Inatiri 6. Ulaleeya Ntuninyani Motheene
Inatiri 6. Ulaleeya Ntuninyani Motheene
“Ni nnya ihapari comaana co Wuumweneni nnya cinaahala ulalennya ntuninyani motheene munkhaliya.”—MATEWUS 24:14.
● Vaiatea, nokhala iciviri imoca yo Tuamutu, ilapo yo Pacífico. Uhookhalaru wiira u Tuamutu ncoko cimwareenle iciviri awula ikicirwa 80 cankaani, ni walikaciyaka unaapwaha 800 mil quilômetros quadrado, arivo atthu 16.000 paasi. Hataa ukhalaka commo, Vaiatea ni atthu awaattamanannyaawe, anaathotolaciyaka ni Masaahiti a Yehova. Kontha isiyani? Kontha ayo ampheela waalalyeera atthu otheene ihapari comaana co Umwene wa Nluku, hataa yakhalaka nipuroni.
CITTHU CINKHUMELELA CINTHOONYERA ISIYANI? Ihapari co Umwene wa Nluku cineera cilaleeyaka ntuninyani motheene. Mwaakha wo 2010 paasi, Masaahiti a Yehova ahoviriha iwoora cinvikana ibiliyau 1,6 yalalyeeraka ihapari comaana ilapo 236. Iyo maanaaya wiira khula namalalyeera, nihuku nomoca anviriha iminutu 30 alalyeeraka. Myaakha 10 civinre, Masaahiti a Yehova yahopanka ni yahokawa ilivuru cinvikana ibiliyau 20, wiira yiittucihere Ibiiblya.
ISIYANI ATTHU ENCI INEERAAYA? Ikhumelo yo khalayi moolumo a Nluku anaalalyeeya.
NIIREKE IYO IKHANLE IKHWEELI? Khweeliini, ahaavo yaatokile ulalyeera moolumo a Nluku. Masi encyaayo yaalalyenre ukati vakani ni mapuro vakaani. Masi Masaahiti a Yehova ari niikampaanya yoolalyeera ntuninyani motheene, ni iyo ineera yaakavihera atthu imiliyau cene. Ayo khanhiyerera uvara ntekwaaya woolalyeera hataa yalupatthiyaka ikhumelo yokhalayi naatthu ookhalana ukhulupale ni mipwinko coohoonela ikiriri. * (Markus 13:13) Uhiya commo, Masaahiti a Yehova khanliviya wiira alalyeere. Ayo anaavarela nteko ukatyaaya wiira alalyee ni anaakawa ilivuru caya woohiliviha itthu. Nteko unvaraaya unkaviheriya nincanko woohikhanyererihaniya.
NYUUVA NNOONELA CANI? “Ihapari comaana co Umwene” cineera cilaleeyaka ntuninyani motheene? Niireke wiirannya wo ila inatiriila unthoonyera wiira citthu comaana cikhuluvelihilyaawe Nluku cinaahala wiirannya woohipica?
[Niwehero no vathi]
^ par. 6 Mwapheela wiitthuca-tho, moone ividiyu: “Fiéis sob Provas,” “Triângulos Roxos” ni “As Testemunhas de Jeová Resistem ao Ataque Nazista.” Cikumiheriye ni Masaahiti a Yehova.
[Moolumo o wapaaginani ootepa woonannya 9]
“Nimwanrihaka Yehova weemeseriha nteko woolalyeera, khaninhala uhiyerera wiikurumica ulalyeera ihapari comaana, nivarelaka nteko khula inanna wiira naalalyeere atthu otheene”—ANUÁRIO DAS TESTEMUNHAS DE JEOVÁ DE 2010.