1. Manannani Yehova canvarenlyaawe nteko Peturu hinakhwa?

 APOSTOLU Peturu ancuwela wiira anhala ukhwa woohipica. Myaakha cotheene aavaraawe ntekwaawe, uyo ahonveleela Yesu wuulalyeerani, aholalyeera mapuro menci ni nuukatyaaya ahopanka mphentte wo Mphwinko wo Mahumu Uhoolela. Masi nteko wa Peturu waari uhinamala. Mwaakha wo 62 mpaka 64 nawile kristu, uyo ahorumiya wantikha iwarakha piili—ilivuru co mbiiblya yoopacera ni yonayeeli ya Peturu. Peturu aweherera wiira nnyo iwarakhannyo caakavihere makristau hataa uyova nakhwile.—2 Pet. 1:12-15.

2. Kontha isiyani iwarakha ca Peturu cantikhiye ukati womaana?

² Peturu antikhile nnyo iwarakha piilinnyo ukati mayamunna “waahuvahuvaaya yaananaka masakha.” (1 Pet. 1:6) Atthu yahaarina nrima womaana yammananiha unanariha nloko yiitthucihaka citthu coohiloka ni meettelo oohiloka. (2 Pet. 2:1, 2, 14) Woohipica makristau yanhala woona “umalamalihiya wo citthu cotheene”, awula arooma yanhala utankanya isittatti yo u Yerusalemu ni ayuuta otheene yaakhala ule ukatyuule. (1 Pet. 4:7) Khweeliini, iwarakha ca Peturu cahaakavihera makristau ucuwela itthu yaalamuliyaaya upanka wiira yaanane marikariko ni wiitthenkaca wiira yakhitiri uvilela masakha yaahala awaakhumelela wahoolo. b

3. Kontha isiyani ninlamuliyeehu usoma iwarakha ca Peturu?

³ Khweeliini Peturu aawantikhele nnyo iwarakhannyo makristau yaakhala ule ukatyuule, masi Yehova hohiya nnyo iwarakhannyo nnuulumoni nawe. Phimaana hiiva pooti waneetthucereehu citthu cinci nnyo iwarakhannyo. (Aroo. 15:4) Hi ninkhala ntuninyani yohiloka ni iriyari yaatthu ahinonswalela Yehova, phimaana hiiva ninawaanana marikariko ni ikwaha cikhwaawe hiiva pooti unirikela unvarela ntoko Nluku. Uhiya commo, ninaahala waanana masakha  moolupale upwaha masakha yaanannyaaya ayuuta khalayi. Phimaana citthu cinnuupuseraaya nnyo iwarakhannyo cikhanle cofayita mahukweehwaala. Nnyo cinaanikavihera uhihiya wuupuwela nihuku na Yehova, utthema uwoova wihu apinaatamu ni woonihera nifento. Nnyo citthu cinoopuseriyeehunnyo pooti waakavihera ciicammo mahumu ucuwela isiyani impheelaaya ikhontwaa cinwehawehaaya.

4. Toko cinhimyaaya 2 Peturu 3:3, 4, Isiyani atthunaka yaahala ulolovihaca waamini wihu?

⁴ Hiiva ninkhala iriyari ya atthu ahinkupali inatiri co mbiiblyani. Atthu akiina anaanitarawaca, kontha hiiva nipacenre khalayi uhimya wiira ituninya inaahala umala ni atthu akiina anawaavaanyiha aneera wiira ituninya khinhala umala. (Nsome 2 Peturu 3:3, 4. c) Neewaka ayo moolumwaayo ni ntthu nonlalyeereehu, nonvareneehu nteko awula mmuciihu, pooti ulolovihaca waamini wihu. Peturu naahimya isiyani inhala unikavihera.

5. Isiyani inhala unikavihera uhihiyerera uvilela mpaka wiimaleloni? (Nwehe 2 Peturu 3:8, 9.)

⁵ Atthu akiina pooti woona toko Yehova naapica umaliha citthu cohiloka co ila ituninyeela. Masi moolumo a Peturu anaanikavihera uwehera saana uyo mwahooyo, naanuupusera wiira mananna hiiva cinwehereehu ukati khaanakhala mananna cinweheraawe Yehova.(Nsome 2 Peturu 3:8, 9. d) Myaakha 1000 Yehova noona ukhala nihuku nimoca. Uyo khanle oopisa nrima ni khampheela wiira ntthu atankanyiye, masi waphiyaka ukati Yehova naahala umaliha citthu cotheene cootakhala. Ni hiiva nihaana iparakha yoovarela nteko ukati unhanle wiira naalalyeere atthu ntuninyani motheene.

6. Isiyani inlamuliyeehu upanka wiira ‘nihiliyale nihuku na Yehova’? (Nwehe 2 Peturu 3:11, 12.)

⁶ Peturu nonisoveriha “uhiliyala nihuku na Yehova”. (Nsome 2 Peturu 3:11, 12. e) Manannani nilamuliyeehu upanka iyo itthwiiyo? Ikhanle itthu yomaana wuupuwela. Wakhitiryaa wuupuwela iparakha ninhaleehu ukhalana upehooni. Nhotoko weemela ni wuupuwela nnari nipuro nomaana, mmumulaka ipyeoo comaana, nlyaaka iyoolya yomaana ni mwaakharipulelaka atthu yunwelelihiye, amuciinyu ni asipatthaniinyu? Awula mwawiitthucihaka atthu akhanle myaakha cinci uttuli mananna ciirannyeelyaaya inatiri co mbiiblyani? Wuupuwela nnyo citthunnyo pooti wuukaviherani uhiliyala ni ukhuluvela wiira uhanle vakaani uphiya wiimaleloni waya ila ituninyeela. Nacuwela itthu inhala uniirannyeela wahoolo ni “nacuwelaka khalayiiru”, khaninhala uthepiya ni citthu cowoothiya co ila ithuninyeela.—2 Pet. 3:17.

7. Manannani umoova pinaatamu unhalaaya unilolovihaca?

⁷ Hi ninaacuwela wiira nihuku na Yehova niri wakhiviru, phimaana nimpheela upanka inkhitiriihu wiira naalalyeere atthu akiina ihapari comaana. Masi ikwaha cikiina pooti wahinkhalaneehu ulipa nrima. Kontha isiyani? Kontha pooti  wanooveehu, khampa cankhumelenlyaaya Peturu. Uhiyu waya nihuku Yesu naavariyaawe, Peturu ahoova ni ahoruna ukhala ntthari a Yesu, ni ikwaha tthaaru ahokhotta wiira anancuwela Yesu! (Mat. 26:69-75) Masi Peturu, ahotthema woova waarinaawe. Unavinreene ukati mwinci, uyo ahantikha co: “Nhoove citthu ayo anoovaaya, hataa nhikhale nimasukhuli.” (1 Pet. 3:14) Moolumo a Peturu anaanikupaliha wiira hiiva ciicammo pooti wantthemeehu umoova pinaatamu.

8. Isiyani inhala unikavihera uhimoova pinaatamu? (Nwehe 1 Peturu 3:15.)

⁸ Isiyani inhala unikavihera uhimoova pinaatamu? Peturu heera: “Munttitthimihe Kristu khampa Pwiyeehu, wanrimani winyu.” (Nsome 1 Peturu 3:15. f) Iyo inhela nhina wuupuwela nipuro aryaaya ni ikuru arinaaya Apwiyeehu ni Amwene, Yesu Kristu. Moonaka vale ukati woopheela wuuluma ihapari comaana ni ntthu nkhwaawe, nyuuva nnawoova? Mmuupuwele Mweneehu. Yakhumelelaka iyo itthwiiyo mmuupuwele Yesu alamulelaka wiirimu ni narukuryeeriye nimalayikha menci. Nhiliyale wiira uyo haana “ukhulupale wotheene wiirimu ni watuninyani”. Ni uyo hokhuluveliha: “Ni ncuwele wiira mahuku otheene kiri ni nyuuva, mpaka wiimaleloni ulumwenku.” (Mat. 28:18-20) Peturu nanisoveriha ukhala “owiitthenkaceene” wiira  nuulume itthu inaaminiihu. Nyuuva waanoocivelani unlalyeera ntthu ntekoni winyu, ucikolani awula nipuro nikhwaawe? Muupuwele khalayiiru ukatini woocivenlyaayani upanka iyo ni ntthenkace itthu nnohaleenyu wuuluma. Nlompe wiira nkhalane ulipa nrima ni munkhuluvele Yehova wiira naahala wuukaviherani utthema umoova pinaatamu.—Mite. 4:29.

9. Manannani Peturu waahilyaawe woonihera nifento? (Nwehe ciicammo ilatarato.)

⁹ Peturu aheetthuca mananna oothoonyihera nifento. Uyo aari nkhayi ni Yesu, ukati Yesu wenryaawe: “Mi kinawuuvahani nlamulo nonaanaano: Nfentane khampa miiva cuufentilyaakani, nyuuva ciicammo nfentane.” (Joau 13:34) Waahookhalaru commo, Peturu ahoova ni ahokhotta waalyaana mayamunna yahaari ayuuta. Apostolu Paulu enre ayo makhalelwaayo yaari “owiiciipitihiya”. (Akalas. 2:11-14) Peturu ahotthuna ikano yaavahiyaawe ni aheetthuca itthu. Nhina iwarakha piili uyo cantithilyaawe hohimya wiira hiiva khaninlamuliya paahi ukhalana nifento ni mayamunneehu, masi ciicammo nihaana uwoonihera nifento.

10. Isiyani inhala unikavihera woonihera “nifento nomayamunna neekhweeli”? (Nwehe 1 Peturu 1:22.)

¹⁰ Peturu heera wiira hiiva nihaana nikhalanaka nifento neekhweeli ni mayamunneehu. (Nsome 1 Peturu 1:22. g) Wiira nikhalane nno nifentonno, nihaana “niiwelelaka ikhweeli”. Nnyo ikhweelinnyo cinhela nhina ucuwela wiira “Nluku khanthanla”. (Mite. 10:34, 35) Hi khaninhala wiiwelela nlamulo na Yesu nawoonihera nifento atthu akiina paahi owanlokoni, masi akiinaayo mena. Ikhanle ikhweeli wiira ntthu naakhalana ntthu notepaawe unfenta, khampa Yesu caarinaawe nimaapostolwaawe. (Joau 13:23; 20:2) Masi Peturu naanikurumica wiira nihaana woonihera “nifento nomayamunna”—noovaresesana khampa amuci—naatthu otheene mayamunna ni mayanuunu.—1 Pet. 2:17.

11. Isiyani inhela nhina waafenta akhunanihu “venci ni ninrimeehu wotheene”?

¹¹ Peturu hoonihera wiira ikhanle itthu yofayita hiiva ‘ufentana venci,’ ninrimeehu wotheene. Ufentana “venci” manaaya wiira hiiva nihaana unfeta ntthuuyo hataa unirikelaka umoonihera nifento. Wootakihera, isiyani nyuuva mwaahaleenyu upanka unari wiira munna howuuvehani awula howuupankani itthu yowuuwereehani nrima? Itthu nyuuva mwahaleenyu upacera wuupuwela atthunaka ukhanle unlivyaanihera uhiya umoonihera nifento. Masi Peturu aheetthuca ni Yesu wiira ayo mananna owuupuwelaayo khaanontteeliha nrima Yehova. (Joau 18:10, 11) Peturu hantikha: “Nhilivyaanihere itthu yootakhala ni yootakhala, uruwaniya ni uruwana. Uhiya commo, nturusele niitthuvo.” (1 Pet. 3:9) Nyuuva mwakhalanaka nifento ninci nimayamunneenyu, nnaahala waawacera saana mayamunna otheene ni umananiha ucuwela isiyani immwiira ntthuuyo hataa ukhalaka wiira hooveehani.

12. a) Ukhalana nifento ninci naakhunanihu pooti unikavihera upanka isiyani? b) Toko noonileehu nvidiyuni, isiyani nnolamuliyeenyu wiikurumica upanka?

¹² Nhina iwarakha yoopacera Peturu yatikhilyaawe, uyo ahovarela nteko nuulumo “nifento ninci” ayo mananna oofentaayo anaanikavihera ulevelela kahi paahi itampi imoca, masi “itampi cinci.” (1 Pet. 4:8) Atthunaka Peturu ahoopuwela ukati weetthucilyaawe ni Yesu ulevelela. Uyo ukatyuuyo, Peturu akupali wiira aari ntthu oonihera unamaana ukati wenryaawe wiira ahaana unlevelela munnaawe “ikwaha 7”. Masi Yesu ahomwiitthuciha Peturu ni hiiva otheene ulevelela “ikwaha 77” awula, ulevelela ikwaha cotheene. (Mat. 18:21, 22) Moona wiira unawuurikelani weettela iyo ikanweeyo,  nhikhale nimasukhuli! Otheene hiiva ikwaha cikiina unaanirikela ulevelela. Itthu yofayita ukhanle uhihiyerera upanka inkhitiriinyu wiira mwaalevelele mayamunna ni ummalihaca nanrokottole nrineenyu. h

13. Isiyani inhala waarikihela mahumu wiira akhalane ukati woopheela waalipiha mayamunna?

¹³ Khweeliini, Peturu khaaliyanle itthu yahimeriyaawe ni Yesu Jesus wuwelelihiya wawe: “Uwacere ikhontwaa caka.” (Joau 21:16) Wakhalaka wiira nyuuva mwaahumu, nyuuva nnaacuwela wiira ayo moolumwaayo anwaacani nyuuva ciicammo. Khweeliini , mahumu pooti waarikela ukhalana ukati wiira awacere uyo inrinttyuuyo. Ayo ahaana waawacera amucyaaya toko awaaveryaka iyoolya, makhalelwaaya ni nhina mminepani. Uhiya commo, ayo ahaana ukhala ntakihero nomaana wuulalyeerani ni nootthenkaca miphantte caya coomikutthaanoni, waasempeleeyani ni mmakonkereesuni. Ni akiina ahaana nrintti woowacera citthu coosipiritaali awula miteko cootekatekiya. Khweeliini, ayo alopwanaayo ankhalana ukati vakaani!

14. Isiyani inhala waakavihera mahumu uwacera ikhontwaa ca Yehova? (Nwehe 1 Peturu 5:1-4.)

¹⁴ Peturu howiirela mahumu co: “Nwacere ikhontwaa ca Nluku”. (Nsome 1 Peturu 5:1-4. i) Wakhala wiira nyuuva nkhale humu, hi ninaacuwela wiira nyuuva nnawaafenta mayamunneenyu ni nnaapheela waawacera saana. Masi ikwaha cikhwaawe, nyuuva pooti uhikhalanaka ukati awula utoomwa cinene wahinkhitiriinyu uvara nteko nvahaceriyeenyu. Wakhalaka commo nyuuva nnolamuliya upanka isiyani? Munhimerye Yehova mananna cineecooneenyu. Peturu hantikha: “Wakhala wiira ntthu nanvarela nteko Nluku apanke niikuru cinvahiyaawe ni Nluku.” (1 Pet. 4:11) Mayamunna anawaanana marikariko anhala uhikhitiryaa umalamaliha nikhalaka ila ituninya yoohilokeela. Masi nhiliyale “makampuci muulupale” Yesu Kristu, pooti waakavihera venci uvikana nyuuva. Uyo  pooti waakavihera ilelo ni ciicammo upephooni. Itthu Yehova nopheelaawe wiira mahumu apanke ukhanle wiira yaafente mayamunna, yaawacere ni “akhale ntakihero nuulupale.”

15. Manannani amunna William awaceraaya nloko? (Nwehe ciicammo ilatarato.)

¹⁵ Amunna William, akhanle humu myaakha cinci, anaacuwela ifayitaaya waawacera mayamunna. Ukati waapacenryaaya iretta yo koronaviiru, ayo ni mahumu makhwaawe yaanaawuulumana mayamunna okhurupwaaya. Ayo anaahimya nlattuni: “Mayamunna menci yaari veekha mmawannyaya ni khawaahala upica ayo wuupuwela citthu coohiloka.” Wakhalaka wiira munna mmoca nawaanana masakha, amunna William anaamwiiwela saana wiira acuwele isiyani noopuwelaawe ni isiyani nopheelaawe. Vano ayo anaamananiha uphwanya mwaha unhala unkavihera nhina ikaruma cineetthucihereehu toko ividiyu ni myaha nsayitini. Ayo aheera: “Nna co, ikhanle itthu yofayita cinene waawacera mayamunna. Hi ninaapanka inkhitiriihu wiira naakavihere atthu ahinoncuwela Yehova wiira ancuwele, phimaana nihaana wiikurumica wiira naakavihere mayamunna uhihiyerera weettela ikhweeli.”

16. Manannani hiiva ninlamuliyeehu weettela citthu nineetthuceehu nwarakhani cantikhilyaawe Peturu?

¹⁶ Mpaka va, hi nihoona citthu nineetthucereehu iwarakha piili ca Peturu. Atthunaka nyuuva nhoona itthu nnolamuliyeenyu uhiya upanka awula upacera upanka saana. Wootakihera, nyuuva waanoocivelani wuupuwela-tho iparakha nnohaleenyu ukhalana upeephoni? Niireke wiira pooti nyuuva wankhalaneenyu mpika woopheela ulalyeera ucikolani, untekoni winyu awula nipuro nikhwaawe? Nyuuva nhokhitiri woona mapuroni nnolamuliyeenyu woonihera nifento ni mayamunneenyu ni mayanuunwiinyu? Mahumu, nholakela wiira nwacere ikhontwaa ca Yehova ninrimeenyu wotheene? Atthunaka nyuuva nhoona wiira nhaana mpankaka saana itthu yahaapankeenyu saana, masi nhikhale nimasukhuli. “Apwiiya akhanle owoonihera unamaana” ni ayo anaahala wuukaviherani nyuuva upanka marukunuso nnopheeleenyu. (1 Pet. 2:3) Peturu honikhuluveliha: “Nluku . . . naahala umalihera ufunttiya winyu. Uyo naahala wuulipihani, uyo naahala wuuvahani ikuru, uyo naahala uweesani wanipuroni noolipa.”—1 Pet. 5:10.

17. Isiyani inhala ukhumelela navilelaka ni nanhiyaka Yehova unifuntta?

¹⁷ Wiipaceroni, Peturu ooniha toko khawamphwanela ukhala nkhayi ni Yesu. (Luka 5:8) Masi akaviheriyaka ni Yehova ni Yesu, Peturu ahovilela ni khaahile ukhala ntthari a Kristu. Nlattu wo iyo itthwiiyo, Yehova hontthunihera Peturu “ukela muumweneni woohimala wa apwiiya ni Moopoli Yesu Kristu.” (2 Pet. 1:11) Iyo ikhanle itthuvo yootepa ureera! Wakhala wiira nyuuva khampa Peturu nnaavilela ni nnaatthuna ufunttiya ni Yehova, nyuuva ciicammo nnaahala waakhela iparakha yookumi woohimala. Naayo manannaayo, nnaahala wiirannyeeha ‘mpikeenyu: woopoliya.’—1 Pet. 1:9.