1-2. Isiyani Yesu ipankilyaawe wiira anoopole, ni kontha isiyani ninaapheela woopoliya?

UWAKATI Atamu waavanryaawe matampi, ahohaleela ukumi woohimala uyova ni asaanaawe otheene yaahala uyarya wahoolo. Khayaarivo mananna wiira Atamu aleveleliye itthu yaapankilyaawe. Uyo aavanre matampi imweeni, phimaana waanomphwanela ukhwa. Masi asaana a Atamu, khiivo itthu yootakhala yaapankilyaaya ni kahi phanthepenrye uvara matampi. (Aroo. 5:12, 14) Niireke ihaavo yaahala upankiya wiira yoopoliye muukhwani? Iyee. Woohipica Atamu navanreene matampi, Yehova ahoonihera vakaani-vakaani isiyani yaahalaawe upanka wiira awoopole asiculawe Atamu mmatampini ni muukhwani. (Upha. 3:15) Nuuwakatyaaya, Yehova anhala unveleeliha Mwanawe watuninyani wiira “avahe ukumyaawe, wiira awoopole atthu enci.”—Mark. 10:45; Joau 6:51.

² Yesu hovaha ukumyaawe wiira alive itthu ihalenlyaawe Atamu. (1 Akor. 15:22) Kontha isiyani ninaapheela woopoliya? Kontha Yehova khanle nasariya. Nlamulo Yehova naavahilyaawe asarayeli, naahimya wiira ntthu amwiivaka nkhunanawe, wahaana uliveleliyaka ukumi nuukumi. (Nkw. 21:23, 24) Atamu halenle ukumi woohipahuwa. Vano wiira itthariye isariya ya Nluku, Yesu ahaana avahaka ukumyaawe woohipahuwa. (Aroo. 5:17) Ala manannaala, Yesu hokhala athumwanaya atthu otheene anaamini woopoliya wihu.—Isai. 9:6; Aroo. 3:23, 24.

3. Toko cinthoonyeraaya Joau 14:31 ni 15:13, kontha isiyani Yesu ahaamini uleva ukumyaawe woohipahuwa wiira anoopole?

³ Yesu nawaafenta cinene Athumwaane o wiirimu, ni naanifenta cinene otheene cihu. Phimaana ahaamini uleva ukumyaawe  woohipahuwa wiira anoopole. (Nsome Joau 14:31; 15:13. *) Nlattu Yesu wonfenta Yehova ni woonifenta, uyo aholakela waavaresesa Athumwaane ni upanka intthunaaya, mpaka waakhwilyaawe. Nlattu Yesu woopanka commo, yanhala wiirannya itthu Yehova inaapheelelaawe apinaatamu ni ituninya. Nhina ula mwahoola, ninaahala woona nlattuni Yehova unhiilyaawe Yesu ahuvaka ni akhwaaka niinanna yoowerya. Ciicammo, ninaahala woopela mwaha vakaani ntakihero na nlopwana mmoca antikhile Ibiiblya aasukhurweela venci woopoliya wihu. Wowaakulela, ninaahala woona mananna cinhaleehu uthoonyera usukhurweela woopoliya wihu. Woomalihera, ninaahala woona isiyani inhala unikavihera utepa usukhurweela itthu Yehova ni Yesu ipankilyaaya wiira anoopole.

4. Nttonkace mananna caakhwilyaawe Yesu.

⁴ Nkuupuwelani citthu caakhumelenle nihuku neeviyaawe Yesu. Uyo pooti waahalaawe wiihana malayikha menci wiira ankhikicere. Waahookhalaru commo, uyo ahaahiya anatoropa o Roma yantthukaka ni yamwaattakacaka, woohimoolela ikiriri. (Mat. 26:52-54; Joau 18:3; 19:1) Ayo anatoropaayo yaavarela nteko nkhoyi waatthukaceriye itthu yaarocolaca ithayi ya Yesu wanthanani ukati wancaphaaya. Vano, hataa Yesu arakalacaka cinene wanthanani, anatoropa yahonkhanyereriha ucisa nipotto noolemela cinene. Yesu ahancera upurulaca nno nipottonno, arweehaka nipuro naahalaawe ukhomeliya. Masi woohipica, anatoropa o Roma yahonruma nlopwana mmoca uncisera Yesu nno nipottonno. (Mat. 27:32) Ukati Yesu waaphiilyaawe nipuro naahalaawe wiiviya, anatoropa yahokhomelela inyaa cawe ni matataawe wanipottoni. Nlattu woorilala irutthu ya Yesu, makhwattaawe o mapuro yaakhomeliyaawe niipereku yahotepaca. Asipatthannyaawe yaanancukulela ni anumwaane yaanonla, masi ayuuta yaanontarawaca. (Luka 23:32-38; Joau 19:25) Cahovira iwoora cinci Yesu oonaka uwerya. Nrimaawe ni maphavelaawe yahancera woona uwerya, ni wahanca unwerya cinene amumulaka. Ahalaka vakaani ukhwa, Yesu ahopanka nivekelo nawe noomalela. Uyo ahooromiha murwaawe, ni ahokhwa. (Mark. 15:37; Luka 23:46; Joau 10:17, 18; 19:30) Unawoonannya wiira Yesu ahohuva hinaaya ukhwa, aakhwile niinanna yoowerya ni yowoonihaca ihaaya.

5. Isiyani yaatepile unwerya Yesu uvikana ukhomeliya wanipottoni?

⁵ Itthu yaatepile unwerya Yesu khayaanakhala mananna ceeviyaawe, masi yaari itthu yootherihiyaawe upanka. Uyo ahootherihiya uhinhisima Nluku awula uhihisima ncina nawe. (Mat. 26:64-66) Wootherihiya uhinhisima Nluku wahonwerya cinene Yesu, mpaka uyo ahaalepela Athumwaane wiira ihinkhumelele iyo itthu yo wuulihiiha murwiiyo. (Mat. 26:38, 39, 42) Kontha isiyani Yehova wanhiilyaawe Mwanawe anfentaawe ahuvaka ni akhwaaka? Nlattu wo citthu tthaaru. Nttwee noopele mwaha nnyo citthunnyo.

6. Kontha isiyani Yesu ahaana akhomeliyaka wanipottoni?

⁶ Yoopacera, Yesu ahaana akhwaaka wanipottoni wiira awoopole ayuuta mahusi yaalaphakaceriyaaya. (Akalas. 3:10, 13) Ayuuta yaaphwanyile ayo mahusyaayo kontha yaholapha wiiwelela nlamulo na Nluku, masi khayeettenle itthu yaalaphilyaaya. Phimaana, uhiya paahi uweherera ukhwa nlattu wookhala asaana a Atamu, ayuuta ciicammo yaahaanana mahusi yaalaphakaceriyaaya. (Aroo. 5:12) Nlamulo Nluku naavahilyaawe asarayeli neera wiira ntthu avaraka matampi oophwanela wiiviya, ahaana eeviyaka  ni irutthwaawe uthomennya wanipottoni. * (Deut. 21:22, 23; 27:26) Cole, nlattu Yesu wookhomeliya wanipottoni, ahowoopola ayuuta mmahusini waalaphakaceriyaaya, hataa ukhalaka wiira yahonkhotta.

7. Itthuni yonayeeli yaamwiirihile Nluku unhiya Mwanawe ahuvaka?

⁷ Moone itthu yonayeeli yaamwiirihile Yehova unhiya Mwanawe ahuvaka. Yehova aanawiira untthenkaca Mwanawe, wiira akhitiri uvara nteko waahalaawe ukhalana wahoolo: ukhala Nankuttho Muulupale. Yesu ahooneeha mananna cinrikaaya umwiiwelela Nluku ukati wo marikariko moolupale. Masakha yaananaawe Yesu yaari oorika cinene, mpaka uyo aholepela ukaviheriya ni Nluku “akhuwelaka cinene ni onlaka.” Ukhala wiira Yesu yahonkhumelela ayo marikariko moolupalyaayo, uyo naacuwela itthu inniira ni pooti unikavihera nattehiyaka. Ninansukhuru cinene Yehova nlattu woonivaha Nankuttho Muulupale owoonela uthunku ni ‘nocuwela uhiicoorya wihu!’—Mabere. 2:17, 18; 4:14-16; 5:7-10.

8. Itthuni yoneeraru yaamwiirihile Nluku unhiya Yesu yankhumelelaka masakha oorika cinene?

⁸ Yoneeraru, Yehova anhiile Yesu yankhumelelaka ale masakha oorikaale, wiira aakhule nna nikoho nuulupalenna: Niireke haavo pinaatamu nohala ukhitiri unvaresesa Nluku, hataa yankhumelelaka masakha moolupale cinene? Sotwani enre wiira khaavo! Uyo enre wiira apinaatamu anonswalela Nluku kontha ihaavo impheelaaya. Ni Sotwani enre wiira apinaatamu ari toko athumwanaya, Atamu—khaanonfenta Nluku. (Jó 1:9-11; 2:4, 5) Masi Yehova aanonkhuluvela Mwanawe. Phimaana wanhiilyaawe Yesu attehiyaka cinene. Yesu khaahiile unvaresesa Nluku, ni ahothoonyera wiira Sotwani khanle moothi.

9. Apostolu Joau aathoonyenre cani waamini ni uvilela?

⁹ Woopoliya wihu wahotepa ulipihaca waamini wo makristau enci. Ayo khayaahiile ulalyeera, hataa yalupatthiyaka ni hataa yaananaka marikariko makhwaawe yaaphwanyile anooluvanleene. Moone ntakihero na apostolu Joau. Uyo ahokhala myaakha coopwaha 60 alalyeeraka ikhweeli ca Kristu ni caahimya woopoliya wihu. Uwakati waahanlyaawe vakaani upiiha myaakha 100, ikuvernu yo Roma yaamonne ukhala ntthu owoopiha, mpaka ayo yahonrwaana untthuka u Patmos. Aatthekileni? “Nlattu woomuuluma Nluku ni ulalyeera myaha ca Yesu.” (Apoka. 1:9) Uyo khweeliini ahothoonyera waamini ni uvilela!

10. Ilivuru co mbiiblyani cantikhilyaawe Joau cinthoonyera cani wiira uyo aanaasukhurweela woopoliya wihu?

¹⁰ Ilivuru co mbiiblyani cantikhilyaawe apostolu Joau, cinawonihera wiira uyo aanonfenta cinene Yesu ni aanaasukhuru nlattu wo woopoliya wihu. Ilivuru cawe cinaaromola ikwaha coopwahaka 100 woopoliya wihu awula iparakha cinniphwanyihaaya. Wootakihera, Joau hantikha co: “Ntthu avaraka matampi, nihaana namakavihera: Yesu Kristu, ule khanle nasariya ni ri nkhayi naapaapeehu.” (1 Jo. 2:1, 2) Ilivuru cantikhilyaawe Joau ciicammo cinaathoonyera nlattuni unreeraaya ulalyaa myaha ca Yesu. (Apoka. 19.10) Khweeliini, Joau aanaasukhurweela cinene woopoliya wihu. Ninhala untakiha cani?

11. Isiyani inhala unikavihera wiikurumica wiira nihivare itampi?

¹¹ Mwiikurumice wiira nhivare itampi. Wakhalaka wiira hiiva khweeliini ninaasukhurweela woopoliya wihu, khaninhala wuupuwela itthu toko co: ‘Pooti wahineekurumicaaka wiira  kihivare itampi. Mi pooti uvara matampi ni ulepela uleveleliya.’ Uhiya commo, nattehiyaka wiira nipanke itthu yootakhala, nihaana niiraka: ‘Mena! Nlattu wo itthu yuulupale ikipankenlyaawe Yehova ni Yesu, mi akinlamuliya upanka ila itthwiila.’ Nuupuwelacaka commo, hi mpaka pooti unlepela Yehova wiira anivahe ikuru ni hataa unsontteelela, neeraka: ‘Sontte, uhikihiye kimoraka ukati unttehiyaaka.’—Mat. 6:13.

12. Ninhala weettela cani ikano iri nhina 1 Joau 3:16-18?

¹² Mwaafente mayamunneenyu. Naafentaka mayamunneehu, ciicammo ninthoonyera wiira ninaasukhurweela woopoliya wihu. Kontha isiyani? Kontha Yesu hovaha ukumyaawe wiira anoopole hiivano, ni ciicammo wiira awoopole mayamunneehu. Yesu khwile wiira awoopole ayo mayamunnaayo, kontha uyo naawoona wiira ahaana ifayita. (Nsome 1 Joau 3:16-18. *) Inanna imoca yootheenyera wiira ninawaafenta mayamunneehu, ukhanle waawacera saana. (Efesu 4:29, 31–5:2) Wootakihera, hiiva pooti waakavihera yawerennyaka, awula yaaphwanyaka masakha oorika cinene, toko ihasara. Masi isiyani inlamuliyeehu upanka munneehu anuulumelaka awula anipankaka itthu ihinicivenle?

13. Kontha isiyani nihaana naalevelelaka akhunanihu khula ukati?

¹³ Unawuurikani unlevelela munneenyu oopankakani itthu ihuucivenleni? (Lev. 19:18) Wakhala commo, ntthare ila ikanweela: “Nhihiye uvilelana ni ulevelelana niiraati, hataa ntthu akhalanaka isariya yonviruwela nkhunanawe. Toko Yehova cuulevelenlyaaweni niiraati, nyuuva nhaana mpankaka ciicammo.” (Akol. 3:13) Khula ukati unonleveleleehu munneehu awula nrokorihu o wanlokoni, ninawaathoonyera Apaapeehu o wiirimu wiira khweeliini ninaasukhurweela woopoliya wihu. Isiyani inlamuliyeehu upanka wiira nihihiye utepa usukhurweela itthuvo inivahilyaawe Nluku?

14. Isiyani inhala unikavihera utepa usukhurweela woopoliya wihu?

¹⁴ Munsukhuru Yehova nlattu woopoliya wihu. Arokorihu amoca ankhala u Índia arina myaakha 83, aneehaniya Joana, aneera: “Mi kinawoona ukhala itthu yuulupale uromola woopoliya wihu ukati woolompa khula nihuku ni unsukhurweela Yehova nlattu wo iyo.” Mwalompaka veekha cinyu, muupuwele citthu civonyileenyu  nno nihukunno. Vano, munlepele Yehova wiira ooleveleleni. Masi wakhalaka wiira nhovara matampi moolupale, unawonannya wiira nyuuva nhaana nlepelaka ukaviheriya ni mahumu. Ayo anaahala wuuviriyanani ni wuuvahani malakihero omaana ankhuma nnuulumoni na Nluku. Ayo anaahala wuulompelani, ni anaahala unlepelela Yehova wiira ooleveleleni nlattu wo woopoliya wihu ni Yesu Kristu. Cole, nnaahala uturuwela ukhalana upatthani womaana ni Nluku.—Tiya. 5:14-16.

15. Nlattuni ninlamuliyeehu ukumiha ukati wiira nisome myaha cinttonka woopoliya wihu ni wuupuwela cinene nnyo myahannyo?

¹⁵ Muupuwele cinene woopoliya wihu. Rajamani, arokorihu amoca arina myaakha 73, aneera: “Kasomaka inanna caahuvilyaawe Yesu, anaakimora minthori.” Nyuuva ciicammo pooti wuuweryaani cinene muupuwelaka inanna Mwaana a Nluku caahuvilyaawe. Masi muupuwelaka cinene wiivaherera wa Yesu, nnaahala utepa unfenta uyova ni unfenta Yehova. Wiira nkhitiri wuupuwela cinene woopoliya wihu, nnoonela cani usoma uyo mwahooyo ukati woosoma Ibiiblya veekha?

16. Kontha isiyani iryaaya itthu yomaana waakavihera akhunanihu ucuwela woopoliya wihu? (Nwehe ilatarato yo wakaapani.)

¹⁶ Mwaakavihere akhunaninyu ucuwela woopoliya wihu. Khula ikwaha ninonlalyeereehu nkhunanihu woopoliya wihu, hi ninaatepa usukhurweela. Hi nihaana ikaruma comaana cinnikavihera uwiitthuciha akhunanihu kontha isiyani Yesu khwilyaawe wiira anoopole. Wootakihera, hiiva pooti uvarela nteko mpantta 4 wobroxuura Ihapari Comaana Cinoovahaawe Nluku! Mwaha wo uyo mpanttooyo uneera: “Yesu Kristu tipani?” Ciicammo pooti wanvareleehu nteko ikapiitulu 5 yolivuru Ibiiblya Ineetthuciha Isiyani? Mwaha wo iyo ikapiitulwiiyo uneera: “Yesu khwenleni?” Ni khula mwaakha, ninaatepa uthoonyera usukhuru wihu noonaka Nuupuwelelo na nookhwa a Yesu, ni neekurumicaka waalattula akhunanihu wiira yoone uyo nkutthaano muulupalyooyo. Ninansukhurweela Yehova cinene nlattu woparakha inivahilyaawe yoowiitthuciha akhunanihu myaha ca Mwanawe.

17. Kontha isiyani woopoliya wihu ikhanle itthuvo yuulupale Nluku yaavahilyaawe apinaatamu?

¹⁷ Khweeliini, cihaavo citthu cinci cinniiriha usukhurweela woopoliya wihu ni uhihiya usukhurweela. Nlattu wo woopoliya wihu, hiiva pooti ukhalana upatthani woolipa ni Yehova, hataa nikhalaka atthu oopahuwa. Nlattu wo woopoliya wihu, miteko cotheene ca Sotwani cinaahala umalamalihiya. (1 Jo. 3:8) Nlattu wo woopoliya wihu, itthu Yehova yaaphenlyaawe ukati wompilyaawe ituninya inaahala wiirannya. Ituninya yotheene inaahala ukhala ipeephoni. Atthu otheene anhaleenyu uwoonanana, anhala ukhala atthu anhala unfenta ni unswalela Yehova. Khula nihuku, mwiikurumice uthonyera usukhuru winyu itthuvo yuulupale Nluku yaavahilyaawe apinaatamu—woopoliya wihu!