MWAHA WOOSOMIYA 46
NCIPO 49 Nimuhakalalihe Yehova
Nyuuva nneera mwiikurumicaka wiira nkhale namakavihera o wanlokoni?
“Uvaha unaatteeliha nrima cinene uvirikana ni waakhelela.” —MITE. 20:35.
ITTHU INHALEEHU WUUTTHUCA
Waasovenriha mayamunna apattisiye wiira yiikurumice ukhala anamakavihera o wanlokoni.
1. Manannani apostolu Paulu awoonelaawe anamakavihera o wanlokoni?
ANAMAKAVIHERA o wanlokoni anaakavihera venci nloko. Apostolu Paulu anawaavaha ifayita venci ayo alopwana ookhuluvelyaayo. Itthu inthoonyihera iyo, ukhanle ukati waawantikhenlyaawe iwarakha makristau o Filipo. Nhina iyo iwarakheeyo, uyo ahowuulumiha anamakavihera o wanlokoni nkhayi ni mahumu.—Afili. 1:1.
2. Manannani munna neehaniya Luis cineecoonaawe nlattu wookhala namakavihera o wanlokoni?
2 Mayamunna enci oopattisiya, anaakhala ootteeliya nlattu wookavihera wanlokoni phanka anamakavihera. Wootakihera, Devan aarina myaakha 18 ukati waathanliyaawe ukhala namakavihera o wanlokoni. Masi amunna aneehaniya Luis yaathanliye anarina myaakha 50. Ayo aneera: “Miiva kinoona ukhala iparakha yuulupale ukavihera khampa namakavihera o wanlokoni, utepa kuupuwelaka mananna mayamunna cinkithoonyeraaya nifento!” Anamakavihera o wanlokoni enci anawiicoona ayo manannaayo.
3. Isiyani inhaleehu woona nhina ula mwahoola?
3 Wakhala wiira nyuuva nhopattisiya ni nanlelo khannakhala namakavihera o wanlokoni, nnoonela cani wiihelela uyo mpikooyo? Isiyani inhala uwiirihani wuucivelani upanka iyo? Ni isiyani Ibiibiliya inhimyaaya nhina wo citthu cinlamuliyeenyu upanka wiira nkhale namakavihera o wanlokoni? Nhina ula mwahoola ninaahala woona waakhuliya wo ala makohwaala. Masi nihinaaya, nttwee noone ntekoni anamakavihera o wanlokoni unvaraaya.
ISIYANI IMPANKAAYA ANAMAKAVIHERA O WANLOKONI?
4. Mitekoni anamakavihera o wanlokoni cimpankaaya? (Nwehe ciicammo ilatarato.)
4 Anamakavihera o wanlokoni akhwaawe anaawacera micoko coopheela ulalyeeriya ni akiina anaawacera irevista ninkaweehu wuulalyeerani. Akhwaawe anaakavihera muukwecakweciyani ni muulokihaciyani Isalau yoomwene. Ayo ciicammo pooti uthanliya wiira akhale anamathoonyera ni uwacera ikaruma cooruma ukati umpankiyaaya nkutthaano. Miteko cinci anamakavihera o wanlokoni cimpankaaya cinkhala cooyevaca, masi ayo mayamunnaayo ari alopwana ookhomaala nhina mminepani, ananfenta Yehova ni anaweettela ikano co mbiibiliyani. Ciicammo, anawaafenta venci mayamunna ni mayanuunu o wanlokoni. (Mat. 22:37-39) Munna pattisiye, nlamuliya upanka Isiyani wiira akhale namakavihera o wanlokoni?
Anamakavihera o wanlokoni anantakiha Yesu yeevahereraka wiira yaakaviheraka akhunanaya (Moone iparaagarafu 4)
5. Isiyani inhala wuukaviherani nyuuva ukhala namakavihera o wanlokoni?
5 Ibiibiliya inaathoonyera mattharelelo munna anlamuliyaawe utthara wiira akhale namakavihera o wanlokoni. (1 Tim. 3:8-10, 12, 13) Nnoonela cani usoma ayo malakiherwaayo ni wiikurumica weettela muukumini winyu? Upanka commo unaahala wuukaviherani ukhalana iyo iparakheeyo. Masi wiipaceroni munlamuliya wuupuwela itthu inwiirihani upheela ukhala namakavihera o wanlokoni.
KONTHA ISIYANI NNOPHEELEENYU UKHALA NAMAKAVIHERA O WANLOKONI?
6. Isiyani inhala wuukaviherani upanka itthu wiira mwaakavihere akhunaninyu? (Matewus 20:28; nwehe ciicammo ilatarato .)
6 Yesu phintakihero nihu, citthu cotheene caapankaawe caavaranaca ni nifento, uyo ananfenta Yehova ni apinaatamu. Nifento nihomwiiriha Yesu wiikurumica wiira akavihere atthu akhwaawe ni mpaka ahovara miteko caathoonyera wiira ari ntthu owiiyeviha. (Nsome Matewus 20:28; Joau 13:5, 14, 15) Wakhala wiira citthu cotheene nnopankeenyu nnopanka ni nifento, Yehova naahala wuucaalihani ni wuukaviherani wiira nkhitiri ukhala namakavihera o wanlokoni.—1 Akor. 16:14; 1 Pet. 5:5.
Wootakihera, Yesu aheetthuciha wiira anlamuliya ukhala owiiyeviha, uhiya uwehaweha uhimiya (Nwehe iparaagarafu 6)
7. Kontha isiyani munna khanlamuliya upheela ukhalana mirintti cinci wiira ahimiye?
7 Ntuninyani, atthu enci anawaattottopela atthu owiihimya ni ammananiha wiittitthimiha. Masi apoovu a Yehova khanwacerana commo. Munna naakavihera akhwaawe ni nifento phanka Yesu caapankaawe, khanwehaweha uttitthimihiya hataa khampheela ukhala ntthu ofayita waavikana atthu akhwaawe. Unari wiira nlopwana nopheela wiittitthimiha naathanliya ukhala namakavihera o wanlokoni, uyo khaahala uvara miteko cothonyihera wiiyeviha masi cirina ifayita wiira ciwaceriye ikhontwaa ca Yehova. Watthunaka uyo aahala wiicoona ukhalana ifayita cinene wahinomphwanelaaya uvara nnyo mitekonnyo. (Joau 10:12) Yehova khanaacaaliha atthu owiicoona awula anwehaweha ukhalana ifayita waavikana akhunanaya.—1 Akor. 10:24, 33; 13:4, 5.
8. Ikanoni Yesu aavahilyaawe attharyaawe 12?
8 Ikwaha cikhwaawe, mpaka asipatthannyaawe Yesu yahopheela ukhalana iparakha ni mananna oohinamaana. Moone itthu Tiyaku ni Joau yanlepenlyaaya Yesu. Ayo yahonlepela ukhala nipuro noottitthima cinene muumweneni. Yesu khaattottopenle nlattu woopheela ukhala atthu ofayita cinene waavikana atthu akhwaawe. Uhiya commo, uyo ahowiirela atthari 12 co: “Masi ule mpheela ukhala muulupale wariyari winyu, haana akhalaka nrumyeenyu ni nophavela ukhala oopacera eriyariinyu eepanke ipottha ya atthu otheene.” (Mark 10:35-37, 43, 44) Wakhalaka wiira munna naapheela ukhala namakavihera o wanlokoni ni nrima womaana, ukhanle waakavihera atthu akhwaawe, uyo nokhala itthuvo yo wanlokoni.—1 Atesal. 2:8.
KONTHA ISIYANI UNAARERA WAAKAVIHERA ATTHU AKHWAAWE?
9. Manannani nyuuva nnohaleenyu wuncerera upheela winyu waakavihera akhwiinyu?
9 Woohitikhinaca nyuuva nnanfenta Yehova ni nnopheela waakhavihera akhwiinyu. Masi hataa ukhalaka commo, mwatthunaka nyuuva khunoocivelani ukhala namakavihera o wanlokoni kontha nnaacuwela wiira nnaahala ukhalana miteko cinci. Vano unhala wuucivelani cani ukhala namakavihera o wanlokoni? Inanna imoca ukhanle wuupuwela utteeliya ninkhalaneehu naakaviheraka mayamunneehu ni mayanuunwiihu. Yesu enre co: “Uvaha unaatteeliha nrima cinene uvirikana ni waakhelela.” (Mite 20:35) Yesu hoonihera iyo muukumini wawe. Uyo ankhala ootteeliya kontha anawaakavihera atthu akhwaawe. Ni itthu imocaaru inaahala uwiirannyeelani.
10. Isiyani inoonihera wiira Yesu antteeliya nlattu wo waakavihera atthu waakhwaawe? (Markus 6:31-34)
10 Moone ntakihero ninoonihera mananna Yesu akhalaawe oootteeliya aakaviheraka akhwaawe. (Nsome Markus 6:31-34.) Ikwaha imoca, Yesu nkhayi nimaapostolu yaanowooca. Vano yaarwaa nipuro noomaalya wiira yamumule. Masi, ikhurupu yaatthu enci yahophiya nno nipuronno ayo ahinaaya uphiya. Ayo atthwaayo, yaapheela wiiwa citthu Yesu ciitthucihaawe. Yesu pooti weeraawe mena. Kontha uyo nkhayi nimaapostolu khayaarina ukati hataa vakaani wiira alye, awula Yesu pooti wawiitthucihaawe ikhweeli imoca awula piili nuuwiirela arweeke. Masi Yesu anawaafenta atthu. Phimaana “ahancera uwiitthuciha citthu cinci”. Ni khaahiyerenre uwiitthuciha mpaka “ucoocilo.” (Mark. 6:35) Yesu apanka commo kahi nlattu wookhanyererihiya, masi kontha ‘anawoonela ikiriri’ atthu. Uyo aapheela uwiitthuciha kontha anawaafenta. Ni apankaka commo, waanaamwiiriha Yesu ukhala oootteeliya.
11. Isiyani Yesu yaapankilyaawe wiira aakavihere ale apoovwaale? (Nwehe ciicammo ilatarato.)
11 Uhiya uwiitthuciha citthu cinci, Yesu ahaakavihera ale atthwaale ni inanna ikhwaawe. Uyo ahaawacera ni citthu caapheelaaya co mwiirutthuni. Yoole ukatyuule, Yesu ahopanka mwiiriirya avarelaka nteko iphaawu ni ihopa vakaani. Ni ahaavarela nteko attharyaawe wiira yaakawele atthu nnyo iphaawunnyo ni ihopannyo. (Mark. 6:41) Naayo manannaayo, Yesu ahowiitthuciha attharyaawe waakavihera atthu akhwaawe. Ciicammo, uyo hothoonyihera ifayita urinaaya waakavihera atthu ni citthu cinaathwa. Ni iyo phiitthu anamakavihera o wanlokoni inlamuliyaaya upanka. Muupuwele mananna maapostolu a Yesu yaaryaaya oootteeliya nlattu wonkavihera Yesu ukawa ile iyoolyeele. Vano, ayo atthwaayo “yaaholya mpaka urupala!” (Mark. 6:42) Ila khinakhala ikwaha yoopacera Yesu oonihenryaawe waawacera atthu akhwaawe. Uyo hoonihera iyo muukumini wawe motheene. (Mat. 4:23; 8:16) Wiitthuciha ni ukhala owiiyeviha, waanontteeliha nrima Yesu. Wohitikhinaca, nyuuva ciicammo nnaahala ukhala ootteeliya cinene wakhalaka wiira nnaahala weesa nipuro noopacera waawacera akhwiinyu ni wiikurumica ukhala namakavihera o wanlokoni.
Ufenta winyu Yehova ni upheela winyu unvarela nteko, unaahala wuukurumicani upanka yotheene inkhitiriinyu wiira mwaakavihere mayamunneenyu o wanlokoni (Nwehe iparaagarafu 11) c
12. Kontha isiyani ntthu hinlamuliyaawe wiicoona uhikhalana ifayita?
12 Atthu akhwaawe aneecoona uhikhalana ucuwelaca wiira akavihere wanlokoni. Wakhala wiira nyuuva nnawiicoona commo, nhikhale ooriipiya nrima. Woohaanyihacera, nyuuva nhaana makhalelo ofayita cinene anhala waakavihera mayamunna. Nnoonela cani usoma moolumo a Paulu amphwanyannya nhina 1 Akorintu 12:12-30 ni ulompa wiira Yehova ookavihereni? Nhina nnyo iveerusu nnyo, Paulu naahimya woohikhuwakhuwa wiira khula nswali a Yehova wuuhelani nhina nyuuva, nhaana ifayita cinene wanlokoni. Vano, wakhala wiira khannothoonyihera makhalelo anhala uwiirihani ukhala namakavihera o wanlokoni, nhihiyerere wiikurumica. Uhiya commo, mpanke inhaleenyu ukhitiri wiira munswalele Yehova ni waakavihera mayamunna. Ni pooti wankupaliinyu wiira mahumu anawoona wiikurumica winyu ni anaahala wuuthanlani wiira nkavihere uvara miteko nyuuva cinkhitiriinyu.—Aroo. 12:4-8.
13. Kontha isiyani malakihero menci aryaaya omaana para ale ampheela ukhala anamakavihera o wanlokoni?
13 Moone itthu ikhwaawe-tho inhala wuukurumicani upheela ukhala namakavihera o wanlokoni: Mattharelelo menci anlamuliyeenyu utthara wiira nkhale namakavihera o wanlokoni akhanle mattharelelo otheene wihu ninlamuliyeehu weettela. Wootakihera, makristau otheene ahaana yalipihacaka upatthannyaaya ni Yehova, owaacivela waakavihera akhunanaya waatteelaka nrima ni ukhala ntakihero nomaana. Atthunaka nyuuva nhaana makhalelo otheene amwiiriha ntthu uthanliya ukhala namakavihera o wanlokoni. Vano matthareleloni munna nopheela ukhala namakavihera o wanlokoni nolamuliyaawe wiikurumica weettela?
MPANKEKE ISIYANI WIIRA NKHALE NAMAKAVIHERA O WANLOKONI
14. “Ukhala ookhuluvelya” maanaaya isiyani? (1 Timotiyu 3:8-10, 12)
14 Nttwee noone mattharelelo o mbiibiliyani ari nhina 1 Timotiyu 3:8-10, 12. a (Nsome.) Anamakavihera o wanlokoni ahaana “yakhalaka ookhuluvelya”. Nna nuulumonna ciicammo pooti utaphuleliya khampa “uphwanela uhisimiya naatthu akhwaawe”, “uwacera saana” awula “ukhalana makhalelo anhala umwiiriha ntthu uhisimiya”. Masi iyo khinthoonyera wiira nyuuva khamunlamuliya woopa mwaha cooteehaca awula uthuka. (Ekles. 3:1, 4) Itthu yuulupale impheeliya ukhanle nyuuva uwacera saana citthu cinvahaceriyeenyu. Wakhalaka wiira nyuuva nnaacuweliya ukhala ntthu owiikurumica ni ookhuluvelya nnaahala uhisimiya ni mayamunna otheene o wanlokoni.
15. “Akhala nlopwana o nuulumo nimoca” ni “uhinyonka mihakhu” maanaaya isiyani?
15 “Akhaleke nlopwana o nuulumo nimoca” Maanaaya wiira nyuuva khannootha ni nnaakhuluvelya. Nyuuva nnaweettela itthu inhimyeenyu ni khannaathepya akhunaninyu. (Miru. 3:32) “Khanlamuliya unyonka mihakhu” maanaaya wiira nyuuva nri ntthu ookhuluvelya muntekoni winyu ni khannohiyerera wuuluma ikhweeli. Nyuuva khannohala waapanka citthu coohinamaana asipatthaniinyu o wanlokoni mpheelaka uphwanya nsurukhu.
16. a) “Uhiwurya cinene iviinyu” maanaaya isiyani? b) “Ukhalana moopuwelelo omaana” maanaaya isiyani?
16 “Uhiwurya cinene iviinyu” maanaaya wiira nyuuva khamunwurya cinene nipha ni khannocuweliya khampa nanhapaliya. Ukhalana “moopuwelelo omaana” maanaaya wiira nyuuva nnaahisima itthu Nluku neeraawe wiira phiitthu yomaana ni yoohinamaana. Khweeliini, nyuuva khannakhala ntthu oohipahuwa. Masi nyuuva nhaana upatthani womaana ni Yehova. Naayo manannaayo, nnawiicoona ukhalana nnema.
17. “Upacera uwehiya yakhalaka wiira anaapwanelela” maanaaya isiyani? (1 Timotiyu 3:10; nwehe ciicammo ilatarato.)
17 “Upacera uwehiya yakhalaka wiira anaapwanelela” maanaaya wiira mahumu ahowoonani wiira nnaawacera saana mirintti cinvahaceriyeenyu ni pooti wanookhuluvelaayani. Vano, mahumu yoovahacerakani uwacera miphantte cikiina, nhaana utthara malakihero anoovahaayani mahumu ni o mumphwinkoni. Nwehawehe weettela citthu cootheene cinhela nhina itthu ivahaceriyeenyu ni nhaana ucuwela ukatini unlamuliyeenyu umaliha. Nyuuva mwiikurumicaka uvara ratta miteko cinvahaceriyeenyu wanlokoni, mayamunna anaahala uwoonani wiira nnawiikurumica upanka miphantte cinvahaceriyeenyu. Mahumu, nhihiye waatthenkaca mayamunna apattisiye. (Nsome 1 Timotiyu 3:10.) b Wanlokoni winyu, ahaavo amirawo arina myaakha 13,14 awula ahipiihile masi apattisiye? Anaapankaka usoma wo veekha ni anaatthenkacaka mikutthaano? Anaakomentariki ummikutthaanoni ni anaarwaa wuulalyeerani? Mwaavahacere mirintti cinhalaaya ukhitiri uwacera, hataa akhalanaka myaakha vakaani. Nuuwakatyaaya, yakhalanaka mwaakha 17 awula 18, atthunaka anaahala uthanliya ukhala anamakavihera o wanlokoni.
Mahumu anawaavacera mirintti mayamunna oopattisiya, naayo manannaayo anawaawehecera wakhalaka wiira anaapwanelela (Nwehe iparaagarafu 17)
18. “Khanlamuliya ukhalana milattu” maanaaya isiyani?
18 “Khanlamuliya ukhalana milattu” maanaaya wiira, khaavo nlamuliya ukhalana isariya yoowootheryani upanka itthu yoohinamaana. Khweeliini, atthu akhwaawe pooti uwootheryani itthu nhipankileenyu. Iyo itthwiiyo mpaka yahomwiirannyeela Yesu, nuuyo aheera wiira attharyaawe yanhala uwiirannyeela. (Joau 15:20) Masi nyuuva mwakhalanaka makhalelo omaana khampa Yesu, nnaahala wooniya ukhala ntthu ooreera nrima ni mayamunna.—Mat. 11:19.
19. “Alopwana arina athiyana amoca” maanaaya isiyani?
19 “Alopwana arina athiyana amoca.” Nyuuva nhaana nkhalanaka moopuwelelo mamocaaru nimananna Yehova cinweheraawe uthelanaca. (Mat. 19:3-9) Nkristau khanlamuliya upanka urupihana woohinamaana. (Mabere. 13:4) Uhiya commo, nyuuva nhaana waafenta amwaarinyu ni khannolamuliya uciveliya naathiyana akhwaawe.—Jó 31:1.
20. Manannani nlopwana “nowaceraawe saana itthokwaawe”?
20 “Uwacera saana itthokwaawe.” Wakhalaka wiira nkhanle nhooleli otthoko, nyuuva nhaana uwacera mirintti cinyu. Mpanke uswali waamuci khula isumana. Mwiikurumice ukhuma wuulalyeerani nkhayi naamwaarinyu ni naasaaneenyu wakhitirya vale. Mwaakavihere asaaneenyu ukhalana upatthani woolipa ni Yehova. (Efesu 6:4) Nlopwana nowacera saana itthokwaawe, nawoonihera wiira naahala ukhitiri uwacera nloko.—1 Timotiyu 3:5.
21. Isiyani inlamuliyeenyu upanka wakhalaka wiira nanlelo khannakhala namakavihera o wanlokoni?
21 Wakhala wiira nyuuva khanakhala namakavihera o wanlokoni, sontte nsome saana ula mwahoola ni nlompe. Nsome ciicammo malakihero o mbiibiliyani anaahimya anamakavihera o wanlokoni ni mwiikurumice weettela ayo malakiherwaayo. Muupuwelacere mananna nyuuva cinonfenteenyu Yehova ni mayamunna o wanlokoni. Iyo inaahala uwiirihani wuncerera upheela winyu ukavihera. (1 Pet. 4:8, 10) Mwakhalaka namakavihera o wanlokoni, nyuuva unaahala wuutteelani nlattu wo waakavihera mayamunna ni mayanuunu. Ni pooti unkupaliinyu wiira nnaahala ucaalihiya wiikurumica winyu upheela ukhala namakavihera!—Afili. 2:13.
NCIPO 17 “Mi kinaapheela”
[Mawehero]
a 1 Timotiyu 3:8 Ciicamo arumiya ahaana yakhalaka alopwana ookhuluvelya ni ootthara nuulumo nimoca; khanlamuliya uwurya iviinyu cinene, ni khanlamuliya utotha unyonka mihakhu. 9 Ahaana avaresesaka isiiri ya Nluku yoomwaamini nimoopuwelelo omaana. 10 Ciicammo, ahaana yaawehiyaka yaaphwanelelannyaaka; vano ahaana akaviheraka khampa arumi, yakhalaka wiira khaarina milattu. 12 Anamakavihera o wanlokoni ahaana akhalanaka athiyana amoca ni weettihera saana asaanaaya ni itthokwaaya.
b 1 Timotiyu 3:10 Ciicammo, ahaana yaawehiyaka yaaphwanelelannyaaka; vano ahaana akaviheraka khampa arumi, yakhalaka wiira khaarina milattu.
c ILATARATO: Ilatarato yo moono wonthiyana, Yesu aakavihera attharyaawe ni mananna owiiyeviha; ilatarato moono wonlopwana, namakavihera mmoca o wanlokoni aakavihera amunna amoca owuuluvala.
