Inatiri 4. Uhinfentaniya

“Atthu anhala ukhala . . . oohaafenta amucyaaya.”​—2 TIMOTIYU 3:1-3, Ibiiblya Nova Versão Internacional.

● Chris naapanka mphantte wo ikhurupu inaakavihera atthu antulumwiya watthokoni, iyo ikhurupwiiyo impwanyannya uhittu waya ilapo yo Gales. “Kinawuupuwela wiira ikwaha imoca ahotoko unaavya athiyana amoca. Ayo yaahowaattakaciya ni urakalihaciya cinene mpaka akaakhitinri waacuwelela, uhookhalaru wiira kaahotoko uwoona,” nohimya Chris. “Athiyana akiina yawiirannyeelaka itthu toko iyo ankhala niihaaya cinene mpaka khankhitiri wuuwehanana.”

CITTHU CINKHUMELELA CINTHONYERA ISIYANI? Ilapo imoca yo África, iriyari yaathiyani araru naakhumelela nthiyani mmoca tokile upankiya citthu cosece nari mwaana. Anamasoma aneera wiira alophwana 33% o iyo ilapweeyo yoona ukhala itthu yoohitakhala uwaattakaca asaaraya. Masi khahi athiyana paasi phintulumwiya watthokoni. Wootakihera: Ilapo yo u Canadá, iriyari yaalopwana 10 anaakhumelela alopwana araru atokile waattakaciya awula upankiya itthu ikhwaawe yoohinamaana naasaaraya.

ISIYANI ATTHU ENCI INEERAAYA? Ikhumelo yokhalayi atthu anaatulumwana watthokoni. Masi mahukwaala uyo mwahooyo unaatepa wuulumiya mmahaparini uvikana khalayi.

NIIREKE IYO IKHANLE IKHWEELI? Khweeliini mahukwaala mmahaparini unawuulumiya cinene utulumwanaciya mmatthokoni. Niireke iyo itthwiiyo ineera ivukulaka utulumwanaciya watthokoni? Mena. Mahukwaala atthu oohaafenta akhunanaya uhiya uvukuwa anawiira winciva.

NYUUVA NNOONELA CANI? Moolumo ahimiye nhina 2 Timotiyu 3:1-3 aneera yeerannyaaka? Nnaakupaleela wiira mahukwaala atthu enci khaanaafenta awanuwaya awula amwaaraya, uhookhalaru wiira iyo phiitthu yaalamuliyaaya upanka?

Inatiri yoneethanu ineerannya mahukwaala invaranaca niitthokweehu, itthaya. Moone itthu inhimyaaya Ibiiblya nhina uyo mwahooyo.

[Moolumo o wapaaginani ootepa woonannya 7]

“Utulumwanaciya watthokoni ikhanle ikhirini impankiya ni inrikarika uhimyaciya mahukwaala. Nthiyana nohimyaca upolisiya utulumwaciya naawanuwawe naattakaciyeene ikhwaha 35.”​—NRUMINYA OMPHWINKO UNTAFITI MYAHA COOTULUMWANACIYA WATTHOKONI WO ILAPO YO GALES.