MBIIBLYANI, ninaasoma moolumo atthu enci ookhuluvelya “o makhalelo toko hiivano.” (Tiya. 5:17) Wootakihera, hiiva ninaacuweleeha itthu Paulu yaapheelaawe uhimya nhina Arooma 7:21-24: ‘Keeraka kipankeke itthu yomaana, ihaavo ikuru inkikakhelela upanka yoohinamaana. Kihotakhaliya!’ Ukati nkiina, coottheka cihu cinaaniriipiha nrima. Masi ninaalipihiya makhuva nacuwelaka wiira Paulu, nlopwana ookhuluvelya, ciicammo ahiicoona toko hiivano.

Paulu ciicammo ahohimya mananna makiina ciicoonaawe. Nhina Akalasiya 2:20, uyo hohimya akupaleehaka: ‘Mwaana a Nluku hokifenta miiva ni heevaherera wiira akoopole miiva.’ Vano weeva? Unawuurika ukupaleeha iyo itthwiiyo?

Atthunaka weeva unkhala ni masukhuli nlattu wo matampi apankalyaa khalayi. Wakhalaka commo, pooti wuurikela cinene ukupali wiira Yehova khweeliini nawuufenta ni hoolevelela. Phimaana, pooti utepa wuurikela cinene uwehera woopoliya wihu ni Yesu khampa itthuvo ivahiyaa weeva. Niireke Yesu naapheela wiira weeva uwehere wiivaherera wawe khampa itthuvo ivahiyaa weeva? Isiyani inhala wuukavihera uwehera commo? Nttwee noopele mwaha ayo makoho meelyaayo.

Iyee, Yesu mpheela wiira weeva uwehere wiivaherera wawe khampa itthuvo ivahiyaa weeva. Nincuwela cani iyo? Wuupuwele itthu yaakhumelenle inttonkiya nhina Luka 23:39-43. Nlopwana mmoca aakhomeliye wanipottoni ri mphantte nkiina wa Yesu. Uyo naakupali wiira hopanka itthu yoohinamaana—ni pooti yaari itthu yootakhala cinene, kontha atthu yaapanka ikhirini cuulupale phaakhomeliya wanipottoni. Uyo naakhala ni masukhuli ni nanlepela Yesu eeraka: “Ukuupuwele ukati unhalaa ukela Muumweneni wa.”

Yesu aapankale isiyani? Wuupuwele-tho: oonaka uwerya, Yesu naarukunusa murwaawe wiira anwehe ule nlopwanoole. Hataa ahalaka vakaani ukhwa, Yesu naakenyuwa ni nankhuluveliha ule nlopwanoole amwiirelaka: “Wokhweeli, kinoohimerya ilelo co: ‘Weeva unkookhala upeephoni wamoca ni miivano.” Yesu pooti waamuupuseraawe ule nakhirinnyuule wiira ‘Mwaana a Pinaatamu waale uvaha ukumyaawe toko moopoli aatthu enci.’ (Mat. 20:28) Masi uhiya umwiirela commo, Yesu ahomoonihera unamaana ni ahonhimyereeha mananna wiivaherera wawe caahalaaya unkavihera ule nlopwanoole. Nincuwela iyo kontha Yesu ahomwiirela “weeva” ni “miivano.” Ni Yesu ahohimya manannani wiivaherera wawe caahalaaya umphwanyiha ifayita ule nlopwanoole muukumini wawe: uyo aanaahala ukhala upeephoni watuninyani.

Khweeliini, Yesu aapheela wiira ule nlopwanoole awehere wiivaherera wawe khampa itthuvo yaavahiyaawe. Vano, wuupuwele co: ule nakhirinnyuule khaakhalanne ukati wonswalela Nluku. Waanookhalaru commo, Yesu aapheela wiira nakhirinnyuule oone wiira Mwaana a Nluku aakhwa nlattu wawawe uyova. Wakhala wiira Yesu ahonwehera commo ule nlopwanoole, wuupuwele vano mananna uyova cinonweheraawe nkristau nonswalela Nluku! Masi isiyani inhala wuukavihera ukupali wanrimani waa wiira Yesu khwaale nlattu wawaa weeva?

Paulu ahovahiya ni Yesu nteko woolalyeera. Iyo yahonkavihera  Paulu ukupaleeha wiira Kristu khweeliini khwaale nlattu wawawe uyova. Paulu hohimya: “Kinansukhuru Kristu Yesu, Pwiyeehu, kivahale ikuru, kontha uyo hokoona ukhala ookhuluvelya, akivahaka nteko, hataa ukhalaka wiira khalayi miiva kaari ntthu ooveeha, nlupatthi ni oohihisima.” (1 Tim. 1:12-14) Paulu ahovahiya “nteko,” hataa ukhalaka wiira ahopanka citthu cinci coohinamaana khalayi. Iyo yahonkupaliha wiira aholeveleliya, ni wiira Yesu ananfenta ni aanankhuluvela. Hiivano ciicammo nihovahiya ni Yesu nteko woolalyeera ihapari comaana. (Mat. 28:19, 20) Niireke iyo pooti unikavihera hiivano toko cankavihenryaaya Paulu?

Woone itthu yankhumelenle Albert. Uyo hokhala myaakha cookhalaka 34 nakumihiye wanlokoni ni mphiyaaruni hoturuwela ukhala Saahiti a Yehova, masi ukati nkiina uyo unanrikela uhuupuwela citthu coohinamaana caapankalyaawe khalayi. Uyo neera: “Akinkhitiri uliyala itampi caka. Masi kakhalaka wuulalyeerani, kinawiicoona toko apostolu Paulu. Kinawoona wiira Yesu hokivaha nteko. Iyo inaakitteeliha nrima cinene ni inaakikavihera wiiwehera ratta miivano, uwehera ratta ukumyaaka ni citthu cinwehereraaka uhoolo.”—Isaa. 51:3.

Allan aanaapanka citthu cokhirini hinaaya wiitthuca ikhweeli. Uyo neera: “Miiva nanlelo kinawuupuwela citthu coohinamaana cotheene caapankenlyaaka atthu. Ukati nkiina, koopuwelaka iyo kinaakhala ooriipiya nrima. Masi kinansukhuru Yehova nlattu wonvarela nteko ntthu namatampi khampa miiva wiira aalalyeere atthu ihapari comaana. Kawoonaka atthu yiiwelelaka ihapari comaana, kinawuupuwela mananna Yehova cinthoonyeraawe unamaana ni nifento. Mi kinawoona wiira uyo naakivarela nteko miiva wiira kaakavihere atthu akiina arina makhalelo oohinamaana yaarinaaka khalayi.”

Wuulalyeerani, hiiva ninkhala nipankaka itthu yomaana ni nuupuwelaka citthu comaana. Ulalyeera unaanikupaliha wiira Yesu khanle nakiri, naanifenta ni naanikhuluvela hiiva.

Nikhalakoono ila ituninya yoohinamaaneela, atthunaka ninaahala wiicoona uriipiya nrima nlattu wo matampi apankaleehu khalayi. Isiyani inhala unikavihera uhiicoona commo?

Jean, ikwaha cikiina naakhalaka ooriipiya nrima kontha ukati waaryaawe mmirawo aari ntthu o mirima miili, aanaapanka citthu comaana akhalaka uwaani naasithumwaane ni Usalau yo Umwene, masi akhumelaka vate, aanaapanka citthu coohinamaana. Uyo neera: “Inaakicivela cinene iveerusu yo mbiiblyani ineera wiira ‘Nluku khanle muulupale uvikana nrimeehu.’” (1 Jo. 3:19, 20) Weeva wakhalaka ooriipiya nrima nlattu wo citthu coohinamaana cipankalyaa khalayi, wuupuwele wiira Yehova ni Yesu anaacuwela ratta-raatta coottheka cihu uvikana mananna hiiva cincuweleehu. Wuupuwele ciicammo wiira Yehova ni Yesu yathoonyeraka nifento, aaheevaherera kahi wiira awoopole atthu oohipahuwa, masi yiivaherenre wiira awoopole atthu oopahuwa anttharuwa itampi caya.—1 Tim. 1:15.

Weeva ciicammo pooti umaaliha nrimaa ni iyo ikhweeli yuulupaleeyo. Phimaana ni nivekelo, wuupuwele mananna Yesu caawacenryaawe atthu oopahuwa ni wiikurumice uvara nteko Yesu wuuvahalyaawe. Commo, weeva unaahala wuuluma toko apostolu Paulu cuulumalyaawe: ‘Mwaana a Nluku hokifenta miiva ni heevaherera wiira akoopole miiva.’