MWAHA WOOSOMIYA 45
NCIPO 138 Ipwii ureera
Isiyani ineetthuceehu nimoolumo oomalela aaswali ookhuluvelya?
“Keera atthu owuuluvala phinkhalana ucuwelaca, ni ntthu khanle mahuku menci phirina ankhili omaana?”—JÓ 12:12.
ITTHU INHALEEHU WIITTHUCA
Nhina ula mwahoola, ninaahala woona mananna umwiiwelela Yehova unniphwanyihaaya iparakha ni ukumi woohimala wahoolo.
1. Kontha isiyani nihaana uwiitthucera mayamunna owuuluvala?
OTHEENE cihu ninaapheela ukaviheriya ukati woolakela citthu coohala upanka muukumini wihu. Ni mahumu ni makristau ookhomaala nhina mminepani pooti unikavihera venci. Hataa ukhala wiira ayo ahooluvala uvikana hiiva, khaninlamuliya wuupuwela wiira ikano caya khacinakhala cookhuluvelya. Yehova noopheela wiira niwiitthucere mayamunna owuuluvala. Ayo ahookhala ukati mwinci uvikana hiiva, phimaana, ayo ahaana ucuwelaca cinene. —Jó 12:12.
2. Isiyani inhaleehu woona nhina ula mwahoola?
2 Khalayi, Yehova ahaavarela nteko alopwana ookhuluvelya wiira yaalipihe ni aweettihere apoovwaawe. Ayo alopwanaayo, yahuuluvala, wootakihera, Moceesi, Davidi ni apostolu Joau. Ayo khakhanle ukati mmocaaru, uhiya commo, makhalelwaaya yaari oovirikana. Waahaleelaka ukati vakaani wiira ukhwa, ayo yahaavaha ikano comaana ale yaari amirawo ni khula ntthu anhimya ifayita urinaaya umwiiwelela Nluku. Yehova heeriha wantikhiya mbiibiliyani moolumwaaya ayo alopwanaayo wiira niwiitthucere ni niphwanyere ifayita. Otheene cihu, amirawo ni owuuluvala, pooti wamphwanyereehu ifayita cinene itthu yaahimilyaaya ayo alopwanaayo. (Aroo. 15:4; 2 Tim. 3:16) Ula mwahoola, ninaahala woona moolumo oomalela aalopwana araru ni isiyani inhaleehu wiitthucera itthu yaahimilyaaya.
“NYUUVA NNAAHALA UKHALA UKATI MWINCI”
3. Citthuni Moceesi cipankilyaawe?
3 Moceesi anonswalela Yehova muukumini wawe motheene. Uyo aari porofeeta, suwiisi, nhooleli ni namantikha. Ni citthu uyo civirihilyaawe muukumini wawe, cihomwiiriha ucuwelaca citthu cinci! Uyo phaakumihile asarayeli mwiipotthani Wiicitu ni aahoona miiriirya cinci ca Yehova. Uhiya commo, Yehova aahonvarela nteko wiira antikhe ilivuru 5 coopacera co mbiibiliyani, Isaalimu 90 ni 91. Ni unawoonannya wiira uyo phantikhile ilivuru ya Jó.
4. Phaapani Moceesi aavahilyaawe ikano ni nlattuni?
4 Unahanle ukati vakaani hinaaya ukhwa, Moceesi ukati waarinaawe myaakha 120, uyo aahathukumani asarayeli wiira awuupusere citthu cotheene Yehova apankenlyaawe. Asarayeli akhwaawe yaari amirawo, yahoona miiriirya Yehova caapankilyaawe ni mananna aattharucilyaawe apoovu o wiicitu. (Nkw. 7:4) Ayo yahomoona Yehova awaakelaka iphiro mpahari yookhwiila wiira alapuwe ni ciicammo yahoona mananna Yehova antankanyilyaawe Farawoo ni naanakhottwaawe otheene. (Nkw. 14:29-31) Umwaakoni, Yehova ahaakhikicera ni ahaawacera. (Deut. 8:3, 4) Vano, anahanle vakaani ukela ilapo yaakhuluvelihiyaaya, Moceesi khaahiyerenre ukati waarinaawe wiira aalipihe ikwaha yoomalela. a
5. Moolumo oomalela a Moceesi, nikhuluvelihoni aavahilyaawe asarayeli? (Deuteronomiyu 30:19, 20)
5 Isiyani Moceesi ihimilyaawe? (Nsome Deuteronomiyu 30:19, 20.) b Moceesi ahowuupusera apoovu o Sarayeli wiira yahaana niweherero nomaana uhoolo. Yacaalihiyaka ni Yehova, ayo yankhala ukati mwinci ilapo yaakhuluvelihiyaaya. Ni iyo ilapweeyo yaari yomaana ni yooruweriya! Moceesi ahantikha mananna caahalaaya ukhala: “Ilapo yo osittatti cuulupale ni yomaana, nyuuva nhitekileenyu, inupa cinci wo khula inanna ni citthu comaana, citthu nyuuva nhivanreenyu nteko, iluusi nhithipileenyu ni mihokorokho nyuuva nhanleenyu.” —Deut. 6:10, 11.
6. Kontha isiyani Yehova waahilyaawe apoovu akhwaawe waatuphele asarayeli?
6 Masi Moceesi ciicammo ahaavaha nlamulo asarayeli. Yaapheela ukhala nanlelo ilapo yaakhuluvelihiyaaya, yahaana uhihiyerera umwiiwelela Yehova. Moceesi ahowuupusera ifayita urinaaya ‘uthanla ukumi’ yawiiwelelaka Yehova ni ‘unvaresesa uyova.’ Masi asarayeli yaahothanla uhimwiiwelela. Phimaana, nuuwakatyaaya, Yehova aahahiya asiiriya ni ciicammo ababilooniya wiira akhale ile ilapweele ni waakusa asarayeli khampa ananteko. —2 Mam. 17:6-8, 13, 14; 2 Ikor. 36:15-17, 20.
7. Isiyani ineetthuceehu nimoolumo a Moceesi? (Nwehe ciicammo ilatarato.)
7 Isiyani ineetthuceehu? Wiiwelela unaawoopola ukumiihu. Khampa asarayeli waahanlyaaya vakaani ukela ilapo yaakhuluvelihiyaaya, nihiiva ciicammo nihaattamela ilapo yonaanaano Yehova ikhuluvelihilyaawe. Woohipica, ilapo yotheene inaahala ukhalihiya ipeepho. (Isai. 35:1; Luka 23:43) Sotwani ni maciinnyaawe khanhala ukhala-tho. (Apoka. 20:2, 3) Khacinhala ukhala-tho ittiini cowootha ni khaavo noohala urwaa uthepiya. (Apoka. 17:16) Khaavo noohala uhuvihiya niikuveerunu yaapinaatamu. (Apoka. 19:19, 20) Yehova khanla uhiyerera wiira ntthu akumiherere masakha upeephoni. (Isaa. 37:10, 11) Atthu otheene anaahala urwaa wiiwelela malamulo a Yehova ni nlattu wo iyo itthwiiyo, ninaahala urwaa ukhala nnema ninci ni waataana. Uhiya commo, atthu anaahala urwaa ukhuluvelana ni ufentana. (Isai. 11:9) Hi ninaaweherera unitteelaka nrima wiirannya iyo itthwiiyo! Naahihiyerereke umwiiwelela Yehova, ninaahala ukhalana iparakha yookhala upeephoni va watuninyani va, kahi myaakha vakaani paahi, masi ukhala mpaka!—Isaa. 37:29; Joau 3:16.
Naahihiyeke umwiiwelela Yehova, ninaahala ukhala upeephoni va watuninyani va, uhiya ukhala paahi myaakha vakaani, masi ukhala mpaka (Nwehe iparaagarafu 7)
8. Manannani nikhuluveliho nookhalana ukumi woohimala nankavihenryaaya misiyonaariyu? (Yuda 20, 21)
8 Nalipihacaka itthu Yehova inikhuluvelilyaawe, hiiva ninaahala ukhitiri umwiiwelela uyova hataa anikhumelelaka masakhani muukumini wihu. (Nsome Yuda 20, 21.) c Ni nno nikhuluvelihonno, pooti univaha ikuru cimpheeleehu wiira naanane citthu cinniloloviha. Munna mmoca misiyonaariyu o wa África ahoviriha myaakha cinci aananaka ulolovaca mminepani. Uyo neera: “Ukati waacuwenlyaka wiira akaahala ukela mpeephoni kaahimwiiweleleke Yehova, mi kaholakela waanaana niikuru caka cotheene citthu caakilolovihaca ni kaahonlompa Yehova wiira akikavihere. Mi kahokhitiri utthema kikaviheriyaka ni Yehova.”
“NYUUVA NNAAHALA UKHALA SAANA”
9. Masakhani Davidi aavirihilyaawe muukumini wawe?
9 Davidi aari mwene ookhuluvelya a Yehova. Uyo ciicammo, aari ntthu owiipaca, nakhotto ni porofeeta. Masi uyo, ciicammo ooviriha masakha muukumini wawe. Wootakihera, uyo aahoviriha myaakha cinci antthawatthawaka mwene Sawuli. Vano ukhala wawe mwene, Davidi ahaana atthawaka wiira oopole ukumyaawe, kontha mwanawe eehaniya Apisalau ammananiha ukhala mwene nipuro na Davidi. Hataa avirihaka ala masakha ni makhwaawe omwiirutthuni wawe, Davidi khahiile unkhuluvela Yehova mpaka waakhwilyaawe. Mpaka Yehova aheera co amwaacaka Davidi: “Nlopwana mmoca nkitteeliha nrimaaka.” Phimaana, phataari niiwelele ikano comaana Davidi nihiyenryaawe! —Mite. 13:22; 1 Mam. 15:5.
10. Kontha isiyani Davidi wanvahilyaawe ikano Salomau hinaaya ukhala mwene?
10 Wootakihera, moone ikano mwene Davidi anvahilyaawe mwanawe Salomau, aahala ukhala mwene o Sarayeli. Yehova honthanla mmirawo Salomau wiira ateke itempulu nipuro atthu yaahalaaya unswalela. (1 Ikor. 22:5) Salomau ahaana nteko mwinci waahalaawe uvara uhoolo ni ahaana ukaviheriya ni Yehova wiira aalamulele apoovu. Isiyani yaahala wiirannya unari wiira Davidi aahomwiirela Salomau wiira anhala unkavihera? Nttwee noone.
11. Khampa cinthoonyeraaya 1 Mamwene 2:2, 3, ikanoni Davidi anvahilyaawe Salomau ni citthuni comaana caamwiirannyenle Salomau ukati waamwiiwelelaawe Yehova? (Nwehe ciicammo ilatarato.)
11 Isiyani Davidi ihimilyaawe? (Nsome 1 Mamwene 2:2, 3.) d Davidi ahomwiirela mwanawe wiira amwiiwelelaka Yehova naahala ucaalihiya. Ni myaakha cinci Yehova ahonvaha citthu comaana Salomau ni ahonkavihera nimananna oovirikana. (1 Ikor. 29:23-25) Salomau ahoteka itempulu yomaana ni moolumwaawe ahantikhiya nlivuruni cikhwaawe co mbiibiliyani. Uyo ciicammo ahokhala thaciri nlattu ucuwelaca waarinaawe ni mihakhu cawe. (1 Mam. 4:34) Ukhala wiira Davidi ahonhimerya wiira Salomau aahala ukhala saana muukumini wawe amwiiwelelaka Yehova. Wooriipiha nrima, Salomau wuuluvala wawe, aahopacera waaswalela anluku oohikhweeli. Nlattu wo iyo itthwiiyo, Yehova aahonhiya uncaaliha Salomau ni khaakhitinri-tho waahoolela apoovu niisariya ni nuucuwelaca. —1 Mam. 11:9, 10; 12:4.
Moolumo oomalela Davidi anvahilyaawe mwanawe Salomau, anaanikavihera wiiweha wiira namwiiwelelaka Yehova naahala univaha ucuwelaca wiira nilakele nimananna omaana itthu yoohala upanka (Nwehe iparaagarafu 11 ni 12) f
12. Isiyani ineetthuceehu niikano ca Davidi?
12 Isiyani ineetthuceehu? Wiiwelela unaaniphwanyiha iparakha. (Isaa. 1:1-3) Mahukwaala, Yehova khanhimya wiira ninaahala ukhala mathaciri khampa Salomau. Masi namwiiwelelaka Nlukwiihu, naahala univaha ucuwelaca umpheeleehu wiira nilakele itthu yoohala upanka nimananna omaana. (Miru. 2:6, 7; Tiya. 1:5) Ikano ca Yehova pooti unikavihera ulakela saana nhina nteko, usoma icikola, nsurukhu ni mathukelo. Weettela ucuwelaca wa Yehova muukumini wihu unaahala unikhikicera masakha menci. (Miru. 2:10, 11) Uhiya commo, ninaahala waakhalana apatthani omaana ni ciicammo ucuwela isiyani inlamuliyeehu upanka wiira nikhalane amuci ootteeliya.
13. Isiyani yankavihenre Carmen ulakela itthu yoohala upanka nimananna omaana?
13 Carmen, nookhala u Moçambique, oopuwela wiira anhala ukhala saana muukumini wawe asomaka icikola cuulupale. Uyo nosoma icikola yaanamatekateka ni neera: “Miiva yankicivela cinene itthu yeetthucaka, masi miiva akaarina ukati ni ikuru cinene. Mi kaapacera usoma 07h30 yo weecisu ni kakhuma 18h. Wankirikela urwaa umikutthaanoni ni upatthannyaaka ni Yehova wahopacera ulolovaca. Vano mi kahoonenela wiira khweeliini kaavarela nteko atthu eeli.” (Mat. 6:24) Uyo ahonlompa Yehova anhimeryaka itthu yaamwiira ni ahotothatotha mmalivuruni wihu. Carmen neera: “Vano mahumu ni amaama ukivaha waya ikano, mi kaholakela uhiya usoma icikola cuulupale ni wiivaherera unvarela nteko wa Yehova ukati wotheene. Mi akintikhina wiira kihothanla itthu yomaana muukumini waka ni kihokhala ootteeliya cinene.”
14. Ikanoni yofayita Moceesi ni Davidi inihiyenryaaya?
14 Moceesi ni Davidi yaanonfenta cinene Yehova ni yancuwela ifayita urinaaya umwiiwelela uyova. Moolumwaaya oomalela, ayo yaahakurumica atthu akhwaawe utthara ntakihero naya. Moceesi ni Davidi, ahohimya sana-saana wiira ale ahiile umwiiwelela Yehova khanhala ucaaliha-tho. Ikano ayo civahilyaaya cihaana ifayita cinene mahukwaala. Ni cinavinre myaakha imiliau cene, nswali mmoca ookhuluvelya hohimya ifayita urinaaya uhihiyerera ukhala ookhuluvelya wa Nluku. Nttwee noone vakaani.
“UNAAKITTEELA NRIMA CINENE”
15. Citthuni apostolu Joau coonilyaawe muukumini wawe?
15 Joau aari ntthari aafentiya cinene ni Yesu. (Mat. 10:2; Joau 19:26) Uyo ahoomweettana Yesu ukati wotheene waalalyeeraawe va watuninyani va, ahoona miiriirya Yesu caapankilyaawe ni aahokhala nkhayi ukati woorika Yesu waavirihilyaawe. Uyo aahoona ukati Yesu waavariyaawe ni wunwelelihiyaawe. Joau aahoona mananna makristau yincivilyaaya. Uyo ookhala ukati mwinci wiira oone ihapari comaana “cilalyeeriyaka cowumpiya cotheene vathi waya irimu”.—Akol. 1:23.
16. Phaapani anlipihiya niiwarakha ca Joau?
16 Ukati wuuluvanlyaawe. Joau ahaana iparakha yo wantikha ilivuru yootteeliha nrima ya Apokalipise, inhimya ‘ihapari ca Yesu Kristu.’ (Apoka. 1:1) Uyo ciicammo hantikha ivangeeliyu inhimya ncinanawe ni iwarakha tthaaru cikhwaawe cantikhilyaawe. Iwarakha yoneeraru, uyo amwantikhenle nkristau mmoca ookhuluvelya eehaniya Gaio, ule Joau anfentaawe khampa mwanawe. (3 Jo. 1) Unawoonannya wiira Joau aahaana asaanaawe oominepani aafentaawe cinene. Itthu ula nlopwanoola yantikhilyaawe ihaalipiha atthari a Yesu mahukwaala.
17. Khampa cinthoonyeraaya 3 Joau 4, isiyani inniphwanyiha utteeliya?
17 Isiyani Joau yantikhilyaawe? (Nsome 3 Joau 4.) e Joau hantikha wiira umwiiwelela Yehova unaaphwanyiha utteeliya. Ukati wantikhilyaawe iwarakha yoneeraru, atthu akhwaawe yammwarusela ihapari cowoothiya ni yankumihereraka nanrokottole wanlokoni. Masi, wootteeliha nrima atthu akhwaawe khayaahiile “weettela ikhweeli.” Ayo yammwiiwelela Yehova ni khayaahiile “weetta attharaka malamulwaawe.” (2 Jo. 4, 6) Ayo alopwana ookhuluvelyaayo, yaahontteeliha nrima cinene, uhiya paahi Joau, masi ciicammo Yehova. —Miru. 27:11.
18. Isiyani ineetthuceehu nimoolumo a Joau?
18 Isiyani ineetthuceehu? Ukhuluvelya unaaphwanyiha utteeliya. (1 Jo. 5:3) Wootakihera, hiiva ninaakhala ootteeliya cinene nlattu woocuwela wiira ninantteeliha nrima Yehova. Yehova naakhala ootteeliya cinene anoonaka wiira ninaakhitiri unyema itapha ca Sotwani ni ninawiiwelela malamulwaawe. (Miru. 23:15) Malayikha ciicammo anaakhala ootteeliya. (Luka 15:10) Ni hiiva ninaakhala ootteeliya cinene nawoonaka mayamunneehu ahihiyerereka ukhala ookhuluvelya hataa yalupatthiyaka ni yaattehattehiyaka. (2 Atesal. 1:4) Yamalamalihiyaka ituninya ya Sotwani, ninaarwaa ukhala ootteeliya nacuwelaka wiira nihokhitiri ukhala ookhuluvelya mpaka umwiisoni.
19. Isiyani arokorihu amoca aneehaniya Rachel ihimilyaaya nhina wiitthuciha ikhweeli atthu akhwaawe? (Nwehe ciicammo ilatarato.)
19 Itthu imoca inniphwanyiha utteeliya ukhanle waahimerya atthu akhwaawe ihapari ca Yehova. Rachel, nookhala u República Dominicana, neera wiira ikhanle iparakha yuulupale wuulumana atthu akhwaawe myaha ca Nlukwiihu. Oopuwelaka atthu otheene aakavihenryaawe uncuwela Yehova, uyo neera: “Kinaatteeliya cinene, kawoonaka atthu kaakavihenryaaka uncuwela Yehova, apankaka marukunuso muukumini waya ni unkhuluvela. Wiikurumica karinaaka wiira kikhitiri wiitthuciha ikhweeli ayo atthwaayo.”
Para hiiva, ikhanle itthu yootteeliha nrima wiitthuciha akhunanihu unfenta ni umwiiwelela Yehova khampa hiiva (Nwehe iparaagarafu 19)
MWIITTHUCEERE MOOLUMO OOMALELA AASWALI OOKHULUVELYA
20. Isiyani hiiva irineehu yaarinaaya alopwana khampa Moceesi, Davidi ni Joau?
20 Moceesi, Davidi ni Joau yaakhala ukati woovirikana nuukati unkhaleehu. Hataa ukhala commo, hiiva ninawaatakiha ayo, khweeliini, ayo yanswalela Nluku eekhweeli, Yehova ni hiiva ciicammo ninonswalela yooyo. Ni khampa ayo, hi ninanlompa Yehova, ninankhuluvela uyova ni ninaatotha ikano cawe. Uhiya commo, khampa ayo alopwana ookhuluvelyaayo, hiiva ninaakupali wiira Yehova nawaacaaliha venci ale ahinhiya umwiiwelela uyova.
21. Itthuvoni cinhalaaya waakhela ale antthara ikano ca Moceesi, Davidi ni Joau?
21 Khweeliini, hi ninaapheela weettela ikano caya ayo alopwanaayo ni umwiiwelela Yehova. Naayo manannaayo, hiiva ninaahala ucaalihiya cinene ni Nlukwiihu. Hiiva ciicammo ninaahala ‘ukhala ukati mwinci’, mpaka! (Deut. 30:20) Ninaahala ukhala utteeliya nawiiwelelaka apaapeehu onifento, anhala unitthuvela nimananna hiiva nahuupuweleehu. —Efesu 3:20.
NCIPO 129 Nimphavela Ovilela
a Asarayeli enci yahoona miiriirya ca Yehova upahari wookhwiila, khayaakhanle wiira yoone ilapo yaakhuluvelihiyaaya. (Manu. 14:22, 23) Yehova ahowiirela wiira ale yaarina myaakha 20 urwaaka uculu yanhala ukhwa muuthakoni. (Manu. 14:29) Masi Josuwe, Kalepe ni atthu enci akhwaawe yaari amirawo, waahela nhina a Levita, yaahokhala ukati mwinci ni yaahokela ilapo yaakhuluvelihiyaaya. — Deut. 1:24-40.
b Deuteronomiyu 30:19 Ileelo kinaavarela nteko irimu ni ituninya khampa saahiti wiira iriyariinyu kiheesa ukumi ni nookhwa, ureeriya nuutakhaliya. Nthanle ukumi wiira nhikhwe nyuuva ni nuucuulwiinyu, 20 nlattu wonfenta Yehova Nlukwiinyu, mwiiwelelaka ncu nawe ni unvaresesa uyova, kontha uyo phiri ukumiinyu ni nlattu wo yooyo, phinhaleenyu ukhala mahuku menci ilapo Yehova akhuluvelihilyaawe aavaha anhiya apaapeenyu, Aparahaamu, Isaki ni Jakoo.
c Yuda 20 Masi nyuuva, afentyaaka, mwiilipihe nhina waamini winyu wowaarya cinene ni nlompe ni nnepa wowaarya, 21 wiira nhihiye upanka citthu cinhala umwiiriha Nluku wuufentani, nwehereraka wooneliya ikiriri ni Yesu Kristu Apwiiyeehu, mpheelaka ukumi woohimala.
d 1 Mamwene 2:2 Woohipica kinaahala ukhwa. Phimaana, ukhale ookhomaala ni ukhale nlopwana. 3 Mpanke ile Yehova, Nlukwiinyu noolepelaawe, mweettelaka iphiro cawe ni mwiiwelelaka ikano cawe, malamulwaawe ni ikettelo cawe cohukhumu khampa cantikhiyaaya Nlamulo na Moceesi. Mapankaka commo, nyuuva nnaahala ukhala ookhikicerya muukumini winyu wotheene.
e 3 Joau 4 Khiivo itthu ikhwaawe intepa ukitteeliha nrima uvikana ila: wiiwa wiira asaanaaka khanhiya weettela ikhweeli.
f ILATARATO: Moono wonlopwana: Davidi anvahaka ikano mwanawe Salomau. Moono wonlopwana: Mayamunna anari Ucikolani yo Mapiyoneeru yaaviriyanaka saana ikano ca Yehova.
