MWAHA WOOSOMIYA 14
‘Ntthare meettelo a Yesu sana-saana’
“Kristu hohuva nlattu wawinyu, oohiyerakani ntakihero wiira ntthare meettelwaawe sana-saana.”—1 PET. 2:21.
NCIPO 13 Cristo, o Nosso Exemplo
NINHALA WIITTHUCANI? *
Yesu hohiya inyaa cawe wiira nitthare sana-saana (Nwehe iparaagarafu 1-2)
1-2. Manannani Yesu nolikanacaawe ni ntthu nohiya inyaa cawe wiira nintthare? Nhimye ntakihero.
NKUUPUWELANI ila itthwiila: nyuuva ni asipatthaniinyu akiina nri ntakhwani yowoopiha ihincuweleenyu. Masi haawo ntthu nooveleenani nocuwelaca iyo itakhweeyo. Uwakati uneettaawe uyo ntthuuyo, naahiya miphito awula inyaa mapuro nonyakelaawe. Woohipica, nyuuva khannokhitiri-tho umoona ntthu nooveleelani. Hataa ukhalaka commo, nyuuva khannosanka ni khannokhala moovaka. Uhiya commo, nyuuva ni asipatthaniinyu nnaatthariha sana-saana inyaa cawe uyo ntthuuyo!
2 Woolikanaca, makristau otheene niri itakhwa yowoopoha—ila ituninya yoohinamaaneela. Masi wootteeliha nrima, Yehova honivaha ntthu oohipahuwa oohala unihoolela—khanle Mwanawe, Yesu Kristu. Uyo hohiya inyaa cawe awula ntakihero nawe ninlamuliyeehu utthara. (1 Pet. 2:21) Ilivuru imoca intaphulela myaha co mbiiblyani iheera wiira nhina ila iveeruswiila, apostolu Peturu nlattanihile Yesu khampa ntthu neetta nohiya inyaa cawe wiira atthariye naakhunanawe. Woolikanaca nuuyo ntthuuyo, Yesu honihiyera ntakihero nawe wiira nitthare. Nhina ula mwahoola, ninaahala waakhula makoho mararu: Ntakiheroni nihiilyaawe Yesu wiira nitthare? Kontha isiyani ninlamuliyeehu utthara? Ni manannani ninhaleehu utthara?
NTAKIHERONI YESU HIILYAAWE WIIRA NITTHARE?
3. Utthara inyaa ca ntthu maanaaya isiyani?
3 Utthara inyaa ca ntthu maanaaya isiyani? Imaara cikiina, Ibiiblya inaaromola moolumo “weetta” ni “inyaa” yaacaka meettelo omuukumini wawe ntthu. (Upha. 6:9; Miru. 4:26) Ntakihero ninhiyaawe ntthu pooti ulikaniheriya ni miphito awula inyaa cinhiyaawe ukati uneettaawe. Phimaana, pooti waniireehu wiira utthara inyaa ca ntthu maanaaya wiira utthara ntakihero nawe, awula, utakiha meettelwaawe.
4. Utthara inyaa ca Yesu maanaaya isiyani?
4 Vano utthara inyaa ca Yesu maanaaya isiyani? Woohincivihaca, maanaaya wiira utthara ntakihero nihiilyaawe. Nhina iveerusu inlipihera ula mwahoola, apostolu Peturu aahimya ntakihero nomaana Yesu nihiilyaawe, uvilela wawe hataa ahuvaka. Masi ahaawo mananna makiina menci anlamuliyeehu untakiha Yesu. (1 Pet. 2:18-25) Khweeliini, muukumini motheene wa Yesu, citthu cotheene cuulumilyaawe ni citthu cipankilyaawe, nikhanle ntakihero hiiva ninlamuliyeehu utakiha.
5. Niireke apinaatamu oopahuwa anaakhitiri utthara ntakihero noohipahuwa na Yesu? Ntaphulele.
5 Hiivano nikhanle atthu oopahuwa. Masi hataa ukhalaka commo, niireke ninaakhitiri utthara ntakihero na Yesu? Iyee, ninaakhitiri. Niwehero niri nhina 1 Peturu 2:21, niineera wiira nihaana ‘nittharaka ntakihero na Yesu wakhiviru’; iyo maanaaya wiira khaninkhitiri utthara ntakihero nawe woohivonyaniha, masi nihaana niikurumicaka wiira nipanke inkhitiriihu. Ala manannaala, ninaahala utthara ikano ya apostolu Joau: ‘Nhihiye utthara meettelo Yesu yaarinaawe.’—1 Jo. 2:6.
NLATTUNI NINLAMULIYEEHU UTTHARA MEETTELO A YESU?
6-7. Nlattuni nineerehu wiira utthara meettelo a Yesu unaanikavihera umpatthanana cinene Yehova?
6 Utthara meettelo a Yesu unaanikavihera umpatthanana cinene Yehova. Nlattuni uneereehu commo? Yoopacera, Yesu aheettela sana-saana citthu cancivela Nluku. (Joau 8:29) Phimaana, nattharaka meettelo a Yesu ninaahala unciveliha Yehova. Ni nikupali wiira Apaapeehu o wiirimu anaahala waapatthanana ale aniikurumica venci wiira akhale apatthannyaaya.—Tiya. 4:8.
7 Yonayeeli, Yesu ahaatakiha sana-saana Athumwaane. Hataa phimaana wenryaawe co: “Ule konne mi, ciicammo howoona Apaapa.” (Joau 14:9) Hiiva pooti wantakiheehu makhalelo a Yesu ni mananna caawaceraawe atthu. Wootakihera, uyo ahomoonela uthunku nlopwana namakuttula, ahothoonyera waawacera athiyana amoca yaawerennyile cinene ni ahowoonela ikiriri atthu yaakhweliye ale yaafentaaya. Nantakihaka Yesu, ciicammo ninontakiha Yehova. (Mark. 1:40, 41; 5:25-34; Joau 11:33-35) Ni nantakihaka Yehova, hiiva ninaatepa umpatthanana.
8. Ntaphulele manannani utthara meettelo a Yesu cinnikaviheraaya ‘utthema’ ituninya.
8 Utthara meettelo a Yesu unaanikavihera wiira ila ituninya yoohinamaaneela ihinihapuse. Uhiyu wo nihuku noomalela ukumyaawe watuninyani, Yesu aheera: “Miivano kihotthema ituninya.” (Joau 16:33) Iyo maanaaya wiira Yesu kheehiile ahapusiyaka ni moopuwelelo, citthu caatothaaya ni citthu caapankaaya atthu o ila itunyeela. Yesu khaaliyanle itthu yaawenlyaawe watuninyani—unttitthimiha Yehova. Vano hiiva? Ntuninyani inkhaleehu, ciicammo cihaawo citthu cinci caahala unihiiha unswalela Yehova. Phimaana, khampa Yesu, hiiva nihaana nihooleliheraka upanka citthu cinoncivela Yehova. Ala manannaala, ciicammo hiiva ninaahala ‘utthema’ ituninya.—1 Jo. 5:5.
9. Isiyani inlamuliyeehu upanka wiira nihihiye weetta munttalani umpiiha wuukumini woohimala?
9 Utthara meettelo a Yesu unaaniphwanyiha ukumi woohimala. Uwakati mmirawo thaciri wankohilyaawe Yesu isiyani yaalamuliyaawe upanka wiira aphwanye ukumi woohimala, Yesu ahomwaakhula eeraka: “Uwe wookhale nttharyaaka.” (Mat. 19:16-21) Uwakati Yesu waawoopanaawe mwaha ayuuta yahaamini wiira uyova phaari Kristu, Yesu aheera: “Ikhontwaa caka . . . cinaakitthara. Mi kinaavaha ukumi woohimala ikhontwaa caka.” (Joau 10:24-29) Ni uwakati waamoopanaawe mwaha Nikotemu, aari ikhurupu yaahoolela itiripunali yuulupale ya aYuuta, Yesu aheera wiira khula ntthu aahala umwaamini anhala ‘uphwanya ukumi woohimala.’ (Joau 3:16) Manannani ninthoonyereehu wiira ninaamwaamini Yesu? Neetteleka citthu ciitthucihilyaawe ni nantakihaka. Napankaka commo, khaninhala uhiya weetta munttalani umpiiha wuukumini woohimala.—Mat. 7:14.
NINHALA UTAKIHA CANI SANA-SAANA MEETTELO A YESU?
10. Isiyani inlamuliyeehu upanka wiira ‘nincuwele’ ratta Yesu? (Joau 17:3)
10 Wiira nikhitiri utthara sana-saana meettelo a Yesu, nihaana nipacaka toko upanka itthu imoca: uncuwela. (Nsome Joau 17:3. *) ‘Uncuwela’ Yesu ikhanle itthu inlamuliyeehu upanka woohihiyerera. Nihaana niikurumicaka khula ukati wiira niitthuce makhalelwaawe, mananna cinoopuwelaawe ni malamulwaawe. Hataa ninswalelaka Yehova ikhumelo yo khalayi, nihaana niikurumicaka khula ukati wiira ‘nincuwele’ Yehova ni Yesu.
11. Ivangeeliyu cese cinttonkaca isiyani?
11 Yehova naanivaha itthu imoca yomaana inhala unikavihera wiira nincuwele Mwanawe: ivangeeliyu. Ilivuru cese co mbiiblyani cineehaniya ivangeeliyu (Matewus, Markus, Luka ni Joau), cinaattonkaca ihantisi ya Yesu ni nteko woolalyeera uvanryaawe. Nnyo ilivurunnyo, cinaanihimerya citthu Yesu cipankilyaawe ni cuulumilyaawe, ni cinaanithoonyera mananna ciicoonaawe. Nnyo ilivuru cesennyo cinaanikavihera ‘wuupuwela ratta-raatta’ ntakihero na Yesu. (Mabere. 12:3) Khweeliini, ivangeeliyu cinaattonkaca meettelo anihiyenryaawe Yesu wiira nitakihe. Phimaana, napheelaka uncewela cinene Yesu, nihaana nisomaka ivangeeliyu. Cole, ninaahala ukhitiri utthara sana-saana meettelo a Yesu.
12. Isiyani inlamuliyeehu upanka wiira niittucere cinene ivangeeliyu?
12 Wiira niitthucere cinene ivangeeliyu, khaninlamuliya usoma paahi. Nihaana nikumihaka ukati wiira nisome sana-saana ni wuupuwela venci itthu insomeehu. (Nwehe ciicammo Josuwe 1:8, niwehero.) Nttwee noopele mwaha citthu piili cinhala unikavihera wuupuwela venci ni weettela itthu insomeehu nvangeeliyuni.
13. Manannani cinhaleenyu ucivihaca ukati woosoma ivangeeliyu?
13 Yoopacera, ncivihace mphantte wovangeeliyu unsomeenyu. Ntanicere nkhalaka khampa nnawoona ni nnawiiwa citthu caakhumelela. Itthu imoca inhala wuukaviherani upanka iyo ukhanle utotha mmalivuruni cihu. Mphwinko woothotokanihiya wa Yehova unaanivaha ikaruma cinci comaana cinnikavihera. Ciicammo, mmananihe ucuwela citthu caakhumelenle ihinaaya wiirannya awula inavinre itthu insomeenyu. Mwaavye waacuwela atthu ni mapuro anromoliya mphantte unsomeenyu. Nlikanihe itthu insomeenyu ni mananna cinttonkiyaaya nvangeeliyuni cikhwaawe. Imaara ikiina, ntthu antikhile ivangeeliyu imoca, naahimyaka itthu yomaana ihantikhiye nvangeeliyuni ikiina.
14-15. Isiyani inlamuliyeenyu upanka wiira mweettele citthu cineetthuceenyu nvangeeliyuni?
14 Yonayeeli, mweettele itthu insomeenyu nvangeeliyuni. (Joau 13:17) Nnamalihileene usoma mphantte wovangeeliyu insomeenyu, mwiikohe co: ‘Ihaawo itthu ineetthucaka nhina ula mphantte wovangeeliyuula inlamuliyaaka weettela muukumini waka? Kinhala unkavihera cani ntthu kivarelaka nteko ula mphanttyoola?’ Mmuupuwele ntthu noncuweleenyu. Vano, moonaka ukati unreeranaaya, munttonkele itthu yiitthucileenyu, mmuulumanaka sana-saana ni nthoonyeraka nifento.
15 Nttwee noopele mwaha ntakihero nimoca ninniitthuciha mananna oohala uvarela nteko nnya citthu piilinnya. Nimpheela usoma ihantisi ya nthiyana nankhweli ni oothwennya Yesu aamonnyaawe ntempulu.
NTHIYANA NANKHWELI NI OOTHWENNYA NARI UTEMPULU
16. Nttonkace itthu yaakhumelenle yantikhiye nhina Markus 12:41.
16 Ncivihace iyo ihantisiiyo. (Nsome Markus 12:41. *) Mmananihe wuupuwela itthu yaakhumelenle. Naari nihuku 11 mweeri wo Nisã, mwaakha wo 33, ni yaahala mahuku vakaani wiira Yesu eeviye. Nne nihukunne, Yesu ahoviriha ukati mwinci eetthucihaka utempulu. Ahooleli ottiini yahonlupattha cinene ni akiina yaanankohakoha tipani anvahacenre nteko waavaraawe. Atthu akiina yahonkohakoha citthu coorika wiira ansankihace. (Mark. 11:27-33; 12:13-34) Vano Yesu ahorwaa nipuro nikiina ntempulu mommo. Nipuro naaryaawe, aanaakhitiri woona ikoofiri co nsurukhu. Uyo atthunaka aari nipuro neehaniya Ipuwa ya Athiyana. Yesu ahonkoma ni ahancera waaweha atthu otheene yaahela micanko. Yesu ahowoona mathaciri yahelaka nsurukhu mwinci mmakoofirini. Atthunaka uyo ahaattamela cinene, mpaka ankhitiri wiiwa nsurukhu waamorela mmakoofirini.
17. Isiyani yaapankilyaawe nthiyana himiye nhina Markus 12:42?
17 Nsome Markus 12:42. * Woohipica, Yesu ahomoona nthiyana mmoca “nankhweli ni oothwennya.”(Luka 21:2) Makhalelwaawe ule nthiyanoole yaari oorika ni atthunaka uyo khaakhalana nsurukhu wootosera wiira eelihere. Hataa ukhalaka commo, uyo ahorwaa wakoofirini imoceeyo ni ahohela misurukhu miili cooyevaca woohooniya naatthu enci. Nnyo misurukhunnyo caari cooyevaca cinene, mpaka caanooceela uruma ukati waattikhenlyaawe nkoofirini. Yesu ahocuwela nsurukhu waahenlyaawe nkoofirini ule nthiyanoole—caari misurukhu miili ceehaniya lépton ni ule ukatyuule, nnyo misurukhunnyo phaaverihenle uyevaca. Misurukhu caahenlyaawe khacaarina ifayita cinene, phimaana khacaaphiyera wiira ntthu anthume mpeleele mmoca, yaahookhalaru asinuni oohirikihiya ule ukatyuule.
18. Toko cihimiyaaya nhina Markus 12:43, 44, isiyani Yesu yuulumilyaawe aacaka ncanko wa nthiyana nankhweli?
18 Nsome Markus 12:43, 44. * Yesu ahokhala ootikhinihiya umoona wawe ule nthiyanoole. Uyo ahowiihana attharyaawe, ahonthoonya ule nthiyanoole ni aheera: “Nsurukhu uhenlyaawe ula nthiyana mmasikhinnyuula, ukhanle mwinci uvikana uhenlyaaya mmakoofirini akiinaayo.” Vano, Yesu ahohimya kontha isiyani: “Kontha otheene ayo [venci-venci mathaciryaayo] ahenle nsurukhu waahalannyaaya, masi ula nthiyanoola, hataa hikhalanaka itthu, henle yotheene yaarinaawe yaahala unkavihera muukumini wawe.” Ule nankhweli ookhuluvelyoole uhela wawe ntempulu misurukhu cotheene caarinaawe, uyo ahokhuluvela wiira Yehova aanaahala unwacera.—Isaa. 26:3.
Toko Yesu, mwaattottopele mayamunna nlattu wo wiikurumica waya upanka yotheene inkhitiryaaya wiira answalele Yehova (Nwehe iparaagarafu 19-20) *
19. Itthu Yesu yuulumilyaawe amwaacaka nthiyana nankhweli, inniitthuciha isiyani?
19 Mweettele muukumini winyu iyo ihantisiiyo. Mwiikohe co: ‘Isiyani inkiittucihaaya itthu Yesu yuulumilyaawe amwaacaka ule nthiyana oohuvoole?’ Mweemele ni mmuupuwele vakaani ule nthiyanoole. Unawoonannya wiira ule nthiyanoole aanaapheelaka nanvahile Yehova itthu yuulupale. Hataa ukhalaka commo, uyo ahopanka yaakhitinryaawe. Uyo ahonvaha Yehova itthu yomaana yaarinaawe. Ni Yesu ancuwela wiira Yehova ahoonela ukhalana ifayita itthu yaavahilyaawe ule nthiyanoole. Ihaawo itthu yuulupale ineetthuceehu va: Yehova naakhala ootteeliya nanvahaka itthu inkhitiriihu—nteko unonvareleehu niiroohweehu yotheene ni ninrimeehu wotheene. (Mat. 22:37; Akol. 3:23) Yehova naakhala ootteeliya anoonaka nipankaka yotheene inkhitiriihu! Iyo ciicammo inaaca wiikurumica wihu ni ukati unviriheehu wiira nilalyeere ni wiira nirwee umikutthaanoni.
20. Nnohala weettela cani muukumini winyu itthu inwiitthucihaayani ihantisi ya nthiyana nankhweli? Ntakihere.
20 Nnohala weettela cani muukumini winyu ihantisi ya nthiyana nankhweli? Nwuupuwele mayamunna anaacuweleenyu. Atthunaka akiina anaakhala oovololaca nlattu wo wuupuwela wiira khaanonvarela nteko cinene Yehova. Wootakihera, pooti ukhalaka wiira nyuuva nnawaacuwela arokorihu owuuluvala anweryaaciya ni ahinkhitiri uvara cinene nteko woolalyeera toko caavaraaya khalayi. Nlattu wo iyo, ayo anaariipiya nrima ni khaaniicoona ukhalana ifayita. Awula, atthunaka nyuuva nnaamuupuwela munneehu inonwerya iretta yuulupale ni yoowerya cinene. Uyo munnooyo naakhala oovololaca nlattu woohikhitiri urwaa umikutthaanoni cotheene. Isiyani inlamuliyeenyu upanka? Nwuulumele ayo mayamunnaayo “moolumo oolipiha.” (Efesu 4:29) Mwaahimerye citthu comaana cineetthuceehu nhina ihantisi ya nthiyana nankhweli ni oohuva. Ala manannaala, nyuuva nnaahala waakavihera ayo mayamunnaayo ukupaleela wiira Yehova naakhala ootteeliya neekurumicaka upanka inkhitiriihu, hataa noonaka wiira itthu impankeehu ikhanle yankaani. (Miru. 15:23; 1 Atesal. 5:11) Mwaattottopelaka mayamunna nlattu wo wiikurumica waya uvara miteko ca Yehova, nyuuva nnohala uthoonyera wiira nnaatthara meettelo a Yesu.
21. Isiyani ilakenleenyu upanka?
21 Ninaasukhuru venci nlattu ivangeeliyu woonittonkacera ratta ihantisi yo makhalelo a Yesu. Ivangeeliyu cinaanikavihera untakiha Yesu ni utthara sana-saana meettelwaawe. Nnoonela cani wiitthaalela usoma ivangeeliyu ukati woosoma veekha awula wuuswalini waamuci? Nhiliyale, wiira mphwanyere ifayita cinene ukati woosoma ivangeeliyu, nhaana ncivihacaka itthu insomeenyu ni weettela muukumini winyu citthu cineetthuceenyu. Masi khawantosa paasi utakiha itthu ipankilyaawe Yesu. Nihaana ciicammo niviriyanaka itthu yuulumilyaawe. Nhina mwaha nkiina unhaleehu usoma, ninaahala woona isiyani inniitthucihaaya moolumo a Yesu hinaaya ukhwa.
NCIPO 15 Louva o Filho de Jeová!
^ par. 5 Makristau eekhweeli ahaana yattharaka sana-saana ntakihero na Yesu. Ntakiheroni nihiilyaawe Yesu wiira nitthare? Ula mwahoola unaahala waakhula nna nikohonna. Ciicammo, ninaahala woopela mwaha kontha isiyani ninlamuliyeehu utthara ntakihero na Yesu ni manannani cinhaleehu utthara.
^ par. 10 Joau 17:3 Wiira ayo aphwanye ukumi woohimala, ahaana yuucuwelakani nyuuva, nkhanle Nluku eekhweeli, ni ahaana yancuwelaka Yesu Kristu, ule munveleelihileenyu.
^ par. 16 Markus 12:41 Yesu ahonkoma wakhiviru ikoofiri caaheliya nsurukhu, ni ahokela waaweha atthu yahelaka nsurukhu mmakoofirini. Mathaciri enci yaahela nsurukhu mwinci.
^ par. 17 Markus 12:42 Vano ahowa nthiyana mmoca nankhweli mmasikhini ni ahohela misurukhu miili cooyevaca ni coohifayita cinene.
^ par. 18 Markus 12:43 Vano Yesu ahowiihana attharyaawe ni ahowiirela: “Kinoohimeeryani ikhweeli: Nsurukhu uhenlyaawe ula nthiyana mmasikhinnyuula, ukhanle mwinci uvikana uhenlyaaya mmakoofirini akiinaayo. 44 Kontha otheene ayo ahenle nsurukhu waahalannyaaya, masi ula nthiyanoola, hataa hikhalanaka itthu, henle yotheene yaarinaawe yaahala unkavihera muukumini wawe.
^ par. 64 ILATARATO Ipaagina: Nrokorihu nawuupuwela itthu Yesu yuulumilyaawe amwaacaka nthiyana nankhweli ni oohuva. Wahoolo, uyo nawaattottopela arokorihu owuuluvala nlattu wo wiikurumica upanka inkhitiryaaya wiira answalele Yehova.
