Apostolu Paulu ahowantikhela makristau o Tesalonika eeraka: “wakhala wiira haavo ntthu hineewelela moolumo nantikhileehu nhina ila iwarakheela, nhinthukane”. (2 Atesal. 3:14) Khalayi mahumu yaalamuliya upanka mwaha wanlokoni wakhalaka wiira haavo ntthu hintthuna wiiwelela nuulumo na Nluku, ikhumelo uyo ukatyuuyo mayamunna o wanlokoni khayaalamuliya umpatthanana uyo ntthuuyo.

Masi ahopankiya marukunuso, nna va ninaakhitiri wiiweeha wiira ikano ya Paulu impheela uhimya wiira khula ntthu nlamuliya utthara iyo ikanweeyo, phimaana mahumu khampanka mwaha ummuuluma ntthu vanre itampi. Kontha isiyani apankiyaaya marukunuso? Moone itthu Paulu yaahimilyaawe ukati waavahilyaawe iyo ikanweeyo.

Paulu ahoona wiira mayamunna akhwaawe o nne nlokonne khayeewelela ikano co nnuulumoni na Nluku. Ikwaha ikhwaawe awotonlyaawe, Paulu aheerela co wakhala wiira ntthu khampheela uvara nteko, nhinvahe iyoolya, kontha atthu akhwaawe yaankhotta uvara. Uhiya commo, ayo atthwaayo yaneekelakeliha mwaha caakhunanaya. Manannani makristau yaahalaaya waawacera ayo atthu ohiwelelaayo?—2 Atesal. 3:6, 10-12.

Paulu enre co: “Nhaapatthanane.” Nuulumo neekereeku “uhimpatthanana” naaca uhinwacera ntthuuyo khampa munna. Paulu ahoveleeliha ayo moolumwaayo maloko otheene, uhiya paahi mahumu owanlokoni. (2 Atesal. 1:1; 3:6) Khula ntthu ahaala umoona mpathanyaawe hiiwelelaka nuulumo na Nluku ahaana ulakela uhimpatthanana uyo ntthuuyo.

Niireke ntthuuyo ahaana awaceriyaka khampa munna oomoliye wanlokoni? Mena, Paulu aheera-tho: “Munwacere khampa munna”vano wo khula nkristau ahaana umpatthanana umikutthaanoni wuulalyeerani masi khaalamuliya uviriha ukati mwinci ni uyo ntthuuyo. Kontha isiyani? Paulu aheera “wiira uyo ntthu ohiiwelelooyo oone ihaaya ni ahiye iphiro cawe coohiloka”.—2 Atesal. 3:14, 15.

Manannani makristau o mahukwaala anhalaaya weettela iyo ikannweeyo? Yoopacera, nimpheela ucuwela wakhala wiira mwaha unuulumiyoyo khunvarihana niitthu inhimyaaya Ibiibiliya, khampa Paulu caahimilyaawe uyo khawaaca atthu yaarina moopuwelelo oovirikana awula citthu cinlakelaaya upanka, ni uyo khawaaca atthu atthunaka aninyoonyihile, uhiya commo Paulu aawaaca atthu yalakela ninrimaaya wootheene uheewelela ikano caakhuma nnuulumoni na Nluku.

Mahukweehwaala, namoonaka munneehu owanlokoni akhalanaka nrima woohiiwelela, hiiva pooti ulakela uhiviriha ukati mwinci nuuyo ntthuuyo. a Ukhala wiira nilakenle nasineeneehu khaninhala wuuluma uyo mwahooyo naatthu akhwaawe ahikhanle amuciihu ni khaninhala uhiya umpatthanana uyo ntthuuyo umikutthaanoni ni wuulalyeerani,vano arukunusaka meettelwaawe ninaahala umpatthanana toko khalayi.