MWAHA WOOSOMIYA 37
Mmwiiwelele niiraati Yehova
“Niireke hiiva khanaalamuliya uwiiwelela niiraati Apaapeehu?”—MABERE. 12:9.
NCIPO 9 Jeová É o Nosso Rei
NINHALA WIITTHUCANI? *
1. Nlattuni ninlamuliyeehu umwiiwelela Yehova?
YEHOVA khanle Mpattusiihu. Phimaana, uyo haana isariya yoohimya isiyani ikhanle itthu yomaana ni yoohinamaana. Ni ukhala wiira Nluku phinumpale, hiiva nihaana nimwiiwelelaka *. (Apoka. 4:11) Masi ciicammo nihaana nimwiiwelelaka Yehova nlattu wo itthu ikiina: kontha mananna uyo cinlamulelaawe akhanle omaana. Ukhuma nenne no khalayi, ikuvernu ceepinaatamu cinci cihokhalana ikuru ni ukhulupale wiira caahoolele atthu. Masi nalattanihaka ikuvernu ceepinaatamu ni ikuvernu ya Yehova, unawoonannya wiira Yehova phikhanle nhooleli oocuwelaca cinene, nanifento, nakiriri ni namaana waapwaha ahooleli akhwaawe otheene.—Nkw. 34:6; Aroo. 16:27; 1 Jo. 4:8.
2. Toko cinthoonyeraaya Maberewu 12:9-11, nlattuni ninlamuliyeehu umwiiwelela Yehova?
2 Yehova khampheela wiira nimwiiwelele nlattu woomoova. Masi, uyo mpheela wiira nimwiiwelele nlattu wonfenta ni nlattu woomoona ukhala Apaapeehu oofenta. Paulu nhina iwarakha yaawantikhenlyaawe maberewu, naahimya wiira nihaana “uwiiwelela niiraati Apaapeehu” kontha iyo ‘inaaniphwanyiha ifayita.’—Usome Maberewu 12:9-11.
3. a) Manannani cinhaleehu uthoonyera wiira ninaamwiiwelela Yehova? b) Makohoni anhala waakhuliya nhina ula mwahoola?
3 Manannani cinhaleehu uthoonyera wiira ninaamwiiwelela Yehova? Inanna yoopacera, ukhanle wiikurumica umwiiwelela nhina wo citthu cotheene. Yonayeeli, ukhanle ukhotta ‘ukhuluvela ankhiliihu.’ (Miru. 3:5) Itthu imoca inhala unikavihera umwiiwelela Yehova ukhanle ucuwela makhalelwaawe omaana. Kontha isiyani? Kontha ayo makhalelwaayo phimmwiiriha Yehova upanka citthu cotheene cimpankaawe. (Isaa. 145:9) Nancuwelaka Yehova, ninaahala utepa unfenta. Ni nanfentaka, khaninhala utotha wiira nantikheliye ikettelo cinci co citthu cinlamuliyeehu upanka ni cihinlamuliyeehu upanka. Uhiya commo, ninawiikurumica wiira nuupuwele ni niwehere citthu khampa Nluku, ni wiira nihipanke itthu yoohinamaana. (Isaa. 97:10) Masi ukati nkiina, umwiiwelela Yehova pooti unirika. Kontha isiyani unaanirika? Ni isiyani mahumu o wanlokoni, mayapaapa ni mayamaama ineetthucaaya ni ntakihero na nhooleli Nemiya, na mwene Davidi ni na Mariya, anumwaane Yesu? Ula mwahoola, unaahala waakhula ala makohwaala.
KONTHA ISIYANI UNAARIKA UMWIIWELELA YEHOVA?
4-5. Toko cinthoonyeraaya Arooma 7:21-23, kontha isiyani pooti unirika umwiiwelela Yehova?
4 Itthu imoca inthoonyera nlattuni unnirikaaya umwiiwela Yehova phi ila: kontha otheene cihu nihoruleliya matampi ni naatthu oopahuwa. Nhina wihu nihaana itthu innikakhelela uhimwiiwelela Nluku. Ukati Atamu ni Hawa wahaamwiiwelenlyaaya Nluku ni waalilyaaya nhokorokho waakhottihiye, ayo yahothoonyera wiira yaapheela ulakela veekha caya isiyani ikhanle itthu yomaana ni yoohimaana. (Upha. 3:22) Ni ilelo, atthu enci anaakupali uhimwiiwelela Yehova wiira atthare citthu cilakenlyaaya.
5 Mpaka ale anoncuwela ni anonfenta Yehova pooti ciicammo waarika umwiiwelela. Apostolu Paulu wahonrika umwiiwelela Yehova. (Usome Arooma 7:21-23.) Toko Paulu, otheene cihu ninaapheela upanka itthu Yehova inoonaawe ukhala yomaana. Unookhalaru commo, ukati wotheene nihaana niikurumicaka wiira nihipanke itthu yoohinamaana.
6-7. Itthuni-tho ikhwaawe innirikihela umwiiwelela Yehova? Utakihere.
6 Itthu ikhwaawe innirikihela umwiiwelela Yehova pooti ukhala makhalelo o nipuro nuunuwenleehu. Moopuwelelo menci aapinaatamu anaavirikana cinene ni moopuwelelo a Yehova, ni ukati nkiina nihaana niikurumicaka wiira nihiye ayo moopuwelelwaayo. Woone ntakihero nimoca.
7 Mapuro makiina, amirawo anaakhanyererihiya wiikurumica wiira aphwanye nsurukhu mwinci. Iyo phi itthu yankhumelenle nrokorihu mmoca neehaniya Maria. * Hinaaya wiitthuca ikhweeli, uyo aasomale wuuniversidade yuulupale yolapo inkhalaawe. Amucyaawe Maria yaanankhaca wiira aphwanye nteko woopokheriya nsurukhu mwinci. Ni Maria ciicammo aanaapheela iyo. Masi, ukati wancenryaawe usoma Ibiiblya ni weetthucalyaawe unfenta Yehova, Maria ahorukunusa itthu yaapheelaawe muukumini wawe. Hataa wakhalaka commo, uyo neera: “Ukati nkiina, kinawoonaka mananna oophwanya nteko wonsurukhu mwinci. Masi kinaacuwela wiira nteko commo, waanaahala ukirikihela unswalela Yehova toko cinonswalelaaka nna va. Nlattu wo mananna cuunuwihiyaaka, unaakirika ukhotta. Kihaana kinlepelaka Yehova wiira uyo akikavihere ukhotta nteko woohala ukirikihela unswalela.”—Mat. 6:24.
8. Isiyani impheeleehu woopela mwaha?
8 Toko cihimiyaaya wuupaceroni ula mwahoola, umwiiwelela Yehova unaaniphwanyiha ifayita. Masi ale arina ukhulupale vakaani, toko mahumu, mayapaapa ni mayamaama, ahaana ciicammo yamwiiwelelaka Nluku nlattu wo itthu ikiina: nlattu ayo pooti waaphwanyiha ifayita atthu akhwaawe. Nttwee noopele mwaha matakihero o mbiiblyani anniitthuciha mananna oovarela nteko ratta ukhulupale urineehu wiira nintteelihe nrima Yehova.
ISIYANI MAHUMU INEETTHUCAAYA NI NTAKIHERO NA NEMIYA?
Mahumu anaakavihera miteko cinvariya Usalau yo Umwene, toko Nemiya caakavihenryaawe utekiya isiri co uYerusalemu (Uwehe iparaagarafu 9-11) *
9. Marikarikoni Nemiya yamphwanyalyaawe ukati waaphiilyaawe uYerusalemu?
9 Yehova haavaha mahumu nteko muulupale 1 Pet. 5:2) Mahumu pooti wiitthuca cinene ni mananna Nemiya caawaceraawe apoovu a Nluku. Khampa nhooleli o uYuuta, Nemiya ahaana ukhulupale. (Nem. 1:11; 2:7, 8; 5:14) Wuupuwele marikariko yaarinaawe Nemiya. Uyo ahoona wiira ayuuta khayaahisima itempulu ni khayaavaha micanko coohala waakavihera malevita toko Nlamulo naarumaaya. Uhiya iyo, ayuuta ciicammo khayaatthara nlamulo no Isaapatu, ni yahaavo ayuuta yaathenle athiyana olapo cikiina. Isiyani nhooleli Nemiya yaahalaawe upanka ule ukati woorikoole?—Nem. 13:4-30.
cinene: waawacera apoovwaawe. (10. Isiyani Nemiya yaapankalyaawe wiira aanane marikariko yaarinaawe?
10 Nemiya khaavarenle nteko pusya ukhulupale waarinaawe wiira aakhanyererihe apoovu a Nluku utthuna miruku cawe. Uhiya commo, uyo ahonlompa Yehova ni aholepela ukaviheriya. Uyo ciicammo ahowiitthuciha apoovu Nlamulo na Yehova. (Nem. 1:4-10; 13:1-3) Uhiya iyo, Nemiya ciicammo ahiiyeviha ni ahovara nteko wamoca naayuuta akhwaawe ukati waatekiyaaya isiri co uYerusalemu.—Nem. 4:15.
11. Toko cinthoonyeraaya 1 Atesalonika 2:7, 8, manannani mahumu cinlamuliyaaya waawacera mayamunna o wanlokoni?
11 Mahumu pooti uhaakhumelela marikariko mamocaaru ni ale yankhumelenle Nemiya, masi ayo pooti untakiha Nemiya ni mananna menci, toko wiikurumica cinene wiira yaakavihere mayamunnaaya ni asirokoraya o wanlokoni. Ni ayo khaneecoona ukhala oolupale waapwaha akhwaaya nlattu wookhulupale urinaaya. Uhiya commo, ayo anaawacera ratta nloko. (Usome 1 Atesalonika 2:7, 8.) Ukhala wiira anawiiyeviha ni anaathoonyera khweeliini ufenta, mahumu anaawuulumana ratta akhwaaya. André, munna khanle humu nenne no khalayi, neera: “Kihoona wiira, humu aathoonyeraka unamaana ni waawacera ratta akhwaawe, iyo inawaatteeliha nrima mayamunna. Ayo makhalelwaayo anawaasovenriha mayamunna o wanlokoni waakavihera mahumu.” Tomás, munna nkiina khanle humu nenne no khalayi, neera: “Mi kinaamananiha weettela ikano iri nhina Afilipo 2:3 ni khula ukati wiikurumica waawehera akhwaaka ukhala oolupale ukipwaha miiva. Iyo inaakikavihera uhaakhanyereriha ukiiwelela.”
12. Nlattuni mahumu anlamuliyaaya wiiyeviha?
Isaa. 18:35; 113:6, 7) Hataa phimaana Yehova ananrusa atthu owiithenca ni owiicoona.—Miru. 16:5.
12 Mahumu anlamuliya wiiyeviha, toko Yehova cineeyevihaawe. Yehova hataa akhalaka Nkhulupale ntuninyani motheene, uyo “nawooroma” ni “naamunwusa wantthupini ule neeyeviha.” (13. Kontha isiyani humu haana ‘avaracaka nlimi nawe’?
13 Humu nomwiiwelela Yehova haana ‘avaracaka nlimi nawe.’ Wakhalaka wiira khaneevaraca, ukati uhinhisimiyaawe uyo pooti wuuluma citthu coohiloka woohuupuwela. (Tiya. 1:26; Akalas. 5:14, 15) André, romoliye, neera: “Ukati nkiina, kinaapheelaka umuulumela citthu cootakhala munna nomoonaaka wiira khakihisimale. Masi mi kihoopuwela ntakihero naalopwana ookhuluvelya anoolumiya mbiiblyani, ni iyo ihokikavihera woona nlattuni unreeraaya wiiyeviha ni ukhala ntthu owaatanannya.” Phimaana, humu mmoca apheelaka uthoonyera wiira naamwiiwelela Yehova, uyo haana athoonyeraka nifento ni unamaana ukati woowuulumana mayamunna o wanlokoni, ni hataa ciicammo mahumu makhwaawe.—Akol. 4:6.
ISIYANI MAYAPAAPA INEETTHUCAAYA NI NTAKIHERO NA MWENE DAVIDI?
14. Ntekoni mayapaapa uvahiyaaya, ni isiyani Yehova inwehereraawe wiira ayo apanke?
14 Yehova haavaha mayapaapa nteko wookhala ahooleli otthoko, ni noweherera wiira ayo awiitthucihe ni yaalake asaanaaya. (1 Akor. 11:3; Efesu 6:4) Masi ukhulupale urinaaya mayapaapa unaavelavela. Yehova phiri Mpattusi otthoko, phimaana mayapaapa anaahala uhukhumwiya ni Yehova nhina mananna cinaawaceraaya amucyaaya. (Efesu 3:14, 15) Yapheelaka uthoonyera wiira anaamwiiwelela Yehova, mayapaapa ahaana yavarelaka nteko ukhulupalyaaya ni mananna oohala unciveliha Nluku. Mayapaapa pooti wiitthuca cinene yasomaka makhalelo a mwene Davidi.
Mananna cinlompaaya mayapaapa ahaana yaathoonyeraka amucyaaya wiira ayo atthu owiiyeviha (Uwehe iparaagarafu 15-16) *
15. Ntakiheroni nomaana mwene Davidi naavahalyaawe mayapaapa?
15 Uhiya paahi ukhala nhooleli o watthokoni wawe, Davidi ciicammo ahovahiya ni Yehova nteko wookhala nhooleli olapo yo Isarayeli yotheene. Nlattu wookhala mwene, Davidi ahaana ukhulupale. Ukati nkiina, uyo khaavarenle nteko ratta ukhulupalyaawe ni ahovara matampi moolupale. (2 Sam. 11:14, 15) Masi Davidi ahothoonyera wiira naamwiiwelela Yehova ni aanaatthuna ulakiya. Ukati woolompa, uyo aananhimyera Yehova yotheene yaarinaawe wanrimani ni aanawiikurumica upanka yotheene yaakhitiryaawe wiira eettele ikano ca Yehova. (Isaa. 51:1-4) Uhiya commo, Davidi aanawiiyeviha cinene ni aanaatthuna kahi paahi ikano caavahiyaawe naalopwana, masi ciicammo caavahiyaawe naathiyana. (1 Sam. 19:11, 12; 25:32, 33) Davidi aheetthuca ni citthu caavonyaawe ni ahohoolelihera unswalela Yehova muukumini wawe.
16. Citthuni mayapaapa cineetthucaaya ni Davidi?
16 Mwakhala wiira mwaayari, nyuuva pooti wiitthuca cinene ni ntakihero na Davidi. Nhivarele nteko pusya ukhulupale uvahiyeenyu ni Yehova. Nkupali wiira nnaavonyaka ni, ntthu oovahakani ikano yo mbiiblyani, nhikhotte iyo ikannweeyo. Mwapanka commo, amuciinyu anaahala wuuhisimani nlattu nyuuva wookhala ntthu owiiyeviha. Ukati woolompa wamoca naamuciinyu, munhimyere Yehova yotheene irineenyu wanrimani, ni amuciinyu anaahala woona wiira nyuuva nnaapheela cinene ukaviheriya ni weettiheriya ni Yehova. Ni venci-venci, nhoolelihere muukumini winyu unswalela Yehova. (Deut. 6:6-9) Ni nhiliyale wiira itthu yuulupale cinene inlamuliyeenyu waavaha amuciinyu nikhanle ntakihero ninyu.
ISIYANI MAYAMAAMA INEETTHUCAAYA NI NTAKIHERO NA MARIYA?
17. Ntekoni Yehova waavahalyaawe mayamaama?
17 Yehova haavaha mayamaama nteko wofayita cinene watthokoni: waahoolela asaana. (Miru. 6:20) Khula itthu mayamaama impankaaya awula inuulumaaya pooti urukunusa cinene makhalelo aasaanaaya. (Miru. 22:6) Moone itthu mayamaama ineetthucaaya ni ntakihero na Mariya, anumwaane Yesu.
18-19. Mayamaama aneetthuca isiyani ni ntakihero na Mariya?
18 Mariya aanaacuwela ratta-raatta Cowantikhiya. Mariya aananhisima cinene Yehova ni ahokhalana upatthani woolipa ni uyo. Mariya ahotthuna niiraati upanka yaapheelaawe Yehova, hataa acuwelaka wiira makhalelwaawe yaanaahala urukunuwa cinene.—Luka 1:35-38, 46-55.
Mayamaama yoocaaka awula yarusiyaka, ahaana wiikurumica wiira yaathoonyere nifento amucyaaya (Uwehe iparaagarafu 19) *
19 Mwakhala wiira nyuuva mwaathiyana ni nhaana asaana, ahaawo mananna menci ontakiha Mariya. Inanna yoopacera ukhanle uwacera upatthaniinyu ni Yehova. Mwiisomihe Ibiiblya ni ciicammo nlompe veekha cinyu. Yonayeeli, ntthune niiraati urukunusa makhalelweenyu wiira muncivelihe Yehova. Wootakihera, atthunaka asithumwaninyu owuunuwihaleni khayaapica uviruwa ni yaanawaacacera cinene asaanaaya. Pooti ukhala wiira nyuuva muunuwale muupuwelaka wiira waapanka asaana commo khuntakhala. Masi ukati wiitthucaleenyu mananna Yehova mpheelaawe wiira ayari yaawacere asaanaaya, nyuuva atthunaka unawuurikelani uhaaviruwela. Ni wakhalaka wiira asaaniinyu ahothuka pusya awula nyuuva moocaaka, pooti utepa wuurikani waavilela. (Efesu 4:31) Uyo ukatyuuyo, nyuuva nhaana nlompaka wiira Yehova ookavihereni. Athiyana amoca aneehaniya Lídia aneera: “Ukati nkiina, mwanaka aahikiiweleleke, miiva kahaana kilompaka cinene wiira kihincacere. Uhaavo ukati weemesenryaaka wuuluma ni unlompa Yehova wiira akikavihere. Ulompa waanaakikavihera ukhala oomaala.”—Isaa. 37:5.
20. Itthuni inaarikela mayamaama akiina, ni manannani cinhalaaya ukhitiri umaliha iyo?
20 Itthu ikhwaawe inaarikela mayamaama akiina ukhanle waathoonyera asaanaaya wiira anawaafenta. (Titu 2:3, 4) Mayamaama akiina yuunuwenle watthokoni wahaawaceriyaaya ratta naasithumwanaya. Wakhala wiira iyo phiitthu yuukhumelenleni, nyuuva khamunlamuliya waatakiha asithumwaninyu. Phimaana, nyuuva nhaana mmwiiwelelaka Yehova ni wiitthuca mananna owaathoonyera nifento asaaniinyu. Atthunaka unawuurikelani urukunusa moopuwelelweenyu ni makhalelweenyu. Masi nyuuva pooti ukhitiri urukunusa! Ni ayo marukunuswaayo anaahala wuukaviherani ni waakavihera amuciinyu.
NHIHIYE UMWIIWELELA YEHOVA
21-22. Toko cinthoonyeraaya Isaiya 65:13, 14, umwiiwelela Yehova umphwanyiha ifayitani?
21 Mwene Davidi aanaacuwela ifayitaaya umwiiwelela Yehova. Uyo heera: “Cooruma ca Yehova cikhanle cosariya, cinaatteeliha nrima; marumo a Yehova akhanle ooreera, anaapankiha meetho woonnyeela. Nimalamulwaa, nantekwaa naacuwelihiya coohoolo; weettela ayo malamulwaayo, unaaphwanyiha itthuvo yuulupale.” (Isaa. 19:8, 11) Ilelo, ninaakhitiri woona mananna cinvirikanaaya ale ammwiiwelela Yehova ni ale ankhotta ikano cawe. Ale athanlale umwiiwelela Nluku ‘anaakhuwela anatteeliye nlattu wookhalana ineema wanrimani waya.’—Usome Isaiya 65:13, 14.
22 Mahumu, mayapaapa ni mayamaama yamwiiwelelaka Yehova niiraati, anaakhalana makhalelo omaana, amucyaaya anaakhala ootteeliya ni nloko ninaatepa wiiwanana. Venci-venci, ayo ananteeliha nrima Yehova. (Miru. 27:11) Iparakhani ikhwaawe yaahala unitteeliha nrima uvikana ila?
NCIPO 123 Obedecemos a Jeová e à Sua Organização
^ par. 5 Ula mwahoola unaahala uthoonyera nlattuni ninlamuliyeehu umwiiwelela Yehova. Ciicammo unaahala uwoopela mwaha otheene ale arina ukhulupale—mahumu, mayapaapa ni mayamaama—isiyani ineetthucaaya ni nhooleli Nemiya, mwene Davidi ni Mariya, anumwaane Yesu.
^ par. 1 MOOLUMO OOTAPHULELIYA: Atthu enci yakhanyererihiyaka wiira ahaana umwiiwelela ni untthunela ntthu, khunaacivela. Masi ale anonswalela Nluku ahoothanla umwiiwelela, khakhanyererihiye. Phimaana, unawaacivela wiiwelela.
^ par. 7 Macina makiina aromoliye nhina ula mwahoola ahaakakhanihiya.
^ par. 62 ILATARATO: Humu mmoca akaviheraka urehererya Isalau yo Umwene wamoca ni mwanawe, toko Nemiya caakavihenryaawe utekiya isiri co uYerusalemu.
^ par. 64 ILATARATO: Nnyari nlopwana anlompaka Yehova ni nrimaawe wotheene wamoca naamucyaawe.
^ par. 66 ILATARATO: Mwammirawo hoviriha ukati mwinci eeraka ijogo ni khamalihale umpanka TPC oocikola ni citthu caarumiyaawe naanumwaane. Anumwaane ahokolyaale untekoni anoocyaale, ananlaka anamaalale awula woohincacera.