1-2. Isiyani yankhumelenle Yesu hinaaya uhimya citthu coomalela cuulumilyaawe hinakhwa?

WAARI uwicisu, nihuku 14 no mweeri wo Nisã, mwaakha wo 33. Yesu ahootherihiya upanka ikhirini. Uyo ahotarawaciya, ahoofulaciya ni ahokhomeliya wanipottoni. Ipereku caakhomeleliyaawe cahottemula matataawe ni inyaa cawe. Uyo waananwerya cinene amumulaka ni oolumacaka. Waahookhalaru commo, Yesu ancuwela wiira cahaavo citthu cofayita caalamuliyaawe wuuluma, phimaana uyo ahooluma.

² Nimpheela woopela mwaha citthu cuulumilyaawe Yesu ukati waaryaawe wanipottoni hinaaya ukhwa ni woona citthu cineetthuceehu. Ni moolumacero makhwaawe, nimpheela ‘unviriyana.’—Mat. 17:5.

3. Phaapani Yesu yaawaacaawe ukati wenryaawe: “Paapa, mwaalevelelace”?

³ Isiyani Yesu yoolumilyaawe? Ukati Yesu waaryaawe wanipottoni, uyo aholompa eeraka: “Paapa, mwaalevelelace.” Masi phaapani Yesu aapheelaawe wiira aleveleliye naathumwaane? Moolumwaawe anaanikavihera waacuwela phaapani. Uyo enre: “Ukhala wiira khancuwela invaraaya.” (Luka 23:33, 34) Yesu atthunaka aawaaca anatoropa o Roma yaakhomenle matataawe ni inyaa cawe wanipottoni. Ayo anatoropaayo khayancuwela Yesu khweeliini aari tipani. Ciicammo, pooti ukhala wiira Yesu aawaaca atthu yaakhanyerenre wiira akhomeliye wanipottoni, masi wahoolo yaamwaaminni. (Mite. 2:36-38) Yesu khawamphwanenle wiiviya. Waahookhalaru commo, uyo khaaviruwenle ni khaakhottile waalevelela atthu yampankile ikhirini. (1 Pet. 2:23) Uhiya commo, uyo ahonlepela Yehova wiira aalevelele ayo atthwaayo.

4. Yesu ahaalevelela niiraati ale yanlupattha. Isiyani hiiva ineetthuceehu?

⁴ Moolumo a Yesu anniitthuciha isiyani? Toko Yesu, hiiva nihaana naaminiki waalevelela akhwiihu. (Akol. 3:13) Atthu akiina,  mpaka ciicammo amuciihu, pooti unirukunuwela nlattu woohoonela isariya citthu cinkupaliihu awula meettelweehu. Ayo pooti unootherya citthu, unuulihiiha muru waatthuni, waahulaca ilivuru cihu awula unoopopihera unaatta. Uhiya waacukula ayo atthwaayo, hiiva ninlamuliya unlepela Yehova wiira aahule miitho ni wanihukuni yiitthuce ikhweeli. (Mat. 5:44, 45) Ukati nkiina, unlevelela ntthu unaarika, venvi-venci uyo ntthuuyo anipankaka citthu cokhirini. Nakhalaka niicuku ni naahipheeleke unlevelela uyo ntthuuyo, thi hi ninhala woona uwerya. Nrokorihu mmoca neera: “Mi kihoona wiira unlevelela ntthu, khunakhala waamini wiira itthu inipankilyaawe ikhanle yomaana, ni khunakhala utirikhyaa. Unlevelela ntthu, unthoonyera wiira nihoolakela uhincukula uyo ntthuuyo.” (Isaa. 37:8) Nalakelaka unlevelela ntthu, ninthoonyera wiira hiiva ninaakhotta ukhala nicukulacaka nlattu wo itthu inipankilyaawe.—Efesu 4:31, 32.

5. Isiyani Yesu yankhuluvelihilyaawe nakhirini mmoca aakhomeliye wanipottoni, ni nlattuni wankhuluvelihilyaawe iyo?

⁵ Isiyani Yesu yoolumilyaawe? Nipuro Yesu naakhomoleliyaawe wanipottoni, ciicammo yahaavo alopwana eeli yaakhomeliye mmapottoni. Wuupaceroni, ooyeeli caya yahonveehaca Yesu. (Mat. 27:44) Masi wahoolo, nlopwana mmocooyo ahorukunusa nrimaawe. Uyo ahoona wiira Yesu ‘khiivo yaapankilyaawe yootakhala.’ (Luka 23:40, 41) Uyo nlopwanooyo ciicammo ahothoonyera ukhuluvela wiira Yesu anhala wunwelelihiya ni ukhala Mwene wahoolo. Uyo ahomwiirela Yesu: “Yesu uhikiliyale wakelaka vale muumweneni waa.” (Luka 23:42) Uyo nlopwanooyo ahothoonyera waamini cinene! Yesu ahomwaakhula, eeraka: “Wokhweeli, kinoohimerya ilelo co: We unkookhala [kahi wuumweneni, masi] Upeephoni wamoca ni miivano.” (Luka 23:43) Wiira wawe “we” ni “miivano”, Yesu ahothoonyera wiira ankhuluveliha yoole nlopwanoole, kahi ntthu nkhwaawe. Yesu ahonkhuluveliha ukhala upeephoni ule nlopwana nakhirinnyuule kontha ancuwela wiira Yehova khanle oolevelela.—Isaa. 103:8.

6. Itthu Yesu yaamwiirenlyaawe nlopwana nakhirini, inniitthuciha isiyani?

⁶ Moolumo a Yesu anniitthuciha isiyani? Yesu nawaatakiha sana-saana Athumwaane. (Mabere. 1:3) Yehova naapheela cinene unilevelela ni unoonela ikiriri otheene cihu, masi uyo nohala upanka iyo nattharuwaka ninrimeehu wotheene, nihiyaka upanka citthu cootakhala cipankileehu khalayi ni nathoonyeraka waamini wiivaherera wawe Mwanawe wiira anoopole. (1 Jo. 1:7) Atthu akiina unawaarika waamini wiira Yehova pooti waalevelela itampi caya co khalayi. Wakhala wiira iyo phi itthu inwiirani, muupuwele co: Yesu hinaaya ukhwa, ahonlevelela nakhirini ancenre umwaamini yoole ukatyuule. Phimaana, hiiva pooti wankupaliihu wiira Yehova naahala utepa waalevelela atthu ookhuluvelya anonswalela, aneekurumica cinene wiiwelela malamulwaawe!—Isaa. 51:1; 1 Jo. 2:1, 2.

7. Toko cinthoonyeraaya Joau 19:26, 27, isiyani Yesu yaawiirenlyaawe anumwaane wamoca ni Joau? Nlattuni waawiirenlyaawe commo?

⁷ Isiyani Yesu yoolumilyaawe? (Nsome Joau 19:26, 27. *) Yesu aari ni masukhuli nlatttu waanumwaane. Ule ukatyuule ayo atthunaka yaari nankhweli; awannyaya yahokhwa. Asihimaawe  Yesu pooti yanhala waawacera, yaavahaka iyoolya ni citthu cikhwaawe. Masi, tipani aahala waawacera nhina wo citthu coominepani, awula waalipiha wiira ahihiye unswalela Yehova? Unoonannyaa wiira mpaka ule ukatyuule, asihimaawe Yesu yaari ahinakhala attharyaawe. Masi Joau aari apostolu ookhuluvelya ni mpatthani muulupale a Yesu. Yesu aawoona khampa amucyaawe oominepani ale yanswalela Yehova nkhayi nuuyova. (Mat. 12:46-50) Yesu aanaafenta anumwaane, Mariya, ni aapheela wiira akhaleke ntthu oohala waawacera. Phimaana, uyo ahonvahacera Joau wiira aawacere. Yesu ancuwela wiira Joau anhala waakavihera anumwaane wiira ahihiye unswalela Yehova. Yesu ahowiirela anumwaane: “Uyo thi mwaninyu!” ni  ahomwiirela Joau: “Ayo anumwana!” Ukhuma nne nihukunne, Joau aahala ukhala khampa mwaana a Mariya, ukhala wiira uyo phaahala unwacera Mariya khampa anumwaane. Mariya ahonwacera sana-saana Yesu anyareru ni ahokhala wamoca nuuyo mpaka ukati weeviyaawe. Yesu khweeliini ahaana isariya yo waafenta cinene ayo athiyana ooreera nrimaayo!

8. Itthu Yesu yaamwiirenlyaawe Mariya ni Joau, inniitthuciha isiyani?

⁸ Moolumo a Yesu anniitthuciha isiyani? Upatthani urineehu ni mayamunneehu ni miyanuunwiihu o wanlokoni pooti ukhala woolipa uvikana upatthani urineehu naamuciihu. Amuciihu pooti unirukunuwela awula unihiya veekha. Masi Yesu honikhuluveliha wiira nanvaresesaka Yehova ni mphwinkwaawe woothotokanihiya, ninaahala waakhela citthu cihiileehu uttuli “imaara iminya”. Mayamunna enci anaahala ukhala khampa mwanihu, athumwanihu awula anumwanihu. (Mark. 10:29, 30) Hiiva ninaapanka mphantte itthoko ya Yehova yaatthu owiiwanana nlattu wo waamini ni nlattu wonfenta Yehova ni ufentana ayaayoru. Nneecoona cani nlattu woopanka mphantte iyo itthokweeyo?—Akol. 3:14; 1 Pet. 2:17.

9. Moolumo a Yesu ari nhina Matewus 27:46 anniitthuciha isiyani?

⁹ Isiyani Yesu yoolumilyaawe? Ahalaka vakaani ukhwa, Yesu ahokhuwela, eeraka: “Nlukwaaka, Nlukwaaka, ukihiyenreni veekha?” (Mat. 27:46) Ibiiblya khinhimya nlattu Yesu woolumacilyaawe commo. Masi ayo moolumwaayo anaahimya citthu cinci. Wootakihera, nlattu Yesu wo wuuluma commo, yaheerannya inatiri imoca yantikhiye nhina Isaalimu 22:1. * Ciicammo, ayo moolumwaayo anthoonyera wiira Yehova ‘khankhikicenre’ Mwanawe wiira hihuve. (Jó 1:10) Masi, uyo ahaahiya ale yanlupattha Mwanawe wiira anttehe mpaka waahalaawe ukhwa, ni Yesu ancuwela iyo sana-saana. Ni khweeliini yaari masakha oorika; khaavo pinaatamu yaapacile unkhumelela masakha oorika uvilela toko ale. Moolumo a Yesu ciicammo yaathoonyera wiira uyo ancuwela wiira khiivo itthu yootakhala yaapankilyaawe ni khuwamphwanela wiiviya.

10. Itthu Yesu yaawiirenlyaawe Athumwaane inniitthuciha isiyani?

¹⁰ Moolumo a Yesu anniitthuciha isiyani? Itthu imoca ineetthuceehu phi ila: khaninlamuliya unweherera Yehova unikhikicera wiira ahinikhumelele masankiho antteha waamini wihu. Toko Yesu caattehiyaawe mpaka waakhwilyaawe, hiiva ciicammo nihaana niitthenkacaka wiira yanikhumelelaka masankiho, ninvaresese Yehova mpaka wanhaleehu ukhwa. (Mat. 16:24, 25) Masi Nluku naanikhuluveliha wiira khaninhala uttehiya mpaka wahinhaleehu ukhitiri uvilela. (1 Akor. 10:13) Itthu ikhwaawe ineetthuceehu phi ila: toko Yesu, hiiva ninaahala upankiya citthu coohinamaana. (1 Pet. 2:19, 20) Ale annirukunuwela, ampanka iyo kahi nlattu hiiva woopanka itthu yootakhala, masi nlattu woohipanka mphantte wotuninya ni nlattu wo waakihera ikhweeli. (Joau 17:14; 1 Pet. 4:15, 16) Yesu ancuwela nlattuni Yehova wanhiilyaawe ahuvaka. Masi ikwaha cikhwaawe, mayamunna ookhuluvelya akiina yaakhumelelaka masankiho, anaakohaka nlattuni Yehova uhiilyaawe yaakhumelelaka ayo masakhaayo. (Habak. 1:3) Nlukwiihu khanle nathunku ni nawaavilela ayo mayamunnaayo. Yehova naacuwela wiira ayo ankoha commo kahi nlattu woohimwaamini, masi ankoha commo kontha ampheela umaalihiya nuuyova.—2 Akor. 1:3, 4.

11. Nlattuni Yesu woolumilyaawe itthu yantikhiye nhina Joau 19:28?

¹¹ Isiyani Yesu yoolumilyaawe? (Nsome Joau 19:28. *) Nlattuni Yesu wenryaawe: “Kiri nintthona”? Uyo enre commo “wiira yiirannye inatiri imoca iri nhina Cowantikhiya Cowaarya,” awula, iri nhina Isaalimu 22:15, ineera: “Ikuru caka cihokimalela khampa maaci cinoomaaya mmwaapuni wooloko woomalamala; nlimi naka nihovaraana nuuculu malakwaaka.” Yesu ahaana isariya yookhala nintthona: uyo ahotulumwiya cinene, ni khaareere woona uwerya waakhomeliyaawe wanipottoni. Uyo aapheela ukaviheriya naakhunanawe wiira amalihe ntthona naarinaawe.

12. Moolumo a Yesu wiira wawe: “Kiri nintthona,” anniitthuciha isiyani?

¹² Moolumo a Yesu anniitthuciha isiyani? Yesu khoopuwenle wiira uhimya itthu yaamwiira waari utirikhyaa. Hiiva ciicammo khaninlamuliya wuupuwela commo. Ikwaha cikiina, hiiva khanimpheelaka waahimerya akhunanihu itthu inniira. Masi noonaka wiira nihovelavela ni khaninamananna, khaninlamuliya woova waalepela akhunanihu wiira anikavihere. Wootakihera, nooluvalaka awula wakhalaka wiira ninaawerennya, atthunaka nihaana ninlepelaka mpatthaniihu wiira anipakhirye nkaaroni wawe mpaka upacari awula usipiritaali. Nakhalaka ooriipiya nrima awula nimasukhuli, hiiva pooti unlepela humu awula nkristau nkiina ookhomaala wiira aniviriyane awula anilipihe ni “nuulumo nomaana” noonitteeliha nrima. (Miru. 12:25) Nihiliyale wiira mayamunneehu ni miyanuunwiihu anaanifenta ni ampheela unikavihera “ukati wo masankiho.” (Miru. 17:17) Masi ayo khankhitiri ucuwela citthu cinniira wanrimani. Naahaahimeryeke, ayo khanhala ukhitiri ucuwela itthu inniira.

13. Isiyani Yesu ikhitinryaawe upanka unvaresesa wawe Yehova mpaka waakhwilyaawe?

¹³ Isiyani Yesu yoolumilyaawe? Yeettaka 15 horas, nihuku 14 no mweeri wo Nisã, Yesu ahokhuwela, eeraka: “Wahomalela!” (Joau 19:30) Moolumo a Yesu anniitthuciha wiira ahalaka vakaani ukhwa, uyo ancuwela wiira ahomalihera upanka citthu cotheene Yehova caapheelaawe. Ni nlattu wonvaresesa Yehova mpaka waakhwilyaawe, Yesu ahokhitiri upanka citthu cinci. Yoopacera, uyo hothoonyera wiira Sotwani moothi. Yesu hothoonyera wiira pinaatamu oohipahuwa naakhitiri unvaresesa Yehova, hataa Sotwani apankaka isiyani. Yonayeeli, Yesu hovaherera ukumyaawe wiira awoopole atthu. Nlattu woovaherera ukumyaawe, Yesu hokhitiriha wiira apinaatamu oopahuwa akhalane upatthani ni Nluku ni aweherere ukhalana ukumi woohimala. Yoneeraru, Yesu hothoonyera wiira Yehova khanle Nhooleli nasariya ni horeeriha ncina na Athumwaane wiira nihuulumiye pusya.

14. Isiyani inlamuliyeehu wiikurumica upanka khula nihuku? Ntaphulele.

¹⁴ Moolumo a Yesu anniitthuciha isiyani? Nihaana niikurumicaka wiira nithoonyere khula nihuku unvaresesa wihu Yehova. Moone itthu yuulumalalyaawe munna Maxwell Friend, aasomiha icikola yo Gileade. Ukati waataphulelaawe mwaha wanthukumanoni wolapo cinci, munna Maxwell aheera: “Itthu inhaleenyu ukhitiri upanka ilelo, nhihiye wiira mpanke meelo. Nnaacuwela wakhala wiira nnaahala ukhala nuukumi meelo? Nkhale khula nihuku khampa wiira phi nihuku ninyu noomalela, noohala uthoonyera wiira unawuuphwanelani waakhela ukumi woohimala.” Nihaana nikhalaka khula nihuku khampa phi nihuku nihu noomalela nirineehu  wiira nithoonyere unvaresesa wihu Yehova! Napankaka commo, hataa nihalaka wiiviya, unhala ukhala toko nimmwiirela Yehova co: “Pwiiya Yehova, mi kiheekurumica wuuvaresesani, kithoonyeraka wiira Sotwani nawootha, kireerihaka ncina ninyu wiira nihuulumiye pusya ni kithoonyeraka wiira nkhanle Nhooleli omaana!”

15. Toko cineeraaya Luka 23:46, isiyani Yesu yaakhuluvelaawe?

¹⁵ Isiyani Yesu yoolumilyaawe? (Nsome Luka 23:46. *) Ankhuluvelaka Yehova, Yesu aheera: “Paapa, ukumyaaka kinhiya mmatatani winyu.” Yesu ancuwela wiira ukumyaawe woohoolo waari mmatatani wa Yehova, ni uyo ankupali wiira Athumwaane khayaahala unliyala.

16. Itthu yankhumelenle mmirawo mmoca ukati waarinaawe myaakha 15 inwiitthucihani isiyani?

¹⁶ Moolumo a Yesu anniitthuciha isiyani? Nlakele uhiya ukumiinyu mmatatani wa Yehova. Wiira nkhitiri upanka iyo, nhaana ‘munkhuluvelaka Yehova ni nrimeenyu wotheene.’ (Miru. 3:5) Moone itthu yankhumelenle Saahiti a Yehova mmoca eehaniya Joshua ukati waarinaawe myaakha 15. Uyo yahonwerya iretta yuulupale yoohivoniya. Joshua ahokhotta utafitiya irettaawe niinanna yaahala uvirikaniha nlamulo na Nluku. Hinaaya ukhwa, uyo ahowiirela anumwaane: “Maama, mi kiri mmatatani wa Yehova. Kineera commo kontha kinaakupali wiira Yehova naahala ukunweleliha. Uyo hoona nrimaaka ni hoona wiira kinanfenta weekhweeli.” * Otheene cihu nihaana niikohaka co: ‘Wanihukuni yakikhumelelaka itthu inhalaaka uthanla ukhwa awula ukhala nkumi, kinaahala uhiya ukumyaaka mmatatani wa Yehova, kikhuluvelaka wiira uyo khanhala ukiliyala?’

17-18. Citthuni ciitthucileehu? (Nwehe ciicammo ikwaaturu “ Isiyani inniitthucihaaya moolumo oomalela a Yesu hinaaya ukhwa?”)

¹⁷ Toko coonileehu, moolumo Yesu yuulumilyaawe hinaaya ukhwa anaaniitthuciha citthu cofayita! Nihaana naalevelelaka akhunanihu ni ukhuluvela wiira Yehova naahala ciicammo unilevelela. Nihaana iparakha yookhalana mayamunna ni miyanuunu o wanlokoni wiira anikavihere. Masi nihaana naalepelaka wiira anikavihere, napheelaka ukaviheriya. Ninaacuwela wiira Yehova naahala unikavihera uvilela khula masankiho anhala unikhumelela. Nihoona wiira nihaana niikurumicaka ukhala khula nihuku khampa wiira phi nihuku nihu noomalela wiira nithoonyere unvaresesa wihu Yehova. Nihaana ukhuluvela wiira nahiyaka ukumiihu mmatatani wa Yehova, uyo naahala unikhikicera.

¹⁸ Khweeliini, moolumo a Yesu ukati waaryaawe wanipottoni hinaaya ukhwa anaaniitthuciha citthu cinci! Amwaacaka Mwanawe, Yehova honiruma co: “Munviriyane.” Neettelaka citthu cinniitthucihaaya moolumo a Yesu yoopenleehu mwaha, ninhala uthoonyera wiira ninanviriyana Yesu, toko Yehova cinirumilyaawe.—Mat. 17:5.