1. Isiyani inniitthucihaaya Nuulumo na Nluku?

HIIVA pooti ukhitiri waanana khula masakha annikhumelela—kontha Yehova, ule khanle Mwiitthucihiihu nkhulupale, naanilakihera iphiro inlamuliyeehu utthara. (Isai. 30:20, 21) Nuulumo nawe, Ibiiblya, inaaniitthuciha yotheene impheeleehu wiira nikhale ‘ookhitiri, oolikaneliya ratta wiira nipanke khula nteko womaana.’ (2 Tim. 3:17) Nahiyaka Ibiiblya wiira yeettihere makhalelweehu, ninaakhala oocuwelaca cinene waapwaha ale anniirela wiira nihaana neettelaka “ucuwelaca wo ila ituninyeela.”—1 Akor. 3:19; Isaa. 119:97-100.

2. Isiyani inhaleehu wiitthuca nhina ula mwahoola?

² Masi uvirikana ni atthu o ntuninyani unaarika. Kontha, ucuwelaca wo ntuninyani unaasovenriha moopuwelelo ni meettelo antepihaca citthu coohinamaana cinnicivela wanrimani wihu. Phimaana Ibiiblya inaaniirela co: “Mwiikhikicerace wiira nhipankiye ipottha ni muulumacero aapinaatamu ni citthu cowootoothiya, cinlipiheriya ni ilema ceepinaatamu.” (Akol. 2:8) Cihaavo citthu piili cimwaryenle ntuninyani mahuku olelo. Ula mwahoola unaahala uthoonyera mananna cikhumakhumalyaaya nnyo citthunnyo. Ciicammo ninaahala wiitthuca kontha isiyani nnyo citthu cowoothiyannyo cikhanle ulolo ni kontha isiyani ucuwelaca wa Nluku phuunuwale uvikana ucuwelaca wo ntuninyani.

3-4. Ukhuma mwaakha wo 1900 mpaka 1930, arukunuwale cani mananna atthu caaweheraaya uruparupa nlopwana ni nthiyana?

³ Ukhuma mwaakha wo 1900 mpaka 1930, mananna atthu u Estados Unidos caaweheraaya uruparupa nlopwana ni nthiyana ahorukunuwa cinene. Uhinaphiya uyo ukatyuuyo, atthu enci yaakupali wiira nlopwana ni nthiyana oothelana phaalamuliya paasi uruparupa ni uyo waari mwaha wahoolumiya waatthuni. Masi ayo makhalelwaayo ahomalamala vakaani-vakaani ni khula ntthu ahancera utthuniheriya upanka impheelaawe.

 ⁴ Mwaakha wo 1920 mpaka 1929, meettelo aatthu ni mananna caaweheraya uruparupa nlopwana ni nthiyana yahorukunuwa cinene. Namasoma mmoca hantikha: “Ifiilime, iteyaaturu, icipo, ilivuru ni ipublicidade caathoonyera wiira atthu caanawaaciva citthu caavaranaca ni usece.” Nnye myaakhannye, mananna o wiina yahanca uthoonyera usece ni ikuwo caawaraaya atthu cahanca ukhala coohihisima. Toko Ibiiblya coolumalyaaya khalayi wiira phinhalaaya ukhala atthu mahuku ookhicera, uhoonannya venci wiira atthu ‘anaahoolelihera cinene cowaacivela wanrimani.’—2 Tim. 3:4.

5. Ukati wo mwaakha wo 1960 mpaka 1969, isiyani ikhumelenle ni mananna atthu cinweheraaya uruparupa nlopwana ni nthiyana?

⁵ Ukati wo mwaakha wo 1960 mpaka 1969, cihomwaryeela ntuninyani citthu toko cila: nlopwana ni nthiyana ukhalakhala wamoca ahithelanne, urupihana alopwanaru awula athiyanaru, ni umwalanaciya. Mathukelo menci anvira yatepaka woonihera citthu cosece. Niireke utthuniheriya khula ntthu upanka impheelaawe uhaakavihera apinaatamu? Khawaakavihere. Namasoma mmoca hantikha eeraka wiira atthu olelo ahaana masankiho menci toko umwalanaca wa amuci, ahaavo alopwana awula athiyana anwuunuwiha asaanaaya veekha, atthu ookhala ni masukhuli menci ni oolemalela woona ipornografia. Toko cineeraawe uyo namasomooyo, citthu cotheenennyo cinkhumelela kontha “atthu anaahiya utthara ikettelo comaana nhina uruparupa nlopwana ni nthiyana.” Ni winciva iretta coovahaniya, toko SIDA, unthoonyera wiira ucuwelaca wa apinaatamu ukhanle ulolo.—2 Pet. 2:19.

6. Sotwani novarela nteko cani mananna atthu o ntuninyani cinweheraaya uruparupa nlopwana ni nthiyana?

⁶ Mananna atthu o ntuninyani cinweheraaya uruparupa nlopwana ni nthiyana phi itthu Sotwani invarelaawe nteko. Sotwani naacuwela wiira muuthelanani, uruparupa nlopwana ni nthiyana ni waayara asaana ikhanle itthu yomaana Yehova yaavahalyaawe apinaatamu. Phimaana, Sotwani nkhala ootteeliya awoonaka atthu yahihisimaka iyo itthu yomaaneeyo. (Efesu 2:2) Uhiya commo, Sotwani naacuwela wiira ale anraruwa khanhala uphwanya ukumi woohimala.—1 Akor. 6:9, 10.

7-8. Itthuni yuulupale Ibiiblya ineetthucihaaya nhina uruparupa nlopwana ni nthiyana?

⁷ Ale unaacivela utthara ucuwelaca wo ntuninyani anoopuwela wiira yotheene ile inhimyaaya Ibiiblya nhina uruparupa nlopwana ni nthiyana, ikhanle itthu yoohimaana ni yoohikhweeli. Ayo aneera: ‘Nluku numpale wiira unicivele uruparupa ni nlopwana awula ni nthiyana, vano nlattuni noniirelaawe wiira nihaana niivaracaka?’ Ayo  atthwaayo anuupuwela commo nlattu wo ile ineeriyaka wiira apinaatamu pooti upanka citthu cotheene cimpheelaaya. Masi Ibiiblya inhimya itthu ikiina. Iyo inniitthuciha wiira hiiva ninaakhitiri wiivaraca ni ukhotta upanka citthu coohiloka cinnicivela. (Akol. 3:5) Uhiya commo, Yehova hopanka wiira nlopwana ni nthiyana aruparupeke ni mananna ooloka ni ohisima wakhalaka wiira ahothelanaca. (1 Akor. 7:8, 9) Yaruparupaka nlopwana ni nthiyana oothelanaca paasi, ooyeeli anaakhala ookhikiceriya wiira ahikhalane masukhuli ni masankiho anaakhumelelaka atthu nlattu wooraruwa.

⁸ Mananna Nluku cinweheraawe uruparupa nlopwana ni nthiyana phiri omaana cinene upwaha ucuwelaca wo ntuninyani. Ibiiblya ineera wiira uruparupa nlopwana ni nthiyana pooti ukhala itthu yootteeliha nrima. (Miru. 5:18, 19) Masi ciicammo inaaniirela: “Khula ntthu iriyariinyu haana acuwelaka weettihera ratta irutthwaawe ni makhalelo eettakattiifu ni ohisima, woohithoonyera usammwa woohiloka, woohitosiya, toko atthu o ntuninyani ahinoncuwela Nluku.”—1 Atesal. 4:4, 5.

9. a) Ikanoni yaavahiye nrevistani Ukhalenla mwaakha wo 1926 yaathoonyera wiira Nuulumo na Nluku phiverihenle ucuwelaca? b) Ikanoni imphwanyeehu nhina 1 Joau 2:15, 16? c) Citthuni coohinamaana cihimiye nhina Arooma 1:24-27 cinlamuliyeehu unyema?

⁹ Ukhuma mwaakha wo 1900 mpaka 1930, apoovu a Yehova khatthunale wiira ahapusiye naatthu ‘yaahiyale meettelo omaana.’ (Efesu 4:19) Ayo yahiikurumica weettela itthu inhimyaaya Ibiiblya. Mwaakha wo 1926, irevista Ukhalenla 15 yo Maio (ni Inglês) yaheera: “Nlopwana ni nthiyana ahaana ukhala attakattiifu nhina moopuwelelwaaya ni citthu cimpankaaya, venci-venci nhina mananna cinaaweheraaya athiyana ahikhanle amwaaraya awula alopwana ahikhanle awanuwaya.” Hataa atthu o ntuninyani yakhalanaka moopuwelelo oohinamaana, ale yanswalela Yehova ule ukatyuule yahokupali wiira ucuwelaca wa Nluku phuunuwale ni yaanaatthara Nuulumo nawe. (Usome 1 Joau 2:15, 16.) Nihoreeriya cinene ukhalana Ibiiblya wiira ineettihere! Ciicammo nihoreeriya cinene ukhala wiira Yehova khanhiya univaha iyoolya yoominepani ukati womaana! Iyo inaanikavihera wiira nihihapusiye ni itthu inhimyaaya ucuwelaca wo ntuninyani nhina uruparupa nlopwana ni nthiyana. *—Usome Arooma 1:24-27.

10-11. Isiyani Ibiiblya ihimyalyaaya wiira yaanaahala ukhumelela mahuku ookhicera?

¹⁰ Ibiiblya yahohimya wiira mahuku ookhicera, atthu yaakookhala “owiifenta asineennyaaya.” (2 Tim. 3:1, 2) Phimaana, khaninkhala ootikhinihiya nawoonaka atthu o ntuninyani yawiirelaka akhwaaya wiira anlamuliya utepa wiivaha ifayita asineennyaaya. Ilivuru imoca ineehaniya enciclopédia ihohimya wiira ukati wo 1970 mpaka 1979, “cihoncereryaa cinene ilivuru cinaavaha miruku atthu.” Ilivuru cikiina toko nnyo, caanawaasovenriha atthu wiicuwela, wiitthuna ni uhuupuwela wiira ihaavo itthu impankaaya yoonanara.” Wootakihera, ilivuru imoca iheera co: “Wiifente, kontha thi weeva uverihenle ukhala ntthu ureera ni ofayita ntuninyani motheene.” Yeeyo ilivurwiiyo inawaakihera “ittiini yo miiva, ineera wiira ntthuuyo phinlamuliya ulakela veekhaawe meetteelo oohala utthara, ni upanka itthu inoonaawe ukhala yomaana ni yonkavihera.”

¹¹ Weewaka iyo itthwiiyo, ummuupuwela pani? Iyo phi itthu Sotwani yanthepenryaawe Hawa upanka. Uyo ahomwiirela Hawa wiira aanaahala ‘unlikanana Nluku, acuwelaka yooreera ni yootakhala.’ (Upha. 3:5) Ilelo, atthu enci anaatepa wiivaha ifayita cinene mpaka wuupuwela wiira atthu nkiina—hataa ciicammo Nluku—khanlamuliya waahimyera isiyani ikhanle itthu yomaana ni yoohinamaana. Itthu inthoonyera iyo akhanle mananna atthu cinweheraaya uthelanaca.

12. Atthu o ntuninyani arina moopuweleloni nhina uthelanaca?

 ¹² Ibiiblya iniitthuciha wiira nlopwana ni nthiyana ahaana yahisimanaka ni weettela itthu yaakhuluvelihalyaaya amwaaraya awula awanuwaya ukati waathelanacaaya. Ibiiblya woothoonyera wiira nlopwana ni nthiyana anlamuliya uvaresesana, ineera: “Nlopwana nrwaa waahiya athumwaane ni anumwaane, urwaa waavaresesa amwaarawe, ni ayoca anhala ukhala irutthu imoca.” (Upha. 2:24) Mphantte nkiina, ale antthara ucuwelaca wo ntuninyani aneettela moopuwelelo makiina. Ayo aneera wiira itthu yuulupale cinene ikhanle ntthuuyo utotha ukhala ootteeliya. Ilivuru imoca inoopela mwaha umwalanaca iheera: “Ilapo cikiina, ukati atthu woothelanaca, anawuulumaka waatthuni wiira ‘ninhala ukhala wamoca mpaka wanhaleehu ukhwa’. Masi atthu akiina ahanca urukunusa ayo moolumwaayo yeeraka: ‘ninhala ukhala wamoca mpaka nifento nihu wanhalaaya umala.’” Nlattu wo wuupuwela wiira uthelanaca pooti umala, amuci enci ahomwalanaca ni ahokhala ni masukhuli menci. Khweeliini, mananna atthu o ntuninyani cinweheraaya uthelanaca ukhanle ulolo.

13. Itthuni imoca immwiiriha Yehova unrusa atthu owiicoona?

¹³ Ibiiblya ineera: “Yehova unrusa otheene ale arina nrima wo wiicoona.” (Miru. 16:5) Kontha isiyani Yehova ananrusa atthu owiicoona? Itthu imoca, kontha ayo atthwaayo anaatepa wiicoona ukhala ofayita cinene, ni anawaasovenriha akhwaaya wiira ciicammo akhale owiicoona, toko Sotwani. Wuupuwele co: Sotwani nawiicoona cinene mpaka ahokupali wiira Yesu—ule Nluku anvarenlyawe nteko wiira ompe citthu cotheene—ahaana ankhoromelaka uhoolo wawe ni unswalela! (Mat. 4:8, 9; Akol. 1:15, 16) Atthu ootepa wiivaha ifayita anaakupali wiira ucuwelaca wo ntuninyani ukhanle ulolo uhoolo wa Nluku.

14. Manannani Arooma 12:3 cinniitthucihaaya wiiwehera ratta asineeneehu?

¹⁴ Ibiiblya inaanikavihera ucuwela mananna o wiiwehera ratta. Iyo inaahimya wiira nihaana niifentaka vakaani. Ukati Yesu wiiralyaawe: “Unfente nkhunanaa toko cineefentaa umwanennyaa,” uyo hothoonyera wiira khuntakhala ntthu wiifenta ni mananna ooloka. (Mat. 19:19) Masi Ibiiblya  khineera wiira nihaana wiihoolelihera hiivano, waahiya uttuli akhunanihu. Iyo ineera: “Nhipanke nanka itthu mpheelaka usinttana awula wiittitthihaca; masi mwiiyevihaka, mwaawehere akhwiinyu ukhala oolupale wuupwahani nyuuva.”—Afili. 2:3; usome Arooma 12:3.

15. Nlattuni weeva unkupalyaa wiira itthu inhimyaaya Ibiiblya nhina wiifenta phiverihenle ukhala yomaana?

¹⁵ Atthu enci, hataa ni ale anooniya ukhala oocuwelaca ntuninyani anoopuwela wiira itthu inhimyaaya Ibiiblya nhina wiifenta khinafayita. Ayo aneera wiira weeva waaweheraka akhwaa khampa oolupale, uneepanka ntirikhi ni ayo anaahala wuulawa. Masi wuupuwele mananna cinkhalaaya atthu o ntuninyani ya Sotwani. Woone itthu inaakhumelela nlattu wo ayo moopuwelelwaayo. Niireke atthu antepa uhoolelihera wiifenta anaakhala ootteeliya? Niireke amucyaaya ankhala ootteeliya? Niireke ahaana apatthani eekhweeli? Niireke ahaana upatthani woolipa ni Nluku? Waweheraka citthu cotheene cinoonaa ilelo ntuninyani, isiyani innikavihera: ucuwelaca wo ntuninyani awula ucuwelaca wo Nuulumo na Nluku?

16-17. Citthuni ninlamuliyeehu usukhurweela, ni nlattuni?

¹⁶ Ule ntthara ikano ca ntthu naakihera ucuwelaca wo ila ituninyeela khanthanla itthu yomaana. Uyo nolikanaca ni ntthu oorimela ilapo ihincuwelaawe. Uhiya unkoha nneeci wiira anlakihere iphiro, uyo nonkoha ntthu nkiina ciicammo rimenle. Yesu awaacaka alopwana “oocuwelaca” ookati waakhalaawe, uyo aheera: “Ayo akhanle ahooleli oohoona. Ni, ntthu oohoona anhoolelaka oohoona nkhunanawe, ooyeeli ankoowuluwela munlikittini.” (Mat. 15:14) Unawoonannyaa wiira ucuwelaca wo ila ituninyeela ukhanle ulolo uhoolo wa Nluku.

¹⁷ Ikano co mbiiblyani khula ukati cinkhala comaana. Citthu cinniitthucihaaya Ibiiblya cikhanle “cowiitthuciha, coovaanyiha, coolokihaca citthu, weettiha nsariyani.” (2 Tim. 3:16, niwehero) Nihaana ninsukhuruku cinene Yehova. Citthu cinniitthucihaawe avarelaka nteko mphwikwaawe cinaanikhikicera wiira ucuwelaca wo ila ituninyeela uhinihapuse. (Efesu 4:14) Iyoolya yoominepani innivahaawe inaanikavihera ukhalana ikuru innikhitiriha utthara ikettelo ciri nNuulumoni nawe. Khweeliini, ikhanle iparakha yuulupale cinene utthara ucuwelaca wookhuluvelya uhinlikananiya: ucuwelaca wo mbiiblyani!