MWAHA WOOSOMIYA 38
NCIPO 25 Atthu a Vameekhaaya
Nyuuva nri mootthara itthu ihimilyaawe Yesu?
“Mmoca naahala ucisiya ni nkinakuuyo naahala uhinnya.”—MAT. 24:40.
ITTHU INHALEEHU WIITTHUCA
Nhina ula mwahoola, ninaahala woona matakihero mararu Yesu ahimilyaawe ni ucuwela nlattuni unvaranacaaya nuukati wohukhumu unhala wiirannya umwiisooni.
1. Ihukhumuni inhala wiirannya woohipica?
ULA UKATI unkhaleehuula ukhanle ukati wootteeliha nrima! Marukunuso moolupale anawiirannya wowaakuvyaaca. Woohipica, Yesu naahala urwaa unhukhumu khula ntthu va watuninyani va. Mwaneene Yesu, ahohimya ukati waahalaaya ukhaliya mpaka uphiya ukati wohukhumu, waavaha wawe “nthoonyero” maapostolwaawe naahala woonihera ukati waahalaawe uwa ni ‘umalamalihiya wo ila ituninyeela.’ (Mat. 24:3) Nno nthoonyeronno, nimphwanyannya nhina ilivuru ya Matewus ikapiitulu 24 ni 25 ni ciicammo Markus ikapiitulu 13 ni Luka ikapiitulu 21.
2. Isiyani inhaleehu woona nhina ula mwahoola ni manannani cinhalaaya unikavihera?
2 Yesu ahovaha ikano yomaana avarelaka nteko matakihero mararu. Ntakihero nokhontwaa ni nopuri, ntakihero naasimwaarusi ankhili ni oohankhili ni ntakihero Notalentu. Wokhula ntakihero ninaanikavihera woona mananna moopuwelelo ni makhalelo antthu cinvaranacaaya nimananna cinhalaawe urwaa uhukhumwiya. Nuupuwelaka ayo matakiherwaayo, nttwee noone citthu comaana nineetthuceehu ni woona mananna cinhaleehu weettela. Woopacera nttwee noone ntakihero nokhonttwaa ni nopuri.
IKHONTWAA NI IPURI
3. Ukatini Yesu unhalaawe waahukhumu atthu?
3 Ntakihero Yesu noolumilyaawe nokhontwaa ni nopuri, aaca uhukhumwiya waatthu arina iparakha yoowiha ihapari comaana ni ulakela wakhala wiira anaahala utthuna waakavihera mayamunna oothanliya awula mena. (Mat. 25:31-46) Yesu naahala urwaa uhukhumu ikhontwaa ni ipuri ukati wo “masakha moolupale” unahanle ukati vakaani paahi ihinaaya uwa ikhotto ya Harmacetooni. (Mat. 24:21) Khampa makampuci hintakanihaawe ikhontwaa ni ipuri, Yesu naahala urwaa waakawaniha atthu anrwaa waakavihera mayamunna oothanliya naale anhala urwaa uhaakavihera.
4. Toko cinthoonyeraaya Isaiya 11:3, 4, kontha isiyani ninlamuliyeehu ukupali wiira Yesu naarwaa waahukhumu atthu niisariya? (Nwehe ciicammo ilatarato yo .)
4 Yehova honvahacera Yesu ukhala suwiisi. Inatiri co mbiibiliyani cinawoonihera wiira Yesu naahala urwaa uhukhumu niisariya. (Nsome Isaiya 11:3, 4. a) Wohukhumu Yesu naawehacera itthu khula ntthu impankaawe, inoolumaawe ni inoopuwelaawe, uhela nhina mananna nintafitiihu Ipottha yookhuluvelya ni yankhili . (Mat. 12:36, 37; 25:40) Coo Yesu naahala urwaa ucuwela tipani noohala waakavihera mayamunna oothanliya ni unvaraaya. b Inanna imoca ale alattanihiye nikhontwaa anaakavihera asunnawe Yesu ukhalaka wiira anaavara nteko woolalyeera. Ayo atthwaayo anhala uhukhumwiya khampa ‘anasariya’ ni anaahala urwaa waakhela niweherero nokhalana ‘ukumi woohimala’ va watuninyani va. (Mat. 25:46; Apoka. 7:16, 17) Iyo ikhanle itthuvo yomaana inhalaaya urwaa waakhela yaahihiyerereke ukhala oovilela! Uhihiyerera ukhala ookhuluvelya ukati wo masakha ni anavinre masakha moolupale, ncina naya ninaahala ukhala “nlivuruni yookumi.”—Apoka. 20:15.
Woohipica Yesu naahala urwaa waahukhumu atthu ari khampa ikhontwa awula ari khampa ipuri (Nwehe iparaagarafu 4)
5. Isiyani nineetthuceehu ni ntakihero nokhontwaa ni nopuri ni tapani anlamuliya utthara?
5 Moonihere ukhala ookhuluvelya. Ntakihero Yesu noolumilyaawe nokhontwaa ni nopuri, ninwaaca venci cinene ale arina niweherero nookhala va watuninyani va. Ayo atthwaayo anawoonihera waamini yaakaviheraka asunnawe Kristu ni ciicammo ukhuluvela cinene ikhurupu yankaani yo makristau oothanliya Yesu aavahacenryaawe khampa “ipottha yookhuluvelya ni yankhili.” (Mat. 24:45) Vano ale arina niweherero nookhala wiirimu? Ayo ciicammo ahaana utthara ikano cimphwanyannya nhina ayo matakihero mararwaayo. Kontha isiyani? Kontha Yesu ciicammo norwaa uwehacera moopuwelelwaaya, makhalelwaaya ni moolumacerwaaya. Ayo ciicammo ahaana woonihera ukhala atthu ookhuluvelya. Phimaana Yesu hohimya matakihero meeli anhala waakavihera makristau oothanliya. Hiva ciicammo, ninaaphwanya ayo matakiherwaayo nhina ilivuru ya Matewus ikapiitulu 25. Vano nttwee noone ntakihero naasimwaarusi ankhili ni oohankhili.
ASIMWAARUSI ANKHILI NI OOHANKHILI
6. Manannani asimwaarusi 5 yoonihenraaya ukhalana ankhili? (Matewus 25:6-10)
6 Nhina ntakihero naasimwaarusi, Yesu ahowuuluma asimwaarusi 10 yaarweele umoonanana ntheli. (Mat. 25:1-4) Otheene caya yaapheela unveleela ntheli ufestani yo ikacamentu. Yesu enre wiira asimwaarusi 5 yaari “ankhili” ni akhwaawe 5 ayo yaari “oohankhili.” Asimwaarusi ankhili yaari owiitthenkaceene ni oohiitthaala wiira anweherere ntheli hataa apicaka uwa. Vano ayo yahowaanana makhura muntitani waya wiira ahele nlampatani waya ni wiira cihittiphye wakhalaka wiira ntheli naahala upica nuuwa. (Nsome Matewus 25:6-10. c) Vano, ukati ntheli waawilyaawe, ayovaca yahorwaaca nkhayi nuuyo nthelwuuyo ufesta yo ikacamentu. Inanna imocaaru, makristau oothanliya yakhalaka owiitthenkaca ni yaahihiyerereke ukhala oohiitthaala ni ookhuluvelya mpaka uwa Kristu, anaahala uhukhumwiya khampa atthu owaaphwanela ukhala nkhayi nintheli. Khanle Yesu, Muumweneni wawe wo wiirimu. d (Apoka. 7:1-3) Masi, isiyani yaawiirannyenle asimwaarusi 5 oohankhili?
7. Isiyani yaawiirannyenle asimwaarusi 5 oohankhili ni nlattuni?
7 Woovirikana naasimwaarusi ankhili, asimwaarusi 5 oohankhili khayaari owiitthenkaca ukati ntheli waawilyaawe. Ilampata caya caahanle vakaani uttiphya ni ayovaca khayarinaca makhura muntitani. Ukati ayovaca ucuwelaca waya wiira ntheli hanle vakaani uwa, ayo yahokhuma wiira yathume makhura. Vano, ntheli uwawawe aaphwanyacile ahinaaya uturuwaca. Phimaana, ‘asimwaarusi yaarica owiitthenkacaceene yaahokelaca nkhayi nuuyo nthelyuuyo nfestani yo ikacamentu ni nkhorooyo wahotthukiya.’ (Mat. 25:10) Ukati asimwaarusi oohankhili wawaacilyaaya, ayo yahomananihaca ukhelaca nfestani yo ikacamentu, masi ntheli ahowiirela co: “Akinocuwelacani.” (Mat. 25:11, 12) Ayo asimwaarusyaayo, khayaari owiitthenkaceene wiira anwehererace ntheli mpaka ukati waahalaawe uwa. Isiyani ineetthucaaya makristau oothanliya ninna ntakiheronna?
8-9. Isiyani makristau oothanliya ineetthucaaya ni ntakihero naasimwaarusi? (Nwehe ciicammo ilatarato.)
8 Moonihere ukhala owiitthenkaca ni oohiitthaala. Yesu khahimile wiira cihaana ukhala ikhurupu piili co makristau oothanliya. Ikhurupu imocyeeyo ukhala yowiitthenkaceene iwehereraka uphiya umwiisooni wo citthu cotheene ni ikhurupu ikhwaaweeyo mena. Uhiya commo, uyo aahimya itthu yaahala wiirannyeela makristau oothanliya yaakhala owiitthaala ni ohitthenkaca wiira avilele mpaka umwiisooni. Naayo manannaayo, ayo khayaahala waakhela iparakha. (Joau 14:3, 4) Iyo ikhanle itthu yuulupale cinene! Hataa nikhalanaka iparakha yookhala wiirimu ni va watuninyani va, otheene cihu nihaana weettela itthu Yesu yaahimilyaawe nhina nna ntakihero naasimwaarusinna. Phimaana, nihaana ukhala oohiitthaala ni owiitthenkaca wiira nikhitiri uvilela mpaka umwiisooni.—Mat. 24:13.
9 Yesu uvarela wawe nteko ntakihero naasimwaarusi wiira anoonihere ifayita irinaaya ukhala ntthu oohiitthaala ni owiitthenkaca, uyo ahooluma-tho ntakihero Notalentu. Nno ntakiheronno ninawoonihera ifayita urinaaya wiikurumica uvara nteko.
Ikhanle itthu yofayita wiiweha ntakihero Yesu ulumilyaawe naasimwaarusi wiira nikhale owiitthenkaceene, oohiitthaala ni oolikaneene wiira nivilele mpaka umwiisooni (Nwehe iparaagarafu 8-9)
ITALENTU
10. Manannani ipottha piili coonihenryaaya ukhala cookhuluvelya? (Matewus 25:19-23)
10 Ntakihero Notalentu, Yesu ahowuuluma asilopwana eeli yaakhanle ipottha yookhuluvelya ni nlopwana mmoca aari ipottha yoohikhuluvelya. (Mat. 25:14-18) Ipottha piili caahonihera ukhala ookhuluvelya kontha canvara nteko nimananna omaana ni cahuncerera mihakhu caapwiiyaaya. Vano, aneene ipottha ahinaaya upanka nkwaha, yaahovaha italentu khula ipottha wiira avarele nteko. Ipottha piili cookhuluvelya caahovara nteko nimananna omaana ni caahovarela nteko italentu waavahiyaaya nimananna oocuwelaca. Vano, isiyani yiirannyeele? Ukati waaturuwilyaawe mwaanene ipottha, ayo yahuncerera italentu waahiyeriyaaya ni mwaanene ipottha ahaattottopila ni yaahokhala ‘ootteeliya nkhayi ni Pwiiyaaya.’ (Nsome Matewus 25:19-23. e) Vano isiyani yeerannyeele niipottha yoneeraru? Isiyani yaapankilyaaya niitalentu waahiyeriyaaya?
11. Isiyani yiirannyeele niipottha yowoolwa ni nlattuni?
11 Ipottha yoneeraru yahakhela italentu, masi iyo yaari ‘yowoolwa.’ Pwiiyaaya apheela wiira avarele nteko ile italentwiile nuucuwelaca. Masi, uhiya upanka khampa pwiiyaaya caapheelaawe, iyo yaahovaca uthipela. Ukati waaturuwilyaawe mwaanene ipottha, iyo yaaphwanynnye woohitthu yoohala unvaha apwiiyaaya. Iyo ipottheeyo khayarina moopuwelelo omaana. Uhiya ulepela uleveleliya nlattu woohikhitiri wuncerera italentu waahiyeriyaaya niipwiiyaaya, nimananna oohisukuru yaahomwiihana ‘nlopwana ookhanyerera.’ Itthu yaapankilyaaya iyo ipottheeyo khayantteelihile nrima pwiiyaaya. Phimaana, italentu waavahiyaaya yaahokumiha ni yaahomoliya waapuwani va.—Mat. 25:24, 26-30.
12. Ipottha piili cookhuluvelya inthoonyihera isiyani mahukwaala?
12 Ipottha piili cookhuluvelya anthoonyera makristau oothanliya akhanle ookhuluvelya. Pwiiyaaya Yesu nawalattula wiira akhale ootteeliya nkhayi nuuyova. Uhiya commo, ayo anaahala utthuveliya wiirimu, wunweelelihiya woopacera. (Mat. 25:21, 23; Apoka. 20:5b) Ntakihero noohinamaana no ipottha yowoolwa, ninaahiya nthoonyero noohinamaana makristau oothanliya nihinlamuliyaaya utakiha. Manannani?
13-14. Isiyani makristau oothanliya ineetthucaaya ni ntakihero Notalentu? (Nwehe ciicammo ilatarato.)
13 Moonihere wiira nnaawikurumica upanka yotheene inkhitiriihu wiira nvare nteko. Ntakihero Notalentu ni ciicammo ntakihero naasimwaarusi, Yesu khapheela uhimya wiira anaahala ukhumelela makristau oothanliya akhwaawe anhala ukhala owoolwa. Uhiya commo, uyo aahimya itthu yaahala ukhumelela yakhalaka wiira anaahala ukhala oololovaca. Ni iyo yanhala wiiriha uhaleela iparakha yaahalaaya ukhalana yowiihaniya ni yoothanliya wiira alamulele nkhayi ni Yesu wiirimu.—2 Pet. 1:10.
14 Matakihero Yesu oolumilyaawe Notalentu ni naasimaarusi anaathoonyera sana-saana wiira makristau oothanliya otheene ahaana ukhala oohiitthaala ni owiitthenkaceene ni ciicammo uvara nteko ni upanka yotheene inkhitiryaaya! Masi, niireke wiira Yesu ihaavo yuulumilyaawe-tho yaahala wiiriha makristau oothanliya uhiitthaala? Iyee. Itthu Yesu yuulumilyaawe nhina Matewus 24:40, 41 ciicammo inaahela nhina uhukhumwiya wo makristau oothanliya ookhicera.
Yesu noopheela wiira makristau oothanliya akhale owiikurumica uvara nteko ni oohiitthaala (Nwehe iparaagarafu 13-14) h
TAPANI ANHALA UCISIYA?
15-16. Manannani Matewus 24:40, 41 unhalaaya waakavihera makristau oothanliya woona ifayita urinaaya ukhala atthu oohiitthaala?
15 Yesu hinaaya wuuluma ala matakihero mararwaala, uyo ahohimya uhukhumwiya wo makristau oothanliya ookhicera anhala uphwanelela wiira yakhale wiirimu. Uyo ahowuuluma alopwana eeli yaavara nteko mmattani ni athiyana eeli yaavarela nteko nsilo. Nnya ikhurupu piili caatthunnya, waakhala toko yaavara nteko mmocaaru. Masi, Yesu enre wiira mmoca anhala ucisiya ni nkinakuuyo anhala uhinnya. (Nsome Matewus 24:40, 41. f) Vano, Yesu ahowiirela attharyaawe co: “Nhiitthaale, kontha khannocuwela nihuku ninwa Apwiyeenyu.” (Mat. 24:42) Ukati Yesu wuulumilyaawe ntakihero naasimwaarusi, uyo ahuuluma itthu imoca yoolikanaca. (Mat. 25:13) Niireke itthu yuulumilyaawe yanlikanaaca? Unawiira, ale anhala ukhala khweeliini oothanliya ni ookhuluvelya phinhala uwennya awula phinhala Muumweneni wawe wo wiirimu.—Joau 14:3.
16 Moonihere wiira nyuuva khaneetthaala. Khula nkristau oothanliya noohala ukhala oowiitthaala, khanhala ukela Mumweneni wo wiirimu. (Mat. 24:31) Masi khweeliini ale otheene anonswalela Yehova arina niweherero nookhala wiirimu awula watuninyani, ahaana aweheraka moolumo a Yesu khampa ikano yowaakurumica ukhala oohiitthaala ni ookhuluvelya.
17. Kontha isiyani hiiva khaninlamuliya ukhala niiwasiwaasi wakhalaka wiira Yehova naalakela waathanla makristau akhwaawe mahukwaala?
17 Hiiva ninancuwela Yehova ratta-raatta, ni naacuwela wiira ihukhumu cawe cikhanle cosariya. Hi khaninkhala niiwasiwaasi kontha isiyani Yehova lakenlyaawe waathanla makristauookhuluvelya ala mahukwaala. g Hi ninawuupuwela ntakihero na Yesu naalopwana yaapacenre mmattani ukati wowiicisu. (Mat. 20:1-16) Ale yaapacenre uvara nteko mphantte woococilo, haahakhela italentu ipereeso imocaaru naale yaapacenre uvara nteko wecisu. Inanna imocaaru makristau oothanliya, anaahala waakhela iparakha cimocaaru yaakhalaka ookhuluvelya mpaka umwiisooni.
NHIHIYERERE UTTHARA ITTHU IHIMILYAAWE YESU
18-19. Isiyani neetthucileehu ni matakihero Yesu ahimilyaawe?
18 Isiyani yiitthucileehu? Ale arina niweherero nokhalana ukumi woohimala va watuninyani va, ntakihero nokhontwaa ni nopuri ninawoonihera ifayita urinaaya uhihiyerera ukhala ntthu ookhuluvelya wa Yehova, ukhuma nenna co ni ukati wo masakha moolupale anhala wiirannya woohipica. Uhoolo Yesu naahala urwaa waahukhumu ale anhala uhihiyerera woonihera ukhala ookhuluvelya nenna co nimananna anhalaaya uphwanelannya uphwanya ‘ukumi woohimala.’—Mat. 25:46.
19 Hiiva ciicammo ni woona matakihero meeli makristau oothanliya anlamuliyaaya utthara. Ntakihero Yesu nuulumilyaawe, naasimwaarusi 5 oohankhili ni 5 oocuwelaca, ayo yaahokhalaca oohiitthaala ni owiitthenkaca yanwehereracaka ntheli uwa. Masi, asimwaarusi oohankhili khayaari owiitthenkaca. Phimaana ntheli khaahiyacile ukelaca nfestani yokacamentu. Ni hiiva ciicammo nihaana ukhala owiitthenkaca ni oohiitthaala mpaka ukati Yesu unhalaawe uwa umalamaliha ila ituninyeela. Uhiya commo, ntakihero Yesu nuulumiyaawe Notalentu, hi nihoona wiira ipottha piili cookhuluvelya caahovara nteko nankhili. Nnyo caahovara nteko waapwiiyaaya, phimaana caahothanliya. Masi, ipottha yowoolwa khayaathanliye. Isiyani nineetthuceehu? Hiiva nihaana uhihiyerera uvara nteko wa Yehova mpaka umwiisooni. Yoomalela, nihoona wiira makristau oothanliya yaahihiyerereke ukhala oohiitthaala anaahala ‘ucisiya’ ni Yesu wiira yaakhele iparakha yookhala wiirimu. Makristau oothanliya ari mooweherera wiira yakhale nkhayi ni Yesu wiirimu. Inavinre ikhotto ya Harmacetooni ayo anhala ukhala nthiyana mpakanenlyaawe Yesu ukacamentuni yo mwakhontwaa.—2 Atesal. 2:1; Apoka. 19:9.
20. Isiyani Yehova inhalaawe waapankela ale anhala utthara itthu Yesu ihimilyaawe?
20 Unhala ukati vakaani paahi wiira Yesu aahukhumu apinaatamu. Masi hiiva khaninkhala noovaka. Naahihiyerereke ukhala ookhuluvelya, Apaapeehu onifento akhanle Yehova, anaahala univaha ‘ikuru wiira nikhitiri weemela uhoolo wa mwaana apinaatamu.’ (2 Akor. 4:7; Luka 21:36) Hataa ukhalaka wiira nirina niweherero nookhala wiirimu awula watuninyani, hiiva ninaahala utteeliha nrima Paapeehu Yehova nahihiyerereke weettela itthu imphwanyannya nhina matakihero Yesu oolumilyaawe. Nlattu wo nifenta nookhuluvelya na Yehova, macineehu anaahala ‘wantikhiya nlivuruni’ yookumi.—Dan. 12:1; Apoka. 3:5.
NCIPO 26 Mwaakiirela Miyo
a Isaiya 11:3 Ni uyo unaahala uncivela umoova Yehova, khanhala unhukhumu ntthu anweheraka ikhovyaawe, hataa khanhala unlaka ntthu nlattu wo itthu ineewaawe paasi. 4 Uyo naarwaa waahukhumu niisariya ale aneeyeviha, ni naarwaa uttarusa uratteene wamphwanyeraaya ifayita ale owatuninyani aneettela isariya.
b Nwehe mwaha “Yehova nohala waahukhumu cani atthu wahoolo?” nhina irevista ukhalenla yo Maio 2024.
c Matewus 25:6 Uphiya waya uhiyu iriyari, ayo yahiiwa ukhuweliyaka wiiriyaka co: ‘Nthelyuuyo howa! Mummwe nrwee mwamoonanane.’ 7 Vano, asithiyana otheene yahommwa ni yahotthenkaca isaminiiya caya. 8 Asithiyana alolwaale, yohowiirelaca asithiyana oocuwelacaayo co: ‘Ninawuulepelani unimeela makhuraayo, kontha isaminiiya cihu cihanle vakaani uttiphyaaca.’ 9 Asithiyana oocuwelacaale yahaakhula yeeraka: ‘Unawiira khaavo makhura oonitosera otheene cihu va. Phimaana, nrwee mwawoonanane ale antumiha ni mwaathumanane vakaani.’ 10 Ukati waarwaalyaaya uthuma makhuraayo, ahowa nthelyuuyo. Asithiyana yeetthenkacilyaayo, yahokela nsukuhuuluni yokacamentu, wamoca ninthelyuuyo ni nkhorooyo wahotthukiya
d Wiira ncuwele-tho, nwehe mwaha “Você vai se manter vigilante?”. Nhina irevista Sentinela 15 yo Março 2015
e Matewus 25:19 “Unavinreene ukati mwinci, pwiiyaaya ale anantekwaale ahowa ni ahanca waapankana ikontha. 20 Vano, ule aahiyeriye italentu thanu, ahorwaa uwoonanana apwiiyaawyaayo ni ahowaana-tho italentu thanu, ni uyo aahowiirela: ‘Pwiiya mwaakihiyenre italentu thanu. Vano mooneke, kihophwanya-tho italentu thanu!’21 Aphwiyaawe yahomwiirela: Uhopanka saana, iphottha yomaana ni yookhuluvelya! Uhoonihera ukhuluvelya utafiti waa citthu vakaani. Kinaahala wuuvahacera citthu cinci. Utteeliyeke nrima wamoca naaphwiyaa. 22 Vano, ule aakhenle italentu piili ahowa ni aheera co: ‘Pwiiya mwaakivahile italentu piili; masi mooneke, kihokhitiri-tho italentu piili.’ 23 Apwiiyaawe yahomwiirela: ‘Uhopanka saana, nanteko omaana ni ookhuluvelya! Uhothoonyera ukhuluvelya ukati waawaceraa citthu vakaani. Phimaana kinawuuvahacera uwacera citthu cuulupale. Utteeliye nrima wamoca naapwiiyaa.’
f Matewus 24:40 Alopwana eeli anhala ukhala umattani, mmoca naahala ucisiya ni nkinakuuyo naahala uhinnya. 41 Athiyana eeli anhala uphwanyiya isilaka; nthiyana mmoca naahala ucisiya nkinakuuyo naahala uhinnya.
g Nwehe irevista Ukhalenla yo Janeiro 2020, ipaag. 29-30, iparaag. 11-14.
h ILATARATO: Anuunu amoca oothanliya ansomihaka mwanthiyana mmoca Ibiibiliya amphwanyilyaaya wuulalyeerani.
