1. Marikarikoni apostolu Joau yaarinaawe mwaakha wo 95?

MWAAKHA wo 95, waari ukati wonrikela cinene apostolu Joau. Uyo ahooluvala cinene, ahotthukiya uPatmu ni atthunaka uyo veekha phaari apostolu aahanle nkumi. (Apoka. 1:9) Uyo aanaacuwela wiira alupatthi yaanawiitthuciha citthu cowoothiya ni yaanawaakawaniha makristau mmalokoni. Waakhala toko wiira, woohipica, makristau eekhweeli yaanaahala umalamala.—Yuda 4; Apoka. 2:15, 20; 3:1, 17.

2. Toko cinthoonyeraaya ilivuru ya Apokalipise 7:9-14, iwoonini yootikhiniha yaakhalannyaawe Joau? (Uwehe ilatarato iri wakaapani.)

² Iriyari wo marikariko otheene ayo, Joau ahokhalana iwooni yootikhiniha yaathoonyera citthu caahala wiirannya uhoolo. Nhina iyo iwooniiyo, malayikha anaarumiya uvarelela niikuru cinene iphyoo cinhala ukwanyulaca ituninya. Anaarumiya uhihiya nnyo iphyonnyo wiira ahipacere masakha moolupale, mpaka wanhalaaya umaliheriya uthanliya ikhurupu yopottha. (Apoka. 7:1-3) Iyo ikhurupwiiyo ikhanle ya atthu 144.000 anhala urwaa ulamulela nkhayi ni Yesu wiirimu. (Luka 12:32; Apoka. 7:4) Vano, Joau nawoona ikhurupu ikhwaawe, yuulupale cinene mpaka uyo nawiira co: “Mi kihoona mphwinko muulupale, ni khaavo pinaatamu aakhitiri waalikela, wo atthu olapo, o mahimo, o maloko ni oluuka cotheene, aneemenle uhoolo wohice ni uhoolo waya Mwaakhontwaa.” (Usome Apokalipise 7:9-14.) Wuupuwele mananna Joau caakhanlyaawe ootteeliya nlattu woocuwela wiira, wahoolo, atthu enci yaanaahala utthara ittiini yeekhweeli!

3. a) Kontha isiyani iwooni ya apostolu Joau inaalipihaca waamini wihu? b) Isiyani inhaleehu wiitthuca nhina ula mwahoola?

³ Khweeliini, ile iwooniile yaholipihaca waamini wa apostolu Joau. Hiiva ninkhala ukati wo mahuku ookhicera, ciicammo ninaatepa ulipihiya kontha ninkhala ukati uneerannyaaya iyo iwooniiyo! Hiiva ninawoona uthukumanihiya wo atthu enci anweherera woopwa ukati wo masakha moolupale wiira akhale wapeephoni mpaka. Nhina  ula mwahoola, ninaahala wiitthuca manannani, myaakha coopwaha 80 uttuli, Yehova caakavihenryaawe apoovwaawe ucuwela phaapani akhanle atthu o uyo mphwinko muulupalyooyo. Ciicammo, ninaahala woopela mwaha citthu piili co uyo mphwinkooyo: (1) iyuunuwelwaaya ni (2) uvirikanaca wo atthu o uyo mphwinkooyo. Nnya citthu piili nnya cinaahala ulipihaca waamini waya atthu otheene arina nweherero womaana woopanka mphantte iyo ikhurupwiiyo.

4. Ikhweeliini yo mbiiblyani ihineetthucihiya mmattiinini? Anamasoma Ibiiblya yaathoonyenre cani wiira yahovirikana ni ittiini cikiina?

⁴ Ittiini co ntuninyani khacineetthucihaka ikhweeli, wiira wahoolo atthu ammwiiwelela Nluku anaahala ukhala watuninyani mpaka. (2 Akor. 4:3, 4) Ittiini cinci cowiicoona ukhala ceekristau cineera wiira atthu omaana, yakhwaaka anrwaa wiirimu. Masi Anamasoma Ibiiblya, yaapanka irevista Ukhalenla ukhuma mwaakha wo 1879, yahovirikana ni ittiini cikiina. Ayo yaanaacuwela wiira Nluku wahoolo nkookhaliha ituninya ipeephoni ni atthu enci oomwiiwelela Nluku anaahala ukhala watuninyani va—kahi wiirimu. Masi wahovira ukati mwinci ahinaaya waacuwela phaapani yaahala ukhala ayo atthwaayo.—Mat. 6:10.

5. Isiyani Anamasoma Ibiiblya yaacuwenlyaaya nhina ikhurupu yo atthu 144.000?

⁵ Anamasoma Ibiiblya ciicammo yaanaacuwela wiira, toko cinhimyaaya Nuulumo na Nluku, atthu akiina yaanaahala ‘uthumiya watuninyani’ wiira arwee yalamulele wiirimu nkhayi ni Yesu. (Apoka. 14:3) Iyo ikhurupwiiyo yaahala ukhala yo makristau 144.000 owiikurumica ni yiivaherenre uhihiya unswalela Nluku ukati waaryaaya watuninyani. Vano nhina atthu o mphwinko muulupale, Anamasoma Ibiiblya yaakupali isiyani?

6. Isiyani Anamasoma Ibiiblya yaakupalyaaya nhina mphwinko muulupale?

⁶ Apostolu Joau ahoona wiira mphwinko muulupale waari mphwinko wo atthu ‘yeemenle uhoolo wohice ni uhoolo waya Mwaakhontwaa.’ (Apoka. 7:9) Ayo moolumwaayo yahowiiriha Anamasoma Ibiiblya ukupali wiira atthu ampanka mphantte mphwinko muulupale ciicammo yaahala urwaa wiirimu, khampa ikhurupu yo makristau 144.000. Masi wakhala wiira makristau 144.000 ni ciicammo atthu o mphwinko muulupale ankookhala wiirimu, nnya ikhurupu piili nnya cinvirikana manannani? Anamasoma Ibiiblya yooniha wiira mphwinko muulupale yaahala ukhala makristau yahaamwiiwelenle ratta Nluku ukati waaryaaya watuninyani. Ayo makristawaayo hataa ukhalaka wiira yaaneettela inhimyaaya Ibiiblya, atthunaka nanlelo yaapanka mphantte ittiini cowootha. Anamasoma Ibiiblya yaakupali wiira ayo makristawaayo yaanawiikurumica, masi khayaatepa wiikurumica cinene, phimaana khawaaphwanela urwaa ukhala mamwene nkhayi ni Yesu. Ukhala wiira khayaafenta cinene Nluku, atthu omphwinko muulupale waaphwanela ukhala uhoolo wohice, masi khayaalamuliya wonkoma mmahiceni.

7. Toko caakupalyaaya Anamasoma Ibiiblya, tipani aahala ukhala watuninyani ukati wo myaakha 1.000 unhalaawe Kristu ulamulela? Isiyani Anamasoma Ibiiblya yaakupalyaaya wiira yaakowaakhumelela atthu yanswalela Nluku khalayi?

⁷ Vano, tipani aahala ukhala watuninyani? Anamasoma Ibiiblya yaakupali wiira, woopacera, oothanliya 144.000 ni atthu o mphwinko muulupale yaahala urwaa wiirimu. Vano, atthu akhwaawe enci yaanaahala uvahiya iparakha yookhala watuninyani ni waakhela iparakha co Umwene wo Myaakha 1.000 wa Kristu. Anamasoma Ibiiblya khayoopuwela wiira ala yaari atthu yanswalenle Yehova uhinaaya wancera Umwene wo Myaakha 1.000 wa Kristu. Ayo yooniha wiira ila ikhurupwiila yaahala wiitthuca myaha ca Yehova unancenre ukati wo myaakha 1.000. Wuumaleloni ukati wo myaakha 1.000, ale yaahala utthara ikettelo ca Yehova yaanaahala uvahiya ukumi woohimala watuninyani, masi ale yahaahala wiiwelela yaanaahala umalamalihiya. Anamasoma Ibiiblya ciicammo  yaakupali wiira atthu akiina yaahala ukhala “ahooleli” watuninyani ule ukatyuule, yaanaahala urwaa wiirimu wuumaleloni ukati wo myaakha 1.000. Ayo ciicammo yaanaakupali wiira nhina ayo ‘ahoolelyaayo’ yaanaahala ukhala atthu yanswalela Nluku khalayi yaakhwaale hinaaya uwa Kristu watuninyani ni yaahala wunwelelihiya ukati wo myaakha 1.000.—Isaa. 45:16.

8. Ikhurupuni tthaaru Anamasoma Ibiiblya caakupalyaaya wiira cihaavo?

⁸ Woohincivihaca, Anamasoma Ibiiblya yaakupali wiira ciri ikhurupu tthaaru: (1) oothanliya 144.000, yaahala urwaa ulamulela nkhayi ni Yesu wiirimu; (2) mphwinko muulupale wo makristau oohiikurumica cinene, yaahala urwaa wiirimu ni ukhala uhoolo waya ihice ya Yesu; ni (3) atthu enci yaahala ukhala watuninyani ni yaahala wiitthucihiya myaha ca Yehova ukati wo Umwene wo Myaakha 1.000 wa Kristu. * Masi nuukatyaaya, Yehova ahaakavihera ucuweleeha ratta uyo mwahooyo.—Miru. 4:18.

9. a) Manannani atthu o mphwinko muulupale cinlamuliyaaya ukhala “uhoolo wohice ni uhoolo waya Mwaakhontwaa”? b) Kontha isiyani Masaahiti a Yehova yahaana isariya yoorukunusa itthu yaakupalyaaya nhina Apokalipise 7:9?

⁹ Mwaakha wo 1935, wahocuwannya phaapani akhanle atthu o mphwinko muulupale attonkiye nhina iwooni ya apostolu Joau. Masaahiti a Yehova yahocuwela wiira atthu o mphwinko muulupale pooti wahinrwaaya wiirimu wiira ‘yeemele uhoolo wohice ni uhoolo waya Mwaakhontwaa.’ Ayo pooti upanka iyo yakhalakoono watuninyani. Ukhala “uhoolo wohice” maanaaya wiira utthuna ukhulupale wa Yehova ni umwiiwelela. (Isai. 66:1) Ukhala “uhoolo waya Mwaakhontwaa” maanaaya wiira waamini woopoliya wihu ni Yesu. Inanna imoca, ilivuru ya Matewus 25:31, 32, ineera wiira “atthu olapo cotheene”—hataa ciicammo atthu oohinamaana—anaahala “uthukumanihiya uhoolo wawe” Yesu wahiceni wawe wiirimu. Masi unawoonannya wiira atthu olapo cotheene khari wiirimu, ayo ari watuninyani. Masaahiti a Yehova yahaana isariya yoorukunusa itthu yaakupalyaaya mwaakha wo 1935. Itthu inkupalyaaya nna va, inaathoonyera nlattuni Ibiiblya ihineeraaya wiira atthu o mphwinko muulupale anaahala urwaaniya wiirimu. Ikhurupu imoca paahi phinweherera urwaa ukhala wiirimu: oothanliya 144.000, anhala “ulamulela ituninya” nkhayi ni Yesu.—Apoka. 5:10.

10. Kontha isiyani atthu o mphwinko muulupale ahaana yiitthucaka myaha ca Yehova uhinaaya uphiya ukati wo myaakha 1.000?

¹⁰ Phimaana, ukhuma mwaakha wo 1935, Masaahiti a Yehova anaacuwela wiira atthu o mphwinko muulupale anhimiya nhina iwooni ya Joau, akhanle ikhurupu yo makristau ookhuluvelya anweherera ukhalana ukumi woohimala watuninyani. Wiira atthu o uyo mphwinkooyo yoopwe ukati wo masakha moolupale, ahaana yiitthucaka myaha ca Yehova uhinaaya uphiya ukati wo myaakha 1.000. Ayo ahaana yathoonyeraka waamini woolipa wiira ‘akhitiri woopwa citthu cotheenennya cinlamuliya ukhumelela’ uhinaphiya Umwene wo Myaakha 1.000 wa Kristu.—Luka 21:34-36.

11. Nlattuni Anamasoma Ibiiblya yoopuwelaaya wiira atthu akiina pooti yaanaahala urwaaniya wiirimu wamalaka ukati wo myaakha 1.000?

¹¹ Vano, ile yeeriyeele wiira atthu akiina ookhuluvelya watuninyani yaanaahala ucisiya wiirimu wamalaka ukati wo myaakha 1.000? Myaakha cinci uttuli, irevista Ukhalenla 15 yo Fevereiro yo 1913, yo Inglês, yahohimya wiira iyo pooti yaanaahala ukhumelela. Anamasoma Ibiiblya akiina yuupuwela co: ‘Atthu ookhuluvelya o khalayi, nlattuni waahalaaya uvahiya iparakha yookhala watuninyani paahi, masi makristau oohikhuluvelya uvahiya iparakha yoorwaa ukhala wiirimu?’ Ayo moopuwelelwaayo yaakhumelenle nlattu wo  citthu coohikhweeli piili: (1) ayo yaakupali wiira atthu o mphwinko muulupale yaanaahala urwaa ukhala wiirimu, ni (2) wiira atthu o mphwinko muulupale yaahala ukhala makristau oohiikurumica cinene.

12-13. Isiyani incuwelaaya makristau oothanliya ni ale o mphwinko muulupale?

¹² Masi toko coonaaleehu, mwaakha wo 1935, Masaahiti a Yehova yahocuwela wiira atthu anoopwa ukhottoni yo Harmacetom phaatthu ampanka mphantte mphwinko muulupale uhimiye nwoonini ya Joau. Ayo “phaale ankhuma mmasakhani moolupale” watuninyani vaava ni anaahala ukhuwela yiiraka: “Woopoliya wihu unkhuma wa Nlukweehu onkomale wahiceni, ni unkhuma wa Mwaakhontwaa.” (Apoka. 7:10, 14) Uhiya iyo, Ibiiblya ineetthuciha wiira ale anonwelelihiya wiira arwee yakhale wiirimu, khweeliini anawaakhela “itthu yomaana” ihinaakhelaaya atthu ookhuluvelya o khalayi. (Mabere. 11:40) Itthu yo naanaano inkupaliihu nhina mphwinko muulupale ihaatteeliha nrima mayamunneehu. Ayo yahancera waalattula atthu wiira answalele Yehova ni wiira wahoolo yaakhalane ukumi woohimala watuninyani.

¹³ Atthu o mphwinko muulupale unawaatteela nrima cinene nlattu wo itthu inwehereraaya. Ayo anaacuwela wiira Yehova phinlamuliya uthanla wakhala wiira atthu ookhuluvelya anonswalela ahaana yarwaaka wiirimu awula ukhala wapeephoni watuninyani va. Makristau oothanliya ni hataa ale o mphwinko muulupale, otheene caya anaacuwela wiira anaahala waakhela itthuvo, kahi nlattu wo waaphwanela, masi nlattu wo unamaana wa Yehova unithoonyenryaawe unvaherera wawe Yesu Kristu wiira anoopole.—Aroo. 3:24.

14. Kontha isiyani enci waanaarika ukupali wiira yaanaahala wiirannya iwooni yo mphwinko muulupale?

¹⁴ Nlattu wo itthu yo naanaano yaakupalyaaya ukhuma mwaakha wo 1935, enci yaaneekoha manannani atthu o mphwinko muulupale caahalaaya winciva wiira akhale mphwinko “muulupale.” Wootakihera, Ronald Parkin, aarina myaakha 12 ukati waataphuleliyaaya itthu yo naanaano yaakupalyaaya Anamasoma Ibiiblya. Uyo neera: “Ule ukatyuule, yaarivo anamalalyeera 56.000 ntuninyani motheene, ni atthunaka enci yaari makristau oothanliya. Phimaana, waakhala toko wiira mphwinko muulupale khweeliini khawaari ‘muulupale.’”

15. Manannani Yehova cinviraawe aathukumanihaka atthu o mphwinko muulupale?

¹⁵ Waaviraaya myaakha, mphwinko woothotokanihiya wa Yehova wahancera waaveleeliha mamisiyonaariyu ilapo cinci, ni Masaahiti a Yehova yahancera winciva. Vano, mwaakha wo 1968, yahancera iporokaraama yoosomihiya atthu Ibiiblya ivareliyaka nteko ilivuru A Verdade Que Conduz à Vida Eterna. Iyo ilivurwiiyo yaanaataphulela ikhweeli co mbiiblyani woohirikarikiha mpaka  atthu enci yahopheela wiitthuca ikhweeli, thanku cihinapacaaya ukhumelela khalayi. Nhina ukati wo myaakha micese, atthu oopwaha 500.000 yahopattisiya. Uhiya iyo, atthu akhwaawe imiliyawu cene yahopattisiya ukati ikereeca Católica wancenryaaya ukhumiya u América Latina ni nlaponi cikiina, ni ukati waakenlyaaya uhiya ukhottihiya ntekweehu ilapo co mphantte unkhuma ncuwa wo Europa ni ilapo co África. (Isai. 60:22) Ni myaakha vakaani civinrennya va, mphwinko woothotokanihiya wa Yehova uhokumihera ikaruma comaana cinci wiira atthu enci akaviheriye wiitthuca Ibiiblya. Ilelo, ahaavo anamalalyeera oopwaha 8 milhões. Khweeliini, pooti waneereehu wiira Yehova ri mowaathukumaniha atthu o mphwinko muulupale.

16. Atthu o mphwinko muulupale ankhuma vayi?

¹⁶ Ukati apostolu Joau wantikhalyaawe iwooni yoonalyaawe, aheera wiira mphwinko muulupale waahala ukhala “wo atthu olapo, o mahimo, o maloko ni oluuka cotheene.” Porofeeta Zakariya ahuuluma itthu imocaaru myaakha cinci uttuli. Uyo ahantikha eeraka: “Mahuku yaale, alopwana khuumi oluuka cotheene co khula ilapo anaahala uvarelela niikuru cinene, iyee, anaahala uvarelela niikuru cinene nlempe nohancu ya nlopwana nYuuta, yiiraka: ‘Nimpheela urwaa nkhayi ni nyuuvaca, kontha niheewa wiira Nluku ri ni nyuuva.’”—Zakar. 8:23.

17. Ntekoni unvariya ilelo wiira akaviheriye atthu olapo ni oluuka cotheene?

 ¹⁷ Masaahiti a Yehova anaacuwela wiira anhala ukhitiri waathukumaniha atthu oluuka cotheene, calalyeeriyaka ihapari comaana niiluuka cinci. Ukhuma nenne no khalayi, myaakha coopwahaka 130 uttuli, hiiva nihotaphulela ikaruma coosomeliya Ibiiblya, masi ilelo ninaataphulela niiluuka coopwaha 900—nteko wootaphuleliya uhinatoko upankiya thanku! Khweeliini, uthukumaniha mphwinko muulupale wo atthu olapo cotheene nikhanle ntikhiniho nimpankaawe Yehova ilelo. Ukhala wiira nna va Ibiiblya ni ilivuru cihu cihotaphuleliya niiluuka cinci, atthu o mphwinko muulupale ananswalela Yehova niinanna imoca, hataa yakhalaka oovirikanaca. Ni Masaahiti a Yehova ancuweliya ukhala atthu aneekurumica ulalyeera ikhweeli ni ancuweliya ukhala atthu oofentana. Woona citthu cotheennyo, khweeliini unaalipihaca waamini wihu!—Mat. 24:14; Joau 13:35.

18. a) Toko cinthoonyeraaya ilivuru ya Isaiya 46:10, 11, kontha isiyani khaninkhala ootikhinihiya noonaka mananna Yehova cineerannyeehaawe inatiri yo mphwinko muulupale? b) Kontha isiyani ale anhala ukhala watuninyani khaniicoona uhinnya uttuli?

¹⁸ Inatiri yo mphwinko muulupale khweeliini ikhanle yoonitteeliha nrima! Ni khanintikhinihiya nlattu wo woona mananna Yehova cineerannyeehaawe iyo inatiriiyo. (Usome Isaiya 46:10, 11.) Ale ampanka mphantte mphwinko muulupale anaasukhuru cinene niweherero Yehova ninvahaawe. Atthu o mphwinko muulupale khaniicoona uhinnya uttuli nlattu woohithanliya ni nnepa wowaarya wiira arwee yalamulele nkhayi ni Yesu wiirimu. Nasomaka Ibiiblya, ninaaphwanya ihantisi cinci ca alopwana ni athiyana yaarina waamini ni yeettiheriye ni nnepa wowaarya. Unookhalaru commo, ayo khampanka mphantte ikhuruphu yo atthu 144.000. Nlopwana mmoca aari Joau Mpattisa. (Mat. 11:11) Nkhwaawe aari Davidi. (Mite. 2:34) Ayo ni atthu enci akiina anhala wunwelelihiya wiira arwee yakhale wapeephoni watuninyani. Otheene caya—wamoca ni atthu o mphwinko muulupale, anaahala ukhalana ukati woothoonyera wiira ananvaresesa Yehova ni wiira anawaakihera ikuvernwaawe.

19. Wiiweeha iwooni ya Joau unaanisovenriha otheene cihu upanka isiyani?

¹⁹ Thanku ipacererwaaya ihantisi ya apinaatamu, Yehova aari hinatoko waathukumaniha atthu imiliyawu cene olapo cotheene watuninyani toko cinaathukumanihaawe ilelo. Hataa niwehereraka urwaa ukhala wiirumi awula wapeephoni watuninyani—otheene cihu nihaana niikurumicaka waakavihera atthu enci wiira apanke mphantte mphwinko muulupale wo “ikhontwaa cikiina.” (Joau 10:16) Woohipica, Yehova naahala uwaana masakha moolupale anhala umalamaliha ikuvernu ni ittiini cinaahuviha atthu. Ni atthu otheene ari nhina mphwinko muulupale anaahala ukhalana iparakha yuulupale uhoolo: unswalela Yehova mpaka!—Apoka. 7:14.