene, urusiya waka uhomala.’ Ukhala wiira mahumu anaacuwela mananna Yehova cineecoonaawe, anaahala ukhala owiitthenkaceene yanwehehaka ntthuuyo waakhala wiira hopacera woonihera uttharuwa. Vano ale ahiile unswalela Yehova khalayi, ala moolumwaala anaawakhuluveliha wiira Yehova nawaafenta cinene ni nopheela wiira aturuwele wanlokoni khampa khalayi.
10-11. Manannani mahumu ammananihaaya waakavihera ale akumihiye wanlokoni myaakha cinci?
10 Vano wakhalaka wiira ntthu kumihiye wanlokoni va khalayi, manannani mahumu anhalaaya unkavihera uyo ntthuuyo? Atthunaka uyo ntthuuyo holiyala itampi yaamwiirihile ukumihiya wanlokoni. Awula khanoopuwela itthu yaapankilyaawe wiira akumihiye wanlokoni. Hataa apankaka isiyani, mahumu anaahala untotha wiira anthotole uyo ntthuuyo. Vano mahumu pooti ulompa wamoca nuuyo ntthuuyo, ankurumicaka wiira aturuwele wanlokoni. Khweeliini, wakhalaka wiira ntthu kumihiye wanlokoni khalayi, uyo naakhala oololovaca nhina mminepani. Vano, wakhalaka wiira uyo naapheela uturuwela wanlokoni, mahumu naahala wiitthenkaca wiira ansomihe Ibiibiliya hataa ukhalaka wiira khanaaya uturuseliya wanlokoni. Ayo manannaayo, mahumu anaahala urwaa unsomiha Ibiibiliya uyo ntthuuyo.
11 Mahumu ampheela utakiha unakiriri ni ufenta wa Yehova. Phimaana, ayo anaawavyavya ale ahiile unswalela Yehova ni waathoonyera wiira pooti wanturuwelaaya unswalela Yehova. Ntthu novara matampi ooniheraka uttharuwa ni upanka marukunuso, pooti uturuseliya wanlokoni woohipica.—2 Akor. 2:6-8.
12. a) Isiyani mahumu inlamuliyaaya uweheeha saana? b) Kontha isiyani khaninlamuliya wuupuwela wiira atthu akhwaawe khanhala uleveleliya ni Yehova? (Nwehe ciicammo niwehero.)
12 Ikwaha cikhwaawe, mahumu anlamuliya ukhala oowehaweha ahinaaya unturusela ntthu wanlokoni. Wootakihera, wakhalaka wiira ntthuuyo aahothereriya umpanka citthu coosece mwaana, uvanyiha mattharelelo o mbiibiliyani awula umaliha ikacamentu aahikhanle mattharelelo o mbiibiliyani. Mahumu anlamuliya ukupaleha wiira uyo ntthuuyo khweeliini hottharuwa. (Mal. 2:14; 2 Tim. 3:6) Khweeliini, mahumu anlamuliya ukhikicera ikhontwaa. Ukati mmocaaru, mahumu anaacuwela wiira Yehova nampheela ntthu pankile itampi ooniheraka wiira khweeliini hottharuwa ni hohiiya meettelwaawe oohinamaana okhalayi. Hataa ukhalaka wiira ayo mahumwaayo anawoonihera ukhala oomaala ukati unaawaceraaya ale yaarina makhalelo oohinamaana khalayi, ayo khanhala wiira uyo ntthuuyo khunomphwanela uleveleliya ni Yehova. c—1 Pet. 2:10.
ISIYANI MAYAMUNNA O WANLOKONI INLAMULIYAAYA UPANKA?
13. Manannani ninonwacereehu ntthu ttarusiye? b) Manannani ninonwacereehu ule kumihiye wanlokoni?
13 Khampa noonileehu mwaha uvinre, wahimiyaka wanlokoni wiira haavo ntthu nottarusiya, hiiva khaninhiya umpatthanana kontha ninaacuwela wiira uyo ntthuuyo hottharuwa ni khampanka-tho citthu cootakhala. (1 Tim. 5:20) Uyo ntthuuyo, nanlelo naapanka mphantte wo wanlokoni ni naapheela ukaviheriya nimayamunna wamoca nimayanuunu wiira hihiye upanka itthu yomaana. (Mabere. 10:24, 25) Masi, unaavirikana wakhalaka wiira ntthuuyo hokumihiya wanlokoni. Wakhalaka commo, hiiva ‘khaninompatthanana ntthuuyo ni khaninonlyaana hataa vakaani.’—1 Akor. 5:11.
14. Isiyani khula nkristau inlamuliyaawe upanka wakhalaka wiira ntthu kumihiye wanlokoni naawa woona mikutthaano? (Nwehe ciicammo ilatarato.)
14 Niireke iyo intaphulela wiira nihaana waathanya ale akumihiye wanlokoni? Khunakhala commo. Masi, unawoonannya wiira khaninhala uviriha ukati mwinci nkhayi nuuyo ntthuuyo. Masi makristau pooti uvarela nteko moopuwelelwaaya wiira alakele wakhalaka wiira anaahala unlattula awula mena ntthu kumihiye wanlokoni, atthunaka mmucyaaya awula mpatthannyaaya wiira oone mikutthaano. Vano, wakhalaka wiira naatthuna? Khalayi, hiiva khanansalaamiha uyo ntthuuyo. Masi vano, khula nkristau pooti uvarela nteko moopuwelelwaawe atthenkaciye ni Ibiibiliya wiira alakele itthu yoopanka. Atthu akhwaawe pooti ulakela waasalaamiha awula waakhelela mmikutthaanoni. Uhookhalaru commo, unaareera wuupuwela wiira khanimpheela uviriha ukati mwinci nawoopanaka mwaha ayo atthwaayo awula naavaranaka miteko cikhwaawe.
Khula nkristau pooti ulakela ulattula ntthu kumihiye wanlokoni wiira oone mikutthaano awula unsalamiha aawaka woona mikutthaano (Nwehe ipaaragarafu 14)
15. Anatampini anhimiya nhina 2 Joau 9-11? (Nwehe ciicammo ikwaaturu “ Niireke wiira Joau ni Paulu yooluma itampi cimocaaru?”)
15 Atthu akhwaawe pooti wiikohaka co: ‘Masi, keera Ibiibiliya ineera wiira khaninlamuliya umuulumiha ntthu vanre matampi akumihiyaka wanlokoni?’ (Nsome 2 Joau 9-11. d) Itthu inhimyaawe 2 Joau 9-11 inawoonihera wiira nnyo iveerusunnyo cinwaaca anamavanyiha awula atthu anaakurumica akhwaaya upanka citthu cootakhala. (Apoka. 2:20) Phimaana, wakhalaka wiira ntthu naavannyiha awula naakurumica wiitthuciha citthu cowoothiya, mahumu khanla unthotola. Uhookhalaru commo, mahumu ahaana niweherero wiira uyo ntthuuyo attharuwe ni arukunuse moopuwelelwaawe. Masi ntthuuyo aahirukunuseke makhalelwaawe, hiiva khaninhala umuulumiha hataa unlattula umikutthaanoni.
NTAKIHE UNAKIRIRI WA YEHOVA
16-17. a) Isiyani Yehova impheelaawe wiira anatampi apanke? (Ezekiyeli 18:32) b) Manannani mahumu anhalaaya uvara nteko nkhayi ni Yehova wiira yaakavihere ale akumihiye wanlokoni?
16 Isiyani niitthucileehu nhina myaha 5 civinre co ila irevisteela? Niheetthuca wiira Yehova khampheela umoona ntthu atankanyinnyaka! (Nsome Ezekiyeli 18:32. e) Uyo nopheela wiira atthu avanre itampi yaakumihiyaka wanlokoni aturuwele wanlokoni. (2 Akor. 5:20) Phimaana, Yehova nawaalepela ale avanre itampi uttharuwa ni unturuwela uyova. Mahumu ahaana iparakha yoovara nteko nkhayi ni Yehova wiira yaakavihere ale avanre itampi cuulupale uttharuwa.—Aroo. 2:4; 1 Akor. 3:9.
17 Muupuwele utteeliya unkhalanaaya apaapeehu owiirimu, Yehova, Yesu ni malayikha yamoonaka ntthu aavanre itampi attharuwaka. Apaapeehu owiirimu, Yehova, anaakhala ootteeliya venci khula ikwaha anoonaaya ikhontwaa yaarimenle ihokolelaka wanlokoni. Ni unfenta wihu Yehova unaatepa winciva nuupuwelaka unakiriri ni unamaana wa Nlukwiihu uhinniphwanela.—Luka 1:78.
NCIPO 111 Citthu cinniitteeliha nrima
a Jeremiya 3:12 Urwe ni waahimerye ala moolumwaala: “‘“Akituruwele, Asarayeli akirukunuwenle”, neera Yehova.’ ‘“Akinhala wuuviruwelani nyuuva, kontha mi kikhanle ookhuluvelya”, neera Yehova.’ ‘“Ni akhinhala ukhala oorusiya mpaka.
b Luka 15:7 Kinoohimeeryani wiira, inanna imocaaru, unaahala ukhala utteeliya wiirimu nlattu wonamatampi mmoca nottharuwa uhiya anasariya 99 ahinlamuliya uttharuwa.
c Ibiibiliya inaahimya wiira atthu akhwaawe khanlamuliya uleveleliya. Iyo anaaciya atthu alakenle unrukunuwela Yehova. Yehova ni Yesu phinhala waahukhumu paahi ayo atthwaayo.—Mark. 3:29; Mabere. 10:26, 27.
d 2 Joau 9 Ule noovannyiha citthu ciitthucihilyaawe Kristu ni hintthara kharina Nluku. Masi ule nootthara citthu ciitthucihilyaawe Kristu, haana Apaapa ni Mwaana. 10 Vano ntthu awaaka uwuulumanani ni hiwaanaka citthu Kristu ciitthucihilyaawe, nhimwaakhelele watthokoni winyu ni nhinsalamihe hataa vakaani. 11 Kontha ule nonsalamiha naapanka mphantte mmitekoni wawe coohiloka.
e Ezekiyeli 18:32 Khunkitteela nrima nlattu wootankanyinnya ntthu’, neera Nkhulupale Pwiiya Yehova. Phimaana, nrukunuse mirima cinyu ni nkhale.
