Mweeri wo Setembro, ninaahala wiikurumica woopela mwaha venci-venci Umwene wa Nluku, wiira phinhala umalamaliha uhuva waapinaatamu. (Mat. 24:14) Vano nyuuva nnohala ukavihera cani? Mwaahimerye Umwene wa Nluku atthu otheene nnohaleenyu ukhitiri uwuulumana, nvarelaka nteko Nuulumo na Nluku Ibiiblya. Ntthuuyo ooniheraka upheela wiitthuca-tho, munvahe irevista Ukhalenla N.^o 2 yo 2020. Vano, nhihiyerere unthotola mpaka wankupalyaawe usomihiya Ibiiblya nvarelaka nteko ilivuru Mphwanye Utteeliya Uhimmala!. Atthu otheene anlakela uvara nteko weepiyoneeru ookavihera mweeri wo Setembro, pooti uthanla ulalyeera mpaka iwoora 15 awula 30.

Woohipica Umwene wa Nluku unaahala umalamaliha ikuvernu cotheene cihimmwiiwelela. (Dan. 2:44; 1 Akor. 15:24, 25) Phimaana, niikurumice woonihera ukhuluvela wihu Umwene wa Nluku nenna co uhinaphiya uyo ukatyuuyo!