MWAHA WOOSOMIYA 34
NCIPO 107 Yehova ti Ntakiheryo Nuulupale na Ophenta
Manannani mahumu anooniheraaya nifento ni unakiriri ale avanre itampi?
“Nluku nowoonihera unamaana wiira ookavihere uttharuwa.”—AROO. 2:4.
ITTHU INHALEHU WIITTHUCA
Nhina ula mwahoola, ninaahala woona mananna mahumu cinaakaviheraaya ale avanre itampi cuulupale wanlokoni.
1. Isiyani inhala wiirannya ntthu avaraka itampi yuulupale?
MWAHA uvinre, nihoona malakihero Paulu avahilyaawe nloko no Korintu mananna aalamuliyaawe uwaceriya nlopwana aavanre itampi yuulupale. Ule nlopwanoole, khoonihenre uttharuwa thimaana ahaana akumihiyaka wanlokoni. Masi Phanka cinooniheraaya iveerusu yo ula mwahoola, ntthu vanre itampi yuulupale pooti ukaviheriya uttharuwa. (Aroo. 2:4) Manannani mahumu anhalaaya unkavihera ule vanre itampi uttharuwa?
2-3. Isiyani inlamuliyeehu upanka neewaka wiira munna hovara itampi yuulupale ni kontha isiyani?
2 Mahumu yaahicuweleke wiira ntthu hovara itampi yuulupale, khanhala ucuwela mananna oonkavihera uyo ntthuuyo. Nacuwelaka wiira haavo munna vanre itampi yuulupale, isiyani inlamuliyeehu upanka? Nihaana unsovenriha waavya ukavihaceriya ni mahumu.— Isai. 1:18; Mite. 20:28; 1 Pet. 5:2.
3 Isiyani inlamuliyeehu upanka wakhalaka wiira ntthuuyo khanrwaa uwuulumana mahumu? Yeerannyaaka commo, hiiva ninlamuliya unhimerya humu wiira akaviheriye uyo ntthuuyo. Iyo ikhanle inanna yoothoonyera nifento, kontha khanimpheela unhaleela munneehu awula nuunwiihu. Wakhalaka wiira ntthuuyo khanhiya upanka citthu coohinamaana, upatthannyaawe ni Yehova unaahononya ni pooti wiiriha wuulumiya pusya nloko. Phimaana, hataa urikaka nihaana ulipa nrima ni uwuulumana mahumu, kontha ninanfenta Yehova ni mayamunneehu.—Isaa. 27:14.
MANANNANI MAHUMU ANONKAVIHERAAYA NTTHU VANRE ITAMPI YUULUPALE
4. Isiyani mahumu impheelaaya yamuulumanaka ntthu vanre itampi yuulupale?
4 Wakhalaka wiira haavo ntthu vanre itampi yuulupale wanlokoni, mahumu anawaathanla mayamunna mararu ciicammo ari mahumu wiira apanke mphwinko wo mahumu anhala umuulumana uyo ntthuuyo. a Ayo mayamunnaaya, ahaana akhalaka owiiyeviha. Ni anaapanka cotheene cinkhitiryaaya wiira ankavihere ntthu vanre itampi uttharuwa. Masi ayo anaacuwela wiira khanlamuliya unkhanyereriha ntthu uttharuwa. (Deut. 30:19) Ciicammo, anaacuwela wiira kahi atthu otheene anvara itampi anaakhala toko Davidi, ahaarunile ni attharuwile. (2 Sam. 12:13) Atthu akhwaawe anvara itampi, anaalakela uhiiwelela ikano ya Yehova. (Upha. 4:6-8) Masi hataa ukhalaka commo, mahumu khanhiyerera unkavihera ntthuuyo uttharuwa. Masi isiyani mahumu ihinlamuliyaaya uliyala ukati woomoopana mwaha ntthu vanre itampi?
5. Manannani mahumu anlamuliyaaya ukhala ukati ummuulumanaaya ntthu vanre itampi yuulupale? (2 Timotiyu 2:24-26) (Nwehe ciicammo ilatarato.)
5 Mahumu ananwehera ntthuuyo khampa ikhontwaa yofayita masi erimenle. (Luka 15:4, 6) Phimaana, yamphwanyaka ntthuuyo khammulumana ipwapwaka, khanonwacera pusya ni khanoopuwela wiira itthu inlamuliyaaya upanka ukhanle umpanka makoho paahi. Ni uhiya commo, ayo anaavarela nteko makhalelo anhimiya nhina 2 Timotiyu 2:24-26. b (Nsome.) Mahumu khanhiya ukhala oohikukurya ni ohisima kontha ampheela unkavihera ntthuuyo.
Khampa amakampuci, mahumu anaapanka yotheene inkhitiryaaya wiira ankavihere ikhontwaa irimenle. (Nwehe iparaagarafu 5)
6. Manannani mahumu aneetthenkacaaya ahinaaya urwaa umuulumana ntthu vanre itampi? (Arooma 2:4)
6 Mahumu anawiitthenkaca ahinaaya umuulumana ntthuuyo. Ayo anaamananiha untakiha Yehova mananna naaweheraawe ale avanre itampi. Ayo anawuupuwela moolumo a Paulu aneera: “Nluku nowoonihera unamaana wiira ookavihere uttharuwa.” (Nsome Arooma 2:4. c) Mahumu ahaana wuupuwela wiira akhanle amakampuci aneettiheriya ni Yesu Kristu. (Isaa. 11:3, 4; Mat. 18:18-20) Ahinaaya umuulumana ntthuuyo, mayamunna anhala umuulumana anawoopela mwaha itthu inhalaaya umuulumana ntthuuyo ni anaalompa: kontha itthu impheelaaya ukhanle unkavihera ntthuuyo uttharuwa. Ayo anaatotha mbiibiliyani, mmalivuruni wihu ni anaalompa yalepelaka mananna oonkavihera. Ayo anawoopela mwaha itthu imwiirihile uvara iyo itampiiyo.—Miru. 20:5.
7-8. Manannani mahumu anhalaaya utakiha uvilela wa Yehova woomuulumana ntthu vanre itampi?
7 Mahumu anaatakiha uvilela wa Yehova. Ayo anaacuwela mananna Yehova aawaceraawe atthu yaavara itampi khalayi. Wootakihera, Yehova ahomuulumana rattaraatta Caim, anhimeryaka citthu caahala unkhumelela nlattu wo matampi ni ahonvaha niweherero noncaaliha amwiiwelelaka. (Upha. 4:6, 7) Yehova ahonkavihera Davidi anvarelaka nteko porofeeta Nataa. Uyo ahovarela nteko ntakihero nanvanre nrima mwene Davidi. (2 Sam. 12:1-7) Ciicammo, Yehova khaahiile waaruma maporofeeta wiira yawuulumane asarayeli yanrukunuwenle. (Jer. 7:24, 25) Uyo khaahiile asarayeli woonihera uttharuwa veekhaayaru. Masi uhiya commo, uyo ahowaakuvela wiira aakavihere woonihera uttharuwa.
8 Mahumu anaatthara ntakihero na Yehova woomananiha waakavihera ale anvara itampi cuulupale. Khampa cinhimyaaya 2 Timotiyu 4:2, Ayo anawuupuwela “yooniheraka uvilela” wowaawacera ale avanre itampi. Phimaana, humu haana akhalaka omala ni owiiyeviha wonkavihera ntthu upanka marukunuso. Vano humuuyo akhalaka oorusiya, iyo pooti umwiiriha ntthuuyo uhiiwelela ikanweeyo awula uhitthuna upanka marukunuso.
9-10. Manannani mahumu anhalaaya unkavihera ntthu vanre itampi wuupuwelacera itthu ipankilyaawe?
9 Mahumu anaamananiha ucuwelela citthu cimwiirihile ntthuuyo uvara itampi. Niireke upatthannyaawe ni Yehova uhololovaca? Niireke wiira ahohiya upanka usoma wo veekha awula urwaa wuulalyeerani? Niireke wiira ulompa wawe khawaakhala wo wanrimani ni ahohiya ulompa khula mahuku? Niireke wiira uyo ahohiya waanana moopuwelelo oohiloka? Phaapani akhanle asipatthannyaawe ni citthuni cinthukanaawe? Manannani nnyo citthunnyo cirukunusilyaaya moopuwelelwaawe? Niireke naacuwela wiira citthu cikhwaawe cinlakelaawe cinanriipiha nrima Yehova?
10 Mahumu pooti umpanka makoho anhala unkavihera ntthuuyo wuupuwela citthu cilolovihacile upatthannyaawe ni Yehova ni uvara itampi. Khweeliini, ayo anhala upanka iyo nimananna ohisima ni woohinkohakoha citthu cihinlamuliyaaya ucuwela. (Miru. 20:5) Uhiya commo, mahumu pooti uvarela nteko ntakihero wiira ankavihere ntthuuyo wuupuwela itthu ipankilyaawe ni woona wiira khweeliini ikhanle itthu yootakhala, khampa Nataa aapankilyaawe wiira ankavihere Davidi. Naayo manannaayo, atthunaka ikwaha yoopacera noopaniyaawe mwaha ntthuuyo pooti upacera wuupuwela wiira itthu ipankilyaawe ikhanle yoohiloka ni uhituruwelatho upanka. Atthunaka uyo pooti woonihera uttharuwa weekhweeli.
11. Manannani mahumu anttharaaya ntakihero na Yesu?
11 Mahumu anawiikurumica wiira antakihe Yesu. Apheelaka unkavihera Saulu o Tarso, Yesu ahonkoha co: “Saulu, Saulu, kontha isiyani unkoomolanihacaa?” Naayo manannaayo, Yesu ahonkavihera Saulu wuupuwelacera wiira citthu caapankaawe caari coohinamaana. (Ekles. 9:3-6) Apheelaka waakavihera “athiyana amoca yeehaniya Jesapeli”, Yesu ahowiirela co: “Kihaavaha ukati wiira arukunuse makhalelwaaya.”—Apoka. 2:20, 21.
12-13. Manannani mahumu anhalaaya unvaha ukati ntthu vanre itampi wiira attharuwe? (Nwehe ciicammo ilatarato.)
12 Antakihaka Yesu, mahumu khanlamuliya uhoolelihera uhimya wiira ntthuuyo khanttharuwa. Atthu akhwaawe pooti woonihera uttharuwa ikwaha yoopacera anuulumaniyaaya, masi akhwaawe pooti uviriha ukati mwinci. Phimaana, mahumu pooti ummuulumanaaya ikwaha cikhwaawe. Nuulumaniyeene ikwaha yoopacera, atthunaka ntthuuyo naapacera wuupuwela itthu ipankilyaawe, mwaha waarinaawe ni mahumu ni untotha Yehova ninrimaawe wootheene alompaka. (Isaa. 32:5; 38:18) Vano, ikwaha ikhwaawe nohalaawe wuulumaniya uyo ntthuuyo naahala ukhalana moopuwelelo oovirikana naale yaarinaawe ikwaha yoopacera yuulumaniyaawe.
13 Wiira ankavihere ntthu vanre itampi uttharuwa, mahumu anaamoonihera unamaana ni unwacera ntthuuyo. Ayo anaalompa wiira Yehova acaalihe wiikurumica wawe ni ayo ahaana niweherero wiira uyo munnooyo naahala urukunusa moopuwelelwaawe ni attharuwe.—2 Tim. 2:25, 26.
Mahumu pooti umuulumana ntthu vanre itampi ikwaha cinci wiira amananihe unkavihera uttharuwa (Nwehe iparaagarafu 12)
14. Tipani unomphwanela uttitthimihiya nlattu wonkavihera ntthu vanre itampi uttharuwa ni kontha isiyani?
14 Wakhalaka wiira ntthu vanre itampi naattharuwa, otheene cihu unaanitteela nrima! (Luka 15:7, 10) Hataa ukhalaka wiira mahumu anawiikurumica unkavihera ntthu, tipani khweeliini nonkavihera ntthu vanre itampi upanka marukunuso? Muupuwele itthu Paulu antikhilyaawe awaacaka atthu oovara matampi: “Atthunaka Nluku nawuuvahani uttharuwa.” (2 Tim. 2:25) Uttitthima unoolumiya nhina iyo iveeruswiiyo uneera: “Uttitthima wootheene nlattu wo marukunuso ofayita khunrwaa waapinaatamu, masi wa Yehova. Uyo phinaakavihera makristau yanrukunuwenle upanka marukunuso. Paulu nawuncerera uulumaka citthu comaana cinkhumelela nhina uttharuwa. Ntthu vanre itampi attharuwaka, naakhalana ucuwelaca weekhweeli, naahiya meettelwaawe oohiloka ni unyema itapha ca Sotwani.—2Tim. 2:26.”
15. Manannani mahumu anhalaaya uhihiyerera unkavihera ntthu vanre itampi ttharuwile?
15 Ntthu vanre itampi ooniheraka uttharuwa, mahumu ananthotola wiira ankavihere ulipihaca waamini wawe, uhihiya waanana itapha ca Sotwani ni weetta iphiro comaana. (Mabere. 12:12, 13) Khweeliini, mahumu khanhimyaca citthu cipankilyaawe uyo ntthuuyo. Vano isiyani mayamunna owanlokoni inlamuliyaaya ucuwela?
“MUNLAKE UHOOLO WO MASAAHITI OTHEENE”
16. Thaapani akhanle “Masaahiti” Paulu aahimilyaawe nhina 1 Timotiyu 5:20?
16 Nsome 1 Timotiyu 5:20. d Paulu ahantikha ala moolumwaala amwantikhelaka Timotiyu wamoca ni mahumu aakurumicaka mananna owaawacera atthu yaavara matampi. Isiyani yaapheelaawe uhimya? Uyo khaapheela uhimya paahi uhimya wiira nloko notheene yaari masaahiti, uhiya commo uyo aawaaca atthu yaacuwela mananna ivariyaaya itampiiyo wiira pooti waakhalaaya masaahiti awula atthu aahimenryaawe itthu ipankilyaawe. Mahumu evitthavitthakoono yanhala ucuwela uyo mwahooyo ni ntthu vanre itampi naahala ulakiya.
17. Isiyani inhimiya wanlokoni wakhalaka wiira ntthu vanre itampi naacuweliya ni kontha isiyani?
17 Ikwaha cikhwaawe itthu yoohinamaana pooti umwareela wanlokoni wootheene awula ucuweliya. Wiirannyaaka commo masaahityaayo pooti waahela mayamunna o wanlokoni wotheene. Vano humu mmoca naahimya wiira munnooyo awula nuunuuyo khari saana. Kontha isiyani? Paulu nawaakhula eeraka: “wiira yaakavihere atthu otheene uhitthara moopuwelelwaawe uyo ntthuuyo.”
18. Manannani mahumu anonwaceraaya mmirawo vanre itampi? (Nwehe ciicammo ilatarato.)
18 Isiyani ineerannya wakhalaka wiira mmirawo pattisiye hinaaya upiiha myaakha 18 naavara itampi yuulupale? Mphwinko wo mahumu unawaathanla mahumu meeli wiira yaamuulumane uyo mmirawooyo wamoca naasithumwaane yakhalaka Masaahiti a Yehova. e Mahumu anaahala upheela ucuwela isiyani asithumwaane uyo mwaanooyo ipankilyaaya wiira ankavihere upanka marukunuso. Wakhalaka wiira uyo mmirawooyo nawiiwelela ikano cinvahiyaawe naasithumwaane ni urukunusa moopuwelelwaawe, ayo mahumu meelyaayo anaalakela uhirweehela mwahooyo uhoolo. Vano, asithumwaane khanhala uhiyerera unkavihera mwanaya, mahumu khanhala umuulumana mmirawooyo ni asithumwaane. Kontha, Yehova haavaha nrintti ayari wo waalaka asaanaaya ni nifento. (Deut. 6:6, 7; Miru. 6:20; 22:6; Efesu 6:2-4) Waviraka ukati, mahumu anaarwaa upheela ucuwela wakhala wiira asithumwaane aneera ankaviheraka mwanaya. Vano wakhalaka wiira uyo mmirawooyo khanhiya upanka citthu cootakhala ni naakhotta upanka marukunuso? Yiirannyaaka commo, mahumu anaarwaa umuulumana uyo mmirawooyo wamoca naasithumwaane akhanle makristau awula ale anonkhalana akhanle makristau.
Wakhalaka wiira mmirawo naavara itampi yuulupale, mahumu meeli anaarwaa umuulumana nkhayi naasithumwaane awula atthu akhwaawe anonkhalana akhanle makristau (Nwehe iparaagarafu 18)
“YEHOVA KHANLE NANIFENTO NI NAKIRIRI”
19. Manannani mahumu cineekurumicaaya untakiha Yehova ukati anaakaviheraaya atthu avanre itampi?
19 Mahumu ankavihera khampa mphwinko wo mahumu, ahaana nrintti uhoolo wa Yehova, wooreeriha nloko. (1 Akor. 5:7) Ayo ciicammo ampheela wiira ntthu vanre itampi attharuwe, wakhitiryaaka vale. Phimaana, ayo akhanle ookhuluvelya ni khanhiya uweherera wiira ntthuuyo apanke marukunuso. Kontha isiyani? Kontha ayo ampheela untakiha Yehova khanle “nanifento ni nakiriri.”(Tiya. 5:11) Moone mananna apostolu Joau aathoonyenryaawe nifento mayamunna ni mayanuunu. Uyo hantikha co: “Asaanaaka, kinwantikhelani nnya citthunnya wiira nhivare itampi, masi ntthu avaraka itampi nihaana namakavihera Yesu Kristu ule khanle nasariya ni ri Naapaapeehu.”—1 Jo. 2:1.
20. Isiyani inhaleehu woona nhina yoosomiya yookhicera yo ila irevisteela?
20 Wooriipiha nrima, ikwaha cikhwaawe ntthu vanre itampi naakhotta upanka marukunuso. Yiirannyaaka commo, uyo haana akumihiyaka wanlokoni. Isiyani mahumu impankaaya yeerannyaaka commo? Ninaahala waakhula nna nikohonna nhina mwaha woomalela wo ila irevisteela.
NCIPO 103 Axitokweene: Yoovaha ya Yehova
a Khalayi, iyo ikhurupu yo mahumwiiyo yeehaniya “Ikhurupu yo Mahumu inhukhumu”. Masi ukhala wiira ayo meehaneliwyaayo anthoonyera wiira uhukhumu phikhanle nteko wo ayo mahumwaayo, hi khaninhala uvarela-tho nteko ayo meehaneliwyaayo. Vano, ninhala uwiihana ayo mahumwaayo “Ikhurupu yo Mahumu” paahi.
b 2 Timotiyu 2:24 Ipottha ya Apwiiya khinlamuliya unyakulihana nintthu, masi ihaana yaatanacaka naatthu otheene, yookhitiri wiitthuciha moolumo a Nluku ni wiivaraca yapaciyaka, 25 ni ihaana ikhitiriki uwiitthuciha nimananna oomaalya ale ahimpheela wiiwelela. Pooti wanihukuni Nluku urwaaka warukunusa nrima, wiira nuuwakathyaaya yacuwele ikhweeli cawe.26 naayo manannaayo, anaahala waakakhaniha moopuwelelwaaya ni anaahala utthawa itapha ca Sotwani, kontha yahovarihiya nuuyo wiira apanke impheelaawe.
c Arooma 2:4 Niireke weeva khuncuwela wiira Nluku nowoonihera unamaana wawe, uvilela wawe ni upisa wawe nrima? Weeva khunoona wiira nowoonihera ureera wawe nrima, wiira ookavihere nttharuwa?
d 1 Timotiyu 5:20 Munttaruse eriyari yaatthu otheene ammoona ale anvara itampi, wiira akiinaayo yooveke.
e Wakhalaka wiira asithumwaane mmirawooyo khanakhala Masaahiti a Yehova, mahumu pooti umuulumana nkhayi ni ntthu muulupale nkiina nonkhalana ni nonwacera mminepani. Wakhalaka wiira khaavo ntthu commo, ayo anhala umuulumana nkhayi ni Saahiti a Yehova muulupale nonsomiha Ibiibiliya awula nkiina nonkhuluvelaawe mmirawooyo.
