Mi kiyariye mwaakha wo 1934 miyaapapaaka yaakhumile ilapo yo Suiça yarwaaka ilapo yo Timmins, u provincia yo Ontario, u Canadá isittatti yaari iwooru. Ukhuma mwaakha wo 1939, amaama yahopacera usoma irevista ukhalenla ni yahopacera woona mikutthaano co Masaahiti a Yehova. Ayo yankicisa miiva nkhayi naasinyenyaaka 6 Usalauni yo Umwene wiira noone mikutthaano. Khayavirihile ukati mwinci ayo yahopattisiya khampa Saahiti a Yehova.

Apaapa khayaakhanle ootteeliya uwoona waya amaama alakelaka ukhala Saahiti a Yehova. Masi amaama yaanaacivela ikhweeli ni ayo yaholakela uhihiya unswalela Yehova. Ayo yaapankile iyo, ukhuma mwaakha wo 1940 ukati nteko woolalyeera waakhottiihiyaaya u Canadá. Amaama yanaahisima cinene ni yanaafenta apaapa hataa ihacivelaka ikhweeli. Ntakihero nomaana amaama yoonihenryaaya, nihokikavihera miiva ni asinyennyaka wiitthuca ikhweeli. Wootteeliha nrima, nuuwakatyaaya, moopuwelelo aapaapa yahorukunuwa, naayo yahopacera waafenta amucyaaya nimananna omaana.

Mwaakha wo 1950, mi kahoona Nkutthaano wo Isirikwiitu “Aumento da Teocracia” isittatti yo Nova York. Mi kampheela cinene uvara nteko wa Yehova, vano woopana waka mwaha mayamunna ni mayanuunu o miphantte cikhwaawe co ntuninyani ni woona intervista caatthu yaasomile icikola yo Gileate, itthu yaahimilyaaya ayo mayamunnaayo, yahokitteeliha nrima cinene ni kaholakela wiivaherera uvara nteko ukati wotheene. Vano uphiya waka uwaani kahopiriyenxeri ipetisau wiira kikhale piyoneeru owiicaaverya. Vano, Ipeteli yo Canadá yahaakhula iwarakha yaavelelihilyaaka yeeraka kahaana upattisiya tokooni. Iyo phiitthu yaapankilyaaka nihuku 1.° yo Outubro mwaakha wo 1950. Nuuwakatyaaya, mi kahokhala piyoneeru owiicaaverya ni kahorwaaniya wiira kavare nteko isittatti yo Kapuskasing, nipuro naapacenryaaka uvara nteko weepiyoneeru. Iyo isittattiiyo, yaari yoottalivana ni ncoko wakhalaka naamucyaaka.

 Mwaakha wo 1951, Ipeteli yahopanka nlattulo wiira mayamunna yaakhitiri wuuluma francês yahaana wiivaherera wiira yakavihere u provincia yo Quebec, nipuro nuulumiya francês. Uyo ncokooyo, yampheeliya mayamunna wiira akavihere. Mi kuunuwile kuulumaka francês ni inglês, phimaana kahotthuna nno nlattulonno ni kahothanliya wiira kakavihere isittatti yo Rouyn. Nwo, miiva khaavo kancuwelaaka, toko cihimilyaaka wuupaceroni, itthu yaarinaaka waari upheela wiivaherera uvara nteko ukati wotheene. Masi cotheene caahokettela saana. Miiva ni Marcel nahokhala apatthani omaana ni miiva wahokicivela venci ukavihera u Quebec mwaakha 4 khampa piyoneeru owiivaherera.

Kinaryeene u Quebec, mi kaahokhala otteeliya nlattu wo waakhela nlattulo wiira kakhale iturma 26 icikola yo Gileati u Nova Iorque. Nihuku naakaweliyeehu mapuro wiira naakavihere, naari nihuku 12 yo Fevereiro mwaakha 1956, vano, miiva kaahothanliya wiira kaakavihere ilapo incuweliya ukhala u Gana, b u Africa ocidental. Masi kihinaaya urwaa nipuro kaalathuliyaaka wiira kaakavihere, mi kahaana kituruwelaka u Canadá wiira kakhitiri utafitici itokumentu.

Mi koopuwela wiira akaahala ukhala isumana cinci, masi kahomaliha myeeri 7 kinari u Toronto kiwehereraka iwarakha. Uyo ukatyuuyo, mi kaakhala inupa yaamucyaaya Cripps, kaatepilyaaka waapatthanana cinene. Nwo mi kaahoncuwela mwaamwanaya neehaniya Sheila. Hi naahocivelana. Ukati kanlepenlyaaka wiira nithelane, itokumentu kawehereraaka yaahowa. Mi ni Sheila naakhala ukati wotheene nilompaka nlattu wo iyo itthwiiyo, ni miiva kaholakela wiira kihaana karwaaka wiira kaakavihere. hiiva ciicammo, naholakela uhihiya woopaca mwaha nivarelaka nteko iwarakha ni niwehereraka woona wakhala wiira ukati ninviriheehu nicuwelanaka unaahala unikhitiriha uthelana. Iyo khayaari itthu yoohirika. Masi nuuwakatyaaya, itthu yaalakenleehu yaaheranya.

Uvira waya mweeri mmoca kipankaka nkwaha ni comboio, ni navio ni muntteekeni, miiva kaahophiya u Accra, u Gana. Nwo kaalattuliye wiira kaakavihere khampa mootoli osirikwiitu. Mi kahaana upanka mikwaha ilapo yotheene yo Gana, ciicammo u Costa do Marfim, ilelo uncuweliya ukhala Côte d’Ivoire ni  Togoland (Togo). Ikwaha cinci miiva kaapankaka mikwaha kinari veekha kavarelaka nteko ikaaro yo Peteli. Mi wankicivela upanka mikwaha wiira kaathotole mayamunna!

Wiimaleloni isumana, miiva kankhalana miphantte mmamikutthaanoni cosirikwiitu. Hi khanaarina isalau wiira nipanke mikutthaano cosirikwiitu, phimaana, mayamunna yaahoteka nipwaro nimithale ni makuntthi onkole wiira yaakhikicere mayamunna ncuwa. Ukhala wiira mapuro yaasunkiya iyoolya khayaarivo igileira, mayamunna yanwaana ikaaro wiira yaavahe iyoolya ale yaawa woona nkutthaano.

Ikwaha cikiina, mmamikutthaanoni cosirikwiitu, cankhumelelaka citthu cinci cooteehaca. Ikwaha imoca, munna Herb jennins  c ari misiyonaariyu ataphulelaka mwaha, imope imoca yahotthawa nipuro naatthukeleliyaaya ni yahotthawela upalukuni ni mpaka mapuro yonkomile atthu yoona mikutthaano. Herb aheemesera mwaahooyo ni imopeeyo yaahorusiya. Masi, mayamunna 4 okuru cinene yahokhitiri uvara imopeeyo ni uturusela nipuro yaatthukeleliyaaya. Vano mayamunna yoona nkutthaano yahoopa makuphi.

Wokhula isumana, miiva kaanoniha ifiilime A sociedade do Novo Mundo em ação para ale yaakhala mmaaliteeya. Wiira yooniye saana, miiva kaatthukelela ikuwo yootthela wamapottoni meeli awula wamirini. Atthu omaaliteeya yoona iyo ifiilimeeyo, yaanacivela cinene. Para atthu enci yaari ifiilime yoopacera yonnyaaya muukumini waya. Ayo yaanoopa makuphi yoonaka khula mphantte waakhumela atthu yapattisiyaka. Iyo ifiilimeeyo, ihaakavihera atthu enci woona wiira hi nikhanle mpwiinko woothotokannya ntuninyani motheene.

Cinavinreene mwaakha miili kinari wa África, mi kahokhala ootteeliya nlattu woorwaa woona ikonkereesu yuulupale isittatti yo Nova Iorque, mwaakha wo 1958. Mi kahokhala ootteeliya cinene nlattu wo woonanaca-tho ni Sheila, aakhumile u Quebec ni vano aakavihera nkhayi naapiyoneera owiivaherera. Hiiva noopaka mwaha nkhayi nivarelaka nteko iwarakha, masi vano naahonanaca-tho co ni co. Vano mi kahonlepela wiira nithelane. Ni uyo ahotthuna. Vano, miiva kahavaherera iwarakha amunna Knorr d kakohaka wakhala wiira wanhala ukhitirya Sheila urwaa u Gileate ni wiira urwaaniya u África, ni aakavihere nkhayi ni miiva. Ayo amunnaayo yahotthuna. Vano, Sheila ahorwaaniya wiira akavihere u Gana. Hi nithelanne ilapo ineehaniya Accra nihuku 3 wo Outubro mwaakha wo 1959. Hi nihoona mananna Yehova nicaalihilyaawe nlattu woohoolelihera Umwennyaawe muukumini wihu.

Mwaakha wo 1961, hi nahothanliya wiira nakavihere isittatti yo Camarões u África. Mi kakhalaka nimiteko cinci coovara, ukhala wiira yahaavo Ipeteli yaalokihaciya. Ukhala wiira kaathanliye phiyaaru wiira kikhale namawehaweha, mi kahaana wiitthuca citthu cinci. Vano, mwaakha wo 1965, hi nahonenela wiira Sheila ari niirukulu. Wahonirikela cinene wuupuwela khampa ayari, masi ucuwela wiira nanhala ukhalana uyo nrinttyuuyo, hi nahokhala ootteeliya nrima. Masi ukati wenreehu wiira nituruweleke u Gana, yahokhumelela itthu yooriipiha nrima.

Mwaana anyanryaawe Sheila aahokwa. Ameetiku yaanirenle wiira mwaanooyo aari nlopwana. Cihovira mwaakha 50 ineerannyeele iyo itthwiiyo, masi hiiva khaninliyala itthu yeerannyeele. Masi hataa ukhalaka wiira ninaakhala uniripaka nrima, hiiva khanihiile uvara nteko waatepa unicivela.

Mayamunna o Camarões ikwaha cinci yanlupatthiya nlattu woohipankela mphantte wosiyaasa. Ayo masakhaayo, yantepa ukhumelela waattamelaka ukati wo mwaathanle. Itthu yaatepeehu woova yaheerannya nihuku 13 mweeri wo Maio mwaakha wo 1970, ukati ikuvernu waakhottihaaya Masaahiti a Yehova ulalyeera. Ipeteliihu yooreera yaatthukuliye phiyaaru, yaahotthukiya naahooleli ookuvernu myeeri 5 ninaathamenleene wonwo. Umala waya isumana imoca, mamisiyonaariyu otheene nkhayi ni hiiva, nahoomoliya iyo ilapweeyo. Yaari itthu yoorika waahiya mayamunneehu uttuli kontha hiiva nanawaawacera cinene ayova. Vano, hi nanawikoha isiyani ayo inhalaaya upanka nna co.

Hi naahoviriha myeeri 6 nikhalaka Upeteli yo França. Nwo miiva kahokhitiri uhihiyerera waawacera mayamunna o Camarões. Mweeri wo Dezembro wo yoole mwaakhoole, hi naholattuliya wiira nakhale Upeteli yo Nigéria, nipuro naapacereehu uwacera nteko woolalyeera u Camarões. Mayamunna o Nigéria yahonaakhelela sana-saana. Hiiva wahonicivela cinene ukavihera nwo myaakha cinci.

Mwaakha wo 1973 hi naholakela upanka itthu yootepa urika cinene. Sheila aanaanana marikariko menci muukumini wawe. Ninari u Nova Iorque wiira noone ikonkereesu, uyo khaakhitinri-tho ni aheera co: “Mi akinhala ukhitiri-tho co. Mi kiri oosanka. Kihoviriha ukati mwinci kiwerennyaka.” Ayo yahokavihera nkhayi ni miiva u África ocidental myaakha coopwahaka 14. Mi kahokhala ootteeliya nrima nlattu wo nteko womaana waavaraaya. Masi hiiva naalamuliya upanka marukunuso makhwaawe. Vano, umaliha wihu woopela mwaha citthu caanikhumelela ni ulompa nlattu wo nnyo citthunnyo, hi naholakela uturuwela u Canadá, nipuro amuciihu yaahalaaya ukikavihera uwacera ukumi wa Sheila. Uhiya nteko weemisiyonaariyu waavareehu ni wiivaherera uvara nteko ukati wotheene, yaari itthu yoorika cinene yaapankileehu muukumini wihu.

Uphiya wihu u Canadá, mpatthannyaaka kancuwelaka myaakha cinci ahokikhitiriha uphwanya nteko. Uyo ahaana ilooca imoca wo waattamela u Toronto. Hiiva nahaalukari inupa, nahothuma citthu caapacile uvareliya nteko ni nahokhitiri uthama woohikhalana iteeni. Hiiva naapheela ukhikicera ukumiihu niwehereraka wiira wanihukuni nanhala uturuwela wiivaherera uvara nteko ukati wotheene. Vano, wootteeliha nrima iyo yeerannyeele ni mananna nahaaweherereehu.

 Miiva kahancera ukavihera khampa owiivaherera mahuku osaapatu mapuro waatekatekiya isalau co mikutthaano cuulupale u Norval, Ontario. Nuwakatyaaya, miiva kahothanliya wiira kikavihere khampa humu nowacera isalau co mikutthaano cuulupale. Ireetta yanwerya Sheila yeera yawukuwaka, phimaana, hiiva naholakela wiira nanhala ukhitiri uwacera nteko wavahaceriyeehu. Vano, mweeri wo Junho mwaakha wo 1974, hiiva nahokhuma ncoko naariihu. Hi naahokhala ootteeliya cinene nlattu wooturuwela uvara nteko wo wiivaherera ukati wotheene!

Wootteeliha nrima Sheila eera amphwanyaka nafaasi. Uvira waya mwaakha miili, hi naholakela utthuna ukavihera mmasirikwiitu. Isirikwiitu yaari u provincia yo Manitoba, u Canadá, uncuweliya ukhala igeelu. Masi, hi wahonicivela cinene ukhala ni mayamunneehu ni mayanuunwiihu o iyo Isirikwiitwiiyo, yaari oofenta cinene. Hi niheetthuca wiira, hataa nikhalaka mapuroni ninanvarela nteko Yehova. Itthu yomaana ukhanle uhihiya unvarela nteko Yehova hataa nikhalaka mapuroni.

Uvira waya myaakha cinci nikaviheraka khampa mootoli osirikwiitu, hi naholattuliya wiira nakavihere Upeteli yo Canadá mwaakha wo 1978. Ukati vakaani mi kaheetthuca itthu yofayita, masi yaari itthu yoorika. Mi kahothanliya wiira kataphulele mwaha wo iwoora imoca ninuusu niiluka francês wankutthaanoni muulupale waapankiye u Montereal. Wooriipiha nrima, atthu yoona uyo nkutthaanooyo wahaarika ukumihera ifayita mwaha kaataphulelaaka. Phimaana, munna mmoca aavara nteko Upeteli, ahokivaha ikano nhina mananna kaataphulenlyaaka uyo mwahooyo. Uhimya ikhweeli, miiva kahaana kicuwelelaka wiira akaataphulela myahannyo saana. Masi mi akaatthunne ikano kaavahiyaaka. Mi kahokhala ooviruwa kontha koopuwela wiira uyo munnooyo ankipwapwela ni khaakittottopenle. Mi kahopanka itthu yootakhala nlattu woohukhumu ikano kaaweheraka mananna kaavahiyaaka ni ntthu akivahile iyo ikanweeyo.

Anavinre mahuku vakaani, munna mmoca nohoolela Ipeteli ahowa ukuulumana nlattu wo itthu yeerannyeele. Mi kahokupali wiira akaakhitiri wuupuwela saana nlattu wo ikano kaavahiyaaka. Ni kahooluma wiira koocukulela itthu yiirannyeele. Vano, mi kahomuulumana munna akivahile ikanooyo, ooniheraka unamaana waarinaawe, uyo ahotthuna ukilevelela. Iyo itthwiiyo, yahokiitthuciha itthu yofayita cinene wiiyeviha, itthu inhalaaka uhiliyala. (Miru. 16:18) Mi kahonlompa Yehova ikwaha cinci nlattu wo iyo itthwiiyo. Mi kimpheela wiikurumica upanka yotheene inkhitiryaaka wiira kihiwehere pusya ikano kinvahiyaaka naakhunanaka.

Kihoviriha myaakha coopwahaka 40 kivaraka nteko Ipeteli yo Canadá. Ukhuma mwaakha wo 1985, kihaana iparakha yookavihera khampa humu nhoolela Ipeteli. Amwaaraka Sheila akhwile mweeri wo Fevereiro mwaakha wo 2021. Uhiya waanana masukhuli nlattu wookhweliya, miiva ciicammo kinawaanana masakha muukumini waka. Masi uviriha ukati mwinci kivaraka nteko wa Yehova unaakitteela nrima. Naala manannaala, akinviriha ukati kuupuwelaka masakha ankikhumelela muukumini waka. (Ekles. 5:20) Hataa akhalaka marikariko otheene kivirihilyaaka muukumini waka, utteeliya urinaaka ikhanle itthuvo yaakhenlyaaka. Unholelihera Yehova muukumini waka ni uvira myaakha 70 kivaraka nteko wa Yehova ukati wotheene uhokiphwanyiha iparakha cinci. Mi kinanlompa Yehova wiira mayamunna ni mayanuunu amirawo ahihiyerere uhoolelihera Umwene wa Yehova muukumini waya. Kontha mi kinaakupali wiira yapankaka commo, anaahala ukhalana ukumi womaana ni waakhela iparakha Yehova cinvahaawe muukumini waya.