MWAHA WOOSOMIYA 41
Uhirwee uhiya ukhala ookhuluvelya ukati wo “masakha moolupale”
“Munfente Yehova, otheene cinyu nnonvaresesa! Yehova nawaakhikicera atthu ookhuluvelya.”—ISAA. 31:23.
NCIPO 129 Eu Vou Perseverar
NINHALA WIITTHUCANI? *
1-2. a) Isiyani ahooleli o ntuninyani inhalaaya ukhuwela woohipica? b) Makohoni anlamuliya waakhuliya?
WUUPUWELE wiira ukati waawehereriya uhophiya, ni ahooleli ahokhuwela “nnema ni mpuha.” Yiithencaka, ayo anawuuluma wiira ahokhitiri ukhaliha ituninya nipuro no nnema. Ni ayo anaahala upheela wiira atthu otheene yuupuwele wiira ayo ahokhitiri umaliha masakha o ntuninyani. Masi ayo khanhala ukhitiri weemesera citthu cinhala ukhumelela woohipica! Kontha isiyani? Toko cinhimyaaya inatiri yo mbiiblyani, unaahala ‘wowaakuvya waaphwanya utankanyiya, ni ayo khanhala woopwa mena vakaani.’—1 Atesal. 5:3.
2 Ahaavo makoho anlamuliya waakhuliya: Isiyani inhala ukhumelela ukati wo “masakha moolupale”? Isiyani Yehova inhalaawe upheela wiira nipanke uyo ukatyuuyo? Ni manannani ninlamuliyeehu wiitthenkaca nenna va wiira nihirwee uhiya ukhala atthu ookhuluvelya ukati wo masakha moolupale?—Mat. 24:21.
ISIYANI INHALA UKHUMELELA UKATI WO “MASAKHA MOOLUPALE”
3. Toko cinthoonyeraaya Apokalipise 17:5, 15-18, manannani Nluku cinhalaawe umalamaliha “Ibabilooniya Yuulupale”?
3 Usome Apokalipise 17:5, 15-18. “Ibabilooniya Yuulupale” inaahala umalamalihiya! Toko cihimiyaaya wuupaceroni, ahooleli o ntuninyani khanhala ukhitiri weemesera citthu cinhala ukhumelela uyo ukatyuuyo. Kontha isiyani? Kontha “Nluku [naahala uhela] wanrimani waya wunlela wiiraneeha inuupuwelaawe.” Inuupuwelaawe ikhanle isiyani? Inuupuwelaawe ukhanle umalamaliha ittiini cowootha cotheene ntuninyani, wohihiya uttuli ittiini cineeciirela ukhala ceekristau. Nluku naahala uhela inuupuwelaawe wanrimani wo “inyaka khuumi” ni wanrimani wo “nsene nooseerya.” “Nsene” ukhanle mphwinko woothotokanihiya uneehaniya Nações Unidas, ni inyaka khuumi cikhanle ikuvernu cotheene cinkavihera nno nsenenno. (Apoka. 17:3, 11-13; 18:8) Hiiva noonaka ikuvernu cirukunuwelaka ittiini cowootha, ninaahala ucuwela wiira masakha moolupale ahancera. Uyo unhala ukhala ukati wootutusa ni unaahala waaphwanyiha masakha atthu o ntuninyani yotheene.
4. a) Isiyani ahooleli inhalaaya wuuluma wiira phinaapankiha upheela umalamaliha ittiini cowootha? b) Atthu yaari ittiini cowootha atthunaka anhala upankani?
4 Hiiva khanincuwela isiyani ahooleli inhalaaya wuuluma wiira phinaapankiha upheela umalamaliha Ibabilooniya Yuulupale. Ayo atthunaka anhala wuuluma yeeraka wiira ittiini khacinwaana nnema ntuninyani ni wiira ittiini cinawiikelakeliha cinene nsiyaasani. Awula pooti ukhala wiira ayo anhala wuuluma yeeraka ittiini cinootepa wiikhupelela mihakhu cinci ni mapuro menci. (Apoka. 18:3, 7) Atthunaka, Ibabilooniya Yuulupale yathupheliyaka, khunakhala wiira anaahala wiivakaciya atthu otheene ari mmattiinini cowootha. Khweeliini, unoonannya wiira ahooleli o ntuninyani anhala umalamaliha ittiini. Ittiini cowootha cotheene camalamalihiyaka, atthu yaari nnyo ittiininnyo anaahala woona wiira ahoolelyaaya yaari alolo. Ayo atthwaayo atthunaka anaahala wuuluma wiira ahokhuma nnyo ittiinnyo.
5. Isiyani Yehova ikhuluvelihalyaawe upanka ukati wo masakha moolupale, ni nlattuni?
5 Ibiiblya khinhimya ukati ahooleli o ntuninyani unhalaaya uviriha yakwanyulacaka ittiini cowootha. Masi ninaacuwela wiira unkookhala ukati vakaani. (Apoka. 18:10, 21) Yehova hokhuluveliha wiira naahala ‘uthikilela mahuku’ o masakha moolupale wiira ale “oothanliya” ni ciicammo ittiini yeekhweeli yoopwee. (Mark. 13:19, 20) Masi, isiyani Yehova impheelaawe wiira nirwee napanke ukhuma ukati unhalaaya upacera masakha moolupale mpaka ukati unhalaaya umala ikhotto yo Harmacetom?
UHIHIYE WEETTELA USWALI WEEKHWEELI
6. Nahiyaka weettela ittiini cowootha, isiyani-tho ninlamuliyeehu upanka?
6 Toko ciitthucaleehu nhina mwaha woosomiya uvinre, Yehova mpheela wiira ale anonswalela akhume Ibabilooniya Yuulupale. Ukhuma Ibabilooniya Yuulupale khunakhala paahi uhiya weettela ittiini cowootha. Nihaana ciicammo neettelaka ittiini yeekhweeli—awula unswalela Yehova. Nttwee noone mananna meeli ninlamuliyeehu upanka iyo.
Hataa nikhalaka ukati woorika, khaninlamuliya uhiya uthukumana (Uwehe iparaagarafu 7) *
7. a) Manannani ninlamuliyeehu ulipihaca weettela makhalelo Yehova aneeraawe wiira phiri omaana? b) Toko cinthoonyeraaya Maberewu 10:24, 25, kontha isiyani mikutthaano cihu cihaana ifayita cinene nna va?
7 Inanna yoopacera, nihaana ulipihaca weettela makhalelo Yehova aneeraawe wiira phiri omaana. Khaninlamuliya utthuna meettelo o ntuninyani. Wootakihera, hiiva ninaakhotta khula inanna yooraruwa. Toko uthelanaca alopwanaru awula athiyanaru ni wiicisiha makhalelo onthiyana unari nlopwana, awula wiicisiha makhalelo onlopwana unari nthiyana. (Mat. 19:4, 5; Aroo. 1:26, 27) Yonayeeli, nihaana uhihiya unswalela Yehova wamoca ni mayamunneehu makristau. Khaninhala uhiya upanka iyo, pooti ukhala nhina Isalau co Umwene, mmawanuwaya mayamunna ni mpaka mmwiitihoni. Hataa ikhumelelaka isiyani, khaninhala uhiya uthukumana wiira ninswalele Yehova. Khweeliini, nihaana nithukumanaka ‘utepa wanooneehu waattamela nihuku.’—Usome Maberewu 10:24, 25.
8. Manannani cinhalaaya urukunuwa wahoolo ihapari cinlalyeereehu?
8 Waphiyaka ukati wo masakha moolupale, ihapari cinlalyeereehu atthunaka cinaahala urukunuwa. Ilelo ninlalyeera ihapari comaana co Umwene ni ninawiikurumica waapanka eetthuci. Masi waphiyaka ukati wo masakha moolupale, ninhala waalalyeera atthu woohaakhuwakhuwa. Ibiiblya ineera wiira ihapari cinhaleehu waalalyeera cinhala ukhala toko ipula yo maluku oolemela cinene. (Apoka. 16:21) Atthunaka ninhala waalalyeera atthu naahimyeraka wiira ituninya ya Sotwani woohipica inaahala umalamalihiya. Waphiyaka uyo ukatyuuyo phinhaleehu ucuweleeha ihaparini cinhaleehu waalalyeera atthu, ni manannani cinhaleehu waalalyeera. Niireke ninhala ulalyeera toko cinlalyeereehu ukhuma myaakha 100 uttuli mpaka ilelo? Awula niireke ninhala ulalyeera ni mananna makiina? Ninkoocuwela iyo ukati waphiyaka. Masi, unawoonannya wiira ninaahala ukhalana iparakha yoolalyeera ihapari cohukhumu ca Yehova nilipaka nrima!—Ezek. 2:3-5.
9. Atthu o ntuninyani anhala ukhala cani nlattu wohapari cinhaleehu ulalyeera? Ni isiyani inkhuluveleehu?
9 Unawoonannya wiira ihapari cinhaleehu ulalyeera cinaahala waavirusa atthu o ntuninyani. Vano, ayo atthunaka anaahala umananiha unimaaliha wo nkwaha mmoca. Phimaana, uyo ukatyuuyo nihaana nirwaaka unkhuluvela Yehova. Ilelo, Yehova naanikavihera wiira nikhitiri ulalyeera ihapari comaana. Ni ninaakhuluvela wiira wahoolo, Nluku ciicammo naahala univaha ikuru wiira nipanke itthu innirumaawe.—Mik. 3:8.
WIITTHENKACE AHINAAYA UTUPHELIYA APOOVU A NLUKU
10. Toko cinthoonyeraaya inatiri ya Luka 21:25-28, atthu enci ankookhala cani ukati wo masakha moolupale?
10 Usome Luka 21:25-28. Waphiyaka ukati wo masakha moolupale, atthu unaahala waawerya nrima cinene. Ayo anaahala woona wiira citthu co ntuninyani cotheene caakhuluvelaaya cihancera umalamalihiya. Ayo anaahala ukhala ni “masukhuli” ni anaahala woova ukhwa ukati woorika cinene uhinatoko thanku wiirannya ukhuma ukati wumpiyaaya apinaatamu. (Sof. 1:14, 15) Ule ukatyuule, atthunaka makhalelo anaahala urika cinene, ni mpaka ciicammo ale anonswalela Yehova anaahala waarikela makhalelo. Ukhala wiira khanimpanka mphantte wotuninya, atthunaka anaahala uniphwanya marikariko. Pooti ukhala wiira cinaahala unithwa citthu cikiina.
11. a) Nlattuni Masaahiti a Yehova unhalaaya urukunuweliya naatthu o ntuninyani? b) Nlattuni uhinlamuliyeehu woova ukati wo masakha moolupale?
11 Uhaavo ukati atthu yaari mmattiinini cowootha unhalaaya woona wiira ittiini yo Masaahiti a Yehova nanlelo ihaavo. Iyo itthwiiyo inaahala waavirusa atthu. Wuupuwele mananna atthu cinhalaaya uttakutta ni unuuluma pusya wamalakuni ni mpaka ciicammo mwinternetini. Atthu o ntuninyani ni hataa ciicammo nhoolelyaaya, Sotwani, anaahala ukasiriya cinene nlattu hiivano wookhala ittiini imoca paahi ihanle. Kontha ayo anaahala woona wiira ahoocyeela umalamaliha ittiini cotheene watuninyani. Nlattu wo iyo, otheene caya anaahala unirukunuwela hiivano. Uyo phuukati ayo unhalaaya ukhala Gogue o uMagogue. * Ayo anaahala uthukumana wiira yaatuphele apoovu a Yehova. (Ezek. 38:2, 14-16) Iyo atthunaka inaanikhaliha ni masukhuli, ni ninaatepa ukhala ni masukhuli nlattu woohicuweleeha citthu cotheene cinhala wiirannya. Masi nihaana nikupaliki ila itthwiila: khaninlamuliya woova masakha moolupale. Yehova naahala univaha malakihero anhala woopola ukumiihu. (Isaa. 34:19) Waphiyaka uyo ukatyuuyo, hiiva ninaahala ‘uvusa nru,’ kontha ninaahala ucuwela wiira “woopoliya [wihu] uri mowaattamela.” *
12. Isiyani “ipottha yookhuluvelya ni yankhili” impankaaya wiira initthenkace nihinaphiya nihuku na Yehova?
12 Ukhuma nenne no khalayi, “ipottha yookhuluvelya ni yankhili” inaanitthenkaca wiira nirwee nakhale ookhuluvelya ukati wo masakha moolupale. (Mat. 24:45) Iyo ipottheeyo inaanitthenkaca ni mananna menci, masi wuupuwele inanna imoca: ikonkreesu yo 2016, 2017 ni yo 2018. Khula ikonkreesu ihoopela mwaha cinene ikhalelo ninlamuliyeehu ukhalana wiira noopwe naphiyaka nihuku na Yehova. Nttwee nuupuwele vakaani ayo makhalelwaayo.
ULIPIHACE UVARESESA WAA, UVILELA WAA NI ULIPA NRIMA WAA
Wiitthenkace nenna va wiira woopwe ukati wo “masakha moolupale” (Uwehe iparaagarafu 13-16) *
13. Isiyani inhala unikavihera ulipihaca unvaresesa wihu Yehova, ni nlattuni ninlamuliyeehu upanka iyo nenna va?
13 Uvaresesa: Mwaha wokonkreesu yo 2016 waari “Uhihiye Unvaresesa Yehova!” Iyo ikonkreeswiiyo ihoniitthuciha wiira, itthu inhala unikavihera unvaresesa Yehova, ukhanle ukhalana upatthani woolipa ni uyova. Myaha caataphuleliya wakonkreesuni cihothoonyera wiira ninlipihaca upatthaniihu ni Yehova nalompaka ni nrimeehu wotheene ni nasomeehaka Ibiiblya. Ulompa ni usoma Ibiiblya phinnivaha ikuru cimpheeleehu wiira nikhitiri uvilela masakha oorika cinene. Ukati ituninya ya Sotwani unviraaya itepaka waattamela umwiiso, ninaaweherera unikhumelela citthu cinhala unirikihela unvaresesa Yehova ni Umwennyaawe. Atthunaka ninaahala utarawaciya cinene, venci-venci nlattu woohikelakela isiyaasa. (2 Pet. 3:3, 4) Napheela urwaa unvaresesa Yehova waphiyaka ukati wo masakha moolupale, nihaana nilipihacaka unvaresesa wihu nenna va.
14. a) Isiyani inhala waakhumelela mayamunna anaawacera apoovu a Yehova watuninyani? b) Kontha isiyani nihaana nithoonyeraka uvaresesa wihu waphiyaka uyo ukatyuuyo?
14 Ilelo, Mphwinko wo Mahumu Unhoolela phinaawacera apoovu a Yehova watuninyani. Masi, anancenre masakha moolupale, unaahala uphiya ukati mayamunna o Mphwinko wo Mahumu Unhoolela uhinhalaaya ukhala watuninyani va. Makristau oothanliya otheene anaahala uthukumanihiya wiirimu wiira akavihere ukhottoni yo Harmacetom. (Mat. 24:31; Apoka. 2:26, 27) Masi mphwiko muulupale nanlelo unaahala ukhala woothotokanihiya. Mayamunna oocuwelaca ahikhanle makristau oothanliya anaahala waawacera apoovu a Yehova. Waphiyaka uyo ukatyuuyo, nihaana nithoonyeraka uvaresesa wihu. Nihaana nirwaaka waakavihera ayo mayamunnaayo ni utthara malakihero anhalaaya uvahiya ni Nluku. Napankaka commo phinhaleehu woopwa!
15. Isiyani inhala unikavihera ulipihaca uvilela wihu, ni nlattuni ninlamuliyeehu upanka iyo nenna va?
15 Uvilela: Mwaha wokonkreesu yo 2017 waari “Uhoocyeele!” Iyo ikonkreeswiiyo ihonilipiha wiira nikhitiri uvilela masakha. Niheetthuca wiira uvilela khinakhala ikhalelo inthoonyereehu citthu cotheene caneettelaka saana. Itthu inhala unikavihera ulipihaca uvilela wihu ukhanle unkhuluvela Yehova. (Aroo. 12:12) Khaninlamuliya uliyala itthu Yesu ikhuluvelihalyaawe: “Ule nvilela mpaka umwiiso, phinhala woopwa.” (Mat. 24:13, niwehero) Itthu ikhuluvelihalyaawe Yesu inthoonyera wiira khaninlamuliya uhiya uvilela, hataa yanikhumelelaka masakha. Navilelaka masankiho otheene ilelo, ninaahala utepa ulipa wiira nihoocye ukati unhalaaya wancera masakha moolupale.
16. Ulipa nrima weekhweeli ninkhalana cani? Isiyani ninlamuliyeehu upanka wiira nilipihace unkhuluvela wihu Yehova nna va?
16 Ulipa nrima: Mwaha wokonkreesu yo 2018 waari “Ulipe Nrima!” Iyo ikonkreeswiiyo ihonuupusera wiira ulipa nrima khaninkhalana nlattu woocuwelaca wihu. Toko uvilela, ulipa nrima weekhweeli ninkhalana nankhuluvelaka Yehova. Isiyani ninlamuliyeehu upanka wiira nilipihace unkhuluvela wihu Yehova? Nihaana nisomaka Ibiiblya khula nihuku ni ukumiha ukati wiira nuupuwele mananna Yehova caawooponlyaawe apoovwaawe khalayi. (Isaa. 68:20; 2 Pet. 2:9) Atthu o ntuninyani yanirukunuwelaka ukati wo masakha moolupale, nihaana nirwaaka ulipa nrima ni unkhuluvela Yehova cinene khampa cihinapaceehu unkhuluvela. (Isaa. 112:7, 8; Mabere. 13:6) Nankhuluvelaka Yehova nna va, ninaahala ukhitiri ulipa nrima wiira nalipe ukati unhaleehu utupheliya ni Gogue. *
UWEHERERE WOOPOLIYA
Yesu ni anatoropaawe o wiirimu woohipica anaahala waana ikhotto yo Harmacetom ni anaahala waamalamaliha awanani a Nluku otheene! (Uwehe iparaagarafu 17)
17. Kontha isiyani khaninlamuliya woova ikhotto yo Harmacetom? (Uwehe ilatarato iri wakaapani.)
17 Toko ciitthucaleehu nhina mwaha woosomiya uvinre, enci iriyariihu, ninkhala mahuku ookhicera ikhumelo iyareliyo. Hiiva ciicammo ninaaweherera woopwa ukati wo masakha moolupale. Ikhotto yo Harmacetom phinhala umalihaca ila ituninyeela. Masi khaninlamuliya woova. Kontha isiyani? Kontha Harmacetom ikhanle ikhotto ya Nluku, kahi thi hiiva ninhala waana iyo ikhottweeyo. (Miru. 1:33; Ezek. 38:18-20; Zakar. 14:3) Yehova arumaka, Yesu Kristu naahala waahoolela anatoropa a Nluku wiira yaane ikhotto. Nkhayi ni Yesu, anaahala ukhala oothanliya anunwelelihiya wiira arwee yakhale wiirimu ni ciicammo anaahala ukhala malayikha. Otheene caya anaahala umwaattakanana Sotwani, maciinnyaawe ni anatoropaawe o watuninyani.—Dan. 12:1; Apoka. 6:2; 17:14.
18. a) Isiyani Yehova ikhuluvelihalyaawe? b) Apokalipise 7:9, 13-17, inookavihera cani ukhuluvela wiira unaahala woopwa?
18 Yehova hokhuluveliha: “Khiivo ikaruma yokhotto ipankiye wiira uhasaraniye inhala wuukhitiri.” (Isai. 54:17) “Mphwinko muulupale” wo atthu ookhuluvelya anonswalela Yehova anaahala ‘ukhuma mmasakhani moolupale’ nuukumi! Ni otheene caya khanhala uhiya unvarela nteko Nluku. (Usome Apokalipise 7:9, 13-17.) Unaareera woona wiira Ibiiblya inaanikavihera cinene ukhuluvela wiira ninaahala woopwa! Hiiva ninaacuwela wiira “Yehova nawaakhikicera atthu ookhuluvelya.” (Isaa. 31:23) Otheene ale anonfenta ni anonttottopela Yehova unaahala waatteela nrima cinene yoonaka ncina nawe nireerihiyaka wiira nihiye woothaceriya.—Ezek. 38:23.
19. Itthuni yooreera inweherereehu uhoolo?
19 Wuupuwele 2 Timotiyu 3:2-5. Iyo iveeruswiiyo yaahala ukhala cani waari wiira inwuuluma atthu anhala ukhala upeephoni, oohihooleliya ni Sotwani? (Uwehe ikwaaturu “ Mananna atthu cinhalaaya ukhala upeephoni.”) Munna George Gangas, * aavanre nteko nhina Mphwinko wo Mahumu Unhoolela, aheera co: “Khweeliini, ila ituninyeela inhala ukhala nipuro nooreera ukati unhalaaya atthu otheene unswalela Yehova! Woohipica, weeva unaahala ukhalana iparakha yookhala upeephoni. Weeva unaahala ukhalana ukumi toko ukumi urinaawe Yehova. Ninaahala ukhalana ukumi woohimala.” Khweeliini, iyo ikhanle itthu yooreera inweherereehu!
NCIPO 122 Vamos Continuar Firmes!
^ par. 5 Hiiva ninaacuwela wiira woohipica, ntuninyani anaahala ukhumelela “masakha moolupale.” Waphiyaka uyo ukatyuuyo, isiyani inhala waakhumelela atthu anonswalela Yehova? Isiyani Yehova inhalaawe upheela wiira nipanke? Makhaleloni ninlamuliyeehu uthoonyera nenna co wiira nalipe ukati wo masakha moolupale? Ala phi makoho anhaleehu waakhula nhina ula mwahoola.
^ par. 11 NUULUMO NOOTAPHULELIYA: Nuulumo Gogue o uMagogue (awula Gogue) ninaaca nkupitti, awula ikhurupu yo atthu olapo co ntuninyani anhala waarukunuwela apoovu a Nluku ukati wo masakha moolupale.
^ par. 11 Wapheela wiiweeha citthu cinhala ukhumelela ihinancera ikhotto yo Harmacetom, uwehe ilivuru O Reino de Deus já Governa!, ikapiitulu 21. Wapheela wiiweeha mwaha wa Gogue o uMagogue waatuphela apoovu a Yehova ni mananna Yehova cinhalaawe uwaakiha apoovwaawe ukhottoni yo Harmacetom, uwehe ilivuru A Adoração Pura de Jeová É Restaurada!, ikapiitulu 17 ni 18.
^ par. 16 Mwaha wokonkreesu yo 2019 uneera “Nifento Khanimmala.” Iyo ikonkreeswiiyo inaanithoonyera wiira Yehova naanikhikicera ni naanifenta.—1 Akor. 13:8.
^ par. 19 Uwehe mwaha “‘Suas obras o seguirão’” nhina irevista A Sentinela 1 yo Dezembro yo 1994.
