Ukati uneetthenkaceehu wiira nisome, pooti wiikoha co: ‘isiyani mpheelaka wiitthuca? Hataa ukhalaka commo, hiiva nihaana uwehacera saana wiira nihihiyerere wiitthuca itthu Yehova impheelaawe ni hataa ikhalaka yoovirikana niitthu hiiva yaapheeleehu. Manannani ninhaleehu wiitthenkaca wiira niphwanyere ifayita itthu insomeehu?

Nlompe nlepelaka ucuwelaca. Munlepele Yehova wuukaviherani wiira nkhitiri ucuwela itthu uyova impheelaawe wiira mwiitthuce nenna co. (Tiya. 1:5) Nhitteeliye niitthu incuweleenyu paahi.—Miru. 3:5, 6.

Nhivyaavyeehe ikuru cinkhuma mbiibiliyani muukumini winyu. “Nuulumo na Nluku nikhanle nokhweeli.” (Mabere. 4:12) Vano, ukati wotheene nyuuva nnosomeenyu Ibiibiliya, nnarwaa wiitthuca citthu co phiyaaru ni cinhala wuukaviherani nimananna oovirikana. Iyo inhala wiirannya wakhalaka wiira nyuuva nnohala usoma wiira mphwanyere ifayita ni ucuwela itthu Yehova inwiitthucihaweni.

Nvahe ifayita yotheene Yehova ineetthucihaawe. Iyoolya yo mminepani Yehova innivahaawe, inkhala khampa ‘iyoolya yoociva yowaapennya.’ (Isai. 25:6) Vano, nhicise iyoolya ihinoocivelani. Munhiye Yehova wiira ookavihereni ukhala ntthu omaana ni unaahala wuucivela upheela wiitthuca itthu Yehova ineetthucihaawe!