Nlattuni Yesu waaromonlyaawe moolumo a Davidi ari nhina Isaalimu 22:1 hinaaya ukhwa?

Nhina wo citthu Yesu cuulumilyaawe hinaaya ukhwa, ahaavo moolumo yantikhiye nlivuruni ya Matewus 27:46: “Nlukwaaka, Nlukwaaka, ukihiyenreni veekha?” Wuuluma wawe iyo, Yesu heerannyeeha itthu yantikhilyaawe nasaalimu Davidi nhina Isaalimu 22:1. (Mark. 15:34) Hiiva nanhala uvonya ninuupuwenle wiira Yesu oolumile commo kontha aahonviruwela Yehova awula aahoohiya umwaamini. Yesu ancuwela sana-saana nlattuni waalamuliyaawe ukhwa ni uyo ahotthuna wiiviya. (Mat. 16:21; 20:28) Yesu ciicammo ancuwela wiira waphiyaka ukati waahalaawe wiiviya, Yehova anhala uhiya ‘unkhikicera’ niinanna cotheene. (Jó 1:10) Commo, Yesu anhala uthoonyera wiira aananvaresesa Yehova, hataa ahalaka wiiviya niinanna yoowerya.—Mark. 14:35, 36.

Vano nlattuni Yesu waaromonlyaawe moolumo o iyo isaalimwiiyo? Hataa ukhalaka wiira khanincuweleeha sana-saana, nttwee noone isiyani atthunaka yaamwiirihile wuuluma iyo. *

Yesu atthunaka aapheela uthoonyera wiira Yehova khaahala unkhikicera wiira hiiviye. Yesu ahaana avahereraka ukumyaawe woohikaviheriya ni Yehova. Uyo aari pinaatamu ni ahaana akhwaaka khampa pinaatamu “nlattu waatthu otheene.”—Mabere. 2:9.

 Yesu atthunaka aaromonle moolumo o iyo isaalimwiiyo wiira atthu yuupuwelele itthu inhimyaaya isaalimu yotheene. Ukati wa Yesu, ayuuta waanaacivela uhela mmuru iveerusu cosaalimu. Ni yeewaka iveerusu imoca yosaalimu, ayo yaanawuupuwela itthu inhimyaaya isaalimu yotheene. Wakhala wiira iyo phi itthu yoopuwelaawe Yesu, uyo atthunaka aaromonle ile isaalimwiile wiira aakavihere attharyaawe wuupuwela wiira iyo isaalimwiiyo ihaana inatiri cinci cinooluma ukhwa wawe. (Isaa. 22:7, 8, 15, 16, 18, 24) Ciicammo, iveerusu coomalela co iyo isaalimwiiyo cinanttottopela Yehova ni cinaahimya wiira uyo khanle Mwene olapo yotheene.—Isaa. 22:27-31.

Yesu atthunaka aapheela uthoonyera wiira uyo khiivo yaatthekilyaawe. Hinaaya wiiviya, Yesu ahohukhumwiya woohisariya ni ahootherihiya uveeha. (Mat. 26:65, 66) Uyo aahukhumwiiye wowaakuvyaaca, uhiyu cinene ni uyo khaahukhumwiye toko ayuuta caahukhumwaaya atthu oottheka ule ukatyuule. (Mat. 26:59; Mark. 14:56-59) Ukati Yesu wenryaawe: “Nlukwaaka, Nlukwaaka, ukihiyenreni veekha?,” uyo atthunaka aapheela uthoonyera wiira khiivo itthu yaapankilyaawe yaamwiiriha umphwanela wiiviya.

Yesu atthunaka aapheela uwuupusera atthwaayo wiira uhuva wa Davidi khawaathoonyera wiira uyo ahohiya ukupaliya ni Yehova. Nikoho na Davidi khaninthoonyera wiira uyo ahohiya umwaamini Nluku. Phimaana upanka wawe nno nikohonno, Davidi aheera wiira anankhuluvela Yehova wiira anhala umoopola, ni Yehova khaahiile uncaaliha Davidi. (Isaa. 22:23, 24, 27) Inanna imocaaru, waahookhalaru wiira Yesu, “Mwaana a Davidi,” anhuva wanipottoni waakhomeliyaawe, iyo khayaathoonyera wiira ahohiya ukupaliya ni Yehova.—Mat. 21:9.

Yesu atthunaka aapheela uthoonyera inanna canweryaaya nlattu woohiya ukhikiceriya ni Yehova ule ukatyuule. Yehova khaaphenle wiira Mwanawe ahuve ni akhwe. Yehova aalakenle unhiya Mwanawe wiira ahuve ni akhwe ukati Atamu ni Hawa wanrukunuwenlyaaya wanlavani no Eeteni. Yesu khiivo itthu yootakhala yaapankilyaawe, masi uyo ahaana ahuvaka ni akhwaaka wiira aakhule makoho yaakumihacalyaawe Sotwani ni avahe ukumyaawe wiira aakavihere apinaatamu ukhalana itthu yaahalenlyaaya. (Mark. 8:31; 1 Pet. 2:21-24) Wiira iyo yiirannye, Yehova ahaana ahiyaka unkhikicera Yesu ule ukatyuule; ni iyo phaari ikwaha yoopacera Yehova yaahiilyaawe unkhikicera Yesu.

Yesu atthunaka aapheela waakavihera attharyaawe wuupuwela nlattuni Yehova wanhiilyaawe akhwaaka ile inanneele. * Yesu ancuwela wiira enci khayaahala utthuna ukhala attharyaawe nlattu uyova wowiiviya khampa nakhirini. (1 Akor. 1:23) Masi wakhala wiira attharyaawe yanhala wuupuwela nlattuni waalamuliyaawe ukhwa, ayo yanhala ucuweleeha kontha isiyani ahaana akhwaaka ile inanneele. (Akalas. 3:13, 14) Coo, atthari a Yesu yanhala unwehera khampa Moopoli, kahi nakhirini.

Hataa nihicuweleehaka isiyani khweeliini yaamwiirihile Yesu uhimya ale moolumwaale, uyo ancuwela wiira ahaana akhwaaka wanipottoni wiira apanke itthu yaapheelaawe Yehova. Uromola wawe moolumo o iyo isaalimwiiyo, Yesu aheera: “Wahomalela!” (Joau 19:30; Luka 22:37) Waahookhalaru wiira ule ukatyuule ahohiya ukhikiceriya ni Yehova, Yesu ahokhitiri upanka itthu yaawenlyaawe watuninyani. Uyo ciicammo heerannyeeha citthu cotheene caamuuluma cantikhiye “munlamuloni na Moocesi, cantikhilyaaya maporofeeta ni cantikhiye mmasaalimuni.”—Luka 24:44.