Waakhitinryaaka waakhula makoho yaarinaaka ni wancenryaaka uvara nteko weepiyoneeru, Yehova ahokihulela mikhora wiira kaakhele iparakha cinci muukumini waka, ni mananna cahaawehereraaka. (Efesu 3:20) Iyo yiirannyaale cani? Kihinaaya uhimya, kinaapacera uttonka citthu caakikhumelenle wiipaceroni.

Mi kiyariye u Berlim, u Alemanha, uvira waya myeeri vakaani inapacenre Ikhotto Yonayeeli yo Ntuninyani. Mwaakha wo 1945, ihalaka vakaani umala ikhotto, imaara cinci matteeke yahomorihela ibomba u Berlim. Ikwaha imoca, ibomba cahomorela mparapaarani yaattamenle uwaani. Mi ni amucyaaka nahotthawela nnikhukuni naahaapahiya ni ibomba. Wiira niikhikicere, wahoolo nahotthawela u Erfurt, isitati amaama waayariyaaya.

Amaama yaanaatotha cinene ikhweeli. Ayo yahosoma ilivuru ca anafilosofiya ni yahototha ucuweleeha khula ittiini, masi khayaaphwanyale ikhweeli. Vano, mwaakha wo 1948, Masaahiti a Yehova eeli yahaatta nkhoreehu. Amaama yahaalattula ukela mpaani ni yahaakoha citthu cinci. Ihinavira iwoora imoca, amaama yahokiweha miiva ni mwanrokoraka ni yahoniirela: “Kihophwanya ikhweeli!” Woohipica, amaama, mwanrokoraka ni miiva nahancera urwaa umikutthaanoni u Erfurt.

Mwaakha wo 1950, nahoturewela ukhala u Berlim ni naathukumana wanlokoni Berlin-Kreuzberg. Wahoolo nahothamela inupa ikhwaawe u Berlim ni naathukumana wanlokoni Berlim-Tempelhof. Wahoolo waya, amaama yahopattisiya, masi miiva kaari kihinaaya wiitthenkaca wiira kipattisiye. Kontha isiyani?

Itthu yaakirikihela wiitthenkaca wiira kipattisiye waari woova. Kaanaarwaaka wuulalyeerani naakhwaaka, masi cahovira myaakha miili miiva woohinlyalyeera ntthu. Vano, kahancera waacuwela mayamunneehu ni asirokorihu yaathoonyenre ulipa nrima ni unfenta Yehova. Akiina yahopaca utthukiya mapuro ipartiitu Nazi yaatthukelaaya maperesu awula yahopaca utthukiya mmakhattya co u Alemanha Oriental. Akhwaawe  yaanaawaana ilivuru cihu u Alemanha Oriental, hataa yahalaka utthukiya. Yaapankalyaaya ayo mayamunnaayo yahokitikhiniha cinene. Mi kanawuupuwelaka: ‘Wakhala wiira ayo mayamunnaayo yaholeva ukumyaaya ni utaphuwa waya nlattu wa Yehova ni nlattu wo mayamunna, miiva ciicammo kihaana kimananihaka uvukula woova waka.’

Itthu yoopacera yaakikavihenre umaliha woova waka, waari ukavihera nteko woolalyeera waatthenkaciye mwaakha wo 1955. Nwarakhani yaakumiheriye nhina Informante, * munna Nathan Knorr ahantikha eeraka wiira uyo waahala ukhala ukati wooverihela ulalyeeriya cinene waatthenkaciye ni mphwinkweehu. Uyo aheera wiira, yaakavihenre anamalalyeera otheene uyo ntekooyo, naanaahala ukhalana “mweeri waahala utepa ulalyeeriya cinene [ihapari comaana].” Iyo phi itthu khweeliini yaakhumelenle! Woohivira ukati mwinci, miiva kahovaherera ukumyaaka wa Yehova ni, mwaakha wo 1956, miiva kahopattisiya wamoca naapaapa ni mwanrokoraka. Masi woohipica, kahaana kithanlaka upanka itthu yuulupale.

Mi kaanaacuwela wiira nteko womaana waalamuliyaaka uvara waari nteko weepiyoneeru, masi cahovira myaakha cinci kuupuwelaka wiira kinaahala uvara uyo ntekooyo wahoolo. Woopacera, kaholakela wiitthuca umpanka nakoso nimpresa colapo cikiina. Wahoolo, kaholakela uvara nteko wiira kicuweleehe uvara uyo ntekooyo. Phimaana mwaakha wo 1961, kahancera uvara nteko u Hamburgo, isitati yuulupale cinene u Alemanha. Ukhala wiira waanaakicivela cinene ntekwaaka, kaanaatepa uhuupuwelaca wancera phiyaaru nteko weepiyoneeru. Isiyani yaalamuliyaaka upanka?

Kinansukhuru Yehova cinene. Uyo haavarela nteko mayamunna oofenta akikavihenre uhoolelihera muukumini waka citthu coominepani. Apatthannyaaka enci yahokhala mapiyoneeru ni yahokivaha ntekihero nomaana. Uhiya commo, munna Erich Mundt, aapacale utthukiya, ahokisovenriha unkhuluvela Yehova. Uyo aheera wiira nipuro naatthukiyaawe, mayamunna yeekhuluvenle asineennyaaya, wahoolo khayaakhanle oolipa mminepani. Masi ale yankhuluvenle Yehova yahokhitiri uvilela ni ahokavihera mphwinko wa Yehova.

Itthu ikhwaawe ikikavihenre yaari moolumo a munna Martin Poetzinger, wahoolo aavanre nteko nhina Mphwinko wo Mahumu Unhoolela. Wiira aalipihe nrima mayamunna, uyo aaneeraka: “Ulipa nrima phi nhakhu muulupale weeva unlamuliyaa ukhalana!” Woopuwenlyaaka iyo, kahohiya ntekwaaka ni kahancera uvara nteko weepiyoneeru, Julho o mwaakha wo 1963. Iyo phi itthu yooreera cinene yaathanlalyaaka upanka muukumini waka! Uvira waya myeeri miili, kihinaaya utotha nteko nkhwaawe, kaholattuliya ukhala piyoneeru ookaviheriya. Cihinavira myaakha cinci, Yehova ahokivaha-tho iparakha ni mananna cahaawehereraaka. Kaholattuliya urwaa usoma iturma 44 yo Icikola yooKiliyati.

“Uhaakuve wooceela nteko urumiyaa uvara.” Iyo phi itthu yuulupale yiitthucalyaaka uKiliyati, venci-venci ni mayamunna Nathan Knorr ni Lyman Swingle. Ayo yaanaanisovenriha uhihiya uvara miteko caavahiyeehu, hataa yanikhumelelaka masakha. Munna Knorr aneeraka: “Isiyani inhaleenyu utepa uweheeha? Nnokooweheeha ikokhola, asinttuuttu, umasikhini? Awula nnohala uweheeha miri, ittuva cooreera ni ikhove ca atthu ootteeliya? Mwiitthuce waafenta atthu!” Nihuku nimoca, munna Swingle aanaataphulela nlattuni mayamunna akiina unaakuvaaya wooceela nteko unrumiyaaya uvara. Masi iyo itthwiiyo yahonwerya cinene mpaka ahonla. Vano, uyo aheemesera mwaha waataphulelaawe wiira eemaalihe toko. Iyo itthwiiyo yahokivara nrima ni ihokikavihera ulakela wiira akinhala mena vakaani unriipiha nrima Kristu ni asunnawe.—Mat. 25:40.

Ukati waahimeriyeehu mapuro naahaleehu urwaa uvara nteko, mayamunna araru yaavara nteko uPeteli yahowa unikoha mapuroni hiiva naahaleehu urwaa. Ayo yahooluma citthu comaana co khula ilapo. Masi ukati waawaakhunlyaaka kiiraka: “u Congo (Kinshasa),” ayo yaanoomaala nuukiirela: “Nnorwaa u Congo! Yehova oocaaliheni!” Ule ukatyuule, waanawuulumiya cinene wiira u Congo (Kinshasa) yaanaalavaniya ikhotto ni atthu yaanawiivakaciya. Masi akaahiyale wuupuwela citthu ceetthucalyaaka uKiliyati. Naamalihale usoma uKiliyati Setembro, mwaakha wo 1967. Woohipica, miiva, Heinrich Dehnbostel ni Claude Lindsay nahorwaa u Kinshasa, isitati yuulupale yo Congo.

Uphiya wihu u Kinshasa, nahokhala myeeri miraru niitthucaka ifrancês. Vano nahokela ntteeke ni nahorwaa u Lubumbashi, isitati khalayi yeehaniya Elisabethville. Iyo isitatiiyo inkhala uhitto waya ilapo yo Congo, waattamela u Zâmbia. Nahorwaa ukhala inupa yo mamisiyonaariyu yaari waparasa.

Mapuro menci o Lubumbashi yaari ahinatoko ulalyeeriya. Waahonitteela nrima cinene kontha thi hiiva naapaceriha waalalyeera ihapari comaana atthu enci. Woohivira ukati mwinci, nahanca waasomiha Ibiiblya atthu enci, mpaka khanaakhitiri waasomiha otheene. Ciicammo naanawaalalyeera atthu yaavara nteko ukuvernu awula mapolisiya. Enci yaanaahisima Nuulumo na Nluku ni nteko woolalyeera ihapari comaana. Atthu enci yooluma iswaahili. Phimaama, miiva ni Claude nahancera wiitthuca iswaahili. Woohipica, nahorumiya urwaa nloko noolumiya iswaahili.

Unookhalaru wiira caanaanikhumelela citthu comaana, ciicammo yaanaanikhumelelaka masakha. Imaara cinci, nahaana naavilelaka anatoropa oohapalaciya awula mapolisiya anakhirini yaanootheeriha upanka citthu cootakhala. Nihuku nimoca, naari wankutthaanoni o wanlokoni aapankiya nipuro naakhalaaya mamisiyonaariyu. Woohipica, ikhurupu yo mapolisiya yahowa ni ikaputthi caya ni yahonirwaana upolisiya. Ayo yahonikhanyereriha wonkoma vathi ukhuma ule ukatyuule ni yaanilevale 22 horas, uhiyu.

Mwaakha wo 1969, kahothanliya ukhala Mootoli o Isirikwiitu. Isirikwiitu ciicammo yaanaahela nhina itakhwa yo África, ni iyo maanaaya wiira naahaana neettaka iwoora cinci mmittalani co marove ntakhwani. Aliteeya amoca yootolaaka, ahaavo mwalakhu mmoca aarupaka nkhukucira ikoryaaka naasaanaawe.  Akinliyala mena vakaani mananna caahaalovaawe ukivusa wala uhinaaya usa, akhuwacaka. Kinawuupuwela ukati miiva ni mayamunna akiina wonkomakeehu uhiyu wamooroni noopaka myaha co mbiiblyani.

Itthu imoca yaanirikale waari waavilela mayamunna owootha yaakihera ikhurupu ya anasiyaasa yeehaniya Kitawala. * Atthu akiina o iyo ikhurupwiiyo yaheekeliha mmalokoni, yahopattisiya ni mpaka yahokhala mahumu o wanlokoni. Masi mayamunneehu ni asirokorihu ookhuluvelya khayeehiyale yathepiyaka ni ayo atthwaayo ookhala toko “myala cowiipithya.” (Yuda 12) Nuukatyaaya, Yehova ahaakweca ayo atthwaayo mmalokoni ni ahotthenkaca maloko wiira yuunuwe cinene.

Mwaakha wo 1971, kahothanliya urwaa uvara nteko uPeteli, yaakhala u Kinshasa. Mi kaanaavara miteko cinci: uveleelihaca iwarakha, utafiti ilivuru caalepeliya ni kaanaapanka citthu cikhwaawe caakavihera nteko woolalyeera. Upeteli, kiheetthuca utthenkaca nteko ilapo yahaarina ratta iparapaara, iluusu ni ikaaro cowaapakhirya atthu. Imaara cikiina, iwarakha mayamunna ooPeteli caaveleeliheraaya maloko caanaavirihaka myeeri cihinaphiya mmalokoni. Kontha nnyo iwarakhannyo cakumihiyaka muntteekeni, caapakheriya mmakalawani, ni ikalawannyo caanaapharaka nlattu wo miri cinoonuwa mmaacini cineehaniya jacinto-de-água awula aguapé. Unookhalaru commo, nteko wahorwaa uhooolo, hataa yakhalaka marikariko toko ayo ni makiina.

Itthu imoca yaakitikhiniha waari uwoona mananna mayamunna caakhitiryaaya utthenkaca ikonkreesu cuulupale ni nsurukhu vakaani. Ayo yaapankaka ipaaluku niiruwa ni yaavarelaka nteko mithale ni malasi moolupale wiira attiyelele nkerekhere. Yaanaapanka ikhara co malaci moolupale wiira akhale mapuro owonkomeliya, ni wiira avathele ni apanke meeca, ayo yaavarelaka nteko matthatto o mikhutta. Ni ukhala wiira khayaarina ipereku, ayo yaakhava nkhoyi. Miiva kaanaakhala ootikhinihiya cinene kawoonaka mayamunneehu ni asirokorihu yavilelaka marikariko nuucuwelaca. Miiva kaanawaafenta otheene caya, ni yaanakinukhela cinene ukati waarwaalyaaka uvara nteko nipuro nikiina.

Mwaakha wo 1974, kahorumiya urwaa uPeteli yo Quénia, inkhala u Nairóbi. Waahaavo nteko mwinci woopheela upanka, kontha iPeteli yo Quénia yaanawacera nteko woolalyeera wolapo 10 caattamannyaaya, ni ikuvernu cikiina caanaakhottiha ntekweehu woolalyeera nlaponi caawaceriya ni iPeteli yo Quénia. Imaara cinci, miiva kahothanliya urwaa wootola nnyo ilaponnyo, venci-venci u Etiópia. Ule ukatyuule, mayamunneehu u Etiópia yaanaalupatthiya ni yaari ni masakha menci. Mayamunna enci yaanaahuvihiya ni yaanaatthukiya. Akiina mpaka yaheeviya. Masi mayamunna khayanhiyale Yehova ni yahovilela kontha yahaana upatthani woolipa ni Yehova ni yaanawiiwanana.

Mwaakha wo 1980, yahokhumelela itthu yuulupale muukumini waka: nahothelanaca ni Gail Matheson o u Canadá. Gail ni miiva naasoma iturma imoca uKiliyati. Hiiva noopaka mwaha nantikhelanaka iwarakha. Gail aavara nteko weemisiyonaariyu u Bolívia. Uvira waya myaakha 12, hiiva nahokumanaca tootho u Nova York. Woohipica, nahothelanaca u Quénia. Kinansukhuru cinene Gail, kontha khula ukati uyova nowehera citthunnyo toko Yehova cinweheraawe ni naakhala ootteeliya ni citthu cirinaawe. Uyo khanhiya ukikavihera ni khanle mpatthannyaaka nonfentaaka cinene.

Mwaakha wo 1986, miiva ni Gail nahothanliya uvara nteko wo wootola isirikwiitu, ni miiva ciicammo kaavara nteko nkhurupuni yo Mahumu Anhoolela Ipeteli. Ukati waavareehu nteko wo moo toli, hiiva nahootola ilapo cinci caawaceriya ni iPeteli yo Quénia.

Kinawuupuwela ratta-raatta ukati waatthenkaceehu ikonkreesu isitati yo Asmara (u Eritreia). Waari mwaakha wo 1992, ni ule ukatyuule kuvernu khaakhottiha ntekweehu u Eritreia. Woocukuliha nrima, nipuro nimoca naakhitinriihu uphwanya wiira nipanke ikonkreesu naari nikhupi nuulupale nootakhala cinene. Nhina waya naanootepa utakhala cinene uvikana vate. Nihuku nokonkreesu, kahotikhinihiya cinene woona waka mananna mayamunna caakhitinryaaya ureeriha nne nikhupinne wiira nikhale nipuro noophwanela uswaleliya  Yehova. Amuci enci yahowaana ikuwo wiira areerihace ni yahokhunela ratta-raatta khula itthu yaatakhaliha nne nikhupinne. Ile yaari ikonkreesu yootteeliha nrima cinene, waawilyaaya atthu 1.279.

Nteko wo mootoli wahorukunusa cinene makhalelweehu, kontha khula isumana mapuro yaalukameehu yaanaavirikana. Ikwaha imoca, naholukama inupa yooreera cinene yowaattamela umaka. Ikwaha ikiina, naalukamale nniparanttani no yuuma nipuro naakhalaaya ananteko, ni nahaana neettaka wookhalaka metro 100 wiira niphiye usoworo. Masi mapuro yaalukameehu khayaari itthu yootepa ukhalana ifayita. Itthu isunkaleehu mmuru wihu akhanle mahuku yaaviriheehu ukati mwinci wuulalyeerani ni mapiyoneeru ni anamalalyeera owiikurumica. Ukati waathanliyeehu wiira nirwee nipuro nikiina, nahaana naaleehaka asipatthaniihu enci yaafenteehu anninukhela cinene.

Ukhuma mwaakha wo 1987 mpaka 1992, ikuvernu cahohiya ukhottiha ntekweehu ilapo cinci caawaceriya ni iPeteli yo Quénia. Phimaana, cahotthukuliya iPeteli ayo mapurwaayo. Mwaakha wo 1993, kahothanliya urwaa uvara nteko nipuro naahooleliya miteko cihu u Etiópia, ninkhala u Adis-Abeba. Uvira waya myaakha cinci mayamunna yanswalelaka Yehova mmwiitihoni, ntekweehu wahaaminiya munlamuloni u Etiópia.

Yehova ri moocaaliha nteko woolalyeera u Etiópia. Mayamunna ni asirokorihu enci ahancera uvara nteko weepiyoneeru. Ukhuma mwaakha wo 2012, anamalalyeera oopwaha 20% akhanle mapiyoneeru owiicaaverya. Uhiya commo, mayamunna enci ahosomihiya mmacikolani co Umwene, ni cihotekiya Isalau co Umwene coopwaha 120. Mwaakha wo 2004, mayamunna yaavara nteko uPeteli yahothamiheriya nipuro nikiina. Ni nipuro nenno ihotekiya Isalau yo Mithukumano co Isirikwiitu, ni iyo ikhanle iparakha yaakhenlyaaya mayamunna.

Uvira waya myaakha cinci, miiva ni Gail nahaapatthanana mayamunneehu ni asirokorihu o Etiópia. Ninawaafenta cinene otheene caya nlattu wo unamaana urinaaya. Myaakha vakaani civinrennya va, hiiva nihanca uweryaaciya, phimaana nahaana narwaaniyaka uPeteli yo Europa Central. Mayamunna ankhala uno anaaniwacera ratta, masi nanlelo anaaninukhela cinene asipatthaniihu ankhala u Etiópia.

Hiiva nihooneeha ratta mananna Yehova cinoonuwihaawe ntekwaawe. (1 Akor. 3:6, 9) Wootakihera, ukati miiva waapacerihalyaaka waalalyeera atthu yaakhuma u Ruanda yaawaale utotha ikobre u Congo, khaarivo nanka namalalyeera u Ruanda. Ilelo, ahaavo mayamunna ookhalaka 30.000 u Ruanda. Mwaakha wo 1967, u Congo (Kinshasa) yaari anamalalyeera ookhalaka 6.000. Ilelo, ahaavo anamalalyeera oopwaha 230.000, ni atthu oopwaha imiliyawu imoca yahowa wanuupuweleloni na nookhwa a Kristu mwaakha wo 2018. Nlaponi cotheene caahooleliya ni iPeteli yo Quénia, anamalalyeera ahoncerya mpaka upwaha 100.000.

Myaakha coopwaha 50 uttuli, Yehova ahaavarela nteko mayamunna enci wiira akikavihere wancera uvara nteko wowiivahereriya ukati wotheene. Kaanookhalaru ntthu owoova, kiheetthuca unkhuluvela Yehova. Citthu cotheene cikikhumelenle u África cihokikavihera uvilela ni ukhala ootteeliya ni citthu cirinaaka. Mi ni Gail ninawaatikhinaca cinene mayamunneehu ni asirokorihu anthoonyera uwaakhelela aletto, uvilela ni unkhuluvela Yehova. Ni mi kinansukhuru Yehova cinene nlattu uyova wookithoonyera unamaana wawe woohikiphwanela. Khweeliini, Yehova hokicaaliha cinene ni mananna miiva cahaawehereraaka.—Isaa. 37:4.