1. Yehova naawehera cani atthu owiiyeviha? Utaphulele.

YEHOVA nawaafenta cinene atthu owiiyeviha. Ale aneeyeviha paahi phinkhalana upatthani woolipa ni Nluku. Masi, “ntthu owiithenca, uyo noncuwela uttayi.” (Isaa. 138:6) Otheene cihu nimpheela untteeliha nrima Yehova ni ninaapheela ufentiya cinene nuuyova. Phimaana nihaana niitthucaka ukhala atthu owiiyeviha.

2. Isiyani inhaleehu wiitthuca nhina ula mwahoola?

² Nhina ula mwahoola, ninaahala waakhula makoho mararu: (1) Wiiyeviha isiyani? (2) Kontha isiyani nihaana nikhalaka atthu owiiyeviha? (3) Ukatini unnirikaaya wiiyeviha? Toko cinhaleehu wiitthuca nhina ula mwahoola, nakhalaka atthu owiiyeviha, ninaahala untteeliha nrima Yehova ni ninaahala wiiphwanyiha ifayita asineeneehu.—Miru. 27:11; Isai. 48:17.

3. Wiiyeviha isiyani?

³ Wiiyeviha unkhala uhiicoona awula uhiithenca. Ibiiblya inaathoonyera wiira ntthu owiiyeviha naacuwela wiira Yehova phiri muulupale cinene unvikana uyo ni khaneecoona ukhala muulupale waavikana akhunanawe. Ntthu owiiyeviha naakupali wiira naahala ukhumelela ntthu ompwaha.—Afili. 2:3, 4.

4-5. Nlattuni uneereehu wiira ntthu ookhala toko nawiiyeviha, khweeliini pooti uhikhala owiiyeviha?

⁴ Ahaavo atthu ookhala toko owiiyeviha, masi khweeliini khanakhala atthu owiiyeviha. Ayo atthunaka akhanle atthu oomaala awula pooti anawaahisima akhwaaya kontha iyo phi itthu yiitthucihiyaaya upanka. Masi wanrimani waya, ayo pooti ukhala atthu owiithenca. Ni wanihukuni, anaahala uthoonyera khweeliini ciryaaya nrimaaya.—Luka 6:45.

⁵ Mphantte nkiina, atthu oowalaala ni oohoova uhimya inoopuwelaaya khunakhala wiira akhanle atthu owiithenca. (Joau 1:46,  47) Unookhalaru commo, atthu oowalaala ahaana yiiweheehaka ratta wiira ahikhuluvele ucuwelaca waya. Hataa nikhalaka atthu oomaala awula oowalaala, otheene cihu nihaana niikurumicaka ukhala atthu khweeliini owiiyeviha.

6. Isiyani ninniitthucihaaya ntakihero na Paulu, toko cinthoonyeraaya 1 Akorintu 15:10?

⁶ Wuupuwele ntakihero na apostolu Paulu. Uyo ahovareliya nteko ni Yehova cinene wiira atthenkace maloko mmasitati cinci. Pooti ukhala wiira apostolu Paulu phivarale nteko cinene wuulalyeerani waavikana maapostolu a Yesu akhwaawe. Masi Paulu khiicoona waavikana mayamunnaawe. Athoonyeraka wiiyeviha, uyo heera: “Thimi kitepale ukhala oohifayita iriyari wo maapostolu ni khunkiphwanela wiihaniya apostolu, kontha khiholupattha nloko na Nluku.” (1 Akor. 15:9) Vano, Paulu aheera wiira uyo aakhitiri ukhalana upatthani womaana ni Yehova nlattu wo unamaana wonronya waathoonyeriyaawe ni Yehova, kahi nlattu wo makhalelwaawe awula nlattu wo citthu caapankalyaawe. (Usome 1 Akorintu 15:10.) Paulu hovaha ntakihero nomaana ninniitthuciha wiiyeviha. Ukati aawantikhenlyaawe iwarakha makristau uKorintu, uyo kheethencale, hataa wakhalaka wiira yahaavo atthu yaapheela uthoonyera wiira anampwaha Paulu.—2 Akor. 10:10.

7. Munna mmoca oocuweliya cinene aathoonyenre cani wiiyeviha?

⁷ Munna mmoca vahale ntakihero nomaana nhina wiiyeviha khanle muulupaleehu Karl F. Klein, aavanre nteko Mumphwinkoni wo Mahumu Unhoolela. Uyo hantikha ihantisi yo makhalelwaawe innilipiha makhuva. Nhina ihantisi yo makhalelwaawe, munna Karl hothoonyera wiiyeviha ni haamini uhimya masankiho menci yankhumelenle. Wootakihera, uyo hohimya wiira mwaakha wo 1922, ahopacera urwaa wuulalyeerani mmawaani. Masi ahoona ukhala nteko woorika ni ahokhala myaakha miili woohirwaa wuulalyeerani. Wahoolo, avaraka nteko uPeteli,  Karl ahokasiriya ni munna mmoca anvahale ikano. Uhiya iyo, uyo ahowerennya nlattu wo masukhuli ni iwasiwaasi caarinaawe, masi wahoolo ahomoona nafaasi. Hataa cinkhumelelaka citthu cotheene nnya, Karl ahaakhela miteko cuulupale. Vano wuupuwele co: hataa akhalaka munna oocuweliya cinene, Karl ahiiyeviha ni khoonenle ihaya uhimyaca citthu canrika upanka! Hataa phimaana mayamunna enci khanonliyala munna Karl ni ihantisi yoomaana inttonka makhalelwaawe. *

8. 1 Peturu 5:6 inthoonyera cani wiira wiiyeviha unantteeliha nrima Yehova?

⁸ Venci-venci, hiiva nihaana nikhala atthu owiiyeviha kontha wiiyeviha unantteeliha nrima Yehova. Apostolu Peturu hothoonyera iyo ratta-raatta. (Usome 1 Peturu 5:6.) Ilivuru “Venha Ser Meu Seguidor” yoopelaka mwaha moolumo a Peturu ineera: “Wiithenca unkhala toko iveneenu. Pooti unhonona ntthu. Ntthu pooti ukhala oocuwelaca cinene, masi nlattu wo wiithenca uyo khankhalana ifayita uhoolo wa Nluku. Masi ntthu hataa akhalaka oohicuwelaca venci, pooti uvareliya nteko cinene ni Yehova wakhalaka wiira nawiiyeviha.  . . . Yehova unaahala untteela nrima cinene wuutthuvela wakhalaka wiira weeva untthu owiiyeviha.” * Niireke ihaavo itthu ikiina yooreera upanka uhiya utotha untteeliha nrima Yehova?—Miru. 23:15.

9. Kontha isiyani hiivano neeyevihaka atthu akiina anaahala upheela unaattamela?

⁹ Wiiyeviha uhiya paahi untteeliha nrima Yehova, ciicammo unaaniphwanyiha ifayita asineeneehu. Hiivano neeyevihaka, atthu akiina anaahala upheela unaattamela. Kontha isiyani? Wuupuwele atthuni anoocivela waakhalana. (Mat. 7:12) Niireke waanoocivela unkhalana ntthu oncivela paahi upanka impheelaawe ni hinwiiwelela akhwaawe yanvahaka nruku? Mphantte nkiina, niireke khunnicivela ukhala ni mayamunneehu ni asirokorihu ‘anwacerana, anthoonyera nifento no mayamunna, uthunku ni wiiyeviha’? (1 Pet. 3:8) Wakhala wiira unaanicivela waakhalana atthu commo, hiiva nihaana niiyevihaka wiira ayo ciicammo apheele ukhala wamoca ni hiiva.

10. Manannani wiiyeviha cinnikaviheraaya uvilela citthu cinnikhumelela?

¹⁰ Wiiyeviha ciicammo khunrikarikiha makhalelweehu. Cinaahala unikhumelela citthu cinhaleehu woona wiira khacihimwena cosariya. Mwene oocuwelaca Salomau aheera: “Kihowoona ananteko yeettaka nkhavaluni, masi ahooleli  yeettaka vathi khampa ananteko.” (Ekles. 10:7) Ukati nkiina atthu oocuwelaca venci khanttottopeliya. Ni atthu oohicuwelaca venci phinttottopeliya. Unookhalaru commo, Salomau hokupaleela wiira itthu inlamuliyeehu upanka ukhanle waaminnyeela wiira makhalelo phiryaaya ciicammo, ni uhikhala ni masukhuli nlattu wo citthu coohinamaana cinkhumelelela muukumini wihu. (Ekles. 6:9) Neeyevihaka, khunhala unirika ukupaleela citthu cinkhumelela cihinnicivela.

11. Isiyani ninlamuliyeehu upanka navahiyaka ikano?

¹¹ Mahuku otheene, ninaakhalana ukati woothoonyera wiira naatthu owiiyeviha. Nttwee noopele mwaha citthu cinkhumelela. Navahiyaka ikano. Unaareera hiiva wuupuwela ila: ntthu akumiha ukati wiira anivahe ikano, pooti ukhala wiira hiivano ninoovonya cinene uvikana mananna cinoopuweleehu. Atthunaka itthu impacereehu wuupuwela ukhanle ukhotta ikano invahiyeehu. Hiiva atthunaka pooti umuuluma pusya ntthu nivahale ikano awula wuuluma pusya mananna cinivahalyaawe ikano. Masi wakhala wiira naatthu owiiyeviha, ninaahala wiikurumica uwehera ratta ikano ivahiyeehu.

12. Toko cinthoonyeraaya Miruku 27:5, 6, nlattuni ninlamuliyeehu unsukhuru ntthu nonivaha ikano? Utakihere.

¹² Ntthu owiiyeviha naasukhuru avahiyaka ikano. Wootakihera, wuupuwele wiira weeva uri Usalau yo Umwene. Uhowuulumana mayamunna enci, masi munna mmoca naawuucisa vate ni, oolumacaka vakaani, naawiirela co: “Ihookoromela iyoolya mmiinoni waa.” Weeva atthunaka waanaahala woona ihaaya. Masi niireke khawaahala unsukhuru uyo munnooyo nlattu wo wuuhimyera? Ni khweeliini waanaahala wuucivela unahimyeriye khalayiiru! Inanna imoca, munna mmoca alipaka nrima wiira anihimyere awula anivahe ikano impheeleehu, ninlamuliya wiiyeviha ni unsukhuru. Nihaana ninweheraka uyo munnooyo khampa mpatthaniihu, kahi nlupatthiihu.—Usome Miruku 27:5, 6; Akalas. 4:16.

13. Manannanni ninlamuliyeehu wiiyeviha akhwiihu yaakhelaka miteko wanlokoni?

¹³ Akhwiihu yaakhelaka miteko wanlokoni. Humu mmoca neehaniya Jason heera: “Ukati nkiina, kawoonaka mayamunna akiina yavahiyaka nteko wanlokoni, kinawiikohaka nlattuni uhithanliyaaka miivano.” Weeva uhopaca wiicoona commo? Khuntakhala upheela unvarela nteko Yehova cinene. (1 Tim. 3:1) Masi nihaana nikhikiceraka moopuwelelweehu. Naahikhikicereke moopuwelelweehu, hiiva pooti wancera ukhala atthu owiithenca. Wootakihera, atthunaka munna mmoca nawancera wuupuwela wiira uyo phinkhitiri uvara ratta nteko wo wanlokoni. Awula amwaarawe munna mmoca atthunaka  anawancera wuupuwela co: ‘Awannyaka paahi phaaha ukhitiri upanka ratta ula ntekoola, kahi fulano!’ Masi nakhalaka khweeliini atthu owiiyeviha, khaninhala wiithenca ayo manannaayo.

14. Isiyani inniitthucihaaya itthu Moocesi yaapankalyaawe ukati atthu akhwaawe waakhenlyaaya miteko?

¹⁴ Ntakihero na Moocesi ninaaniitthuciha venci wiiyeviha. Moocesi waanancivela nteko waarinaawe wo waahoolela apoovu olapo yo Isarayeli. Masi ukati mmoca, Yehova ahaathanla alopwana akiina wiira avare nteko nkhayi ni Moocesi. Moocesi aapankale isiyani? Uyo khaakhanle niihace. (Manu. 11:24-29) Uyo ciicammo ahiiyeviha ukati waatthunalyaawe wiira alopwana akiina ankavihere uvara nteko wo wuulumacera myaha ca apoovu. (Nkw. 18:13-24) Moocesi khaahoolelihera utotha ukhalana miteko cuulupale, masi aahooleliha waakavihera apoovu. Uyo aanaacuwela wiira yakhalaka atthu enci onkavihera wuulumacera myaha ca apoovu, asarayeli yaanaahala uphwanya ifayita, kontha khayaahala ukhala ukati mwinci yawehereraka wuulumaceriya myaha caya. Khweeliini, nna nikhanle ntakihero nomaana! Khaninlamuliya uliyala wiira, napheela wiira Yehova anoone ukhala atthu ofayita, wiiyeviha wihu uhaana wuunuwaka uvikana ucuwelaca wihu. Ni uhiliyale wiira “hataa Yehova akhalaka muulupale, uyo nanweha ule owiiyeviha.”—Isaa. 138:6.

15. Marukunusoni yaakhumelenle mayamunna enci?

¹⁵ Yakhumelelaka marukunuso muukumini wihu. Myaakha civinrennya va, mayamunna enci akhanle ukati mwinci yavaraka nteko wa Yehova, ahaakhumelela marukunuso. Wootakihera, mwaakha wo 2014, Mphwinko wo Mahumu Unhoolela uhohimya wiira khanhala ukhala-tho mamootoli odistritu. Phimaana, ayo mayamunnaayo ni asimwaaraya yaholattuliya wiira arwee yavare miteko cikiina. Ni ciicammo uhohimiya wiira, ukhuma mwaakha wo 2014, mayamunna arina myaakha coopwaha 70, khanhala ukhala mamootoli osirikwiitu. Ni munna rina  myaakha coopwaha 80, khanhala ukhala humu ntthenkaca mphwinko wo mahumu wanlokoni. Uhiya commo, mayamunna enci yaavara nteko uPeteli yahorumiya ukhala mapiyoneeru. Ni mayamunna akiina yaavara nteko wowiivahereriya ukati wotheene, yahaana yahiyaka nteko waavaraaya nlattu wooweryaaciya, amucyaaya yaanaapheela ukaviheriya awula nlattu wo citthu cikhwaawe.

16. Mayamunneehu ni asirokorihu athoonyenre cani wiiyeviha ukati waakhumelenlyaaya marukunuso?

¹⁶ Mayamunna enci yaakhumelenle ayo marukunuswaayo wahaarika cinene wiilemaleliha makhalelo makiina. Unawoonannya wiira waanaacivela cinene nteko waarinaaya ni atthunaka ahokhala myaakha cinci yavaraka. Vano, waakhela waya nteko nkiina, yahokhala ni masukhuli menci ukati weelemalelihaaya makhalelo o phiyaaru. Masi nuukatyaaya, ayo yahokhitiri wiilemaleliha ratta. Kontha isiyani? Venci-venci, kontha ayo ananfenta Yehova cinene. Ayo anaacuwela wiira yiivaherenre wa Nluku—khayiivaherenre wiira akhalane nteko awula nrintti mmoca wanlokoni. (Akol. 3:23) Ayo unawaatteela nrima cinene unvarela nteko Yehova yiiyevihaka, hataa ukhalaka ntekoni. Ayo ‘ananttikhela cotheene cinaahela isukhuli,’ kontha anaacuwela wiira Yehova nawaawacera.—1 Pet. 5:6, 7.

17. Kontha isiyani unaareera wiiyeviha toko Nuulumo na Nluku cinnisovenrihaaya?

¹⁷ Ninaasukhuru venci ukhala wiira Nuulumo na Nluku ninaanisovenriha ukhala atthu owiiyeviha! Neeyevihaka, ninawiiphwanyiha ifayita asineeneehu ni akhwiihu ciicammo anaaphwanya ifayita. Ninaakhitiri uvilela marikariko o muukumini. Ni itthu yuulupale cinene ukhalaka wiira ninaatepa waaphiyeera Apaapeehu o wiirimu. Ninaatteeliya cinene nlattu woocuwela wiira Yehova, hataa akhalaka “Oottitthima ni Nkhulupale,” nawaafenta cinene atthu o wiiyeviha ni nwoona ukhala atthu ofayita cinene!—Isai. 57:15.