MWAHA WOOSOMIYA 39
NCIPO 125 Atthu “Òmoriwa Ikharari” Anoohakalala
Ntteeliye nrima nlattu wowoonihera ukhala ntthu namavaha
“Uvaha unaatteeliha nrima cinene uvirikana ni uvahiya.” —MITE. 20:35.
ITTHU INHALEEHU WIITTHUCA
Ninaahala woona mananna hiiva ninlamuliyeehu ukhala anamavaha ni kontha isiyani iyo inniphwanyihaaya utteeliya.
1-2. Kontha isiyani Yehova nopheelaawe wiira nikhale ootteeliya naakaviheraka akhunanihu?
YEHOVA unumpa wawe, uyo numpile nimananna hiiva unnitteelaaya nrima naapankelaka citthu comaana akhunanihu uhiya uweherera uvahiya. (Mite. 20:35) Masi, niireke wiira hiiva khaninkhala ootteeliya navahiyaka itthu? Mena. Otheene cihu ninaakhala ootteeliya naakhelaka itthu. Masi, naakaviheraka akhunanihu, hiiva ninaatepa ukhala ootteeliya nrima. Ni ikhanle itthu yomaana ukhala wiira Yehova numpile naayo manannaayo. Kontha isiyani?
2 Kontha Yehova ancuwela wiira iyo yaahala ukhala inanna hiiva yoowehera saana utteeliya wihu. Hiiva ninaakhala ootteeliya cinene nuupuwelaka mananna owaakavihera akhunanihu. Ni ikhanle itthu yomaana ucuwela wiira Yehova numpile naayo manannaayo.—Isaa. 139:14.
3. Kontha isiyani Yehova neehaniyaawe “Nluku ootteeliya”?
3 Ibiibiliya ineera wiira waapankela akhunanihu citthu comaana unaaphwanyiha utteeliya. Phimaana, khanintikinihiya wiira Yehova khanle ‘Nluku ootteeliya.’ (1 Tim. 1:11) Uyo hipacenre unipankela citthu comaana ni khaavo-tho noonihera unamaana uvikana Yehova. Khampa apostolu Paulu oolumilyaawe eeraka: “Kontha nlattu waawawe, hi nihaana ukumi, ninaweetta ni nihaavo.” (Mite. 17:28) Ikhweeli ukhalaka wiira “itthuvo yomaana yotheene ni yoovahiya yoohipahuwa yotheene” inkhuma wa Yehova.—Tiya. 1:17.
4. Isiyani inhala unikavihera ukhala ootteeliya cinene?
4 Khweeliini, otheene cihu ninaapheela ukhala ootteeliya wo waapankela citthu comaana akhunanihu. Ni ninhala ukhitiri upanka iyo natakihaka unamavaha wa Yehova. (Efesu 5:1) Woosoma ntakihero na Yehova ninaahala woona, isiyani inlamuliyeehu upanka wakhalaka wiira ntthu khanoonihera usukhuru niitthu impakenleehu. Iyo inaahala unikavihera uhihiyerera waapankela citthu comaana akhunanihu ni wuncerera utteeliya wihu.
NTAKIHE UNAMAVAHA WA YEHOVA
5. Citthuni cikhwaawe Yehova nonivahaawe?
5 Manannani Yehova oonihenryaawe ukhala namavaha? Moone matakihero makhwaawe. Yehova naaniwacera ni citthu cinnithwa. Atthunaka Yehova khannivaha citthu cotheene cinnicivela, masi uyo khanhiya univaha citthu cimpheeleehu wiira nikhale akumi. Wootakihera, Yehova naanivaha iyoolya, yoowara ni nipuro nookhala. (Isaa. 4:8; Mat. 6:31-33; 1 Tim. 6:6-8) Niireke wiira Yehova noopanka iyo nlattu wookhanyererihiya? Khweeliini mena! Vano, kontha isiyani Yehova nonikaviheraawe?
6. Isiyani ineetthuceehu nhina Matewus 6:25, 26?
6 Yehova naanivaha yotheene impheeleehu kontha uyo naanifenta venci. Moone itthu Yesu yaahimilyaawe nhina Matewus 6:25, 26. a (Nsome.) Yesu naavarela nteko ntakihero naasaanuni. Oolumaka asaanuni, uyo enre co: ‘Ayo khaanaala ni khanhepha, ciicammo khanthotokaniha nnikhupini.’ Vano moone itthu yaahimilyaawe-tho: ‘Masi Apaapeenyu ari wiirimu, anawaaliha ayo asaanunyaayo.’ Vano Yesu ahokoha co: ‘Niireke nyuuva khantepile ukhalana ifayita waavikana asaanuni?’ Isiyani ineetthuceehu? Moonelo wa Yehova aswalyaawe ahaana ifayita uvikana inama. Vano, wakhalaka wiira Yehova naawacera inama, hiiva pooti wankupaliihu wiira Yehova naahala uniwacera! Khampa nyari naawacera amucyaawe, Yehova ciicammo naanifenta cinene ni uyo khanhala uhiyerera uniwacera.—Isaa. 145:16; Mat. 6:32.
7. Manannani ootakiha unamavaha wa Yehova? (Nwehe ciicammo ilatarato.)
7 Nlattu wo nifento na Yehova, hiiva ciicammo pooti wanaakavihereehu akhunanihu ni citthu cinaathwa. Wootakihera, nyuuva nnaacuwela munna noopheela ukaviheriya nhina iyoolya awula yoowara? Yehova pooti wuvarelani nteko nyuuva wiira munkavihere uyo munnooyo. Apoovu a Yehova ciicammo ancuweliya ukhala anamavaha venci-venci caakhumelelaka ihasara. Ukati wo reetta yo Koronaviiru mayamunna ni mayanuunu yaaneekurumica uvaha iyoolya, ikuwo ni citthu cikhwaawe wiira yaakavihere ale yaapheela ukaviheriya. Ni mayamunna enci anaavaha ncanko wiira akavihere miteko cinvariya ntuninyani motheene. Iyo inaanikavihera uhihiyerera waawacere mayamunna ni mayanuunu yaakhumelenle ihasara ntuninyani motheene. Mayamunna anoonihera ukhala anamavaha anaweettela itthu imphwanyannya nhina Maberewu 13:16: “Nhiliyale waapankela citthu comaana akhunaninyu ni waamela irineenyu, kontha Nluku unancivela wiikurumica winyu ayo manannaayo.”
Otheene cihu pooti wanontakiheehu Yehova ni uthoonyera ukhala atthu anamavaha (Nwehe iparaagarafu 7)
8. Manannani makhwaawe Yehova nonikaviheraawe? (Afilipo 2:13)
8 Yehova naavaha ikuru. Yehova naakhala ootteeliya aavahaka ikuru cimpheelaaya aswalyaawe. (Nsome Afilipo 2:13. b) Nyuuva nhopaca ulompa nlepelaka ikuru wiira nkhitiri utthema uttehattehiya ni wiira nvilele masakha nnoviriheenyu? Atthunaka nyuuva mwalepenle paahi ikuru wiira nkhitiri waanana masakha yuukhumelenleni nihuku nimoca. Ukati waakhuliyaaya ulompa winyu, nyuuva nhoopuwela moolumo a Paulu ni nhokupali niitthu uyo yaahimilyaawe nhina Afilipo 4:13 : “Citthu cotheene kinkhitiri nlattu wa ule nokivaha ikuru.”
9. Manannani ninhaleehu untakiha Yehova nivarelaka nteko ikuru cihu ni ukatiihu wiira naakavihere akhunanihu? (Nwehe ciicammo ilatarato.)
9 Hataa nikhalaka atthu oopahuwa, hiiva pooti utakiha mananna Yehova novarelaawe nteko ikuru. Khweeliini, hiiva khaninhala ukhitiri ukawaniha ikuru cihu naatthu akhwaawe. Hataa ukhalaka commo, hiiva pooti uvarela nteko ikuru cihu wiira naakavihere akhunanihu. Wootakihera, hiiva pooti uthumathuma awula uwacera citthu cikhwaawe naakaviheraka mayamunna owuuluvala awula anwerennya. Wakhitiryaaka hiiva ciicammo pooti waakavihera nakwecakwecaka Usalau yo Mwene. Uvarela nteko ikhuru cihu naayo manannaayo, unaahala waakavihera ale anonswalela Yehova.
Hiiva pooti uvarela nteko ikuru cihu ni ukatiihu wiira naakavihere akhunanihu (Nwehe iparaagarafu 9)
10. Manannani ninhaleehu waalipiha akhunanihu ni moolumweehu?
10 Nhiliyale wiira moolumo ciicammo anaaphwanyiha ikuru. Nyuuva nnaakhitiri umuupuwela munna aahala ukhala ootteeliya nlattu woottottopeliya nimananna omaana? Nyuuva nnancuwela ntthu noopheela umaalihiya? Naayo manannaayo, nnoonela cani nyuuva ulakela ni umwiirela wiira nnanfenta cinene. Nyuuva pooti umuulumana co ni co awula munvarelaka nteko telefooni, iwarakha, umwantikhela imensage awula E-mail. Nyuuva pooti uhitepa ukhala niiwasiwaasi niitthu mwaahaleenyu unhimerya. Ni moolumo ooyevaca paahi ookhuma wanrima winyu, pooti ukhalaka phiitthu yaapheelaawe munnooyo wiira hihiyerere ukhala ookhuluvelya nenna co ni aturuwele ukhalana niweherero.—Miru. 12:25; Efesu 4:29.
11. Manannani Yehova nohalaawe univaha ucuwelaca?
11 Yehova naavaha ucuwelaca. Apostolu Tiyaku hantikha co: “Wakhala wiira haavo ntthu hirina ucuwelaca, hihiye unlepela Nluku ni uyo ntthuuyo naahala uvahiya ucuwelaca, kontha Nluku nawaavaha atthu otheene woohimatthepwa ni woohaattekutta.” (Tiya. 1:5; niweherero.) Khampa anooniheraaya ala moolumwaala, Yehova uhiya usunka ucuwelaca wawe para uyova paahi, unawonanya wiira naavaha. Uyo nawaavaha ucuwelaca urinaawe atthu. Ciicammo, ukati Yehova unvahaawe ucuwelaca, naapanka iyo ‘woohimatthepwa’ ni ‘woohiittekutta.’ Yehova khampheela wiira hiiva niicoone ukhala ooriipiya nrima nlattu woolepela ukaviheriya nuuyova. Khweeliini, uyo nopheela wiira hiiva nihaana ulepela ukaviheriya.—Miru. 2:1-6.
12. Ukati umpheeleehu wiira naakavihere akhunanihu ile incuweleehu?
12 Vano hiiva, niireke pooti wanontakiheehu Yehova ni waahimerya akhunanihu itthu incuweleehu? (Isaa. 32:8) Apoovu a Yehova anaakumiha ukati wiira yaahimerye akhunanaya itthu yiitthucilyaaya. Wootakihera, hi ninawaatthenkaca anamalalyeera onaanaano wiira avare saana nteko woolalyeera. Yooniheraka uvilela, mahumu anawaatthenkaca arumiya o wanlokoni ni mayamunna oopattisiya wiira awacera saana mirintti cinkhalanaaya wanlokoni. Ni ale avirihile ukati mwinci yavaraka nteko wootekateka ni woowehaweha Isalau co Mwene, ciicammo anawaatthenkaca mayamunna apacenre uvara uyo ntekooyo naanaano ni uvara nteko wa Yehova.
13. Ninhala untakiha cani Yehova ukati wo waatthenkaca akhunanihu?
13 Mmananihe untakiha Yehova ukati wo waatthenkaca akhunaninyu. Muupuwele wiira Yehova naavaha ucuwelaca wawe. Inanna imocaaru, hiiva nimpheela waavaha ile incuweleehu atthu ampheela wiitthuca. Hiiva khaninkhala owoova napheelaka wiitthuciha akhunanihu ile incuweleehu ni woova wiira ahaavo atthu anhala ukhala nkhayi nihiiva wanihukuni. Phimaana, khaninlamuliya wuupuwela co: ‘Khaavo ntthu kiitthucihile! Khula ntthu eeciitthucihe mwanenyaawe.’ Khaavo nswali a Yehova nolamuliya wuupuwela ayo manannaayo. Uhiya commo, hi khanintteeliya nlattu wo wiitthuciha akhunanihu ile incuweleehu, masi ciicammo ile yotheene inavaheehu wiira naatthenkace. (1 Atesal. 2:8) Niweherero nihu nikhanle wiira ‘wanihukuni ayo pooti wiivaherera wiira yeetthucihe akhunanaya.’ (2 Tim. 2:1, 2) Otheene cihu nakhalaka anamavaha ni nawiitthucihaka atthu ile incuweleehu, hiiva ninaatakiha unamavaha wa Yehova ni ninaahala ukhala ootteeliya wo citthu cotheene.
WAKHALAKA WIIRA NTTHU KHANVAHA IFAYITA ITTHU IPANKILEEHU
14. Isiyani atthu enci impankaaya naapankelaka itthu yomaana?
14 Nakhalaka anamavaha, venci-venci navahaka mayamunneehu, ayo ananisukhuru ninrimaaya wotheene. Atthunaka ayo pooti uvaherera iwarakha yasukhuruku awula upanka iyo nimananna makhwaawe. (Akol. 3:15) Iyo itthwiiyo yeerannyaaka, hiiva ninaakhala ootteeliya nlattu wo waapankela itthu yomaana ayova.
15. Isiyani inlamuliyeehu wuupuwela wakhalaka wiira ntthu khanvaha ifayita itthu ipankileehu?
15 Masi, ninlamuliya ucuwela wiira kahi ikwaha cotheene atthu anaahala uvaha ifayita itthu yaapankenleehu. Ikwaha cikhwaawe pooti ucuwelela wiira ntthu khavahile hataa vakaani ifayita ukatiihu, ikuru cihu ni citthu cihu ninvahileehu. Wakhala wiira iyo itthwiiyo inawiirannya, isiyani inlamuliyeehu upanka wiira nihihaleele utteeliya awula nihikhale ooriipiya nrima? Muupuwele moolumo oveerusu yo ula mwahoola, Miteko 20:35. Hiiva, khanintteeliya nlattu atthu woovaha ifayita awula mena itthu naapankenleehu. Hiiva pooti wanthanleehu waakavihera akhwiihu hataa ukhalaka wiira ayo khansukurweela. Masi manannani? Nwehe mananna makhwaawe.
16. Isiyani inlamuliyeehu uweheeha?
16 Wiikurumice untakiha Yehova. Yehova nawaavaha citthu comaana atthu. Hataa ukhalaka wiira ayo ikwaha cikhwaawe khansukhuru. (Mat. 5:43-48) Yehova enre: ‘Hiiva naapankelaka citthu comaana akhunanihu woohiweherera uturuseliya hataa itthu, ninaahala utepa utthuveliya.’ (Luka 6:35) Vano, nhikhale ooriipiya nrima wakhalaka wiira ntthu khanvaha ifayita itthu ipankileehu. Muupuwele wiira Yehova naahala wuutthuvelani ni citthu comaana nlattu wo waakavihera akhunaninyu ni nlattu wookhala ‘namavaha ootteeliya.’—Miru. 19:17; 2 Akor. 9:7.
17. Isiyani innikurumica wiira naakavihere akhunanihu? (Luka 14:12-14)
17 Itthu ikhwaawe inlamuliyeehu upanka wiira nintakihe Yehova ukhanle wuupuwela itthu Yesu ihimilyaawe nhina Luka 14:12-14. c (Nsome.) Khunnanara unlattula ntthu wiira aalye nkhayi nihiiva awula woonihera unamaana atthu ninaacuweleehu wiira anaahala unipanka ciicammo nihiiva. Masi, nacuwelelaka wiira ninawaapankela itthu akhunanihu nawehereraka uturuseliya? Hiiva pooti upanka itthu Yesu ihimilyaawe. Pooti wanonihereehu ukhala anamavaha naatthu ahirina mananna ooniturusela itthu naapankenleehu. Naayo manannaayo, hi ninaakhala ootteeliya cinene kontha nintakiha unamavaha wa Yehova. Ayo akhanle mananna ovaresesa citthu caahala unikavihera ukhala ootteeliya naapankelaka itthu yomaana akhunanihu e hataa ahooniheraka usukhuru.
18. Isiyani inhala unikavihera uhikhala nuulumaka pusya akhunanihu?
18 Nhiwuulume pusya akhunaninyu. (1 Akor. 13:7) Wakhalaka wiira ntthu khansukhuru itthu nyuuva mumpankenleenyu, mwiikohe co: ‘Kiireke wiira ula ntthuula khanle oohisukhuru awula hooliyala wiira asantte?’ Atthunaka ihaavo itthu imwiirihile uhisukhuru khampa naweherereehu. Atthu akhwaawe, anaakhala oosukhuru cinene, masi unawaarika uhimya itthu inwiira. Atthunaka ayo anawoona ihaaya nlattu wookaviheriya, utepa wakhalaka wiira ayo yaanaakavihera akhunanaya khalayi. Phimaana, ikhanle itthu yofayita wuupuwela wiira hi ninawaafenta mayamunneehu, khanhala wuupuwela waatarawaca ni khaninhala uhiyerera waakavihera akhunanihu wanitteelaka nrima.—Efesu 4:2.
19-20. Kontha isiyani ikhanlyaaya itthu yofayita ukhala oovilela naapankelaka itthu yomaana akhunanihu? (Nwehe ciicammo ilatarato.)
19 Nvilele. Nuulumaka unamavaha, ncuwelaci mwene Salomau hantikha co: ‘Mwaameele akhunaninyu itthu nrineenyu, kontha yaviraka mahuku nnaahala uphwanya-tho.’ (Ekles. 11:1) Khampa anooniheraaya ala moolumwaala, atthunaka akhwaawe anoonihera usukhuru unavinre ukati mwinci awula “mahuku menci.” Moone itthu yaakhumelenle arokorihu amoca.
20 Cinavinre myaakha, amwaara a Mootoli Osirikwiitu yahomwantikhela iwarakha arokorihu yaapattisiye naanaano, yaahimeryaaka ifayita urinaaya uhihiyerera ukhala ookhuluvelya wa Yehova. Cinavinre myaakha 8, ayo yahaakhula yiiraka: “Miva khaapheela uwantikhelani ni wuuhimeryani mananna moolumweenyu akikavihenryaaya muukumini waka myaakha cotheene civinre. Nyuuva khannocuwela ikwaha kavi iwarakheenyu ikikavihenryaaya cinene. Ni iveerusu nyuuva mwantikhileenyu ihokivara nrima. Nimiiva akiliyanle-tho iyo iveeruswiiyo.” d Vano uhimyaca waya masakha avirihilyaaya, arokorihu aheera: “Ikwaha cikiina mi koopuwela uhiya ikhweeli, mirintti ni uhiya cotheene. Masi iveerusu yantikhileenyu nanlelo kinawuupuwela wanrimani waka ni ihokikavihera uhihiya. Myaakha 8 kivirihilyaaka, iyo iwarakheeyo ihokikavihera uhihiyerera uvilela. Muupuwele utteeliya waarinaaya amwaara a Mootoli Osirikwiitu waakhela waya ayo moolumwaayo anavinre mahuku menci! Inanna imocaaru, atthunaka hiiva pooti waakhela moolumo anoonihera usukhuru cinavinre myaakha cinci.
Atthunaka ntthu ninkavihenreehu noohala urwaa unisukhuru unavinre ukati mwinci ninankavihenre (Nwehe iparaagarafu 20) e
21. Nlattuni nimpheeleehu utakiha unamavaha wa Yehova?
21 Khampa noonileehu, Yehova numpile nimananna omaana. Uyo numpile wiira nikhale ootteeliya cinene naakaviheraka akhunanihu uhiya waakhela. Ni hiiva ninawiicoona ukhala saana nakhitiri waakavihera mayamunneehu. Ni ikhanle itthu yomaana yasukhurwelaka itthu hiiva naapankenleehu. Ni hataa ukhalaka wiira akiina khanvaha ifayita itthu naapankenleehu wiira naakavihera, ninaakhala ootteeliya kontha ninaacuwela wiira nihopanka itthu yomaana. ‘Yehova naahala univaha cinene uvikana yotheene ipankileehu wiira naakavihere akhunanihu.’ (2 Ikor. 25:9) Nuulumaka waavaha citthu comaana akhunanihu, khaavo noohala umpwaha Yehova! Ni khiivo-tho itthu yootepa unitteeliha nrima uvikana utthuveliya ni Yehova. Vano, nihaana uhihiyerera utakiha unamavaha wa Apaapeehu o wiirimu, Yehova.
NCIPO 17 “Mi kinaapheela”
a Matewus 6:25 “Nlattu wo iyo itthwiiyo, kinwiirela co: Nhiye utepa ukhala nimasukhuli muukumini winyu , moopuwelaka itthu yoohala ulya awula uwurya, ni niirutthwiinyu, moopuwelaka itthu yoohala uwara. Ukumiinyu phitepile ukhalana ifayita uvikana iyoolya, ni irutthwiinyu phitepile ukhalana ifayita uvikana ikuwo cinwareenyu. 26 Mwaaweheehe asaanuni anvava uculu; ayo khaanaala ni khanhepha, ciicammo khanthotokaniha nnikhupini, masi Apaapeenyu ari wiirimu, anawaaliha ayo asaanunyaayo. Niireke nyuuva khantepile ukhalana ifayita waavikana asaanuni?
b Afilipo 2:13 Nluku thi ule, khampa cinoncivelaaya, nookhitirihani upanka citthu, ni nowiirihani wanrimani upheela nnyo citthunnyo ni noovahani ikuru wiira nkhitiri upanka.
c Luka 14:12 Ni ciicammo, Yesu ahonhimeerya ule anlattunle eeraka: “Watthenkacaka iyoolya yoothana awula yoohiyu, upheelaka waalattula aatthu, uhaalattule paahi asipatthannya, asuulupalyaa, amucyaa ni amwaattamanannya mathaciri. Wapanka commo, naayo ciicammo, anaahala wuulattula ni iyo inhala ukhala wuulivyaanihera. 13 Masi, watthenkacaka iyoolya wiira waalattule atthu, waalattule amasikhini, oopahuwa, oottumpela, oohoona, 14 ni unaahala utteeliya. Kontha ayo, khaarina itthu wiira yuulivyaanihere, masi weeva, unaahala utthuveliya ukati unhalaaya wunwelelihiya anasariya.”
d Iveerusu yantikhilyaaya arokorihu nwarakhani, yaari 2 Joau 8, neera: ‘Nweheehe raatta wiira nyuuva nhihaleele citthu mphwanyileenyu nvaraka nteko, uhiya commo, nnaahala utthuveliya.’
e ILATARATO: Ila ilataratweela, amwaara a Mootoli Osirikwiitu yaakaviheraka arokorihu amoca ukhala oolipa nhina mminepani yavarelaka nteko iwarakha yawantikhenlyaaya. Cinavinre myaakha uttuli, ayova anawaakhela iwarakha yathoonyeraka usukhuru arokorihu yaakaviheriye.
