MWAHA WOOSOMIYA 38
Mmiravo—Ukumyaa umpheela wiira ukhale cani?
“Ankhili anaahala wuukhikicera.”—MIRU. 2:11.
NCIPO 135 “Sê Sábio, Meu Filho”
NINHALA WIITTHUCANI? a
1. Marikarikoni Yehoyasi, Usiya ni Yosiya yaanannyaaya?
UHOTOKO weemela ni wuupuwela mananna waahalaa ukhala yeeriyaka wiira uhaana ukhalaka nhooleli aapoovu a Nluku, hataa ukhala mwaana awula mmirawo? Waahala uvarela cani nteko ikuru caa, uhoolela waa ni ukhulupalyaa? Ibiiblya inaawuulumana amirawo enci yaakhanle mamwene u Yuuta. Wootakihera, Yehoyasi aakhanle mwene narina myaakha 7 paahi, Usiya aakhanle mwene narina myaakha 16 ni Yosiya aakhanle mwene narina myaakha 8. Iyo itthwiiyo pooti yahaarikelaca cinene. Waahookhalaru wiira iyo itthwiiyo yaari yoorika, Yehova ni atthu akiina yahaakavihera utthema marikariko yaarinaaya ni upanka citthu comaana.
2. Kontha isiyani ikhanlyaaya itthu yofayita usoma matakihero a Yehoyasi, Usiya ni Yosiya?
2 Hiiva khaninakhala mamwene awula mapwiyamwene. Masi hi pooti uwiitthucera citthu cofayita mamwene Yehoyasi, Usiya ni Yosiya. Ayo yaholakela upanka citthu comaana, masi ciicammo yaholakela upanka citthu coohiloka. Ukati unhaleehu woopela mwaha ayo matakiherwaayo, ninaahala woona nlattuni ninlamuliyeehu waathanla apatthani omaana, uhihiyerera ukhala atthu owiiyeviha ni wiikurumica wiira nimphiyeere Yehova.
MWAATHANLE APATTHANI OMAANA
Pooti wanontakiheehu Yehoyasi neewelelaka ikano caapatthaniihu omaana (Nwehe iparaagarafu 3, 7) i
3. Manannani Yehoyata cankavihenryaawe mwene Yehoyasi ulakela upanka citthu comaana?
3 Untakihe Yehoyasi ulakelaka upanka citthu comaana. Ukati waaryaawe mmirawo, mwene Yehoyasi aholakela upanka citthu comaana. Uyo khaarina athumwaane. Phimaana, aatthara ikano ca Yehoyata, nankuttho ookhuluvelya. Yehoyata ahomuunuwiha Yehoyasi khampa mwaamwanawe onnyara. Ni nlattu wonvaha ntakihero nomaana, Yehoyasi aholakela unswalela Yehova ni waakavihera apoovu upanka itthu imocaaru. Yehoyasi mpaka ciicammo aholakela ulokihaca itempulu ya Yehova.—2 Ikor. 24:1, 2, 4, 13, 14.
4. Ifayitani ninkhalaneehu nanfentaka Yehova ni neewelelaka malamulwaawe? (Nwehe Miruku 2:1, 10-12.)
4 Wakhalaka wiira asithumwanaa awula ntthu nkhwaawe naawiitthuciha myaha ca Yehova ni malamulwaawe, ukupali wiira iyo ikhanle itthuvo yuulupale ni yooreera inoovahaawe. (Nsome Miruku 2:1, 10-12. b) Asithumwanaa weeva pooti uwiitthuciha nimananna oovirikana. Woone mananna anuunu amoca aneehaniya Katya caakaviheriyaaya naathumwanaya ulakela upanka citthu comaana. Mahuku otheene ukati athumwanaya waaveleelaaya ucikolani, yaanoopela mwaha iveerusu yo nno nihukunno. Anuunu Katya aheera: “Khula nihuku nnyo myahannyo cankikavihera ukhitiri waanana marikariko o nno nihukunno.” Masi atthunaka asithumwanaa ahaana ikano akumihilyaaya mbiiblyani cuuhimenryaaya ni weeva unooniha wiira cinaarika weettela. Wakhalaka commo, isiyani inhala wuukavihera wiiwelela? Anuunu akiina aneehaniya Anastasia aheera wiira asithumwanaya khayaahiya waahimerya nlattuni waakhottiheraaya upanka citthu cikiina. Ayo aheera: “Iyo itthwiiyo yankikavihera miiva ucuweleeha nlattuni waakikhottiheraaya upanka citthu cikiina. Ayo khayaakikhottiha upanka nnyo citthunnyo wiira akiwehawehe nhina khula itthu yaapankaaka, masi yaapanka commo kontha yankifenta ni yaapheela ukikhikicera.”
5. Asithumwanaa ni Yehova anoonela cani citthu cimpankaa? (Nwehe Miruku 22:6; 23:15, 24, 25.)
5 Asithumwanaa unaahala waatteela nrima weettelaka ikano cinoovahaaya co mbiiblyani. Masi itthu yofayita cinene ukhalaka wiira unaahala untteeliha nrima Yehova ni unaahala ulipihaca upatthannya nuuyova. (Nsome Miruku 22:6; 23:15, 24, 25. c) Nnyo phi citthu cinhala uwiiriha untakiha Yehoyasi, ukati waaryaawe mmirawo.
6. Ikanoni Yehoyasi yaapacenryaawe wiiwelela ukati Yehoyata waakhwilyaawe ni yaakhumelenle isiyani? (Nwehe 2 Ikoronika 24:17, 18.)
6 Wiitthucere citthu coohiloka Yehoyasi caalakenlyaawe upanka. Ukhwa wawe Yehoyata, Yehoyasi ahancera waapatthanana atthu oohiloka. (Nsome 2 Ikoronika 24:17, 18. d) Uyo aathanlile utthara ikano caavahiyaawe naasaana o mamwene o Yuuta, yahanfenta Yehova. Atthunaka weeva unaakupali wiira Yehoyasi khaalamuliya waapatthanana ayo atthwaayo. (Miru. 1:10) Masi uhiya upanka commo, uyo ahokhala nlolo ni aholakela wiiwelela ikano caatthu oohiloka. Ni itthu yootepa uriipiha nrima yaapankilyaawe waari umwiiviiha munnaawe eehaniya Zakariya, ukati waamananihilyaawe unhimerya wiira itthu yaapankaawe khayaareenre. (2 Ikor. 24:20, 21; Mat. 23:35) Iyo khweeli yaari itthu yooriipiha nrima! Wiipaceroni, Yehoyasi ahopanka saana, masi wahoolo uyo ahorukunuwela uswali weekhweeli ni ahokhala nakhirini. Wiimaleloni, uyo aheeviya naanantekwaawe. (2 Ikor. 24:22-25) Uyo canhala unkhumela citthu cotheene saana unari wiira khaahiile umwiiwelela Yehova ni uwiiwelela ale anonfenta. Isiyani weeva ineetthucera ntakihero noohiloka na Yehoyasi?
7. Tipani weeva unlamuliya unthanla wiira akhale mpatthannya? (Nwehe ciicammo ilatarato.)
7 Citthu coohiloka caalakenlyaawe upanka Yehoyasi, ninawiitthucera wiira hiiva nihaana waathanla apatthani omaana annikurumica upanka citthu comaana. Nihaana nikhalanaka apatthani anonfenta Yehova ni ampheela untteeliha nrima. Ni asipatthaniihu pooti ukhala oolupale unipwaha myaakha cihu hiiva awula pooti ukhala amirawo cinene. Uhiliyale wiira Yehoyasi aari mmirawo cinene nanlikanihaka ni Yehoyata. Uwuupuwelaka asipatthannya, wiikohe co: ‘Ayo anaakikavihera ulipihaca umwaamini waka Yehova? Ayo anaakikurumica miiva weettela ikettelo ca Yehova Nluku? Ayo anawuuluma myaha ca Yehova ni ikhweeli co mbiiblyani? Ayo anaahisima ikettelo ca Yehova? Ayo anooluma citthu wiira paahi akicivelihe awula ahaana ulipa nrima wiira akivahe ikano kapheelaka?’ (Miru. 27:5, 6, 17) Ikhweeli phi ila: Wakhala wiira asipatthannya khaanonfenta Yehova, ayo khaanakhala apatthani anhala wuukavihera. Masi wakhala wiira asipatthannya ananfenta Yehova, waavaresese ayo apatthannyaayo—yaayo phiri apatthani anhala wuukavihera!—Miru. 13:20.
8. Wakhala wiira weeva unaavarela nteko interneti awula redes sociais, isiyani yaahala ureera weeva wuupuwela?
8 Interneti awula nnye cineehaniya redes sociais pooti unikavihera uwuulumana amuciihu ni asipatthaniihu. Masi atthu enci anvarela nteko interneti wiira yiithoonye ni yooniye naakhwaaya. Ayo anaweesa ilatarato ni ividiyu caya cinoonihera itthu ithumilyaaya naanaano awula ipankilyaaya. Wakhala wiira weeva unaavarela nteko interneti ni redes sociais, wiikohe co: ‘Kiireke wiira miiva kinvarela nteko interneti wiira kooniye naakhwaaka? Kiireke wiira miiva kimpheela uwoonihera akhunanaka citthu comaana awula kimpheela wiira kiicoonihere? Kiireke wiira citthu cinthoonyiheraaya atthu akiina mwinternetini cinaakiiriha wuupuwela, wuuluma awula upanka citthu coohiloka?’ Amunna Nathan Knorr yaapanka mphantte nhina Mphwinko wo Mahumu Unhoolela yahovaha ila ikanweela: “Nhimananihe waaciveliha atthu akhwaawe, kontha nnohala umalela uhinciveliha hataa ntthu. Mmananihe unciveliha Yehova. Naayo manannaayo, ninaahala waaciveliha atthu otheene anonfenta.”
NIHAANA NIHIHIYAKA WIIYEVIHA
9. Isiyani Yehova yankavihenryaawe Usiya upanka? (Nwehe 2 Ikoronika 26:1-5.)
9 Untakihe Usiya ulakelaka upanka citthu comaana. Usiya ukati waaryaawe mmirawo, uyo aari ntthu owiiyeviha. Uyo aheetthuca “umoova Nluku eekhweeli.” Usiya aakhwile narina myaakha 68 ni ikwaha cinci, Yehova ahoncaaliha. (Nsome 2 Ikoronika 26:1-5. e) Usiya ahaatthema awanannyaawe enci ni ahokhaliha isittatti yo Yerusalemu nipuro nookhikicerya. (2 Ikor. 26:6-15) Khweeliini, Usiya waanantteela nrima nlattu wo citthu cotheene caakhitinryaawe upanka akaviheriyaka ni Yehova.—Ekles. 3:12, 13.
10. Isiyani yankhumelenle Usiya?
10 Wiitthucere citthu coohiloka Usiya caalakenlyaawe upanka. Mwene Usiya aholamalela waaruma atthu ni waahimerya itthu yaalamuliyaaya upanka awula yahaalamuliyaaya. Niireke wiira iyo itthwiiyo yahomwiiriha wuupuwela wiira pooti waapankaawe khula itthu yaapheelaawe? Nihuku nimoca, Usiya ahokela ntempuluni ya Yehova ni aapheela upaha ilumpani wakhilompini. Iyo yaari itthu mamwene yahaalamuliyaaya upanka. (2 Ikor. 26:16-18) Nankuttho Azariya ahomananiha unhiiha, masi Usiya ahoviruwa. Wooriipiha nrima, Usiya ahohiya unvaresesa Yehova ni ahottarusiya nimakuttula. (2 Ikor. 26:19-21) Yeeriyaka wiira Usiya khaahiile unvaresesa Yehova ni ukhala ntthu owiiyeviha, atthunaka khayaahala ukhumelela iyo itthwiiyo!
Uhiya wiicoona nlattu wo citthu cinkhitiriihu upanka, nihaana ninvahaka Yehova uttitthimihiya wotheene (Nwehe iparaagarafu 11) j
11. Isiyani inhala unikavihera uhihiyerera ukhala atthu owiiyeviha? (Nwehe ciicammo ilatarato.)
11 Ukati mwene Usiya waakhanlyaawe nlopwana okuru cinene, uyo aholiyala citthu cotheene Yehova campankenlyaawe. Nineetthucani? Nihaana nihiliyalaka iparakha cotheene cinnivahaawe Yehova. Uhiya ukhala niicoonaka nlattu wo citthu cinkhitiriihu upanka, nihaana nanvahaka uttitthimihiya wotheene Yehova. f (1 Akor. 4:7) Ciicammo, nihaana nikhalaka atthu owiiyeviha ni ucuwela wiira hiiva nikhanle atthu oopahuwa ni ninaapheela ulakiya. Amunneehu arina myaakha 60 ahantikha co: “Mi kiheetthuca uhirusiya akhunanaka yoonaka citthu cinvonyihaaka. Ikwaha cikhwaawe, mi kinaavonyanihacaka citthu. Nlattu wo iyo itthwiiyo, miiva kinaavahiyaka ikano. Uhookhalaru commo, miiva kinaamananiha uhiya nnyo citthunnyo ni urwaanela uhoolo unvarela nteko Yehova.” Namwiiwelelaka Yehova ni nihihiyereraka ukhala atthu owiiyeviha, hi ninkhala atthu ootteeliya khweeliini.—Miru. 22:4.
UHIHIYE UMPATTHANANA YEHOVA
12. Manannani Yosiya campatthanannyaawe Yehova ukati waaryaawe mmirawo? (Nwehe 2 Ikoronika 34:1-3.)
12 Untakihe Yosiya ulakelaka upanka citthu comaana. Yosiya aarina myaakha 16 ukati waapacenryaawe umpatthanana venci Yehova. Uyo aapheela wiitthuca citthu cinci ca Yehova ni upanka itthu inoncivela. Masi uyo cahonkhumelela citthu canrikihenle umpatthanana Yehova. Ule ukatyuule, atthu enci yaaswalela anluku oohiloka ni Yosiya ahaana alipaka nrima wiira akhitiri waakihera uswali weekhweeli. Ni iyo phi itthu yaapankilyaawe. Uyo aari hinaaya upiihera myaakha 20 ukati waalakenlyaawe umalamaliha uswali woohikhweeli ile ilapweele.—Nsome 2 Ikoronika 34:1-3. g
13. Woonela waa, wiivaherera wa Yehova maanaaya isiyani?
13 Hataa weeva ukhalaka mmirawo, weeva pooti untakiha Yosiya ni wiitthuca citthu cinci ca Yehova ni makhalelwaawe. Iyo phi itthu inhala wuukurumica weeva ulakela unvaha ukumyaa Yehova. Masi manannani makhalelwaa cinhalaaya ukhala walakelaka upanka iyo itthwiiyo? Munna Luke, pattisiye narina myaakha 14 heera: “Ukhuma nna co mpaka, mi kinhala weesa nteko wa Yehova nipuro noopacera muukumini waka ni kinaahala wiikurumica wiira kintteelihe nrima Yehova.” (Mark. 12:30) Pooti wankupalya wiira unaahala ucaalihiya walakelaka upanka iyo itthwiiyo!
14. Uttonkace matakihero aamirawo anontakiha Yosiya.
14 Marikarikoni atthunaka weeva unhala waanana khampa mmirawo onswalela Yehova? Munna Johan, pattisiye narina myaakha 12 naattonkaca mananna cinkhanyererihiyaawe naasimpwanaawe oocikolani wiira ampahe sikaro neehaniya vaping. Wiira akhalane ikuru inhala unkavihera uvilela itthu inkhanyererihiyaawe, Johan nawiicuupusera mwaaneennyaawe wiira sikaro uhiya paahi utankanya ukumiihu, uyo pooti utankanya upatthaniihu ni Yehova. Nuunwiihu Raquel, pattisiye narina myaakha 14 naattonkaca itthu inonkavihera wiira aanane marikariko ucikolani. Uyo heera: “Mi kinaamananiha ulattanihera citthu cotheene niitthu yo mbiiblyani. Wootakihera, wakhalaka wiira ucikolani ninsomihiya História, mi kinaamananiha wuupuwela ihantisi yo mbiiblyani awula inatiri invaranaca niitthu insomihiyeehu. Ni ikwaha cikhwaawe, ucikolani kamoopanaka ntthu mwaha wo mbiiblyani, mi kinawuupuwela iveerusu ni kinaamoonihera.” Marikariko weeva anaananaa pooti uvirikana nimarikariko aanannyaawe Yosiya. Uhookhalaru commo, weeva pooti ukhala ntthu oocuwelaca ni oovaresesa itthu khampa Yosiya caaryaawe. Waanana marikariko unari mmirawo pooti wuukavihera ukhala owiitthenkaceene wiira waanane marikariko wahoolo.
15. Isiyani yankavihenre mwene Yosiya unvarela nteko Yehova saana? (Nwehe 2 Ikoronika 34:14, 18-21.)
15 Ukati mwene Yosiya waarinaawe myaakha 26, uyo ahopacera ulokihaca itempulu. Yooyo ukatyuuyo, phaaphwanyiyaaya ilivuru yo malamulo a Yehova yaavahiyaawe Moceesi. Ukati weewilyaawe isomiyaka, uyo ahopanka marukunuso wowaakuvya wiira eettele itthu yantikhiye nhina iyo ilivurwiiyo. (Nsome 2 Ikoronika 34:14, 18-21. h) Weeva uholakela wiikurumica usoma Ibiiblya khula nihuku? Wakhala wiira uholakela upanka commo, unnokhitiri usoma khula nihuku? Unnantikhaka nipuro iveerusu cinsomaa cinoonaa wiira cinaahala wuukavihera? Munna Luke, nimoopenleehu mwaha, nawantikha nkadernuni iveerusu cinoncivela nophwanyaawe ukati unsomaawe Ibiiblya. Upanka commo pooti atthunaka wuukavihera weeva uhaakuva uliyala iveerusu co mbiiblyani awula itthu yiitthucilyaa. Ukati unviraa ucuwelaka Ibiiblya, weeva unaahala wuucivela cinene usoma Ibiiblya ni unaahala upheela unvarela nteko Yehova. Ni khampa Nuulumo na Nluku nankavihenryaaya mwene Yosiya upanka citthu comaana, nno ciicammo ninaahala wuukavihera weeva.
16. Kontha isiyani mwene Yosiya aapankilyaawe itthu yootakhala cinene, ni isiyani nimmwiitthucereehu?
16 Wiitthucere citthu coohiloka Yosiya caalakenlyaawe upanka. Ukati Yosiya waarinaawe myaakha 39, uyo aholakela upanka itthu yoohiloka yaamwiirihile ukhwa. Uhiya waavya ikano ca Yehova, uyo ahowiikhuluvela. (2 Ikor. 35:20-25) Ni iyo ikhanle itthu yuulupale nineetthucereehu. Hataa nikhalaka oolupale awula amirawo, ni hataa ukhalaka wiira nancenre unswalela Yehova khalayi awula naanaano, hi nihaana uhihiyerera umpatthanana Yehova. Phimaana, nihaana ninlompaka Yehova, ninlepelaka ikano, usoma Ibiiblya ni wiiwelela ikano co makristau ookhomaala. Naayo manannaayo, ninaahala uvukula citthu cinci caahala uniiriha uvara matampi. Masi ninaahala utepa ukhalana citthu cinhala unitteeliha nrima.—Tiya. 1:25.
AMIRAWO—NYUUVA POOTI UKHALA OOTTEELIYA WEEKHWEELI
17. Citthuni cofayita ninwiitthucereehu mamwene mararu o Yuuta?
17 Cihaavo citthu cinci comaana nyuuva nnolamuliyeenyu upanka nnari amirawo. Ihantisi ya Yehoyasi, Usiya ni ya Yosiya cinawoonihera wiira nyuuva pooti ulakela upanka citthu comaana contteeliha nrima Yehova, hataa nkhalaka amirawo. Uhookhalaru wiira ayo otheene yaamalenle uvara matampi, weeva pooti utakiha citthu comaana caapankilyaaya ni unyema citthu cootakhala caapankilyaaya. Wapankaka commo, muukumini waa motheene unaahala utteeliya venci.
Ukati waaryaawe mmirawo, Davidi aanampatthanana Yehova. Phimaana, uyo ahooniya ni Yehova ukhala nlopwana ookhuluvelya ni ahokhalana ukumi wootteeliya (Nwehe iparaagarafu 18)
18. Matakiheroni anoonihera wiira ukumyaa pooti ukhala wootteeliya? (Nwehe ciicammo ilatarato.)
18 Ibiiblya ciicammo inaawuuluma amirawo akhwaawe yampatthananne Yehova, yaacaalihiye ni yaakhanle ootteeliya venci. Mmirawo mmoca aaphwanyile iyo iparakheeyo khanle Davidi. Davidi naryeene mwammiravo, ahothanla ukhala mpatthani a Yehova ni wahoolo ahokhala mwene ookhuluvelya. Uhookhalaru wiira Davidi ahovara matampi, ikwaha cinci Yehova aamoona ukhala nswalyaawe onvaresesa. (1 Mam. 3:6; 9:4, 5; 14:8) Nnoonela cani nyuuva usoma ihantisi ya Davidi? Khweeliini weeva unaahala wiicoona ulipihiya ni ukurumiciya unswalela Yehova sana-saana. Awula weeva pooti usoma ciicammo ihantisi ya Markus ni ya Timotiyu. Ayo yaapacenre unswalela Yehova anari amirawo cinene ni khayaahiyerenre unswalela mpaka waakhwilyaaya. Nlattu woopanka commo, ayo yahontteeliha nrima Yehova ni wahaatteela nrima venci muukumini waya.
19. Weeva umpheela wiira ukumyaa ukhale cani?
19 Mananna weeva cinvarelaa nteko ukumyaa nenna co phinthoonyera mananna unhalaa uvarela nteko ukumyaa wahoolo. Wakhalaka wiira weeva unankhuluvela Yehova uhiya wiikhuluvela, uyo khanhala uhiya wuukavihera ulakela upanka citthu comaana. (Miru. 20:24) Weeva khweeliini pooti ukhalana ukumi wootteeliya ni citthu comaana cinci. Masi uhiliyale wiira Yehova naavaha ifayita cinene citthu cinompankelaa. Uvarela nteko ukumyaa wiira waaswalele Apaapeehu Yehova ikhanle itthu yootepa ureera weeva inlamuliyaa upanka. Khiivo-tho itthu ikiina yootepa ureera uvikana iyo.
NCIPO 144 Pensa nas Bênçãos de Jeová
a Yehova naacuwela wiira ikwaha cikhwaawe ikhanle itthu yoorika mmirawo upanka citthu comaana ni uhihiyerera ukhala mpatthannyaawe. Masi manannani weeva unlamuliyaa ulakela upanka citthu comaana cinhala waatteeliha athumwana o wiirimu? Ninaahala woona matakihero mararu aamirawo yaari mamwene o Yuuta. Wiiwelele saana ni woone itthu inhalaa uwiitthucera ayo amirawaayo.
b Miruku 2:1 Mwanaka, watthunaka moolumwaaka ni wasunkaka wanrimani malamulwaaka, 10 Ucuwelaca woophwanyaka wanrimaniwaa ni ucuwela woocivela vale waroohoniwaa, 11 Moopuwelelo anaahala wuusunka ni ankhili anaahala wuukhikicera, 12 Wiira awoopole mphironi yoohiloka, mwaatthuni anooluma citthu coohinamaana
c Miruku 22:6 Munlake mmirawo iphiro yoohala utthara, hataa ooluvalaka khanhala uhiya utthara. 23:15 Mwanaka, nrimaa wakhalaka woocuwelaca, nrimaaka unaahala utteeliya. 24 Athumwaane mwaana neettela isariya khweeliini anaahala utthapa; Athumwaane mwaana ncuweli anaatteeliya nlattu wo uyo mwaanooyo. 25 Athumwaane ni anumwaane anaahala utteeliya, ni athiyana anyanre anaahala utthapa
d 2 Ikoronika 24:17 Ukhwa wawe Yehoyata, ahooleli o Yuuta yaahowa ni yahokhoroma uhoolo waamwene, ni amwene yahowiiwelelaca. 18 Ayo ahohiya inupa ya Yehova, Nluku asitaataaya, ni ahopacera uswalela mapotto ni attontto, phimaana Nluku haaviruwela atthu o Yuuta ni o Yerusalemu nlattu womatampyaaya.
e 2 Ikoronika 26:1 Apoovu otheene yahonkusa Usiya, aarina myaakha 16, ni yahompanka mwene nipuro naathumwaane, Amazia. 2 Uyo aholokihaca ilapo yo Elote ni ahoturusela ukhala yo Yuuta ukhwa waya amwene. 3 Usiya aarina myaakha 16 ukati waakhanlyaawe mwene, ni holamulela myaakha 52 u Yerusalemu. Ncina naanumwaane yeehaniya Jekolia, o Yerusalemu. 4 Uyo aanaweettela ikano ca Yehova, khampa Amazia, athumwaane yaapankaaya. 5 Uyo aanontothaka Nluku mmahuku a Zakariya, mwiitthucihale umoova Nluku eekhweeli. Uwakati wantothaawe Yehova, Nluku eekhweeli aanampankiha urwaa uhoolo.
f Moone ikwaaturu “Cuidado com a falsa modéstia” nhina mwaha “É importante ser popular nas redes sociais?” nsayitini jw.org
g 2 Ikoronika 34:1 Yosiya aarina myaakha 8 ukati waakhanlyaawe mwene, ni holamulela myaakha 31 u Yerusalemu. 2 Uyo aheettela ikano ca Yehova ni aheettela mittala ca Davidi, anhiya tataawe; khaahiile weetteela sana-saana. 3 Ukati waapiihenryaawe myaakha 8 alamulelaka, nari mmirawo nanlelo, ahopacera umwaavya Nluku a Davidi, anhiya tataawe; ni waapiihenryaawe myaakha 12 alamulelaka ahopacera ureeriha ilapo yo Yuuta ni u Yerusalemu apwesakacaka ikhilompi, mapotto yaaswaleliya, ilatarato ni attontto oyuuma
h 2 Ikoronika 34:14 Ukati waakumihiyaaya nsurukhu waawaaniye nnupani wa Yehova, nankuttho Helekiya, ahophwanya ilivuru yo malamulo a Yehova aavahiyaawe Moceesi. 18 Safaa, aahoolela miteko, ahowiirela ciicammo amwene: “Nankuttho Helekiya, hookivaherera ila ilivurwiila.” Ni Safaa ahopacera usoma amwene yiiwaka. 19 Mwene wiiwa wawe ayo moolumo omalamulwaayo, ahaanyula ikuwo cawe caawanryaawe. 20 Vano mwene ahaaruma Helekiya, Aikawu, mwaana a Safaa, Abdom, mwaana a Mika, Safaa, aahoolela miteko, ni Asaiya, nanteko aamwene eeraka: 21 “Nrwaace, mwankohace Yehova isiyani nopheelaawe uhimya nhina ila ilivurwiila; kontha Yehova honiviruwela cinene, ukhala wiira asinhiya taateehu khayeettenle moolumo a Yehova ari nhina ila ilivurwiila.”
