WUUPUWELE wiira meteorologista, awula ntthu nowehaweha uwakati, hoona mmaakinani wawe wiira nipuro ninkhalaaya atthu enci, impheela uvira iphyoo yuulupale ineehaniya naphuvu awula nkhaya. Uyo nawuupuwela itthu inhala waakhumelela ale atthwaale, ni nawiikurumica waahimyeera hinaaya waaphwanya naphuvu.

Toko meteorologista, ilelo Yehova nawaahimerya atthu wiira haavo “naphuvu” mpheela uwa, owoopiha cinene unvikana khula naphuvu nhala uhimiya wiira naawa. Yehova naahimyera cani atthu? Ni nlattuni ninlamuliyeehu ukupali wiira Yehova nawaavaha atthu ukati wootosera wiira yiitthenkace? Nihinaaya waakhula ayo makohwaayo, nttwee noopele mwaha mananna Yehova caahimenryaawe atthu khalayi hinaaya waahukhu.

Khalayi, Yehova ahohimya imaara cinci wiira aanaahala unwaana “naphuvu,” awula ihukhumu, wiira aattaruse ale yahaapheela umwiiwelela. (Miru. 10:25; Jer. 30:23) Masi khula ukati, uyo aanaahoolelihera waahimyera khalayiiru ni aanaahimya isiyani ayo yaalamuliyaaya upanka wiira athoonyere ukhala atthu oomwiiwelela Nluku. (2 Mam. 17:12-15; Nem. 9:29, 30) Wiira aasovenrihe urukunusa nrimaaya, Yehova imaara cinci aarumaka atthu yanswalela yaakhala watuninyani wiira alalyeere ihukhumu cawe. Iyo yaanawaathoonyera atthu wiira ayo yaalamuliya urukunusa nrimaaya woohipica.—Amos 3:7.

Ntthu ookhuluvelya mmoca Yehova anrumalyaawe aari Nowee. Nowee ahoviriha ukati mwinci aalalyeeraka atthu oohinamaana ni anakhirini woohoova, ni ahaahimyera wiira waapheela uwa ucara wo maaci menci. (Upha. 6:9-13, 17) Uyo aanawaahimyera itthu yaalamuliyaaya upanka wiira yoopwe. Hataa phimaana wahoolo, Nowee aheehaniya “namalalyeera isariya.”—2 Pet. 2:5.

Nowee hataa eekurumicaka, atthu yaalalyeeraawe khayaamwiiwelenle mena vakaani. Ayo khayaaminni itthu Nluku yaahimyeraawe anvarelaka nteko Nowee. Phimaana, yahokhwaaca “nihuku naawiilyaaya ucara wo maaci ni yahokhupiya otheene caya.” (Mat. 24:39; Mabere. 11:7) Khaavo ntthu aalamuliya wiira Nluku khaahimyacale.

Ukati nkiina, Yehova aahimenrye atthu wiira mpheela uwaana ihukhumu uhaleelaka ukati vakaani. Hataa ukhalaka commo, Yehova ahovaha ukati wootosera wiira atthu yiitthenkace hinaaya waaphwanya “naphuvu.” Yehova ukati waawanalyaawe Ihasara Khuumi Wiciipitu, ahaahimyera atthu khalayiiru. Wootakihera, uyo ahonveleeliha Moocesi ni Arawu wiira yanhimyere Farawoo ni anantekwaawe wiira waaseele yaanaahala uwa ihasara yonasaapa, ipula yo maluku, ni yaanaahala ukwanyulaca citthu cinci. Niireke nihuku nimoca paahi naanaahala utosa wiira atthu yiitthenkace ni atothe nipuro no wiipitha? Ibiiblya ineera: “Ananteko otheene a Farawoo yaahisima nuulumo na Yehova, wowaakuvya yahaakusa anantekwaaya ni yaahohakhela inama caya muncicini, masi otheene ule ahiiwelenle nuulumo na Yehova ahaahiya anantekwaawe ni inama cawe utakhwani.” (Nkw. 9:18-21) Khweeliini, unawoonannya wiira Yehova ahovaha ukati wootosera wiira ananteko a Farawoo yiitthenkace. Ale yiitthenkacale wowaakuvya yahopwa ni khayaaphwanyale ile ihasareele.

Farawoo ni anantekwaawe ciicammo yahohimyeriya ihinaaya waaphwanya ihasara yonakhuumi. Masi ayo yaari alolo ni khayiiwelenle. (Nkw. 4:22, 23) Yaamalenle cani? Ayo yahowoona yakhwaaka asaanaaya asilopwana yaapacenryaaya waayara. Iyo yaari ihasara yuulupale! (Nkw. 11:4-10; 12:29) Niireke ayo yahokhalana ukati wo wiiwelela ni wo wiitthenkaca? Iyee! Moocesi wowaakuvyaaca ahaahimyera  asarayeli wiira yaapheela uwa ihasara yonakhuumi ni ciicammo ahaahimyera isiyani yaalamuliyaaya upanka wiira awoopole amucyaaya. (Nkw. 12:21-28) Yoopwaale atthu akavi? Yaalikeliyaka, unawoonannya wiira atthu oopwaha 3.000.000—asarayeli, oohikhala asarayeli ni ciicammo atthu o Wiciipitu yahoopwa. Otheene ayo khayaaphwanyale ihukhumu ya Nluku ni yahokhuma Wiciipitu.—Nkw. 12:38; niwehero.

Cotheene nnyo cinthoonyera wiira Yehova ahaavaha atthu ukati wootosera wiira yiiwelele inaahimyeraawe. (Deut. 32:4) Nlattuni waapankalyaawe commo? Apostolu Peturu hohimya wiira Yehova “khaavo ntthu mpheelaawe wiira atankanyiye, masi mpheela wiira atthu otheene attharuwe.” (2 Pet. 3:9) Iyee, Yehova aanaawacera ale atthwaale. Uyo aapheela wiira ale atthwaale attharuwe ni arukunuse meetteelwaaya oohinamaana ihinaaya waaphwanya ihukhumu.—Isai. 48:17, 18; Aroo. 2:4.

Ilelo, ihaavo itthu inhimeriyaaya atthu otheene ntuninyani, ni ayo ahaana yiitthenkacaka wowaakuvya. Ukati waaryaawe watuninyani, Yesu ahohimya wiira ntuninyani ninkhaleehu anaahala ukhumelela “masakha moolupale” ni ila ituninyeela inaahala umalamalihiya. (Mat. 24:21) Uyo ahopanka inatiri inthoonyera citthu atthari a Yesu caahalaaya woona ni caahala waakhumelela waattamelaka uyo ukatyuuyo. Nhina iyo inatiriiyo, Yesu ahohimya citthu cinooneehu cikhumelelaka ntuninyani ilelo.—Mat. 24:3-12; Luka 21:10-13.

Ukhala wiira ninkhala ukati uneerannyaaya iyo inatiriiyo, Yehova nawaahimyera atthu otheene. Uyo mpheela wiira atthu otheene athanle unswalela ni umwiiwelela, kontha ale anhala upanka iyo anaahala ukhalana ukumi womaana ilelo, ni anaahala waakhela iparakha cinci upeephoni. (2 Pet. 3:13) Yehova mpheela wiira atthu yaamini inatiri cawe. Phimaana, uyo nawaavaha atthu otheene “ihapari comaana.” Yesu aheera wiira nnyo ihapari coowoopolannyo caanaahala ulalyeeriya “ntuninyani motheene munkhaliya, yahimyeriyaka atthu o khula ilapo.” (Mat. 24:14) Nluku nawaahoolela atthu ookhuluvelya anonswalela wiira alalyeere, awula, wiira yaahimyere ihapari ca Nluku atthu olapo 240. Yehova mpheela wiira atthu enci yiiwelele ile inaahimyeraawe ni wiira yoopwe ukati wo “naphuvu” ohukhumu aattamenle.—Sof. 1:14, 15; 2:2, 3.

Vano, itthu inlamuliyeehu wiikoha khunakhala wiira Yehova nawaavaha atthu ukati wootosera awula mena. Kontha, toko coonaleehu, Yehova nawaavaha ukati wootosera wiira yiiwelele inaahimyeraawe. Itthu yuulupale inlamuliyeehu wiikoha phi ila: niireke atthu anaahala umwiiwelela Nluku nna va urinaaya ukati? Yehova honivaha iparakha yo waalalyeera atthu ihapari cawe. Phimaana, wiikurumice upanka yotheene inhalaa ukhitiri wiira waakavihere atthu enci woopwa naphiyaka nihuku ninhalaaya utankanyiya ila ituninyeela!