1. Ninlamuliya utakiha cani mananna Yehova cinnifentaawe?

YEHOVA naanifenta cinene. (Joau 3:16) Ni hiiva nimpheela waatakiha Apaapeehu onifento. Phimaana ninawiikurumica ‘waawacera, waathoonyera nifento no mayamunna ni uthunku’ atthu otheene, venci-venci “ale akhanle amuciihu nhina waamini.” (1 Pet. 3:8; Akalas. 6:10) Amuciihu oominepani awula mayaamunneehu ni asirokorihu yaakhumelelaka masakha, ninaapheela cinene waakavihera.

2. Isiyani inhaleehu woopela mwaha nhina ula mwahoola?

² Otheene ule mpheela ukhala mphantte waamuci a Yehova, uhaavo ukati unhalaawe ukhala ni masukhuli. (Mark. 10:29, 30) Ni pooti ukhala wiira wanvireehu nitepeka waattamela umala wo ila ituninyeela, anaahala unikhumelela masakha menci. Isiyani inlamuliyeehu upanka wiira naakavihere akhwiihu? Ninaahala woopela mwaha ihantisi yo mbiiblyani ya Loti, Jó ni Nowemi ni woona isiyani ayo inniitthucihaaya. Ciicammo, ninaahala woopela mwaha masakha anaakhumelelaka mayamunneehu ni asirokorihu, ni ninaahala wiitthuca isiyani inlamuliyeehu upanka wiira naakavihere.

3. Toko cinthoonyeraaya 2 Peturu 2:7, 8, itthuni yoohiloka Loti yaathanlalyaawe, ni isiyani yankhumelenle nlattu wo iyo?

³ Loti ahothanla ukhala uSotoma. Masi nno khanaari nipuro nomaana. Waanookhalaru ncoko wooreera cinene, atthu ooSotoma yaari atthu oohinamaana. (Usoma 2 Peturu 2:7, 8.) Loti yahonkhumelela masakha moolupale nlattu woorwaa ukhala nne nipuronne. (Upha. 13:8-13; 14:12) Atthunaka, amwaarawe Loti yaanaacivela cinene ile isitatiile ni atthu yaakhala wonwo. Phimaana, ukati Nluku waalakenlyaawe umalamaliha ile isitatiile ni mooro, amwaara a Loti khayeewelenle itthu malayikha yoolumalyaaya ni yahokhwa. Ni uwuupuwele asaana asithiyana a Loti eeli. Ayo yahopakaneliya  naalopwana eeli ciicammo yaakhwaale uSotoma. Loti yahompwetya inupaawe, maalyaawe ni ciicammo amwaarawe. (Upha. 19:12-14, 17, 26) Ule ukati woorikoole, niireke Yehova ahohiya unvilela Loti? Mena.

4. Yehova aathoonyenre cani wiira aananvilela Loti? (Uwehe ilatarato iri wakaapani.)

⁴ Loti mwaneene phaathanlale urwaa ukhala uSotoma. Hataa ukhalaka commo, Yehova ahomoonela uthunku Loti ni ahoveleeliha malayikha wiira amoopole Loti ni amucyaawe. Malayikha yahomwiirela Loti wiira akhume uSotoma woohipica. Masi uhiya upanka iyo, Ibiiblya ineera wiira Loti “aanaapicapica.” Malayikhaale yahaana yanvaraka moono Loti ni amucyaawe wiira yaakumihere vate waya isitati. (Upha. 19:15, 16) Vano, malayikhaale yahomwiirela Loti wiira atthawele mphantte woomwaakoni. Masi Loti uhiya umwiiwelela Yehova, uyo aholepela wiira arwee isitati ikiina yo wakhiviru. (Upha. 19:17-20) Yehova ahovilela ni ahonhiya Loti utthawela ile isitatiile. Masi wahoolo waya, Loti ahoova ukhala ile isitatiile ni ahorwaa ukhala mphantte woomwaakoni—nipuro neereliyaawe wuupaceroni ni Yehova wiira atthawele. (Upha. 19:30) Unawoonannya wiira Yehova khweeliini ahonvilela Loti! Ninlamuliya untakiha cani Yehova?

5-6. Manannani ninlamuliyeehu upanka itthu inhimiya nhina 1 Atesalonika 5:14?

⁵ Khampa Loti, pooti ukhala wiira munneehu o wanlokoni hothanla veekha cawe upanka itthu yoohinamaana ni ahonkhumelela masakha nlattu wo itthu ithanlalyaawe. Yakhumelelaka iyo, weeva waahala umuulumela isiyani? Atthunaka weeva waanaahala upheela umwiirela wiira uyo nhepha itthu yanlyaawe, ni iyo ikhanle ikhweeli. (Akalas. 6:7) Masi ihaavo itthu yomaana yooreera upanka. Ninlamuliya unkavihera uyo munnooyo toko Yehova cankavihenryaawe Loti. Manannani?

⁶ Yehova khaaveleelihale malayikha wiira paasi anhimyere Loti itthu yaahala ukhumelela, masi ciicammo wiira ankavihere woopwa ukati waahalaaya umalamalihiya isitati yooSotoma. Ninlamuliya utthara nno ntakiheronno noonaka wiira munneehu mmoca hancera upanka itthu inhala unwaanela masakha. Unookhalaru wiira hiiva nihaana ninhimyeraka, ciicammo pooti nihaana nipankaka itthu yoohala unkavihera. Uyo hataa apicapicaka weettela ikano co mbiiblyani civahiyaawe, hiivano nihaana nivilelaka. Ukhale toko malayikha meeli yankavihenre Loti woopwa. Uhiya umoocyaa munneehu ni unhiya veekha cawe, utothe upanka itthu yoohala unkavihera. (1 Jo. 3:18) Ukati nkiina, atthunaka nihaana ‘nivaraka moono’ wa munneehu, nihaacaka unvara moono, masi unthoonyera mananna cinlamuliyaawe weetteela ikano civahiyaawe.—Usome 1 Atesalonika 5:14.

7. Ninlamuliya untakiha cani Yehova?

⁷ Yehova pooti waaweheehaawe coottheka ca Loti. Masi uhiya upanka iyo, Yehova ahonruma apostolu Peturu wantikha wiira Loti aari nlopwana nasariya. Ni unaanitteela nrima ucuwela wiira Yehova naanilevelela coottheka cihu! (Isaa. 130:3) Ni hiiva ninlamuliya untakiha Yehova. Manannani? Ninlamuliya uweheeha cinene makhalelo omaana arinaaya mayamunneehu ni asirokorihu. Upanka commo unaahala unikavihera waavilela. Ni nakhalaka atthu oovilela, ayo pooti anaahala utepa utthuna wiira naakavihere.

8. Manannani ninlamuliyeehu uthoonyera uthunku?

⁸ Jó ciicammo ahohuva cinene, masi uhuva wawe khaawaari nlattu woothanla itthu yoohiloka toko Loti. Jó cahompwetya mihakhu cawe cotheene, atthu yahohiya unhisimu ni ahowerennya cinene. Ihaavo itthu ikiina yantepihale: asaanaawe otheene yahokhwa weemara imoca. Nhina masakha otheene ayo, apatthannyaawe araru yahowa umootola Jó. Masi uhiya ummaaliha,  ayo yahothoonyera wiira khayanwacera mena vakaani. Yaapankale commo nlattu wosiyani? Kontha ayo khayaacuweleeha itthu yaamwiira Jó. Phimaana, yahoopuwela citthu coohikhweeli ni yahomuuluma pusya Jó. Isiyani ninlamuliyeehu upanka wiira nihittheke toko apatthannyaawe Jó? Wuupuwele wiira Yehova paasi phincuweleeha khweeliini citthu cotheene cinonkhumelela ntthuuyo. Phimaana, unviriyane ukati ntthuuyo unttonkaawe masakhaawe. Uhiya unviriyana paasi, umananihe upanka-tho itthu ikiina—umananihe wiira wuuwerye nrima toko ntthuuyo cinonweryaaya. Commo weeva phinhalaa ukhitiri uthoonyera wiira khweeliini unaamoonela uthunku munnaa awula nrokoraa.

9. Isiyani ihinlamuliyeehu upanka, ni kontha isiyani?

⁹ Uthunku unaahala unihiiha waahimyera atthu akiina masakha arinaaya mayamunneehu. Ntthu naapa khanlipiha nloko; masi naakwanyulaca. (Miru. 20:19; Aroo. 14:19) Ntthu nomwarusela “moolumo oohuupuweliya ratta” khanthoonyera unamaana ni uyo pooti utepa unwereeha nrima munna nhuva. (Miru. 12:18; Efesu 4:31, 32) Phimaana, itthu yomaana inlamuliyaawe upanka khula ntthu uri uweheeha makhalelo omaana arinaaya mayamunneehu ni wuupuwela mananna owaakavihera uvilela masakha anaakhumelela.

10. Itthu ihimiye nhina Jó 6:2, 3 inniitthuciha isiyani?

¹⁰ Usome Jó 6:2, 3. Jó ciicammo ‘ahooluma woohuupuwela ratta.’ Masi wahoolo waya uyo ahottharuwa. (Jó 42:6) Iyo itthwiiyo ciicammo pooti unkhumelela munna ri ni masukhuli menci nlattu wo masakha ankhumelenle. Uyo pooti wuuluma citthu wahoolo cinhalaawe wuupuwela wiira khaalamuliya wuuluma. Ninlamuliya waakhula cani? Uhiya unvaanyiha munnooyo, uthoonyere uthunku. Wuupuwele wiira Yehova khaaphenle wiira aniphwanye masakha ni masukhuli otheene arineehu ilelo. Phimaana, hataa ntthu ookhuluvelya nonswalela Yehova, akhalaka ni masukhuli menci pooti wuuluma citthu cahaalamuliyaawe wuuluma. Uyo pooti umuuluma pusya  Yehova awula pooti unuuluma pusya hiivano. Yakhumelelaka iyo, uhinviruwele munnooyo ni uhimuulume pusya nlattu wo citthu cuulumalyaawe.—Miru. 19:11.

11. Manannani mahumu cinlamuliyaaya untakiha Eliwu ukati wonvaha ntthu ikano?

¹¹ Ukati nkiina, ntthu ankhumelenle masakha naapheela uvahiya ikano co mbiiblyani ni pooti upheela mananna makiina oolakiya. (Akalas. 6:1) Mwakhala wiira nyuuva nkhanle humu o wanlokoni, manannani cinhaleenyu upanka ratta iyo? Mmananihe untakiha Eliwu. Athoonyeraka uthunku, uyo ahoviriyana citthu cotheene Jó capheelaawe wuuluma. (Jó 33:6, 7) Eliwu anvahale ikano Jó ukati waacuwenlyaawe ratta itthu yoopuwelaawe Jó. Inanna imoca, nviriyane ratta itthu ntthuuyo inhimyaawe ni mmananihe ucuweleeha itthu inonkhumelela. Mwapanka commo, ntthuuyo pooti unvara nrima ikano inhaleenyu unvaha.

12. Nowemi eecoonale cani ukati waakhwilyaaya awanuwawe ni asaanaawe eeli?

¹² Nowemi aari nthiyana ookhuluvelya ni anfenta Yehova. Masi, ukati waakhwilyaaya awanuwawe ni asaanaawe eeli, Nowemi ahokhala ni masukhuli cinene mpaka ahopheela waakakhaniha ncina nawe wiira ancere wiihaniya “Mara,” maanaaya wiira “oowaawa.” (Ruti 1:3, 5, 20, niwehero, 21) Ruti, nthiyana mmoca aari amwaara-mwanawe Nowemi, ahokhala wamoca ni Nowemi ule ukati woorikoole. Ni Ruti khaapankale paasi itthu yankavihenre Nowemi, masi ciicammo ahomuulumana ni mananna yammaalihale. Ni moolumo vakaani ni eekhweeli, Ruti ahonthoonyera nifento Nowemi ni ahonkavihera.—Ruti 1:16, 17.

13. Kontha isiyani ale akhwaale awannyaya awula amwaaraya anaapheela ukaviheriya ni hiivano?

¹³ Amuciihu oominepani enci ciicammo ahokhwa awannyaya awula amwaaraya. Ayo anaapheela cinene ukaviheriya ni hiivano. Muuthelanani, nlopwana ni nthiyana ankhala toko miri miili cowaattamana cinoonuwa nkhayi. Wanviraaya myaakha, mitithari co miri coopiili cinaakumanaca ni cinaatthavelelana. Vano mwiri mmoca waseliyaka ni wakhwaaka, mwiri nkiinooyo ciicammo khunkhala ratta. Inanna imoca, ntthu akhwaaka awannyawe awula amwaarawe, uyo pooti ukhala ukati mwinci nari ni masukhuli menci. Paula, * yaakhwaale awannyawe ukati wahaawehereraawe, neera: “Ukumyaaka wahorukunuwa cinene. Akaacuwela co wiira. Ahokhwa mpatthannyaaka ankhuluvelaaka. Uyo aari ntthu anhimyeraka citthu caka cotheene. Uyo aakhala ni miiva ukati womaana ni ukati wo masakha; uyo khaahiya ukiviriyana kanhimyeraka masukhulyaaka. Ukati ukhwalyaawe, ukhanle khampa wiira mphantte nkiina worutthwaaka uhokhwa.”

14-15. Manannani cinlamuliyeehu ummaaliha ntthu akhwaale awannyawe awula amwaarawe?

¹⁴ Ninlamuliya ummaaliha cani ntthu akhwaale awannyawe awula amwaarawe? Itthu yoopacera ukhanle umuulumana ntthuuyo, hataa weeva ukhalanaka ihaaya vakaani awula uhicuwelaka itthu yoorwaa unhimyera. Paula, romoliye, neera: “Mi kinaacuwela wiira ukhweliya unawaapankiha atthu ukhala oosanka. Ayo anawoova wuuluma itthu ihinhala uncivela ntthu khweliyooyo. Masi itthu yootepa utakhala ukhanle umaala paasi, woohuuluma itthu.” Imaara cinci, ntthu khweliye khanweherera wiira nuulume itthu yoohala urukunusa makhalelwaawe ule ukatyuule. Paula neera: “Apatthani yakiirelaka paasi ‘Unaakiira uthunku,’ miiva kaanaakhala ratta.”

¹⁵ William, akhwaale amwaarawe myaakha civinre uttuli, neera: “Mi unaakicivela cinene kawiiwaka atthu yoopuwelaka citthu caapankaaya amwaaraka. Iyo inaakikupaliha wiira ayo khweeliini yaanaafentiya ni yaanaahisimiya. Ayo manannaayo kaanaakaviheriya cinene. Iyo itthwiiyo  inaakimaaliha cinene, kontha amwaaraka yahaana ifayita cinene ni ayo yaari mphantte nkiina wookumyaaka.” Nankhweli mmoca neehaniya Bianca heera: “Itthu inkimaaliha ukhanle akhwaaka ulompa ni miiva ni ukisomela iveerusu imoca awula piili co mbiiblyani. Kinawiicoona ratta ayo yawuulumaka awanuwaka ni yakiviriyanaka ukati unwuulumaaka.”

16. a) Isiyani ninlamuliyeehu uhihiya waapankela ale akhweliye? b) Toko cinthoonyeraaya Tiyaku 1:27, ntekoni urineehu?

¹⁶ Toko Ruti cankavihenryaawe Nowemi, hiiva ciicammo nihaana uhihiya waakavihera ale akhweliye. Paula, romoliye, neera: “Ukhwa waya awanuwaka, woohipica atthu enci yahowa ukikavihera. Uvira waya ukati, ayo atthwaayo yahoturuwela upanka citthu caapankesaaya khula nihuku. Masi makhalelwaaka miiva yahorukunuwa cinene. Unaareera cinene atthwaayo yacuwelaka wiira ntthu akhweliyaka, uyo naapheela ukaviheriya myeeri cinci—awula myaakha cinci.” Ninaacuwela wiira atthu khanlikana. Ahaavo atthu anaakuva wiilemaleliha makhalelo makhwaawe woohipica. Masi atthu akiina, ukati woopanka khula itthu yaapankaaya khalayi ni ntthu khwaale, anawuupuwela ukhweliya waya. Mananna atthu cinweheraaya ukhweliya anaavirikana. Phimaana, nihaana nuupuwelaka wiira Yehova honicaaliha ni honivaha nteko wo waawacera ale akhweliye.—Usome Tiyaku 1:27.

17. Kontha isiyani ale ahinnye naawannyaya ni naamwaaraya ciicammo anaapheela ukaviheriya ni hiivano?

¹⁷ Atthu akiina ankhala ni masukhuli ni ooripiya nrima nlattu woohinnya naawannyaya awula naamwaaraya. Woone itthu yankhumelenle Joyce.  Awannyawe yahonhiya ni yahorwaa unthela nthiyana nkiina. Joyce neera: “Umwalanaca wihu, wahokiwerya nrima cinene uvikana inanna caahalaaya ukiwerya waari wiira awannyaka anookhwa. Unari wiira awannyaka anookhwa nlattu waasitente awula uwerennya, ayo khayaahala ulakela iyo itthwiiyo. Masi itthu ikhumelenle, ayo philakenle ukihiya. Kiheecoona wuulihaciya muru ni uhitthuniya.”

18. Manannani cinlamuliyeehu waakavihera ale ahirina-tho awannyaya awula amwaaraya?

¹⁸ Naapankelaka citthu cankaani ale ahirina-tho awannyaya ni amwaaraya, ninawaathoonyera wiira hiiva ninawaafenta weekhweeli. Ni nna va uryaaya veekha, ayo anawaapheela cinene apatthani omaana. (Miru. 17:17) Manannani weeva cinlamuliyaa uthoonyera ukhala mpatthani omaana? Weeva pooti waalattula wiira waalyane uwanuwaa. Awula pooti waaleehanana wiira waakhumane wuulalyeerani awula urwaaca nkhayi nipuro noothuka. Ukati nkiina, ciicammo pooti waalattula wuuswalini winyu waamuci. Wapanka nnya citthunnya, unaahala untteeliha nrima Yehova, kontha uyo “ri wakhiviru ni ale arina nrima wooripiya” ni ‘nawaakhikicera manankhweli.’—Isaa. 34:18; 68:5.

19. Wuupuwelaka moolumo ari nhina 1 Peturu 3:8, isiyani ilakenlyaa upanka?

¹⁹ Woohipica, Umwene wa Nluku unaahala ulamulela watuninyani, ni ‘masukhuli o khalayi otheene anaahala uliyaliya.’ Ninaaweherera cinene ukati ‘citthu co khalayi uhinhalaaya wuupuweliya-tho, ni uhinhalaaya uturuwela wanrimani.’ (Isai. 65:16, 17) Nihinaaya uphiya nno nihukunno, khaninlamuliya uhiya ukaviherana. Phimaana, ni citthu cimpankaa ni cinoolumaa uthoonyere wiira unawaafenta otheene ale akhanle amuciihu oominepani!—Usome 1 Peturu 3:8.