MWAHA WOOSOMIYA 37
NCIPO 118 “Muncererye Wamini Wahu”
Iwarakha inhala unikavihera ukhala ookhuluvelya ni uvilela mpanka umwiisooni
“Hi nihovaresesa mpaka umwiisooni ukhuluvelya waarineehu wuupaceroni.”—MABERE. 3:14.
ITTHU INHALEEHU WIITTHUCA
Nhina iwarakha yo maberewu ninaahala wiitthuca ikano cinhala unikavihera uhihiyerera ukhala ookhuluvelya mpaka umwiisooni.
1-2. a) Isiyani yaakhumelenle ukati Apostolu Paulu awantikhenlyaawe iwarakha a heperewu? b) Kontha isiyani nineereehu wiira iyo iwarakheeyo yaaphiile ukati womaana?
MAKRISTAU aheperewu yaakhala u Yerusalemu ni u Yuteya yahoviriha ukati woorika cinene ukhwa wawe Yesu. Unamanleene utthenkaciya nloko neekristau, atthu enci yahopacera waalupattha ayo mayamunnaayo. (Mite. 8:1) Vano, cinavinreene myaakha coopwahaka 20, atthari a Yesu yahokela waanana masakha moolupale, toko uthwennya nsurukhu, atthunaka nlattu wotala yaakhumelenle ile ilapweele. (Mite. 11:27-30) Masi, mwaakha wo 61 makristau khayaalupatthiye cinene nalattanihaka niitthu yaahala uwiirannyeela wahoolo. Uyo ukatyuuyo, yahaakhela iwarakha ya apostolu Paulu. Nhina iyo iwarakheeyo, cahaavo ikano caahala waakavihera.
2 Iwarakha yo maberewu yaaphiile ukati womaana, kontha waari ukati makristau waaryaaya ninnema. Ni uyo ukatyuuyo khawaahala upica. Phimaana, Paulu ahowantikhela ikano caahala waakavihera waanana masakha yaahala ukhumelela. Wahaattamela ukwanyulaciya isittatti yo Yerusalemu Yesu waahimilyaawe. (Luka 21:20) Khweeliini, hataa Paulu ni makristau o Yuteya khayaacuwela ukatini waahalaaya ukhumelela ayo masakhaayo. Masi ayo makristawaayo yahaana uvarela nteko ukati waahala wiira alipihace waamini waya ni wiira akhitiri uvilela.—Mabere. 10:25; 12:1, 2.
3. Kontha isiyani ilivuru yo maberewu ikhanlyaaya itthu yofayita para makristau mahukwaala?
3 Woohipica, ninaahala waanana masakha moolupale uvikana masakha yaakhumelenle makristau aheperewu. (Mat. 24:21; Apoka. 16:14, 16) Phimaana, ninaahala woopela mwaha ikano Yehova caavahilyaawe ayo makristawaayo ni ciicammo cinhala unikavihera.
“NHIHIYERERE UKHOMAALA NHINA MMINEPANI”
4. Marikarikoni yaanannyaaya a Yuuta yaathanlile ukhala makristau? (Nwehe ciicammo ilatarato.)
4 Ayuuta yaakhanle makristau yahaana upanka marukunuso moolupale, ni iyo yaari itthu yoorika. Khalayi, ayuuta yaari apoovu yaathanliye ni Yehova. U Yerusalemu naari nipuro naahooleliya miteko co Umwene wa Nluku watuninyani ni itempulu naari nipuro waapankiya uswali weekhweeli. Ayuuta otheene yaatthara malamulo a Moceesi ni citthu ceetthucihaaya ahooleli ottiini. Nnyo citthu ceetthucaaya nnyo phaahimerya isiyani yaalamuliyaaya ulya awula uhilya, mananna yaweheraaya wuulihiya ni mpaka mananna caalamuliyaaya waawehera atthu yahanswalela Yehova. Vano ukhwa wawe Yesu, Yehova ahohiya wakhelela ayo mananna ooswalyaayo. Iyo yahaasankiha ayuuta enci yaakhanle makristau ni yaalemalenle utthara Nlamulo na Moceesi. (Mabere. 10:1, 4, 10) Mpaka makristau ookhomaala khampa Apostolu Peturu, yahaana itafawuti wiira apanke marukunuso. (Mite. 10:9-14; Akalas. 2:11-14) Nlattu wo nnyo citthu caapacenryaaya waamini nnyo, ayo makristawaayo yahopacera ulupatthiya naahooleli ottiini ayuuta.
Makristau yahaana uvaresesa nuulumo na Nluku ni ukhotta moopuwelelo owoothiya yaavanyihaya a Yuuta (Nwehe iparaagarafu 4-5)
5. Citthuni cowoopiha makristau yaalamuliyaaya wiikhikicera?
5 Makristau o Yuteya yahopacera ulupatthiya niikhurupu piili caatthu. Ikhurupu yoopacera, yaari yaahooleli ottiini yawoona ukhala anamavaanyiha nlattu woohiya weettela ittiini ya ayuuta. Ikhurupu ikhwaawe yeehimya ukhala makristau, yaanakhanyereriha uhihiya weettela malamulo a Moceesi. Atthunaka ayo yaamananiha upanka commo wiira ahilupatthiye. (Akalas. 6:12) Isiyani yaahala waakavihera ayo makristawaayo uhihiya uunvaresesa Yehova?
6. Isiyani Paulu yaakurumicilyaawe mayamunna wiira apanke? (Maberewu 5:14–6:1)
6 Nhina iwarakha Paulu yaawantikhenlyaawe mayamunna aheperewu, ahaakurumica usoma cinene nuulumo na. (Nsome Maberewu 5:14–6:1. a) Paulu ahopela mwaha cowantikhiya cowaarya ceeheperewu ni ahotaphulela nlattuni yaaryaaya itthu yofayita utthara citthu ceetthucihaawe Yesu ni uhiya mananna ayuuta yalemalenlyaaya unswalela Yehova khalayi. Paulu ancuwela wiira ayo mayamunnaayo yeetthucaka ni yeeweehaka saana ikhweeli co mbiibiliyani, yanhala ukhitiri ucuwelela ni ukhotta citthu cowoothiya.
7. Marikarikoni anaananeehu mahukwaala?
7 Khampa ukati wo makristau aheperewu, mahukwaala, ahaavo atthu ammwarusela citthu cowoothiya ni cinvirikaniha malamulo a Yehova anhimya isiyani ikhanle itthu yooreera awula yoonanara. Atthu akhwaawe, anawaavanyiha Masaahiti a Yehova nlattu wootthara ikano co mbiibiliyani cinooluma urupihana. Ni akhwaawe annoona ukhala atthu ootakhala nrima nlattu wo wiira atthu ahiile weettela ikano ca Yehova khanlamuliya ukhala Masaahiti a Yehova. Mananna atthu o ntuninyani cinoopuwelaaya anaavira yatepaka uvirikana ni mananna Yehova cinoopuwelaawe. (Miru. 17:15) Phimaana, ikhanle itthu yofayita ucuwelela ayo moopuwelelo oohilokaayo ni ukhotta. Hiiva khaninlamuliya unhiyerera hataa ntthu anilolovihaka ni anihiihaka unswalela Yehova.—Mabere. 13:9.
8. Manannani ninhaleehu uhihiya wuunuwa nhina mminepani?
8 Paulu ahaakurumica aheperewu ukhala makristau ookhomaala ni hiiva ciicammo ninlamuliya utthara iyo ikanweeyo. Iyo nhela nhina usoma cinene Ibiibiliya wiira nincuwele sana-saana Yehova ni nicuwele mananna cinoopuwelaawe. Ninlamuliya upanka iyo hataa ukhalaka wiira niheevaherera ni nihopattisiya. Hataa nivirihaka myaakha cinci ninaryeene Masaahiti a Yehova, ninlamuliya usoma woohihiyerera nuulumo na Nluku. (Isaa. 1:2) Uhihiyerera upanka usoma wo veekha, unaahala unikavihera ulipihaca ikhalelo imoca Paulu yaahimilyaawe nhina iwarakha yo maberewu ikhanle waamini. b—Mabere. 11:1, 6.
“NKHALANE WAAMINI WIIRA NKHIKICERE UKUMIINYU”
9. Isiyani yaari itthu yofayita cinene wiira makristau o heperewu akhalane waamini woolipa?
9 Makristau aheperewu yaalamuliya ukhalana waamini woolipa wiira akhitiri uvilela masakha moolupale yaahala ukhumelela u Yuteya. (Mabere. 10:37-39) Yesu ahaahimerya attharyaawe wiira yoonaka isittatti yo Yerusalemu yaarukureriyaka naanakhotto, ayo yahaana utthawela mmamyaakoni. Hataa makristau yaakhala nsittatti ni ciicammo ale yaakhala mmaaliteeya yahaana utthara iyo ikanweeyo. (Luka 21:20-24) Ule ukatyuule, anakhotto yoopopihaka ukela ilapo, atthu yaakhala mmaaliteeya yaatthawela nsittattimmo wiira akhikiceriye, kontha wahaavo muuru waatekiya wiira ikhikiceriye isittatti. Phimaana, utthawela mmamyaakoni waakhala toko itthu yaahala uhaakhikicera. Noopuwelaka commo, ninawoona wiira ayo yaalamuliya ukhalana waamini woolipa wiira yiiwelele itthu yaahimeriyaaya.
10. Isiyani makristau yaahalaaya upanka yaakhalanne waamini woolipa? (Maberewu 13:17)
10 Makristau aheperewu ciicammo yaalamuliya waakhuluvela ale Yesu yaavahacenryaawe uhoolela nloko no makristau. Atthu yaahoolela atthunaka yanhala waavaha malakihero yaahala waakavihera ucuwela ukatini awula nipuroni naalamuliyaaya utthawela. (Nsome Maberewu 13:17. c) Nuulumo “ukhala owiiwelela” niiluka iheperewu nivareliye nteko nhina Maberewu 13:17 nimmwaaca ntthu neewelela nlattu wo waakhuluvela atthu anvaha malakihero. Maanaaya wiira ayo khaneewelela paahi kontha ntthu oolumilyooyo haana ukhulupale. Phimaana, ahinaaya ukhumelela masakha, makristau aheperewu yaalamuliya wiitthuca waakhuluvela ale yaahoolela. Wakhalaka wiira ukati wahaalupatthiyaaya yaahakhuluvela ale yaahoolela, khawaahala waarikela uwiiwelela ukati womasakha moolupale.
11. Kontha isiyani ikhanlyaaya itthu yofayita makristau o mahukwaala ukhalana waamini woolipa?
11 Khampa makristau aheperewu, hiiva ciicammo nihaana ukhalana waamini. Hiiva ninkhala ukati atthu enci uhinaminnyaaya wiira ninkhala mahuku okhicera. Nlattu hiiva wo waamini, atthu akhwaawe anaanitarawa. (2 Pet. 3:3, 4) Uhiya commo, hataa Ibiibiliya inihimeryaka citthu cinhala wiirannya ukati wo masakha moolupale, cihaavo citthu cinci cihincuweleehu. Nihaana waamini wiira umwiisooni wo citthu cotheene unhala uphiya ukati womaana, niiyo yeerannyaaka Yehova naahala unikhikicera.—Habak. 2:3.
12. Isiyani inhala unikavihera uvilela ukati wo masakha moolupale?
12 Hiiva ciicammo, nihaana nilipihacaka waamini wihu wiira Yehova naacaaliha “ipottha yookhuluvelya ni yankhili” wiira inivahe malakihero. (Mat. 24:45) Yapaceraka masakha moolupale, atthunaka ninaahala waakhela malakihero anhala unikavihera woopola ukumiihu, khampa makristau aheperewu yaahakhela malakihero ukati anakhotto o Rooma yaarukurenryaaya isittatti yo Yerusalemu. Phimaana, ula ukhanle ukati unlamuliyeehu wiitthuca waakhuluvela ale Yehova anaarumaawe wiira anihoolele. Wakhalaka wiira hiiva khaninaakhuluvela ni khanineewelela malakihero annivahaya nenna co, unaahala unirika wiiwelela malakihero anhalaaya univaha ukati wo masakha moolupale.
13. Kontha isiyani ikano ya Paulu iri nhina Maberewu 13:5 iryaaya yomaana?
13 Ukati wawehereraaya nthoonyero wiira atthawe, makristau aheperewu yaalamuliya unyema “uciveliya ninsurukhu” ni waavyavya mihakhu, masi yahaana uweheeha paahi unfenta waya Yehova. (Nsome Maberewu 13:5. d) Akhwaawe khayaamala uhuva khalayi nlattu wotala. (Mabere. 10:32-34) Hataa ukhala wiira yahaamini uviriha ayo masakhaayo nlattu wohapari comaana, nuuwakatyaaya, ahaavo yaapacenre waavya ukhalana nsurukhu mwinci wiira yiikhikicere wo citthu cowoopiha awula ahihuve. Masi nsurukhu khawaahala woopola ukumyaaya ukati Yerusalemu waahalaawe ukwanyulaciya. (Tiya. 5:3) Khweeliini, atthu otheene yaahala woonihera waaciva mihakhu, atthunaka wanhala waarikela uhiya uttuli nnyo mihakhunnyo ni inupa caya wiira atthawe.
14. Manannani waamini woolipa unhalaaya unikavihera mananna oowacera mihakhu?
14 Wakhalaka wiira ninawaamini khweeliini wiira Yehova naahala ukwanyulaca ila ituninyeela woohipica, hiiva khaninhala wuupuwela wiira ukhalana nsurukhu mwinci awula mihakhu phi itthu irina ifayita. Ukati wo masakha moolupale, nsurukhu khunhala ukhalana ifayita. Ibiibiliya ineera wiira atthwaayo anaahala ‘urihela mparapaarani iparaata caya,’ kontha anaahala ucuwela wiira ‘hataa iparaata caya awula iwooru caya khacinhala woopola ukumyaaya nihuku Yehova nohalaawe uviruwa.’ (Ezek. 7:19) Uhiya waavyavya ukhalana nsurukhu mwinci, hiiva nihaana ulakela upanka citthu cinhala unikavihera wiira nikhitiri waalihera amuciihu ni ukhalana ukati wonswalela Yehova. Khawaahala ureera ukopakopa nsurukhu nihinhaleehu ukhitiri uliva awula urihakaca ukati mwinci wiira niwacere mihakhu cihu. Ciicammo, nihaana uhiitthaala wiira nihivaresese mihakhu cirineehu. (Mat. 6:19, 24) Ukati ila ituninyeela untepaaya waattamela umwiisooni, hiiva nihaana uthanla wakhala wiira ninhala unkhuluvela Yehova awula ninhala ukhuluvela mihakhu cihu.
“NYUUVA NHAANA NVILELAKA”
15. Kontha isiyani makristau o heperewu yaalamuliyaaya uvilela?
15 Makristau aheperewu yahaana yavilelaka cinene ukati waamini waya waahalaaya uttehattehiya. (Mabere. 10:36) Hataa ukhalaka wiira akiinaayo yaholupatthiya khalayi, yahaavo atthu enci yaakhanle makristau ukati waakhalaaya ninnema, woohilupatthiya cinene. Phimaana, Paulu ahowuupusera wiira yaalamuliya ukhala owiitthenkaceene wiira akhale oolipa ukati waahalaaya ulupatthiya ni unvaresesa Yehova mpaka wahalaaya ukhwa, khampa Yesu. (Mabere. 12:4) Ukati maloko eekristau waatepaaya umwareela, ayuuta enci yantepa urusiya ni yaanaalupattha ayuuta akhwaawe yalakela ukhala makristau. Nkwaha mmoca, ikhurupu yaatthu enci yahontuphela Paulu ukati waalalyeeraawe u Yerusalemu. Ayuuta oopwahaka 40 “yaholapha wiira khayaahala ulya itthu ni hataa uwurya ahipacenre umwiiva Paulu.” (Mite. 22:22; 23:12-14) Hataa akhalaka wiira yanthanyinnya ni yanlupatthiya, ayo makristawaayo khayaalamuliya uhiya uthukumana wiira answalele Yehova, ulalyeera ihapari comaana ni ulipihaca waamini waya.
16. Manannani iwarakha yo maberewu inhalaaya unikavihera ukhala oolipa nalupatthiyaka? (Maberewu 12:7)
16 Isiyani yaahala waakavihera makristau aheperewu uvilela hataa ukhalaka wiira yanlupatthiya? Paulu apheela waakavihera woona wiira ulupatthiya iwoora ikiina uhaana ifayita. Vano, uyo aheera wiira ukati makristau unttehattehiyaaya waamini waya, Nluku pooti uvarela nteko iyo itthwiiyo wiira aatthenkace. (Nsome Maberewu 12:7. e) Nwo utthenkaciya nwo wanhala waakavihera ukhalana makhalelo eekristau ofayita. Wakhalaka wiira yanweheeha itthu yomaana yaahala uwiirannyeela yavilelaka, ayo makristawaayo khawaahala waarikela uvilela.—Mabere. 12:11.
17. Isiyani Paulu yaacuwelaawe nhina ulupatthiya?
17 Paulu ahaakurumica makristau aheperewu wiira yahaana yakhalaka oolipa nrima ni uhoocya hataa yalupatthiyaka. Apostolu Paulu ahaavaha ikano comaana, kontha khalayi uyo ciicammo ahaalupattha makristau. Phimaana, Paulu ancuwela itthu yaahimyaawe. Ukhala wawe nkristau, uyo ciicammo khamala ulupatthiya. (2 Akor. 11:23-25) Vano, Paulu ancuwela sana-saana itthu ayo makristawaayo yaalamuliyaaya upanka wiira avilele. Uyo ahowuupusera wiira yaananaka marikariko, ayo khayaalamuliya wiikhuluvela asineenyaaya, masi yahaana unkhuluvela Yehova. Ayo yahaana ukhala oolipa nrima ni wuupuwela co: “Yehova phi nikavihero naka; akinhala woova.”—Mabere. 13:6.
18. Isiyani inhala unikavihera nalupatthiyaka?
18 Mahukwaala, mayamunna akhwaawe anaalupatthiya. Hiiva pooti waakavihera naalompelaka ayo mayamunnaayo ni, ikwaha cikhwaawe, hi pooti upanka citthu wiira naakavihere. (Mabere. 10:33) Masi Ibiibiliya inaahimyeeha sana-saana, yeeraka wiira “atthu otheene ampheela ukhala yanswalelaka Nluku, wamoca ni Yesu Kristu, ciicammo anaahala ulupatthiya.” (2 Tim. 3:12) Phimaana, otheene cihu ninlamuliya ukhala owiitthenkaceene wiira waphiyaka ukati ninhaleehu ulupatthiya nikhale oolipa. Vano, nihihiye unkhuluvela Yehova ni waamineeha wiira uyo naahala unikavihera uvilela marikariko otheene anhala unikhumelela. Uyo naahala waawaanela nnema ale ahinhiya unswalela.—2 Atesal. 1:7, 8.
19. Isiyani inlamuliyeehu upanka wiira nikhale owiitthenkaca ukati wo masakha moolupale? (Nwehe ciicammo ilatarato.)
19 Iwarakha Paulu yawantikhenlyaawe makristau aheperewu, khweeliini yaahakavihera ayo makristau oopaceraayo ukhala owiitthenkaca ukati yaahalaaya waanana masakha yaahala ukhumelela. Paulu ahaakurumica wiira yahaana usoma nuulumo cinene na Nluku ni wiiweha saana. Yapankaka iyo, ayo yanhala ukhitiri ucuwelela citthu ceetthucihiya cowoothiya caahala ulolovihaca waamini waya ni ukhotta. Uyo ahaakurumica ulipihaca waamini waya wiira akhitiri utthara malakihero Yesu yaavahilyaawe ale yaahoolela nloko. Woohipicapica, uyo ahaakavihera ayo makristawaayo wiira akhitiri uvilela ukati waahalaaya waanana marikariko ni yoone khampa antthenkaciya ni Yehova, akhanle Apaapeehu onifento. Hiiva ciicammo ninlamuliya utthara nnyo ikanonnyo. Napankaka commo, ninaahala ukhala ookhuluvelya mpaka umwiisooni.—Mabere. 3:14.
Makristau ookhuluvelya yaavilela yaahocalihiya. Utthawa waya uyuuta, ayo khayaahiile uthukumana. Isiyani inniitthucihaaya? (Nwehe iparaagarafu 19)
NCIPO 126 Nikhale Oowiilipiha, Oowehaweha, ni a Ikuru
a Maberewu 5:14 Masi iyoolya yoolipa anlya atthu arina waamini woolipa. Ayo akhanle atthu alemalenle uvarela nteko moopuwelelwaaya wiira acuwele isiyani ikhanle itthu yomaana ni yoohinamaana. 6:1 Phimaana, vanova nihileehu wiitthuca citthu coopacera ca Yesu Kristu, niikurumice ukhomaala, wohaathipela-tho aliserise, akhanle uttharuwa upanka citthu coohiloka ni umwaamini Nluku.
b Ikapiitulu yoopacera, Paulu horomola citthu 7 cowantikhiya cowaarya ceeheperewu, wiira utthara mananna Yesu eetthucihilyaawe onswalela Yehova phirina ifayita uvikana mananna a Yuuta yanswalelaaya Nluku khalayi.—Mabere. 1:5-13.
c Maberewu 13:17 Nkhale oowiiwelela ale anhoolela iriyariinyu ni nkhale ootthunela moolumwaaya, kontha ayo phi noowehawehani ni anaahala uhukhumwiya; wiira avare uyo ntekooyo yatteeliyaka nrima, ni kahi yacukulacaka, kontha ucukulaca waya waanaahala wuuhononani.
d Maberewu 13:5 Nhikhale wuucivakani nsurukhu cinene muukumini winyu; ni nkhale ootteeliya nrima ni citthu cirineenyu. Kontha uyo heera: “Mi akinhala wuuhiya ni akinhala wuunyanyala.”
e Maberewu 12:7 Nwuupuwele atthu anhoolela iriyariinyu, atthu yuuhimyenreni nuulumo na Nluku, ni ukati wooweha ifayitaaya meettelwaaya, ntakihe waamini waya.
