MWAHA WOOSOMIYA 37
Munkhuluvele Yehova khampa Sansau caapankilyaawe
“Pwiiya Yehova, sontte, nkuupuwele ni nkilipihe-tho.”—MASUW. 16:28.
NCIPO 30 Meu Deus, Meu Amigo e Pai
NINHALA WIITTHUCANI? a
1-2. Kontha isiyani ikhanle itthu yomaana usoma ihantisi immuuluma Sansau?
NYUUVA nnoopuwelaka isiyani mweewaka ncina Sansau? Atthunaka, nyuuva nnoopuwela wiira, uyo aari nlopwana nakuru cinene. Iyo ikhanle ikhweeli. Masi uyo aholakela citthu coohinamaana ni cahonkhumelela citthu cootakhala nlattu wo iyo itthwiiyo. Masi uhookhalaru commo, Yehova aaweheeha citthu comaana paahi Sansau caapankilyaawe. Phimaana Yehova hohiya mbiiblyani ntakihero na Sansau wiira hiiva niitthucere.
2 Yehova ahonvarela nteko Sansau wiira apanke citthu cootikhiniha ni ciicammo uwoopola asarayeli. Uvira waya myaakha cinci Sansau nakwileene, Yehova ahonvarela nteko apostolu Paulu wiira antikhe ncina na Sansau nipuro nantikhiye macina aatthu yoonihenre waamini venci. (Mabere. 11:32-34) Ntakihero na Sansau pooti unilipiha. Uyo ahonkhuluvela Yehova hataa akhalaka ukati woorika cinene. Nttwee noone mananna ntakihero na Sansau ninhalaaya unikavihera ni manannani hiiva ninhaleehu umwiitthucera.
SANSAU AHONKHULUVELA YEHOVA
3. Nrinttini Sansau waavahiyawe?
3 Ukati waayariyaawe Sansau, mafilisteu yaanaahuviha ni waavyaavyeeha asarayeli. (Masuw. 13:1) Ayo yaari ootakhala nrima cinene, phimaana asarayeli yanhuva venci. Yehova ahonthanla Sansau wiira awoopole asarayeli mmatatani wo mafilisteu. (Masuw. 13:5) Iyo itthwiiyo yaari yoorika cinene! Wiira Sansau akhitiri upanka iyo itthwiiyo, uyo ahaana ankhuluvelaka Yehova.
Sansau ahonkhuluvela Yehova ni khalolovacile. Ahovarela nteko itthu yaari wakhiviru wawe wiira apanke itthu Yehova impheelaawe (Nwehe iparaagarafu 4-5)
4. Manannani Yehova cankavihenryaawe Sansau ukati waavariyaawe? (Nwehe Masuwiisi 15:14-16.)
4 Nttwee noone ntakihero nimoca ninthoonyera mananna Sansau ankhuluvelaawe Yehova ni mananna aakhuluvelaawe ukaviheriya ni Yehova. Nkwaha mmoca, anakhotto mafilisteu yahorwaa mpaka u Leí, atthunaka waari u Yuuta, wiira yanvare Sansau. Alopwana otheene u Yuuta yahoova, phimaana ayo Yaholakela unhiya Sansau wiira avariye. Sansau ahovariya naapoovwaawe ni ahotthukiya nimikhoyi miili conaanaano ni ahorwaaniya wo mafilisteu. (Masuw. 15:9-13) Masi “nnepa wowaarya wa Yehova wahonva ikuru” ni Sansau ahokhitiri wiitthukula nnye mikhoyinye ni yooyo ukatyuuyo Sansau aholokottha nikhuva no miino omwannama neehaniya puuru ni avarelaka nteko nno nikhuvanno ahowiivakaca alopwana ookhalaka 1.000 afilisteu!—Nsome Masuwiisi 15:14-16. b
5. Manannani Sansau cithoonyenryaawe wiira anonkhuluvela Yehova?
5 Masi kontha isiyani Sansau aavarenlyaawe nteko nikhuva no puuru? Iyo yaari itthu yoomalela ntthu aahalaawe wuupuwela uvarela nteko wiira eecaakihere wakhottoni! Masi khweeliini, Sansau ancuwela wiira anhala ukhitiri waana akaviheriyaka ni Yehova, kontha nikhuva no miino khinakhala itthu aahalaawe uvarela nteko wiira aane ikhotto. Uyo nlopwana ookhuluvelyooyo aavarenle nteko itthu yaari wakhiviru wawe wiira akhitiri upanka yootthuna ya Yehova. Khweeliini Sansau ahokhitiri waana ile ikhottweele ni ahaatthema ale alopwanaale kontha uyo aakaviheriye ni Yehova!
6. Ntakihero na Sansau, ninnivaha niwehereroni?
6 Yehova ciicammo pooti univaha ikuru wiira nikhitiri uwacera khula nrintti hiiva ninvahaceriyeehu, hataa ule ninooneehu wiira unaarika cinene. Ni Yehova pooti wampankaawe iyo itthwiiyo ni mananna ootikhiniha. Phimaana, munkhuluvele Yehova. Khampa cankavihenryaawe Sansau, uyo naahala wuukaviherani nyuuva ciicammo mwapankaka itthu impheelaawe, mwankhuluvelaka ni mwaavyaka ukaviheriya nuuyova.—Miru. 16:3.
7. Nvahe ntakihero ninthoonyera wiira ikhanle itthu yomaana waavya ikano ca Yehova?
7 Mayamunna enci anvara nteko wootekateka anawoonihera wiira anankhuluvela Yehova. Khalayi, ayo yaanawuupuwela uteka Isalau co Umwene ni ipereetiyu cikhwaawe co Mumphwinkoni wa Yehova. Masi nuukatyaaya, atthu enci yanvira yapattisiyaka ni mphwinko wahaana wapankaka marukunuso. Mayamunna yaawehaweha nnyo mitekonnyo yaahavyaavya ukaviheriya ni Yehova ni yahottehatteha mananna makhwaawe oovara uyo ntekooyo, wootakihera, uthuma ipereetiyu cootekiyeene ni ulokihaca. Munna Robert kavihenre myaakha vakaani uttuli miteko cootekatekiya ntuninyani motheene heera co: “Wiipaceroni wanrika ukupali wiira naahala upacera uvara mitekonnyo iyo inanneeyo. Kontha wanvirikana ni mananna caavareehu nteko myaakha cinci uttuli. Masi mayamunna yaheekurumica uttharelela ayo marukunuswaayo, wahoonannya wiira Yehova ankavihera ayo marukunuswaayo”. Nno nikhanle ntakihero nimoca ninoonihera mananna Yehova naakaviheraawe apoovwaawe wiiraneeha itthu impheelaawe. Ikwaha cikhwaawe, waanaareera wiikoha co: ‘Kiireke wiira miiva kinawaavya malakihero a Yehova ni kiheetthenkaca wiira keettele?’
SANSAU AHOVARELA NTEKO ITTHU YEHOVA ANVAHALYAAWE
8. Sansau aapankile isiyani ukati aaryaawe ni ntthona?
8 Nyuuva atthunaka nnawuupuwela wiira Sansau ahopanka citthu cinci cootikhiniha. Wootakihera, nkwaha mmoca hirina itthu mmatatani uyo ahomwiiva kharamu ni ikwaha ikhwaawe ahowiiva mafilisteu ookhalaka 30 isittatti yo Ascalom. (Masuw. 14:5, 6, 19) Sansau aanaacuwela wiira woohikaviheriya ni Yehova uyo khaahala ukhitiri upanka nnyo citthunnyo. Iyo inawoonannya kontha ikwaha imoca, Sansau nahonvola ntthona uwiivakaca wawe mafilisteu ookhalaka 1.000. Vano isiyani yaapankilyaawe? Uhiya waavya maaci wiira amalihe itafaawuti yaarinaawe, uyo ahaavya ukaviheriya ni Yehova.—Masuw. 15:18.
9. Isiyani Yehova yaapankilyaawe ukati Sansau waalepenlyaawe ukaviheriya? (Nwehe Masuwiisi 15:19 ni nwehe niwehero.)
9 Yehova ahaakhula nivekelo na Sansau apankaka mwiiriirya wookumihera maaci. Sansau, uwurya wawe ale maacyaale “ikuru cawe cahonturuwela ni ahokhala oolipa.” (Nsome Masuwiisi 15:19 c ni nwehe niwehero.) Pooti ukhalaka wiira ayo maacyaayo, yahaavo ukati Samuweli wantikhaawe ilivuru yo Masuwiisi. Ukati wotheene asarayeli waawehaaya ayo maacyaayo, yaanawuupuwela wiira yankhuluvelaka Yehova uyo anhala waakavihera khula ukati yaahalaaya ulepela ukaviheriya.
Sansau ahohokoleela ukhalana ikuru uwurya wawe maaci Yehova yanvahilyaawe. Woolikanaca ninlamuliya wiikurumica nhina mminepani ni utthuna citthu Yehova cinnivahaawe (Nwehe iparaagarafu 10)
10. Isiyani inlamuliyeehu upanka wiira nikaviheriye ni Yehova? (Nwehe ciicammo ilatarato.)
10 Hiiva ciicammo ninlamuliya ulepela ukaviheriya ni Yehova, hataa ukhalaka wiira nihaana ucuwelaca ni nihaana ikuru ni hataa ukhalaka wiira nihonvarela nteko cinene uyova. Ninlamuliya ukhala atthu owiiyeviha ni ukupali wiira ninhala ukhitiri upanka citthu cotheene nakaviheriyaka ni Yehova. Khampa Sansau, aakhalannyaawe ikuru uwurya wawe ale maacyaale aavahiyaawe ni Yehova, hiiva ciicammo pooti wankhalaneehu ikuru nhina mminepani natthunaka citthu cotheene Yehova nonivahaawe.—Mat. 11:28.
11. Manannani Aleksey caathoonyenryaawe wiira anonkhuluvela Yehova, ni hiiva ninhala upanka cani iyo?
11 Moone ntakihero na Aleksey, munna mmoca o Rússia nolupatthiya venci. Isiyani yankavihenre ukhala oolipa, hataa aananaka masakha? Uyo wamoca naamwaarawe yaari oolipa nhina mminepani. Uyo neera: “Mi kinawiikurumica uhihiya usoma Ibiiblya woveekha ni usoma cowantikhiya cowaarya khula nihuku ni kinanlompa Yehova nkhayi naamwaaraka.”Isiyani inlamuliyeehu umwiitthucera munna Aleksey? Uhiya wiikhuluvela imwaneeneehu, ninlamuliya unkhuluvela Yehova. Masi manannani? Nihihiyereraka usoma Ibiiblya veekha ni uvara miteko coominepani, cinhala ulipihaca waamini wihu. Napankaka commo, Yehova naahala ucaaliha wiikurumica wihu. Uyo ahonlipiha Sansau, khweeliini hiiva ciicammo naahala unilipiha.
SANSAU KHAALOLOVACILE
12. a) Itthuni yoohinamaana Sansau Yaalakenlyaawe upanka? b) Manannani ucivelana waya Sansau ni Dalila waavirikanaaya nuucivelana naathiyana akhwaawe?
12 Sansau aari ntthu oopahuwa khampa hiiva, ikwaha cikhwaawe anlakelaka upanka citthu coohinamaana. Itthu imoca yaalakenlyaawe yahonwaanela masakha imwanennyaawe. Sansau navanreene nteko weesuwiisi ukati mwinci, uyova ahomoonenela mwanthiyana mmoca ancivenle o Soreque eehaniya Dalila. (Masuw. 16:4) Ukati vakaani uttuli, Sansau ahaapakanela athiyana amoca yaari o Filisteu. Yehova haamwiirihile Sansau upanka iyo itthwiiyo, kontha vano anaahala ukhitiri uwaanana mafilisteu. Ni ukati nkhwaawe, Sansau ahokela uwannyawe nthiyana mmoca namararuwa oosittatti yo filisteu u Gaza. Ni uyo waari ukati nkhwaawe Yehova aahalaawe unvaha ikuru wiira akhitiri uwaanana mafilisteu oole ncokoole. (Masuw. 14:1-4; 16:1-3) Masi ni Dalila yaari itthu yoovirikana, pooti ukhalaka wiira Dalila aari nsarayeli. Phimaana, uthelanaca waya khawaahala ukhitiriha wiira Sansau awaanane mafilisteu.
13. Isiyani Dalila yaapankilyaawe Sansau?
13 Mafilisteu yahonvaha nsurukhu mwinci Dalila wiira anthepye Sansau. Sansau anciveliya venci ni Dalila, mpaka wahaakhitinryaawe ucuwelela itthu Dalila yaapheelaawe upanka. Dalila ahonkhanyereriha Sansau uhimya isiyani yaamwiiriha ukhalana ikuru. Nlattu wo iyo itthwiiyo Sansau ahonhimerya. Wooriipiha nrima, Sansau mwaneennyaawe aheewaanela masakha. Nlattu wo iyo itthwiiyo ahohiya ukhalana ikuru cawe ni upatthannyaawe ni Yehova.—Masuw. 16:16-20.
14. Isiyani yaamwiirannyenle Sansau nlattu wonkhuluvela Dalila?
14 Sansau ahohuva venci nlattu wonkhuluvela Dalila, uhiya Yehova. Mafilisteu yahonvara ni yahompwesakaca miitho ni yahontthuka usittatti yo Gaza. Ikwaha imoca, Sansau ahowoonihaca ihaaya apoovu o iyo isittattiiyo. Masi vano, uyo woonihaciya ihaaya khampa ipottha. Vano Sansau khaahile woonihaciya ihaaya ukati waakusiyaawe usukuhuuluni yaapankeeliyaawe nluku Dagom. Ayo yaakupali wiira nlukwaaya Dagom phaakavihenre unvara Sansau. Mafilisteu yaapheela uthweeliha itthu yeerannyeele ni yahomwiihanihaca Sansau wiira “waatteelace nrima nlattu woomoona”.—Masuw. 16:21-25.
Yehova ahonlipiha Sansau wiira ahukhumu mafilisteu awiivakacaka (Nwehe iparaagarafu 15)
15. Manannani Sansau coonihenryaawe wiira ahohokoleela unkhuluvela Yehova? (Nwehe Masuwiisi 16:28-30.) (Nwehe ilatarato yo wakaapani.)
15 Sansau ahovara itthu yootakhala cinene, masi uyo khaahiyerenre unkhuluvela Yehova ni unswalela. Uyo ahoweherera ukati womaana wiira apanke itthu yaapheelaawe Yehova, awula, uwaanana mafilisteu. (Nsome Masuwiisi 16:28-30. d) Sansau ahonlepela Yehova, “nkihiye kaalivyaanihere mafilisteu”. Yehova ahaakhula itthu yaalepenlyaawe Sansau ni ahonvaha ikuru cinci ni comiiriirya. Naayo manannaayo, Sansau ahowiiva mafilisteu enci wonkwaha mmoca upwaha awiivilyaawe muukumini wawe motheene.
16. Isiyani nimmwiitthucereehu Sansau niitthu aavonyilyaawe?
16 Sansau ahaana aananaka masakha nlattu wo citthu cootakhala caapankilyaawe, masi uyo khaahiile umananiha upanka citthu cinoncivela Yehova. Iyo itthwiiyo inaanikhumelela hiiva ciicammo. Navaraka matampi ni nalakiyaka awula nahaleelaka mirintti cihu cowanlokoni, khaninlamuliya uhiya unswalela Yehova. Nhiliyale Yehova khannihiya. (Isaa. 103:8-10) Hataa ukhala wiira nihovara itampi, Yehova pooti univarela nteko khampa anvarenlyaawe nteko Sansau.
Pooti ukhalaka wiira Sansau ahoriipiya nrima nlattu woottheka, masi uyo khaahiyerenre unkhuluvela Yehova ni hiiva ciicammo khaninlamuliya ulolovaca (Nwehe iparaagarafu 17-18)
17-18. Mwiitthucileni ni ntakihero na Michael? (Nwehe ciicammo ilatarato.)
17 Moone itthu yaamwiirannyenle munna mmoca mmirawo neehaniya Michael. Uyo, ukati mwinci anvara miteko cowanlokoni, avaraka nteko weepiyoneeru owiicaaverya ni unamakavihera. Masi Wooriipiha nrima, uyo ahovara itampi ni ahohaleela mirintti caarinaawe wanlokoni. Uyo naattonka: “Citthu cotheene cankeettela saana ni cahaavo citthu cinci kaahalaaka uvara ca Yehova, masi woohipica waakhala khampa kihoowiipwesaniha wasirini. Mi kancuwela wiira Yehova khaahala ukihiya, masi mi kaanawuupuwelaka wakhala wiira kanhala ukhitiri ukhalana upatthani waarinaaka nuuyova awula wakhala wiira khanhala ukhitiri unvarela miteko caavaraaka khalayi wanlokoni.”
18 Wootteeliha nrima, Michael khaahiyerenre unswalela Yehova. Nuukatyaaya, uyo ahohokoleela ukhalana mirintti wanlokoni khampa caarinaawe khalayi, ni ilelo uyo humu ni naavara nteko weepiyoneeru owiicaaverya. Uyo neera: “Miiva keekurumica uturuwela ukhalana upatthani ni Yehova kihihiyereraka unhulela nrimaaka kanlompaka, kisomaka Ibiilblya ni kuupuwelaka itthu yaasomaaka. Ukaviheriya ni ulipihiya waka, venci-venci ni mahumu wahokikavihera woona wiira Yehova nanlelo naakifenta. Vano mi koohokoleela ukavihera wanlokoni ni nrima wootaphuwa. Iyo itthwiiyo ihokiitthuciha wiira Yehova nawaalevelela atthu otheene anttharuwa weekhweeli.” Vano hiiva nineetthucani? Nineetthuca wiira pooti ukhuluvela wiira Yehova naahala univarela nteko ni unicaaliha hataa nivaraka matampi. Naahihiyerereke wiikurumica urehererya citthu cinvonnyanihaceehu ni uhihiyerera unkhuluvela.—Isaa. 86:5; Miru. 28:13.
19. Nyuuva nneecoona cani usoma winyu vakaani ntakihero na Sansau?
19 Nhina ula mwahoola, nihoopuseriya citthu caamwiirannyenle Sansau muukumini wawe. Uyova ciicammo aari oopahuwa, masi khaahiile unswalela Yehova, hataa avaraka matampi ni Dalila. Ni Yehova kannyanyanle. Uyo ahohokoleela unvarela nteko Sansau ni mananna ootikhiniha. Ni nanlelo nomoona ukhala nlopwana ookhuluvelya venci, phimaana uyo ncina nawe nihantikhiya nhina ilivuru yo Maberewu ikapiitulu 11. Ikhanle itthu yootteeliha nrima cinene, ucuwela wiira ninaaswalela apaapeehu onifento ni ampheela unilipihaca, venci-venci nakhalaka oololovaca! Phimaana, khampa Sansau nihaana ninlepelaka Yehova neeraka: “Sontte, nkuupuwele ni nkilipihe.”—Masuw. 16:28.
NCIPO 3 Jeova, Minha Forca e Esperanca
a Sansau—Uyo nlopwanooyo naacuweliya naatthu enci, hataa naatthu ahincuwela citthu cinci co mbiiblyani. Ihantisyaawe inaattonkaciya mmatiyaaturuni, mmaciponi ni mmafilimeni. Masi ukumyaawe khinakhala ihantisi yoociva paahi. Hiiva pooti umwiitthucera venci uyo nlopwana aarina waamini woolipooyo.
b Masuwiisi 15:14 Uphiya wawe u Lei, mafilisteu yahokhuwela unaatteenle nrima umoona waya. vano nnepa wowaarya wa Yehova wahonvaha ikuru, ni mikhoyi caatthukeliyaawe cahokhala khampa mikhoyi cowuntta ni cahomora. 15 Uyo ahophwanya nikhuva no miino no puuru nihinaaya wuuma, ahottotta ni ninno nikhuvanno ahowiiva alopwana 1.000. 16 Vano Sansau aheera: “Ni nikhuva no miino no puuru — atthu enci! Ni nikhuva no miino no puuru kihowiiva alopwana 1.000.”
c Masuwiisi 15:19 Vano, Nluku ahottemula mwiithe waarivo u Leí, ni yahokhuma maaci. Sansau uwurya wawe, cahonturuwela ikuru cawe ni aholipa. phimaana wiihannyaawe nno nipuronno En-Hacoré, niri u Leí mpaka ilelo.
d Masuwiisi 16:28 Vano Sansau ahonlompa Yehova eeraka: “Pwiiya Yehova, sontte, nkuupuwele ni nkilipihe-tho yoola nkwahoola paahi, sontte, oo Nluku, nkihiye kaalivyaanihere mafilisteu nlattu wo niithonaka nimoca paahi.” 29 Vano Sansau ahovarela mapotto oweeriyaryaayo yaalipihera inupaayo, avarelaka nikiinanno ni moono wonlopwana ni nikiinno ni moono wonthiyana. 30 Sansau ahokhuwela: “Kikhwe nimafilisteu!” Vano uyo ahopurula mapottwaayo niikuru cawe cotheene, ni inuupeeyo yaahaamoorela ahooleli ni atthu otheene yaari nne nipuronne. Naayo manannaayo, ukhwa wawe, ahowiiva atthu enci upwaha aawiivilyaawe muukumini wawe motheene.
