MWAHA WOOSOMIYA 38
‘Nkiphiyeere, ni miiva kinaahala wuuvahani ikuru’
“Nkiphiyeere, otheene cinyu nyuuva nnovara nteko cinene ni nri oolemeliyeene, ni miiva kinaahala wuuvahani ikuru.”—MAT. 11:28.
NCIPO 17 “Eu Quero!”
NINHALA WIITTHUCANI? *
1. Toko cantikhiyaaya nhina Matewus 11:28-30, itthuni Yesu ikhuluvelihalyaawe?
YESU ahaakhuluveliha itthu yooreera atthu enci yaamwiiwelela. Uyo ahowiirela: ‘Nkiphiyeere, ni miiva kinaahala wuuvahani ikuru.’ (Usome Matewus 11:28-30.) Yesu khoolumacale wamalakuni paahi, uyo ahopanka itthu yaakhuluvelihalyaawe. Wootakihera, wuupuwele itthu yampankilyaawe nthiyana mmoca aavirale myaakha cinci ahuvaka nlattu woretta yuulupale yaarinaawe.
2. Isiyani Yesu yampankilyaawe nthiyana aawerennya?
2 Ule nthiyanoole aari oovelavela ni aapheela ukaviheriya. Uyo ahaapheelaca mameetiku enci wiira avonihiye. Cahovira myaakha 12 ahuvaka ni nanlelo aanaawerennya. Uyo ooniya ukhala ntthu oohiirya toko Nlamulo caahimyaaya. (Lev. 15:25) Masi uyo aheewa aromolaciyaka Yesu ni wiira uyo aanawaavoniha aretta. Phimaana, ule nthiyanoole aholakela untotha Yesu. Ukati wamphwanyilyaawe, ahokwannya nkerekhere waya ikuwo yaawanryaawe Yesu ni ahovonihiya woohipica! Masi uhiya paahi unvoniha ule nthiyanoole, Yesu ahopanka itthu ikhwaawe. Yesu ahothoonyera wiira nanhisima ni nanwacera. Wootakihera, Yesu ahomwiihana “Mwanaka,” nuulumo ninthoonyera nifento ni ihisima. Munnokhitiri wuupuwela mananna ule nthiyanoole ciicoonalyaawe umaalihiya, awula uvahiya ikuru?—Luka 8:43-48.
3. Makohoni anhaleehu waakhula nhina ula mwahoola?
3 Woone wiira nthiyanoole phaapacenre umphiyeera Yesu. Uyo aheekurumica urwaa mpaka waaryaawe Yesu. Iyo phi itthu inlamuliya ukhumelela ilelo. Phi hiiva ninlamuliya wiikurumica umphiyeera Yesu. Ninaacuwela wiira ilelo Yesu khanhala upanka ntikhiniho wiira aavonihe aretta anomphiyeera. Masi Yesu nanlelo naanilattula otheene cihu: ‘Nkiphiyeere, ni miiva kinaahala wuuvahani ikuru.’ Nhina ula mwahoola, ninaahala waakhula makoho mathanu: Isiyani ninlamuliyeehu upanka wiira nimphiyeere Yesu? Isiyani Yesu yaapheelaawe uhimya ukati wiiralyaawe: “Mwiicisihe nivanko awula nikonkwa naka”? Ntakihero na Yesu ninniitthuciha isiyani? Kontha isiyani uvara nteko Yesu unirumalyaawe unaanivaha ikuru? Ni isiyani ninlamuliyeehu upanka wiira niphwanyihiye ikuru nlattu woocisa nivanko awula nikonkwa na Yesu?
“NKIPHIYEERE”
4-5. Manannani ninlamuliyeehu ‘umphiyeera’ Yesu?
4 Inanna imoca yomphiyeera Yesu ukhanle wiikurumica wiitthuca citthu cuulumalyaawe ni cipankalyaawe. (Luka 1:1-4) Khaavo ntthu nlamuliya unipankela iyo. Phi hiiva ninlamuliya usoma ihantisi cinttonka citthu cinkhumelenle Yesu. Hiiva ciicammo ninomphiyeera Yesu nalakelaka upattisiya ni ukhala attharyaawe.
5 Inanna ikhwaawe ‘yomphiyeera’ Yesu ukhanle uwuulumana mahumu ukati umpheeleehu ukaviheriya. Yesu nvarela nteko “itthuvo ceepinaatamu,” akhanle mahumu, wiira awacere ikhontwaa cawe. (Efesu 4:7, 8, 11; Joau 21:16; 1 Pet. 5:1-3) Phi hiiva ninlamuliya upacera waalepela mahumu wiira anikavihere. Nihiweherere wiira ayo anaahala ucuwela itthu inniira ni impheeleehu. Woone itthu yankhumelenle munna mmoca neehaniya Julian. Uyo naahimya: “Miiva kahaana kihiyaka uvara nteko uPeteli nlattu wooweryaaciya. Mpatthannyaaka mmoca ahokiirela wiira kahaana kilepelaka wootoliya ni mahumu. Wiipaceroni, miiva akoona iyo ukhala itthu yofayita. Masi wahoolo waya, kahorwaa ulepela ukaviheriya ni mahumu. Ni wootoliya ni mahumu ule ukatyuule, khweeliini yaari itthuvo yuulupale cinene yaakhenlyaaka.” Mahumu ookhuluvelya, toko mahumu eeli yaamootonle Julian, pooti unikavihera wiira naacuwele “ankhili a Kristu,” awula ucuwela manannani cinlamuliyeehu utakiha moopuwelelo ni meettelo a Yesu. (1 Akor. 2:16; 1 Pet. 2:21) Khweeliini, iyo ikhanle itthuvo yuulupale cinene mahumu yaahalaaya univaha!
“MWIICISIHE NIVANKO AWULA NIKONKWA NAKA”
6. Isiyani Yesu yaapheelaawe uhimya ukati wenryaawe “mwiicisihe nivanko awula nikonkwa naka”?
6 Moolumo a Yesu ukati wenryaawe “mwiicisihe nivanko awula nikonkwa naka” atthunaka maanaaya wiira “nkiiwelele khampa nhooleli.” Masi ciicammo atthunaka uyo aapheela wiira co: “Nkele vathi waya nivanko awula nikonkwa naka nkhayi ni mi, ni nttwee otheene cihu ninvarele nteko Yehova.” Nhina mawehero otheene ayo, ucisa nivanko awula nikonkwa * na Yesu maanaaya wiira nihaana nivaraka nteko.
7. Toko cinthoonyeraaya ilivuru ya Matewus 28:18-20, ntekoni uvahiyeehu ni isiyani ninlamuliyeehu ukupali?
7 Hiiva nincisa nivanko awula nikonkwa na Yesu navahereraka ukumiihu wa Yehova ni napattisiyaka. Atthu otheene pooti upanka iyo—Yesu khanhala unkhotta ntthu khweeliini nopheela unswalela Nluku. (Joau 6:37, 38) Uhiya iyo, atthari a Kristu otheene ahovahiya iparakha yoovara nteko nkhayi ni Yesu—nteko Yehova unvahalyaawe Yesu. Ni pooti wankupaliihu wiira Yesu khanhala unihiya nivaraka veekha uyo ntekooyo ni naahala unikavihera.—Usome Matewus 28:18-20.
“NKIITTHUCERE”
Waamaalihe ni waavahe ikuru akhunanaa toko yesu (Uwehe iparaagarafu 8-11) *
8-9. Kontha isiyani atthu owiiyeviha waanaacivela ukhala wakhiviru ni Yesu, ni isiyani ninlamuliyeehu wiikoha?
8 Atthu owiiyeviha waanaacivela ukhala wakhiviru ni Yesu. (Mat. 19:13, 14; Luka 7:37, 38) Kontha isiyani? Kontha Yesu khaari toko mafarisewu. Ahooleli ottiini mafarisewu khayaawacera ratta atthu ni yaanawiithenca. (Mat. 12:9-14) Masi Yesu aanawaafenta atthu ni aanawiiyeviha. Mafarisewu yaapheela wiira acuweliye naatthu otheene ni yiicoona ukhala atthu oolupale. Yesu aanaawiitthuciha atthu wiira ahiithence ukhala oolupale waapwaha akhwaaya, masi yaavarele nteko akhwaaya. (Mat. 23:2, 6-11) Mafarisewu yaapheela wiira yiiweleliye naatthu nlattu wo wooviya. (Joau 9:13, 22) Yesu aanawaamaaliha atthu ni moolumo omaana ni athoonyeraka nifento.
9 Nnyo cikhanle citthu cofayita nineetthuceehu ni Yesu. Unaareera wiikoha co: ‘Kiireke akhwaaka anaakoona ukhala ntthu oomaala ni owiiyeviha? Kiireke kinaatthuna niiraati waavarela miteko cankaani akhwaaka? Kinawaawacera ratta akhwaaka?’
10. Isiyani Yesu yaatthenkacenryaawe atthu yaavaranaawe nteko?
10 Yesu ahaatthenkacera nnema ale yaavaranaawe nteko, ni waanancivela waalakihera. (Luka 10:1, 19-21) Uyo aanawaasovenriha attharyaawe ukoha ni aanaapheela uviriyana itthu yoopuwelaaya. (Mat. 16:13-16) Toko miri caaliye nipuro noomiceriya cinene, atthari a Yesu yahoonuwa ratta. Ayo yaanaweesa wanrimani waya citthu Yesu ceetthucihaawe ni, nlattu wo iyo, yaanawiimiha mihokorokho, awula yaanaapanka miteko comaana.
Ukhale oohirika wuulumaniya ni waawacere ratta akhwaa
Uhinyoonyaciye ni wiikurumice
Wiiyevihe ni uvare nteko *
11. Isiyani ninlamuliyeehu wiikoha?
11 Wakhala wiira nyuuva nhaana ukhulupale wo waahoolela akhwiinyu, mwiikohe co: ‘Kinaawacera cani akhwaaka untekoni ni uwaani? Kiireke miiva kintthu kinwaana nnema? Kinawaasovenriha akhwaaka ukoha? Kinaapheela niiraati uviriyana itthu inoopuwelaaya?’ Khweeliini, otheene cihu khanimpheela ukhala toko mafarisewu. Ayo yaanaarusiya yakohiyaka naakhwaaya ni yaanaalupattha ale yahoopuwela toko ayova coopuwelaaya.—Mark. 3:1-6; Joau 9:29-34.
“NNAAHALA UPHWANYA UTTEELIYA”
12-14. Kontha isiyani nteko Yesu univahalyaawe unaaniphwanyiha ikuru?
12 Nlattuni uneereehu wiira nteko Yesu univahalyaawe unaaniphwanyiha ikuru? Nlattu wo citthu cinci, masi nttwee noopele mwaha citthu vakaani paahi.
13 Nihaana ahooleli omaana. Yehova, Nhooleliihu Muulupale, khanakhala nhooleli ootakhala nrima ni oohisukhuru. Uyo naavaha ifayita cinene nteko unvareehu. (Mabere. 6:10) Uyo naanivaha ikuru cimpheeleehu wiira nikhitiri ucisa nrinttiihu, awula nteko univahalyaawe. (2 Akor. 4:7; Akalas. 6:5, niwehero) Yesu, Mweneehu, naavaha ntekihero, anithoonyeraka mananna cinlamuliyeehu waawacera akhwiihu. (Joau 13:15) Ni mahumu anniwacera anantakiha Yesu, “makampuci muulupale.” (Mabere. 13:20; 1 Pet. 5:2) Wiira aniitthucihe ni anikhikicere, ayo anawiikurumica ukhala atthu omaana, oonivaha ikuru ni oolipa nrima.
14 Nihaana apatthani omaana. Khuuvo mphwinko nkiina wo atthu unvara nteko wootteeliha nrima toko nteko unvareehu ni urina apatthani omaana toko hiiva arineehu. Wuupuwele ila: hiiva nihovahiya iparakha yoovara neko nkhayi naatthu arina meettelo omaana, masi ahiniicoona ukhala oolupale waaphwaha akhwaaya. Ayo anaacuwelaca citthu cinci, masi khaniicuunuwiha ni anawaawehera akhwaaya ukhala oolupale. Ayo khanniwehera paahi khampa atthu anaavaranaaya nteko, masi anniwehera khampa apatthani. Uyo ukhanle upatthani muulupale cinene mpaka ayo anaakupali uleva ukumyaaya wiira anikavihere hiiva!
15. Ninoonela cani nteko urumiyeehu uvara?
15 Nihaana nteko womaana. Hiiva ninaawiitthuciha atthu ikhweeli ca Yehova ni ninaahimya citthu cowoothiya ca Sotwani. (Joau 8:44) Sotwani nawaarya atthu mirintti cihinkhitiryaaya uphinka. Wootakihera, uyo mpheela wiira hiiva nikupali wiira Yehova khanhala unilevelela matampiihu ni wiira khunniphwanela ufentiya ni Apaapeehu. Iyo ikhanle itthu yowoothiya cinene ni ukhanle nrintti woolemela cinene! ‘Namphiyeeraka’ Kristu, matampiihu anaaleveleliya. Ni ikhweeli phi ila: Yehova naanifenta cinene. (Aroo. 8:32, 38, 39) Unaanitteela nrima cinene nlattu wo waakavihera atthu unkhuluvela Yehova ni ukhalana ukumi womaana!
UHIHIYE UPHWANYIHIYA IKURU NI NIVANKO AWULA NIKONKWA NA YESU
16. Nrintti Yesu unnilepelaawe wiira nicise unvirikana manannani ni mirintti cikhwaawe cinciseehu?
16 Nrintti Yesu unnilepelaawe wiira nicise unaavirikana ni mirintti cikiina cinciseehu. Wootakihera, imaara cinci, ntthu ahokolyaaka untekoni khankhala paahi owoocya, masi ciicammo nkhalaka oohitteeliya. Mphantte nkiina, nanvarelaka nteko Yehova ni Yesu, hiiva ninkhala ootteeliya. Nahokolyaaka untekoni wihu ucoocilo, atthunaka hiiva ninkhala owoocya ni nihaana niivaracaka wiira nirwee unkutthaanoni uhiyu. Masi imaara cinci, nahokolyaaka unkutthaanoni, ninkhala oolipihiya mmakhuvani ni ninaakhala niikuru cinci. Iyo phi itthu ciicammo inkhumelela neekurumicaka ulalyeera ni wiisomiha Ibiiblya veekha. Ninaaphwanya ifayita cinene uvikana mananna ciikurumicaleehu!
17. Isiyani ninlamuliyeehu ukupaleela, ni isiyani ninlamuliyeehu uwehera ratta?
17 Otheene cihu nihaana nikupaleelaka wiira ikuru cihu cinaavelavela. Phimaana, nihaana niweheraka ratta mirinttini cinhaleehu uthanla ucisa. Wootakihera, ninaahala urihakaca ikuru cihu neekurumicaka utotha ukhalana maali menci. Ikwaha imoca, mmirawo thaciri ahonkoha Yesu co: “Isiyani inlamuliyaaka upanka wiira kaakhele ukumi woohimala?” Uyo mmirawooyo aanaweettela Nlamulo. Ni atthunaka aari ntthu ooreera nrima, kontha Ivangeeliyu ya Markus inaahimyeeha wiira Yesu ‘ahomoonihera nifento.’ Vano, Yesu ahonlattula ule mmirawoole, amwiirelaka: ‘Urwee, wathumihe citthu cirinaa ni uwe ukhale nttharyaaka.’ Ule mmirawoole ahokhala ni nrima wookawanihiya. Uyo aanaapheela untthara Yesu, masi ciicammo pooti khaakhitiri uleva “mihakhu cinci” caarinaawe. (Mark. 10:17-22) Aamalenle cani? Uyo khaatthunale nivanko awula nikonkwa naavahiyaawe ni Yesu ni khaahiile ukhala ipottha yo “Mihakhu.” (Mat. 6:24) Vano unari wiira waari weeva, waahala uthanlani?
18. Isiyani ninlamuliyeehu upanka woohihiyerera, ni kontha isiyani?
18 Woohihiyerera, unaareera ukumiha ukati wiira neemele ni niweheehe citthuni cinhoolelihereehu muukumini wihu. Kontha isiyani? Kontha upanka commo unaahala unikavihera woona wakhala wiira ninaarihakaca ratta ikuru cihu awula mena. Woone itthu yankhumelenle munna mmoca neehaniya Mark. Uyo neera: “Cahovira myaakha cinci kuupuwelaka wiira maakhalelo yaarinaaka yaari oohirikarika. Miiva kaari piyoneeru, masi unookhalaru commo, khula ukati kuupuwela ukhalana nsurukhu mwinci ni upuha. Mi kaanawiikohaka nlattuni makhalelwaaka waakhanlyaaya oorikarika cinene. Vano, kahoona wiira kaanaatepa uhoolelihera cinene citthu caapheelaaka, ni ukati ni ikuru vakaani caahalanaaka phanvahaaka Yehova.” Mark ahorukunusa moopuwelelwaawe ni makhalelwaawe wiira atepe ukhala ukati mwinci avaraka nteko wa Yehova. Mark neera: “Uhaavo ukati unkhalakaaka ni masukhuli. Masi kikaviheriyaka ni Yehova, ciicammo ni Yesu, kinaakhitiri uvilela ratta marikariko arinaaka.”
19. Kontha isiyani unaareera cinene uwehera ratta citthu?
19 Napheelaka uhihiya uvahiya ikuru ni nivanko awula nikonkwa na Yesu, nihaana nipankaka citthu tthaaru. Yoopacera, uwehere ratta citthu. Ukhala wiira nteko unvareehu ukhanle nteko wa Yehova, uyo uhaana uvariyaka toko Yehova mwaneene cimpheelaawe. Hiiva nikhanle ananteko, ni Yehova phinniruma itthu inlamuliyeehu upanka. (Luka 17:10) Umananiha uvara nteko wa Yehova ni mananna cimpheeleehu, unaalikanaca ni waattakanana nivanko awula nikonkwa. Wuupuwele itthu inkhumelela wakhalaka wiira imope khimpheela ukhala vathi nivanko ihooleliyaka ni mwaneene, ni yamananihaka utthawa ni urwaa nipuro nimpheelaaya. Hataa ikhalanaka ikuru cinene, iyo imopeeyo inhala umalela woocya ni pooti wiirakalihaca. Masi, hiivano napankaka citthu toko Yehova cimpheelaawe, ninaahala upanka citthu cahoopuweleehu wiira naanaahala ukhitiri upanka ni utthema marikariko yahoopuweleehu wiira naanaahala ukhitiri utthema. Uhiliyale: Yehova apheelaka wiira itthu yiirannye, iyo inawiirannya, khaavo oohala unhiiha!—Aroo. 8:31; 1 Jo. 4:4.
20. Isiyani inlamuliya uniiriha ucisa nivanko na Yesu?
20 Yonayeeli, uvare nteko nlattu wo itthu yomaana. Itthu inlamuliya uniiriha ucisa nivanko na Yesu ukhaleke upheela waattottopela Apaapeehu onifento, Yehova. Ukati wa Yesu, ale yaavara nteko nlattu wopheela uphwanya itthu awula nlattu woopheela wiiphwanyiha ifayita asineennyaaya, woohipica utteeliya wahaamalela ni yahohiya nivanko na Yesu. (Joau 6:25-27, 51, 60, 66; Afili. 3:18, 19) Mphantte nkiina, ale yaavara nteko nlattu wonfenta Nluku ni nlattu wo waafenta akhunanaya, yahocisa nivanko na Yesu muukumini waya motheene watuninyani ni ahaakhela iparakha yoovara nteko nkhayi ni Kristu wiirimu. Iyo ciicammo pooti unikhumelela hiiva. Nacisaka nivanko na Yesu nlattu wo itthu yomaana, ninaahala uvara nteko ninari ootteeliya nrima.
21. Toko cinthoonyeraaya ilivuru ya Matewus 6:31-33, isiyani ninlamuliyeehu uweherera wiira Yehova naahala upanka?
21 Yoneeraru, uweherere citthu comaana. Ukati utthunaleehu nivanko na Yesu, nithunale uvaha ukumiihu ni wiikurumica uvara nteko cinene. Mpaka Yesu heera wiira hiiva ninaahala ulupatthiya. Masi pooti wanweherereehu wiira Yehova naahala univaha ikuru cimpheeleehu wiira nivilele khula marikariko anhala unikhumelela. Navilelaka, ninaatepa ukhala oolipa. (Tiya. 1:2-4) Ciicammo pooti wanweherereehu wiira Yehova naahala univaha citthu cinnithwa, wiira Yesu naahala uniwacera ni wiira mayamunneehu ni asirokorihu anaahala unilipiha makhuva. (Usome Matewus 6:31-33; Joau 10:14; 1 Atesal. 5:11) Khweeliini, nihaana yotheene impheeleehu wiira nikhitiri uvilela!
22. Isiyani ninlamuliyeehu usukhuru?
22 Nthiyana Yesu anvonihalyaawe ahokhalana ikuru nenne nihuku naavohiyaawenne. Masi, wiira hihiye uvahiya ikuru, uyo ahaana akhalaka ntthari ookhuluvelya a Kristu. Woonela waa, ule nthiyanoole aapankale isiyani? Wakhala wiira uyo ahothanla utthuna nivanko na Kristu, wuupuwele iparakha yaakhenlyaawe: uvara nteko nkhayi ni Yesu wiirimu! Itthu yotheene yaalevalyaawe wiira antthare Kristu, khinlikana mena vakaani ni iparakha yaakhenlyaawe! Hataa niwehereraka urwaa ukhala wiirimu awula wapeephoni watuninyani—otheene cihu ninaasukhuru cinene utthuna nlattulo na Yesu: “Nkiphiyeere”!
NCIPO 13 Cristo, o Nosso Exemplo
^ par. 5 Yesu naanilattula: “Nkiphiyeere.” Manannani ninlamuliyeehu uthoonyera wiira ninaatthuna nna nlattulonna? Ula mwahoola unaarwaa waakhula nna nikohonna ni unaahala unikavihera wuupuwela isiyani ninlamuliyeehu upanka wiira niphwanyihiye ikuru nlattu woovara nteko nkhayi ni Yesu.
^ par. 6 Nivanko awula nikonkwa unkhala mwiri ntthu uncisaawe wamakhatani natthukelenle mirintti mmapontha waya. Ciicammo unkhala mwiri unwarihiya inama piili nsikoni wiira cilime.
