Khweeliini eetthuci 70 a Yesu khayaari nkhayi nuuyo ukati waapankaawe iyoolya yoohiyu Yaapwiiya, masi iyo khinthoonyera wiira ayo yaahonhiya Yesu awula wooniya ukhala atthu oohifayita ni Yesu. Uhiya commo, Yesu apheela uviriha paahi ule ukathyuule naattharyaawe.

Ukhuma atthari 12 ni ale yaari 70 otheene yaari eetthuci a Yesu. Woopacera, Yesu ahaathanla alopwana 12 wiira akhale maapostolu. (Luka 6:12-16) Ukati aryaawe u Kalileeya Yesu ‘ahaathanla atthari 12’ ni ‘ahaaruma wiira yaalalyeere ihapari ca Nluku ni wiira yaavonihe areetta.’(Luka 9:1-6) Nuuwakatyaaya nari u Yuuta, Yesu “ahaalathula atthari 70, ni ahaaruma eeli-eeli wiira yalalyeere.” (Luka 9:51; 10:1) Uhiya commo, Yesu ahaana attharyaawe mapuro yaalalyeeriya ihapari comaana.

A Yuuta yaari atthari a Yesu yahaana apankaka ifesta yo Paasikuwa wo khula mwaakha ni ayo pooti waapankaaya nkhayi naamucyaaya. (Nkw. 12:6-11, 17-20) Unahanle ukati vakaani Yesu hinaaya ukhwa, uyo nkhayi ni maapostolwaawe yahorwaa u Yerusalemu. Masi Yesu khaalatthunle attharyaawe otheene, o Yuuta, o Kalileeya ni Upereeya wiira yapanke ifesta yo Paasikuwa. Iyo inawoonannya wiira Yesu apheela uviriha ule ukatyuule nkhayi ni maapostolwaawe. Uyo ahowiirela atthari 12 ayo co: “Kaanaapheela cinene ulya nkhayi ni nyuuva ila iyoolya yo Paasikuweela kihinaaya uhuva.”—Luka 22:15.

Yesu ahaana isariya wiira apanke iyo. Uyo anhala ukhwa khampa “mwaakhontwa a Nluku nokumiha itampi watuninyani.” (Joau 1:29) Yesu aahala ukhwa u Yerusalemu nipuro naavahereriya nkuttho nenne nokhalayi. Paasikuwa anwuupusera asarayeli itthu Yehova apankenlyaawe wiira aakumihe Wiicitu. Masi wiivaherera wa Yesu yaahala ukhala itthu yuulupale, kontha uyo anhala woopola apoovu otheene ntampini ni muukhwani. (1 Akor. 5:7, 8) Ukhwa wa Yesu uheeriha maapostolu 12 ukhala ahooleli o maloko. (Efesu 2:20-22) Ikhanle itthu yomaana ucuwela wiira isittatti yowaarya yo Yerusalemu ahaavo ‘maluku 12 aliserisi,’ mapuro yantikhiye ‘macina o maapostolu 12 o mwaakhontwa.’ (Apoka. 21:10-14) Iyo inoonihera wiira maapostolu ookhuluvelya yahaana ifayita cinene wiira yiirannye itthu yaapheelaawe Nluku. Phimaana wahophwanelannya, Yesu ahaana esariya yookhala nkhayi naayo ukati ampankilyaawe Paasikuwa oomalela ni wuupuwelela waapankilyaawe ikhanle iyoolya yoohiyu Yaapwiiya.

Eetthuci akhwaawe ni waahela nhina atthari yaari 70 ayo khayaari nkhayi ni Yesu ukati waalilyaawe iyoolya yoomalela. Hataa ukhala commo, eetthuci otheene yaari ookhuluvelya yanhala uphwanyera ifayita iyoolya yoohiyu Yaapwiiya. Eetthuci otheene yaahala ukhala makristau oothanliya ciicammo yanhala upankela mphantte Umwene wa Yesu waahimenryaawe maapostolwaawe ule uhiyuule.—Luka 22:29, 30.